الثلاثاء، 20 مايو 2008

ممكن اسوق فيها ؟؟؟

السلام عليكم :
منورين فى القاعده تملي . ووحشتوني برضه مش عارفه ليه !!!!

شوفوا بقى انا دلوقتي فى حيره من امري وشوشة الستاتيت الجزء التاني انا مش عارفه اكتبها . كل ما ابدأ فيها امسح الي كتبته واعيد من الاول . وبصراحه وكل صراحه خايفه منه . لاني حاسه انه هايجبلى الكلام ومش هاخلص منكم . المهم انا هاكتبه بررررررضه وبعدين ناخد راي الحبايب الاول فى السر وبعدين نبقى نزله لو تمت الموافقه عليه بالاغلبيه مش الاجماع اصل انا ديموقراطيه .

ها نرجع بقى للرغي يا حلوين يا قطاقيط . ايه رأيكم بقى انا عايزه اقولكم على موضوع جد خطير - فصحى اهو خطير بصحيح يعنى -
أنا يا جماعه عندي عقده نفسيه مركبه دلوقتي لانى مش عارفه اسوق العربيه .ماتبصوليش كده والله حاولت كتير واصلا ما فشلتش اوي يعنى اصلا ما حدش اداني فرصه . هاحكيلكم حكايتى واحكمواااااا انتم .

من حوالي سنتين كده يا حلوين انا كنت واقفه فى مفترق طرق قدامي طريقين الاول هو انى اتعلم السواقه واسطو على عربية جوزي فى بعض الايام واقضي مشاوير البيت والعيال واودي العيال انا المدرسه واجيبهم وفى الصيف اوديهم تدريب رياضه وتحفيظ قرآن وما الى ذلك ونعيش حياتنا خارج المنزل بقى .
والتاااااني : هو انى اطنش خاااااااالث واعمل نفسي هبله وابيع القضيه وما اعملش اي حاجه واقعد زي خيبتها وخلاص .
المهم بعد تفكير عميق قلت لا ممكن ابدا ابقى زي خيبتها . انا لازم اتعلم السواقه .
مااخبيش عليكم الموضوع كان صعب اوي اوي خالد كان عنده اربع شهور وخارج من عمليات وجلسات وبلاوي كتير من اول ما شاف الدنيا . لمده اربع شهور بس قلت برضه احاول.
اتفقت مع رضا انه اول ما يفضى فى اي يوم ياخدنى بالعربيه يعملنى فى اي منطقه تكون فاضيه شويه . طبعا يجى شهر على مااليوم ده جه . وكذا مره يادووووووووب اركب انا العربيه والتليفوووووووون تررررررررررررررم الحقى خالد بيعيط وارجع يا جدع على البيت .
وبعد ما سمعتلي كلمتين فى دماغي من ماما وبابا على انى مااسيبش ابنى تاني بلا سواقه بلا بتاع . قررت انى اروح اتعلم فى مدرسة السواقه فى المرور وبالمره اخد الرخصه والتدريب هايكون الصبح بدري وخالد نايم وهاسيبه مع رضا .
وقد كااااااان .
وبدأت اروح وكنت ماشيه فى التدريب زي الفل طب ياعم ايه هانفضل كده نلف بالعربيه فى الحته الفاضيه دي وبعدين طيب . جوزي قالي باقولك ايه اديله خمسه جنيه كده ولا حاجه كل مره وهو يخرجك الشارع . اديتله كام مره واتحايل عليه يقولي ممنوع ياعم الحاج الناس كلها طالعه بره اهو وبعدين ممنوع ايه امال كاتبين على العربيات تعليم ليه عشان تمشي فى الساحه الفاضيه دي ؟؟؟؟ هو كده

المهم خرجت من الموضوع زي ما بدأت تقريبااااااا . وبعدين بقى بدأت انى اتجرأ شويه واخد عربية رضا وهو معايا طبعا وانزل بيها شويه يعنى ربع ساعه وارجع جري طبعا عشان العيال وطبعا ده كان مره فىا لشهر ولا حاجه .
شويه كده واتجرأت اكتر وكنت باخد العربيه واطلع بس بابا كان بيصر يجى معايا وكنا بنبقى الصبح بدري واروح وامشي كده يجى كيلوا ولا حاجه والدنيا فاضيه وانزل اتمشى ساعه وارجع تاني للعربيه وعلى البيت .
حلو الكلام ؟؟؟؟
بعدين بقى رضا قالي ما ينفعش بقى لازم تطلعي لواحدك . طلعت لوحدي وحصل خير الحمد لله روحت مشوار قريب كده ورجعت صحيح وانا راجعه خبط فى جدار البيت بتاعنا بس جت سليمه اهو بيتنا وعربيتنا مش مشكله .

