الاثنين، 31 مارس، 2008

18- شباب وبنات فى سرفيس سلطه كبيييييييير

أنساتي سيداتي سادتى وكل الحبايب يعنى :
فى البوست الى فات فى كلمه كان نفسي ارغي فيها شويه بس ما رضيتش اطول عليكم بس الكلمتين واقفين على قلبي انتم عارفين .
والكلمتين بقى بخصوص البلوه المجتمعيه بتاعة العلاقات بين الشباب والبنات وطريقة معاملتهم مع بعض والى بقت عباره عن طبق ... لا سرفييييييييييس سلطه كبير كله عك وهبل ما حدش عارف مين صاحب مين ومن حبيب مين ومين متجوز مين ولو متجوزه عرفي ولا شرعي . كله داخل سرفيس السلطه .
المهم انا هاحكيلكم قصه عجباني موت من سيرة الرسول عليه الصلاة والسلام مع زوجاته والى انا شخصيا مفتووووونه بها وشايفها مدرسه زوجيه واجتماعيه عميقة جدا .
المهم نقول القصه ونناقشها كلمه كلمه :
كان الرسول عليه الصلاة والسلام معتكف فى الغار وذهبت اليه صفيه لتكلمه وفضلت ساعه ولما جت تخرج خرج معاها الرسول يوصلها لخارج الغار فكان فى اثنين من المسلمين معديين فقال الرسول عليه الصلاة والسلام: على رسلكما انها صفيه بنت حيي.فقالا سبحان الله يا رسول الله فقال الرسول (ان الشيطان يجرى من ابن ادم مجرى الدم وانى خشيت ان يقذف فى قلوبكما شرا)
يا سلام القصه دى فيها معانى جميله اوى تعالى ناخدها واحده واحده
اولا ان صفيه كانت عند الرسول اثناء اعتكافه عادى يعنى مش عشان بيعبد ربنا يبقى نعض الى يجى نحيتنا زى ما بعضنا بيتخيل
ثانيا انه قام عليه الصلاة والسلام يوصلها لباب الغار مش قالها يلا فرقينا بقى عطلتينى وكده يعنى لا فى ذوق وأدب وترفق .
ثالثا بقى وده المهم عشان ده موضوعنا وهو ان الرسول عليه الصلاة والسلام اتقى الشبهات يعنى فسر موقفه فورا للناس مش قال بقى ده أنا الرسول ماحدش ممكن يظن فى غلط وكمان وضح ليه هو قال كده مش عشان هو مش واثق من نفسه ولا مثلا ظانن شر فى نية الى شافوه لا قال ان عارف ان الشيطان زى ما احنا بنقول شاطر وممكن يأثر على تفكيرهم وهو بكده سد باب فى وجه الشيطان .
حلو الكلام ؟؟؟ اه حلو انا شايفه انه حلو
طب تعالوا بقى نسمع الردود فى الايام الجميله الى عايشينها دي :
واحده مثلا تلاقيها واقفه ساعه مثلا بتكلم واحد فى الجامعه وبعدين تقولك ايه:
ده فلان ابن خلتى، أو ده جارنا ومتربيين مع بعض من واحنا فى كى جى وان
يا سلام طبعا ده مش مبرر ابدا انك تقفى تتكلمى معاه فى الشارع وبعد كده تقولى: (انا طالما واثقه من نفسى ومش باعمل حاجه غلط ما يهمنيش الناس )
يا حلولي وسد ابواب الشيطان ما جاتش على بالك ؟؟؟ مش بس أبواب الشيطان على الناس وعليكى انتى كمان !!!!!
وطبعا نفس الكلام باقوله للشباب مش البنات لكن الولد بقى رده بيبقى ساعات يفرس زى مثلا :
وأنا ما لى هى الى واقفه تتكلم هى حره
وكأن الموضوع يخصها لواحدها انما هو ما يمسوش حاجه ليه مش عارفه
أو مثلا الرد التالى الى برضه يفرس: ايه المشكله يعنى لما تقف معايا تكلمنى هو انا هاكلها ايه التخلف ده .
طب اسأله كده لو هو شاف اخته واقفه تكلم واحد ساعه ولا اكتر ولا اقل ساعتها هيبقى برضه ده موقفه؟؟؟
طبعا لا اقل ما فيها هيابادر بسؤال فى ريبه مين ده وليه وعشان ايه......... وده لو هو بارد يعنى.
ولما نقول كده يقولك :مش كل الناس زى بعضها
يعنى ايه مش كل الناس زي بعضها يا ابنى ؟؟؟؟ يقول : يعنى هى واحده تربيتها مختلفه وظروفها مختلفه مش زي اختي وهي بتقبل كده خلاص
السؤال هى موافقه وانت ايه ؟؟؟؟ موقفك ايه ؟؟؟ او مبدأك ايه ؟؟؟ قانونك الى ماشي عليه ايييييه ؟؟
أنا مش باقول انك تمشي مبوزه وما تكلميش حد من زمايلك فى عمل ولا دراسه اطلاقا . ولا لما واحد يوقفك فى الشارع من زمايلك يسألك الساعه كام تمسكي مكرفون وتقولي ده زميلى وبيسألنى !!!!
لا بس كل حاجه ولها حدود ولها شكل لائق ولها اصول كلنااااااا عارفينها وكنا بنعملها زمان . ليه بطلناها ؟؟؟ ليه بنستهبل ؟؟؟ ليه بقى عادي البنت تتصل بزميلها فى البيت ؟؟؟؟ وليه بقى عادي يتصل عليها وبعلم اهلها وبشكل متكرر مش مره ولا صدفه ولا ظرف ؟؟؟؟
ليه بقى عادي اننا نسيب الولد يلعب ببنات الناس ونقول بناتنا غير بنات الناس ؟؟؟؟
ميت ليه وميت سؤال عايزه اوجهه للناس فى هذا الصدد
وده على فكره جانب واحد بس من المشكله فى علاقة الشباب والبنات
الجوانب كتير وان شاء الله نتكلم عنها .
كنت ناويه اكمل كلام عن كتاكيت الشعب فى الجواز بس النقطه دي بالذات حبيت اتكلم عنها وابرزها شويه .
شكرا لكم جميعا ونفعنا الله واياكم ووفقنا لما يحب ويرضى

