الأربعاء، 28 مايو، 2008

احنا وهما (العرب والغرب )



السلام عليكم اولا

فاكرين يا جماعه البوست الى كان من زماااااان اوي ده بتاع احنا وهما الستات والرجاله ؟؟؟ مش انا قلتلكم ان فى احنا وهما كتير وعايزين نتكلم فيها .
مش عارفه كنت ناسيه الحكايه دي ومش عارفه افتكرتها ازاي برضه المهم . النهارده بقى نتكلم عن احنا وهما العرب والغرب أو نقول يعنى العرب والناس التانين دول الى بيقولوا عليهم متقدمين عقبالنا . بس مافيناش من زعل وخناق .
نبدأ الرغي بسم الله طبعا ونشوف الفرق بينا وبينهم :

أولا : هما يربوا الطفل ويعلموه ماشي اول ما يبقى 16 سنه وياخد الثانويه العامه . بس خلاص اخرج اشتغل بقى يا حلو واعتمد على نفسك ولو عايز تكمل فى الجامعه اصرف على نفسك ومش بعيد يطردوه من البيت كمان لكن ممكن يفضل معاهم ويساعدوه يكمل تعليمه ،يساعدوووووه .
احنا بقى : اخر حلاوه نطبطب على الواد طول عمره وندلع فيه على الاخر (على راي الست نانسي ) ونوديه احسن مدارس انشاله نجوع وينبوس ايده كل يوم عشان يذاكر وينجح ويجيب مجمووووووع . ونعيط ونبات قدام لجنة الامتحان وكده يعنى . وبعدين ندخله الجامعه ونفضل نصرف عليه وهو جايز فاشل اساسا وبيسقط وبعدين يتخرج ويقعد ويستنى ابوه يشوفله واسطه عشان يتعين فى الحكومه وما يتهبدلش وابوه برضه يجيبله شقه وامه تعمل جمعيه وتجيبله الشبكه ونقعد ندلع ونهنن فيه كده الى ما شاء الله مش مشكله عاااااااااادي ونصرف عليه لحد ما يبقى 35 سنه عااااااااااااادي .

ثانيا : الشغل والاجازه . هما بيعيشوا حياتهم فى الاجازات الاسبوعيه او السنويه مش بيأجزوا باخلاااص ويتفسحوا ويظبطوا نفسهم على الاخر . لكن ايه فى أيام الشغل كل شغال وكله بينام بدري وكله مش فاضي .
احنا بقى : نروح الشغل واحنا متأخرين ومكسلين ونعسانين ويوم الاجازه نقضيه نوم ويمكن ناخد معانا البيت كام ملف نحطهم قدامنا كده نعذب بهم نفسنا ونقنع نفسنا اننا مشغولين . وايام الشغل نتفنن فى الخروج من الشغل قبل المعاد ونضيع وقت الشغل زي الفل ومافيش اي التزام لا باجازه ولا بشغل نعزل الخبطه دي اد عنينا. ولا منا اشتغلنا ومنا استمعتنا بالاجازه .

ثالثا : الموت هما واحد مات ممكن نزعل عليه طبعا ونعزي فيه بس يوم واحد ونسيب بقى اصحاب الفقيد يرتاحوا ويكملوا حياتهم ولا يكتئبوا حتى على راحتهم .
احنا بقى نفضل كابسين على نفس اصحاب الفقيد الى مش ناقصنا اصلا 3 ايام عزا وخد عندك 3 اخمسه واربعين مواويل ورغي ولك حريم للصبح واصحاب المعزى قاعدين يناموا على نفسهم ومش شايفين قدامهم . ده غير بقى قوانين لبس الاسود الى بتمتد سنين وكده يعنى .

رابعا : الجواز : هما الفرح يوم واحد ويمكن ساعه واحده والعريس ياخد عروسته ويمشي وديتهم علبتين صلصله فاضين مربوطين فى العربيه وويل يا ويل ومشيوا وخلصت .
احنا بقى خد عندك حنه وفرح وصباحيه وأسبوع كامل من الضيوف والمواويل . وساعة الفرح بتاع خمسين فرد يطلعوا مع العروسه شقتها ومافيش مانع يتخانقوا كمان عندها وعيال تبوظ فى الشقه ومطلوب عشرين عربيه عشان تمشي تلف انحاء الجمهوريه ورا العروسه وتكلكس ويعملوا خمسات ولا مش عارف ايه الى بيقولوها دي ويقفوا الشارع ويقرفوا الناس كام ساعه كده على الماشي .