بعد كام يوم رضا سافر الصين وانا بقى عملت فالحه وخدت ولادي وكنا يوم شم النسيم وقلنا نروح الناااااادي .
تمام كده وماما كانت معانا وماشين زي الفل لحد لما وصلنا قرب النادي وكنت ماشيه على كوبري زحمه اصلا وكنت واقفه وطلعت على الاولاني وما غيرتش عشان اطلع من الكوبري على الملف والاقي واحده ست كبيره ومعاها عيال كده ومولد وشايله حاجات على راسها ووقفت فى نص الطريق تمش خطوه وترجع اثنين اديها كلكس تتلبخ اكتر وانا اتلبخت اكتر واكتر
هوب طاخ بم تش وقعت الست من الخضه قبل ما المسها وقعت وانا فرملت الحمد لله ما حصلش حاجه بس هى بقى كانت بقت تحت كبوت العربيه ابنها كان هايقتلنا قبل ما يشوف امه .

المهم بعد سيل من الاحداث اصروا يعملوا محضر ورحت القسم وكان يوم لطيف جدا جدا جدا . وطبعا المنصوره كلها اتقلب عليا عشان رضا مش موجود كله بيعمل الواجب . ومش عارفه مين فلان بيه اتصل عليا يقولي ادينى الظابط الى عندك وانا اقولهم يا جدعان الست طالعه الاسعاف على رجليها مافيش حاجه ااساسا . المهم اتضح ليا فى الاخر انهم عملوا الفيلم ده ولادها عشان يسلكوا قرشين بس الست الحمد لله طلعت سليمه وانا طنشت لانها ست غلبانه فعلا بس عيالها مش تمام .
المهم بقى رجعت البيت بالعربيه وبابا قالي ما عدتيش تركبيها تاني الا لما جوزك يجى ابقى خوديها وانزلي فى البحر. قلت حااااااااااااضر
وجه جوزي وخرجت بها تااااااااني وكله تمام مافيش اي حاجه بس كان معايا العيال وانا ماشيه مامااااااااااا خالد وقع . طبعا انا زي الهبله بصيت ورايا . بس يعنى كنت هاطلع على الرصيف بس حصل خير ما طلعتش . طبعا ماما كانت معايا عملت قصه وحدووووووته . وكانت اصلا حصلت مشكله هبله وانا بره ومعصباني . رجعت قلت خلاااااااااااص مش سايقه ها ما تقرفوناش بقى انا اقعد واحط رجل على رجل واي حد فيكم يوصلني مكان ما أنا عاوزه بلاش قرف بقى .
لكن رجعت فى كلامي لاني عيله . وانا دلوقتي هاموت واسوق بقى عشان اعرف اخرج بالعيال واوديهم التدريب وماالى ذلك .
والله العظيم حتى لو انا مش باعرف اسوق يعنى هي جت عليا ؟؟؟؟؟؟
ما الناس فى الشارع اهو بيعجنوا ؟؟؟؟؟!!!!! وربنا انا قلت كده لرضا .قالي والله انتي بتقولي فيها .
انا عموما ما حبيتش السواقه ولا سيما فى شوارعنا المنيله دي بالاضافه لان الناس الى سايقين فى الشورع ما ينفعش تقول عليهم بشر اصلاااااا .
انا كل مااركب مع سواق تاكسي لازم ما اعرفش امسك اعصابي واديله كلمتين فى جنابه . حاجه تقرررررف . ماشي بطريقه مش ممكن بتهيئلي لو كان ماشي على رجليه كان بقى احرص من كده . مافيش اشارات مافيش قوانين مافيش عقل مافيش ذوق مافيش مراعاة حق الشارع والاخرين مافيش اي حاجه .
بس اعمل اييييييييه لازم اسووووووووق برضه .
الغلط فييييييييين فيا ولا فى الى ادوني الرخصه ولا فى الى خايفين عليا اسوق ولا فى الشوارع الهم ولا فى السواقين الى مش سواقين . ولا فى كله ده .
وايه المطلوب من الى عايز يسوق فى البلد دي ؟؟؟؟ انه يتعلم السواقه ولا انه يسوق فيها ؟؟؟؟؟؟؟؟؟؟؟؟؟؟
وعليه انا بطالب بحقى بقى فانى اسوووووووق فيها ............ اتصرفوا فى الموضوع ده وافيدونا افادكم الله .

شوفوا البوست الاخير فى الرؤيه الاسلاميه عن عائشه بنت ابي بكر زوجة الرسول صلى الله عليه وسلم

هناك 39 تعليقًا:

Ali-7ob يقول...

ام مريم
اولا انا عايز الجزء التانى من الوشوشة وما تخفيش عادى يعنى انتى بتنصحينا هو ناتى بتشتمينا يعنى كله من اجل حياة افضل فاتكلى على الله ونزليه البوست اللى جاى
ثانيا كده ومن غير زعل بلاش تسوقى احسن طبعا هتقوليلى ليه هاقولك عشان حضرتك واى ست خالقها ربنا مجموعة متراكبة من المشاعر والاحاسيس والسواقة عايزه قلب جامد مش عايزه قلب ضعيف زى قلب الستات
بلاش هاقولك على حاجة انا لما اكون مع اصحابى ومعانا عربية بنقعد نتراهن على عربية معينة ان اللى سايقها واحدة ست وفعلا بتطلع ست
طبعا هتقوليلى عرفنا ازاى
هاقولك لان العربية دى اما موقفة الشارع اما مش عارف تلف او تركن وبرده موقفة الشارع ياما عاملة حادثة زى حضرتك كده وبرده سبحان الله موقفه الشارع ههههه
خليهم هما اللى يسوقوا وانت اقعد باشا
وهتقل الحوادث كمان
تحياتى ليكى
على حب

صبرني يارب يقول...