هناك 35 تعليقًا:

Anonymous يقول...

الأخت الفاضلة/أم خالد
تحية و أحترام
مواضيعك جميلة يا أم خالد
و أنا أؤيد كلامك و موافق عليه
و لكن هناك ملحوظة صغيرة الحديث لا يكون للفتى أو الفتاة الحديث من الأصل
التربية البيت الأساس الأم الأب أختى العزيزة و اجب على الأم و الأب من الاساس غرس القيم و الخوف من الله فى النفوس،فأنتى تعلمين أنه يشب الفتى على ما رباه أبوه-و الحصاد نتيجة حرث و زرع..كنا نربى على الآية الكريمة"و لمن خاف مقام ربه جنتان"..
أم خالد/سعيد أنى تعرفت على مدونتك.
أبو خالد

خايف من الحقيقة يقول...

ام خالد
السلام عليكم ورحمة الله وبركاته
استخلاصك لنتائج من الموقف النبوي الكريم رائع بجد
سلمت يداكي
وربنا يستر على بناتنا وولادنا

Anonymous يقول...

السلام عليكم,

الموضوع جميل جدآ...

مؤيد لكلامك جدآ.. اذا قلنا ان هناك خطأ من الشباب ( بنات واولاد ) فهناك خطأ اكبر وده يمكن الخطأ الواجب تصليحه اولآ وهو خطأ الآباء وخطأ تربيتهم لابنائهم... ولكن كما قال الربانين من العلماء لابد من الاصلاح على الجانبين معآ لابد من اصلاح المفهوم التربوى للآباء وايضآ على نفس الخط والدرب الآبناء كذلك...

جزاكى الله كل الخير..

ربنا يكرمك...

كلامك ممتع جدآ
السلام عليكم

صبرني يارب يقول...

خايف الله يكرمك انت نورت

صبرني يارب يقول...

الله يكرمك يا ابو خالد ومتشكره على كلامك الحلو وتشريفك

وانا فى البوست بتاعي فى الجزء الاول منه باتكلم مع الشباب
ولما اكلم شباب مش هاقوله الخطأ على اهلك هما الى ربوك غلط
لان بمجرد انه بقى انسان بالغ فهو مسؤل عن تصرفاته كامله حتى لو كانت ناتجه عن سوء نشأه وتربيه وخطأ من الاب والام
والا تبقى شماعه يعلق عليها اخطاؤه
وفى الناحيه دي بالذات انا شايفه ان المجتمع كله عايز اصلاح فى طبيعة العلاقه بين البنت والولد وشكلها وقوانينها وحدودها
لان الام والاب نفسهم عندهم موروثات مش صح
ده غير ان الولد فضلا عن الموروثات كمان اكتسب اراء وافكار من الاعلام السخيف يزود الطين بله .
وشكرا على وجودك ابو خالد ونورت

صبرني يارب يقول...

غير معرف
شكرا لك على التعليق اللطيف وزي ما قلت لابو خالد المسؤليه فى النهايه بتقع على عاتق الشخص نفسه ما دام هو بالغ قدام ربنا يعنى
لكن ده لا ينفي مسؤليه الاب والام برضه ولكن الشخصيه برضه .
لكن ان اردنا توجيه الكلام للشباب ما نديلوش شماعه يقول من خلالها انا ماليش ذنب كلموا اهلي
شكرا لك

Liberal Muslim يقول...

