الاثنين، 5 مايو 2008

الى ما يجيش بالذوق نعمل فيه ايه ؟؟

السلام عليكم

والله العظيم وحشتوني جدا ووحشني الرغي موووووووت بس مش عارفه اكتب والله مشغوله جدا جدا .

المهم طبعا انتم مستنين البوست الجديد بتاع اخوانا الرجاله بس والله مش فاضيه اكمله عشان ده محتاج مخمخه عاليه وتكتيك محكم .

بس انا النهارده بقى قلت اقولكم على كام نقطه كده قابلونى فى الكام يوم الى فاتوا قبل ما انساهم .

أولا : من موقعي هذا باوجه اعتذار وشكر وامتنان لخالتي الحلوه طنط حنان . اعتذار عشان هى زعلانه مني عشان كلمت ماما وهى بتزورها في القاهره سألتها هاتيجى امته وقولتها تعالى بدري عشان تتغدي معانا ودى جريمه شنعاء واتخناقنا فيها وكنا خلاص هانجيب البوليس .
وشكر وامتنان لاني اكتشفت انها بتشجعني فى صمت وبتطبع المدونه بتاعتي وبتقراها وانا ما اعرفش الا من كام يوم .
وحاجه ساقعه على حسابي للبلوجريه كلهم يا جدعان على شرف طنط حنان .

ثانيا : هاحكيلكم على صوره شوفتها وحبيت ابرزها واوضحها من موقعي هذا برضه - حلوه موقعي هذا دي عجبتنى - المهم يوم الخميس فى تمام الساعه الثانيه ظهرا كان موعدي مع دكتور الاسنان (لا مش طقم ما وصلناش للدرجه دي بس قربنا )
لاحظت ملاحظه مهمه جدا فى الشارع وان تقريبا تسعين فى المائه من الشباب الى قابلوني فى الشارع من عمر مثلا 16 سنه لحد 22 سنه كده تقريبا ويمكن اعلى شويه
كلهم باين على وشهم كده لسه مدلوقين من على سريره حالا يادوب غسل وشه وضرب حبة جل فى شعره او حتى زيت تموين وخارج بقى ويمكن نصهم تقريبا عنيه حمرا دم وشفايفه زرقا (بيشرب سجاير يعنى على الاقل )
المهم قلت لرضا هو في ايه هو الناس كلها لسه صاحيه من النوم ليه ؟؟ وبعدين الناس الى صاحيه من النوم مش هما الفئه المنتجه فى الشعب اصلا ؟؟؟ لما يبقوا لسه نايمين لحد دلوقتي امال مين الى صاحي ومين الى بيشتغل ؟؟؟؟
رضا رد عليا ساخرا : منتجه ؟؟ مين دول ؟؟؟ قلتله الشباب مش المفروض ان المرحله العمريه دي هى ذروة الشباب والعمل .
طبعا ظهرت على وش جوزي علامات القرف كده والخنقه من الحياه وقالي :اه ان شاء الله .
بصراحه نفسي ميزان الحياه يتعدل تاني بينا والناس تصحى الصبح وتنام بالليل والناس تشتغل والدنيا تتظبط كده تاني اصل خلاص الحكايه بقت خانقه على الاخر .

المحلات عندنا ما عدتش بتقفل طول الليل وعلى العكس كمان طول النهار قافلين . انا مره اتهفيت فى عقلي ونزلت اشتري حاجه من شارع فيها المفروض محلات ملابس كتير وكانت الساعه 12 ظهرا . لقيت كل المحلات لسه قافله ؟؟!!
ولما فتحوا بعد الظهر روحت لقيتهم كلهم حاسين انى كائن فضائي لانهم ما كانوش فاضيين بيرتبوا المحل والبضاعه استعدادا لفترة الشغل بقى الى هى اخر النهار وبالليل ولما سألتهم . صاحبة المحل قالتلى: اعمل ايه يا مدام انا بابدأ اقفل الساعه 1 بالليل بافضل امشي فى الزباين مش عايزين يمشوا يجى ساعه واكتر . باقفل الساعه 2 ويمكن اكتر . انام امته وافتح بدري ازاي ؟؟؟

