الأربعاء، 4 يونيو، 2008

تايفويد ....ولا بروسلا... ولا لوكيمااااااااااااا؟؟؟؟؟!!؟!؟؟

السلام عليكم
مش عارفه ابتدى الكلام ازاي عشان مخنوقه وحالتى مش عارفه اوصفها . هاحكيلكم الى حصلى النهارده يمكن استريح لما اقوله .

النهارده من الظهر تقريبا وبدأت الاحداث ورا بعضها . اتصلت بيا سلفتى الكبيره وطلبت مني رقم تليفون دكتور تحاليل وبعدين قالتلى كلميه انتى عشان مش انا مش عارفه اتكلم واطلبي منه تعجيل نتائج التحاليل بتاعة محمد ابني عشان نلحق نعرضها على الدكتور قبل ما يقفل . وعملت كده فعلا
ابنها ده من حوالي 3 اسابيع جاله اسهال وسخونيه وترجيع وعمره 16 سنه . وقالوا جابوله دكتور وقالهم تايفويد والعلاج شغال . وانا عرفت واتصلت عليهم على ان الوضع طبيعى وما روحتش لان هما قالولي انه معدي وانا مش عارفه هو كده فعلا ولا لا .
المهم بعد شويه صراحة تاه الموضوع عن بالي على ان التايفويد بقى مرض علاجه موجود ولله الحمد لكن لقيت اخو رضا الى هو ابو الولد بيقولي ان الولد لسه تعبان اوي والحكايه مأزمه اوي عشان الامتحانات قربت لانه فى ثانويه عامه .
ومن هنا بدأنا نقلق ونقول في ايه . وكلمتهم وحثيتهم شويه على انهم يعيدوا التحاليل ويشوفوا ا يه الموضوع .وفعلا عادوا التحاليل قام الدكتور التاني قال لا ده مش تايفويد ده بروسيلا ( تقريبا هى دي حمى البحر المتوسط ) وقال دي منقوله من اللبن . وهات يا علاج تاني
وفات اسبوع والواد حالته فى النازل وبقى كوم عضم وابوه بدأ يشك فى الموضوع لانه ابوه ده بيشتغل اساسا فى مستشفى فنى اشعه وعدى عليه من البلاوي دي ياما .
نرجع للحصل النهارده : كلمت الدكتور تاني لما وصل العياده والبنت الى هناك قاتلى نص ساعه وتعالوا استلموا التحاليل . لقيت الدكتور دخل على الخط وقالها سبيلى التليفون يا فلانه . وكلمنى وقالي محمد حلل دم قبل كده قلتله اكيد لانه تعبان من زمان . زعق فيا وقالي مافيش اكيد حلل ولا لا . قلتله حلل قالي عايز اشوف التحاليل حالا ابعتيهالي . قلتله حاضر (هو اساسا صديق لبابا ) . حدته فى الكلام دي قلقتنى جدا لانه هو مش كده اصلا .
المهم بعد سيل من التليفونات رايحه جايه الدكتور نفسه قالي انا عاااااااااايز اعرف عدد كرات الدم البيضاء كام .
اول ما قالي كده حسيت الدنيا فى وشي خرم ابره . لانى عرفت معنى السؤال ده . لكن كذبت نفسي وقلت انتى معقده يا بنتى ولا ايه .
واسنيت لحد ما بعد شويه اتأكدت ان كل الدكاتره شاكين بالفعل بان الولد عنده لوكيميا او سرطان الدم . جرينا عليهم فى البيت .لقيناهم منهارين فى محاولات يائسه من الاهل الى هناك انهم يخبوا على الولد . وادعاء انهيار امه وابوه انه بسبب انه هيأجل الامتحان السنه دي . ومع عدم اقتناع الولد الا انه مش قادر اصلا يناقشنا .
وبعد سلسله اخرى من البحث والجري فى الشوارع وتشقيط الدكاتره لنا شمال ويمين ونصنا فى الشارع معاهم والنص التاني فى البيت فى ساعات من الا نتظار المميت .
جالي تليفون من رضا ان المرض شبه اكيد فاضل فحص واحد مش هايكون الا فى مركز الاورام وده هايكون الرد القاطع انما كل الفحوصات الاوليه بتؤكد انها لوكيميا بالفعل .
وبعد وقت كمان مش عارفه اد ا يه لمحاولة ترتيب اوراقنا وتوزيع الادوار عشان ناخد اسرع وقت ممكن فى تخليص اجراءات دخول الولد بكره المركز رجعنا البيت .
ورضا قعد يحكيلى الدكاتره قالولهم ايه وانهم طمنوهم ان كل شيء له علاج الحمد لله وانه لسه صغير وحالته لسه حديثه والعلاج ان شاء الله ممكن وبنسب عاليه فى الشفاء .
تخيلوا من 3 سنين زي ا لايام دي بالظبط حصلت نفس الاحداث دي بالظبط من اول التايفويد لحد اللوكيميا. انا سمعت نفس الكلام بالحرف من رضا عن واحد من اعز اصحاب رضا عليه .وللاسف مات بعد دخول المركز بايام . بعد كل الكلام المطمئن الى سمعته من رضا بنفس الشكل عنه . وسنوية كانت اول امبارح . والايام الوحشه دي كلها ما راحتش لسه من دماغي . وهاتجنن وانا شايفه الفيلم من اوله تاني ومش عارفه اعمل ايه .
حد يفهمنى لو فاهم ازاي الحاله تتشخص تايفويد وبعد اسبوعين تتشخص بروسيلا وبعد كام يوم تتشخص لوكيميا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هل الدكاتره دول الى شخصوا فى الاول بقر مش فاهمين حاجه ومن الاول كانت لوكيميا؟؟؟؟؟؟؟؟؟؟؟؟
ولا هى كانت كده فعلا ودول كانوا سبب انه جاله سرطان فى الدم ؟؟؟؟؟؟؟؟؟؟؟؟؟؟؟؟؟؟؟؟؟؟
ولا لما اخد ادوية لعلاج التايفويد عملت كده معاه ؟؟؟؟؟؟؟؟؟؟؟؟؟
حد يفهمنى ازاي فى الحالتين دول حصل كده من تايفويد الى لوكيميا ؟؟؟؟؟ ايه العلاقه ؟؟؟؟؟

