مناقشة قلب ايمان 2

السلام عليكم

وحشتوني مع ان ماليش نفس لكم بصراحه

ايوه ايوه صدقوا

نفسي مقفوله من البلوج كله بقالي كام يوم

صحيح بافتحه واتابع المدونات

بس قرفااااانه على الاخر ونفسي اولع في البلوج كله

ما علييييييييينا

نكمل بقى مناقشة قلب ايمان عشان نخلصها ان شاء الله نشوف الى ورانا 

عشان عندي كلام كتير واقف فى زوري عايزه اقوله 

 احنا كنا ناقشنا المره الى فاتت لحد الجزء الخامس

ان شاء الله المره دي نكمل 

فى الجزء السادس 

كان كله تقريبا عن احتفال ايمان بعيد خطوبتها والى خلته سبب لانه يكون واقفه فى حياتها مع اشرف وبدايه للتغير 

فى كذا نقطه هنا فى البوست ده

اولا مافيش فيها اي حاجه ابدا مهما مرت السنين وضاعت الفرص انك تراعي شريك حياتك وتفكر فى اسعاده وتعمله مفجأه وتحتفل معاه بذكرى  حلوه

واوعى اوعى تصد برضه شريك حياتك لو لقيته بيقرب لان ممكن الصد ده يبعدك عنه اميال واميال

حتى لو كانت نفسك مقفلوه منه على الاقل ادي لنفسك فرصه انك تفكر هاتعمل ايه مش لازم لو لقيته بياخد خطوه تاخد  انت اثنين يا سيدى خد نص خطوه لحد ما تفكر هاتعمل ايه 

ثانيا: مافيش مانع ابدا من استشارة الصديق او الام او الاب وسماع نصيحتهم بس

فى حدود المعقول واحنا مشغلين عقلنا مش مغمينه لو لاحظتم هاتلاقوني باقول ان ايمان عملت حاجات من نفسها مش كله من دماغ داليا  ولو انه مش عيب ابدا

بس المهم نلاقي العقل الحكيم المخلص فعلا الى نقدر نفتح لنا قلبه ونثق فى كلامه

مش مهم اننا نقول 

لكن مهم هانقول ايه ولمين وازاي

 نيجى بعد كده للجزء السابع

والى كان فى صوره للتفاهم بس في وقت هما فيه علاقتهم حلوه ببعض

وشوفنا شويه تنازل من ايمان على شوية تنازل من اشرف مشيت المراكب

ولازم تعرفوا ان كل حاجه تزيد عن الحد المعقول غلط

يعنى حلو تدلعي جوزك وما تخليهوش يعمل حاجه فى البيت

لكن كمان مش على طول وفوق طاقتك وعوديه ان من حقك تدلعي عليه برضه

احلى شعور ممكن يحسه الراجل هو ان مراته محتاجله دايما

تاني حاجه باكد عليها

من حق كل واحد انه ينبسط

لكن كمان لازم تعرفوا ان الاسره دي اساسااا كائن واحد من حقها برضه الاسره كلها انهم ينبسطوا مع بعض

خلي فسحكم اولا مع اسرتكم وبعد كده ابقوا اتفسحوا على كيفكم

الجزء الثااااااامن

بعد ما اتصلحت الحياه بينهم بنشوف بقى تراجع هايبدا تاني لان فى اخطاء ما كانوش واخدين بالهم منها

اهمها الي انا ابرزته فى الجزء ده هو الكلام

يعنى بكل بساطه كل واحد يقول على الى مضايقه والى بيوجعه والى بيتعبه

يقوم الطرف التاني بدل ما يتضايق منه ويقرف منه بالعكس يعذره ويصعب عليه ويحاول يساعده ويحاول ما يضايقوش

والكلام ده عموما فى كل حاجه بينهم ولا سيما طبعا العلاقه الخاصه والى اساسا فيها مشكله دايما مابين الازواج وبتكون سبب المشكله فى الاعم الاغلب ان مافيش بينهم كلام ولا تواصل ولا صراحه مهما ادعوا ذلك

 التااااااااسع   و  العاشر  

الخيانه

خيانه احد الطرفين ازاي ممكن نقابلها وازاي ممكن نعالجها

من غير ما نهد البيت على دماغنا

وما نبقاش عاملين زي شمشون الى هد المعبد على الكل بما فيهم نفسه

وامته نغفر الخيانه وامته لا

وبالنسبه للطرف الخاين لو كان تاب فعلا

لازم يصبر  على شريكه عشان يقدر يتعايش مع نفسه ومعاه وخطاه ده

***********************

المهم هى فى النهايه مش حرب ياريت بس ناكد على  الموضوع ده

وكمان مش لعبه  لا دي جد وجد اوي

صدقوني الحكايه مش محتاج مجهود اد ما هى محتاجه اخلاص وايثار

وشكرا لكم

وحاسه انى دمي تقيل ومودي وحش خالص معلش بقى استحملوني

حد القذف ....على الرؤيه

حــــــــــــــد الـــقــــــــــــذف

موضوع جديد على

الرؤيه الاسلاميه المتواضعه

ياريت تنوروني هناك

ثواب لله يا محسنين

ومن قدم شيء بيداه التقاه

ههههههههههههههههههههههههههه

مناقشة قلب ايمان

السلام عليكم

قبل ما نقول اي حاجه احب بجد اقولكم كلكم الف شكر لكل الناس الى شرفوني فى البوست الى فات وقالولي كل سنه والمدونه بتاعتي طيبه وبخير وانا كمان برضه

اسعدني وجودي معاكم لمدة سنه فعلاااااا

ندخل بقى فى الموضوع لانه شكله هايطول

الى هو طبعا نقاش القصه الى جابتلي صداع كتير جدا فى دماغي بس مش مشكله انا باحب الصداع ده

انا الاول احب اقولكم ان انا ماليش فى الادب والقصص خالص مالص لا دارسه ولا اعرف عنه حاجه تقريبا

لكن انا فكرت اكتب القصه دي لان كان فى مواضيع كتيره ونقط كتيره عايزه ابرزها واتكلم عنها ومش عارفه ازاي

