الأحد، 14 سبتمبر 2008

مباحث جمارك ؟؟؟!!!!

السلام عليكم


كل سنه وانتم طيبين يارب يكون رمضان خير وهنا عليكم يارب .


انا اخيرا باكتب اليكم من بيتنا والحمد لله واي حد يقر على الكمبيوتر بتاعي ابو رامات جديده انا ممكن اجي اقطعه قطيع .



طبعا انا الكمبيوتر اتصلح من يجى عشر ايام بس ما كنتش فاضيه خااااالص رمضان بقى وعزايم وما الى ذلك كل سنه وانتم طيبين .


بس حيث انى خلصت عزايم تقريبا قلت اجي ارغي شويه الا فى موضوع خانقنى وهاموت منه .

ندخل فى الموضوع على طول قبل ما يطلعي حد يعطلني .

حد يعرف مباحث الجمارك دي يا اخوانا يعني ايه ؟؟؟ وايه اختصاصتها ومكانها وعملها ؟؟؟


الصراحه انا اول مره اسمع عنها من كام يوم كده هاحكيلكم سمعت عنها ازاي .



من كام يوم لقيت رضا جاي من بره فى غير معاده وبيجري على المكتبه وبيطلع اوراق .


انا وانا مخضوضه : فى ايه يا رضا؟؟؟؟


رضا وهو محتاس : مافيش بادور على ورق الاستيراد ما شوفتيهوش


انا : ليه فى ايه ؟؟!!! وعايز اي ورق فيهم يعنى .


رضا : عايز المستخلصات لان العربيه بتاعة المحل اتمسكت وفيها بضاعة الاستيراد .
أنا وانا مزبهله : اتمسكت ؟؟ ايه انت كنت مستورد ايه ؟؟؟ مخدرااااااااااااات اخس عليك وما تجبليش منها ؟
المهم لقينا الورق وخده وطار على هناك واتصل عليا بعد كام ساعه
قالي: خدوا العربيه وقالولي بكره تاخده مع عسكري من عندنا وتروح مينا دمياط تفحض البضاعه والورق !!!


قلتله : نعم ؟؟؟ ليييييييه ؟ انت مش خدتلهم الورق .


المهم لما رجع حكالي التفاصيل كالآتي :


العربيه ماشيه فى أمان الله وقفوا العربيه وانت شايل ايه ياعم .


انتم مين ؟؟؟ احنا مباحث الجمارك !!!!! طب عايزين ايه يعنى ؟؟؟؟


انزل افتح صندوق العربيه وورينا انت معاك بضاعه مستورده ولا لا .


قاله : كل الى معايا مستورد اصلا ( وهو يعنى فى صناعه محليه اصلا هانستهبل؟ )


شاف البضاعه وقاله : فين مستخلصات البضاعه دي ( الورق الى يثبت ان البضاعه دي مدفوع عليها جمارك مش متهربه )


