الاثنين، 29 ديسمبر 2008

الوقفة التضامنيه بالدعاء لغزه فجر الجمعه 2/1/2009

تحديييث
فاضل شويه صغيرين على الفجر يا جماعه
وانا قاعده اهو مستنياااااكم ومعاكم لحد ادان الفجر
تحديييييييييث : وهنـــــــــا الجروب على الفيس بوك لنفس الغرض
تحدييييث تاني: نمى الى علمى ان فى دعوه بالفعل من ناس تانيه مش عارفه مين لنفس الكلام وتكون فى فجر يوم الجمعه الجايه عشان كده انا غيرت المعاد عشان نكون اكتر عدد ممكن اوووووووووك يا جماعه ؟؟
يا جماعة ان شاء الله انا حددت معاد الوقفه التضامنيه بالدعاء لاهل غزه
يكون ان شاء الله يوم الجمعه فى صلاة الفجر
ومن فضلكم ندعي من قلوبنا
ومن فضلكم نحاول الالتزام بالوقت
نفسي احس اننا وقفنا كلنا على قلب رجل واحد عشان حاجه مهمه
لنصرة دينا ولنصرة اهلنا المكلومين
وزي ما ساعة ماتشات الكوره بتبقوا كلكم فى وقت واحد بتقولوا يارب
ياريت نسمعها مره عشان حاجه مهمه فعلا
وده دعاء انا كتبته وطبعا الى عايز يقول حاجه تانيه يقول والى عايز يقول ده ويزود عليه حاجه يقوووول
وطبعا ما تنسوش تدعولي كلكم فرصه بقى
هانصلي كلنا ان شاء الله
وبعدها ندعوا الدعاء ده
والى ما تعرفش تصلي تدعي مش مشكله
والى عايش بره مصر ياريت يحاول يدعي معانا فى نفس الوقت احنا الفجر عندنا الساعه الخامسه والثلث بتوقيت القاهره (عشان كده انا كنت محدد ساعه فى الاول مش أذان بس مين يفهم )
طبعا الى ما يقدرش يعمل كده يدعي بعد الفجر بتاعه وامرنا لله
يا ودود، ياذا العرش المجيد، يا فعالاً لما تريد أسألك بعزك الذي لا يرام، والملك الذي لا يضام، وبنورك الذي ملأ أركان عرشك أن تكفي المسلمين شر أعدائهم ، يا مغيث أغثنا، (ثلاث مرات)
اللهم إنا عبيدك وابناء عبيدك ، ناصيتنا بيدك، ماضين في حكمك، عدل في قضاؤك، نسألك بكل اسم هو لك، سميت به نفسك، أو أنزلته في كتابك، أو علمته أحداً من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدورنا، وجلاء حزننا، وذهاب همنا
اللهم اللهم عليك باعداء الدين. اللهم يا قادر يا قاهر يا قوي يا عزيز ،
اللهم عبادك المستضعفين في غزة تجبر عليهم اعداء الدين الملاعين والمنافقين الحاقدين اللهم فانصرهم على أعدائهم وفرج كربتهم وارحمهم ،
اللهم من يجيرهم سواك ومن يرأف بهم إلاك اللهم بك نثق وبقوتك نؤمن
اللهم زلزل الارض تحت اقدام اعدائنا اللهم شتت شملهم واجعل تدبيرهم تدميرهم
يا الله يا الله يا ذا القوة والملكوت ليس لنا رب سواك
يارب ارفع عن المسلمين اجمع الضر
يارب ولي علينا الصالحين
اللهم انصر المسلمين فى كل مكان
اللهم ثبتهم واضعف اعدائهم
اللهم نسألك الرحمه نسألك الرحمه نسألك الرحمه
لا إله إلا أنت سبحانك إني كنت من الظالمين،
لا إله إلا الله العظيم الحليم، لا إله إلا الله رب السموات والأرض ورب العرش العظيم
واللهم صلي وسلم وبارك على سيدنا محمد وعلى اليه وصحبه وسلم
طبعا يا حلوين الدعاء طويل شويه معلش انا استغرقت بس مش هاقصره طبعا مش هاتلحقوا تحفظوه ياريت تطبعوه او حتى تقروه ساعتها من الشاشه
والي يعرف يحفظ منكم يدعوا الى الله وهو ساجد
واوعوا تنسوا تدعوووووولي باي حاجه كويسه يعنى الى يطلع من ذمتكم حلو

هناك 70 تعليقًا:

ahmed_k يقول...

آمين يا الله
ربنا يبارك فيكي يا أم مريم
ويجازيكي خير على الحملة المباركه اللي بتقومي بيها لطلب الدعاء لأهل غزه

وأدعو أن يتقبل الله منكي ومن كل المسلمين صالح دعائهم لأهلنا المجاهدين هناك

romansy يقول...

اللهم ااامين

ان شاء الله ربنا يقوينا
ونكون الدعاء مستجاب


وهندعيك كمان

AhMeD RaDy يقول...

مع غزة .. ولو باضعف الايمان

بسم الله الرحمن الرحيم

شارك

بدعاء واحد

فى

صلاة الفجر ليوم الاربعاء القادم

31-12-2008

وصيام الخميس تطوعا

1-1-2009

حنين القلب يقول...

ان شاء الله
كلنا نكون بندعى من قلوبنا
وباذن الله ربنا هيتقبل مننا

وحسبنا الله ونعم الوكيل

ساره يقول...

عزيزتي
الله يجزاك خير وانا معاكي ان شاء الله يوم الجمعه فى صلاة الفجر والله يستجب لناجميعا

نهر الحب يقول...

امين
ان شاء الله نقدر ندعى
ومنخفيش من الامن
ولا من اليهود ولا من السياسة
اللهم فرج كرب اخواننا فى فلسطين والعراق وكل مكان

Anonymous يقول...

سلام عليكم
اللهم تقبل دعائك ودعائنا لكل مريض وملهوف ومظلوم.. ربنا يبارك فيكى وفى اسرتك ان شاء الله ربنا يتقبل منك ومنا( اللهم انا عبيدك وابناء عبيدك ناصيتنا بيدك ماضين فى حكمك عدل فى قضائك )اشفى كل مريض يارب واستجب لدعوة الملهوف والمظلوم اللهم يا قادر يا قاهر يا قوى يا عزيز .
مدحت

صبرني يارب يقول...