خامسا : الجهاز اه ده تبع ا لى فوق هما كل اثنين هايتجوزا بيصرفوا نفسهم هما يجيبوا كتير يجيبوا قليل هما حرين . احنا بقى لو ما كانش الاهالي يتخانقوا مع بعض خمسين خناقه ويعملوا جمعيات للركب ويدينوا لكل الخلق (ده الاهالي مش العرسان) ويفرشوا شقه ممكن تكفي خمس افراد يعيشوا فيها ويملوها فرش واطباق وحلل من كل صنف ولون يكفوهم عشر سنين قدام ما يرتاحوش ولا يتجوزوا (امال الخيبه جايه منين يعنى )

سادسا : هما دايما باحس خصوصا الامريكان ان لسانهم طويل اوي وبيقولوا كلام وحش اوي لكن والله اعلم انا ما روحتش هناك عمري ما شوفت بعينى لكن هما لما بيشتموا بعض بيبقوا زعلانين وبيتخانقوا ده العادي بتاع البنى ادمين بتهيئلي (وممكن الناس تشتكيهم كمان ويرحوا فى داهيه) .
احنا بقى ممكن تسمع اقذع الشتائم والالفاظ حتى يمكن وانت قاعد فى بيتك من اثنين فى الشارع بيهزروا . اها بيهزروا مش عارفه لما بيتخانقوا بيعملوا ايه ؟؟؟
اه لا عرفت مطاوي على طول .

سابعا : هما عندهم اختراع عظيم اسمه تنظيم المرور وقواعد المرور واشارات ا لمرور والناس هناك عقبال عندكم بيبصوا فى المرايات ويستعملوا الاشارات وحاجه زي الفل .
احنا : انسىىىىىىى ان كان على القوانين والقواعد موجوووووووووده بس الى ينفذها بقى ياعم الحاج والشارع كله خالي تماما من الاشارات سواء اشارات المرور فى الشوارع ولا الاشارات بين السواقين وبعضهم هيييييييييييييييصه (والفلوس نازله عليه وهييييييييصه ) ده الى هو عسكري المرور طبعا .

ثامنا : هما عقبال املتكم برضه وعلى ما سمعت انهم ممكن يعملوا استفتاء داخل مدينه معينه مثلا الناس تقول رايها فى انهم يعملوا هنا نافوره ولا ما يعملوش مثلاااااااااا . والناس بتقول رايها وبينفذوا رأيهم .
احنا بقى : اخترنااااااااااااه اخترنااااااااااااه . مش عارفه هو ايه بس كل حاجه اخترناه يعنى من اول اسم الله عليه لحد سيادة اللواء المحافظ( عيييييب ما حدش يقول سيادة اللواء ممنوع على فكره ) لحد بتوع الحكم المحلي حتى لحد تمثال رمسيس التاني الى حطوه فى المنصوره عندنا الى اتكلف عمله 23 مليون جنيه .واحنا طبعا ا لى ايه ؟؟؟ اخترناااااااااااااه.

تاسعا : هما عقبال عندكم بررررررررررضه بالقوي عملوا الولايات المتحده الامريكيه . والاتحاد الاوربي . وماشين زي الفل . لا زي السمن على البتنجان الاسود بس ماشين يعنى .
احنا بقى : بالصلاة على النبى ما عملناش اي اتحادات لها قيمه واستمرت اللهم الا الامارات العربيه المتحده الى هما اساسا لولا الشيخ زايد وثروته ما كانوش راحوا تحت جناحه .
وتحيا الامه العربيييييييييييييييييييييييه .
عاشرا : هما ناس عندهم برود اجتماعي وعاطفي فظيع والعلاقات الاجتماعيه بتاعتهم تعتبر معدومه حتى بين الاهالي واولادهم . احنا بقى عندنا ترابط عائلي جامد جدا خصوصا فى الريف تلاقي الواحد من دول عارف البلد كلها واصلها وفصلها ونصهم ولاد عمه والنص التاني ولاد خاله عادي . لقيتلكم ميزه اهو يلا انشاله ما حد حوش . ولو ان انا ساعات كتير باتخنق من الترابط لما يتحول لحشريه بشعه بين الناس وبعضها .

وأفتكر كفايه كده اصل شكلكم زهقتم من رغيي النهارده . نستودعكم الله يا كتاكيت .