لما رضا راح بالورق قالولوا: طيب ماشي تمام بس احنا بقى جهة ضبط فقط ومش جهة فحص. من الاخر لازم العربيه دي تبات عندنا هنا وبكره تيجى تاخد العربيه وتروح بها ميناء دمياط عشان يفحصوا البضاعه ويقولوا اذا كان اتسددت جماركها ولا لا وتاخد معاك الاوراق الى تثبت انك دفعت الجمارك بتاعتها .
وتاني يوم وسط سخط حقيقى مننا على الاوضاع راح رضا ميناء دمياط قعد حوالي ساعتين عشان يخلص بس اجراءات دخول المينا
ودخل المينا بالعربيه وجه واحد فحص البضاعه حته حته .
وبالنسبه للبضاعه الى من استيرادنا احنا كان رضا معاه الورق ودي خلاص مافيهاش مشكله كان رضا معاه المستخلص الجمركي الخاص بها .
المشكله بقى فى البضاعه والى كانت حاجات هايفه جدا مستورده بس مش من استيرادنا احنا . حضراتهم بقى قالوله ما دام مش معاك المستخلص بتاعها فانت بقى تدفع غرامة تهرب ضريبى 25% من تمنها .
طب يا عم انا مالي مش انا الى مستوردها مالي انا متهربه ولا متنيله ما هو مكتوب عليها اسم المستورد اهو روح ارجع عليه .
وبعدين ما هو ما دام دخلت يبقى ادفع عليها جمارك .
المهم رضا دفع الغرامه ورجع بس طبعا انا متغااااااااااظه وكان نفسي بصراحه ارفع قضيه عليهم هما مين مش عارفه .
الباشا فى المينا قاله القوانين كده يا فندم نعمل ايه يعنى .
عارفين دفع كام ؟؟؟ عشرين جنيه .... كل البهدله دي عشان ياخدوا عشرين جنيه.
السؤااااااااال بقى :
يعنى ايه بقى بالصلاة على النبي الكلام ده ؟؟؟؟
ان كل مستورد بقى كل ما يبيع كرتونه يبقى يصور المستخلص الجمركي كده ويلزقه على الكرتونه ؟؟؟
وكمان تاجر الجمله كل ما يبيع علبه من الى جوه الكرتونه يدي للمشتري صوره من المستخلص
يا كده يا اما البضاعه تتمسك ويقولك تم ضبط بضاع متهربه ويحصلوا ربع تمن البضاعه ؟؟؟
يعنى ان شاء الله الجمارك على البضاعه هاتتحصل كام مره ؟؟؟؟ ده غير السفر والبهدله والعطله .
ولو كان رضا مش هو المستورد وشاري بضاعه ومعاه الفاتوره زي ما حصل فى جزء من البضاعه الموجوده ليه ما يقبلوش الفاتوره كاصل للبضاعه يرجعوا عليه هما لو حبوا .
يعنى ايه اي حد يشيل بضاعه مستورده شاريها من اي حد كان يدفع هو ربع تمن البضاعه ؟؟؟؟ استهبال على الاخر .
وبعدين يعنى هايبقوا يعملوا كده مثلا فى الصعيد لما يضبط بضاعه مستورده من غير ورق يقوله سافر يا حلو على اسكندريه مثلا ؟؟؟
وكمان هو يعنى البضاعه المتهربه دي مين الى هربها ؟؟؟؟ مش هما نفسهم مسؤلي الجمارك سواء بقلة ضميرهم ولا باهمالهم ؟؟؟
ويعنى ايه احنا جهة ضبط مش فحص ؟؟؟ ولما انت مش جهة فحص بتضبط ايه ؟؟؟
يعنى لما انت مش عارف اصلا تفحص البضاعه يعنى ما تعرفش تحدد هي تهرب ولا مش تهرب يبقى انت بتضبطها ليه ؟؟؟؟
وبعدين جمارك ايه ؟؟؟ احنا هانستهبل ؟؟؟ الجمارك دي المفروض انها معموله ليه ؟؟؟
لحمااااااية المنتج المحلي
صح ولا لا يا رجاله ؟؟؟ ويا ستات برضه اجدع ناس
طيب هو فييييييييييييييين المنتج المحلي ؟؟؟
هو عاد عندنا انتاج اصلاااااااااااااااا
بتهيئلي هى بقت اتاوه مش حمايه
وبتهيئلي كمان احنا فاضل يوزنوا الواحد كده على ا لميزان الى يزيد مثلا عن 70 كيلوا يدفعوه لكل كيلوا غرامه عشان كده يبقى هو بياكل اكتر من الناس بقى ؟؟؟؟!!!!!
انا بقى عايزه ارفع عليهم قضيه . اه هما مين مش عارفه لو حد يعرف مين ممكن ارفع عليه قضيه فى هذا الشأن يقولي وانا مستعده ارفع قضيه على اتخن تخين فيكى يا بلد .
طبعا دي مش اول استهبال وقلة ادب تقابلنا لا طبعا بس دي بالذات غاظتني جداااااااااا لانه استهبال علني وابتزاز للناس وانا زهقت من الوضع المقرف ده .
وكفايه كده عشان واضح انكم اتخنقتم
ياريت تنوروني فى الرؤيه الاسلاميه وتشوفوا الموضوع الجديد الصيـــــام

هناك 18 تعليقًا:

محمد يقول...

أحمدى ربنا أنهم مخدوش ضربيه ولا غرامه

على رضا نفسه


سؤالى هو رضا معاه


أفراج جمركى


حمدلله على سلامته

صبرني يارب يقول...

اخ محمد نورت والله

ايوه طبعا معاه افراج جمركي

والسؤال بقى افرض رضا ما كانش هو المستورد وكان شاري بضاعه مستورده من اي حد ومعاه الفاتوره بس

هما بقى قالوا لا الفاتوره مش كافيه لازم يكون معاك الافراج الجمركي .

