الناس ما بيتجوزوش ليه ؟؟؟!!!

سلام عليكم :
عدنا الى الرغي مره اخرى يا حلوين . وحشني الرغي جدا جدا .

فى موضوع اعتقد انه بقى مهم جدا جدا كل الناس اتكلموا فيه . الا وهو ان ما عادش حد بيتجوز !!!! مش بس البنات لا
طبعا بنات وشباب والله قاعدين من غير جواز ولما تسألهم عن الاسباب تلاقيهم قالوا شوية حاجات كده ماسخه مش هى السبب الحقيقى .

فأنا بقى فى قاعده تمحيص وتحليل للموقف وصلت للنتايج الاتيه :

أولا : ان الازمه دي مش سببها الاساسي هو الحاله الاقتصاديه . ليه ؟ لان فى ناس كتير معاها فلوس بالعبيطه وبرضه
قاعدين من غير جواز .

ثانيا : ولا سببها انهم مش عارفين يحبوا ما بيتنيلوا يحبوا من وهما عندهم 18 سنه وبعدين يزهقوا من بعض لما يبقوا فى سن الجواز ويهيموا على وجههم بقى .

طيب يبقى ايه السبب ؟؟؟

انا من وجهة نظري شايفه ان الاسباب مش هي دي خالص ومن منطلق ان انا صاحبة موطن الرغي فانا كل الشعب المصري بيرغي معايا ويفضي عندي بلا بلاش كله نصه عشان الامانه .

بالنسبه للبنات اسمعكم بعض الى لقيته جواهم :

خوف فظيع جدا من الفشل . ايوه اصلا هى مش عارفه تتجوز عشان خايفه تفشل لان على حد تعبيرهم مافيش ضمانات للنجاح .
ده بالنسبه للفئه العمريه ما بين 20 و 35

اما الى اكبر من كده : فهما اساسا ما عادش يهمهم الموضوع وخايفين من التغيير . وعلى حد تعبير احداهم برضه انا لسه هاجيب واحد يتحكم فيا ويصدعني انا كده كويسه وعايشه وباشتغل وما عنديش ولا ساعه فاضيه .

ده غير بقى الى مستنيه انها تتجوز عن حب وتقابل فارس الاحلام الى هايخدها على حصان اخضر . ومش عايزه تتجوز جواز صالونات . وكلام الافلام العربي بتاع محمود يس ده .

وغير كمان المبدأ الى فى ناس بتعمل به وهو : القاعده فى الخزانه ولا الجوازه الندامه .

اما بالنسبه للشباب :

فهو خايف برضه بس مش من الفشل . لا في كتير منهم خصوصا العكاكين خايف ينضرب على قفاه . تحديدا شاف كتير خاينين ومنيلين بنيله ما عندوش ثقه فى حد وبرضه ما عندوش ضمانات .

وطبعا فى ناس مش معاه فلوس بس دول ربنا بيسهلهم ويتجوزوا ولو كبار شويه .


وفى اسباب مشتركه :

ومنها مكتب التنسيق الى فاتحينه للجواز والى خلى كل واحده تقولك انا دكتوره واتجوز محاسب يا للهول .
وطبعا كل نفس تصبوا للاعلى منها من وجهة نظرهم وبالتالي بتحصل دروبات فى الموازين .

من وجة نظري خريجي الجامعات كلهم ناس على مستوى ثقافي واحد مالوش دعوه بالتكافوء الاجتماعي الخاص بالجواز . دى خرافات بس احنا بنروج لها وعاشينها .

وكمان كل واحد سافر بره مثلا عشان يكون نفسه ورجع معاه فلوس بس بقى عنده 35 سنه لما يجى يتجوز بقى عايز يعوض الى فاته قوم يدور على واحده ورور كده عندها 22 سنه ولا حاجه وتتفلق بقى الى عندها 30

ولو الى عندها 30 طبعا سولت لها نفسها انها تتجوز واحد عنده 30 الا شهر يبقى ايامه وايامها سوده .
طب يعنى يعملوا ايه ؟؟!!! يتجوزوا مين ؟؟؟؟

عملت دروب كبير فى تواؤم الاعمار الحكايه دي على فكره مش هزار .