وليه نسة الاصابات بالزفت ده بقت كده . احنا بنعمل ايه وبناكل ايه وبنشرب ايه ؟؟؟؟؟؟؟؟؟؟؟؟؟

ولما يكون التدخين والاكل ولا اي حاجه سبب للسرطان . ليه طفل يجيله سرطان بالشكل المفاجيء ده ؟؟؟
مش عارفه اعمل ايه بابكي وبس ومش عارف ابص فى وش الولد ومش عارفه ابص فى وش اهله ولا فى وش رضا

مش قادره استحمل تفاصيل الفيلم ده تاني انا لسه ما نستوش .
مش قادره اقول غير
انا لله وانا اليه راجعون
واللهم اجرنا فى مصيبتنا
وحسبنا الله ونعم الوكيل
واللطف من عندك يا لطيف والرحمه يا رحيم بينا وباولادنا .


وارجوكم ادعولنا نروح بكره المركز يقولوا غلط كله غلط ونلاقيه سليم . وادعولنا لو طلع عنده لوكيميا ربنا يشفيه
وادعوا لامه وابوه ربنا ينزل السكينه فى قلبهم .
ويارب ما يسيء حد ابدا فى اولاده ولا حبايبه ويشفى مرضى المسلمين جميعا
واسفه لو نكدت عليكم


تحديث : اتأكدنا يا جماعه انه فعلا عنده لوكيميا الغدد الليمفاويه الحاده . يقال انها خطيره لكن علاجها بدري ممكن اوي . والدكاتره بيقولوا برضه انه لسه باديء الامر معاه . والله ورسوله اعلم .
خايفه اصدق طمأنة الدكاتره لنا .
هو دلوقتي فىمستشفى 57357 هاحكيلكم عنها بكره .

ارجوووووووووكم ما تنسوناش بالدعاء بظهر الغيب ان ربنا يشفي محمد ويصبره ويقويه على العلاج الصعب اوي ويصبر اهله ويقوي امانهم . الى هو احنا يعنى .
والف شكر لكل من اهتم وسال ولكل من استجاب ودعالنا

هناك 30 تعليقًا:

خمسة فضفضة يقول...