يمكن انا ساعات كنت باحس ان القصه خاويه تمام من الحبكه الدراميه الى بيقولوا عليها والاثاره والتشويق

بصراحه انا كنت باطنش الحته دي ساعات عن عمد عشان ما اطولش لانى مش

باكتب مسلسل

انما لانى كنت بابقى عايزه اوصل الكلمتين الى انا عايزه اقولهم وبس

يعنى زي ما تقولوا ساعات كنت باحس ان القصه عامله زي الفيلم الوثائقي او التسجيلى او التعليمى

لكن برضه زي ما قلتلكم اعتبروني مش قصاصه لكن انا بارغي بشكل تاني

بعد كده نيجى بقى للقصه فى نقط معينه انا حبيت ابرزها من القصه دي هاقولهم نقطه نقطه وعايزه اسمع رايكم فى كل فتفوته عشان عايزه اناقشكم كتير عشان فى ناس قالت كلام كتير محتاج نقاش فى التعليقات

*****************************************

اولا :الاستهوان بتصرفات صغيره تكون بذره لمشاكل كبيره وتعقيدات فى الحياه فعلا (زي قبول رساله من صديق او صديقه والسعاده بين الشخص ونفسه انه مرغوب وفي ناس بتحبه لسه غير الشريك الى من وجهة نظره لا يبالي )فى الجزء الاول شوفنا ده

ثانيا : الضغط النفسي والعصبي على الزوجه وخصوصا العامله وتحميلها كافة المسؤليات من عمل فى البيت ومسؤلية الاطفال عموما ولومها على اي تقصير وتسفيه من مهمتها داخل البيت وخارج البيت (وده كان فى الجزء التاني من القصه)

********************************

وده فعلا بيعمل نوع من الاحباط والخنقه وكل المشاعر السلبيه لانها لو كانت من النوع المسالم هاتحتار. فهي رغم بذل كل وقت وجهد تقدر عليه غير مرضي عنها .

ولو كانت من النوع المتمرد هاتقلب الحياه راسا على عقب وتعمل عواصف من شأنها فعلا هد البيت ده .

ولعلمكم الخاص فى حالة القاء المسؤليات دي على عاتق الزوجه على المدى البعيد

الزوج خسران اكتر منها بكتير

هايجى وقت يلاقي نفسه وحيد فى الدنيا دي

هى عندها عيالها ومشغوله بهم جدا ومهمه بالنسبه لهم جدا حتى لما يكبروا ويتجوزوا

وهو مافيش اي حاجه عنده وحياته فاضيه وجافه حتى لو كان مشغول بالعمل لانه فى الغالب بيكون كمان خسر زوجته نفسيا

لكن فى البدايه بيكون مستعذب الهروب من المسؤليه

ما تحرموش نفسكم من اسرتكم واولادكم هما محتاجين لكم وانتم كمان محتاجين لهم والله

ثالثا : الصديق مش الى نروح نشرب معاه قهوه وننزل نعمل معاها شوبنج

الصديق هو الى نلاقيه لما نحتاج له

والى يقولنا استوب لما يلاقينا غلط

والى يحاول يصلحنا مش يساعدنا على الخطا

والى يفتح لنا قلبه ويسمعنا ويرد علينا بامانه

رابعا : ممكن نغلط فى الطريق. لكن من الغباء اننا نغلط وما نعرفش نرجع قبل ما نتوه فى الطريق.

لما تحس الضعف فى وقت معين فى شريك لك فى الحياه حاول تلجأ له يمكن تلاقي الى انت بتدور عليه مش دايما الحل موجود بره البيت .(شوفنا الكلام ده لما ايمان فى الجزء الثالث رمت نفسها فى حضن اشرف وقالتله ما تسبنيش . وهو لما لقاها محتاجله فعلا كده كان حنين معاها واحتواها وحققوا هما الاثنين غايتهم )

***********************************************

خامسا : الاناينه هى دمار اي علاقه بين اثنين .

وعكسها الايثار .او تفضيل الاخر ومتطلباته على نفسك وده اساس وسر نجاح العلاقه بين اي اثنين وخصوصا المتجوزين

وده حصل فى الجزء الرابع (لما اشرف كان تمام اوي لحد ما الليله خلصت وتاني يوم الصبح خلاص خلصت المشاركه وخلصت التفاهم وبدأ بالقاء اللوم عليها تااااني فى كل غلطه )

المشاركه لو ما كنتش فى كل حاجه عمرها ما هاتكون فىحاجه واحده يا كله يا بلاش .

وربنا قال ايه موده ورحمه الاثنين لو سمحتم ودوا بعض وارحموا بعض من فضلكم .********************************

سادسا : الثوره الى عملتها ايمان بكل هدوء برضه على حياتها وقالت فى الجزء الخامس (أنا مش عايزه اعيش ميته )وقررت تغير حياتها وتعيشها بسعاده ولو بجزء يسير منها . كلنا محتاجين اللحظه دي على فكره ولو استسلمنا مش هانعيش ابدا بسعاده حقيقيه .

سابعا : الخوف من صد الطرف الاخر واعتباره اهانه له وكأن من المفروض ان الطرف الاخر بعد سنين الجفا طالت او قصرت طبعا المفروض انه يكون مستنى اشاااااره منك عشان يقولك شبيك لبيك

.

لا طبعا خدوا بالكم لما يكون بين الطرفين جدار من الجليد بيعلى ويكبر مع زيادة عدد سنين جوازكم . اوعوا تفكروا تهدوا او تذوبوا مره واحده هاتبقى كارثه .

هاتغرقوا فيه . الى اتبنى فى سنين ارجوكم حاولوا تذوبوا فى شهور على الاقل

الصبر الصبر الصبر

وفى هنا كمان حاجه مهم الراجل لو اتقابل بالرفض ممكن يجى على نفسه ويعتبره دلال من الست او تقل

انما الست لما بتتقابل بالرفض صعب تتقبله وممن تتخيله نفور منها . الا انها برضه لازم تاخد بالها من ننظرية جبل الجليد .