وانا كنت فى ابو ظبي كان فى قانون على ما افتكر المحلات بتقفل الساعه 11 . يارب اشوفها لان في رايي انها كلها متواليه مرتبطه ببعضها .
يعنى لو المحلات قفلت بدري الناس هاتروح بدري مش هايلاقوا حته يتسرمحوا فيها . وعليه المحلات دي هاتفتح بدري والناس تظبط نفسها تشتري حاجتها قبل ما المحلات تقفل . وهكذا . ولا ايه رايكم ؟؟؟

ثالثا : الحكايه التانيه . انا روحت النادي يوم الجمعه وما رضيوش يدخلوني واتخانقت مع الحارس الى هناك ودخلت عافيه . اه انا بقيت متشرده . انا عارفه انه النادي ده للاعضاء فقط . لكن صدفة سألتهم لما روحت هناك للولادي وهما فى رحله فيه ممكن ادخل بتذاكر قالي اه ومن يومها من كام شهر وانا بادخل عادي . والى بقطعلي التذكره بيقعد يتلاكع كده عشان ازهق وامشي ويضرب هو على الفلوس لكن هيهات مش انا .
لكن بقى بعد الخناقه والدخول عافيه اكتفشت انهم بقبلوا التذاكر فقط فى حال النادي فاضي اما لو زحمه طز فى الناس الى جت من بيوتها وقطعت مشوار عشان تدخل . لان الناس مش مهم اصلا . لو محترمين كانوا اعلنوا ان الاجازات قاصرة على الاعضاء لكن هما اعلنوا انه للاعضاء وبعدين بيدخلوا بقى حسب مزاجهم وهواهم . كان ممكن احل المشكله بتليفون من غير خناق . لكن حيث ان قبلي بدقايق اصحابي دخلوا بتذاكر ومكلمنى من جوا النادي . فلا بقى مش هاتصل بحد ومش هاخرج والى تقدر عليه اعمله .
بدأت اؤمن ان الي ما يجيش بالذوق يجى بالعافيه. موقف ما كنتش احب اعمله لكن دفعونى اليه دفعا . يارب نكون محل اهتمام الاخرين .

رابعا : المكان شارع البحر (شارع رئيسى فى المنصوره ) الزمان يوم الجمعه الساعه 9 مساءا . الموقف ان الشارع زحمه جدا جدا والعربيات لازقه فى بعضها وفى كمية هبل مش معقوله من السائقين لعباتهم المدلعه نفسها على الاخر .وانا رايحه ما خدتش بالي اوي من خلفيات الموقف . وأنا راجعه بقى لقيت ان مصدر الزحمه عربيات مدلعه وتلاقي السيناريو ده قدام عربيه على اليمين سايقها بنت ومعاها صاحبتها ومشغله الكاست وبتهزر راسها وهى بتدندن مع الكاسيت وكلهم حاطين وشهم فى كيس الدقيق قبل ما يخرجوا ولابسين عجائب . وعلى الشمال عربيه تانيه فيها ولد لزج واهبل ومعاه اصحابه برضه ولابسين هبل برضه وناقشين وشهم زي الستات برضه مافيش ماااااانع . ومش شايف اي حد فى الشارع الا الحلوه ام كيس دقيق على وشها وجري وراها زي ال ...... ما علينا . غير عابيء بالناس الى في الشارع وعليه التلطيش فى الناس شغال على اشده .
المشهد ده اتكرر صدقوني على طول الطريق يجى حوالي 5 مرات تقريبا الى هو الطريق اصلا اخد ربع ساعه بسبب الزحمه .
حد بقى يقولي اعمل ايه وانا شايله المراره من اربع سنين ؟؟؟
ملحوظه : الشارع ده كله مستشفيات العام والجامعه والطواريء . وأنا عن نفسي كنت رايحه بابنى مستشفى العيون . والشارع زحمه ومقفول عشان العيال الهبله دي بيتفسحوا . وصبرني يااااااااااااارب .

وكفايه كده رغي واشوفكم على خير

شوفوا كمان معاملة اهل الكتاب كما اراها فى دينا الجميل

زعلانه منكم اوي عشان ما حدش بيجى فى المدونه التانيه رؤيه اسلاميه متواضعه وجوزي كل شويه يقولي ولا حد معبرك شكلى بقى وحش اتكسفوا بقى


هناك 16 تعليقًا:

Ali-7ob يقول...