السلام عليكم ورحمة الله وبركاته

لا حول ولا قوة الا بالله العلي العظيم ربنا يلطف بيه وبامه وابوه

ويارب يكون كل الكلام غلط

ولعلمك بقي الدكاتره اليومين دول بقوا بيهبلوا فعلا ، من غير اي تحاليل ولا فحوصات يخمنوا المرض ويدوا العلاج علي اساس التخمين ده
وايكد هو ده اللي حصل لما لقوا عند الولد اعراض التيفود ادوله العلاج
ولما مافيش استجابه قالوا لا يبقي حاجه تانيه

حسبنا الله ونعم الوكيل
مش بس في الدكاتره اللي ماعندهاش ضمير لا كمان في كل واحد كان السبب اننا ناكل ونشرب وكمان نتنفس حاجات مسرطنه

وبالنسبه للعلاج لو كان خد في علاج التيوفود حاجه اسمها تارفيد وده اشهر علاج للتيفود ، او اي حاجه زيه ( الماده الفعاله اوفلوكساسين او اي حاجه تانيه فيها مجموعة اسمها الكينولون ) ممكن يكون هو السبب لانه ساعات بيسبب ظهور حالات لوكيميا في نسبة ≥ 1.0% من المرضي
بس غير معروف اذا كانت الاعراض دي بسبب العلاج نفسه بس ولا في المرضي اللي بيبقي عندهم استعداد

والمفروض اصلا الكينولون ده مايتاخدش تحت 18 سنه ولو كان الدكتور كتبهوله فعلا يبقي منه لله واكيد هو السبب

ربنا يلطف بالولد وتكون الاضطرابات الموجوده في التحليل دي بسبب العلاج ويارب ترجع النسب طبيعيه لما يتسحب الدوا من جسمه بعد كام يوم


ياريت تقوليلي ايه الادويه اللي كان بياخدها وانا افيدك اكتر


سلام

خمسة فضفضة يقول...

نسيت اقولك كمان ان ممكن تكون اختلطت عليهم اعراض حمي البروسيلا مع الاعراض الجانبيه للعلاج ده طبعا اذا كان ضمن العلاج تارفيد او اي حاجه من مجموعة الكينولون
واعراضها بتبقي شبه الانفلونزا مع ارهاق شديد وخمول و نقصان وزن

ربنا يلطف بيه ويتم شفاه يارب

حاجات جوايا يقول...

ربنا يستر ويعديها على خير
يارب عديها على خير يارب
وخليه لأهله وباركلهم فيه وطول فى عمره عشان خاطر اهله يارب

يارب الكلام ده كله يكون غلط ويكون مجرد التهاب عنده عمله شوية زيادة فى كريات الدم البيضا والموضوع يخلص على كده يارب

أنا مش عارفة انتوا عملتوله أشعة بالصبغة ولا لسه ؟؟
أعتقد انها بيبان فيها سبب زيادة كريات الدم البيضاء

انا مقدرة والله الكابوس اللى انتوا عايشين فيه عشان كنا لسه عايشين فيه الصيف اللى فات مع أخت زوجى والحمد لله بعد التشخيص طلع التهاب هو اللى عمل كل ده

يارب يكون كده يارب

طمنينا اول باول وان شاء الله هدعيله على طول ربنا يشفيه ويخليه لأهله ويباركلهم فى عمره ياااااااارب يا كريم

dreem يقول...

لاحول ولا قوة الا بالله العلى العظيم
ان شاء الله هيكون التشخيص غلط وربنا يلطف بيه ويشفيه ويخليه لامه وابوه ولا يحرق قلبهم عليه اللهم امين
ابقى طمنينا وربنا معاكم
دعواتى

المـــفـــــــقــــــــوعـــــة مــرارتـهــا يقول...

ايه الكابوس ده
انا للأسف ماعرفش افيدك غير بالدعاء انه يطلع حاجة بسيطة ويكون التشخيص غلط
ربنا يستر عليه ويصبره هو واهله علي الأيام دي
الكلام اللي قلته خمسة فضفضة يرعب
يعني ممكن الواحد من علاج غلط يجيله مرض خبيث ذي ده
ربنا يلطف بينا

صبرني يارب يقول...

سالي

يارب يارب يطلع كده ياااااارب ويشفى كل مريض ويعفي عنه

صبرني يارب يقول...

خمسه فضفضه

مش عارفه والله ادوية التيفود كانت ايه. لكن لم اروح هنا النهارده ان شاء الله هاشوفها

بس لما يكون دوا بيعمل كده للنسبه دي ليه يبقى موجود اصلا ؟؟؟

هما دلوقتي فى الطريق راحين مستشفى 57357

مش قدامنا غير نقول يارب

صبرني يارب يقول...

مفقوعه والله فعلا هو كده كابوس ويارب يخلص على خير ويشفيه وينجيه يااااااااااارب

صبرني يارب يقول...

دريم
امين يارب

خمسة فضفضة يقول...