باحث عن الحقيقه

نهارك شكله مش حلو النهارده يا باحث
انا يتقالي هاتيلك توكتوك يا وليه ؟؟؟؟
بتلعب فى عداد عمرك يا باحث

ولو الحاج رضا شافك هاتتقطع يا باااااااحث .

صبرني يارب يقول...

علي حب

ربنا يسهل ونشوف موضوع الوشوشه ده هايودينا لحد فين

اما بقى السواقه هاسوق رغما عن انف الجميع ان شاء الله

والرجاله مش فالحين يعنى فى السواقه اوي ماهم مبوظين الشوارع اهو

وبعدين على فكره انا ورضا بنتراهن برضه على العربيات انى الى سايقاها ست .
بس عاااااااااادي اقوله وايه يعنى ما تسبوها تتعلم ايه ده اعملوا خير طيب ما ياما استحملناااااااكم فى الشوارع وانتم بتتعلموا .

ولعلمك ساعات بيخسر الرهان ويطلع الى سايق يا جدو كبير فى السن يا اما فرفور صغير بيلعب بعربية بابا شويه .

وبعدين اوعدك لو لقي تحد يسوقلي اني ما افكرش خالص فى موضوع السواقه
بس السواق بتاعنا الى هو ابو رياض يعنى مشغول اوي نعمل ايه طيب ؟؟؟

لموا من بعضكم بقى شوفلنا سواق
هههههههههههههههه
نورت يا علي

عمرو (مواطن مصرى)0 يقول...

والله بوست لذيذ جدا,,

ياستى حقك الدستورى كمواطنة مصرية بتؤدى ماعليها من واجبات كالوقوف فى طابور العيش إنك تتعلمى السواقة.

وبعدين اللى بيعملوا حوادث كبيرة اللى بتيجى فى الجرايد دى كلهم رجالة, يعنى ياسواق مقطورة, ياسواق ميكروباس, ياسواق أتوبيس, وكل عقد من الزمان على مانسمع إن فى ست عملت حادثة ضخمة,,

وبرضه تلاحظى ان الست رقيقة فى حوادثها يعنى لما بتعمل حادثة تموت واحد ,اتنين بالكتير,,طفل شارد ,, كده يعنى ,,انما الراجل يضيع معاه أتوبيس بركابه وأقل من 15 قتيل مايقبلشلى.

_الكــلام الجد بقى: المشكلة إن انتى كانسانة واعية عايزة تمشى بشكل صحيح وتسوقى بشكل سليم يعنى بلا اى نقيصة فى التعلم وفى نفس الوقت مجال السواقة كله مليان نقائص ونسبة كبيرة من اللى بيسوقوا ماينفعشى يطلعلهم رخص أصلا, لعدم صلاحيتهم نفسيا وذهنيا, فانتى فى حيرة بين انك تتعلمى زى ماتعودتى تتعلمى اى شىء بشكل علمى وسليم و بين سواقة الفهلوة اللى مالية الشوارع , وماشية بالبركة واهى ماشية...

_نصيحتى قاوحى واتعلمى وماتتكسفيش من حاجة , وكملى مقاوحة لحد ماتتعلمى سواء فى السواقة او اى شىء آخر,,


امضاء : واحد مابيعرفشى يسوق

mayada يقول...

هههههههههههههههههه
وانا اقول ام مريم راحت فين اتاريكي
مشغوله في السواقه بقي مش عارفه تشوقي
في المنصوره ياام مريم امال القاهر تعملي فيها ايه
بصي حكايه الرخصه دي الرخصه بقت بتطلع
من غير ما تروحي حتي تمتحني كله ماشي بالفلوس للاسف
وكمان نصيحه من خليفتك في الملاعب بلاش تسوقي فيها ليه بقي لان غلاسه سواقين التاكسي اللي بتشوفيها دي هتلاقيها وانت
سايقه اضعاف مضعفه مضعفه اللي يكسر عليكي
واللي يديكي في جنب العربيه غير بقي الخناقه علي الركنات واحنا محتجاينك
لو مصممه بقي هقولك علي الحل
عارفه جامعه المنصوره خدي ابوا مريم بالليل وروحي اتعلمي جوها لان فيها لفات ومفارق وطريق رايح جاي نموذج للطريق تمام وكمان مفيش عربيات هتقابلك تلبخك لو تتمكني شويه اخرجي بقي من الجامعه مره علي جيهان حبه علي السريع خمسه في الترعه حبه علي كوبري الجامعه حبذا شويه في الجلاء لو بقيتي تمام في الحتت دي هتبقي تمام في كل الحتت وابقي ادعي
لخليفتك في الملاعب
سلام ياقمر

dreem يقول...

