السبت، 5 أبريل 2008

19- كتاكيت فى مخ الشعب

السلام عليكم
طبعا انتم عارفين الطريق طويل اد ايه على ما اوصلكم بقى ومش هاقولكم انا كام مره على مدى 4 ايام افتح المدونه عشان اكتب بوست جديد ويادوب ارد على حد وما الحقش اعمل اي حاجه تانيه . المهم جينا .

هانرغي النهارده يا حلوين عن الكتاكيت التى تنمو داخل مخ الشعب بخصوص الجواز .
والى انا شايفه انها سبب رئيسي ان ما كان اوحد فى المأساه الى موجوده من تأخر سن الزواج فى البنات والشباب كمان .
نعملها نقط كده عشان نركز فى كل كتكوت على حده :

أولا : أكتر كتكوت فارسني فى حياتي هو كتكوت مكتب تنسيق الزواج . اه انتم ما تعرفوش ؟؟ مكتب التنسيق الى هو بتاع الكليات ده . اه احنا بقى عندنا مبدأ لا يبدل ولا يتغير بن الدكتور لازم يتجوز دكتوره او صيدلانيه علىالاقل . والدكتوره لو اتجوزت محامي تبقى استعجلت واتنازلت واتهبلت .
التكافوء مطلوب والقرب فى التفكير مطلوب . بس ايه الفرق الاجتماعي والثقافي بالفعل بين المهندس والمحاسب والدكتور والمحامي والمدرس ......... ايه الفرررررررررق ؟؟؟
يبقى الراجل متقدم وهو عريس زي الفل كده ويتلككوا له على اي حاجه (ده لو ماكانش رفض صريح له ) وتلاقي بعد تعديد الاسباب الواهيه للرفض امها تقولك : امال لو كان مهندس بقى ولا دكتور كان عمل ايه . ليييييييييييييييييه ؟؟؟؟!!!؟؟؟؟

ثانيا : ان الشاب من دول بعد ما يكون نفسه (يعنى يبقى عنده مثلا 35 سنه ) يجى يتجوز طبعا المفروض لما يطلب عروسه اشوفه واحده يعنى مثلا 27 سنه .الاقي واحد بكل بجاحه يقولي لا اكتر من 25 سنه تبقى خنشرت بقى . مش عارفه هو طيب يبقى جراله ايه ؟؟؟
والله العظيم الستات لها عمر افتراضي والرجاله برضه لهم عمر افتراضي ده احتى احنا اتوكسنا وكسه بنى يعنى حتى اسألوا بتوع بودرة السراميك كانوا جايبين ال .... سيراميك لمين .
والنتيجه للموضوع ده ان الى عنده 35 سنه بيتجوز واحده عندها 22 سنه والى عندها 30 سنه ما تلاقيش حد على مقاسها .ومع تكرار الوضع بيحصل دروب
واوعى حد يقولي ان الى عندها 30 سنه ممكن تتجوز واحد عنده 27 سنه لان دي جريمه دوليه فى المجتمع بتاعنا . رغم انى مش باحبذها لكن هى مش جريمه برضه .

ثالثا :لازم عشان البنت تتجوز ابوها يشحت ويتدين ويجيب فوق طاقته ويقف العريس المصون ويتبجح وتأمر ويقول ما جبتوش وما جبتوش مع ان الشرع بيقول ان العروسه ما تجيبش حاجه خالص لا وانت تديها المهر الى ترضاه كماااااان .
ولازم عشان اي اثنين يتجوزوا يبدأوا حياته كاثنين بشقه مؤهله لعيش اسره كامله من 6 افراد مثلا . وباصرار من الطرفين مش عارفه ليه امال هايعملوا ايه باقي حياتهم ؟؟؟

رابعا : كتكوت كبير اوي اوي بيتنطط فى عقول البشر اسمه الجواز عن حب والجواز التقليدى ده عايزه بوست لوحده خليه على جنب .