السلام عليكم ورحمة الله وبركاته

ربنا يطمنكوا عليه ان شاء الله

وبخصوص النسبه بتاع التلرفيد مش عاليه ولا حاجه دي مجرد واحد من عشره في الميه او اقل وكمان الابحاث بترجح ان ده مش بيحصل الا في الاشخاص اللي عندهم استعداد انه يجيلهم كده
وكمان ممنوع تماما في الاطفال اقل من 18 سنة

ربنا معاه ويارب يشفيه ويرجعه لمامته وباباه بالسلامه

سلام

صبرني يارب يقول...

فضفضه الدوا الى انتى قلتي عليه بالظبط هو الى كان بياخده

النوعين الى قلتي عليهم وفعلا عمي قالي ان المضاد الحيوي ده لاعمار فوق العشرين
بافكر ا روح اولع فى الدكتور الى كتبه له .

وياااااااااااارب ما تكونش لوكيميا ياااااااااااارب
وشكرا لك يا فضفضه

واحدة مفروسة يقول...

ربنا يقويهم و يخفف عن الولد
ربنا يلطف بعباده
مش عارفه اقولك ايه...اكيد حالتكم كلكم صعبه
ربنا يعينكم

صبرني يارب يقول...

تسلمي يا مفروسه

والله احنا مستنيين فرج الله ورحمته بكره لما يعمل فحص اخير

حاول تفتكرنى يقول...

ربنا يستر
إن شاء الله يكون خير
والمواقف الصعبة تحتاج إلى هدوء للقدرة على التصرف الصحيح


دعواتنا لن تنقطع

واحدة مفروسة يقول...

إيه الأخبار إنشالله خير

يارب يكون خير

حاجات جوايا يقول...

إيه الاخبار ؟؟؟
اتاخرتى علينا ليه ؟؟؟
يارب يكون خير

طمنينا

ربنا يشفيه ويشفى كل مريض

صبرني يارب يقول...

حاول تفتكرني ومفروسه وسالي

ربنا يكرمكم يارب على قلقكم معايا

بس والله غصب عني ما عرفتش اجي النهارده خالص

هو نتيجة الفحص فعلا طلعت وهو عنده فعلا لوكيميا الحمد لله على ما نحن فيه

لكن الكل بيأكد انها لوكميا الغدد الليمفاويه الحاده.
هى خطيره فى سرعتها وسرعة انتشارها لكن اكتر الانواع استجابه للعلاج

رغم كل الكلام المطمئن من الدكاتره الا انى سمعته قبل كده بررررررررضه ومش قادره اصدقه تاني .

واتمنى ان ربنا يشفيه ويرفع عنه العذاب ويغفر لوالديه ويرحمهم ويصبرهم

ودعواتكم معانا الله يكرمكم
وشكرا لكل مهتم

الباحث عن الحقيقة يقول...

السلام عليكم
فيه تعليقين لى ارجو النظر إليهما بشكل عاجل
خاصة التعليق الاول لى في مدونتك رؤية
كتبتهم امبارح الليل ورجعت مالقتش رد من حضرتك
ففكرت في ان اترك لحضرتك تنويه هنا
مع الشكر

حاجات جوايا يقول...

لا حول ولا قوة إلا بالله
أسأل الله العظيم رب العرش العظيم ان يشفيه
ربنا كبير
بس خلى الامل موجود دايما وحسسوه بيه عشان الحالة النفسية بتاثر
ربنا يشفيه ويشفى مرضى المسلمين

جنّي يقول...

السلام عليكم

عليكم بالدعاء وأكثروا منه في كل وقت وحين فالله تعالى هو الشافي مع
الأخذ باسباب العلاج طبعا ..

نسال الله العظيم رب العرش العظيم أن يشفيه ..

اللهم رب الناس اذهب البأس اشف أنت الشافي شفاء لا يغادر سقما ..

اللهم اشفه وعافيه ..
اللهم اشفه وعافيه ..
اللهم اشفه وعافيه ..

اللهم وجميع مرضى المسلمين

اللهم آمين

الباحث عن الحقيقة يقول...

السلام عليكم ورحمة الله وبركاته
اسف ما قريتش الموضوع امبارح طبعا
طهور ان شاء الله
ربنا موجود
ان شاء الله ربنا يتم نعمته عليه وعلى اهله ويتم شفاه بخير
انه نعم المولى ونعم النصير
واذكركم بقوله تعالى
واستعينوا بالصبر والصلاة
لانه تعالى يوفي الصابرون الجزاء العظيم
يقول تعالى
انما يوفى الصابرون اجرهم بغير حساب

صبرني يارب يقول...