وثالث حاجه هى فكرة الناس عن الجواز يعنى البنات يسمعوا المتزوجات يقولوا الجواز وسنيه وايامه السوده وتفضل تقولها ما تستعجليش على الجواز يا اختي بدري القرف وتجيبى واحد يتحكم فيكى ويقرفك . وعيال يتعبوكي ويقرفوكي وما الى ذلك من سنفونية السخط على الحياه .

وعلى الجانب الاخر تلاقي برضه .بلا جواز بلا قرف هو شهر يا ابنى واحد وبعد كده هاتكره الصنف كله . كبت حريه ورايح فين وجاي منين وهات فلوس وودينى وهاتني وبعد شويه عيال ومصاريف وقطم وسط وخلق تسد النفس عن الحياه .

صوره كئيبه سخيفه مريعه تخلي اي حد عاقل يقول وعلى اييييييييه ما انا قاعد اهو بلا وجع دماغ .

وطبعا طبعا احنا عندنا جيل شباب من الجنسين ولله الحمد ما عندوش اساسا حب للمسؤليه ولا للجد والعمل جيل طالع عشان يرتاح ويأنتخ على حساب الناس
طبعا مش الكل لكن كتير منهم كده للاسف .


ده غير المشكله الام اصلا فى كل حاجه فى حياتنا اننا نسينا كتاب الله وسنة نبيه وبقى عندنا معايير تانيه كتير ماديه واجتماعيه وسطحيه للغايه بنحطها فى المقام الاول من حسابتنا للاسف الشديد .

باختصار يا جماعه الازمه مش ازمة فلوس وامكانيات ماديه فقط احنا عندنا افكار اجتماعيه غلط لازم نصلحها
عندنا اوضاع مذريه .
عندنا مشاكل فى نظري اكبر من كونها مشاكل ماديه وبس .

عرضت المشكله يمكن لما نعرفها نقدر نحط لها حلول ومستنيه اسمع رايكم الى يهمني ا وي

.زينب بنت خزيمه( على الرؤيه)

زينـــب بنـــت خزيمـــه

زوجة الرسول عليه الصلاة والسلام

موضوعي الجديد على مدونتي الاخرى

رؤية اسلامية متواضعة

شرفوني هناك

محسن ومحسنه

المكان : بيت محسن ومحسنه فى ساعة عصاري

محسنه : محسن اصحى بقى انت هاتفضل نايم طول النهار .

محسن : ايه يا محسنه عايزه ايه ما تسبينى انام شويه .

محسنه: لا يلا قوم بقى عشان انا عايزه اروح لماما .

محسن وفاق لها واتعدل لها: نعم ؟؟ ماما ؟؟ اشمعن ؟؟

محسنه : اصل اتصلت عليها فى التليفون النهارده لقيتها تعبانه هاروح اشوفها

محسن : يا سلام يااختي طب ما هو ماما هى كمان تعبانه من امبارح وانتى عارفه اشمعن ما قلتيش نروح هناك

محسنه : الله هو ايه ده ؟؟!!! اولا مامتك مكلماني الصبح وعاطياني كلمتين فى جنابي وما كانتش تعبانه . ثانيا طيب ما تروح لها هو انا قلتلك ما تروحش .

محسن : لا هانروح لماما النهارده ونبقى نروح لمامتك بكره .

محسنه: لانروح لماما الاول ماما تعبانه .

محسن : خلااااااااص مش راحين فى حته خاااااالص .

ويقوم وهو متنرفز ينط من السرير ويغسل وشه ويلبس ويخرج يروح لصحابه وهو بيشتم ويلعن على الجواز وسنينه وحماته والعيشه والى عايشينها .