خامسا : كتكوت طماااااع ساكن فى العقول بيقول انك مش لازم ابدا تتنازل عن اي حاجه لازم الى اتجوزه او اتجوزها تكون فيها كل حااااااجه حلمت بها فى الدنيا من اول ما اتولدت ومن اول هند رستم لحد هيفا وهبي مالناش دعوه هو كده بقى .
وتلاقي كل واحد يقول ليه هو انا ناقصنى ايه عشان اخد حاجه نص لبه ؟؟؟

سادسا : طبعا ده كتكوت عايز اعدام الى بيقول ان الراجل من حقه يعك على كيفه والبنت لا . وان الراجل ما يعبوش الى جيبه والست يعيبها ملوخية الجيران الى طشتها وحشه . وده اصلا خلق عدم ثقه في نفوس الكل وقرف مالوش حد .

سابعا : كتكوت عايز الحرق فى ميدان عام وهو ان احنا بنقلد بعض ونبص لبعض ولازم ابنى يعمل فرح احسن من فرح البت الى كان اتقدم لها وهى رفضته . وبنتى لازم يكون بيتها احسن من بيت بنت سلفتي الى عامله نفسها بتاعه علينا .
ونفضل فى صراع وهبل مالوش اي علاقه بمصلحتنا الحقيقه وهى انشاء وبناء بيت واسره سعيده لنا أو لاولادنا .

ثامنا : كتكوت الرسم والاصطناع . يا ابويا على كده تلاقي البنت بتترسم والولد بيترسم واهاليهم بيترسموا على بعض وحاجه وكله عمال يبربش ويدي برمجه وحركات غريبه ببؤهم واصوات بتصوصو ـ كتاكيت بقى ـ وبمجرد الدخول فى التفاصيل (القايمه بقى والقاعده والحاجات دي ) اتفرج يا سلام تسقط الاقنعه الاول بتاعة الاهالي والشعر الى كان بيتقال بخ خلاص راح .
بعد الجواز بقى شويه شويه تسقط الاقنعه ويبدا يبان الوش العكر بقى والزعيق والصوت العالي وجمعيه الابواز المشتركه تباااااان وكله يظهر على حقيقته . نص الجوازات بتبوظ قبل ما تبدأ بسبب الرسم وقلة الصراحه من البدايه .
ده لما الاقنعه بتسقط من اول الاتفاق على مبلغ الشبكه .
وكفاااااااااايه كده كتاكيت عشان العشه اتملت والمغرب اذن .
شكراااااااااا
ولو سمحتم اي حد شايف فى كتكوت انا نسيته ياريت يدخله العشه

هناك 26 تعليقًا:

الباحث عن الحقيقة يقول...

احجز الاول ..وارجع اقرأ
اوعى حد ياخد مكانى انا هسيب الاجنده على الدرج اياك حد ييجى مكانى
انتى رجعتى للكتكيت تاني
ههه لما اشوف بقى وارجع ..سلام مؤقت

الباحث عن الحقيقة يقول...

ايه يام مريم
انتى ربنا مسلطك على الكتكيت النهارده ليه؟
لو سمحتى ده رغي فاضح في التدوين العام
انتى فعلا اتكلمتي بصراحة ووضوح عن حالة البؤس اللى اسمها شكليات وحركات الراغبين والمتقدمين وطالبي الزواج
بسى نسيتى كتكوت مهم
هو ان البنت لما بتكبر وتعدى التلاتين بتضطر تقدم تنازلات احيانا عن مواصفات كانت بتطلبها
او حتى تتغاضى عن بعض الشكليات التى لا تتغاضى عنها بنت تانية فى اوائل العشرينات مثلا
هى بتكون متضطره لكده ومدفوعه لذلك نفسيا واجتماعيا
بينما الحقيقة ان الست ست ..ايا كان سنها او عمرها
هى انثى تحمل الرقة والحنان والوداعة ..وخفة الدم .. مفتكرش ان فيه فرق إلا فى اجادة الطبخ بس
علشان كده اللى يتجوز لازم يبص للانسانه اللى ينوى الارتباط بها اولا ..قبل ما يفكر سنها كام
يشوف فيه توافق ولا لا ؟ فيه حب وارتياح ولا لا؟
ده اهم
والتضحية بيه علشان ياخد واحده سنها اصغر شئ هيظهر اثره مستقبلا بعد كده حتى لو كان هيضحى بقدر بسيط من التفاهم ..لكن ده هينغص عليه عيشته بعد كده

فرنسا هانم يقول...

اكتر من 25 سنه تبقى خنشرت ؟؟؟؟؟
على كده بقى انا خنشرت من زماااااااااااااااااااااااان

سلوى يقول...