باحث الله يكرمك رديت هناك وشكرا لمرورك هنا ولدعائك وربنا هو الشافي

صبرني يارب يقول...

سالي وجني


ربنا يكرمكم يارب ويتقبل دعائكم ودعائنا له ولا يريكم مكروها ابدا في انفسكم وكل من تحيط به شفقى قلوبكم . والمسلمين جميعا .
متشكره اوي بجد

دكتور حر يقول...

ربنا يشفيه يا رب


لكن
بتحصل

Appy يقول...

يا حبيبتى ربنا معاه يا رب ويشفيه معلش فيه دكاترة بيستسهلوا بس وعاملين نفسهم شطار بجد علشان كده مش بحب الدكاترة خالص
ربنا يشفيه بصى انا فى القاهرة وقريبه لو احتجتى حاجه بجد قوليلى وانا اجيلك على طول والله
وربنا يشفيه يا رب

صبرني يارب يقول...

دكتور حر
الله يكرمك يارب بس هى ايه الى بتحصل ؟؟؟

ان دكتور يدي علاج فوق السن ويكون فيه نسبة حدوث لوكميا بسببه ولسه العلاج ده موجود بالسوق ؟؟
ده على كلام خمسه فضفضه .

ولا بيحصل ان دكتور يشخص تايفويد او باروسيلا من غير تحاليل ؟؟؟؟

ليه حالتين تايفويد تقلب لوكميا اشوفهم رؤى العين ؟؟؟؟

مش صدفه مؤكد في علاقه ارجو كل من واحد له علاقه بمجال الطب والبحث يشوف ايه الموضوع يا جماعه
احنا بناكل كل يوم زفت وقرف والتايفويد بقى يجى زي دور البرد لما يكون علاجه بيجيب لوكيميا يبقى حاجه لا تحتمل التهاون.

ويارب الجهات المسؤوله ما تبعناش اكتر من كده لمافيا الادويه .
اي حد هنا يعرف ان احنا صندوق نفايات العالم خصوصا فى الادويه .
عندنا ادويه متداوله فى السوق والدكاتره بتوعنا سواء بعلمهم او بغير علم منهم وطبعا عذر اقبح من ذنب بيكتبوهم للمرضى .
والادويه دي ممنوعه فى دول كتير بس طبعا شركات ا لادويه تودي الانتاج فين الى انتجته والى استعدت لانتاجه فى صندوق نفايات العالم دول العالم الثالث .

ما حدش بيرحمنا احنا شعوب ما لهاش اصحاب .

مصدقاك انها بتحصل يا دكتور للاسف بتحصل للاسف بتحصل وكتييييييييير وحسبى الله ونعم الوكيل فى كل من تسبب فى الام وامراض الناس بعلمه وقصده او بجهله او باهماله

صبرني يارب يقول...

آبي

ربنا يخليكى يارب ويكرمك تسلمى يارب الحمد لله انا ليا اعمام فى مصر وبرضه لو احتاجت حاجه هاقولك يا حبيبتى الله يخليكى

خمسة فضفضة يقول...

السلام عليكم ورحمة الله وبركاته

الف سلامه عليه ويارب يتم شفاه ويستجيب للعلاج ويرجع تاني ينور بيته ويفرح باباه ومامته

بالنسبه لتاريفان مش ممنوع ولا حاجه بس اي دوا موجود في السوق بيبقي له محاذير واعراض جانبيه وتداخلات دوائيه والمفروض الدكتور اللي بيديه يبقي عارف كل الحاجات دي وبالتالي بيختار الدوا المناسب للحاله المناسبه
و اي دوا لو مش متوفره فيه نسبه معينه من الامان مش هاياخد التصريح بالاستخدام من ال FDA والمنظمات المختصه بترخيص الدوا



ارجع تاني اقولك ربنا يشفيه يارب ويطمنكم عليه

سلام

صبرني يارب يقول...

اوك يا فضفضه

هاحاول اصدقك ان احنا مش مزبلة العالم .

لكن هاحاول اعرف خالد الله يرحمه صاحب رضا كان بياخد نفس العلاج للتيفود ولا لا
لو طلع كده اكيد هاقولكم

Liberal Muslim يقول...

اللهم رب الناس اذهب الباس واشفي انت الشافي .

وان شاء الله مايكونش كانسر ويكون حاجه بسيطه ,.... ربنا يلطف ان شاء الله .

علي فكره يا أم مريم الكانسر مهما كان نوعه بقي من السهل علاجه دلوقتي .
وانا اعرف ناس كتير ربنا كتب لها الشفاء من المرض ده .