هناك 26 تعليقًا:

واحدة مفروسة يقول...

موضوع شيق....بس همه الغرب عندهم حاجات كتيره كويسة....
احنا بس لو استخدمنا ذكاءنا فى اننا ناخد منهم الحاجات الكويسه...حنبقى احسن من الكل يعنى همه المغزى فى انهم يسيبوا الولد من سن 16 ده علشان يتحمل مسؤلية نفسه همه ربو لسن معين و غرسوا كل الاسس ...و يسيبوه
ومن هنا بتنشف الشخصيه....
همه فى ايام العمل معندهمش اغلبهم الحاجات اللى بنشوفها فى الافلام همه بينامو بدرى و يومهم بيبدا عند الفجر و اثبتت كل الدراسات و الابحاث ان احسن جو مفيد للجسم لتجديد الخلايا هو عند الفجر و احسن اشعة شمس للعظم هيه الشروق...يعنى همه بالفطرة و التعود بيعملو الصح و احنا بالتقليد الاعمى للى همه بيصدروه لنا بنعمل العكس....

انا شكلى حرد ببوست...بس انتى كان حقك اولا يبقى بوست لوحده و ثانيا....و هكذا
الخلاصه الموضوع جميل و مقارنه يارب تنفع البعض

صبرني يارب يقول...

مفروسه حبيبتى منوره

لسه منزله البوست حالا لحقتينى ازاي منوره يا جميل والله.

والله يا مفروسه انا لو دورتي تلاقي اغلب ا لبوستات بتاعتي كل نقطه عيزه بسوت لواحده لكن انا بقى تقريبا من كتر الرغي الى في دماغي بابقى عايزه اكتب كل حاجه فى بوست واحد .

انتى تردي بعشر بوستات مدونتك وبيتك وبيت الرغي الاصلي يا بنتى

نورتي يا جميل

tamer.sala7 يقول...

اعزريني علشان انا تعليم مجاني هو احنا دي تقصدي بيها المصريين بس ولا العرب كلهم ؟؟

صبرني يارب يقول...

تامر
والله كلنا مجاني يا اخويا ما تزعلش نفسك بس انا نص مجاني ويارته كان دام اي تعليم اصلا مجاني ولا مش مجاني اهو ما عادش خالص تعليم

واحنا دول كنت اقصد العرب كلهم طبعا لان احنا كلنا فى النقط الى انا ذكرتها اعتبرنا فى بوتقه واحده يعنى (حلوه بوتقه دي )

يعنى فى النقط الى انا اتاكلمت فيها فعلا مشتركين فيها الا لو كان عندك راي تاني نحب نسعمه ونورت

جنّي يقول...

هذه الصورة الوردية التي يصدرونها لنا من خلال إعلام قوي وسينما مسيطرة .. من خلال رامبو القوي الذي لا يقهر ولا يفنى سلاحه ومخلص البشرية من العرب الهمج والمسلمين الأرهابيين ..
ولكن هناك صور كريهة وسلبية كثيرة عايشها من سافر إلى الغرب أو أمريكا منها الإنحلال الأسري والأخلاقي ..
منها الفساد على أعلى المستويات السياسية والإجتماعية ..
منها السجون الممتلئة بأخطر مرتكبي الجرائم من كل الأنواع ..
منها قلة النظافة ..
منها كثرة العاطلين عن العمل ..
منها أطفال القمامة ( مواليد في صفائح الزبالة )..
منها الأمهات المراهقات بلا ازواج ..
منها انتشار المخدرات بين أطفال المدارس وشباب وشابات الجامعات كالماريجوانا..
وغيرها الكثير والكثير لو عندك وقت مش هاخرج من المدونة حتى أنتهي منها ..

الصور السلبية عندنا لا يمكن لذي بصر إنكارها ولكن هناك من الصور الإجابية الكثير والكثير ..
أسف للإطالة وسامعك بتقولي ايه اللي جابهولي الباحث واللي بيعارض في كل بوست واللي بيقول أنا أعارض إذا أنا موجود ..
على فكرة أنا لست كذلك ولكني أحب إثراء الحوار ..
الموضوع رائع لأنه يضغط على موضع الألم لدينا ..
لعل وعسى نغير ما بأنفسنا ..
تحياتي
said

صبرني يارب يقول...