يا كتاكيتك

فكرتيني بحلقه كانت في برنامج صبايا
وكانت بمناسبه يوم الحب وكنت هعمل عن الحلقه دي بوست
المهم هخلي لك السبق
المزيعه
جابت نمازج جميله جدا

إتنين إرتكبو جريمه وهما لسه مراهقين وقتلوا الأب لأنه مكنش موافق على الزواج
واتحكم عليهم بمؤبد
وبعد حوالي 18 سنه إتجوزوا في السجن
بين المساجين .. كبروا والسجن علم فيهم
ولما المزيعه سألت الرجل .. لما تخرج وتشوف البنات والفيديو كليب عينك مش هتزوغ .. قالها أبدا .. مش هقدر اعوضها
**************
مثال تاني لرجل وإمرأه في الشيخوخه
تعرفوا على بعض في دار للمسنين
بجد أسعدوني جدا
كانوا بيتكلموا كأنهم في العشرين
مقبلين على الحياه وسعداء
كانت الزوجه بتقول .. لما بيخرج شويه أفضل قلقانه
وأفضل رايحه جايه في البلكونه لجد ما يرجع
*******************
طبعا ناس زي دول لو سمعوا كلام الناس مش هيتجوزوا وخصوصا وإن الزوج إبنه الأكبر كان لسه متوفي في حادثه
******************
المهم كل واحد يشوف سعادته مكان ما يحب
ولازم هيكون في تنازلات لأن مفيش حد هيلاقي كل حاجه في شخص

كل واحد هياخد نيته
بس هي الناس تبطل تنحشر في اللي ملهاش فيه

سلوى يقول...

برنسيس فرنسا حبيبتي
ماتقوليش على نفسك كده

إنت فيكي خفه دم وسلام نفسي
وجدعنه
مش عند حد

لو المشكله بس السن
فياريت اللي شايف إنه مشكله يخبط راسه في الحيط
لأن كل شئ يقدر
وكل واحد مش هياخد أكتر من المكتوب
ومفيش مخلوق هياخد رزقك ولا هيشاركك فيه
ولا حد هيديك رزق مش لك

كوني سعيده برنسيس
لأنك فعلا مميزه
****************

أعتذر بشده على التطويل ده
أول زياره بقى وبعشمنا
دمتم جميعا بكل خير

خمسة فضفضة يقول...

السلام عليكم ورحمة الله وبركاته

ايه الرغي البناء والجميل ده يا مدام صبرني

معاكي في كل اللي قلتيه ماعدا الكتكوت بتاع التنسيق

انا عندي الاتنين يبقوا ينفس المستوي التعليمي والثقافي حتي لو بداوا حياتهم من الصفر علي ان واحده تتجوز اقل منها ولو معاه ملايين

وهاقولك ليه
لما بيبقي الراجل اقل من زوجته بيحس بنقص وبيطلع عقده عليها والكلام ده بقوله عن حالات كتييييييييييييييييييييير اوي شيفاها بعيني وشايفا اللي حاصل فيها ، عندي واحده صحبتي معيده صيدلانيه اتجوزت مهندس والله مواريها الويل واهه مهندس يعني مش قليل ومطلع عقده وعقد اللي خلفوه عليها ومش علشان حاجه الا انها اعلي منه في المستوي
كمان لما بيكون الاتنين من نفس المجال بيبقي الحوار بينهم سهل وبيلاقوا نقط تلاقي بينهم كتير اوي
تالت حاجه بقي ودي والله العظيم صح ميه في الميه وبناء علي تجارب كتير ، ساعات بيبقي الراجل داخل علي طمع خصوصا لما بيتقدم لصيدلانيه بيبقي طمعان انه يفتح باسمها صيدليه يديرها هو ويقعد مراته في البيت
اما لو دكتوره بيتجوزها علشان يطلع معاها الخليج محرم ويشتغل هناك وكتير بيفضل يقعد بالعيال وهي تشتغل وتجيبله الفلوس
والله الكلام ده صح ومش تجني علي حد وقدامي حالات كتير بعدد شعر راسي بنفس الشكل
وخدي بقي من ده كتير ، عارفه ان راي ده مش هايعجب ناس كتير بس صدقيني دي الحقيقه

صبرني يارب يقول...