بصى يا ستى
اهم حاجة فى السواقة انك تبقى جريئة يعنى تشوفى اخوكى لو كان شاب روش كده ولا ابن خالك او اى قريب وتخليه يقعد جنيك مرة واحدة بس وانتى بتسوقى فيها لان مع الاسف السواقة فالبلد دى عايزة بلطجية وما بتجيش الا بالدراع واوعى تخافى .
وابقى طمنينى
تحياتى

أليس في بلاد العجائب يقول...

السلام عليكم يا ست انتي:)

وانا بقرأ البوست ضحكت ضحك .. ايه يا ست انتي دا لو حد بيفكر يعمل فيلم كوميدي مش هيطلع اطرف من بتاعك دا:)

السواقة مش معضلة و في الوفات ستات بيسوقوا يعني مش ماساة وانا منهم

هو تركيز هههههههه مش الولد وقع تبصي وراكي .. يا ستي دا وقع ومعاه ناس المصيبة في اللي محدش سمي عليه و جه في وش عربيتك و سعادتك باصه في حته تانية

علي فكرة السواقة سهله بس تبص قدام و تركزي امتي تنقلي وامتي تسرعي وامتي تقفي و اسلملك تمشي دايما علي اليمين علشان متتعرضيش لغتاتة واحدة سايقة علي الشمال ممكن تتلامض عليكي زيي كده:)

بقولك ايه يا خالتي:) أجزي من ابو العيال يومين تعالي انا هعلمك السواقة علي اصولها :)

تنورينا والله و اهو كله بثوابه اردلك من بعض خيرك:)

صبرني يارب يقول...

الاخ عمرو

والله انا تقريباهى دي مشكلتي الفعليه دلوقتي انى عايزه امشي صح
بس على فكره مش هاتنازل عن الفكره ابدا انى امشي صح .
وكمان مش هاياس وان شاء الله هاتعلم .
انا اساسا مش انهزاميه .
وشكرا لك ونورت

صبرني يارب يقول...

مياده حبيبتى :

انا رفضت انى اخد الرخصه بالرشوه والواسطه والله يا مياده
وروحت بنفسي طلعت الرخصه على فكره بس ربنا سترها معايا يعنى .

وبعدين يا بنتى المراحل بتاعة السواقه دي انا عدتها من زماااااااان
خلاص مش فاضل غير التفاعل مع الشارع
الشارع الى هو اصلا مش شارع .
وبعدين انا ما حدش يقدر يغلس عليا انا بافكر اشيل مطوه على فكره .

نورتي يا جميل

صبرني يارب يقول...

دريم
نورتي

والله انا ماليش اخوات ولاد مافيش قدامي الى ابو رياض
ربنا كرمنا به يعنى فيه العوض .

بس البلطجه والدراع دي ماشي مااحنا عارفين انا اساسا بلطجي قديم واعتزلت .

بس برضه مش عارفه اسوووووق
نورتي يا جميل

صبرني يارب يقول...

اليس فى بلاد العجائب

جت وسابت باني باني لواحده

حتى المدونه يا اليس داخله فيها شايله مطوه برضه ؟؟؟
معقوله كده ( معلش يا جماعه اصل اليس فى بينى وبينها طار بايت )

وبعدين ايه ده عامله فالحه وبتسوقي وهاتعلمينى ماشي تلاقيكى اساسا بتعكي لما تقولي بس اقعدي اقعدي .

نورتي يا لوستي والله والعظيم
اخيرا شوفتك فى المدونه ياا ختي .

واحدة مفروسة يقول...

ام مريم عندق حق مليون فى الميه
انا من حقى حتى لو ما سقتش انى احس بالامان فى الشارع
بس بجد ديه ظاهرة زادت بكل المقايس عن حدها...لأ زادت ايه ديه طفحت خالص و غرقت الدنيا...
ده انا هنا فى 6 اكتوبر تلاقى الناس كلها ماشيه عكس الطريق ...و يا سلام لو لاقيتى حد فى و شك و اصريتى على موقفك ...تسمعى شريط و لاأ حلى..من الكلام المتنقى
و ياسلام سلم لما تلاقى واحد ملتحى و دقنه واصله لركبه و عامل فيها شيخ و برضه يمشى عكس الطريق....ياعمنا ياااشيخنا...المفروض انك تكون قدوه و الاكاده بيبقى معاه اولاده فى العربيه
تقدرى تقوليلى ازاى العيال ديه تتعلم النظام و الاصول من اصله...
يا شيخه سلوكيات الناس بقت حاجه تقرف...
انا شخصيا باسوق...مش فيها بس باسوق بطريقتى المعتدله والواحد بيقرى اللى حافظه من ادعيه
وربك بيستر..اتعلمى السواقه و سوقى ....

mony يقول...