رومانسي

تعيش يارب ما اتحرمش منك

صبرني يارب يقول...

استاذ احمد

الله يكرمك يارب ونورتنا

صبرني يارب يقول...

ساره

الله يكرمك يارب ويجازيكى خير ويتقبل منك

صبرني يارب يقول...

حنين

يا رب يتقبل مننا يارب وتسلمى يا جميل نورتي

صبرني يارب يقول...

احمد راضي

انا روحت عندك المدونه وسبتلك رد ياريت تقراه عشان نوحد المواعيد

شايفه ان فجر الجمعه انسب بكتير

صبرني يارب يقول...

عمو مدحت

يااااااارب يارب يارب

ربنا يتقبل منا يارب نورت يا عمو

صبرني يارب يقول...

نهر الحب

انا مش باخاف من حد يا بنتى هو احنا بنسرق ده احنا بندعي كمان هايقفلوا علينا باب الرحمه ؟

Anonymous يقول...

سلام عليكم
ماشاء الله عليكى روعه والله وياريت كل الناس تستجيب
انا راجع مصر كمان كام ساعه وان شاء الله معاكم وربنا يفك كربهم يارب ويزيح الهم اللى كابس على نفس البلد كلها ومخلى راسنا فى الطين

صبرني يارب يقول...

غير معرف

الله يكرمك يارب هاتنور مصر وتنورنا

عمرو يقول...

بارك الله فيكى يا أم خالد
الدعاء جميل و ربنا يتقبل متتا اللهم آمين يا رب

بنت الغربة يقول...

دعاء حلو قوى ياصبرنى
وانا ان شاء الله هاطبعه
بس دلوقتى الفجر عندى الساعه 5.30 يعنى عندكمالساعه 3.30
كده هاكون لوحدى تقريبا
بس مش مشكله انا هادعى وربنا يتقبل منى ومنكم
تحياتى

hasona يقول...

ربنا يرضي عنا وعنكم وعن المسلمين جميعا
ويتقبل منا ومنكم
ويستجيب لدعاء كل المسملين
ويجمعنا ويوحد صفوفنا ضد كل مغتصب

اللهم فرج كرب كل مكروب
وأعفوا عنا ولا تعاقبنا بما فعل الجاهلون منا
يا مغيث أغثنا - وأرسل الغوث لأهلنا في غزة وفي فلسطين وفي كل مكان تراق دماء مسملة

كل سنة وانت بكل خير
تحياتي

صبرني يارب يقول...

عمرو

ربنا يكرمك ونورت

nody يقول...

ربنا يتقبل منك ومن سائر المسلمين

ويفك كرب المستضعفين فى فلسطين ويخلصهم من شر البلاء والى هما سبب الكارثه

صبرني يارب يقول...

اليس

يا حبيبتى انتى تطولي براحتك

وكمان انا قلت كل الى عايز يدعي حاجه يدعيها

وتدعولي عشان مش اعوركم

وكمان انا فعلا فى الدعاء قايله دعاء عام

المهم تقوووووووولوا بقلب نضيف كده وخشوع لله تعالى وثقه فى قدرته

صبرني يارب يقول...

بنت الغربه

والله يا بنتي انا غلط انى غيرت المعاد

انا كنت عاملاه على ساعه عشان كده
قلت يكون الساعه 3
عشان يبقى الكل فى وقت واحد

بس انا قلت بلاش نبقى نشاز خلينا مع بعض كلنا لما لقيت ناس تانيين عاملين نفس الموضوع


عموما حاولي برضه تكوني صاحيه وتدعي معانا فى نفس الوقت

صبرني يارب يقول...

نودي

امين منا ومن المسلمين اجمع نورتي

صبرني يارب يقول...

حسونه

الله يكرمك يارب وربنا يتقبل منا ومنكم

صبرني يارب يقول...

ليه يا اليس فى ايه
ههههههههههههههههههههههههههه

بجد مش فامهمه تقصدي ايه

sahwa 2009 يقول...

و لا تنسي الدعاء لمصرنا الحبيب
و للمصرين انه يثبتهمو يهديهم
و يقفوا ايد واحدة و لا يعطوا الفرصه
للعب بمشاعرهم
الفلسطنيون لهم الله
ناس بتكره نفسها اصلا لا يمكن تحب غيرها و لا تقدر مساعدتهم
احنا بنساعد
و غيرنا بيهتف لفتح المعبر
اللى بيهتف اوي كده
يستضيف الفلسطنين عنده
بلاش يزجوا بمصر
بلاش يدوروا على ان ينزعوا الامن من مصر
لا لفتح المعبر سوى للمساعدات
ما اتفتح قبل كده و دخلوا يتدلعوا و قالوا داخلين نتفسح
مع انهم كانوا بيصوتوا و بيقولوا حصار
فوقوا

norahaty يقول...

السلام عليكم ورحمة
الله تعالى وبركاته
قولى يارب من قلبك
خالصة مخلصة لوجه الله
فى أى وقت وفى أى مكان
تجدى استجابه الله لكى فورية!ا
اليس سبحانه وتعالى القائل
(وإذا سألك عبادى عنى فأنى قريب)

حسن حنفى يقول...

جزاكم الله كل خير

وان شاء الله كلنا نشارك

صبرني يارب يقول...

sahwa2009

يا بنتى انا باقول ندعي للاسلام والمسلمين اجمع وخصينا بس اهل غزه لانهم فعلا غلابه طلعان عينهم

ربنا ما يكتب الحرب وموت الضنا قدام عنيه

لكن طبعا طبعا انا مش مع فتح المعبر على مصرعيه فى الاتجاهين لان ده اساسا يبقى بتنجان هايكبر المشكله مش هايحلها

وده اصلا الى عايزاه اسرائيل

ما عليهم انهم بس جابو الكبريت وحطوه فى ادين الهبل وهما عملوا الواجب

صبرني يارب يقول...

حسن حنفي

تعيش يارب ونورتنا

صبرني يارب يقول...

