الأربعاء، 10 ديسمبر، 2008

تاج العيد

جالي تاج يا جماعه من الجميله اوي سالي حاجات جوايا
وكمان جالي من خالد همس الاحباب

وهو تاج جميل ومناسب للعيد وجو العيد

واليكم التاج


ماذا يمثل لك العيد ؟


يمثل عيد يعنى
مش عارفه يعنى ايه يمثل ليا العيد هههههههههههه


وما أكثر شئ يبهجك في مظاهر العيد ؟


تكبيرات العيد


اوصف لنا طقوسك في العيد .. من ليلة العيد لآخر يوم ؟


طب ده هاقوله فى الوقت الحاضر

طبعا فى ليلة العيد زيها زي الكام يوم الى قبل العيد بانضف فى الشقه واجهز فى هدوم العيال الجديده والى ناقصه بنطلون والى ناقصه شوز والى ناقصها توكه والافلام دي

ومهما بدأت بدري لازم تفضل التجهيزات لاخر لحظه

وفي السهره بقى بابدأ طبيخ عشان العيد


اول يوم العيد : باصحى اصلي الفجر واكمل الطبيخ ورضا بينزل يصلي العيد على مايرجع اكون جهزت الفطار

وعندنا بنفطر فطار متين اول يوم العيد ده فى العيدين


وبعدين باحاول جاهده اخطف نوم ساعه ان امكن

وفى العيد الكبير في الغالب بندبح اول يوم ورضا بينزل بقى بعد الصلاه على طول

ولما بيرجع انا باحتاس حوسه عجب باقي اليوم فى اللحمه وما الى ذلك

في العيد الصغير بننزل نعيد على الناس على الظهر كده
وباقي العيد بقى فى تبادل زيارات غالبا


احكي لنا أطرف موقف حصلك في العيد ؟

تصوروا مش  لاقيه حاجه تعد طريفه فعلا ؟؟؟
بس من حيث المفارقات العجيبه انى كنت وانا فى ابو ظبي باشتكى من الملل والعيد الهادي وانى مش لاقيه حد اعيد عليه ولا يعيد عليا

اما لما رجعت مصر وانا باقول يا عااااااالم يا هوووووووو شوية هدوء
يا جدعان شوفوا مكان نتقابل فيه كلنا بدل دوخينى يا لمونه ولفنا حوالين بعض طول العيد خلينا نعرف نخرج ولا نسافر ولا اي حاجه

مفاااااارقات الحياه


بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
ايوه طبعا فردا فردا وبيت بيت حتى لو ما كنتش بالعهام يعنى


مين أول حد تزوره أو تكلمه في التليفون /الموبايل عشان تهنيه بالعيد ؟
اول واحد بازوره  بخلاف ماما وبابا الى معايا فى نفس البيت
بازور عمي الكبير

والرسايل باجيب اللسته بتاعة التليفون من اولها لاخرها وابعد لكل حد اعرفه


إيه الفرق بين العيد الحالي .. وعيد (أيام الطفولة )؟
يااااااااااااااااه الفرق شاااااااااااسع

العيد ده اصله بتاع العيال يا ناس
بس هو ما بيختلفش كتير من حيث البرنامج لاننا برضه فى العيد عند بابا فى البيت بيقتصر على تبادل الزيارات العائليه


كلمنا عن ذكرياتك في العيد تفتكر الحياة من غير عيد .. هتفرق كتير ؟؟؟

ما بلاااااااااااش

يعنى ما بين الحلو والوحش  فى العيد بتمشي هى كان بيبقى عيد وبتعدي وخلاص
وطبعا تفرق كتير


إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟

تهنئة حاره مولعه بأعياد جميله مشخلعه وبمب وفرقعه لناس حلوه مطرقعه

من هبه صحبتي



احم احم .. لسه بتاخد عيدية ؟؟ من مين ؟؟ وبتديها لمين ؟
اه طبعاااااااا لسه باخد عديه
من جوزي
ومن بابا
وباديها لمين ايه ؟؟؟ وادي ليه انا باخدها ليا طبعا
هههههههههههههههههههههه


إيه رأيك في التاج ؟

جميل اوي ومن ناس  جميله اوي اوي وفى مناسبته ومكانه بالظبط


تحب تمرره لمين من المدونين ؟ اذكر على الأقل 10
يا لهوي عشره ؟؟؟

طيب جزاءا لكى يا سالي
انتى اول واحده اهااااااااا امال يعنى  احنا بس الى نقع فيها

حاجات جوايا

واحده مفروسه

داليا قوس قزح

حنين القلب

احمد k

احمد سكر

عمر حبشتكنات فلسفيه

اليس  اه منك يا دنيا

مولان

شوية كلام

موني زوجه شابه

زوجه مخنوقه

وبالشفا للجميع 

وطبعااااااا اي حد عايز التاج يتفضله

وكل سنه وانتم طيبين

هناك 44 تعليقًا:

Anonymous يقول...