باحث انت كفايه نورك الى ساطع علينا فى اول التعليقات كده
والاجنده بتاعتك دي انت شاريها من بره ؟؟ ينفع كده مش تيجى تنفعنا يا راجل .
وبالنسبه للكتاكيت اه ده مبهدلاهم معايا

وايه حكاية مافيش فرق بين الستات الا فى اجاده الطبيخ دي ؟؟
اول مر اسمع الفرق الفظيع ده لكن بتهيئلي ان الطبيخ ده مش مشكله يعنى اي حد يعرف يتعلمه

وبعدين موضوع التنازلات فقط لمجرد انها سنها كبر دي تبقى مجنونه رسمي .
الا اذا ضاع العمر يا ولدي فانصحها تغامر وكلها ثقه فى الله انه يوفقها لانه وبساطه مافيش حاجه تخسرها اكتر من عمرها الى راح انتظارا للاستقرار .

انا بقى شايفه ان التنازلات دي لازم تكون من البدايه
مش عشان تتجوز والسلام لا
ولا بالنسبه للبنت بس برضه لا

انا شايفه ان الواحد ممكن يكون راسم فى خياله مثلا واحده معينه ولنفرض مثلا انها تكون متدينه وجامعيه واخلاق وعنيها خضرا( اه والله بصحيح كان في واحد مره دى مواصفاته وبيتكلم جد )

طيب فرضا انه لاقاها فيها كل المميزات بس عنيها مش خضرا
ايه المشكله ؟؟؟ مش لازم يبقى الحلم بالمسطره
مش يمكن لما يرضى ويقول كفايه دينها واخلاقها وباقي مميزاتها تكون دي فعلا الى هاتسعده مش ام عيون خضرا ؟؟؟ وبعدين ما البت اختي عندها يجى ثلاث اربع الوان عنين بتغير فيهم يعنى مش مشكله.

صدقنى اعتقد مافيش فى الدنيا اجمل ولا احلى ولا اهم من ان الزوجين يتوصلوا لنغم واحد يجمعهم فى الحياه .
مش مهم النغم ده ايه لكن المهم انه واحد .

وليعلم كل واحد انه مش كامل ابداااا وعليه مش هايلاقي حد كامل برضه .
لازم قبول الشريك على حاله فى اشياء معينه طبعا .
وشكرا باحث

صبرني يارب يقول...

فرنستي حبيبتى

انا باعرض نموذج متخلف من البشر .
لو كنتى عرفتيه كنتى قلتي الحمد لله ان ده مبدأه عشان ما يقابلكيش فى حياتك خالص .
وبعدين نرجع تاني نقووول البنت خنشرت طيب وهو جراله ايييييييه ؟؟؟؟
حد كده يتمطع من الرجاله ويقولي لما يبقى هو عنده 35 سنه بيبقى ايه اكيد مش بيبقى زي الى عنده 20 .
وانتم عارفين ان الشباب دلوقتي بيقرعوا من سن 25 اصلا فاسكتوا احسن بقى .
فرنسا حتى لو خنشرنا يا حبيبتى الى عاجبه على كده عاجبه الى مش عاجبه خليه قاعد جمب الحيط .
نورتي يا جميل

صبرني يارب يقول...

سلوى يا حبيبتى احنا لازم ناخد فى الاعتبار حاجه كلنا
ان احنا عندنا دستور وقانون واحد للحياه وهو الدين

صحيح المجتمع علينا مراعاة شعوره لكن مش على حساب الدين والراحه الفرديه .

وعليه احنا المفروض نغير افكارنا ونحترم حرية وراي الاخرين

وحكاية زواج المسنين دي باحبها اويييييي
لان مش شايفه ابدا ان لازم المسن يندفن بالحيا عشان هو مسن
ولا شايفه ان الزواج بس للشباب
ولا كمان ان الزواج مجرد ارتباط حسي ان انتفت اركان العلاقه الحسيه انتفت الحاجه الى الزواج .

شكرا لكى سلوى وانتى تنوري فى اي وقت
وتكتبي للصبح ولا يهمك مدونتك وزياده

واي حد عايز يرغي يا جماعه انتم عارفين انا باقدر الرغي اد ايه .

صبرني يارب يقول...

خمسه فضفضه

بصى بقى احنا كنا هانتخانق خناقه كبيره كبيره

لا لا معاكي
مع الكتكوت الى عايش معاكي ده

اسمحيلي بقى انت كده عندك كتكوت منهم اهو اشهدوا .