=================
ايه كان يحصل فى الدنيا لو كان كل واحد راح لوالدته لواحده ؟؟؟

ليه لما مامته كلمته ما راحش هو لمامته وتاني يوم بيحاسب مراته انها ما قالتش تروح لمامته ؟؟؟ّّّ!!

رساله الى كل محسن فى الدنيا :

من فضلك انت عليك تبر امك وهى عليها تبر امها

ما حدش مفروض عليه بر ام حد تاني

لكن طبعا لا تنسوا الفضل بينكم

الفضل يعنى مش عافيه لا بالمحبه والحسنى

ومحسنه كمان غلطانه كان ممكن تقوله نروح لمامتك وبعدين نطلع على ماما مثلاااااا وتبقى ا تحلت المشكله لكن برضه الحق احق ان يتبع والاستهبال وحش .

وكمان كان ممكن لما عرفت ان مامته تعبانه تقوله روح زور مامتك من باب انها تحضه على بر امه وكان ممكن برضه تروح تزورها .

المهم نصفي النوايااااااااااا من الجميع

تحياتي لكم

العيد فرحه

كل سنه وانتم طيبين يا مدونين ومدونات وكل الناس وربنا يجعله عيد سعيد وخير عليكم كلكم يارب

بكره العيد يا جماعه يعنى العيد فرحه مش فرخه وفته ولحمه .

بجد افرحوا وفرحوا كل الى حواليكم . والىمخاصم حد يصالحه فرصه ان فى عيد .خلوه سبب للخير كده والصلح
وعيدوا وانتم فرحانين بالعيد وباهاليكم واصحابكم .

والى مزعل مراته ولا مراته مزعلاه حتى ولا مزعله جوزها ولا غيره ياريت تعيدوا وبعدين تكملوا خناق وزعل مافيش
مشكله بس عيدوا وافرحوا بالعيد .


والى ناوي يعمل خير يلا بسرعه قبل ما تعدي ايام الخير وتكون سبب فرحة اي بنى ادم فى العيد ده .

والى عايز بالونات يجى ياخد من عندي ياااااالا انشاله ما حد حوش . ولو ان مريم قاعده ورايا اهو تنفخ البالونات ومش عاجباها وبتقولي دى صينى واي كلام .

كل سنه وانتم طيبين وبالف خير وسعاده وربنا يعيد عليكم الايام الحلوه وانتم بصحه وهنا يارب

رمـــضـــــان

نورونــي فى مدونتـي

رؤيــه اسلاميـــة متواضعــة

وشوفـوا موضـوعــي

رمضـــــــــان

القرش الحرام ما بينفعش يا بوي

سلام عليكم

ازيكم يا قوم طبعا على ما خلصت الكحك كنتم انتم افتكرتم ان الكمبيوتر بتاعي فرقع فى وشي . لا انا لسه عايشه ولله الحمد. وكل سنه وانتم طيبين .

بصراحه مش محدده انا هارغي عن ايه . انتم عارفين احنا فى رمضان ومش عايزين غيبه بقى وكده يعنى بس عادي ممكن نرغي فى موضوع تاني .

مش عارفه انا هاقوم اعمل اصابع زينب تحبوا اقولكم الطريقه . اهو نتكلم فى الاكل بدل ما نجيب سيرة الخلايق .
اه كان فى سؤال قعدت افكر فيه امبارح لما اقولهولكم شاركوني الاجابه .

السؤال : هو الناس الى بتسرق ولا بترتشي ولا اي كلام من ده ازاي بجد بيقولوا ربنا يستر ؟؟؟

أو يعنى بيبقوا متوقعين انهم بعد ما يعملوا كده مثلا عادي بقى الدنيا سايبه وربنا هايسيبهم كده عادي ؟؟
يعنى ده بيبقى عن جهل ولا عن استهبال .