موضوع جميل قوي يا أم مريم
وفيه نقطه عجبتني قوي
اللي هي تحميل الشاب جزء من المسئولية .
لأن فعلاً لما بنت بتتكلم أو تخرج مع شاب في مصر بتحملوا البنت كل المسئولية والشاب ولا كأنه هنا ... ولا حد بيكلمه اساساً .
وكأن البنت هي الشيطان اللي أغوت الشاب البرئ الجميل الطاهر وجرته الي مستنقع الرزيله وهو مسلوب الإراده يا عيني ومش قادر يقاوم .
بجد ومع احترامي ده تفكير متخلف وبيدل علي ان مجتمعنا مجتمع ذكوري بحت .
المفروض الغلط بيوقع علي الاتنين وبيكون الجزاء علي الاتنين بنفس المقدار .
يعني مش البنت أهلها يقطعوها من الضرب والواد ابوه يقوله كلمتين وخلاص .

صبرني يارب يقول...

وائل

بصرف النظر عن الرنه الامريكانى الفى كلامك
وعن كلمة مجتمع ذكوري الى بتخنقنى
لكن هو وضع غلط طبعا وفكر غلط طبعا

الا ان الوضع ده مش فىمصر بس ولا عند العرب بس
صدقنى الوضع الذكوري الى مش عاجبك ده وضع عالمي بالفعل
قول الى انت عايزه وخليك شايف الى انت عايزه لكن هي دي الحقيقه

لكن الى بيغظني اكتر المناديين بحقوق وحرية ا لمرأه مش بيقولوا للكل ما تعملش الغلط لا
بيقولوا اشمعن الرجاله تعمل غلط والستات لا ؟؟؟
يعنى مش فامهه هل كون الرجاله غلطانين والمجتمع موافق علىكده يبقى احنا عشان نصلح الوضع نقوم نخلس الستات كمان تغلط بموافقةالمجتمع ؟؟؟
يعنى نبوظ الدنيااكتر ؟؟؟

احدى حلقات اعوجاج المجتمع

شكرا وائل

Liberal Muslim يقول...

يا فندم والله انتي فهمتيني غلط ولا نبره امريكاني ولا نبره فيومي
دانا من سوهاج :)
بس خلينا نتفق علي حاجه
مافيش مجتمع في الدنيا مافيهوش ناس بتغلط .
مافيش المدينة الفاضلة في الدنيا
اه نمنع الغلط وكل حاجه ونحاول نقلل منه
بس لما حد يغلط لازم نحاول نخلي نظرتنا حيادية للولد أو للبنت .
يعني الغلط غلط بصرف النظر عن إن كان ولد أو بنت .
تكون نظرة المجتمع للغلط علي انه غلط بغض النظر عن جنس مرتكبه .
ويكون عقاب المجتمع واحد .
فهمتيني حضرتك؟

FaceMoon يقول...

كلامك جميل وانا مؤيدة لكل الكلام بس فية ملحوظة ان دلوقتى بيختلف عن زمان يعنى دلوقتى البنت مجبرة تتعامل مع الولد فى كل مكان فى الجامعة وفى الشغل وفى الشارع البنت مش بقت منفصلة عن المجتمع زى زمان بالعكس دى بقت متبهدلة زيها زى الولد فيه
بس طريقة التعامل دى بتختلف من بنت للتانية وفيه بنات بتجبر اللى قدامها على احترامها حتى لو كلمتة ساعات فى الجامعة بس المهم يكون فى احترام وأخوة بين الطرفين ودة بيرجع للتربية ومش تربية البنت بس تربية الولد كمان لان فيه نفوس ضعيفة كتير دلوقتى وانا بؤيدك ان لو فيه خطأ المفروض يقع على الاتنين الولد قبل البنت لان لو الولد فهم ان اللى قدامة دى فعلا اختة ويحطها مكان اختة اللى فى البيت ويتعلم انه ميناقضش نفسة المجتمع بجد حيتعدل والتناقض دة بيتعلمة من وهو صغير لان تربية الولد فى المجتمع غير تربية البنت والحرية للولد هيا اللى بتعمل فيه كدة فى النهاية
وبهنيكى على مدونتك وكلامك الجميل

صبرني يارب يقول...

وائل انت الى ما فهمتش ردي على ما يبدو
انا مش مختلفه معاك اطلاقا
بس هو بش عشان انت عميل وكده واخدها على قلبك
ههههههههههههههههههههههههه

صبرني يارب يقول...