هل انا اعترض على ان التكافوء ده شيء مهم اوي ؟؟؟
اوانا قلت ان الدكتوره ممكن تتجوز سواق ميكروباظ عادي وتنجح يعنى ؟؟؟
اطلاااااااقا

انتى قلتى عن حاله صيدلانيه ومهندس
تسمحي تقوليلي الى الفرق الاجتماعي والثقافي والي بين المهندس والصيدلي ؟؟؟

ده واحد معقد نفسيا مالنا احنا وماله ؟؟؟
ايه الفرق بين المهندس والدكتور والمحاسب والمحامي والصيدلي والمدرس من حيث الثقافه والمكانه الاجتماعيه ؟؟؟؟
مش شايفه غير حاجتين نتيجة مكتب التنسيق وعدد سنين الدراسه المختلفه بينهم
انما كلهم جامعيين ومحترمين ومثقفين (يفترض كده يعنى )

ليه بقى الكتاكيت الى في مخ الناس بان الدكتور اعلى من الصيدلي الى بدوره اعلى من المهندس والى بدوره هو الثالث اعلى من الباقيين والى ما هونالك ؟؟؟

ليييييييييه ؟؟؟
ليه اصلا يبقى المهندس عنه اعتقاد ان الصيدلانيه اعلى منه ؟؟؟

وحكاية الطمع دي بقى يا فضفه دى بتبقى داء يا حبيبتى انتى نفسك عارفه ان زي ما في واحد طمعان فى الصيدلانيه فى كمان صيدلانيه طمعانه فى المحاسب الى جاي من بره وهايفتح لها صيدليه برضه عاااااااادي

مش الدكاتره والصيادله بس الى بيطمع فيهم .
واى واحد يفكر يتجوز واحده لمجرد كده بس يبقى مش مقياس لكلامنا كله
وبعدين هيصي يا ستى عليكم طلب اهو بقى عشان الصيدليات عيشي بقى ههههههههههههههههه
التكافو مش معناه التطابق يا فضفضه التكافوء معناه التقارب
شكرااااااااا يا فضفضه نورتي يا جميل

Anonymous يقول...

صبرنى يا قمراية انتى بجد اخترتى موضوع جامد ويارب دايما
بس الكتاكيت لسة كتير فية كتكوت مهم جدا وهو كتكوت الحموات ماولكيش علية دول ممكن يخربو الدنيا واللى فيها ويا سلام لوكانت واحدة فى الحماتين حطا عنيها على بنت اختها ولا ابن اخوها حيكون الطرف التانى راح فى دهية وتطلع القطط الفاطصة فية ولا ياعينى على كتكوت تانى وهو حب التملك بالنسبة للبنت متبوصش لدى ومتاولش كدة وانت بتكسفنى وسط اهلى وهو كمان كتكوت الرجولة الزايدة يا عينى علية لما سى السيد يلعبلة فى دماغة
ياة يا صبرنى على الكتاكيت مش عارفة احنا ممكن تجلنا الف الونزا من كترهم
ههههههههههههههه ومع زلك لسة الدنيا حلوة ولسة الايام يامة بتنسى وبتجيب الخير بس بجد مدونتك عجبانى موت حببتى ربنا يوفقك ويصونك يارب
توقيع اختك ساندرا يارب تكونى فكرانى يا جميلة 6/4/2008

صبرني يارب يقول...

ساندرا حبيبتى

ازيك يا جميل والله واحشاني منهم لله الى حارمينا منكم بقى

انا عارفه ان العشه هاتكتظ وهناخد عشه ايجار جديد

نورتي يا جمييييييييل وشكرا على الكلام الحلو ده

FaceMoon يقول...

اية الموضوع الجميل دة بجد تحفة وكل اللى كاتباة فعلا بيحصل ومن الحقيقة بس الحاجة الوحيدة اللى زعلتنى انى حخنشر كمان سنة فضلى زلطة واطلع برة
كتاكيتك عجبانى بجد اوعى تبطليها
تحياتى

صبرني يارب يقول...

فيس مون
اهلا يا جميل بعد الشر عليكى من الخنشره يا حبيبتى على كده انا طلعلى شنبات بقى ما دام انتم خنشرتوا .