رضا جه من يومين يحكيلى ان مش عارف حد راحله من جهه حكوميه مش فاكره اسمها .
وبدأوا تغليس بقى فيما معناه هاقرفك يا صغنن . وفى النهايه بقى طلبوا بكل بجاحه من رضا انه يعملهم كل واحد شنطه فيها حاجات لعيالهم عشان المدارس . هما كانوا كذا واحد اصلا .

يعنى بدل ما ينزلوا يعملوا شوبنج عشان المدارس قوم يرموا نفسهم على حد من التجار.

طبعا انا لما رضا قالي كالعااااده .
قلتله :وادييييييتهم ليه انت مش ورقك سليم ؟؟؟؟ خلاص ما تسألش عنهم .
لان ده مبدأي فى الحياه ما استسهلش الرشوه ابداااااا .

قوم رضا قالي : يا سلام على النباهه مش انا قلتلك انهم مجموعه . يعني لو اتفقوا عليا يعملولي محضر وممكن يلبسوني بلوى .

قلت اه فعلا عندك حق ما هو قليل الضمير بيبقى مش بس عايز يستفيد لا ده كمان بيبقى ما بين انه عايز يثبت لنفسه انه فوق الجميع وايده طايله وكمان ساعات باحس انهم بيأذوا الى يلاقوه نضيف زي ما يكون بيفكرهم بحقارتهم .

السؤال بقى الى دار فى دماغي ساعتها . هو الشخص ده الى جه سرق حاجات لابنه عشان يروح بها المدرسه .

مش خايف على ابنه كده ان عربيه تهفه وهو ماشي فى الشارع وشايل شنطه فلوسها حرام ؟؟؟

او بلاش كده . يوم لما ابنه يجي يمتحن هايرفع ايده لربنا ويقول ربنا يوفقك يا ابنى ازاي ؟؟؟

بلاش كده ولا كده . نجح الواد مش خايف جزاء لما فعل هو ابنه ده يدفع الثمن انه مثلا يتلم على صاحب سوء ويبوظه

ويخسر ابنه الى هو سرق عشانه ؟؟؟

نفس السؤال برضه دار فى دماغي وانا باتفرج على مسلسل قلب ميت اصل هو ده الى بالحق اتفرج عليه ساعة السحور

من اول المسلسل وانا مستنياهم يقولوا كلمه واحده ولسه عندي امل يقولوها . ان كل الى حصل للعيله دي ان دخل بيتهم فلوس حرام .

لكن لا ما حدش بيجيب سيرة الموضوع . ومصورين البطل على انه بريء جدا . مع انه الحقيقه انه صايع وبتاع قمار وخمرا ونصاب وحرامي .

واول قرش قبضه من النصب اعطى لاخوه منه عشان يروح رحله واخوه مات فى الرحله دي غرقان .

والبطل الى هو شريف منير قال انا الى اديته الفلوس بايدى عشان يروح الرحله .

كان املي فى الحياه ان كاتب السناريو يخلي شريف منير يقول عشان انا اديته فلوس حرام . لكن لا عادي جابوا بس ان الواد حاسس بالذنب عشان اخوه مات فى الرحله .

ما حدش يقولي ايه اهمية الكلمه دي لو اتقالت فى المسلسل . لان للاسفه القاعده العريضه من الشعب بتستمد معلوماتها وثقافتها من المسلسلات والافلام والاعلام بتاعنا . والى القائمين عليه ابعد ما يكون عن الدين والاخلاق اصلا .

