الثلاثاء، 22 يوليو، 2008

عيش ندل تموت مستور

السلام عليكم
وربنا وحشتوني جدا جدا
شكرا اوي لكل الناس الى سألت عليا والى ما سألوش والى سألوا فى بالهم وقالوا الست دي راحت فين شكلها كلت دراع جوزها وهو قتلها .
احب اطمنكم على دراع جوزي وعليا
انا بس كل الحكايه انى عملت جدعه اه تخيلوا . مش عارفه مالها النداله يا اخويا
الحكايه ان جوزي احتاج كمبيوتر عشان الشغل ونظرا لاننا واخدين محل جديد والحكايه ملخبطه حبتين فأنا عملت جدعه بقى
وقلتله:ولا يهمك يا ابو رياض الكمبيوتر اهو خده مش مشكله بعدين نبقى نجيب واحد جديد بقى للبيت .
قالي :ا ممكن ابدا انا عارف انك ما تقدريش تعيشي من غير الرغي
قلتله :فداك الرغي وصاحبة الرغي يا ابو رياض ولا يهمك .
قوم الاخ بقى ما صدق وقام هووووب اخد الكمبيوتر .وبعدين بعد ما فكه بقى
قالي : قوليلي بالامانه بعد اد ايه هاتمسكي فى زمارة رقابتي وتقوليلى عايزه كمبيوتر .
قلتله : اخسسسسسسسس ليه كده بقى ما انا ادتهولك بنفس راضيه اهو .
قالي : لا انا بسأل بس عشان اعمل حسابي .
المهم يا اخواني اخدوا الكمبيوتر بتاعي حبيبى عشرة 7 سنين وودوه المحل وبعدين تاني يوم اتصل عليا رضا وقالي الكمبيوتر ما نفعش وكسفنا اخر كسفه وما اشتغلش
قلتله : اوباااااااااااا اكيد انتم عاملتوه وحش هاته تااااااااااني لما اشوف عملتم فيه ايه ؟؟؟؟؟؟؟؟؟
قالي هاجيبه وانا جاي انا هاروح اشتري واحد جديد للمحل واجيبلك بتاعك يا اختي .
شااااااااايفين اخرة الجدعه بقى
مش دي المشكللللللللله جابولي الجهاز وقعدت اركب فيه ساعه واطبطب عليه وشغلته واشتغل عااااااااادي بعدين انشغلت بقى وما فضيتش ارجعله تاني .
وبعدين آخر الليل طالعه بقى من عند ماما لقيتهم قاعدين فى الانتريه وشارين كمبيوتر جديد بيجمعوه وبعد شويه وانا قاعده كده اكتشفت انهم قلبونيييييييييييييييييييييي
ايوه مش كفايه انهم شحاتين وبيتأمروا لا قلبوني واخدوا الشاشه وقال اييييييييييييييه ما لقيوش الا شاشه كبييييييره فقالوا ناخد الصغيره ونجيبلك انتى الكبيره شوف الكرم يا جدع
بعد شويه اكتشفت ايضا انهم قلبوني فى احد الهاردين بتوعي حبايبي وقالي ابقى ستبيلك وندوز بقى على الهارد بتاعك اصل احنا خدنا واحد .
وكمان علقوا الماوس وقالي اصل الماوسات فى المخازن مش عارفين نوصلها دلوقتي هناخد ده حتى مكسوره ونبقى نجيبلك واحد جديد .
ومر على هذا الكلام يا اخوااااااااااااني اسبوع ولا حد جابلي شاشه ولا ماوس ولا حد عبرني
وطبعا دلوقتي لم باطلب اي طلب من جوزي حتى لو كان كيس عيش .
قوم يبصلي بصى غلب اه الى هي ينزل حواجبه لتحت كده وعنيه تضيق وشفايفه تتقلب ويقولي : طيب حاضر لو قدرت اديكى شااااايفه .
طبعا انا لسه لحد دلوقتي ما مسكتش فى زمارة رقابته بسبب الكمبيوتر ده لانى اساسا مش فاضيه الايام دي اصلا للكمبيوتر .
بالطبع انا باكتب دلوقتي وورايا دار حضانه مؤلف من ولادي وولاد اخواتي بالاضافه لاخواتي وماما وبابا عشان كده ما تفكروش انى هاعرف اكتب اي حاجه اكتر من الرغي الفاضي الى فوق ده وكتبته على 17 مره .
وان شاء الله هامسك فى زمارة رقابته بعد الافتتاح ما حدش يجى مافيش جاتوه . احنا الافتتاح بتاعنا هو اننا نفتح المحل ونقعد يعنى هههههههههههههههههههه ما لناش فى الحركات التانيه .
يلا بقى عشان الشاي على النار وابويا هاينام من غير ما يشرب الشاي . سلام عليكم ابقوا اسألوا عليا وعلى زمارة رقبة رضا .