ثامنا : بلاش نهمل المناسبات الحلوه فى حياتنا بالعكس ده احنا نزودها ده احنا نتلكك على اي مناسبه حلوه وحتفل بها. الحاجات دي بتبقى النسمه البارده فى عز الصيف . واللمسة الدافيه فى عز الشتا . بتخلينا نقدر نكمل .

الحياه صعبه ارجوكم هونوها على نفسكم

احتفلوا بكل ذكرى حلوه فى حياتكم وهادوا بعض ولو بورده ولا صنية كيك كل واحد وطبعه بقى مش مهم المهم تهادوا تحبوا .

تاسعا: واعملوا مفجآت لبعض يا مملين . ما تجيش فى عيد جوازك وتديها 100 جنيه وتقوليها خدي اشتريلك جزمه .

حاول تفكر فيها وتفكر هى ممكن تكون محتاجه ايه .

مش عارف اسال اختها وامها ولا استدرجها في الكلام

معلش اشغل بالك بها شويه

وانتى كمان ما تقوليش ما بيهموش الحاجات دي لا بيهمه بس عامل نفسه ما بيهموش عبيط بقى تعملي ايه مش مشكله خديه على اد عقله

وده الى اتكلمت عنه القصه فى الجزء الخامس

واظن كفايه كده النهارده وخلينا نكمل المره الجايه نقاش اصل تهنجوا مني

انا كده ناقشت لحد الجزء الخامس اي حد عنده كلمه اتمنى اسمعها

فبراير شهر العظماء .. والاحداث العظام برضه(تحديييث التورته اهي )

تحدييييييييييييييييييييييييييييييييييث

ادي التوووووووووورته اخيرررررراااااااا خلصت

وحاليا اتكلت والى كالوها ناااااااااااااموا

اه دي بالشيكولاته فى واحده تانيه بالفراوله بس على مدونة طابخين ايه النهارده بقى

وده باتيه بالجبنه وشويه نواشف وحوادق اهو الى نفسه تمووووع من الشيكولاته

وده عصير اهووووووووو

بس بما ان الجو برد عملتلكم كابتشينوا احسسسسسسسسسن

ما تقولوش بقى مخليه فى نفسكم حاجه اهو

بس الى طلعت به من هذا اليوم ان الي يسمع كلام اشرف العطار الى فى شارعنا اخرته وحشه زيي كده

ايووووووووووه لو كان حد فيكم ساكن فى شارع كلية الدراسات اللعين على راي خيخه ما يجيبش من عنده دقيق تورته عشان طلع وحش اوي

ولا كريمه سايبه عشان طلعت زفته خالص

وما يسمعش كلامه لما يقوله ام دينا بتستعملهم وبتطلع جميييييييييييييييييييييله

قال ام دينا قااااااااال

طلعت عينى بسبب الخامات الزفته بتاعته وقعته بني لما اروحله

اه وعلى فكره انا فرحانه بعيد ميلاد المدونه اوي مش بعيد ميلادي على فكره

السلاااااام عليكم

احبائي اعزائي فلذات اكباد عالم التدوين

حبايبى الحلوين

قلتلكم المره الى فاتت ان فبراير هو شهر العظماء . آآآآآينعم هو كذلك.

فطبعا محسوبتكم صبرني يارب اتولد فى مثل هذا اليوم الى هو انشاء الله 16 فبراير

وللصدف الباااااحته السعيده جدا انى اكتشفت ان كمااااااان مدونتي الشماااااء الغراااااااء حبيبتى دي اتولدت فى نفس ذات اليوم

وده يثبت ويعزز المقوله السابقه بان فبراير ده شهر العظماء

واي حد تااااافهه اتولد فى مثل هذا الشهر لازم يجيب اربع خمس شهود عشان نصدقه

وتطلعوا من الكلام الى فوق ده كله انى متواضعه جدا جدا جدا

فكل سنه بقى وانا طيبه ومدونتي طيبه

وبجد بجد مش مصدقه ان فات سنه على التدوين بتاعي عدت زي الهوا يا اخويا

سامعه واحده رخمه بتقولي بقى عندك كام سنه يا صبرني

دي مش هارد عليها خااااااالص

واقولها انتى البعيده نظرك ضعيف ؟؟؟ مش شايفاني يادوب 18

قصدي ابقى بصي فى البروفايل بتاعي

من غير ما نقول كلام مكرر انا فعلا باشكر ربنا انى عرفت عالم التدوين والمدونين وبقى ليا مدونات حلوه باشوف فيها ناس حلوه وباكتب فيها الى نفسي اكتبه بعد سنوات الضياع - لا لا مش التركي - الضياع فى المنتديات يعنى وكتبت ياما حاجات ما حدش قراها ولا فهمها زيكم يا حلوين

وبس بقى عشان هاعيط خلاص

وبعدين كان نفسي اعمل نيو لوك للمدونه بس ما عرفتش معصلجه معايا على الاخر يلا تخيلوا بقى ان المدونه اتغيرت

اه صحيح وتاكيدا لموضوع شهر فبراير الواد خالد ابني عيد ميلاده يوم 22 فبرااااير برضه يظهر انه هايبقى عظيم برضه هههههههههههههههههههه

عيد الحب ...وعلاقته بالبتنجان المخلل

السلااااام عليكم

تفتكروا ايه هي علاقة عيد الحب بالبتنجان المخلل؟؟؟؟ مع انه مش احمر ولا على شكل قلب ؟؟؟

لا لا الاول كل سنه وانتم طيبين وكل الي بيحب والى مش بيحب وناوي يحب برضه طيب

يااااااااااااااااااااااااه وحشني الرغي موووووووووووت

طبعا بصرف النظر عن كون اليوم ده اسمه عيد الحب او الفلان طين داي وبصرف النظر فلان طين ده كان بيشتغل سباك ولا مبيض محاره المهم يعنى ان هذا العالم الرومانسي البريء اتفق على انه يعمل هذا اليوم عيد الحب

كل واحد بقى يحتفظ بطريقته فى الاحتفال لنففففففففففففففففففففففسه

انا بقى يا قوم بينى وبين اليوم ده مصانع الحداد قولولي ليييييه ؟؟؟

ده مصانع قديمه من ايام ما كنت فى الكليه . من يوم ما فجأه كده ماشيه فى الكليه وانا فى سنه رابعه يعنى قبل كده ما حصليش الشرف اصل انا كنت باروح الكليه اشراف بس 3 مرات فى الاسبوع هههههههههههههههههههههههه

المهم ماشيه كده لقيت عيال ماشيين ولابسين احمر بنات وولاد يعنى وماسكين هدايا فى اديهم لونها احمر برضه وورد وحركات من دي
قولت ايه ده فى ايه ؟؟؟!!! وبعدين قلت يلا مش مهم اهم شوية اطفال والاطفال احباب الله دعهم يلعبون .