الاخت فيس مووون

بصي يا ست الكل انا اساسا مش مع الانفصال التام بين الرجل والمرأه بشكل تام
بالعكس وانا مش باقول مافيش علاقات
لكن الحدود الى انتى بتتكلمي عليها بقت نسبيه للاسف
كل واحد بيعمل حدود ويقول عليها صح

يعنى افتكر مره واحد قالي انه زميلته مش بترضى تتصل عليه متأخر وهى بتذاكر يعنى وقالتله مافيش واحده محترمه تتصل على واحد متأخر كده .

مع ان بتهيئلي مش صح اصلا تتصل عليه الا لو في حاجه بقى شنيعه يعنى .
خصوصا ان لها اكيد زمايل بنات وممكن تتصل عليهم .
وانا قضيت سنين الجامعه من غير مااكل ولاد ولا اصادقهم عادي وكنت بانجح والله .
وعلى فكره انا مش مقفوله ولا حاجه بس اساسا اي ولد فى السن بتاع الجامعه ده تقوليله السلام عليكم يفكر انك هاتخطفيه بعد شويه وانتى مروحه .

فآثرت السلام وكنت باقصر مع الكل
ومش مت ولا حاجه عايشه عادي والله
والصح والحقيقه مش نسبيه يا فيس مون
يعنى ما ينفعش ابدا تقف بنت تكلم ولد فى الشارع ساعتين وبعدين تقولي باحترامهم
لا المجتمع الى انتى عايشه فيه له حق عليكى يا فيس مون لازم تحترميه .
ولازم تسدي ابواب الشيطان عليكى وعلى الناس .
وشكرا لكي وانتى نورتي

دكتور حر يقول...

الله الله الله

موضوع في الجول يا ام مريم

اه كده هي دي المواضيع اللي احنا مفتقدينها
ونفسنا نعمل للناس هزة وصدمه في دماغها من المفاهيم التعبانه المغلوطه اللي ساهمنا فيها كتير

وللاسف الدور الأكبر على البيت والاباء اللي بيسمحوا بالعجن ده يحصل

في بس ملحوظة عن القصة ان النبي كان معتكف في مسجده وليس في الغار

جزيتي كل الخير
ولا تنسنا

دكتور حر يقول...

ايه ده
هو انتي ام خالد
ولا ام مريم
ولا ايه بالضبط

:)))


الحاجه التانيه
ياريت تلغي تأكيد الكلمة من الاعدادات والتعليقات عشان تريحينا شويه
وربنا يكرمك

صبرني يارب يقول...

دكتور حر

بصوا شاهدين عليه عمال يأنب فيا من يوم البوست بتاع ا لرغي الى مالوش لازمه الطويل
وانا قلتلكم كنت بافضفض شويه ايه الاسلوب ده ما حدش عايز يستحملني مع انى كلامي قليل طوووووول عمري .
والله يا دكتور انا حرمت خلاص


اولا يا دكتور متشكره اوي على التصحيح بتاع القصه انا فعلا رجعت للكتاب الى عندي وهو نساء حول الرسول لمحمود حلبي

لكن انا القصه دي كانت عندي ضمن موضوع كامل عن زوجات الرسول وانا اخدتها مكتوبه من هناك .
اصدقك القول مش فاكره بالظبط كانت مصدرها اصل انا كاتباها من زمان اوي من حوالي ست سنين كنت لسه فى كي جي تو يعنى .
لكن هو كان فى اكتر من كتاب باخد منهم مش فاكره الا كتاب نساء بيت النبوه لبنت الشاطيء وما كانش بتاعي بلاش احراج بقى مش عارفه ارجعله .
وشكرا على التصحيح .

وانا معاك المجتمع عايز يفووووق بشويه ميه فى وشه .

وانا يا دكتور ام مريم ورحمه وخالد
اختار الاسم الى يعجبك .

وأنا لغيت كلمة التاكيد من التعليق معلش ما كنت واخده بالي انى معذباكوا كده اي خدمه أأمر بس دكتور
وشكرا لك يا دكتور حقيقى وجودك فى التعليقات بيسعدني

mayada يقول...

ياام خالد ورحمه ومريم ده مش في سرفيس
سلطه دوله في سلطانيه سلطه
وياريتها سلطه خضرا كنا عرفنا ايه
المكونات
لاده سلطانيه سلطه طحينه
وانا بقي اللي هتخانق المره دي لان الكلام ده انا موافقه عليه
لدرجه ان انا حاسه فعلا اننهم مستنسخني
منك

صبرني يارب يقول...

عسوله يا مادي طيب ما نشوف الموضوع ده ونعمل خطه شريره ونخليهم يعملوا كتير مننا عشان نعيش احنا مرتاحين
ماهو اكيد الباقيين مش هايستريحوا عشان مش لهم دماغنا

لوبتشوفي تيمون وبمبه ( اه انا حافظاه طبعا ) فى حلقه بيقوله هما بيعملوا كتير مني قالوا لا لازم يعملوا كتير مني انا
كتير منيييييييييييي كتير منيييييييييييي
هههههههههههههههههههههههه
هابقى ارفعهالكم على رابط لما ربنا يصلح حالي واتعلم

الشموع البيضاء يقول...

