الخميس، 21 يونيو 2012

انقراض الجين الرجولي



قبل ما ابدأ كلام عايزه اقول لشمس البلوجر الجميله شكرا عشان هى كلمتنى النهارده وادتني كلمتين فى العضم عشان سايبه مدونتي العنكبوت ماليها ونبهتنى لشهر التدوين اليومي وعليه هحاول كل يوم اجي اصدعكم هنا J

يلا نرغي  ومش فى السياسه احسن جالي هس هس من السياسه

برغم من ان العنوان عن الجين الرجولي انما بكل صراحه وحياديه الجين الانوثي كمان بعافيه بس هانبدأ بالرجولي ونوضبوهم الاول لان موقفهم اهمممممم

انا ملاحظه كده والله اعلم ان فى انقراض للجين الرجولي .. ايون بيختفوا .. وبيحل محله جين تاني من الجبن والاستنطاع .. ايوووون استنطاع

طيب كل واحد  وواحده هنا وبجد وبحق وحقيقى يقولي يعرف كان نطع قاعد فى بيتهم مش بيشتغل ومستنى امه ولا اخته ولا مراته تصرف عليه .. بكل امانه عدوهم وقلولي
انا عن نفسي اعرف كتير ....
 بس بس بس عارفه البؤين الحمضانين الى هايتقالوا: مافيش شغل   البلد بايظه البتنجان مخلل .. حافظه هذه الاسطوانه من فضلكم

هاديلكم مثال لطيف
واحد اتخرج بالعافيه بعد ما كفر اهله دروس وسقوط وبلاوي وبعدين لما اتخرج امه وابوه جابوله ميت شغلانه فى قطاع خاص مافيش فايده مش راضي ولما يروح ما يكملش كام يوم ويسيبها وبرنامجه اليومي بين الكافيه والنت والصرمحه فى الشوارع  وسجايره وموبايله ومواصلاته وصياعته مدفوعين مقدما
امه غلبت فيه راحت باعت دهبها واستلفت من طوب الارض وجابتله فيزا السعوديه وسافر قعد هناك ست شهور غير 3 شغلانات وبعدين امه لمتله فلوس تذظرة العوده ورجع
رجع  بالعافيه وبمجهودات الاهل والمعارف اشتغل فى شركه قطاع خاص بس كبيره واستقر فيها اخيراااا واول لما اشتغل راح يعيط لامه عشان عايز يتجووووز البنت الى حبها
واهله جابوله شبكه وشقه و ونص عفش وحماه النص التاني  وهو تقريبا حوش فى الليله دي بتاع الفين جنيه .. واتجوز صلاة النبى الحمد لله بس لواحده بقى
مراته بتشتغل .. سنه اثنين  الشركه استغنت عنه .. اه عادي قطاع خاص زي باقي الناس يعنى .. وبدأت رحلة البحث عن عمل ... اناااا اشتغل بياع فى محل ؟؟ّ اناااا اشتغل مندوب ؟؟؟؟ اناااااااا اشتغل محصل ؟؟؟!!  الحقيقه كان المفروض بقى اناااا اشتغل ؟؟ واسيب الانتخه لمييييين
وتمر الشهور والسنه الاولى والتانيه والثالثه ومش عارفين هايكمل لحد امته ... وهو ما بين مانتخ فى البيت او حد يجيبله شغل يكون شيك كده وحلو ويشتغل فيه شهرين  بالكتير ويقعد تاااااااااااني
واكل نايم شارب هو وعياله من عرق مراته او من ادين اهله مثلا ... وهو يعيش فى عالم الانتخه ويبرر لنفسه
البلد واقفه ... البطاله ... الحكومه بنت كلب.... الثوار خربوا البلد... العيشه زفت ....  ما حدش مقدر مهارااااااتي
القطاع الخاص مستغل...البتنجاااان مخلل

انا عن نفسي اعرف من العينه دي بتاع ثلاثه اربعه ... اه والله العظيم على اختلاف ظروفهم واعمارهم  ومراحل الانتخه الى وصلوا لها

  • ما حدش يقولي مافيش شغل ... انزل يا حبيبى دور على شغل ما تنامش زي خيبتها فى البيت ومستنى الشغل يجيلك لحد عندك
  • ما تتأمرش على الشغل وتتعالى عليه اتوكس على خيبتك انت حمار اصلا لو كان فيك خير ما كان رماك الطير .. اشتغل اي حاجه وخد اي مرتب احسن ما تقعد فى البيت عاله على المجتمع
  • ما تقولش انا عايزه اشتغل بشهادتي ... شهادتك دي ياعم الامور تبلها وتشرب ميتها.. احنا عندنا ولله الحمد تسعين فى الميه من الكليات ومرتاديها مطلعين ما شاء الله شوية تحف ما بيعرفوش يقروا  اصلا