ام مريم
كده بقلا انا قاعد مستنى الجزء التانى من الوشوشة ادخل الاقيكى كاتبه حاجة تانية
وكمان مخمخة ايه اللى انتى محتاجها ده انتو الستات يعنى بطرقعة صباع كده تعملى 10 بوستات عن الرجالة والستات والشياطين كمان ههههه
بس بجد فين البوست المفروض ان ده هيكون الجزء التانى من وشوشة الستاتيت والبوست اللى بعده هيبقى للرجالة

بالنسبة للبوست ده
اولا انا عايز اعرف هى خالتو حنان زعلت ليه انتى عازمتيها على الغدا هو انتى عازمتيها على نايت كلب
بالنسبة لباقى المواضع فالتسيب والاستهتار بقى للاسف سمة من سمات الشعب المصرى واللى بيشجع كده السلبية وكلمة انا مالى بتخلى اللى عايز حاجة بيعملها ربنا يرحمنا
تحياتى ليكى
على حب
ملحوظة:انا عجبنى جدا قصة سودة بنت زمعة واتأثرت بيها جدا بجد بس معلقتش قولى للاستاذ رضا ان فيه واحد اعجب بالرؤية الاسلامية المتواضعة بتاعتى

mayada يقول...

ازيك ياام مريم وانت كمان وحشانا
خدي وقتك ومخمخي براحتك عاوزين
حاجه ضرب نار كده
اما بالنسبه للناس اللي باين
عليها صاحيه من النوم فعلا بجد
ودايخين كمان كنت خلي جوزك يزق اي حد منهم برفرف العربيه كده هتلاقيه قعد علي العربيه من قدام هههههه
روحي محاضره في الجامعه الساعه 8
ان لقيتي حد قولي مادي قالت
وبعدين ايه اللي يوديكي الجلاء الساعه
دي جريمه سب وقذف في المنصوره
اما العيال الدايخه دي شوفيهم
بقي بالليل وهما بيعملوا خمسات قدام
اداب او في شارع البحر
منظر يفرح يفرح يفررررررررررررح

أبو خالد يقول...

أبنتى الغالية/أم مريم
تحية و اجبة و احترام من القلب
و جزاك الله خير مرتين
المرة الأولى :لكونك تنفذين و صية
رسول الله "بلغوا عنى و لو آية" وواضح
مجهودك فى مدونة رؤية إسلامية متواضعة
مع أختلافى معك فى العنوان فأى رؤية
إسلامية عزيزة بعزة الأسلام ..
و كل مرة أقلب صفحاتها و أرى مجهودك
و لكن ياأم مريم ده دين لا يجب الأخذ
و الرد فيه ،لذا أتصفح و أدعوا الله
أن تكون فى ميزان حسناتك..وواجب علينا كمسلمين دوام المذاكرة فى كتاب الله و فى سنة أفضل الخلق صلى الله عليه و سلم..
و المرة الثانية: أنك و ضعتى مدونتى المتواضعة فى لوحة مدونات عجبانى و هذا شرف عظيم لى و وسام لتدوينتى ..
أما تعليقا على قصة النادى سأقص عليك قصة حدثت لى فى عام 1971 ،كنت فى
زيارة لبيت خالى فى مصر الجديدة أيام
الهجرة و بعدين ذهبت معهم لنادى الشمس الجماعة مشتركين و أنا زائر بصحبة مشترك و تمتعنا بيوم جميل و لكن
لكون الزيارة عاجلة فلم ننزل حمام السباحة..و عجبنى نادى الشمس ..
فى مرة ثانية ذهبت النادى و حدى دون أن أصحب أولاد خالى فرفض الأمن دخولى
لا بنقود و لا بتذاكر ..طب و العمل
أنا مجهز نفسى على نزول حمام السباحة
أخذت أتمشى بجانب السور و النادى كبير
و حدثتنى نفسى أن أقفز على السور
و أدخل على حمام السباحة ..ترددت قليلا و لكنى فعلتها و قفزت من على السور كى أنزل فى أحضان أمن النادى
من الداخل و كأننا على موعد و أخذنى
بعد شد و جذب إلى رئيس النادى اللواء
و دخلنا حجرة رئيس النادى و قال له
الحارس :البيه ناطط من على السور.
قال له رئيس النادى:شكرا على يقظتك
و صرفه.. ثم ألتفت لى قائلا:حضرتك عملت
حاجة غلط الحل أيه؟
بعفوية أجبته كان نفسى أنزل الحمام
و لم يوافقوا على دخولى من الباب.
نظر إلى مستغربا و سأل أنت منين ؟
قلت له من بورسعيد و من سنتين لم أنزل حمام سباحة و لا البحر.
فأبتسم ضاحكا و قال :أنت ضيفى اليوم
و عزمنى على الغداء و نزلت الحمام أكثر من ثلاث ساعات و أعطانى كارت أدخل نادى الشمس كل ما أكون بالقاهرة و بدون أى رسوم و لا على الباب و لا فى حمام السباحة و لا فى غرفة خلع الملابس ..رحمه الله كان إنسان نبيل
مر بحياتى..
أسف على الأطالة كنت محتاج أفضفض أعذرينى..دمتى أم مريم إنسانة فاضلة
و جزاك الله خير ..
و أسف على الدراما فى مدونتى و لكنى أسرد حقائق مرت بحياتى..