نور حياتي

هو حد قال غير كده

انا بس بجد يوم مش فاكره كان ماتش ايه الى حسيت فيه بجمال اتحاد الكلمه

لما كانت مصر كلها واغلب العرب قاعدين قدام الماتش بيقولوا يارب

وقلت امته نجتمع على قلب رجل واحد كده فى كل حاجه مش لازم حكومات

نجتمع بس نقول يارب ونحب لبعض الخير

مش ناكل فى بعض ونهبهب على بعض بمناسبه وبغير مناسبه

ادعي يا جميل فى اي وقت يعجبك

Anonymous يقول...

بس مش عارف ؟
بعد البوست السابق اللي كتبتيه هينفع اللي بتقوليه ؟
إنتي مصدقة نفسك ؟
تحرير غزة واجب عليا و على كل رجل مسلم بما فيهم رضا جوزك و لو ما رحناش نصبح آثمين .. عندما نقول هذا فنحن لا نحرر غزة علشان الغزيين و لا علشان حماس .. علشان ربنا اللي نسيتوه و أصبحتو منتظرين الأجر في الدنيا.

سيف الدين اليزل يقول...

انا مش عارف اذا كنتوا انتم فهمين الموضوع ولا هوا الحماس وبس ده كمين معمول لمصر علشان رجلينا تيجي في حرب اهليه قذره وفي نفس الوقت اسرائيل تزق غزه علي سينا والضفه علي الاردن وتبقي اسرائيل ضربت كرسي فالكلوب وخلصت الليلة فهمتو ولا اقول تاني جيش مصر علشان مصر وتولع غزه علي حماس والكل كليله نيستو اللي عملوه اهل غزه السنه اللي فاتت لما دخلوا سينا واشتروا الحاجات من البدو بفلوس مزيفه ودخلو الارهاب وامخدرات ورفعو العلم الفلسطينى علي المعبر ياناس حماس واخدينفلوس الليله ده والسلام علي من اتبع الهدي

Anonymous يقول...

انتو ماخترتوش حكومة و لا اخترتو رئيس و بتاكلو قمح لا يصلح للبهايم و لحمة حمير و كلاب ..أكيد كل ده أثر عليكم

طائرٌ حر يقول...

بسم الله الرحمن الرحيم.. الأخت العزيزة .. جزاك الله خيرا على إيجابيتك و أتمنى إن كتير يشاركو معاكي( و انا كمان هشارك إن شاء الله) في هذه الحملة .. و لكن لي تعليق أنا مش موافق على البوست السابق خالص و مع كامل إحترامي لرأيك ألا ترين أن أهل غزة الآن محاصرون تماماً من اليهود و من حكومتنا التي نشتكي منها نحن بأنفسنا و يجب ألا نتركهم هكذا لأنهم إخوتنا في الإسلام و في العروبة و جيراننا.. فهل بعد كل هذه الأواصر نتركهم ليواجهوا مصيرهم ثمنقول لا تدخلوا بلدنا لأنكم ستجلبوا الخراب و الدولارات المزيفة ؟ فأين إذا كرم أهل مصر و احتضانهم للغريب و القريب ؟ و كيف تكون مصر الشقيقة الكبرى لكل العرب و المسلمين هي من يفعل ذلك ؟
و شكرا

طائرٌ حر يقول...

أختي العزيزة بعد نشر البوست السابق فوجئت بشخص غير معرف كاتب شتايم و حاجات بأسلوب مش محترم.. و للأسف رغم إن أنا متفق معاه في النقاط اللي كتبها عن قضية فلسطين لكن لا أتفق معه في إستخدام هذه الألفاظ و من كان آمرا بمعروف فليكن أمره بالمعروف.

سيف الدين اليزل يقول...

غير معروف انت لسه هنا مش انا قلت لك روح استشهد عارف فين قادة حماس دلوقتي وفين اولادهم واهلهم في سوريا ياعبيت ومفيش ولا واحد منهم في غزه وبعدين ايه الغلط اللي عملتو صاحبه المدونه علشان تغلط فيها الم تسمع قول الحبيب المصطفي ومن لم يستطيع فبقلبه وهذا اضعف الايمان هيا تقدر تعمل ايه غير الدعاء هي اختك راحت تحارب في غزه عرفت مين اللي جاهل في ملحوظه عاوزك تعرفها اللي بيقول حاجه او بيعلق علي موضوع لازم يكون مؤدب او ميغلتش في الناس والسلام علي من اتبع الهدي

سيف الدين اليزل يقول...

تاني مره بقول انا اسف يا اختي لو كان صدر ميني اي لفظ مش كويس بس انا كنت برد عليه بس انا غلطان كان لازم استاذنك الاول سامحيني والسلام علي من اتبع الهدي

صبرني يارب يقول...

غير معرف

اهل غزه قلنا على عينا وراسنا

ولما هو الحرب واجب انت قاعد هنا بتعمل ايه ؟؟

شوف يا ابنى الحرب والجهاد مش معناه انك تعري صدرك للرصاص لا طبعا

لكن لو عايز تعمل كده روح يا بابا

وتاني مره لما تدخل المدونه دي تحترم صاحبة ا لمدونه والى بيعلقوا عندها

ويستحتسن ما عدتش تورينى سحنتك البهيه

احنا بناكل قمح بهايم ولحم حمير اووووك

وانت قاعد بره هربان من بلدك نفسها مش من غزه بس

مش عايزه غباوه انا هنا

صبرني يارب يقول...

طائر

المعبر مفتوح يا طائر بيدخل الجرحى وبيدخل معونات

مطلوب ايه تاني ؟؟؟

نحارب ؟؟

مافيش معانا فلوس نحارب

احنا مش هانحارب اسرائيل

احنا هانحارب اسرائيل وحليفتها امريكا وحلفاء حليفتها امريكا

هانحارب العالم كله

لازم العرب الي قاعدين يهبهبوا علينا ويقولوا عندكم جيش يتهببوا يمولوا الحرب

احنا ما عندناش فلوس

اتسرقت الفلوس اتنيلت على عينها لكن النهايه والوضع الحالي اننا ما عندناش فلوس

قلوبنا بتتقطع على اهل غزه ماشي الا انى مش مع لا حماس ولا حزب الله ولا الفتح والى كلهم بيضربوا فى بعض وكلهم بيموتوا فى بعض

فا مش عايزه اندفاع فى العواطف على مافيش

لو روحنا نحارب هاننضرب يا ناس من اراضي عربيه القواعد الامريكيه ماليه بلاد الكلاب الى بيهوهو علينا

افهمواااااااااااااا

صبرني يارب يقول...