جني

انت نورت انت وباحث وكل من يجى من طرفكم ونشيلكم على راسنا

مين قالك انى باتضايق من الى يقول انااعترض بالعكس
انا بارحب جدا باي معترض كلمة منا وكلمة منه عااااادي.

واحترم الاختلاف جداا طالما فى الجوانب الممكن ا لخلاف عليها .

والكلام الى انت قلته تمام التمام ومظبوط ميه الميه وانا لااعارضه بالعكس تماما .

دايما باقول الغرب ان كانوا متقدمين اقتصاديا وعلميا
الا انهم منفكين ومنحلين اخلاقيا واجتماعيا . وباعترفهم هما شخصيا عارفين ان العرب والمسلمين متماسكين وناجحين اجتماعيا بفضل تأثرهم وتمسكهم الى حد ابعد منهم بدينهم .
وانا مش متأثره بافلامهم واعلامهم لا انا عديت المرحله دي ولله الحمد .
حتى من الخبره بقى انى اعرف ايه هو الطبيعى وايه هو الى مدسوس وسط العمل الدرامي اظهارا للصوره المراد رسمها وخدمة لسياسة الغرب عموما .

لكن انا قصدت فى البوست بتاعي اقول ادي الى مش مسلمين بيطبقوا الصح الى هو صح من وجهة نظر دينا ومعاييره .

بيجدوا فى العمل ويتقنوا عملهم بيحترموا خصوصيات بعضهم .
بيعتمدوا على نفسهم ويربوا عيالهم بشخصية مسؤله مش تافهين مرفهين ليس الا .
بيحترموا الراي الاخر ويحترموا الوقت ويقدروه .
وكل النقط الى انا اتكلمت فيها ديى محاسنهم .
نبصلها يا ريت من بعيد حتى ؟؟!!!

زي ما هما بيبصولنا وعندهم دلوقتي جمعيات تدعوا لعدم ممارسة الجنس بدون زواج .
وصراحة من احدى الناشطات فى المجال ده: افتكر قالت ان في الشرق ما عندهمش المشاكل دي لانهم ما بيمارسوش الجنس قبل الزواج ودى من تقاليدهم (ما قالتش دينهم يا ما تعرفش يا بتستهبل الله اعلم )
فى منهم كتير ما يعرفش صدقنى .
وبعدين انت تطول براحتك تماما
مليون مره اقولكم هنا موطن الرغي الاصلي يا جماعه .
ادينا انا الى رغيت تاني
نووووووورت يا جني ودايما منور ومعارض يا سيدى . مع انى راي مش متعارض معاك

ليلـــــــــــــــــــــــــــــى يقول...

والله بصى المشكلة كلها البعد عن الشريعة بمعنى:
1. الحِداد: فى الاسلام 3 أيام و يكون اللبس أبيض مش أسود (ولا فيه بقى 40 و لا 50 ولا سنوية و الهبل ده)

2.الشغل والاجازة: و ده نظرا للتعليم الهايل بتاعنا اللى بيخللى الامتحانات بعد العيد و يخللى العيال يذاكروا فى العيد. و غير العيد الامتحانات بتبقى أول يوم دراسى فى الاسبوع. ولو مفيش عيال بتلاقى الناس فى ضغط شغل و مربوط فى ساقية عشان بيته فطبعا بيصدق الاجازة تيجى و ينااااااام.

3. تربية الطفل الى سن 16: و الله الموضوع ده هايل يا ريت نعمله هنا بس يبقى فى اشراف من جانب الأهل لأن السن ده خطر و لازم فيه متابعة (المشكلة بره لما الولد يصرف على نفسه بييعتبر نفسه مستقل فى كل حاجة و مبيديش لحد الحق انه يحاسبه حتى لو بيشرب مخدرات علشان كده لازم المتابعة زى ماقلت)

4.الجواز: دلوقت بقى فى ناس بتعمل فرحها زي الأجانب و حضرت فرح كده. حاجة مريحة بجد و لا بتصرخ فى ودن اللى جانبك عشان تسمعه و لا ناس بترقص بطريقة مقرفة و لاحتى تكلفة فى السواريهات (من جانب المعازيم) بجد حاجة تفرح و محترمة و تخليك فاكر اليوم ده بكل خير.