اخيرا يا ام مريم

فينك يا بنتي

كل شوي ادخل ابص عليكي و مش بلاقيكي

بالنسبة للسواقة انصحك بالاستمرار في المحاولة انك تنمدجي في الشارع لان كتر المحاولات هو اللي هيخليكي تعرفي تمشي في الشارع
لان السواقة ممارسة

و حاولي ماتخديش العيال معاكي في الاول كده علشان مايلبخوكيش
لحد ماتتمكني و تبقي معلم




ماتغبيش علينا كده تاني
علشان انا اخدت علي وجودك

المـــفـــــــقــــــــوعـــــة مــرارتـهــا يقول...

بصي ياحبيبتي
مشكلتك هي مشكلتي .. انا برضه بقالي سنة متعلمة السواقة وكل مااركب جنب جوزي يقعد يشتمني ويصرخ فيا . خايف علي عربيته علي الرغم بقي من اني اتعلمت السواقة في أزحم حتة في مصر
ماعلينا المهم اتعقدت من فكرة السواقة دي وانا حاليا مستنية الفرج عشان اجيب عربية ليا لواحدي لان عربية جوزي مافيش أمل اني اخدها
فلما هاجيبها ان شاء الله في بحر سنتين تلاتة قولي خمسة هاابقي انزل اتعلم تاني مع حد محترف تعليم بس عليها هي
فرايي انك تاخدي كورسات تاني وتشترطي انك تاخديها وسط الشارع
وبلاش تبصي وري وانتي سايقة

la3lahakhier يقول...

لا اسكوتر وبلاهة خوتة
ههههه
كل التحية

أليس في بلاد العجائب يقول...

السلام عليكم

بصي يا ست انتي ... وادي المطوة هخبيها منك اما نشوف اخرتها:)

عارفة الناس اللي بتكسر مقاديف الناس

يعني هتفضل تقولك مش فالحة مش فالحة صدقيني عمرك ما هتفلحي

شوفيلك حد يشجعك و يكون قلبه جامد الله يسترك بلاش ماما هه اديكي عارفة ماما بتعمل ايه :) عندنا كلنا مش معاكي لوحدي .. الام ام في اي مكان و دايما هتلاقيها قلقانة مهما كنتي ماهرة

المهم يعني انتي شوفي حد من قرايبك او اصحابك تكون جريئة كده و تاخدك لفة بالعربية و لعلمك لو معملتيش كده و فضلتي مستنية هتنسي و هتبقي زي اللي بيتعلم من اول و جديد

بقولك ايه لما تعوزي توصيله ابعتيلي اي عيل صغير يناديلي وانا اجيلك يا حبيبتي اوصلك وارجع واحنا عندنا كام خالتي يعني:)

ربنا يعزك وييسرلك كل صعب :)

يلا كفاية عليكي كده مش فاضيين احنا ورايا باني باني؛)

صبرني يارب يقول...

واحده مفروسه

والله حكاية الدقون الى بيمشوا يخبطوا فى الخلق دول بتخنقنى برضه . بابقى نفسي اشوفهم احسن ناس بدل ما هما جايبين لنا الكلام كده .

والشوارع انا خلاص شويه كده وبافكر اولع فى روما عشان ابنيها من جديد على نظافه .

وطول ما انا ماشيه فى الشارع باقول حسبى الله ونعم الوكيل .
وانا ماشيه فى الشارع بتاعنا بالذاااااااات باقول رحم الله عمر بن الخطاب الى كان خايف لحد معزه تتكعبل فى اخر بلاد المسلمين ويسأل عنها عمر .
تعالوا شوفوا المسلمين نفسهم كلهم متشنكلين في بعض . يا لهوي يا جدعان ده فى واحد هايتسحل هناك.

منوره يا جميل

صبرني يارب يقول...

موني حبيبتى

والله يا موني مش بايدى عارفه انتى لو تعرفينى وتعرفي انا يومي ازاي تستغربي انا باكتب ازاي اصلا .

وبالنسبه للسواقه انا وراها والزمن طويل وربنا يسهل .

صبرني يارب يقول...

مفقوعه

والله يا مفقوعه الشهاده لله رضا مش بيبقى خايف على العربيه للدرجة دي بالعكس هو دايما يقولي اتشجعي والعربيه قدامك اهى دوسييييييييييي براحتك بس ما تدوسيش بنى ادمين الله يرضى عليكى .
بس امي وابويا بقى عملولي عقده نفسيه مركبه .

بس لن ايأس . بس انا لاممكن اجيب عربيه على حسابي على فكره . وانا مالي انا يا ستى انا هاوصله عياله . هانحط التحويشه كلها فى عربيه .
ولا اقولك لما نبقى نحوشها نبقى نفكر هههههههههههههههههههههه.
نورتي يا مفقوعتي

صبرني يارب يقول...