بياخدوا درس يدوبلهم شوية كلام فى الكوبايه يشربوه ويروحوا الامتحان يرجعوه على الورقه ويطلعوا حمير كما دخلوا

قوم اشتغل يا نطع منك له ما تعيش عاله على المجتمع لو ما لقيتش خاااالص حاجه تشتغلها ولو ان ده مش ممكن روح اتطوع فى اي حاجه خيريه بشكل رسمي
اولا تذكي عن صحتك..... ثانيا تعمل خدمه للمجتمع بدل ما تعيش عاله عليه .....ثالثا هاتتعلم اي حاجه تنفعك بعد كده ....رابعا هاتحطها فى السيره الذاتيه بتاعتك الى فاضيه يكاد يكون مافيش فيها غير شهادة الميلاد بتاعتك يا فالح

على فكره الكلام ده موجه ايضا لطلبة الثانوي والجامعه الى بيقضوا فترة الاجازه يتلطعوا من كافيه لكافيه ومن نادي للتاني .. لا يا بابا اشغل انت طول الباب وعفيتك ما شاء الله مفروض فى سنك ده تشد عربيه نقل ..اشتغل بدل ما تقعد تتفرج على المزز وتظبط مزز وتعاكس مزز وتتمحور حياتك كلها حول عدد المزز الى فى الكون

والبنااااااات ... ما تستهبلووووش ما تعشيش عاله على المجتمع.. اشتغلي فى البيت بدل مامتك ... اخدمي نفسك واتعلمي تبقى ست بيت محترمه وريحى مامتك وخدي ثواب.. واتطوعي فى الجمعيات الخيريه ... وعلى فكره حتى لو كنتى بتشتغلي اصلاااا لازم برضه تساعدي مامتك ما تبقيش عايشه فى البيت طيشه عايزه حد يخدمك شاركي فى البيت الى انتى عايشه فيه

اشتغلواااااااااااا... العمل عبااااده ... الشغل هايعمل منك بنى ادم ... مش لاقي شغل دووووووووووور ما تقعدش فى البيت لف على كعوبك لحد ما تلاقي شغل مش تنام وتانتخ وعايز الشغل يجى يدور عليك وتتأمر عليه
اعزائي الاهالي .. طلعوا ولادكم بنى ادمين  طلعوهم رجاله وستات تفتح بيوت مش تخرب بيوت
طلعوهم افراد منتجين مفيدين لنفسهم ولاسرهم ومجتمعهم
الشغل مش بيتعب  الشغل بيطلع رجااااااااااااااله
الدلع والراحه بتفسد اكتر ما تعالج
الحزم والشد احيانا هم منتهى الحب ... مش قسوه ابدااااا
اتقوا الله فيما حملتم من امانات

هناك 15 تعليقًا:

غير معرف يقول...

حبيبة قلبي
بصي يا ست الكل
أقولك على ستوتة حلوة أعرفها، بتقولي لو الإخوان مسكوا البلد و قعدوا الستات في البيوت..مين اللي هيصرف ع البيت إن شاء الله ياأختي ؟!!!

من وجهة نظرها بما أن الطبيعي أن الراجل نطع! يبقى هي اللي بتصرف، في بيئتها الست اللي بتصرف و الراجل ارزقي عايش على قفا المدام،و لو اتأخرت عن البيت في شغلها يمسح بيها البلاط.
انت بتحكي على قصة كوميدية و الله، أنا اعرف اللي كان يطلب الشاي من مراته عشان يدلقه على وشها بس مش اكتر..و الست بتشتغل في البيوت و ده باااااااااشا ملك زمانه!
خلي الطابق مستور و خلينا نجز على سنانا

و صحيح ايه شهر التدوين اليومي ده؟
بما أني مش من نجوم بلوجر و معرفش اي حد فيه خالص فطبعا معرفش اي حاجة عن اللي بتقوليه

Mahmoud Bahgat يقول...
أزال المؤلف هذا التعليق.
Mahmoud Bahgat يقول...

اولا حمدلله على السلامة و مبروك ترك السياسة (مؤقتا)
اتفق معاك فى انتشار هذه النوعية من الشباب و انا اتعاملت مع بعض منهم فى الشغل مش فى البيت تلاقى الشاب جاى الشغل و مقضيها ساعة فطار و ساعة وضوء و حمام و استعداد للصلاة و ساعة غدا و ساعة استعداد لصلاة العصر و ساعة شاى و ساعة موبايلات اصل فى مشكلة فى البيت
طب جاى تعمل ايه ياعم الحاج و يلبسك فى ميت غلطة نقول بيتعلم بس لحد امتى لحد ما فى الاخر نبتلى بيه غيرنا
المشكلة اللى انا اكتشفتها مش فى الشخص بل فى اهله هم من تركوه لهذه المرحلة من الدلع لو نشفوا عليه من الاول مكنش وصل للدرجة دى
و البنات برده لما بتدلع بتطلع عين جوزها بعدين

shimaa elkholy يقول...

