الأحد، 11 مايو 2008

وشوشه للرجال

سلام عليكم
يعنى مش عارفه اعتذر للرجاله ازاي على تأخير البوست بتاعهم بس غصب عني يا كباتن والله . والبوست اهو بس ده بقى الستات هاتدخل تقراه عادي اه فرض سيطره بقى على القاعده . وبعدين يا ستات اي واحده عندها مطالب اخرى تتفضل تقول .
وبعدين اي حقد على الستات عشان انا دلعتهم المره الى فاتت وقلتلهم يا ستاتيت مش عايزه جيت ادعلكم واقول رجاجيل لقيتها سخيفه اوي مش لايق عليكم دلع خالص .
نبدأ الوشوشه بقى :
اولا: المره الى فاتت قلت فى بوست وشوشة ستاتيت للستات ( الايثار - الكلام - المشاركه - ساحرة القلوب - تهادوا تحبوا - ممنوع الخصام الطويل ) كل ده معاناااااااااا .
ثانيا: اوعى تفكر انك تحسسها بالغيره عليك عشان تزود حبها يبقى جنيت على نفسك عشان كده هاتولع نار مش هاتعرف تطفيها لانها هاتوصل عندها نوع من عدم الامان من ناحيتك
ثالثا: ما تعلقش كتير على لبسها الى مش عاجبك او مكياجها او حتى شكلها وخصوصا شكلها لوحبيت تبدى رايك فى اي موضوع من دول يبقى لاااازم تبقى حريص اوي وكفايه اوي تلميح من بعيد ويكون قبليه كلمة حبيبتى .
رابعا: اذا حبيت تطلب منها طلب زى عزومه اصحابك مثلا يبقى لازم تحسسها انها هاتعمل كده عشان بتحبك مش غصب عنها والا اصحابك هايباتوا فى المستشفى .
خامسا: لا تذمها ابدااااااااااا قدام اهلك او صاحبتها او اصحابك ويستحسن مش قدام اى حد. لان فى مثل تعتقد فيه كل النساء هو( من قلها زوجها يا عوره لعبوا بيها الناس الكوره)

سادسا: اذا نسيت ان النهارده عيد جوازكم او عيد ميلادها او اى مناسبه انشاله اول مره هى كحت فيها قدامك لما تفكرك مش تقولها ان الموضوع هايف ومش يستاهل مدام هى فاكراه يبقى مهم عندها انت استغرب من نفسك انك نسيت واعترف بخطأك على طول من غير مكابره وياريت تقولها البركه فيكى انتى عقلى تبقى تفكرينى( وخليك لطيف واظبط الموبايل يفكرك بعيد ميلادها وهات لها هديه من غير ما تسألها اجيبلك ايه ولا تديها 100 جنيه وتقولها هاتي الى نفسك فيه ).
سابعا : اذا جابتلك هديه مش مهمه او ورد مثلا مش تقولها صرفتى الفلوس فى هيافه كفايه انك انت نسيت اساسا تجيب هديه او جبتلها هديه خلاط أو شبب .
ثامنا: لما تقابل اى واحده ست او تكلمها فى التليفون احسنلك لما تروح على طول تحكى لها عشان لو اكتشفت من بره هاتبصلك بكل شك وريبه حتى لو كانت متأكده من الموقف.
تاسعا: ما تلغيش شخصيتها بمعنى ما تحولهاش لمسخ حاول دايما تعلمها كل حاجه انت بتعرفها وتكلمها عن شغلك وتاخد رايها فيه حتى لو مش عملت بيه بس تحس انها قالت رايها وبعدين لما يطلع رايك انت غلط هاتقولك لو كنت سمعت كلامييييييي . وصدقنى اول من سيفتقد عقلها لو فقدته هو انت .
عاشرا: حاول تتفرج معاها على برنامج الموضه والميك اب عشان تبقى تسيبك تتفرج على الماتش واتكلم معاها وانت بتتفرج ما تقعدش مشمقنط وتحسسها انها بتتفرج على هيافه وحاجات مش مهمه بس ما تنساش اوعى تعلق على الموديل انها حلوه عشان هاتبقى اخر مره تتفرج فيها على التلفزيون
الحادي عشر: اذا تكلمت عن اى سيده اخرى حتى لو كانت اختك لا تمدحها كثيرا خصوصا لو كانت فى حاجه مش فى زوجتك زي انها مثلا شعرها اصفر وزوجتك شعرها اخضر يبقى نهارك هايبقى الوان حتى لو كانت مامتك . لو لازم تمدح ما تطولش وفى الاخر قولها هو فى زيك انتى ياحبيبتى صلح نفسك يعنى . وما تبقاش قاعد تاكل من ايديها وتقولها فينك اكلك ياماما هاتقولك روح كل عند ماما . كل وقولها تسلم اديكى ده احسنلك يعنى .
اثنى عشر: لا تمنعها من اهلها كلما منعتها زاد شوقها اليهم وحثها على ودهم ما تخلهاش تحس انك ند لهم وبعدين ده لو كنت عايزها تبقى تضحك فى وش اهلك
الثالث عشر : معلومه تهمك كل الستات فى مجتمعنا عندهم مشكله . انهم اتربوا فى كوكب مختلف عن كوكب الرجال بمباديء واخلاق تانيه خالص . تخلى الخجل ممكن يقتل المشاعر جواها قبل ما توصلك . مهما ادعت هى عكس ذلك اعرف ان ده جواها . ترفق بها وحاول تكسر الحاجز الى ممكن يتخلق بينكم للسبب ده وحاول قبل ما يكبر الحاجز ده .
رابع عشر: عاشرها بالمعروف . ورفقا بالقوارير. واوصيكم بالنساء خيرا. وان احببتها اكرمها وانم لم تحبها فلا تظلمهاهكذا علمنا رسول الله صلى الله عليه وسلم فلنمشي على الدرب
وفى النهايه اقولكم ربنا يوفقكم جميعا وشكرا لكم