اولا بحييكى على موضوعك
ثانيا انا موافقه على كلامك فعلا انا كل ماروح حته بحس ان الدنيا بقت زى مانكون فامريكا مش فمصر وعلى فكره فمختلف المستويات مش مثلا الى متعلمين فلغات وامريكانى الى كده لا دى حاله عامه فالاغلب الا من رحم ربى
وشايفه ان الموضوع على البنت والولد سوا والاهم واهم الاهل نفسى اعرف الاهالى راحوا فيييييييين.؟؟ بيعملوا ايه فحياتهم؟؟الاجيال عماله تبوظ اكتر وهمه بيلموا فلوس ولا بيعملوا ايه؟؟ على فكره انا صغيره مش كبيره بس مش موافقه على الى بيحصل ده لانه مخالف للشره والتقاليد والفطره..الله المستعان ربنا يهدينا ويهديهم

صبرني يارب يقول...

شموع

تعليم امريكاني مين والله العظيم يا بنتى وانا كنت فى الكليه فى العصور السحيقه طبعا
كانوا الفلاحين عاملين عمايل يا لهوييييييييييييي
والله العظيم مصايب سوده شوف بقى بيقولك الفلاح لما يتمدن يجيب لاهله العار
وربنا صح وانهو عاااار تبقى لابسه خمار وماشيه زي الفل وبعدين فجأه الاقيها بتخبط واحد وهى ماشيه كده هزار يعنى بس شروع فى قتل

او يقعدوا مع بعض على الحش (النجيله بس بلغاتهم) وياكلوا فول وطعميه ويهزروا بكلام خارج كمان ايو الله كده .
ومافيش مانع الواد يمدد كده تحت السجره (الى هي الشجره يعنى ) ويا حبذا لو تهرشله فى شعره وتزغده زغدتين .
طبعا انتم فاكرين باهزر وبابالغ لكن وربنا انا فاكره كويس المنظر ده وكانت البت لابسه خمار نبيتى والواد عامل شعره بانك ولابس بنطلون منفاخ وحاجه زي الفل

وقعدنا يومها نحاول نعرف هو يا ترى نايم على رجلها ولا جمب رجلها عشان كانت السجره مغطيه عليهم
وكانت شجره اوزعه يعنى مش برتقال ولا حاجه
ما علينااااااااااااااااااااا
والاهالي يا بنتى بيستهبلوا يا اما مش عارفين حاجه
يا اما عارفين وعايمين على عوم العيال
وشكرا شموع نورتي

canary يقول...

كلامك كويس ومنطقى ووالله عندك حق لكن دة دلوقتى بيقولو عليه تخلف وتاخر ونيله على دماغهم عارفه بشوف مناظر فى الشوارع وقدام المدارس تقرف وتوجع القلب ولو حبيتى مرة واحدة تقولى كلمه نصيحه هتسمعى كلام يسم بدنك ولا بقى فيه صح ولا غلط ولا كلام يصح ولا ميصحش ولا حتى كبير وصغير
مدونتك جميله اوى . سلامى

Anonymous يقول...

الفاضلة أم خالد
السلام عليكم ورحمة الله وبركاته
اسمحي لي أن أختلف معك تماما في الرأي والخلاف لا ولن يفسد للود قضية أن ظاهرة الانفتاح بين البنات والشباب في مصر هي سمة مصرية ولا يوجد أي ارتباط بينها وبين مسألة الالتزام فقد تعددت أساليب الإغراء من البنت للشاب حتى في مسألة التدين نجد البنت ما أن تبلغ سن 18 سنة تتغير بمائة وجه كل كام شهر في حال ممكن نلاقيها متحررة وبعدها بفترة نلاقيها محجبة ممكن نلاقيها معقدة ومتزمته وممكن نلاقيها على النقيض.
المهم كل هذا لا تتحمله البنت بل يتحمل هذا الجرم الاب والأم وخاصة الأم أصبح هاجس العنوسة والخوف على البنات ومستقبل والبنت وده بيخلي الأسرة غير ثابتة على نمط تربية هي مقتنعة بها لكن تحولت البنت لفار تجارب واصبح التقليد هو سيد الموقف وأصبحت البنت تشعر أنها مسؤولية إلى حد كبير عن اقناع الشاب بها وايضا الشباب عاوز يعيش مرحلته على حريته وعند الزواج بيختار على النقيض تماما ممكن يصاحب 100 بنت وفي النهاية ده إذا تزوج يتزوج بنت هو يظنها خام أو ممكن ربنا يوفقه لوحده خام فعلا الوضع في المجتمع المصري أصبح يمتاز بكونه مسخ أو باختصار كله بيضحك على كله والبنت هي الضحية ومن وجهة نظري الأسرة مجرمة وجانية في حق البنت.