هناك 20 تعليقًا:

mayada يقول...

ههههههههههههههههههههه
حمد الله علي السلامه انا والله
باجي كل يوم افتح شبابيك المدونه
واهويها وكده المهم خلي بالك من رقبه
الاستاذ رضا
يلا سلام

واحدة مفروسة يقول...

ههههههههههههههههه
ههههههههههههههههه
يعني انتي بتكتبي من المحل الان
هههههههههههههه
مش لازم توضحي يا صبرني
هههههههههههههه
معلش يا مااما الشاشة مجايبها سها و الماوس و ...و....
هههههههههههههههه
يا بنتىي انزلي انتى و اشتري و خلصي الليله ديه
وحشتيناااااااااااااااا

canary يقول...

اعوذ بالله
دة انتى سودتى الليله فوشى
طب لما انتى ملكيش قلب على بعاد المحروس كان لازمتها ايه حركات الجدعنه؟
ومدام اتشمللتى استحملى بقى شويه
بس واضح بقى ان البيت يضرب يقلب عندك
وبعدين متخفيش اوى كدة على الجاتوة احنا واكلين وشبعانين وعنينا مليانه شكرا على كرم الضيافه
وبعدين دة الماوس والشاشه مش هيعملو اكترمن 200 جنيه ضحى انتى وانزلى جبيهم بدل الولوله دى كلها

mony يقول...

ياااااااااااا اخيرا وحشتينا و وحشنا رغيك


كل شوي ادخل المدونة اشوف وصلتي ولا لسه


و الحمد لله دخلت و لقيتك وصلتي

ازاي يا صبرني تفرطي في الكمبيوتر

كده برضه تقهريه و تخليه ماينطقش غير لما تقعدي تحايلي و تعتذري ليه

عموما احنا فرحنا بطلتك علينا
ماتغيبش تاني بأه

شكلك ملخومة علي الاخر

حبيبـــــــة القمـــــر يقول...

هههههههههههههههههههههههه
عودا احمدا ومرزوقا ومسعدا يا صبرني
بقى يابنتي حد يفرط في الكمبيورر بتاعه
دا كله الا الغالي رفيق الليالي هههههههههههه
بس انتي جدعه
اشربي بقى نتيجة الجدعنه
والف مبروووك ياقمر
ربنا يجعله مكان مبارك ويرزقك فيه رزق واسع

مش هتغيري رأيك وتجيبي جاتوه بقى ههههههههههه

صبرني يارب يقول...

مادي خليفتى فى الملاعب

تسلمى يا اختي اهو ده العشم يا اختي خلى بالك من المدونه

صبرني يارب يقول...

مفروسه حبيبتى
انتى دايما كده بتوهي مني ؟

لا يا بنتى انا عند باباااا وعندي مووووولد مجموعة ظروف مختلفه عايزالها 15 بوست عشان احكيها . المهم انى فى مولد

صبرني يارب يقول...

كناري

بصي اصل انا طماعه راسمه على جهاز جديد من بابه اصل الجهاز بتاعي حالته بقت مستعصيه المسكنات ما بقتش تجيب فايده معاه خاااااااالص .

وبعدين ايه كلكم مستسهلين انزلي انتى واشتري انتى
ماهو انا لو اعرف انزل كنت نزلت حتى اروح لدكتور السنان يا اختي ده انا سناني كلها محشيه حشو مؤقت .
اااااااااااااه يا سناني

صبرني يارب يقول...

موني
والله يا موني بالعافيه باكتب وارد عليكم عارفه الي هو درب من الخيال والله العظيم باكتب وناس بتدوس عليا فى النص

وانتم كمان وربنا وحشتوني جدا جدا
وجهازي حبيبى انا الى غلطانه انى بهدلته يا اختي انا كان لازم نزلته على الزباله على طول مش على المحل ههههههههههه

صبرني يارب يقول...

حبيبة القمر

والله يا جميل دايما اقول الجدعنه دي جايباااااااني ورا بس يلاااااا بقى ما حدش واخد منها حاجه

والله يبارك فيكى ودعواتكم معانا وبالنسبه لك انتى تعالى نأكلك جاتوا فى البيت وعمايل اديه كمان والله بس المحل رضا رفض رفضا بااااتا وقالي دماغي مش مستحمله

kochia يقول...