يا بنتى دي ناس هبل بعيد عنك هو بصراحه الشعب كله عنده كتاكيت اصلا

ومش هابطل ده شايله فى قلبي وساكته يا بنتى سنين ما صدقتك لقيتكوا عشان ارغي هنااااا
نورتي يا قمر

Liberal Muslim يقول...

أختي أم مريم
البوست ده ماحصلش ... بجد تسلم ايدك
موضوع ان الدكتوره ماتتجوزش غير دكتور والكلام ده، بيبقي في الغالب عشان الوضوع المالي مش أكتر .

وموضوع التكاليف العاليه للجواز دي بقيت صعبه قوي والبنات والأولاد بيعنسوا ولا حد بيسأل فيهم .
بس للأسف تلاقي البنت أو الولد في الأول يفضل يتشرط وهي تقول انا ماتجوزش اقل من فلانه ، وهو يقول انا لازم فرحي يحكي عليه العالم كله ، وللأسف الاتنين مايكونش عندهم اللي يساعدهم انهم يحققوا الحاجات ويبصوا يلاقوا الوقت سرقهم .
بس الراجل في الغالب مش بيفوته القطر انما البنت المسكينة بيفوتها القطر وبيقزح :D
بجد بجد مأساه

بت خيخة وأي كلام يقول...

فيه كتكوت بكرهه اوى عند بعض الرجالة
والله انا راجل البيت وانا اللى كلامى يتسمع ومحدش يراجعنى فى كلامى وقراراتى
على اساس انه واخد معزة هيربطها مرة فى شجرة ومرة يربطها فى رجل كرسى وماطرح مايربطها تتربط
وناسى تماما مش علشان انت راجل لازم كلامك يكون صح
وناسى تماما انك واخد انسانة متعلمة وليها شخصيتها وتجاربها فى الحياة واكيد ليها راى منفصل عن رايك ومن حقها انك تسمعها وماينفعش انك تلغى دماغها
وناسى تماما ان الجواز مش مجموعة اوامر موجهة من الراجل الى حرمه المصون وعليها انها تنفذها دون اى نقاش
وهتكون مصيبة سودا وحلت فوق نافوخها لو فكرت بس انها تفتح بقها وتقول رايها فى اى حاجة

معلش يا ام مريم طولت عليكى
اصل الكتكوت ده انا لسة شايفاه قدامى من كام يوم
واحدة صاحبتى خطوبتها اتفسخت علشان عندها راى وخطيبها عايزة واحدة معندهاش راى
مع العلم ان صاحبتى دى عندها تلاتة وتلاتين سنة يعنى كبيرة مش عيلة صغيرة
علشان واحد يجى يقولها انتى عليكى انك تسمعى كلامى وتنفذيه
مش بقولك هو كان عايز يتجوز معزة
حاجة تقرف
تحياتى ليكى
اختك خيخة

mayada يقول...

بيتك بيتك
مع ان ياام مريم انفلونزا الطيور
ماشيه في البلد الله ينور
الا ان الكتاكيت دي عماله تكبر
وهتبقي فراخ وتفقس وسنه طويله
بصي هقولك حاجه بتاع نانسي ده
فاكر نفسه جاد شويري يعني ولا ايه النظام
لو الحكايه مظاهر يروح ينزل كرشه
ويغير نضارته ويجي يتكلم

وبعدين يعني انت عاوز واحده غسيل ومكوه
حلوه وقمر ونانسي وصابره وشاكره
وساكته ورقيه وطيبه وام فاضله
وست بيت وست الستات وبنت ناس
وخام ومؤدبه
لا الصراحه لسه منزلتش الارض
النوعيه دي
ومش عارفه ايه بقي حكايه
عنده 35
عاوزواحده 20 او 18
علي كده اللي عنده 25 نشوف له واحده
لسه مااتفطمتش
اما حكايه المغالاه في العفش والفرح
والشبكه والفرش والفشخره والاقنعه
وبقيت الكتاكيت دي
فدول مش كتاكيت دول بط مزغط
متربي علي الغالي
موروثات وعادات وتقاليد فارغه
ورثناها وقاعدين نزغط فيها
لما هتبقي غول ويكولنا
اللي خايب ليه سكر
ان احنا بنتجوز علي سنه الله ورسوله
نفسي بس اعرف ايه سنه الله ورسوله
في الحاجات دي
واللي احنا بنقول كلام كده واحنا مش فاهمينه
او نسيب الموضوع الاساسي ونمسك في الديل

ده مش جواز ده تبقي بيعه وشروه
عشان كده تلاقيهم يقولوا لك ايه
لما تكون طلباتهم كتير
احنا مش هنبيع ولادنا
المفروض يكلموا
احنا مش هنبيع ولادنا بالرخيص هنبيعهم بالغالي

طوله عليكي بقي المره دي سلام

صبرني يارب يقول...