لعله خير

هههههههههههههههه سكوتر . تصوري الحكايه دي شكلها لطيف عمري ما لعبت بالاسكوتر ده يا اختي ما كانش على ايامي .
خيخه الى جابته لابنها وبتلعب هى به نفكر نجيبه للعيال بقى .

بس السؤال هاخد العيال ورايا علىالاسكوتر ازااااااي

نورتي يا جميل

صبرني يارب يقول...

باحث
انصحك بالابتعاد مؤقتا لسببين انك طلعت من اسيوط وانا بينى وبين اسيوط طار بايت
وثانيا لان ابو مريم كان هنا النهارده وشاف الردود وشاف يا وليه بتاعتك وشكله ناوي يعورك على فكره .

هايجيبلك هديه قنبله من الصين مش اسكوتر ههههههههههههه

صبرني يارب يقول...

لوستي حبيبتى

ايه ده مرتين فى بوست واحد الواحد عنيه هاتوجعه من النور يا اختي

ومشكرين ياا ختي على عزومة التوصيله دي تعيشي يارب .

وسلملى على باني باني

صبرني يارب يقول...

اخي الفاضل احمد:

اعترض بشده على ردك على مفروسه والاساءه لها ولفكرها لمجرد انها قالت حقيقه.

انا لست من انصار تجميل الحقائق ولا دفن الرؤس فى الرمال .

الحقيقه المؤسفه ان اغلب الملتحين للاسف وادينها منظره فقط

والدين عندهم مظاهر وعبادات ونوافل فقط
مع العلم ان الدين يجب ان يكون كل ذلك بعد ان يكون الانسان على خلق والتزام ويعيش الدين لا يلبسه ولا يتكلم به بس

وهى ما قالتش انه شيخ يعنى يعلم الدين ولو ان ده موجود برضه للاسف
انما قالت : مربي دقنه وعامل فيها شيخ .

يعنى هو مش شيخ اصلا .
وهى وانا بارضه باحب اشير للناس دي ليه ؟؟؟
لان زي ما مفروسه قالت ان كانوا هم متبعين لسنة رسول الله فاولى بهم ان يكونوا مثله خلقا والتزاما ونفعا لمجتمعهم .
مش سنة اللحيه والجلباب القصير والسواك والباقي عواف عليه .

استاذ احمد احنا فى عندنا مشكله لو ما اتكلمناش ا حنا هنا الناس التانيين هايتكلموا
وبصرف النظر عن كون مفروسه مسلمه ولا لا .وأعتقد انها مسلمه .
الا انى ان انتقدني غير مسلم وهو بحق فى انتقاضه فأنا احيه على الانتقاد بادب ولا اهاجمه بل اهاجم ما بنفسي من خلل .

واسفه من قلبي يا مفروسه وحقك على راسي لو زعلتى من كلام الاستاذ احمد
هو يمكن ما يعرفكيش وما فهمش كلامك .

حبيت اسيب التعليق وردي عليه احقاقا للحق واحتراما لصاحبه .
وبرضه اعلاء لقيمة لا لتجميل الحقائق ودفن الرؤس فى الرمال .

ahmed_k يقول...

عذرا ان كنت تحاملت في ردي علي التعليق ولكني فقط اود الأشاره الي ان الشيخ ليس هو من يقوم باطالة لحيته و ويترك باقي امور الدين وديننا يعلمنا ان الدين المعامله فمن كانت معاملاته سيئه فليس منا واعتراضي علي وصفه بالشيخ فقط وهو شخص غير ملتزم مع ان الغير ملتزمين كثروا جدا هذه الأيام وليس اصحاب الذقون فقط فكنت اود ان تشير للسلوك بشكل عام بغير تخصيص ونحن في مكان يقرؤه الجميع وقد يفهم الأمر علي انه ظاهره عامه والحسنه تخص والسيئه تعم والسلام ختام

صبرني يارب يقول...

اخ احمد

حصل خير

مفروسه بتقول عامل فيها شيخ ما قالتش انه شيخ .

وبعدين للاسف زي ما قلتلك الى قالته مفروسه هو الحقيقه .
والى مربي دقنه هو الى بيبقى ظاهر للاسف لانه بيبقى متوقع منه انه زي ما هو ملتزم بمظاهر الاسلام يكون كمان ملتزم بروح الاسلام مش القشور بس .

وحصل خير ونسال الله العفو والاجر بحسن نويانا جميعا

عبده الرايق يقول...

السواقه صعبه ؟؟؟؟؟؟؟؟؟؟
ههههههههههههه
هههههههههههه
ضحكتينى يا ام خالد
ههههههههه
السواقه دى اسهل حاجه فى الدنيا
انا بسوق وانا مغمض عينى
والسواقه عندى زى شرب الميه
لكن الحاجه الوحيده اللى محيرانى
ازاى اركب فرامل للعربيه الكارو اللى بعرف اسوقها

صبرني يارب يقول...