روحت المحاضره لقيت المدرج مرشوش خلق لابسه احمر وفى بعض اشباح كده لابسين اسود وفى ناس مالهاش فى المواضيع برضه كتييييييير زيي انا كده والغريب ان المدرج مليان ناس مع اننا لسه اول اسبوع فى الدراسه ايه يا جودعان النشاط ده . واكتشفت بقى موضوع عيد الحب ده ومع انى كنت باحب ايامها برضه بس رجعت قلت لرضا فى التليفون انت ازااااااي يا حضرة ما تجبليش كتكوت احمر حتى فى عيد الحب قالي ااااااااه انا اسف فعلا عنيه ليكى اول قفص طماطم يقابلنى هاجبهولك .


المهم بقى كاااااااانت ايام وبيلبسوا احمر بس

تطور الامر بقى ان كل البلاوي دول ماشيين فى الشوارع تلاقي بنت عندها بالكتير 15 سنه وماشيه لابسه احمر وضبها طالع من بؤها 3 متر بتضحك يعنى وهى ماشيه لواحدها اه والله وماسكه فى ايدها بوكيه ورد او هديه .عااااااااادي وتقولك اصل النهارده عيد الحب . طب انتى يا مزغوده يا مسخوطه بتحبى مين؟؟؟!!!! اما بجاحه صحيح

المهم نفس ذات الموقف الى فات ده حصلي السنه الى فاتت يوم 11 نوفمبر وكنت داخله محل اشتري كريم شعر اه والله وكان لونه اخضر لقيت البنت الى فى المحل

بتقولي :اهلااااااااا تعالى ثواني وهافضالك شوفي بقى الهدايا الى هناك دي على ما اجيلك
قلت: هدايا ايه يا امي انا عايزه كريم شعر
قالتلي: عشان عيد الحب
أنا باستغراب : عيد حب ايه يا بنتى ؟؟؟!! مش ده بيبقى فى فبراير ؟؟؟
هى : اه لا ده واحد تاني .

افتكرت انا بقى عيد الحب بتاع مصطفى امين باين ولا هو كان مين مش فاكره وقلت فى عقل بالي يلا رزق الهبل على المجانين اهو بقوا يومين هبل متقع فى الشوراع
وبجاحه ووقاحه وعين واسعه من العيال

ونفسي اعرف شعور الاب لما يلاقي بنته او ابنه فى عيد الحب خارجه شايله هدايا وقلوب وراجعه شايله هدايا هدايا تانيه غيرها بيبقى موقفه ايه يعنى بيقولها ايه ؟؟؟ اها بنته او ابنه يعنى ما تفرقش بالنسبه لي


المهم قلتلها: يا سيتى احنا بنحب من غير اعياد اخلصي وتعالى هاتيلى الكريم

المهم قدام الحاح هذه البياعه الظريفه وانا احبها احبها يعنى عشان اول مره روحتلها قالتلى يا انسه هههههههههههههههههههههه
وطبعا انا قلتلها ربنا يجبر بخاطرك يا ضنايا
وقعدت بقى تنفخ فى شخصي وتقولي لا لا انتى شكلك صغير مش معقول متجوزه وعند 3 عيال

اقولها اه يا اختي سنوني وجوزوني هههههههههههههههههههههههه

المهم اشتريت بتاعه كده بتتعلق فى العربيه بسبعه جنيه ونص حته واحده . تقولي طب خدي العلبه دي بقى على شكل قلب قلتلها بكام دي
قالتلي بخماشر جنيه . قلتلها لا يا ضنايا اخلصييييييييي طلعي الفاتوره

وشوفت هناك مناظر بقى اجارك الله جالي مغص وحسيت بان المراره بتاعتي بدأت تطلعلي من جديد

والاكاده يعنى ان كان فى هناك بنت ملزقه كده قعدت تاخد رايي فى البرفان الى بتنقيه للشخص المعني الى مش عارفه وضعه ايه حيث انها لا مخطوبه ولا متجوزه حسب تقرير عنيا الى رشقت فى اديها

وقاتلى انا بقى جاااااالي قطه هاهاهاها قطه بصحيح مش لعبه لا لا قالت اوته

وانا عماله ارد عليها تخيلوا كان شكلي ايه هههههههههههه

وتقولي ايه رايك كفايه كده ولا يبقوا قوليلين

قلتلها لو قطه بلدي كفايه كده ولو قطه سيامي هاتيله مع البرفان جزمه نيهاهاهاهاها

وقلت فى بالي ياااااااااله رزق الهبل على المجانين يلا خلي الناس تاكل عيش

ومن خلال هاذين اليومين الى انا حكيت لكم عليهم تقدروا تستنجوا ايه علاقة عيد الحب بالبتنجان المخلل ؟؟؟؟