وائل
انت مش بس عميل انت كمان انسان انوي

ليه يعنى الراجل مش بيفوته القطر والبنت بيفوتها
درجة تانيه هى فى المجتع
ولا احنا الى مجتمع خايب اصلا

مش معقول كده نجيب هنا ساطور وقورمه يا بنات عشان نشتغل ولا ايه

هههههههههههههههه
نورت يا وائل

صبرني يارب يقول...

خوخه يا حبيتى نورتي وعود حميد من عند ماما يا جميل
وربنا يجعلها اخر الاحزان

انتى تطويل وتعرضى براحتك يا خوخه بيتك ومطرحك يا اختي احنا ما لناش الى بعضينا يااختي .

المهم الكتكوت بتاعك ده عايزله بوست بحاااااااله

يتخلص فى جمله واحده ان الرجل يسعى جاهدا لتحويل شريكة حياته الى مسخ غير ذى شكل ولا معنى .
ثم يبكى وينعى حظه ووحدته النفسيه بعد ما يبقى مافيش غيرها .
وبعدين يقول من حقي اشوف واحده تشاركنى افكاري وحياتي مش واحده غارقه حتى النخاع فى امور ليس لي بها شأن
الى هى امور بيته يعنى

مسخ من صنعه يلومه على ما صنعه به .

خوختي نورتي يا جميله وكتكوت فى الجون

صبرني يارب يقول...

مادي حبيبتى
خليفتى فى الملاعب
اه هايفتحوا ملاعب هنا فى البلوج

المهم حلوه اوي نبعيهم بالغالي دي

لا ولا تلاقي واحده بتقولك اهم حاجه عندي الدين
وبعدين بقى ما هى عايزه متدين كده وحلو وبيقول جزاكم الله خيرا واول ما يرفع السماعه يقول سلام عليكم مش الو .
ويقول يا خالتو مش طنط وكده يعنى
وكمان يكون شيك ويكون عنده شقه وعربيه وشغله كويسه وكله على كله

اه ويكون طويل اه مش بنحب القصييرين بقى

وطبعا الشاب نفس الحكايه
عايز طابور من الشروط بس المهم يقول اهم حاجه الدين

وعلى فكره
تصوري بقى ان كل واحد بياخد الى هو دور عليه فعلا
بس المشكله انه بيبقى مش كفايه عشان يسعده فيبص للحاجه دي بعد كده ولا كانه شايفها
ما علينااااااااااا
اضفتى ونورتي يا مادي يا جميله

الفارس الملثم يقول...

هههههههههه

بجد كل الكتاكيت دي موجودة في مجتمعنا , وعاوزين مذبحة زي مذبحة القلعة بتاعت محمد علي ,بالذات حكاية اللي بيترسموا علي بعض وكل واحد عاوز يقول للتاني انه تنازل لما وافق علي الارتباط بيه ..

ولا اللي عاوزة فارس الاحلام اللي في خيالها وهو عاوز سندريلا تطلعله من الحواديت ..

المهم بوست عجبني اوي , ويجعل كلامنا خفيف علي انفلونزا الطيور

تحياتي

Liberal Muslim يقول...

أنا أنوي أنا؟
ده طيب وابن حلال والله :(
بصي يا فندم عشان تبقي عارفه ان 90% من الرجاله اللي بتتجوز في مصر ، أخر حاجه الواحد منهم بيبصلها في البنت طريقة تفكيرها وعقلها .
إنما الأول بيبص لوشها ، جسمها ، شعرها .... إلخ .
يعني كأنه رايح يشتري حاجه وبيختار الأحسن .
ومش عارف ليه عندهم تصور ان البنت كل ما كانت اصغر كل ما كانت احسن
... واحد يقول هتبقي عجينه طرية اشكلها بإيدي . وفي الأخر هي اللي تربيه من أول وجديد .
والتاني يقول عشان تخلفلي حتة عيل ... اقوله راجع كتاب العلوم بتاع تانيه اعدادي هتلاقي ان فترة قدرة المرآة علي الحمل مش بس العشرينات من العمر .