سيف

انا معاك انا معاك الا فى حاجه واحده ان اهل غزه قابضين تمن الحركه دي

شوف
انا لا اثق فى جميع سياسي العرب كلهم قابضين اصلا

بما فيهم حماس دول

انما الشعب الغلبان زيه زينا

مالوش يد فى حاجه
وهي لعبه فعلا بتلعبها اسرائيل على الكل واحنا هبل وبنعمل الى هى عايزاه

شعب العرب لازم نعترف بجهله وتخلفه للاسف

لما بقينا عرايس ماريونيت فى اديهم

سواء من حكوماتنا ولا من اسرائيل ولا امريكا

وعشان كده انا ضد فتح المعبر على مصرعيه

نفتحه بحساب لاخذ الجرحى مش لدخول الهربانين والمتنيلين

مش ناقصين قرف احنا

وبعدين بتتأسف على ايه انت ما غلطتش فى حاجه

انا الى اسفه ان بقى في ناس هم بتيجى المدونه معلش لو عرفته هاسحله ان شاء الله

my dream يقول...

ما شاء الله عليكي
ربنا يباركلك بجد
بعد كده بقى نيجي للموضوع الجهاد وان المعبر لازم ينفتح على البحري التصريحات والتعليقات العنتريه الي لابتودي ولا بتجيب ولما البطل الي بيعلق ده بطل كده ليه لسه قاعد يعلق مارحش حارب ليه وليه فاضي للتعليق والغلط وليه غير معرف بصي انا كمان مع فتح المعبر بس بحساب يعني جرحى وحالات خاصه يعني الي داخل غزه سواء معونات اطباء واو حتى مجاهدين متطوعين ما فيش مشاكل اما نقلب سينا مخيمات ومندسين و مشاكل لاء والف لاء
مع وافر حبي
مروه

mostafa rayan يقول...

ربنا يكرمك
وينصرنا
دمت بكل الخير

طائرٌ حر يقول...

الأخت العزيزة أم مريم .. السلام عليكم و رحمة الله
لا أدري سب غضبك من حماس و حزب الله و وضعك لهم في نفس الخانة مع فتح أو حكام العرب ؟هل يصح أن أضع الخير و الشر في نفس المكان و أقول أن الجميع سواسية ؟
هل يكون أخي كعدوي؟
ثم سؤال لك و لكل الإخوة المتحاملين على المقاومة عموما و حماس خصوصا و على الفلسطينيين.. هل مصر كانت مخطئة عندما كانت تحارب حرب الإستنزاف سنة 69؟ ألم تكن صواريخ مصر و فدائيي مصر يحاولون تحرير أرضنا؟ ألم تتسبب تلك العمليات في غارات إسرائيلية على بلادنا و شهداء بالآلاف و لعلكم تذكرون بحر البقر فهل شهداءنا كانوعلى خطأ و هل كنا على خطأ وقت أن حاولنا تحرير أرضنا ؟كذلك إخوتنا في فلسطين يحاولون تحرير أرض المسلمين المقدسة الأرض المباركة التي تكلم الله عنها في القرآن الكريم فهل نتركهم؟

على كل حال خدي العنوان ده و اقري قناة العربية كاتبة إيه عن الهجمة الإعلامية على غزة و كيف أن كل المرتزقة من الصحفيين خدوها و حولوها إلى لبانة في فمهم عن مسؤلية حماس عن الحرب و ...
http://www.alarabiya.net/articles/2008/12/31/63212.html#
و هناك محاضرة للشيخ حازم صلاح أبو اسماعيل أرجوكي و كل الشرفاء يسمعوها و ينشروها.

سيف الدين اليزل يقول...

الكلام ده لطائر حر انت بتشبه حرب الاستنزاف زي اللي بيعملوه حماس احنا كنا ندخل عندهم وندبح فيهم ماكانوش بيناموا وكنا كل يوم عندهم مش بنضرب صواريخ بتاعت اطفال من بعيد قولي بس امتا فدائين حماس دخلوا عند اسرائيل وضربوهم واشتبكو معاهم في اي معركه اخر عمليه انتحاريه عملاها بنت وفشلت وبعدين انا معاك في اي حاجه تقولها الا انك تقول حماس زي ابطال حرب الاستنزاف اسال ولدك لو سمحت مين هما شهداء حرب الاستنزاف لاكن حماس بيستخابو في المساجد وبيضربو صاوريخ الاطفال من المستشفيات والمساجد وانا مع اهل غزة بس مش مع حماس والاختلاف في الراي لايفسد للود قضيه والسلام علي من اتبع الهدي

جنّي يقول...

السلام عليكم

جزاكي الله خيرا على دعوتك ان شاء الله نلبي الدعوة ..

المساجد هنا بفضل الله تدعوا منذ بدء العدوان يوميا في صلاة العشاء والفجر ..

اللهم سدد رميهم يارب

جنّي يقول...

السلام عليكم

في وقت يجب ان تتكاتف فيه كل القوى في الوقوف ضد اليهود الملاعين نجد من يتلاسنون ويقذفون بعضهم البعض من المعلقين فالغير معروف أخطأ وسيف أخطأ ..

ومن يتحدث عن من قدموا الشهيد تلو الشهيد بكلام رخيص لا يجب ان يقال في مثل هذه المواقف أخطأ .. الاستخفاف بالمقاومة الحرة الشريفة ليس من اخلاق اي وطني وليس من اخلاق المصريين الذين قاوموا على مر العصور في القناة وبور سعيد .. بالخنجر والسكين ..

قادة حماس قدموا الشهيد الشيخ احمد ياسين والدكتور الرنتيسي والمهندس يحيى عياش والقائمة تطول .. والزهار ابنه شهيد .. وكل القادة في غزة في الميدان يحملون السلاح وارواحهم على كفوفهم ..
اما خالد مشعل ونزال فهم مرغمون لانهم من فلسطيني الشتات وليس لهم حق العودة ..

اما صواريخ الاطفال فقد ادخلت اليهود الملاجئ ونسفت محطة الانذار المبكر في المجدل .. ووصلت بير سبع ..