صالح البدري

الفارس الملثم يقول...

بداية انا سعيد بتواجدي في مدونتك للمرة الاولي ..

حقيقي قصة مهمة جدا اللي حضرتك حكتيها , فصدق رسول الله صلي الله عليه وسلم حيث تنبيهه النبوي المدرك لطبيعة النفس البشرية في اتقاء الشبهات , خاصة اننا نعلم طبيعة مجتمعنا في تحويل الشئ القليل لحكايات وقصص , ونحن نذكر قصة السيدة عائشة زوجة الرسول وابنة الصحابي الجليل ابو بكرالصديق ورغم مكانتها الرفيعة التي يعلمها الجميع لم تسلم من حديث الافك ..

اتفق معاكي في الا نضع انفسنا في محل الشك والظنون ..

بوست مميز وقيم للغاية ...

تحياتي وتقديري

صبرني يارب يقول...

شكرا لك يا فارس وانت نورت المدونه وصاحبتها ويارب دايما منور

وبالفعل اشارتك لحادثة الافك الى دليل ان مافيش حد فوق الشبهات وزي ما القرآن بيقول اذا جائكم فاسق بنبأ بتبينوا .
يعنى لازم نتأكد من صحته او عدمها مش نصدق او نكذب عميانى

وشكرا لك

صبرني يارب يقول...

الاخ صالح والله نورت

حضرتك تختلف برااااحتك خالص انت على راسنا استاذنا
لكن حضرتك ما خدتش بالك من كلامي انا اساسا مش ضد تواجد البنت والولد فى المكان نفسه او مايدعونه بالاختلاط .
لكن انا رايي انا الاختلاط ده مقنن عندنا فىالدين .
لو التزمنا بالقوانين ده هايكون هو ده المناخ الصحي لتواجد الشباب والبنات فىمكان واحد .

اما حكاية ان البنت بتتفنن فى اغراء الشاب عشان تقنعه بها وتفوز القوز العظيم
فاسمحلي اختلف معاك كل الاختلاف .
لان فى الصوره دي يكون البنت هى المذنبه الاولى لو ما كنتش الوحيده .
لكن الحقيقه انهم كلهم فى بوتقه واحده من الخطأه بدرجاته

لكن تقدر تقول ان البنات زيهم زي الشباب برضه ماشيين حسب الموضه يعنى بيتحجبوا عشان الحجاب والايشاربات موضه
وبتلبس الاسدال عشان برضه هو موضه .

اما نقطه ان الناس كلها بتضحك على بعضها .
ان كان ذلك صحيح فما حدش هايضحك على ربنا . كل واحد هايخد الى يستهله برضه
ولو كان الولد الى عرف 100 بنت ماشيه معاه واخد واحده خام زي ماحضرتك بتقول (كلمة خام دي بتضايقنى جدا)
فقدامه احتمالين لا ثالث لهما :
الاول انه يكون هو الاول فى حياتها بمحض الصدفه لكن مش هايبقى الاخير .
والثاني انه ربنا يسترها معاه ويبقى ا لاخير لكن هايخلف بنات ويشوفها فى بنته بدل المره 100 زي ماعمل فى بنات الناس بالظبط .
طبعا الا من تاب وآمن وعمل صالحا ثم اهتدى .
وكذلك الوضع للبنات برضه .ربنا ما بيظلمش حد يا استاذنا صدقنى يمهل ولا يهمل .
ومن ناحية الضحايا هما بقوا كتير على جانبي الطريق لكن يتساوى البنت والولد فى نظري فى المشكله دي .
وشكرا الف شكر لك يا استاذنا الغالي ونوووووووورت واضفت

صبرني يارب يقول...

كناري نورتي المدونه

حقيقى صح
لكن بصي انا فى طريقه باتبعها مع الناس الى ما يسمعوش نصيحتى او اتوقع انهم ما يسمعوهاش

اولا انى اكسب ودهم الى حد ما وبعدين بقى اقل ما يجب انى اظهر موقفي تجاه الى بيعملوه

وده على فكره انا باعتبره امانه انك لما تظهر موقفك الرافض لتصرف ممكن سبحان الله يأثر في الشخص من غير ما تتكلم ولا تتعصب ولا حاجه .

وطبعا لا اترك فرصه سعيده بالنسبه لي انى انا الى اسم بدنه بكلمتين كلما استدعى الموقف .
وطبعا بالذوق كله ويكون السم عليه شوية عسل كده عشان ما يقدرش يقول لا
نورت كناري

احساس لسه حى يقول...