5.و6 و8و9: يا ريت فعلا نبقى زيهم فى ده بالذات

7. المرور: المرور بجد فى كل مكان حتى دول الخليج (هو بس مش عندنا فى مصر)

10. الترابط: مش حقول غير كلمة واحدة و ده حديث عن الرسول صلى الله عيه و سلم (من حسن اسلام الرء تركه ما لا يعنيه) و فى خيط رفيع بين الحشرية و الاهتمام ياريت الناس تفهم ده :)

أسفة للإطالة و يا ريت تتقبلى مرورى :)

Appy يقول...

عارفه والله كنت هاكتب موضوع زى ده بس اسمه خدوا ده منهم وسيبوا ده هههههههههه
لسه كنت بفكر بس عاوزة اقول مش كل حاجه عندهم وحشه ومش كله حلو بس هما منظمييييييييييييين عننا

صبرني يارب يقول...

redليلى:

نورتي جدا جدا وتسلمى ويسلم مرورك علينا واتمنى نشوفك دايما

وشكرا على الرد الجميل الى اتفق معاه كليا

صبرني يارب يقول...

اليس

هاتدفعى نص ايجار المدونه دي ههههههههههههههههههه
رغايه طالعالي

بصي بقى احنا ناس كويسين اه بس مش كلنااو بالاحرى ايه العموم دلوقتي النسبه الاكبر

انتى بتشتغلي اه بتشتغلي وما بتاخديش حقك ؟؟؟
طيب ما تشتغليش عنده شوفي غيره

والموظف الحكومي بيشتغل ومرتبه قليل ؟؟؟ طيب ليه قابل ؟؟ ما يسيب الحكومه ويشتغل فى غيرها ؟؟؟؟؟؟؟؟؟؟!!!!

شايفه ان بتوع القطاع الخاص مفتريين ؟؟
ومش شايفه ان العاملين كمان مستهبلين ؟؟؟
تقدري تنكري ان قدام شغلك الزياده عن طاقتك ده فى واحد مأنتخ ومستهبل معاكم فى الشركه وعامل نفسه بيشتغل ؟؟؟!!!!!

لا مش واحد تلاقي فيه ثلاثه اربعه مسترحيين على حسك
فى الحكومه بقى تلاقي عشرين ثلاثين قاعدين لا شغله ولا مشغله وواحد بس الى بيشتغل .
الموازين كلها غلط فوضاويه فى كل حاجه

مبالغين ومستهبلين فى كل حاجه يا اليس

وان كان يا ستى على الحمد احنا حامدين ربنا وشاكرينه على فضله ونعمته التى لا تعد ولا تحصى .

لكن بلاش وحياتك يا اليس تقولي قارني بينك وبينهم وان احنا نلاقي نفسنا احسن
بلاش يا بنتى الا بيجيلى حسره قويه بعد المقارنه دي وانا شايفه ان احنا امة المسلمين حالنا كده

فى هناك بلاوي ومصايب اجتماعيه وفى هناك بطاله وفى هناك كساد اقتصادي وفي هناك شوارع مش نضيفه وفى هناك فساد وفى هناك سرقه

بس فى هنا ايه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وشوفي النسب ايه
وشوفى النتيجه اييييييييييييه

ما تسبوني ساكته يا جدعان ما حدش يخلينى اتكللللللللللللم

نورتي يا اليس

صبرني يارب يقول...

آبي

حبيبتى لا فض فوك


فعلاااااااا هما منظمييييييييييين حتى الفساد عندهم منظم والجريمه منظمه هههههههههههه


نورتي يا جميل واكتبى البوست بتاعك ونتقابل هناك

جنّي يقول...

السلام عليكم
شكرا على ردك المستفيض ودا كان غرضي من تعليقي الا وهو إثراء الحوار وليس الجدل .. وشكرا على ترحيبك وأن تتركي لنا الرغي على الغارب ..
ياريت تشرفي وترغي براحتك ولن تجدي من يمنعك ..
جميل تعليق اليس وأجمل ردك عليه وخاصة ما تسبوني ساكته يا جدعان ما حدش يخلينى اتكللللللللللللم
كل ده وساكته أمال لما ها تتكلمي هتعملي فينا إيه ؟؟؟
تحياتي
said

صبرني يارب يقول...

جنى الله يكرمك يارب انت تنور المدونه

وصدقنى كل ما ادخل المدونه عندي اقول هاروح اشوف جني فين بس مش بالحق والله طبعا ان شاء الله فى اي وقت هاتلاقينى طابه عليك هناك بس شوف بقى هاتقفلنى ازاي تاني

وبعدين ده انا لسه ما رغيتش اوي بجد ساكته انا اهو خاااااااااالص ههههههههههه

رئيس جمهوريه نفسى يقول...