وحتى لو حجر فمعناه لمن يعي الكثير

ومن لا يعرف تاريخ العمليات الاستشهادية لحماس عليه ان يعيد قراءة التاريخ ..

بدلا من التلاسن ادعو الله بقلب مخلص للمجاهدين في غزة ان يسدد الله رميهم ..

صبرني يارب يقول...

مصطفى ريان

ربنا يكرمك ونورت

صبرني يارب يقول...

دريم

مروه انا معاكي تماما شرفتي يا جميل

صبرني يارب يقول...

طائر حزين

شوف يا طائر طول ما هما بيضربوا فى بعض وهما مسلمين كلهم عندي سواسيه

طول ما هما فى ظل الحرب والموقف المرعب الى هما فيه مش عارفين يوحدوا صفوفهم يبقوا يستحقوا منى كده

احنا كنا فى الحرب ايد واحده واحنا على مله مختلفه ما اكلناش فى بعض

وحرب الاستنزاف تختلف فعلا عن حرب حماس فى حاجات كتير اوي

انا مش باهاجم حماس وحزب الله

اطلاقا
لكن كمان مش باقول عنهم انهم ملايكه ومثاليين واحنا ظلمه والمفروض اننا نشيلهم على راسنا طول عمرنا

نصر الله طلع ناشد الجيش المصري يطلع يحارب ؟؟؟؟؟؟؟؟

اشمعن الجيش المصري ما سوريا عندها جيش ما قالهمش ليه ؟؟؟؟؟؟؟

ايران يا حبيبى عندها جيش حبايبه ما قالهمش ليه ؟؟؟

هو مش القضيه قضية مسلمين ؟؟؟
مش ايران دوله اسلاميه ؟؟؟

يورونا الهمه مش يجعجعوا من بعيد

نصر الله نفسه كش ملك لما لقى نفسه كل لما بيساعد بيتلب على قفاه

فمش عايزين بقى فرد عضلات

تفتكر يكون خيار صح مننا دلوقتي اننا ندخل فى حرب ؟؟؟؟؟؟

فكروا يا ناااااااااااااااس

الدول العربيه كلها فيها قواعد امريكيه

العرب الى بيهبهبوا علينا دوووووووول هاننضرب من ارضهم فكرواااااااااااا

هانتدعك احنا ومش هايحصل حاجه هاتروح سينا على الاقل وبس على كده

افهمواااااااا

صبرني يارب يقول...

سيف

انا معاك طبعا ان حرب الاستنزاف غير حماس تماما

احنا كنا بنحارب بجد

انما كمان لا انكر على حماس جهادها دول ناس عاشوا عمرهم كله فى نحار مع اليهود لازم نقدر ده كويس

صبرني يارب يقول...

جني
احنا كمان عندنا بيدعوا بس انا عايزه كلنا نكون فى وقت واحد من فضلكم


بالنسبه لرد حضرتك على سيف

انا معاك فى ان حماس لها طبعا جولات لا تغفل

لكن كمان لها هفوات لا تغتفر من ناس يفترض فيهم الخبره والبساله والعقل

اسلامنا علمنا نكون كده

شكرا لك يا جني ونورت

طائرٌ حر يقول...

يا سيف.. أرجوك ماترددش كلام الجرايد المصرية و التلفزيون المصري و أنت كذلك يا أم مريم..حماس ليست مثل فتح وليس من اتبع رضوان الله كمن باء بسخط من الله. ليس المؤمنون المجاهدون الصادقون كالعملاء و الخونة و من باعو أنفسهم لليهود و تواطؤا على إخوانهم ؟بأي عقل و بأي منطق يستوي هذا و ذاك؟هل يستوي محمود عباس مع إسماعيل هنية؟ هل يستوي فياض أو قريع أو حنان عشراوي(بنتها متجوزة إسرائيلي و دوروا على النت و اتأكدو) مع الزهار أو سعيد صيام أو خالد مشعل ؟هل يستوي الأطهار مع الأشرار ؟ هل يستوي الأبيض و الأسود ؟ مش معقول ياجماعة يكون كده..

و الله يا أم مريم إني ما رديت إلا لحرصي عليكم لأنكم إخواتي و على فكرة أنا طائر حر مش طائر حزين ..
بالنسبة لمحاضرة الشيخ حازم صلاح أبو إسماعيل فخدو الرابط و اسمعوها ..إسمعوها كلها لأنها هتغير فكركم خاااالص .
جزاكم الله خيرا
http://ia310831.us.archive.org/0/items/fadfada30-12-2008part1/30-12-2008.wmv.mp3

http://ia310821.us.archive.org/3/items/fadfada30-12-2008part2/30-12-2008.wmv.mp3

أو إدخلي على هذا الرابط
http://www.ikhwan.net/vb/showthread.php?t=72484
بالمناسبة يا سيف .. السلام على من اتبع الهدى تقال لغير المسلمين.

صبرني يارب يقول...

طائر حر

شوف ياعم الاول كده عشان ما حدش عاد يقولي كلام جرايد وتلفزيون مصري

والله ياعم انا ما قريت جرايد من يوم الجمعه الى فاتت وقريت بريد الجمعه بس هههههههههه

والتلفزيون اخر مره عديت من جنبه شوفت الاخبار عند ماما على الجزيره

انا التفزيون بتاعي ما بيجيبش الا كارتون للعيال
وابوهم قبل ما ينام بيجيب ام بي سي تو عشان ينام على موسيقى الفيلم ههههههههه


المهم يا سيدى انا ما ساوتش بينهم فى كل حاجه غير فى انهم بيضربوا فى بعض وهما فى حالة حرب كمان
دي لواحدها مصيبه يا ابنى والله

وحماس وحزب الله مش ملايكه

لا لهم هفواتهم واخطائهم التى لا تغتفر

وان كنت انت شوفت مش عارفين متجوزه اسرائيلي على النت ادينى صورتك وانا الصبح اطلعك متجوز هيلاري كلينتون (نقيتلك واحده حلوه اهو ياعم )

وكمان بلاش تفتح سيف يقولك بقى هو شاف ايه بام عينه مش على النت

حماس وحزب الله مش ملاايكه وكمان مش شياطين

ما انكرتش عليهم كفاحهم لكن كمان ما غفرتش لهم اخطائهم

منهم ناس مجاهدين عن حق واكيد اكيد منهم ناس خونه والا تبقى اسرائيل بتلعب يا عمنا

وسامحني بطلت اسمع خطب وداني تعبت منهم

نورت ياطير يا حر ويارب اشوف دايما ناس محترمين زيك بيعرضوا رايهم المختلف بكل ادب وذوق

سيف الدين اليزل يقول...