صبرني يارب يقول...

علي حب

معلش انا والله بس الحاجات دي غاظتني اوي قلت اقولكم عليها على ما البوست الجديد يخلص
وعشان خاطر الراجاله ما يزعلوش انا هاعمل البوست الجاي وشوشه للرجاله . ونرجيء الجزء التاني قليلا .

اما خلتو حنان زعلت عشان انا باستعجل ماما تيجى من عندها وشافت ان ده اعتداء من شخصي على حقوفها فى اختها . خلاف فى وجهات النظر ياا خويا .

وشكرا لك على كلامك عن الرؤيه الاسلاميه وربنا يكرمكم خلاص ولا يهمك ما دام قريت يبقى انا خدت ثواب الحمد لله .
وشكرا لك وشرفت

صبرني يارب يقول...

مياده

تصوري انا اول مره اخد بالي انك من المنصوره .
بلدياتي كمان ايه الحلاوه دي

والله يا بنتى ما دخلت الجلاء ده انا كنت رايحه اودي خالد مستشفى العيون عشان وقع من على المرجيحه وعنيه دخل فيها رمل كتير وروحت اطمن عليه.
مضطره يعنى مش رايحه عياقه .

وايه يا اختي خمسات دي ؟؟؟ اصل انا منقطعه دلوقتي لا باروح شارع البحر ولا اداب الا نادرا يعنى لما اكون باشتري هدوم للعيال مشوار رخم ما باحبوش .

نورتي يا جميل

صبرني يارب يقول...

ابو خالد الغالي علينا

الف شكر لك لكلامك عن مدونة الرؤيه الاسلاميه .
والتواضع هنا لاحق بيا انا مش بالكلام الى فى المدونه لان انا حقيقى باعتبر نفسي تلميذى مبتدأه ومعلوماتي متواضعه فى الدين مهما كان
وشكرا لك على دعائك ليا ربنا يكرمك وكفايه عليا وخلاص هانغض الطرف عن التعليفات مش مهم بس هابقى اخلي رضا يجى يقرا كلامكم بقى انتم عارفين ما انا قلتلكم من الاول بقى اعداء النجاح هههههههههههههه

والقصه الى حضرتك حكيتها على النادي بجد ضحكتني وفى نفس الوقت اسعدتنى لوجود حد محترم زي الاخ الى اعطاك كارت وعجبنى اوي كمان تبريرك انك بورسعيدى وما نزلتش الحمام ولا البحر بقالك كتير .

وكمان بالنسبه لوضع مدونتك فى مدونات عاجباني عايزه حضرتك تعرف حاجتين اولا انى انا الى لياالشرف بتنوير اسمك حضرتك فى القايمه دي
ثانيا كل مدونه اسمها موجود على القايمه دي مدونات فعلا عاجبتنى مش باجامل حد .
ومافيش اطاله ولا حاجه مدونتك وزياده وهنا موطن الرغي الاساسي كل الناس تيجى ترغي براحتها .
شرفت ونورت يا استاذنا الغالي .

la3lahakhier يقول...

انا تهت خالص
الموضع عن ايه بالظبط ...هههههههه
انا طبعا بهزر
ندخل مش عشان نقرأ عشان جوزك مايفرحش فيك ابدااااااا
الستشاتش لبعضشيها يا ختشى

واحدة مفروسة يقول...

هههههه
شكلك مش وحش ولا حاجه انا ساعات بروح هناك

صبرني يارب يقول...

لعلها خير

ايوه كده يا اختشي خليهم يعرفوا ان احنا عزوه برضه

صبرني يارب يقول...