انا حقول تعليق على موضوع ال16 سنه ده طيب هما بتتوفر ليهم فرص العمل فى السن ده انما احنا عندنا مطلوب فى اى عمل خبرة 16 سنه وانا على فكره قابلت ناس كتير فى الاقصر بتشتغل وبتدرس بس هما عندهم نظام منح تعليم وقروض عقاريه كمساعده من الحكومه الحجات دى مش عندنا يعنى المعضله مش الاسره لا احنا بنتكلم فى منظومه كامله حكومه واسره وافراد بتتصرف غلط

صبرني يارب يقول...

رئيس جمهورية نفسي :

أولا بارحب بك اوي اوي وباقولت نورت جدا اوي خالص وانت من الناس الى من اول ما دخلت عالم التدوين باشوف اسمه واقول هاروح ازور مدونته وان شاء الله هايجى يوم واطب عليك هناك .
بس انت سباق بقى ونورتنا وشرفتنا هنا .

ثانيا :
بالنسبه لموضوع توفير العمل ده صدقنى الحكايه مش كده .
هناك الاولاد من سن 12 سنه مثلا الى هو سن الاعدادي هنا بيطلبوا منهم اجباريا فى اجازه لمده مثلا 15 يوم انهم يشتغلوا فى الاجازه دي اي شغلانه ويجيبوا شهاده من المكان الى ا شتغلوا فيه ويقدموا تقرير فى نهاية الفتره دي عن العمل الى اشتغلوه .
الكلام ده نقل لي من فرنسا مش عارفه مطبق فين تاني .
بس بقى الكلام ده بيطبق فعليا مش على الورق .
هنا فترة التدريب بتاعة الكليات العمليه بيبقوا عايزين ياخدوا الشهاده وعليها البصمه وبسسسسسسس .
ولا اتعلم حاجه ولا فهم حاجه .

وبعد سن ال 16 سنه مين قالك انهم بيوفروا لهم شغل ؟؟؟؟
لا هما بيدوروا على شغل بنفسهم
وبيشتغلوا اي حاجه وكل حاجه
بيغسلوا اطباق ويمسحوا ارضيات المطاعم ويشتغلوا ويتر وكل حاجه ينفع يشتغلوها وما ينفعش كمان .

وعندهم الى بيشتغل فى شغل محترم وفلوسه قليله والى بيشتغل كمان شغلانه مش تمام فى اي مكان مش مهم .

وعلى فكره لمعلومات حضرتك احنا بندور على اي حد يشتغل بقالنا سنه واكتر مش لاقيين . اللهم الا ولد عنده 17 سنه ومعاه دبلوم هو الى اشتغل وبياخد 500 جنيه.

وكتير اشتغلوا معانا فى فترات الاجازات من الشباب بتوع الجامعه .
وتخيل انت بقى انهم بيشتغلوا رغما عن اهاليهم .
واحد منهم بيقول بابا بيقولي تشتغل وتبهدل نفسك ليه انت ناقصك حاجه ؟؟؟!!!!
منطق غريب فعلاااااااااا طلع تنابلة السلطان .
قاعد فى بيت ابوه ياكل ويشرب وينام ويبوسوا اديه عشان يذاكر وبيسقط كمان يشتغل ليه بقى ؟؟؟؟؟؟؟؟؟؟؟؟

المشكله ان احنا اصلا مش عارفين نربي ولادنا .
نورت يا استاذنا

mayada يقول...

ام مريم
يامقارناتك ياام مريم
بس هو زي ماعندهم حاجات حلوه
عندهم بلاوي انحراف عالم مفتوح
غياب الواعظ والقدوه يعني
اللي بيضيع محدش بيدور عليه هناك
بس هما بيصدروا لينا صوره ورديه
عن مجتمعهم ده في حد ذاته ذكاء
وبياكد انهم منظمين
بس ارجع واقول العبره بالخواتيم
الناس دي تستاهل اللي هما فيه
لانهم وصلوا له بمجهودهم تحياتي ياام مريم

صبرني يارب يقول...

مياده حبيبتى

شوفي انا ما قلتش انهم ملايكه ولا انهم مش عندهم مصايب سوده

لكن انا قلت ان عندهم حاجات كويسه بالفعل عندهم مش بيمثلوها علينا فى الافلام .
واحنا طبعا بنقلد بس قصة ريكى مارتن وفستان جوليا روبرتس ده اخرنا

ونورتي يا جميل

حاول تفتكرنى يقول...