بس والله رغي كويس
اصل ساعات الرغي بيفقع
هو ده بيفقع برده
بس مش منك الحمد لله

المهم انا معاكي
اصبري شوية لحد ما يبقي كمبيوتر جديد من بابه
احسن برده ولا ايه ؟؟

تحياتي

صبرني يارب يقول...

كوشيا

نورتي حبيبتى اولا

والله انتى الى حظك جه فى الرغي البحت ادينا مستنيي الفرج ونكتب موضوع جديد ولا حتى نكمل القديم الى حصل عليه سطو

حسن حنفى يقول...

ههههههههههههههههه
موضوع ظريف
والف مليون مبروك علي المحل

محمد يقول...

بجد من أول ما قرأت ما قلتية ومن غير مأقرأ التعليقات عرفت أنك كنتى نوية تدبيسى زوجك المحترم فى كمبيوتر جديد, مهو دة الاسلوب الرسمى لخواتنا البنات والستات فى التعامل , تصرفات ظاهرها الجدعنة والتضحية لكن النتيجة فى الاخر بتكون فى صالحها بدون نقاش.
عموما أنا واثق أنك هتحققى هدفك بس الحكاية محتاجة شوية صبر.
أنا كل الى يهمنى الان زمارة ودراع الاستاذ رضا معلش تعالى على نفسك وسيبهم فى حالهم برضة الاستاذ رضا
راجل طيب وصبور , مش كفاية أنة متجوز
وصابر على صبرنى يارب
بهزر مع جناب معاليكى يا هانم لأن كل واحد لازم يخاف على زمرتة ودراعة خصوصا اللحمة سعرها طالع فوق
هههههههه
أخوكى الى معندوش الازمارة ومخبيها
محمد
http://kalamfekalamm-mohamed.blogspot.com/

http://kalamfekalamm.blogspot.com

أدى عنوان المدونتين بتوعى ياريت تبقى تيجى ومعاكى حتة لحمة

صبرني يارب يقول...

حسن حنفي

نورت المدونه يا اخونا الفاضل

وشكرا لله والله يبارك فيك

صبرني يارب يقول...

محمد

شوف والله العظيم انا الكمبيوتر بتاعي عايزه اغيره من كام سنه وهو الى عايز يغيره قبلي عشان هو كان بيشتغل عليه برضه

مش خطه والله وانا عارفه انه ممكن فعلا يسبني كده سنه
للاسفه كانت جدعه بحته

يااااااااااااريت كانت تبقى خطه
لكن انا بقى لما لقيته قلبني وسبلي حكام
قلت لاااااااا كلا والف فلا
انا هاجيب جديد اشمعن انا
يعنى هو الواد محمد المحاسب بتاعنا ابن اخت رضا احسن مني ولا ايه

وزمارة رقابتك اكيد هاتوصلها برضه صاحبتها يعنى ما تقلقش ههههههههههههههه

وعنيه هاروح المدونات بس الاقي وقت وكمبيوتر

نورت

Anonymous يقول...

لو ممكن عنوان المحل لاجل ما نشوف الموضوع يستاهل التضحيات دي كلها ولا ايه هههههههههههههههههههه

وممكن نيجي ننفعكم \ الا هو نوع التجارة ايه انا سامع انكم من المنصورة، مبروكة عليكم وعلينا

The Queen يقول...

مبروك عليكم المحل يا مدام رضا

اول مرة ازور مدونتك بس انا بحب بشكل عام مدونات المتزوجات بيكون دمها خفيف وكمان بناخد خبره

ربنا يحفظك

تحياتي لك

صبرني يارب يقول...

كوين

نورتي يا جميل

ايوه يا بنتى عشان لازم تاخدي خبره عشان تعرفي الى هايجرالك

صبرني يارب يقول...

الاول اسفه اوي اوي على التأخير على الرد والمشاركات انتم عارفني الظروف بس خلاص عدنا ولله الحمد



الاخ الغير معرف

الله يبارك فيك يا اخي الفاضل

النشاط ادوات كتابيه وهدايا جمله
والمحل فى ا ول شارع الشيخه عيشه من الطمهي

والمحل اسمه الخولي
بريما الخولي تشرفنا يا سيدي الفاضل فى اي وقت بس ابقى اشتري فاتوره محترمه عش عايزين دوشه على الفاضي
ههههههههههههههههههه