عزيزتى
انتى بتتكلمى على حاجات بالنسبة لللى بيحصل عيين

الدنيا باظت اكتر من كده

والسلطة انتى متكلمتيش عنها فى البوست

السلطه اكبر مما تتصورى

وربنا يستر

تحياتى

سلام

صبرني يارب يقول...

اخي احساس حي

أنا للاسف عارفه ان بقى في مش سلطة خضار لا سلطة طحينه وبابا غنوج كمان.

بتهيئلي لو ما كنتش عارفه كان يبقى احسن على الاقل الواحد يبقى اعصابه مرتاحه .
وبعدين يا اخي الفاضل الى وصلنا للي احنا فيه والله العظيم هو اننا من الاول تساهلنا وبصينا للمواقف دي على انها صغيره ومافيهاش حاجه .
بكن ده طبعا مش صح كل طريق له بدايه والطريق اوله خطوه .
وطب الطحينه اوله معلقتين سمسم ومعلقتين زيت وشويه شويه يتحول لسلطة طحينه ولبخ افرنجي من الى قلبك يحبه

ولما يكون ده موقف الرسول فى حاجه زي كده يبقى حالنا احنا يستاهل ايه ؟؟؟؟؟

شكرا اخي الفاضل نورت المدونه وصاحبتها

اللؤلؤة المكنونة يقول...

أنا كل بشوف منظر من المناظر ده
بحاول أحسن الظن وأقول
أكيد زوج وزوجة
أو أخ وأخت

بس برجع لنفسى وأقول
معقول فيه دلوقتى زوج يمشى مع زوجته المشية الشاعرية ده ماسكين ايد بعض وعنيه ما بتفارقش عينيها



أنا بصراحة ان شاء الله لما ربنا يسهل واتجوز
عمرى ما همشى مع جوزى مشية فيه
أذى للناس أو تهييج لشهواتهم أو مشاعرهم
ايه اللى هيعرفهم انه جوزى ؟
ده الواحد بعد كده هيمشى بالقسيمة



ربنا يهدى شباب وبنات المسلمين ويهدى ءاباءهم ويفوقو بقى وياخدو بالهم من ولادهم وبناتهم حبتين


نرجع ونقول المهم الأساس
والتربية منذ الضغر

معلش طولت عليك
أصلى اتعديت؟؟؟؟؟؟؟

صبرني يارب يقول...

نورتي يا لؤلؤه والله

وكلامك صح ميه الميه

واما حكاية الازواج الى مش بيمشوا ماشيه شاعريه والصباع الصغير مع الصباع الصغير وكده يعنى
فده في رايي ان اي زوجين ربنا رازقهم حب وود بينهم يبقى عندهم اخلاق كفايه تمنعهم من الهبل المنغولي الى بيعمولوه العيال فى الشارع .

والحب ممكن تشوفيه فى عين اثنين من نظرتهم لبعض من غير ما يبربشوا لبعض ولا يمسكوا ادين بعض .

وانتى تطولي براحتك خالص يا جميل مدونتك وبيتك ومطرحك .

الباحث عن الحقيقة يقول...

صبرني يا رب
الاخت الكريمة ام مريم
امال مين ام خالد دى
ما علينا
المهم امبارح وانا بقرا الموضوع ده النت فصل علي صوباعى
هههه فقعدت بقى قريت كل المواضيع لغاية ما الصفحة خلصت
ما شاء الله يا ام مريم
عندك مقدرة فظيعة على الرغى
ايه ده
عينى عليكى بارده
استمتعت جدا والله
وفى انتظار بحوثاتك الاسلامية ..هى فين؟؟؟
وتحياتى الى رضا وواولاده
قولى له : الكرتونه اللى بيرجع يشتريها بمية وعشرين يبيعها بمية واربعين علشان يعوض خسارة يوم ومكسب يوم
تحياتى
هى كرتونة ايه بالظبط؟
ههههههه
السلام عليكم

mostafa rayan يقول...

طبعا انامعاكي في رايك دة المصيبة بقي ان الاعلام دلوقتي بيطلع الحوار دة على انه عادى جدا وبيس قوي فلان بوي فريند وعلانة جيرل فريند والناس بتقلد وربنا يستر علينا

Anonymous يقول...