مفروسه حبيبتى

تعيشي يارب تنوريها فى اي وقت

mony يقول...

الشباب بأه مش عاوز يتعتع من مكانه
ماما جابت لاخويا(19 سنة) شغل في مكتب تصدير و استيراد
قاللها ليه ان شاء الله
انا اقوم بدري من النوم و اروح لواحد يتأمر عليا و يديني اخر الشهر 300ولا 400 جنيه
ليه ان شاء الله
ما انا كده كده بخدهم منك من غير ما اتحرك من مكاني
طبعا كده جنت مراكش علي نفسها
علشان بقي لا بياخد مصروف و لا لاقي شغل


يعني الشباب كسلااااااااان جدا
و مش عاوز يتعب نفسه



و بالنسبة لمدونة روئ اسلامية انا متابعاها في صمت
علي رأي الاستاذ ابو خالد الامور الدينية مافيهاش نقاش
بس متبعاكي


الي الامااااااااااام سر

الباحث عن الحقيقة يقول...

انتي جبتي الحاجه الساقعة على شرف طنط حنان منين
هو انتى بتنفعي حد غيرنا
فاتح الاستراحة سبيل انا مثلا ولا ايه
..........
بخصوص المحلات ..للاسف فعلا المدون الكبيره كلها كده
الناس والمحلات بتريح طول النهار
والشغل يبتدي اخر النهار
لان المشترين عقبال ما ينزلوا من بيوتهم ويدوروا يلفوا بياخدوا وقت كبير
فكده كده اليوم ضايع
يبقى يخلوها بالليل واهو منها بيشتروا ومنها برضه فسحه
.........
الهبل اللى في الشوارع ده بتاع الشباب
بجد حرام
يبقى الناس طالع عينها مش لاقية العيش ونشوف شوية شباب راكبين عربيات وبيتسرمحوا بيها وكأنها مراجيح
لا يا حبيبي المراجيح دي معطله مصالح ناس عايز توصل لشغلها او بيتها
وكمان بتثير القرف والحقد والضيق والاحساس بالظلم الاجتماعي وقلة التربية وقلة الادب
..........
سلامة عيون ابنك ربنا يحفظهم كلهم
انا عايز شويبس ممكن مش بشرب سفن
انا عامل مقاطعة

صبرني يارب يقول...

موني يا حبيبتى نورتي

لا مامتك طبعا الى غلطانه مش اخوكي ما هو لوما كانش لقي حد يديه الفلوس من الاول وهو نايم مكانه كان دور هو الى شغل لنفسه

اصلا احنا بنربي غلط او قولي مش بنربي اصلا .
كويس انها منعت عنه المصروف يمكن يفوق

وشكرا يا جميل على المتباعه الصامته المهم بناخد الثواب واتمنى تكون بتنفعكم فعلا .

نورتي يا جميل

صبرني يارب يقول...

الباحث

لا لا عييييييب يا باحث انا اقدر . الساقع عن باحث يا جماعه فى الاستراحه نتحاسب اخر القاعده يا باحث بقى .

اما بخصوص المحلات يا باحث ما انا قلتلك بقى هى كلها متواليه مترابطه مع بعضها يعنى طول ما المحلات فاتحه اهي الناس ماشيه وطول ما الناس ماشيه اهو الملحلات فاتحه
انما لما يطلع قانون معلن ان المحلات تقفل الساعه 11 مثلا
والى يتأخر عن كده ويتظبط من دوريات الشرطه الى ما عندناش بنشوفها اصلا يبقى ياخد مخالفه

صدقنى اعتقد الامور هاتنعدل
لان الناس كلها هاتعمل حسابها تخلص طلباتها بدري .

والهبل الى فى الشوارع بقى مثير للاعصاب ومن غير اثارة احقاد حتى برضه مثير للاعصاب .
وبالنسبه للشويبس عنينا لك يا باشا بس ابقى اعمل حسابي فى واحده يوسفي معاك الله يصلح حالك .

نورت يا باحث

حزلووووقه يقول...

هههههههههههههههههههههه


ايه ده وربنا انيت عسل


لا هجيلك هجيلك في المدونه التانيه


سلامي ليكي

شكلك رغايه زيي



سلامي

حزلووووقه

صبرني يارب يقول...

حزلوقه

ايه ده اسمك حلو اوي
نورتي المدونه يا جميل وانتى الى عسل والله
وان شاء الله تنوري المدونه التانيه