من الواضح جدا أنهم يسبقونا بمائتين سنة علم

عندما تضيق هذه الفجوة سنجد أن الحياة أكثر سهولة ، والعمل أكثر جدية

فقط علينا فى هذه المرحلة الاعتراف بتقمدهم وأن هناك فجوة كبيرة ، يجب أن تتضاءل

والمسألة صعبة جدا فى ظل معتطات الحاضر الذى نعيشه

تحياتي

صبرني يارب يقول...

حاول تفتكرني

بتهيئلي المفروض الاول نعترف ان احنا نستاهل الى احنا فيه

نورت يا حاول تفتكرني وعندك حق بالفعل الفرق بينا وبينهم كبير

كلام على بلاطة يقول...

غريبة دى
هل يوجد احد فى زمنا غير مطحون
تحياتى

صبرني يارب يقول...

كلام على بلاطه

ماهو السؤال بقى لما انا كده واعتبر مش مطحونه امال المطحونين يعملوا ايه

اقرااول بوست فى المدونه فى شهر فبرايرلوحبيت تعرف معنى الاسم
نورت يا اخي الفاضل

mohamed يقول...

الفرق الاساسى بينا وبينهم
الكدب هناك غير مقبول
الجوهر أهم من المظهر
الانسان لة حق يتساوى فية الغنى والفقيروالقوى والضعيف
القانون العادل
حريةالتعبير عن الراى
توازن القوى بين السلطة والمال والعمال والموظفين
الاعلام الحر
ونورتينى

صبرني يارب يقول...

الاخ محمد

الله يكرمك النور نورك يا اخي الفاضل

تمام كل الكلام الى قلته اتفق معاك كامل الاتفاق
وازيد عليه ان هناك نظام الحكم بيحترم الشعب ويقدره .
انما احنا اخر حاجه بيفكر فيها نظام الحكم

bembo يقول...

الله يسامحك حسستينى بالذنب ناحيه امى وابويا طيب انا اعمل ايه يعنى اولا انتى قلتى بيعتمد على نفسه طيب ماهو برده بيتجوز ببلاش ومش بيجيب جهاز احنا عندنا النقطه ديه منتهيه تماما
هما عندهم سابوا ابنهم يمشى علشان الحياه بعد كده فى متناول ايديه يقدر يعيش لوحده عندنا احنا تفتكرى فى كده

صبرني يارب يقول...

بدون عنوان

ربنا يسامحنى فعلا ياريت ويعفوا عني .

لكن ليه حسستك بالذنب تجاه والدك ووالدتك ؟

وبعدين مين قالك ان هناك بيتجوز ببلاش ؟؟؟
هو الجواز فى نظر حضرتك شقه وعفش بس ؟؟
وبعدين ماهو اصلا لو هايججوز فى علبة سردين برضه لها تكاليفها مافيش حاجه ببلاش .
الا اذا كان رايح يتجوز واحده من الشارع
هنا ممكن تلاقي فى الشارع كتير يرضوا يتجوزوا عرفي حتى عااااااااادي .

اما بقى حكاية الحياه فى متناول ايده دي
اسمحلي اقولك ان هناك السما ما بتمطرش فلوس
والحياه هناك طاحنه برضه الى يشتغل بس هو الى بياكل .
هنا تسعين فى الميه من الموظفين مش بيشتغلوا وبياخدوا مرتبات وزعلانين كمان انها قليله عليهم .

وانا ما قلتش يرموهم فى الشارع
لا طبعا انا قلت يسبووووووهم يشتغلوا ويعلموهم هما فى السن ده انهم لازم يكونوا اشخاص لهم قيمه ولهم دخل ولهم مسؤليه

انما فجأه كده وهو عنده مثلا 24 سنه تقوله يلا بقى بعد ما راح سن التعود والتعليم وبعد ما عشت 24 سنه منعم مرفه
انزل واشتغل واعرق واتعب واتبهدل

طبعا الى يجرب الانتخه يا سيدى الفاضل يا يرضى عنها بديلااااااااااا

صبرني يارب يقول...

أه معلش يا بدون عنوان نسيت اقولك نورت المدونه وصاحبتها بس معلش الواحد النهارده مش طبيعى نووووووووورتنا