هناك 33 تعليقًا:

واحدة مفروسة يقول...

ربنا يكرمك على الكلام الجميل ده

أبو خالد يقول...

أبنتى الغالية /أم مريم
جزاك الله خير عن هذه النصائح
الجامعة الشاملة و لى إضافة صغيرة
للزوجين معا يجب أن يحترم كل منهم
حرية الآخر لأننا فى سكن و رحمة
و ليس فى سجن أسمه الزواج و إلا
الزبون ها يخلع..
دمتى بخير و صحة جيدة أنتى و الأستاذ رضا
و الأعزاء مريم و خالد

خمسة فضفضة يقول...

السلام عليكم ورحمة الله وبركاته

ماشاء الله ايوه كده يا ام مريم اديهم شويه من كلامك الجميل

لعل وعسي
:-)

سلام يا قمر

صبرني يارب يقول...

مفروسه حبيبتى

تسلمى يارب انتى الى جميله والله

صبرني يارب يقول...

خمسه فضفضه

على رايك فعلا عل وعسى

ادينا بنقول لما نشوف اخرتهم ايه
هههههههههههه
نورتي يا جميل

صبرني يارب يقول...

ابو خالد استاذنا كلنا

وطبعا مش عايزين الزبون يخلع ههههههههه


ربنا يكرمك على فكره عندي رحمه كمان فى النص نسيتها حضرتك

عشان بس ما تسقطت من الدعوه الحلوه هههههههههه

نورت يا ابو خالد

mostafa rayan يقول...

السلام عليكم
بصي انامش متجوز بس انتي بتقولي كلام مهم قوي الراجل العاقل لازم يفكر فيه علشان المركب تمشي بسلام
بس يعني لما نكون بنشوف برامج الموضة والموديل تعجبني مانا لوماقلتش بلساني هي اكيد هتلاحظ اعجابي من خلال ملامح وشي
والنبي قولي للستات يحاولو يطبقوا اللي بيشوفوه في برامج الموضة في البيت وعلي اجوزاتهم بس
مش يبقوا غفر في البيت وقمر وقت الخروجات
تحياتي ليكي ولدماغك العالية بجد

Darsh يقول...

أنا معاكي في كل اللي قولته

إن شاء الله كده لما أتخرج و أخش الجيش و أخرج اشتغل و أسافر بره و أعملي خمس قروش ... قرشين مش بيكفوا في وسط الغلا ده .... و ارجع أفتح صيدلية فسلسلة صيدليات فمخزن أدوية فمكتب أدوية فشركة صغيرة .... إن شاء الله لو فاض حاجة في العمر بعد ده كله و اتجوزت إن شاء الله أكيد هاخد بكل اللي قولتيه إلا إلا إلا ....

و من فضلك خدي بالك من إلا دي ...

::::::" ثالثا: ما تعلقش كتير على لبسها الى مش عاجبك او مكياجها او حتى شكلها وخصوصا شكلها لوحبيت تبدى رايك فى اي موضوع من دول يبقى لاااازم تبقى حريص اوي وكفايه اوي تلميح من بعيد ويكون قبليه كلمة حبيبتى ."::::::

الزوج من حقه أنه يعلق على زوجته ... مش معقول هيخلي تعليقاته للغرب سواء هو هيعلق على الستات اللي بره بيته أو الرجالة اللي بره بيته يعلقوا على حرمه المصون .... ساعتها مش هتبقى مصون و هو ما عرفش يصونها

كلكم راع و كلكم مسئول عن رعيته .... و المفروض أن الرجل ما يكونش ديوث ...