كل سنه وانتى طيبه وحياتك كلها اعياد ان شاء اللة

محمود

عمرو يقول...

ماشى يا أم خالد
شكرا على التاج و تمريره ليا و كل سنه و أنتى و الأستاذ رضا و الآولاد بألف صحه و خير

AHMED SAMIR يقول...

كل عيد وانتي بصحة وسعادة
تحياتي

قوس قزح يقول...

ميرسى على التاج يا جميلة
بس خالد همس الاحباب قام بالواجب قبلك و لبسنى التاج ده

كل تاج و انتى طيبة

صبرني يارب يقول...

عمرو

اي خدمه وانت طيب وبخير يارب

صبرني يارب يقول...

محمود

يا اهلا بك وكل سنه وانت طيب وبخير يارب

صبرني يارب يقول...

سمير

وانت طيب وبخير يارب ومنورنا دايما

صبرني يارب يقول...

دولي حياتي نورتي

اها خالد انا روحت اهديه التاج لقيته عنده ومصدرهولي كمان

كيــــــــــــارا يقول...

بندبح اول يوم ورضا

**********

هههههههههههههه قرتها بندبح كل يوم رضا مااخدتش بالي من الواو خالص هههههههههه

قلت صبصب اشتغلت المراه والساطور بقي

كل سنه وانتي طيبه ياقمر انتي ورضا والقطاقيط

وحاضر هحل التاج

حسن حنفى يقول...

كل سنه وحضرتكط طيبه

واجابات متميزه علي التاج

دمتي بخير

mahasen saber يقول...

عيد سعيد يا جميله

وتاج اسعد طالما من سالى

وطالما بتبعتى للكل ماسيجات ابقى ضيفينى عندك فى لستة التليفون يمكن تخبطينى ماسيج ولا حاجه

كل عيد وانتى بكل خير وامن وسلام انتى وزوجك واولادك وكل من تحبين

حواء يقول...

السلام عليكم
ضحكتيني ياصبرني
كل سنه وانتي طيبه وعقبال سنين كتيرررررررررررررر اوي
سلمي علي رحمه ومريم وخالد

بنت الغربة يقول...

شكرا ياحبيبتى على التاج -وانا هارد عليه بكره ان شاء الله علشان العيد عندى السنة دى غير كل الاعياد - ولسه مافقتش منه -روحى عندى وانت تعرفى ليه ؟ وكل سنه وانت طيبه ياقمر - وشكرا انك افتكرتينى فى التاج ياحبيبتى - تحياتى ليك- داليا

حاول تفتكرنى يقول...

كل عيد وانت بخير

تحياتي

جنّي يقول...

اجابات جميلة بس تعرفي كاننا غشينا من بعض ولو عايزة تتاكدي اقرأي اجاباتي عند سالي في حاجات جوايا ..

اخبار الفتة ايه ؟؟

سلام

فشكووول يقول...

سيدتى صبرنى يا رب .. انت العيد عندك زحمه قوى .. ربنا يكون فى عونك .. كل سنه وحضرتك بالف خير ويعيده الله عليك وعلى رضا بالخير والبركات وتكونوا على جبل عرفات العام القادم ان شاء الله

حنين القلب يقول...

كل سنه وانتى بالف خير يا حبيبتى

وعقبال ما تشوفى مريم ورحمه اجمل عروستين

بس ليه التدبيسه دى ؟؟
مش بعرف اجاوب على التاجات دى
بس علشان هو جاى ليه من اغلى اتنين عندى هجاوبه غصب عن عينى

ماااااااااااشى والنبى لدبسك بس الصبر
وحشتينى جداااااااااااوالله
ونفسى موت اقعد ارغى معاكى
بس يلا لما تخلصى اكل لحمه مع انى اشك انك تخلصى قبل العيد الجاى
ههههههههههههههههههههه
مووووووووووووووووووه دى لرحمه حبيبتى

همس الاحباب يقول...

كل سنة وحضرتك طيبة وعيد سعيد عليكى
وعلى اسرتك
ومبروك عليكى التاج
بس الواضح انه مقاسه ضيق شوية
علشان كده مش عارفة ترغى كويس
ولا ده تاثير لحمة العيد
ههههههههه
تحياتى

صبرني يارب يقول...

حسن حنفي

تعيش يارب ونورت

صبرني يارب يقول...

مولان

كده يا كوكي لو رضا شافك هايجى يعلقك ولو ما عرفش يجى هايعلقنى انا
هههههههههههههههههه

نورتي يا قمر

صبرني يارب يقول...

محاسن

يا خبر ابيض ده انا اتشرف بيكى والله ولعلمك انا فله يعنى بابعت رسايل فى المناسبات للجميع يعنى اي خدمه هههههههههههههه

نورتي يا قمر

صبرني يارب يقول...