هما الاثنين بيظهروا نفس العلامات على الخلق فى الشوارع علامات الهوبا استنجلينا

هيه هيه رجعت ا رغي تاني

اه بالنسبه لمناقشة القصه ان شاااااااء الله تعالى بعد كام يوم كده نبدأ نناقشها

لكن بعد البوست الجاااااااي فبراير شهر العظمااااااء

قلب ايمان ... العاشر والاخييييييييييييير

سلام عليكم يا حلوين
قبل ما نكمل القصه . تعليقات ومناقشات كتير دارت بينى وبين ناس كتير سواء هنا على المدونه او بره عن البوست الى فات .
وحقيقى متضاربه جدا فى الاتجاهات ومش قادره احدد الناس بتفكر ازاي او عايزين ايه
لا لا مش عايزين ايه مني فى القصه يعنى
لا ن انا هاكتب الى انا عايزه اقوله مش الى انتم عايزين تسمعوه برضه
اقصد الناس عايزين ايه من حايتهم ومن الدنيا دي وايه الى يريحهم فعلا او يسعدهم
نشوف بقى ايمان قطعت اشرف على كام كيس هههههههههههههههههههههههههه

********************************************************
اشرف بارتباك واضح : ايه دي ؟
ايمان وكلها حرقه وبكا وعصبيه واندفاع : انت عارف كويس ايه دي وياريت بلاش تاخد الدور ده عشان انا فتحتها وعرفت الى فيها صدفه وكنت فاكراها شريحتى القديمه عشان ما تقوليش بتفتشي ورايا .
اشرف : طيب طيب ممكن تهدي شويه عشان اعرف اتكلم .
ايمان : اشرف انا مش عارفه انت عايز تقول ايه بس كمان مش عارفه هاعرف اسمعك ولا لا
اشرف : طيب ادينى فرصه احكيلك الى حصل وبعدين ابقى احكمي بس ارجوكي اسمعينى للاخر .
ايمان وهى لسه بتعيط : ماشي يا اشرف هاسمعك بس لو حسيت انك بتكذب عليا مش هاكمل .
اشرف : عيب يا ايمان انا مش كداب .
ايمان : يا سلااااااام ؟؟؟؟؟؟؟؟؟؟ طيب اتفضل اتكلم .
اشرف عمل بنصيحة هاني صاحبه وقال من اول قلم واعترف على طول وبكل صدق وصراحه وقالها انه دي فتره وعدت وكان وقتها حاسس بانها مش معاه وانه وحيد والضغوط كانت حواليه كتير وكمان هو فعلا من يوم ما علاقتهم اتصلحت ببعض وهو كان خلاص بطل كل ده والحكايه كلها كانت لا تتعدى التليفونات والنت وكلام فى كلام و ..و....و.... المهم اشرف حس انه لاول مره بيتكلم مع ايمان بكل صراحه وحب وقرب وفى الاخر
اشرف : بصي يا ايمان صدقتى الى انا قلته او ما صدقتيهوش انا كده ارتحت انا كنت تعبان وكنت حاسس ان فى كابوس على قلبي . والى يرضيكى انا هاعمله بس لازم تعرفي انى قررت ما اعيش الدنيا فى تمثليله بعد كده . قررت اعيش الدنيا مش اتفرج عليها .
ايمان وهى هديت شويه : طيب لو كنت انا الى عملت كده كنت هاتسامحني .
اشرف بعد ما سكت شويه : مش عارف بس انا دلوقتي باتمنى تسامحينى عشان انا باحبك وعايز اكمل حياتي معاكي فعلا ونربي ولادنا واحنا بنحب بعض مش واحنا كارهين بعض او حتى عايشين وخلاص .
ايمان : بص يا اشرف انا بجد على اد ما انا زعلان اوي وتعبانه اوي الا انى حاسه انك اول مره تكون صريح معايا كده .
لكن برضه انا مش هاقدر فى دقيقه انسى واقول هيه خلاص سامحتك الا انى باجد اوعدك انى احاول بس على شرط ان احنا لازم سوا نحافظ على حياتنا وايدينا فى ايدين بعض ونسعى احنا الاثنين لده مش حد فينا لوحده .
اشرف : وانا ما قلتلكيش تنسي فى لحظه لكن انا يا ستى مقدما هابوس راسك واقولك حقك عليا يا اطيب قلب فى الدنيا .
واتكلموا برضه كتير اوي عن نفس الموضوع واشرف حاول يغير الموضوع بعدها ويتكلم لكن ايمان كانت مقفوله اوي
واشرف حاول يضيع الجو ده لكن ايمان ما قدرتش وطلبت منه يسيبها تنام مع نور النهارده .
اشرف : لا لا احنا كده هانكسر الاتفاقيات من اولها . عشان خاطري خليكى في سريرك وفى اوضتك .... وضحك وقالها يا ستى مش هاكلمك هاديكى ظهري . ولا اقولك ادينى ظهرك انتى اصل مش هايهون عليا انا .
ايمان من غير تعبيرات على وشها : حاضر هانام هنا .
وعدت الليله دي صعبه عليهم الاثنين وهى كان نفسها تعيط برضه مافيش فايده الحنفيات بتاعتها مسيبه عيطت شويه من غير ما اشرف يحس واشرف رغم الليله الصعبه والى امتدت للفجر الا انه كان راضي عن نفسه عشان حس انه فعلا شال حجر من على قلبه .
واتمنى فعلا ان العاصفه دي تعدي وكله وعود ونوايا من جواه انه هايستقيم ويحاول بكل جهده يسعد ايمان ويسعد نفسه كمان .

وقراره الى مش هايتنازل عنه انه يعيش الحياه ما يتفرجش عليها ولا يمثل انه عايشها .

وتاني يوم كانت ايمان برضه شكلها مش عاطي اي حاجه يمكن حزينه يمكن بارده يمكن مخنوقه يمكن كلهم مع بعض
واشرف بيحاول يكلمها كتير وهى نفسها ترد عليه لكن مش عارفه ترجع زي الاول وحاسه بخنقه على حلقها لما تحاول تتكلم او تضحك .

اشرف : ايه يا ايمان ما خلاص بقى عشان خاطري انا كده مش عارف اعمل ايه انا اتأسفتلك ولا انى كالعاده بتدوري على النكد .