السلام عليكم يا صبـــرني

حضرتك دايما كده تختاري المواضيع اللي حالتها صعبة دي والواحد مش بيبقى عارف يقول ايه ولا ايه ولا ايه

ما عليـــــــنا

شوفي يا أختي الكريمة الأول والأصل على تربية الأهل على الطرفين الولد أو البنت

بمعنى أنا قرأت عن أب يشجع ابنه أنه يتكلم مع بنات ويدردح كده وهاتك يا زن في ودن الواد في الأخر الواد بقا بتاع خمرة وكباريهات وبلاوي طين

ومحدش بقا قادر عليه وفي نهاية الأمر قتل أبوه عشان ما اداهوش فلوس كفاية يسهر بيها في النيلة الكباريها

ومن ناحية كلام البنت مع الولد عادي جدا
بس لازم تكون له حدود توقف كل طرف عند حد معين ما يتخطاهوش

بمعنى في الجامعة عادي البنت والولد يتعاونوا على الاسئلة وشرح حاجات لبعض

بس لما البنت يبقى لها بديل بدل ما تسأل زميلها تسأل زميلتها دي حاجة تانية
وبعد ما تسأله السؤال اللي تبقى مخترعاه

تجر كلام والأخ ما يصدق ويتبسط ويفرح ويزغرظ ويروح يقول لأبوه يا بابي الحق يا بابي انا اتعرفت على بنت في الجامعة

يزغرط الأب لو كان يعرف يعني ويقول أخيرا ابني بقا راجل مع العلم ان نفس الأب عنده بنت في كلية تانية ممكن يقتلها لو عرف انه قالت السلام عليكم لزميلها في الكلية

دي تبقى ازدواجية منيلة ولا لأ

مش عارف أقول ايه بجد يا صبـرني

ولنا في رسول الله أسوة حسنة

اللهم صلي على رسولنا الكريم

أحييك على اقتباسك لموقف رسولنا الكريم يا صبـرني عشان توضحي اسلوب التعامل المفروض بين البنات والأولاد

وان لازم ناخد بالنا من تفكير المجتمع وكل حاجة تكون باينة ادامه وواضحة

أنا عن نفسي ومش هتكلم غير عن نفسي لما هاكلم زميلتي في الكلية هيكون بكل احترام مع وضع الحواجز طبعا

بس طبعا ما ينفعش اقول اختي والكلام الفاضي اياه اللي بنضحك على روحنا بيه

دي زميلتي المحترمة وهي بتحترمني عشان انا بحترمها وخلاااااااص

بس ما ينفعش اخدها ونتفسح واعزمها على كوباية ينسون عند قهوة عم عبدو
والكلام الفاضي اياه ده

والحلال بين والحرام بين

اخيرا هقولك اني برضك مش عارف اتكلم ولو ان الموضوع يستاهل الرغي المفيد للصبح

بس دماغي قفلت على كده

تحياتي ليكي ياصبرني

التوقيع/// THE WHITE KNIGHT

صبرني يارب يقول...

باحث عن الحقيقه
أباحث ارى ؟؟

نورت يا باحث والله

الف سلامه على صوابك كويس ان النت حبسك فى الصفحه عشان يبقى لا مفر .
والرغي ده موهبه مش اي حد يعرف يرغي الرغي بتاعي ده.شوفتوا الرغي بقى موهبه هههههههههههه .
ونقول كمان انا ام مريم ورحمه وخالد اختار الاسم الى يعجبك .

وبالنسبه للكرتونه هههههههه
احنا عندنا محل جملة ادوات كتابيه وهداياولعب اطفال .
وصدقنى حاولت كتير احوله الى تاجر جشع بس فشلت هههههههههههههه

والبحوثات الاسلاميه ان شاء الله آتيه وانا باقول افضل انى انزلها فى مدونه لواحدها .
ونفسكم معانا بقى بس مش عايزه حد يزقل طوب هناك .
ونورت يا باحث والله بجد واسعدني وجودك
والف سلامه على صوابعك .

صبرني يارب يقول...

والله يا اخ مصطفى حكاية بوي فريند وجيرل فريند دي مش عارف بتعصبني ازاااااااي
لان فعلا الاهالي عادوا بيستعبطوا اكتر من العيال .
لنا الله .
نورت اخ مصطفى

صبرني يارب يقول...

وااااااااايت
انت فين يا ابويا انا قلت انت هاجرت

شوف يا وايت انا بيبقى فاضي تكه واحده واخبط الى قدامي فى وشه لما الاقيه بيضحك وسعيد اوي ان ابنه ولا ابنها كل اصحابه بنات ودوشني فى التليفون .
وأه ثم اه لو دخلت معاهم فى نقاش واقولها طب خافي على بنتك ما تشجعيهوش .
بنتى ؟؟؟؟؟؟؟ هو انا بنتى برضه زي دول الرك على الاهل يا بنتى .
ده انا بنتى فى الكليه بميت راجل ما حدش يقدر يقولها بم .
وبعدين انا هاعمله ايه هو انا باقدر عليه ؟؟؟ هو حر مع ابوه .
مع انها من شويه كانت ضبها كله بره بؤها من الضحك وهى بتقول انه بيكلم بنات .

وطبعا بنتها ا لى مسترجله ما بتكملش ولاد خاااالص ( بتتجوز عرفي على طول جايز )
ماهو مش هايضحكوا على ربنا .
شكرا وااااااااات ونورت