عبد الرايق :

ايه ده ايه النور والشرف والرواقه الى حطت على المدونه بتاعتي دي يا ولاد

شرفت بجد يارايق والفرامل ده سهله اوييييييي بس انت ابقى شوف دونكي بيفهم شويه تقوله بيبقى فول اوبشن بدل ما تدوس فرامل تقوله هششششششش اقفل . يفرمل على طوووووووول .

ههههههههههههههههه نورت يا رايق والله

أليس في بلاد العجائب يقول...

هههههههههه عبده الرايق فكرني بحاجة

شكلك وحش اوي يا خالتي
عارفة ان في حد تعرفيه اخوه الصغير 9 سنين بياخد عربية باباه و بيسوقها زي الفل ولا عمره حد سمعله حس وبيعمل غرز كمان P:

اتجدعني باه دا قريب من مريم يعني

( حبة احراج علشان تبقي تقوليلي ربنا ميحرمكيش منه تاني وبتتريقي علي الكتكوت بتاعي :) )

Appy يقول...

يا عينى عليكى تعالى يا قمر وانا اديكى نصايح فىالسواقه اختك سويقه من بدرى
اولا ادخلى عندىهتلاقى بوست اسمه عسكرى لكل مواطن كده يبقى تفهمى الدنيا ماشيه ازاى
ادخلى بقى بعديه على طول
على بوست مرور كوكبى الخرفانى واقريه
وبعديها يبقى اخدتى كورسات فى السواقه المكثفه المصريه اللولبيه
ههههههههههههههههههههه
وابقى قولى ليهعلىالنتيجه بعدها
انا بتكلم عن القاهرة وعلى فكرة انا نصى يعنى ماما من المنصورة فعارفه السواقه هناك عامله ايه لما بنروح نزور نانا جدتى ام ماما هههه

الباحث عن الحقيقة يقول...

نعتذر لحضرتك وللاخ ابو خالد
مكنش قصدنا نضايق حد يا فندم

FaceMoon يقول...

والله انتى سكرة خالص
كل اللى قولتية دة معظمة حصلى
وانا حاليا اعتزلت السواقة والحمدلله
بس بفكر انى ارجع اسوق عشان انا اتقرفت من المواصلات بفكر اجيب طيارة
دى اسهل حاجة دلوقتى
تحياتى

جنّي يقول...

السلام عليكم
تعرفت على مدونتك الجميلة من خلال الباحث بسبب مسألة في المواريث موجودة الآن في التعليقات على البوست الأخير .. وأول مرة أحضر الاقيه عامل مشكلة .. على كل هو إنسان مهذب جدا لكن بيحب يمزح شوية .. وكويس أنه أعتذر ..

المهم ... البوست جميل والعرض سلس وانسيابي بلا تعقيدات كلامية ..
ويجب أن تكون لديكي الثقة التامة في نفسك من ناحية القيادة للسيارة وكثرة السير بالسيارة .. بعد كده ها تقودي وانت مغمضه عينك ! بجد والله ..
بس ازاي أعطوكي الرخصة ؟؟

أول مرة أخرج بالسيارة كنت رافع رجلي من على البنزين والفرامل وعند أول ركنة حاولت الوقوف وظللت أبحث عن الفرامل برجلي فلم أجدها والنهاية معروفة دخول سريع في الجدار ..

المهم لا تتوقفي وإن شاء الله تكوني تمام

أعتراض : أعترض وبشدة على تشبيهات المفروسة للحية وكلمة الشيخ ..
ولكني لست مع الإساءة لها من أحمد..

أشكرك وتحياتي وآمل التواصل
said

أليس في بلاد العجائب يقول...

تصدقي مش عارفة معلق معايا حكاية السواقة دي ليه

أل و بقولك تعالي اعلمك انا

:) افتكرت بداياتي يعني
دا انا كنت يوماتي بتبهدل من الوالد :( علشان العربية بتطفي مني
اول مرة خالص بعد ماخلصت دروس مدرسة السواقة

اخدت عربية سيات و في حتة عندنا علي النيل فاضية شوية بابا قالي عايزة تجربي تسوقي تصحي الساعه 7 الصبح يوم الجمعه

قمت زي ال أ :) المهم مشيت كويس قدامه وهو واقف في الشارع اللي انا اخدته رايح جاي
قلنا تمام كده

يلا لفي من جوة باه ووسعي الدايرة اللي بتسوقي فيها

ههههههههههه وياريته ما قال

دخلت في شارع مش كبير و الدنيا هس يوم الجمعه والصبح بدري يعني العربيات كلها راكنة وانا ماشية جت عربية كبيرة شيفروليه من بتوع زمان العريضة و مصر انه يعدي وانا علي ناصية شارع وفي مكان فاضي ادخل فيه قدامي عربيات راكنة علشان اعديه

و أل ايه المفروض علشان افرمل الهانم دي لازم ادوس فرامل للاخر وانا طبعا مكنتش عارفة المعلومة دي

بدوس فرامل و انا علي ثقة اني بدوسها يعني و هقف قبل العربية اللي راكنة ههههههههههههههههه