ايمان: اشرف من فضلك انا قلتلك سبنى اروق لوحدي وبطل كلمة بتدوري على النكد مش معقول فى يوم وليله انسى كل حاجه وتيجى تلاقي ابتسامه عريضه . انت شايف الى حصل ما يستهلش ولا ايه .
اشرف : اه والله ما يستاهلش عشان خاطري فكي بقى حقك عليااااااااااااااااااااا . تحبي اعملك افلامانت وتقومي الصبح تلاقي سلالم العماره كلها ومكتبك مكتوب عليه باحبك يا ايمان وسامحينى يا ايمان عشان ابقى صيحتلك فى الدنيا كلها .
ايمان والابتسامه مخنوقه على وشها : خلاص ماشي والى يرجع فى كلامه .
اشرف : الي يرجع فى كلامه راااااااااجل طبعا . .................
ايمان : لا يا اشرف عشان خاطري بلاش كده........ وبحده اكبر ما ينفعش كده يا اشررررررررف .
اشرف : هو ايه الى ما ينفعش . وليه ما ينفعش
.............
ايمان : ارجوووووك يا اشرف سبنى لما اروق اكتر حاجه باكرهها الى انت بتعمله ده .
اشرف وهو اتنفض من مكانه : هو ايه ده يا ايمان الى بتكرهيه ؟؟؟؟ !!!!
ايمان بتبرير وصوت متررد : اقصد اننا نكون زعلانين وانت مش عارفه بتهيئلك ان بكده بتنهي المشكله .
وبحده اكتر تكمل :مع ان ده بيضايقنى جدا وبيخنقنى جدا جد ا .لا وبيخلينى اقرف من نفسي كمان .

وهنا تتفتح الحنفيات تااااااااني مش عارفه ليه مش بتشوف حل للمحابس بتاعتها .
لكن اشرف هايكون عاقل النهارده وهايسمع منها برضه ويهديها ويقولها مش هايضايقها تاني وانه ما كانش يعرف ان ده بيضايقها فعلا وانه كان فعلا بيقصد يصالحها
وخصوصا ان ايمان لاول مره برضه اتكلمت مع اشرف بصراحه كبيره .
وبعد كام يوم كانت بدأت ايمان فعلا تنسى شويه وتفك شويه لكن برضه لسه حاسه ان فى حاجز مش عارفه تغلبه وأشرف كان حاسس بده
فقال لا انا لازم اعمل حاجه بقى
وفكر اشرف كتير لا لا مش كتير اوي
وبعدين تاني يوم وبعد شويه ترتيبات ومباحثات مع وسام اخته . اتصل على ايمان فى الشغل
وقالها اشرف : ايمان ما تعديش تاخدي العيال من الحضانه .
ايمان باستغراب : ليه فى ايه ؟؟
اشرف : ابدا مافيش حاجه وسام اختي اتصلت وقالت انها رايحه النادي وعايز الولاد معاها عشان يلعبوا مع ولادها وكده وانا قلتلها تاخده فى مشكله ولا حاجه ؟؟؟
ايمان : لا مافيش حاجه عادي طب هايرجعوا مته ؟؟
اشرف : لا احنا هانروح ناخدهم اخر النهار .

ايمان : طيب ماشي .

وترجع ايمان البيت فى معادها تلاقي الباب مش مقفول بالمفتاح تستغرب وتدخل بسرعه تشوف الشقه وتقول اشرف نسي يقفل ولا ايه
وتلاقي اشرف قدامها فجأه ولابس بدله ومتشيك اويييييي وعلى وشه ابتسامه عريضه وودوده
وبعد ما اتخضت ايمان وكانت هتاخده بوكس فى وشه على اعتبار انه حرامي فى الشقه

ايمان : ايه ده فى ايه ؟؟؟!!!!

اشرف وهو بيضحك عشان يطمنها : مافيش حاجه ايه فى ايه ؟؟؟!!!

ايمان : انت رايح فين وايه الى جابك من الشغل بدري فى ايه ؟؟؟!!!

اشرف : مافيش حاجه تعالى بس اقعدي .

وتقعد ايمان وهى مستغربه من الجو كله وبعدين اشرف يروح جنبها وما تعرفش منين طلع بوكيه الورد الجميل الرقيق ده وطلع من بينه علبه صغيره وفتحها فيها دبلتين

وقالها أشرف وهو بيبربش بقى ويسنسن : تقبلي تتجوزينى ؟؟؟

ايمان وهى بتضحك وتعيط فى نفس الوقت: ممكن افكر ؟؟؟

اشرف وهو بيستربع ويقعد على الارض : طيب اوك فكري بسرعه مافيش وقت عشان انا حواليا كتير .

ايمان وهى الحنفيات بتاعتها اتفحت على الاخر وبتضحك فى نفس ذات الوقت : بقى كده طيب روحلهم .

اشرف وهو بيقوم جري : لا يا جميل اروح لمين بس واسيب قطتي . انا قاعد على بابك هنا لحد ما تقولي رايداه والنبي رايداه .

ويطلع فجأه الموبايل الى كانت ايمان نفسها فيه وفلوسه اتصرفت يوم الحته الروز .فاكرين ؟؟

ويقولها : طب كده ممكن توافقي ؟

ايمان باستغراب : ايه ده ؟؟

اشرف : ده عشان العروسه بس لما توافق .

ايمان: يا سلام طب مش موافقه.

اشرف : لا هاتوافقي .طب ده عشان روحي وقلبي وعمري .

ايمان : لا برضه هافكر

اشرف: الله مين قالك انه ليكى هو انتى روحي وقلبي وعقلي

فأخد خبطه تمام على كتفه

فاستردك قائلا : لا يعنى انتى روحي وقلبي وعقلي وعنيه وفشتي وكل حاجه

هاااااااا هاتقولي ولا لا

ايمان: اقول ايه بقى ما وافقت والى كان كان .

اشرف : لا تقولي رايده والنبى رايداه .

ايمان وهى برضه بتعيط وبتضحك وتستخبى فى حضن اشرف : خلاص رايداه والنبى رايداه .
.............................................

اشرف : طب ينفع بقى ولا اروح اجيب المأذون الاول ؟؟؟!!!!!