شوفتوا بقى ادي اخرة الرغي ادينا غلطنا فى الناس واحنا صايمين يلا بقى كفايه كده عشان نلحق نعمل صوابع زينب
اشوفكم على خير يا كتاكيت

تااااااااج مظبوط وصلحه

السلام عليكم

جاني تاج يا جماعه من استاذنا الغالي ahmed-k صاحب مدونة دردشة بالعربي الف شكر لك يا استاذنا على التاج المتييييين قصدي الجمييييل ده

وطبعا انا لسه شافاه حالا وحيث ان من استاذنا احمد ما اقدرش اتأخر عليه بتاتا البت . رغم انى والله ما شايفه قدامي يعنى انتم وحظكم كل واحد يحافظ على صوابع رجليه ممكن ادوسه .

نبدأ فى التاج بالحلاوه كده :

بدأت تدون من إمتى ؟ ودخلت العالم ده إزاي ؟

بدأت التدوين تقريبا فى يوم 15 /2/2008 .
ودخلت العالم ده بعد نيه دامت يجي كام شهر كده كالعاده انتم عارفين الوقت عندي مشكله . لكن صد نفس عن التدوين والبحث فيه فى الاول بعض المدونات الى كنت باتكعبل فيها فى صفحات السيرش لانى بادعبس كتير اوي .
لكن رجعت فكرت فيه لانى كنت محتاجه مكان اكتب فيه . جربت منتديات كتير وحصلتلي مشاكل كتير وقرفت جدا من المنتديات ومشاكلها .
وفى مره كانوا فى التلفزيون جابوا سيرة التدوين مش فاكره ايه وافتكرت وقلت اروح ادعبس فيه تاني ودعبست وجيت على طووووووووول .



أيه كان إنطباعك في البدايه ؟

أول ما بدأت دعبسه ووصلت لمدونه عن طريق السيرش برضه كانت تقريبا عايزه اتجوز وبعدين بعدها برضه روحت عند فرنسا ومن عند فرنسا عرفتكم كلكم تقريبا .
وكنت كتبت بالفعل كام موضوع . ودعيت فرنسا وغيرها انهم يشرفوني . وكنت هاموت من الفرحه حيث انى لقيت مجتمع مثقف وعاقل ومحترم وصفحات خاصه بيا اكتب فيها وافرغ دماغي عشان ما تفرقعش


من أكثر شخص بتهتم بتعليقه على بوستك الجديد ؟

طبعا اي حد فى الدنيا يعدي من على المدونه بتاعتي ولا من قدام بابها مهم عندي . لكن احب الحد الى يناقشني ويعارضني بعقل وذكاء وعلم مش عن هبل وجهاله طبعا .


ما هو أهم شيئ تعلمته من عالم التدوين ؟

ان كلمات الحق والعقل لابد لها من مكان تنصهر فيه واتمنى انها في يوم تمثل ضمير المجتمع

ما هو أكثر شيئ كرهته في عالم التدوين ؟

انى فى ناس راشقه مناخيرها فى التدوين وهما مش بيقولوا حاجه محترمه .

انا احب اسمع كل ما يعبر عن رايه وعقله ولكن المشكله ان فى ناس ما لهاش راي وما لهاش عقل ما عندهاش الا لسان ملوث بس .

هل تشعر أن التدوين له تأثير؟

اشعر طبعا انه له اثر مهم والا ما كنتش اكون انا فيه . وان شاء الله هايكون له دور اوسع

تهدي التاج ده لمين ؟

اه تهدي التاج لمين يا صبصب وتدبسيه زي ما الاستاذ احمد دبسك ؟؟؟؟!!! هاروح ادور كده يمينا ويسارا واجي

اول واحد احب ادبسه وبشششده هو عبده الرايق

وثاااااااني متدبس يا بشوات جنـــــي

وثالثا المره دي متدبسه وهي خليفتى فى الملاعب ميااااده

ورابعا تقولوا ميييييييين ؟ لقوس قزح وآبي بلانت مدونة بيكيا للبيع

وبس على كده كفايه تدبيس وشكرا يا استاذنا الفاضل احمد ونرجوا ان نكون قد اسعدانكم ويادوب الحق اصحي مريم للمدرسه سلام يا قطاقيط