الكلام للاخ الصديق طائر حر اسمحلي اقول صديق اولا السلام علي من اتبع الهدي تقال اذا دخلت علي جماعة لاتعرفهم المسلم فيهم المتبع للهدي هوة الذي يرد السلام وانا لااعرف كل الاصدقاء علي المدونه ثانيا انامع اخواتنا في غزه لكن برضو مش هنفتح الحدود علشان هي ده الفرصه الذهبيه لاسرائيل حماس تجري علي سنيا واسرائيل وراها واحنا ندافع عن الحدود طبعا وتجي رجلينافي حرب قذره واول صاروخ هيكون من اولا قاعده امركيه في السعوديه وقطر والبحرين والعراق يا صديقي قاده حماس ومعهم قاده فتح وكل الفصائل الفلسطنيه مش عاوزين يحلو القضيه علشان الحسابات المفتوحه هنا في اوربا انا مش هاقسم بالله ركبو معايا قاده حماس سكرانين من دبي ولما عرفت مين هما قلت حسبي الله ونعمه الوكيل ولما قلت لهم حرام قالو هو في ايه حلال فالدنيا مع الاحتفاظ بالاسماء طبعا انا معاك في ناس في حماس شرفاء لكن مصر اشرف من كل ا لدنيا ولو عاوز تعرف العرب عملو ايه في حرب 73 اسال وانتا تعرف والاختلاف في الراي برضوا لا يفسد للود قضيه والسلام علي من اتبع الهدي

طائرٌ حر يقول...

آخر كلامي .. إقرو موضوع إبراهيم عيسى عن خيار الجاهلية ..عارفة الكفار بتوع الجاهلية..أه أه بتوع نحن غرابا عنك عنك و بتوع هبل و اللات و العزى..لم يتشفوا في المسلمين و لم يقولو أصل ليهم أخطاءهم , أو إنهم مش ملايكة

http://dostor.org/ar/index.php?option=com_content&task=view&id=11275&Itemid=1

أتمنى تقريه لأنه مهم..بس أرجوكي رجاء حار من كل قلبي..و انا باسمع دلوقتي خبر استشهاد قيادي من حماس (اللي مافيهومش عملاء كما تتصوري) و قد صدق الله فصدقه الله.. مات و معه زوجته و ثلاثة من أبناؤه سبقهم 2 من أبناؤه شهداء..هؤلاء هم القادة في حماس.. شهداء أو مشروع شهداء..لا ينتظرون الحكم و لا يريدونه .. فقط إعلاء كلمة الله و الجهاد في سبيله و الشهادة و اللحاق بركب الشهداء..هذه هي حماس..فتح فيها شرفاء مقاومين ..نعم و لكن فيها مناضلين من الخمارات و البارات..لكن حماس ..حاشا لله ..و أرجوكي و أرجو سيف و كل الزوار وكل مصري حر شريف.. حتى لو مختلف مع حماس..بلاش تنصر الأعداء عليهم.. بلاش تتبنى وجهة نظر اليهود..حرام علينا دول اخواتنا

طائرٌ حر يقول...

أشكرك يا سيف لاعتبارك لي صديقا و لكن لي عتب شديد عليك ..قادة حماس سكرانين في دبي!!..برغم إنه من السهل فبركة الصور و الفيديوهات لكن هات الصور يا سيف .. لكن أؤكد لك أنك ماتعرفش حاجة .. و على كل حال ها هم قادة حماس يكذبون ما تقول باستشهادهم و أبناءهم..يكذبون ما يقال عنهم بتقدمهم للصفوف الأولى ..باعتيادهم المساجد..لأول مرة حكومة تهرب الأموال إلى داخل بلادها.. هنيه يهرب الأموال و التبرعات لأهل غزة و غيره يهربها للبنوك في سويسرا..

آخر حد ممكن تتكلم عليه كده هما حماس ..

عيب.. عيب .. جبت منين الكلام ده .. ليه الإفتراء على أنضف ناس في العرب ؟
على كل حال ..ستقف و يقفون أمام الله و سيسألك عما كتبت يداك عنهم من قذف في أخلاقهم..فاتق الله فيما تكتب و تأكد فيمن تنقل عنه الأخبار لأنهم مستهدفون من كثير ممن لا يفيق من الخمر و لا ينظف من زنا و عهر.. و تأكد أن العاهرة لا ترمي الشرفاء إلا بما فيها.. و عندما يرمي أحد شرفاء المجاهدين بالسكر أو الزنا أو العهر فتأكد أنه يرمي الطاهرين بما فيه .
أشكرك لسعة صدرك.و أرجوك تقرأ جيدا عن حماس من مصادر محترمة.
و أشكرك يا أم مريم على استضافتك للمناقشة..و أؤكد مرة أخرى على أن تقرأو جميعا مقال إبراهيم عيسى و تستمعو لمحاضرة الشيخ صحازم أبو إسماعيل لأنها مهمة جدا لكل مسلم في هذه الظروف.

صبرني يارب يقول...

شوف يا سيف

كون فى حد من بتوع حماس شوفته سكران دي برضه ما يجعلش من حماس كلهم سكارى
ولا ان كلهم غير صادقي النيه فى الجهاد

حاش لله حتى لو كانوا كده لا نتهمهم جميعا فى دينهم

لكن كمان مش هانبصم وراهم

وما زلت ضد فتح المعبر على مصراعيه واعطاء التصريح الضمني بدخولنا فى حالة حرب حاليا

صبرني يارب يقول...