مشكلة ان الراجل مش بيفوته القطر دي السبب فيها البنات في الغالب .
يعني البنت يكون عندها 18 سنه وترضي تتجوز واحد عنده 40 سنه .
إنما لو البنات تحاول تختار سن متقارب ليها يبقي كده الراجل اللي عنده 40 سنه لما يجي يتجوز هيدور علي واحدة فوق ال30 وتبقي البنت مش هيفوتها القطر .
انما طول ما الرجاله بتختار البنت علي اساس ان البنت الاصغر أجمل ، أحسن .
وطول ما البنت الصغيره ترضي تتجوز واحد فيه فرق بينها وبينه 20 سنه وأكتر .
يبقي هنقول ان البنت بيفوتها القطر والراجل مش بيفوته القطر .
بس الرجاله اللي تفكيرها كده يارب القطر يدهسها يعني :)

صبرني يارب يقول...

الفارس الملثم نورت

صدقنى فارس الاحلام دي ما نقدرش نقول ما تبقاش موجوده
لكن وقت الجد بقى لازم تعرف ان مافيش حد كامل ولما الواحد بيتغاضى عن حاجه ثانويه بالمقارنه بالاخلاق والدين ربنا بيكرمه جدا جدا ده حقيقى

وشكرا لك ونوووووورت يا فارس

صبرني يارب يقول...

وائل

اه اه انت انوي يا وائل وبعد شويه هانخلي تقول انا ورقه .

وبعدين بص اكتر حاجه بتعصبني فى العيال دي كلمة عشان تبقى عجينه دي واربيها على ايدي والكلام التعبان ده .
وايه عجينه دي هو هاخبز عيش ما علينا

اما بقى البنت الى عندها 18 سنه وتتجوز واحد عنده 40 او حتى 35 فده فى رايي مش ذنبها لان سنها ده ما يسمحلهاش انها تحكم حكم صحيح على المجتمع ككل
واظن المجتمع والمسؤلين عن البنت دي بشكل مباشر هما الى مسؤلين

ازاي عايز البنت الى عندها 18 سنه هى الى تحكم على المجتمع ككل ؟؟؟
لازم الجتمع ده الاول يغير فكره
ولازم الراجل يعرف ان هو كمان له عمر افتراضي زي الست بالظبط
وسكتوني بقى وما حدش ينكشني

canary يقول...

لا كتاكيت ايه تانى اللى انتى نسيتيها انتى خلصتى على كل الكتاكيت اللى فمحل الفرارجى اللى جنبنا
موضوع ملوش دعوة بكتاكيتك
الواد اخويا بعد ما خلص تعليم وابويا بناله شقه
وفرشها
وجابله شبكه بفلوس ااااد كدة لو قولتلك عليها هتتخضى
ها يا بنى مش تكمل نص دينك؟
لما الاقى شغله سابته الاول(يتوظف يعنى)
ربنا كرمه واتوظف
ها يا حبيبى مش تستر عرض بنت من بنات المسلمين وتتجوز بقى؟
اصل البنت اللى ماما قالت عليها مناخيرها كبيرة
والبنت اللى اختى قالت عليها عندها سنه معووجه
والبنت زميلتى فى الشغل بتحدف شمال وهى ماشيه .عارفه يا اختى منتهى القلاطه والتناكه اللى فى الدنيا عشان يخلص فى الموضوع اللى مكنش باين عليه خلصان دى واخيررررررررا ربنا كرمه واتواضع واتنازل ووافق انه يتجوز الجوازة اللى مكلفتهوش ولا مليم
وتقوليلى كتاكيت؟ دة جيل عاوز حش رقبته

صبرني يارب يقول...

كناري يا جميله

كلامك بيأكد ان المشكله فى تأخر سن الزواج مش بس المشكله الماديه والاقتصاديه .

وبعدين احنا مش هانحش رقبتهم لا

احنا هانسيبهم كده يعمهون لحد ما يحمضوا من قلة الجواز يا اختي .

نورتيييييييي يا كناريا