حق مراته عليه انه يقومها ... و الأولى أن الزوجة تكون ذكية و تعرف ايه اللي مش هيضايق جوزها ... بعلها ... و العين من غير نقطة .

رئـــــيسـة حزب الأحلام يقول...

بارك الله فيكى

la3lahakhier يقول...

اه يا ياختى قوليلهم
تسلم ايدك

صبرني يارب يقول...

مصطفى ريحان

يا سيدى اعمل مش واخد بااااالك من الموديل ايه ده .
انا قلبي عليكم يعنى مش عايزين الفرجه تقلب بواحده ذواقه .
اما بالنسبه لموضوع ان الستات يهتموا بنفسهم دي . صدق اولا تصدق لو الامور كلها صح هاتكون حكاية الغفر دي مظبطه جدا .
وبعدين انت لازم لازم هاتشوف منها ده وده .

ما علينا
نووووورت يا مصطفى

صبرني يارب يقول...

درش

ربنا يوفقك ومش لازم ابدا تستنى كل ده عشان تتجوز والا ما حدش هايتجوز خالص

شوف واحده بنت حلال تبقى شريكتك ورفيقة كفاحك واوصلوا لكل الى بتحلم بيه مع بعض هايبقى طعمه احلى

بس لما تعمل شركه ولا مصنع ما تبقاش تروح تتجوز واحده غيرها عشان تغير جو .

اما الا بتاعتك ما لهاش دعوه خالص بكلامي

انا اقصد تعليق من ناحية شكله حلو ولا وحش ده جوه البيت
اما بره البيت فطبعا انت مسؤل عنها
وطبعا لما تقولها انت احسن ما يقولها الغريب

لاحظ الفرق بين الاثنين .
ونورت يا درش

صبرني يارب يقول...

لعلها خير

تسلمى يارب وتعيشي ادينا بنقول يا اختي لما نشوف اخرتها معاهم

نورتي يا جميل

صبرني يارب يقول...

رئيسة حزب الاحلام

تسلمى يارب يا جميل ونورتي

Anonymous يقول...

السلام عليكم يا صبرني
حظك كنت جايب معايا الشومة والرجالة

بس الموضوع طلع كويس ومالهوش حل بجد يعني

ومش هقدر أقولك الا:

كلام جميل كلام معقول ما اقدر اقول حاجة عنه

بس برضك هيا كمان في نقط من الوشوشة دي لازم توصلها

يعني الغيرة دي هيا كمان المفروض ما تخلهوش يغير عليها عشان أل ايه تشوف معزتها عنده

طيب ما هو طبيعي هو الأخر هيولع فيها

ثانيا برضك المفروض تقدر شغله ومجهوده اللي بيبذله عشان في الأول والأخر كله ليها ولعيالها (( اللي هما عياله طبعا ))

ثم يا صبرني الستات اليومين دول هما اللي بيعلقوا على لبس الرجالة مش العكس
يعني يا ريت لو تفهميهم ينوبك ثواب ((
_ ** _ ))

بس بجد اهم حاجة علقت في ذهني حتة ما تلغيش شخصيتها دي
أهم حاجة أنه يسيبها تتصرف في مواقف أكتر باشراف من حضرته طبعا

عشاااااان ما تبوظش الدنيا

على كل تحيااااااتي ليكي أختي الفاضلة

التوقيع // عمو THE WHITE KNIGHT

بت خيخة وأي كلام يقول...

فكرتينى يا ام مريم
ببوستات كنت كاتباها من فترة
واحد اسمه من فضلكم البوست ده حريمى
والتانى اسمه البوست الرجالى

هتلاقيهم عندك فى صحيفة السوابق بتاعتى
فى شهر يناير

اقريهم كدة وقوليلى رايك ايه

تحياتى ليكى
اختك خيخة

صبرني يارب يقول...

عمو وايت

هههههههههههههههههههه

من دور اولادي وايت انتم عارفين

انت ما قريتش الوشوشه بتاعة الستات شكلك ابقى اقراها

ونوووووووورت

صبرني يارب يقول...

خوخه حبيبتى نورتي

الاستفتاء بتاعك كتبته والله يا حبيبتى وقبل ما ابعته بثانيه النور قطع من ساعتها مش فاضيه ارجعله تاني بس ان شاء الله هابعته لكي



والبوستات الى بتقولي عليها ان شاء الله هاشوفها واقولك .
ماهو احنا يا اختي كلنا فى مركب واحده انا عارفه .