يعنى لو واحد شاري بضاعه مستورده يطلب من الى اشترى منه الافراج الجمركي ؟؟؟
دى بتبقى اوراق خاصه صاحب البضاعه مش ممكن يطلعها اصلا .
نورت يا محمد والله يسلمك

محمد يقول...

لا ياست الكل
أنا لاأقصد أفراج جمركى على البضاعه
أنا أقصد أفراج جمركى على الانسان
مش الحكومه بتطلب من الانسان شهاده بأنه عايش وعلى قيد الحياه
تانى شىء
هى الجمارك دى من غير سور ولا موظفين
أمال البضائع بتتهرب أزاى
الاحتمالات
1- صواريخ عابره للقارات
2بأنزال مباشر عبر الطائرات
3- بطاقية الاخفاء
4- بكلمة السر أفتح يا سمسم

مع تحياتى للبضائع العشوائيه
والمساكن العشوائيه والناس العشوائية

صبرني يارب يقول...

اه والله يا استاذ محمد مش قلتلكم قريب هيوزونونا وياخدوا فلوس على الوزن .

اه واضف تحياتي كمان للحكومه العشوائيه والعقول العشوائيه

maha zein يقول...

بس غريبة دي
اذاي ربع ثمن البضاعه ويبقه عشرين جنيه
انتوا كنتوا مستوردين ايه بالظبط
بضاعه ببتاع 80 او 100 جنية ولا ايه
طيب ما لو كده كان سابلهم البضاعة وخلاص واستلم العربية
اله
اله
اله
لا تمام والله
المهم جابلك مشبك من دمياط
ولا طنش
وعمل نفسه مضايق عشان الغرامة
احب اقولك اتاكدي
لان شكل لا في غرامة ولا بتاع
دي محاولة للهروب من المشبك الدمياطي
صضقيني
شكرا ليكي بجد علي مرورك عندي
وهارد لاك يا رضا بقه
بس مش كنت تقول انك عاوز تستورد مخدرات وانا كنت عملت الواجب
اخصي

صبرني يارب يقول...

مها
لا يا جميل انتى الى مش واخده بالك

العشرين جنيه دول كانوا على البضاعه الى احنا شارينها من واحد مستورد
يعنى كانت حاجه كده مركونه فى العربيه رايحه لزبون تاني عباره عن عشر اكياس بالونات وخمس علب قلم جاف اندونيسي

اما باقي العربيه يا ستى كانت محمله بضاعتنا وربنا ستر
وكان معانا الافراج الجمركي بتاعها

وبعدين يا اختي مشبك ايه بس انا الى قربت احط مشابك فى شعري
واه يا نفوخي
نورتي يا قمر والله

حسن حنفى يقول...

فعلا والله البلد خلاص الواحد زهق

اي حاجه بيغلسوا فيها

حتي المواطن اللي مش لاقي ياكل بيغلسوا عليه في اكله

استغفر الله

(احمد سكر ) يقول...

ههههههه

طب احمدو ربنا بئه

انهم مجمركوش العربيه كمان

زمان لكا كنت شغال ف السكر

شفت عجب العجاب من مباحث التموين

سايبين المصدر

وجااين على اخر ايد بتوزع

طيب ياعم الحاج عندك المصدر لو انت مش عاوز بضاعته تتسوق


لنا الله

زهقونى وخلونى بطلت تجاره خالص

تحياتى

احمد سكر

canary يقول...

امال ايييييييه
هو انتى كنتى فاكرة البلد سايبه؟
طبعا كل حاجه تدخل وتخرج متراقبه وعين الامن سهرانه وكل شئ تحت السيطرة

تعرفى . احمدى ربنا اوى انها جات على قد كدة والله فعلا دة انتو اتخدمتو وخلصتو بسرعه . فيه بضايع بتقعد للفحص والافراج الجمركة فترات مهوله بتتسبب فى فسادها اصلا
وبعدين هو الاستاذ كان بدل البهدله دى ادى اللى وقفه خمسين جنيه وكان رحم نفسه من كل البهدله دى على غرامه عشرين بس
يعنى كان اشترى كرامته بفلوسه
ولا عزاء للشرف فى شهر رمضان

ahmed_k يقول...