طائر حر

بص يا عمنا اولا بما انك راجل محترم اوي فى النقاش فى نقطه بس احبك تراعيها بعد كده من اختك يعنى بلاش تكذب الى قدامك مش حلوه كنقاش المفروض انه راقي

أما بقى موضوع العملاء الى فى حماس فلو مافيش عملاء داخل حماس يا ابنى يبقى اسرائيل بتلعب يبقى فى حاجه غلط

جيش المسلمين ايام الرسول عليه الصلاة والسلام كان فيه منافقين والرسول كان عارف يعنى مش حماس منزلين من السماء عييييب انت

احنا مش شمتانين فيهم يا طائر برضه عييييييييييب

احنا ببببس مش هانمشي وراهم مغميين عنينا وناخد على دماغنا فى الاخر

وصور ايه الى ملفقه وفديوهات ايه يا ابنى

سيف طيار وكان بيقوم برحلات من هولندا لدبي ودي حاجه شافها بأم عينه مش صور ولا فديوهات ولا هاصورهالنا

الرسول عليه الصلاة والسلام كان يقول لا تصدق كاذبا ولا تكذب صادقا

عشان كده لما تكون بتسمع حاجه مش مصدقها بررررضه ما تكذبش صاحبها لكن انت حر ان كنت تصدق او لا

ومازلت باقولك حماس مش ملاااااااائكه
منهم المجاهد الشهيد ومنهم الى مش كده خالص

وبعدين هى مصر مش بتبعت مساعدات ؟؟؟

امال يا ابنى الانفاق الى مجننه اسرائيل دي طالع منين ؟؟؟

هو احنا لازم نمسك ميكريفون ونقول من ده بكره بقرررررررشين

وابراهيم عيسى مش هاسمعه بطل امشي فى الزفه من زمان يا ابنى عجزت على الزفف دي .

نورت يا طائر وفرحانه بك

Anonymous يقول...

السلام عليكم

أختي الحبيبة أم مريم ..

أنا متابعه لمدونتك من فتره طويلة وحقيقي أسلوبك بيعجبني جدا وكنتي بتديني امل إن لسه في ستات ملتزمات وعندهم هدف في الحياه و عايزين يربوا أولادهم زي ما ربنا يحب و زي ما انا نفسي ان اولادي يطلعوا .. فحقيقي كنت دايما فخورة بيكي .. وده يمكن اللي خللاني ولأول مرة أرد على مدونتك هو المناقشات الدائرة في الردود بخصوص حماس و وو وو ..

بيني و بينك اتخضيت شوية من رأيك في حماس في البوست اللي فات و بعدين كلامك في الردود ..

بصراحة لانك زيي وأهدافك زي اهدافي ده حرك فيا من منطلق الحرص عليكي ادام ربنا سبحانه وتعالى .. لان ربنا هيحاسبنا لما نكون قاعدين في بيتنا وسط عيالنا آمنين مطمئنين وبنشرب شاي باللبن وبندور لولادنا على هدوم جديدة للشتا وأحسن خروجة عشان الفسحة في آخر الأسبوع وأحسن أكلة عشان ياكلوها واهما مبسوطين .. وقاعدين و مشغلين الدفاية في وقت البرد الشديد وبنتغطى بالبطانية واللحاف في عز البرد .. يعني من الآخر (ملكنا الدنيا وما فيها ) زي ما قال سدنا محمد لما قال في الحديث ( من بات آمناً في سربه معافىً في بدنهعنده قوت يومه فقد ملك الدنيا وما فيها) أو كما قال الرسول صلى الله عليه وسلم...

مينفعش واحنا مالكين الدنيا باللي فيها .. نتكلم على ناس ونشكك فيهم وفي خيانة جزء منهم وهما معندهمش كلللللل اللي احنا فيه .. هما محاصرين وولادهم و في عز البرد من غير غطا او بيتغطوا كلهم ببطانية واحده في أوضه عشان يدفوا بعض .. وأفرانهم مبتشتغلش عشان الدقيق خلص فبيخبزوا في البيت أي حاجه تنفع بس تسد جزء من الجوع ..

عارفه حبيبتي .. قريت في مجلة على لسان أسير خرج حديثا من سجون الصهاينة فلما راح على غزة عند اهله راح مع كذا واحد من الأسرى عزمهم إسماعيل هنية اللي هو قائد حماس ورئيس الحكومة في غزة.. عارفة استضافهم في بيته...

عارفة بيته عبارة عن خيمة في مخيم مش حتى في بيت مبني .. عارفه الخيمة اللي قاعد فيها هو وولاده كام؟
ولاده 12 واحد وزوجته في خيمة .. ده قائد حماس يا حبيبتي .. عارفه المهم فالراجل بيحكي بيقول فلما رحنا لقينا العزومة عبارة عن حمص و عدس .. فالأسير المحرر بيهزر بيقول دول معدتي دابت منهم في السجن معندكوش حاجه غيرها .. فراح وجابوله زعتر .. وقالهم .. ياريت كان عندي اللي أكبر من كده وكنت طلعتهولك كله ..
ده قائد حماس يا أختي ..

دول اللي بيجاهدوا .. دول اللي بيضحوا .. مينفعش واحنا بمنتهى الهدوء نقول عليهم .. واللهم اصلهم فيهم وفيهم ..

لا احنا أحسن نقول احنا منعرفش .. بس نبعد تمااااااااااااما عن اتهامهم بأي حاجه ... عشان منحاسبش على حاجه يوم القيامه قلناها وتكون غلط وربنا عارف انها غلط .. لان ساعتها حسابنا هيكون عسيييييييييير أوي ..

انا وانتي فعلا منعرفش يبقى منتكلمش... اللي نعرفه ان و متأكديم منه انهم بيجاهدوا عشان يحرروا أرضهم .. وانهم بيقدموا منهم شهداء كتيييييير ..

لكن نقول ان منهم عملاء عشان زي ما قلتي امال يعني اسرائيل بتلعب ... لا مينفعش تقولي كده لان ده اسمه ظن .. وظن في مجاهدين ..

كونهم مختلفين مع بعض ميعنيش ان ان احنا نمسكهم نقول عنهم عملاء.. حراااام يا حبيبتي نقول كده ... حرام والله وهنتحاسب قدام ربنا ...

على فكرة انا بكتبلك وانا دموعي مغرقاني بعد مشاهد مجزرة بيت الشهيد ان شاء الله نزار ريان .. حاجه صعبه اووووووووي .. ده اكبر قائد في حماس في غزة وهو العالم بتاعهم اللي كان بيربيهم على الجهاد وهو أستاذ في علم الحديث اصلا .. تخيلوا هدوا عليه بيته وموتوه هو و زوجته و5 من ولاده و احفاده الاتنين .. عارفه اليهود هدوا عليه بيته ب500 طن متفجرات .. ولما فتحت على النت ادور على اخباره على شبكة فلسطين للحوار .. لقيت انه أول واحد قدم ابنه استشهادي في فلسطين..