واخد نفس الخبطه الى فاتت بس حنينه شويه

بس خلاص
وتوته توته خلصت الحدوته حلوه ولا ملتوته
******************************************************************

نحيطكم علما ان بعد البوست ده ما يخلص الكلام عنه هانعمل ان شاء الله بوست اتكلم انا فيه عن القصه وكلام كتير اوي عايزه اقوله عنها من خلال تعليقاتكم عليها
وكمان عايزه اسمع منكم كلام كتير يلا بقى الى اللقاء وكل قصه وانتم طيبين

تدوينه سوداء... تضامنا مع اهل فلسطين

حدادا على ضحايا غزه وتضامنا مع اهل فلسطين

شارك فى يوم التدوينه السوداء من فضلك

من يشري نفسه ..... صهيب بن الرومي .....فى الرؤيه الاسلاميه

من يشري نفسه ... صهيب بن الرومي

موضوع الرؤيه الجديد

شرفونا يا حلوين

قلب ايمان..... التاسع

معلش يا جماعه على التاخير فى الجزء بس حقيقى ما كانش ليا اي نفس اكتب كل يوم بافتح المدونه واقعد قدامها متنحه تماما مش عارفه ليه

ما علينا خلينا نشوف ايمان عملت ايه

**************************

ايمان احتارت قوي وقلبت فى الارقام الى على الشريحه والاسماء الغريبه والى اغلبها زي ما تكون اسامي دلع لبنات وكانت هاتتجنن ومش عارفه تعمل ايه ودموعها نازله على خدودها تجري وهى يمكن مش حاسه وما زالت عنيها مبرقه ومذهوله .

والف سؤال جه على بالها والف ظن والشيطان لعب بعقها كتير اوي

يا ترى الشريحه دي بتاعة اشرف فعلا ؟؟؟ طب ليه ؟؟

يا ترى مين البنات ولا الستات دول وعرفهم منين ؟؟؟ وانا كنت فين ؟؟؟

والعلاقه بينهم وصلت لحد فين ؟؟

وانا الى غلطانه ولا هو ؟؟؟

طب اعمل ايه ؟؟؟

اقوله انى لقيت الشريحه ؟؟؟ اقوله مين دول ؟؟؟

اسأله يمكن الشريحه دي مش بتاعته ؟؟؟......... هاتضحكي على نفسك ؟؟

طب اعمل ايييييه ؟

وتبكي ايمان بحرقه وحيره ونار فى قلبها الى ما صدقت يا دوب انه دفي بحب اتمنته.

وبعدين بعد ما فكرت بسرعه قبل ما اشرف يجى قررت تأجل القرار لما تهدا وعليه شالت الشريحه وخبتها وغسلت وشها وحاولت تداري ولما جه اشرف

اشرف : مالك يا ايمان ؟؟ شكلك متغيره

ايمان: ابدا يا اشرف مافيش حاجه

اشرف : لا انتى شكلك معيطه مالك فى ايه ؟؟؟ ماما تعبانه ولا حاجه ؟؟

ايمان : لا ابدا بس اتعصبت شويه من العيال ومخنوقه كده من ساعتها .

وغصب عنها نزلت الدموع من عنيها

اشرف وهو بياخدها فى حضنه : طيب ليه كده يا حبيبتى مش بالراحه على نفسك .

ايمان وهى بتمسح دموعها وبتنسحب من حضنه : دلوقتي هابقى كويسه ... أنا هاروح انيم نور .

اشرف باستغراب : طيب ماشي يا حبيبتى بس روقي كده .

ايمان راحت نيمت الولاد وطول ما هى معاهم وهى بتبكي جامد اوي من غير صوت وبتفكر ومش عارفه تفكر .

واشرف بعد شويه لما حس الولاد ناموا راح ينده عليها عشان تقوم تنام مكانها ايمان كانت صاحيه بس ما ردتش عليه وكتمت صوت نفسها وبكاها لحد ماهو فكرها نامت ومشي

اشرف استغرب من كل الموقف وقعد يفكر كتير وحاسس ان فى حاجه غريبه .

وعدت الليله تقيله على ايمان حتى لما نامت حلمت احلام سخيفه واشرف كمان ما نامش الا الفجر من حيرته

والصبح

اشرف وهو بيلبس : ايماااااااان فين البنطلون الكحلي بتاعي ؟؟

ايمان بترد من خلال بوز طوله مترين : غسلته خد غيره من الدولاب .

اشرف بفزع : طب شلتي الاوراق الى كانت فى الجيوب ؟؟

ايمان : ايوه عندك على التسريحه زي العاده .

اشرف لبس وراح ياخد حاجته وبعدين وهو بيلم فى الحاجه قعد يدور على حاجه فى المحفظه مش لاقيها وقلب المحفظه

وايمان شافته وطنشت وعملت مش واخده بالها ونزلت على شغلها

واشرف اخد الولاد النهارده وداهم وراح على مكتبه طلب قهوه وقعد يدورفى درج المكتب ويقول فى باله : يادي النيله السوده تكون شبورة النكد بتاعة امبارح دي وراها الشريحه المقندله بتاعتي ؟؟؟

والله باين كده ... دى تبقى مصيبه .... يارب ما يكونش كده والله يارب انا كنت تبت وانت عالم وبقالي شهر اهو ماحطيتهاش حتى فى الموبايل

ايه بس الى خلاني ما رمتهاش ولا حتى ولعت فيها .

عموما هايبااااان كل حاجه

*****************

ايمان فى التليفون: ايوه يا داليا انتى وراكي حاجه بالليل ؟

داليا : استر  يارب مالك ؟؟؟

ايمان : مافيش هاجيلك عايزه اتكلم معاكي شويه .

داليا : طيب هاروح كده واشوف الظروف والجوابات عشان افضيلك الجو واقولك فى التليفون.