سنكوح شنن ايه الاسم ده ههههههههه

اولا ازاي تقولي انك مش من نجوم البلوجر وانتى هنا فى مدونتي خلاص ما دام انتى هنا تبقى نجمه على طول هههههههه

نورتي المدونه
وشهر التدوين دعتنى له شمس والفكره اننا عايزين نرجع تاني ندون زي زمان فكل فتره بنعمل شهر التدوين اليومي كل يوم نكتب فى البلوك عشان نصحصح بس :)))

وبالنسبه للامثله الى انتى قولتيها انا عارفه منها كتييييييييييير بس انا جبت الحال العادي الى هو منتشر للاسف الايام دي وعشان ما حدش يقولي ده حاله خاصه وبتنجان
وكمان اخترت المثال من الطبقه المتوسطه
عشان احنا فى زمن المسخ يا حبيبتى

shimaa elkholy يقول...

محمد بهجت انت صح وانا متفقه معاك
بس يعنى فرضا اهله دلعوه نسيبه بقى يعيش الهبل ده ؟؟ لا طبعا لازم يصلح نفسه
امال انا كاتبه البوست باكلم مين ؟؟
الاثنين طبعا الاهل والشباب برضه
المجتمع عايز علاج فوري لمشاكل كتيره

ليلى الصباحى.. lolocat يقول...

السلام عليكم

حمد لله على سلامتك حبيبتى وبداية قوية جدا ههههههه

منورة البلوجر غاليتى

وباختصار شديد انا اؤيدك فى رأيك جدا جدا اوى خالص
سعيدة بعودتك وماتغيبى تانى
تحياتى لك

شمس النهار يقول...

ازغررررررررررت

رجعتي ياصبصب اخيرا لبلوجر
تصدقي ماكنش فاضل غير اني اطلبهكم في بيت الطاعة
:))

وحشني رغيك الجميل علي المدونة
والمناقشات الحامية
:))

عارفة الاجابة ايه الام

حنعيش يعنى حنعيش يقول...

ياااااااااه ... فينك ياباشا من زمان

amr fadl يقول...

الي مابيشتغلش يشتغل ويبطل كسل ماشي :) بس ايه علاقة ده بجين الرجولة الي هو يعني جين الذكر ؟

shimaa elkholy يقول...

ليلى الصباحي
متشكره يا حبيبتى ربنا يخليكى النور نورك ونور كل الى شرفوني

shimaa elkholy يقول...

شمس النهار
يا جميل ده نورك والله وانتى الى جبتينى من ايدى كمان ههههههه

انا عارفه انه الاجابه الام ولو انى شايفه ان الاجابه الام والاب

لكن الى اهله ما ربهوش نعمل فيه دلوقتي احنا عندنا جيل كامل كده هانضيع يا شموسه لازم الايام تربيهم

shimaa elkholy يقول...

حنعيش يعنى حنعيش

كنت هربانه :))

shimaa elkholy يقول...

عمرو فضل
جين الرجوله عشان اكتر حته بتجننى هى ان ازاي راجل كده زي الباب ويقعد لمراته ولا امه ولا اخته ياخد منها فلوس وهو قاعد كرشه قدامه مابيتحركش ؟؟

momken يقول...

....

الف حمدالله على السلامه
نورتى بلوجر تانى وربنا يكون فى عون فيسبوك بقى

اعتقد ان جين الرجوله والجدعنه وتحمل المسئوليه هو جين مكتسب وليس موروث ككل الجينات
والامر فى النهايه يعود لتربيه ونشأه
فعندما يتعلم الرجل الفرق ما بين الرجوله والذكوره
وتتعلم المرأه الفرق ما بين كونها امرأه وكونها انثى

وقتها سنجد الشوارع تعج بالرجل
وسيختفى الذكر الذى يغلب عليه طابع الغرور الذكورى البغيض

جميل البوست

تحياتى

...

shimaa elkholy يقول...

ممكن
انا قلت جين رجولي ما قلتش ذكوري عشان انا عارفه الفرق بينه
واعتبرته جين على اساس انه من اساسيات الرجوله ولعلمك الرجوله مش كلها مكتسبه في منها برضه مرتبطه بكون ذكر
وعليه فكل رجل هو ذكر ولكن مش كل ذكر يرقى لمرحلة الرجوله
نورت ومتشكره على الحفاوه :)