نبعد خاااااااااااالص عن كلمة عملاء عن مجاهدين .. عشان حراام والله هنتحاسب .. احنا مش عايزين نروح عند ربنا ظالمين حد .. ولا انتي رأيك ايه ؟؟؟؟

يارب اصدق نيتي وخلصها ولا تجعل كلماتي الا بالصدق ولا تجعلني اقول الا ما يرضيك .. اللهم لا تؤاخذني بجهلي ياااااارب

أختك المحبة بصدق
أم حسن

صبرني يارب يقول...

حبيبتى ام حسن

اولا انا فرحانه اوي ان نقاشنا طلعنا من صمتك وخلاكي تشرفينى وتتكلمي معايا

ثانيا بقى نتكلم عن الموضوع الى قلب عليا الدنيا والى حقيقى ما حدش قادر لحد الان يفهم وجهة نظري

حقيقى انا كمان شوفت الى حصل النهارده وكنت قاعده عند دكتور الاسنان مسكت نفسي من البكا بجد عشان الناس الى قاعدين .

ولما رجعت ياما قلت لرضا البشريه ضميرها مات
واحنا كمسلمين وعرب تبلد احساسنا

صدقينى ان كان معايا سلاح وقدامي مجمع سكني لليهود واعلم ان به نساء واطفال عمري ما هاضربه حتى لو كان هو بيضرب اطفالنا .

يعنى ما ارضاش الحياه دي لاطفال اليهود فما بالك باولادنا لحمنا ودمنا

وربنا الى يعلم اد ايه باقول الحمد لله الذي عافنا مما ابتلى به غيرنا

وادي ايه اللقمه بترجع من بؤي لما افتكر جواعى المسلمين

واد ايه لما احس بلسعة البرد باقول فى بالي يا عينى على الى مش لاقيله متوى

بس طبعا انا مافيش فى ايدى اعمل اكتر من كده

اما بالنسبه لحماس يا اختي والله والله انا مش باتهمهم بحاجه

لكن انا قصدي انهم لازم بلاش يا ستى نقول عملا قولي جواسيس

نقول كماااااااان

جيش المسلمين ايام رسول الله كانوا كلهم ايه ؟؟ مش الصحابه واولادهم ؟؟؟

طيب ما كان فى يا حبيتبى فى نفس الجيش المنافقين والى منهم كانوا جواسيس وعملا للكفار

والا ازاي بس حبيبتى قوليلى عرفوا مكان نزار ؟؟

وازاي واحد ماشي فى عربيه منه قادة حماس معروف خط سيره وبينضرب وهو ماشي فى الشارع ؟؟
مش ده شغل المخابرات والجواسيس ؟؟؟

انا قلت مليوووووووون مره حماس لا انكر عليهم جهادهم يا ناس ولا شرفهم

لكن بررررررررررضه مش ملايكه وبرررررررررضه لهم هفواتهم الى اهل غزه وفلسطين عموما شربوا المر بسبب هفواتهم دي .

اعذرينى يا ام حسن لكن ده رايي

شوفي انا ممكن اغفر لواحد عادي خطأه

انما اغفر لسياسي فى رقبته متعلق ارواح ناس ما لهاش ذنب فى اي حاجه ؟؟؟؟

ابدااااااااااااااااااااا

واظن انتى معايا فى كده

نزار ده كان محارب معاكي كان مجاهد معاااكي كان معلم ماااااااشي

لكن الى حصل انهم ضربوه وسط عياله وقتلوا معاه عشره عشان يقتلوه هو بس مين يقووووول كده

العالم ضميره مات يا ام حسن

وارجو تكوني فهمتى وجهة نظري ولحد لما يأذن الله فى امري

عمرييييييي ما اقول على جماعه معينه انهم مصيبون على طول الخط
ولا مخطئون على طول الخط

اسمحيلى ليس فينا معصوم


تحياتي ليكى ورغم المناسبه الى مش حلوه الى حضرتك جيتى فيها الا انى فرحانه بوجودك ومشاركتك وما تحرميناش منها

سيف الدين اليزل يقول...

صديقي العزيز شكرا علي سعه صدرك وشكرا كمان علي انك اتهمتني بالسكير الزاني وشكرا برضوا علي انك اتهمتني بالعاهره التي ترمي الناس بما فيها وارجع اللي مقالك وتاكد من هذا الكلام وربنا يخاليلك اسماعيل هنيه وقاده حماس كلهم والايام بيننا وبرضو مش هنفتح الحدود ومش هنحارب علشان خاطر اسماعيل هنيه وفي مثل في مصر بقول كلم ...... تلهيك واللي فيها تيجيبو فيك والسلام علي من اتبع الهدي

صبرني يارب يقول...

لا يا سيف ما اعتقدش ا ن طائر حر قصده يقول عليك

هو بيقول عن الناس الى انت يمكن نقلت عنهم


طائر مش واخد باله انك بتتكلم من منطلق عين يقين وشوفت بعينك


والمثل الى انت كاتبه انا ما اعرفوش

قوس قزح يقول...

جزاكى الله كل خير يا ام مريم

تقبل الله الدعاء من الجميع ان شاء الله

جعله الله فى ميزان حسناتك

صبرني يارب يقول...

دولي

نورتي يا جميل

عمرو يقول...

دعيت و لله الحمد
ربنا يتقبل منا جميعا و يفك ضيقة اٍخوانا فى غزه آمين يا رب
جزاكى الله عنا و عنهم كل خير يا أختنا أم خالد

صبرني يارب يقول...

تعيش يا عمرو

ونورت انا كنت جايبه فى سيرتك لسه حالا والله مع واحد شرقاوي برضه جدع ومحترم ما يتخيرش عن السامعين

شرقت ؟؟؟

mony يقول...

للاسف يا صبرني النت عندي ساعة كويس و عشرة لاء

ماشوفتش الدعاء غير دلؤتي



بس دعيت بيه برضه و ربنا يتقبل


جزاك الله خيرا

صبرني يارب يقول...

اوك يا موني ربنا يكرمك يارب ويتقبل منك