نورتي يا خوخه ويعيش حزب النسوه يا يعيش

mayada يقول...

هاااااااااااا مين هناك
المكان كله محاصر انت بتنزلي البوسط
ده امتي امال لو مكنتش خليفتك في الملاعب
طيب اديني اماره اشاره كلاكس
بجد ياام مريم جزاكي الله خيرا
اول ما اتكعبل فيه هكتفه واجيبه
يقرا البوست واقوله ياتعملني زي
ماام مريم قالت يابلاش
مش بلاش قوي يعني ههههههههه
مش عاوزه اقاطع
اممممممممممم
بصي اكتفه واجبيهولك تديله درس خصوصي
احسن

الباحث عن الحقيقة يقول...

قرار رئيس الجمهورية بتأميم صبرني يا رب
رئيس الجمهورية
مادة واحد
تأمم صبرني يا رب جمعية مصرية مساهمه لحل الخلافات الزوجية والمستعصية وباطنه واطفال وعلى الساكنين خارجها مراعاة فروك التوكيت

تسلمي يام خالد عين العقل والله
خاصة اخر بندين
خاصة خاصة برضه اخر بندين
ربنا يكرمك ويسعدك

صبرني يارب يقول...

مياده حبيبتى

منزله البوست فى النهارده الصبح بس والله مش من وراكي يا جميل بس عليه اقبال جماهيري مش عارفه ليه

عنيه اول ما انزل البوست هاعملك كلكس يصحى المنصوره كلها

وبعدين ماشي يلا كتفيه وهاتيه وتعالى

ولو انى لسه من كام يوم قلت لن اعطى دروسا فى الحياه بعد اليوم كلا والف كلا عشان واحده نصحتها فى الله طلعت عيله وجابتلى الكلام .

بس انتى خليفتى فى الملاعب كعبليه انتى لو سمحتي ما تستنيش تتكعبلي فيه وهاتيه على طول وتعالى

صبرني يارب يقول...

باحث عن الحقيقه

بلاش التأميم يا اخويا الله يصلح حالك بيجبلى حساسيه بسبب الى حصلنا من ايامه لحد دلوقتي .

وتسلم يارب احفظ البوست ده بقى صم

عندى منتهى الاستعداد لمساعدة الناس تحل مشاكلها بس يكونوا عايزين يحلوها مش يستهبلوها .

شكرا لك يا باحث نورت

FaceMoon يقول...

الله الله بجد مش عارفة اقول اية
كلام كبير وموزون ومعقول ولو كل واحد فكر فية حتبقى كل الجواز جميل اوى
بارك الله فيكى وفى كلامك الجميل

صبرني يارب يقول...

فيس مون

تسلمى يارب انتى الى جميله وربنا يكرمك ان شاء الله
نورتي يا حبيبتى

Anonymous يقول...

الله الله الله

المهم انو يكون عسل
ههههههههه

صبرني يارب يقول...

غير معرف

الله عليك يا سيدى الفاضل نورت

Ali-7ob يقول...

ام مريم
شكر خاص لحضرتك على النصائح الغالية وفى الحقيقة انا كنت متوقع اقرأ نصائح معينة مشتركة عند كل السيدات لكن فى الحقيقة لقيت حاجات جديدة زى لما تكلم او تقابل امراة اخرى تروح وتحكى لمراتك دى جديدة
الله يباركلك فى حياتك ويسعدك

فين البوست الجديد فى رؤية اسلامية متواضعة وماتخفيش هاقراوادور قبل ما اعلق عشان ماتقوليش على حاجة
تحياتى ليكى
على حب

صبرني يارب يقول...

علي حب

الف شكر لك . لا ده مهمه اوي الحكايه دي لانها لو نسيت ممكن تحس انك مخبي عليها ويكون مخها مفرقع وده عادي يبقى ليلتك الوان .

والبوست الجديد عنيه النهارده ان شاء الله ينزل والله ما لحقتش بس انزله وتنوره طبعا وتقول الى يعجبك

دكتور حر يقول...

الله الله


احفظ يا بني



وقولي يارب

صبرني يارب يقول...

دكتور حر

واخدينك غياب ما ينفعش كده

نورت والله والله الله عليك يا اخي الفاضل

Anonymous يقول...

http://masrelgadeeda.blogspot.com/


اهلا ام خالد اشكرك على تشجيعى على عمل مدونه ....وده عنوانها ..انا اسامه جزاكى الله خيرا

mohamed elkhoy يقول...

بجد جميل جداااااا

mohamed elkhoy يقول...

بجد جميل جداااااا