ههههههههههه
هو كده بس اللي مضايقك
يا ستي ما تزعليش
إبتسمي أنتي في مصر
أنا بصراحه شايف ان الناس
مغلطوش كل ما هنالك أن الدنيا رمضان
والناس صايمه
ولازمن ولامبد يسلوا صيامهم
حظكم بقه جه في وشهم
يبقى الغلط عند مييييييييين ؟؟؟

مش كدا ولا أيييييييييه

صبرني يارب يقول...

حسن حنفي
نورت

اها بس انا قررت اغلس انا على الحكومه

صبرني يارب يقول...

احمد سكر

عادي والله العظيم يا ابنى لحد الان بنفكر نقفل على الليله ونحط الفلوس فى البنك ونأنتخ على الفوايد

وان كان ولا بد من الشغل عادي رضا محاسب وعنده خبره طويله يقدر يشتغل فى احسن شركه فيكى يا بلد

لكن اولا مستحرمين ركنة الفلوس والعيشه على الفوايد واحنا بصحتنا والحمد لله ما لناش حجه
وثانيا الناس الى بيشتغلوا وفاتحين بيوت من ورانا
لنا الله فى هذا البلد

صبرني يارب يقول...

كناري

يا بنت الحلال انتى بتحكيلى على ايه احنا اصلا البضاعه دي الى احنا مستوردنها منها اتركن فى الجمرك بدون سبب عقلاني ابدا لمدة 8 شهور

بعد البهدله اكتشفنا اننا تقريبا صرفنا اد ثمنها عليها عشان تطلع رسمي

وخلي بالك من كلمة رسمي دي
عشان هي دي سبب ان رضا ما دفعش حاجه للجنه ومشي اموره وقال اياكش تولع

شوفي يا بنتى فى بداية حياتي العمليه فى البلد دي انا وجوزي اتفقنا اننا ما ننخرطش فى الفساد ابدااااا ولا نساعد عليه ولا نكون طرف فيه ابدا

ما دام نقدر
يعنى ما نستسهلش الرشوه ونسيب كل فاسد يستغلنا

لاخر نفس ان شاء الله
لحد ما نغلب او نتعب او نغير راينا
مش بندفع رشاوي لحد استرياح
لكن طبعا احيانا لما بنلاقي المصلحه هاتقف خالص خالص ولا سيما فى المرور مثلا
اهو فى اضيق الحدود كده بنتصرف

ارفض ان انخرط فى الفساد او اكون طرفا فيه والحمد لله
وده مش كلام والله ولا شعارات واتمنى من الله اننا نقدر نكمل على كده

صبرني يارب يقول...

استاذنا الغالي احمد
نورت
الغلط على البضاعه باين يا استاذنا

لا انت عارف هما بيفكروني بمين ؟؟؟
عارف العصور بتاعة الاستبداد والظلم الى بيجبوها فى الافلام دي

لما يقولولك الحاكم مزنوق فى كام الف دينار عشان عايز يصيف قوم ايه الوزير يقوله ولا يهمك يا مولانا
احنا نفرض ضرايب جديده على الشعب ؟؟؟

اهو كده برضه باحس انهم كل ما يتزنقوا يألفوا تأليفه كده يلموا بها فلوس
بس نفسي جايباني ارفع عليهم قضيه مش عارفه ليه

الطائر الحزين يقول...

ناس فى ساكتة وناس فى هرية وناكته
فساد حولك فى كل شىء

صبرني يارب يقول...

الطائر الحزين نورت

بس حلو المثل ده اوي اوي عجبنى هاكتبه عندي يمكن ينفعني

ناس فى ساكته وناس فى هريه وناكته

لان انا دايما فى هريه وناكته دي يا عمنا والله

نورت

جنّي يقول...

السلام عليكم

اخيرا المدونة فتحت من غير مشاكل والحمد لله .. والشكل الجديد جميل ..

مش عارف العيب على مين على حكومتنا الذكية ولا علينا احنا اللي مش عرافين نفهم حكومتنا ..

كل سنة وانتي والأسرة الكريمة بخير وصحة وعافية وعفو من الله وغفران

رمضان كريم

صبرني يارب يقول...

جني

تسلم يارب وتعيش وكل سنه وانت بخير يارب وربنا يكرمك

والعيب اولا واخيرا فينا احنا

عشان احنا الى موافقين وساااااااااكتين
نورت يااستاذنا