زوجه

كل سنه وانتي طيبه وبخير يارب
ووحشاني

صبرني يارب يقول...

حاول تفتكرني

الله يكرمك وكل سنه وانت طيب ونورتنا ويارب دايما

صبرني يارب يقول...

بنت الغربه

حبيبتى براحتك تعيشي يارب

وانا قريت نص الموضوع بتاعك امبارح لحد البوسه بس هههههههههههه وجالي ضيوف ان شاء الله اروح اكمل دلوقتي
كل سنه وانتى طيبه

صبرني يارب يقول...

جني

معقوله مع ان انت طفولتك حافله يااستاذنا اكيد هاروح اشوف ان شاء الله


والفته مش باكلها والله عملت مكرونه با لبشاميل تمشي برضه ههههههههههههه

كل سنه وانت طيب ونورتنا

صبرني يارب يقول...

فشكول

والله يااستاذنا زحمه اكتر مما تتخيل

تخيلوا حوالي 15 بيت مطلوب مني ازورهم وكمان اغلبهم يرد ليا الزياره خلال ايام تخيلوا الموقف يبقى ازاي


يلا كل سنه وانتم طيبين وبخير نورتنا ياا ستاذنا

صبرني يارب يقول...

حنين

وحياتك يا اختي لسه ما دوقت اللحمه بتاعة العيد مش فاضيه

وانتى كمان وربنا وحشاني ولقيتك سايبه اوف لاين بس انا اساسا مش باقعد عشان اعرف ارنلك

يلا ها نت من بكره تلاقوني راشقه هنا تاني

صبرني يارب يقول...

همس الاحباب

ماااااااشي كده هانصيح لبعض ماشي ياعم مسيرك تقع تحت ايدى

بس الحقيقه انا فعلا لما بصيت في البوست دلوقتي حسيت ان كنت رخمه اوي وانا باكتب
معلش بقى كان مزاجي وحش حبتين ثلاثه
وبالتالي مش هاعرف ارغي بقى

كل سنه وانت طيب

كيــــــــــــارا يقول...

هههههههههههههههههههه

معلش بقي ياقمر العيب في النضاره

صبرني يارب يقول...

مولان انا باهزر معاكي عادي ما حدش يقدر يعلقنا انتى عارفه

المدونه دي حريمى ومنحازه كمان والى مش عاجبه بقى هو حر هههههههههههههههههههه

احنا هنا ندبح نقطع على كيف كيفنا ههههههههههههههههه

كيــــــــــــارا يقول...

ههههههههههههههههههه

اييوه كدااا

وحشاني وهتوحشيني اوي في الفتره اللي هغيبها

Anonymous يقول...

كل سنه وحضرتك بخير
اتمنى تكونى قضيتى عيد سعيد


تحياتى

Anonymous يقول...

كل سنه وحضرتك بخير
اتمنى تكونى قضيتى عيد سعيد


تحياتى

صبرني يارب يقول...

غير معرف

تعيش يارب الله يكرمك اتمني يكون عيد سعيد على المسلمين كلهم

يعنى مش سعيد اوي بس يعنى اهو عدى والحمد لله الذي عفانا مما ابتلى به غيرنا

تحياتي ونورت

mostafa rayan يقول...

الأجابات جميلة
كل سنة وانتي طيبة يا صبرني
وينعاد عليكي بالخير

kochia يقول...

تاجك ثري وجميل
ربنا يديم الاعياد

تحياتي

صبرني يارب يقول...

كوشيا

ازيك يا جميل وكل سنه وانتى طيبه وبخير

صبرني يارب يقول...

مصطفى ريان

تعيش يارب كل سنه وانت طيب وبخير يارب

حاجــ عيال ــات يقول...

السلام عليكم
أم خالد كل سنة وانت بخير وجميع الاهل والاقارب بخير
واجاباتك في التاج زي الثكر
ويارب عقبال التاج في السنة اللي جاية ويكون بعد حجة يارب

جهاد مشالي

Ahmed Al-Sabbagh يقول...

فى البوست ممتع ومفيد ربنا يكرمك
وجزاكى الله كل خير ومتعك بالصحة والسعادة
وكل سنة وحضرتك بألف خير

أحمد

صبرني يارب يقول...

صباغ

يا اهلا بك يا صباغ ونورت ربنا يكرمك

صبرني يارب يقول...

حاجات عيال

ربنا يكرمك يارب وانت بخير وسعاده

ويارب يارب نكون جماعه فى الحج ان شاء الله

طهقان يقول...

سؤال على الطاير

انت كنت ساكنة فين في ابو ظبي ؟

نهر الحب يقول...

كل سنة وانتى طيبة
لو انها متاخرة شوية