المهم دخلت فيها
واحدة ست في الشارع تقريبا مرات البواب بتاع العمارة قعدت تزعقلي و عربيات الناس و كده

وانا خيبة زي ما انتي عارفة ولا نطقت قلتلها انا اسفة و نزل ابص حصل ايه للعربية بتاعت الناس يعني علشان لو عملت حاجة وحشة اكيد هصلحها انا

المهم اظرف ما في الموضوع ان العربية اللي انا ركباها هي اللي اتخبطت هههههه
والنمر دخلت لجوة و كانت لسه متجددة و العربية اللي انا خبطت فيها دي كانت بيجو 504

بالله يعني عربية سيات تخبط عربية بيجو 504 يبقي مين فيهم اللي يتعور
بصيت للست دي وقلتلها معلش اهو ربنا خلص حق الناس ممكن امشي بعد اذنك
فضلت تزعق:( من اجل الزعيق العربية مجرالهاش حاجة وانا اللي سمعت كلمتين ملهمش لازمة لما رجعت العربية لصاحبها وهي مخبوطة

كل دا علشان محدش قالي ان الفرامل فيها لازم للاخر انا اعمل ايه يعني متعلمة علي عربية بتقف من اول دوسة مش لازم اقف فوق الفرامل يعني:(
وادي فضيحة ليا اهيه علشان متزعليش و مبقاش بتريق :)

صبرني يارب يقول...

اليس
شكلك هاتتعوري يا اليس

مين حد تعرفيه ده ؟؟؟
وبعدين يا عاااادي انا لسه فى واحد خابط جوزي كان عمره لا يتعدى 14 سنه هى دي بلدنا يا طعمه

صبرني يارب يقول...

آبي

نورتي يا جميل والله وشرفتينا

هاشوف انا حكاية السواقه اللولبيه الى عندك دي

على فكره انا اول ما رجعت من الامارات كنت باخاف اركب اي عربيه اصلا اركبها بس مش اسوقها يعنى كنت بلا شعور كده لما اركب التاكسي الاقينى على اخر المشورا رجليا الاثنين لازقين فى الدواسه وانا متشبسه بالكرسي ومشدوده على الاخر .كنت حاسه اننا ماشيين فى فيلم اجنبي

صبرني يارب يقول...

باحث

زعلت منك لما حذفت التعليق انا لو كنت زعلت منه اوي كده كنت حذفته انا يا باحث .
ولسه ما حدش اضايق منك بس نفكر نضايق بقى دلوقتي ههههههههههههههه

صحيح أنا ما باحبش حد يقولي يا وليه دي بس زي ما قلتلك ما زعلتش لدرجة انك تشيل التعليق

أي حد يحذف تعليقه بعد كده هايتعور على فكره

صبرني يارب يقول...

فيس مون

والله يا قمر واحشاني

عارفه انا لما حصلتلى اخر مشكله اعتزلت فعلا وقلت خلااااااص بلاها سواقه
بس كل ما اخرج واسيب العربيه الصبح كده راكنه جمب الحيط بازعل اوي .
ولما اتخانق مع سواق التاكسي كالعاده برضه باقول ربنا يتوب علينا .
ولما اقف بالنص ساعه استنى تاكسي يحن عليا اقول يا خيبتك البني يا صبرني .
نورتي يا جميل

صبرني يارب يقول...

جنى

حضرتك شرفت ونورت المدونه وصاحبتها ويارب دايما منور

باحث ده على راسنا يا جني ولا عمل مشاكل ولا حاجه بس ابقى حذره بقى من حكاية حذف التعليقات دي عشان هايتعور المره الجايه .

وبالنسبه للسواقه هاحاول واسوق وانا مغمضه وسايبه ادايه واقول جني الى قالي ههههههههههههههه
وعلى فكره حركة الحيطه دي عملتها عااااااااادي .

اما بالنسبه لمفروسه اعتراض حضرتك على راسنا .
لكن انا معاها وباقول ان فى ناس ملتحين او منقبات او غيره من الى شايلي مظاهر الدين فقط على كتافهم ومستترين خلفها للاسف لكن المشكله ا نهم بيكونوا اسوأ مثل للمسلمين واخلاقهم
لكن ده طبعا ما يخليش ا للحيه والنقاب علامه على الفساد لكن كمان هما مش علامه على الدين .
وارفض انا وبششششششششششده تجميل الحقيقه او اخفائها ودفن راسنا فى الرمل .
افضل المواجهه احسن
نورت يا جني

صبرني يارب يقول...

اليس

احكموا انتم اعمل فيها ايه بقى حد دلوقتي قالها حاجه هههههههههههههه
وبعدين فضيحه ليه عااااااااادي مش عربيتك اتخبطت ده كده اول علامه انك سويييييييييقه .

نورتي يا اليس وبعدين انا ابطل تريقه ؟؟؟؟ ازاي يا بنتى ما ينفعش امال مين يقول طيب .