ايمان : ماشي لو مش هاينفع اجي انا تعالى انتى

داليا بجديه وقلق تساوي صوت ايمان الحزين المكسور : حاضر يا ايمان عنيه

وفى البيت عند ايمان فضلت ايمان برضه حزينه وبتحاشى الكلام مع اشرف واشرف قلقان وسألها تاني وتالث ايه مضايقها وهى بتقول  مافيش وقلقه هو يزيد

وباليل راحت عند داليا واشرف راح لاصحابه وهايبقى يرجع ياخدها

داليا : تعالى يا بنتى نقعد انت قلقتينى خالص

ايمان : انا مخنوقه خالص يا داليا ومش عارفه اعمل ايه

وانفجرت فى البكا

وداليا: لا حول ولا قوة الا بالله فى ايه يا بنتى بقى انتى  ما بتلحقيش

ايمان قالت لداليا على موضوع الشريحه وعلى كل ما دار بعقلها وداليا سمعتها كتير

وفى الاخر :

ايمان: انا محتاره مش عارفه اعمل ايه

داليا : اقولك الحق انا كمان محتاره

بس بصي انتى لو اتكلمتي معاه فى الموضوع ده انا شايفه  انها هايكبر

خصوصا انك بتقولي الرسايل كلها كلام تعبان يعنى ما تدلش برضه على ان فى حاجه خطيره يعنى

يعنى هاتلاقيه كله كلام فارغ وسنسنه على الهوا

ايمان: يعنى ايه اعديها كده بكل بساطه؟؟

داليا : لا طبعا ما قلتش كده بس لازم تاخدي بالك بقى وتعرفي ان كان لسه مستمرفى الوضع ده ولا لا

وكمان ما تنسيش ان كان فى فتره ما بينكم العلاقات كانت وحشه ويمكن ضعف وانتى عارفه ان ده ممممممممكن

ايمان بحده : داليا ارجوكي لو كنتى تقصدي موضوع محمود انا ما كانش فى بينى وبينه اي حاجه وانتى عارفاني كويس وانا اصلا صديته يعنى وخلصت الحكايه

داليا: طب بس اهدي طيب ما يمكن كمان جوزك خلصت الحكايه مش يمكن ؟؟؟

حتى انتى نفسك بقيتى تقولي انه ما بقاش يقعد كتير على النت لوحده ولا يخرج كتير مع اصحابه

ايمان بتحاول تهدى: طيب يعنى انا ازاي  اقدر اعديها كده مش عارفه وابص فى وشه ازاي

داليا وهى بتحاول تكسر حدة المناقشه: يا ستى البس نظاره شمس وبصي

ايمان : لا ما تهزريش بجد ماليش مزاج

داليا: والله يا بنتى هاتعدي وهاتنسي بس انتى حاولي تسامحيه وتنسي وفى نفس الوقت خدي بالك بقى من غير ما تحسسيه انك شاكه فيه  طبعا لحد ما تشوفي هايحصل ايه

ايمان: والله ما انا عارفه يا دالي بس هاحاول  خصوصا انك عندك حق انا نفسي كان ممكن اضعف زيه بس برضه انا ما عملتش زيييييييه. 

داليا : معلش ما تدبحيش من اول  غلطه يا ايمان اصبري لما نعرف الحكايه ايه

***********************

اشرف مع اصحابه مبوز وشارد ومحتار

اسامه : ايه يا  ابنى مالك متنح وشكلك مضروب كده ليه؟؟ هو كان بورده ولا بصباع ؟؟؟

اشرف: بس يا هاني مش ناقصه رواقتك  يا ابنى خلينالك الورد والصوابع .

هاني وهو بيضحك: لا وحياتك الحكايه شكلها اتقفشت يا حلو .يارب تكون اتقفشت عشان تبطل هبل

اشرف: بس يا انت كمان لا ما اتقفشتش و هي دي المصيبه.

اسامه: ازاي يعنى مش فهمك انت عايز تتقفش ولا ايه نفسك هفاك على ابو ورده يعنى.

اشرف:كن يا ابنى ابو ورده ده لامثالك 

..... انا شاكك  انها عارفه حاجه من امبارح فوق انى مش لاقي الشريحه اياها بتاعتي

هاني: طب ما تسألها عليها .

اشرف: انت عبيط يا ابنى ما يمكن اتنيلت الشريحه دي وقعت فى اي مكان اقولها واجيب لنفسي الكلام وامته بعد اصلا ما ا نا خلاص قطعت علاقتي بهم كلهم وما حطيتش الشريحه دي من شهر وزياده؟؟؟؟

اسامه: طول عمرك فقري يا اشرف هاتروح فى ابو نكله على مافيش وكمان بطلت المفيش نفسه.

هاني: طب ما هو ده سبب أدعى انك تقولها اصلا .قولها وقولها انك خلاص تبت وانبت

.

اشرف: لا مش عارف قلقان .المهم يا اخي ان الفتره الى فاتت دي كانت الدنيا بيس خالص بينا والمشاكل تكاد تكون انعدمت .

هاني: معلش قدر الله وما شاء فعل .وبعدين عشان تبطل الهبل الى كنت بتعمله كان جايلك ايه من السهوكه فى التليفونات والنت يعنى.وعمال تستخبى وتكذب وعامل مواويل حواليك.

اشرف:والله انا ندمت فعلا وحسيت انى باتعذب بكذبي على  مراتي وعلى الناس الى باكلمهم برضه بس كان غصب  عني وخلااااااص قلنا بطلت ما تقعدش تأنب فيا يا عم هاني بقى.

اسامه: ياعم ولا تقول ولا بتاع هى لو عرفت هاطين عيشتك وتبقى ايام سوده وانت طرقعلها وهى تسكت وتنسى بعد شويه وخلاص

هاني لاسامه: بس يا جدع انت خليك محضر خير لتقل خيرا او لتصمت....

ولاشرف ما تسمعش كلام الواد ده يا ابنى كان نفع نفسه  مراته سايبه البيت بقالها اسبوعين .

اشرف وهو بيضحك: لا ما انا عارف انه مهياص وبؤ على الفاضي .

اسامه وهو بيهزر : كده طيب يا امور انت وهو ادينى ساكت البس فى  اول جدار بقى انت وهو

هاني: ايووه اسكت احسن....

ويبص لاشرف: بص يا ا بنى حتى لو حصل وقالتلك هى او انت الى اعترفت ما تكابرش اول ما تتزنق قول من اول قلم هههههههههههههه

اشرف: حلو ا وي شكلي انا التسالي بتاعتكم النهارده

هاني: استنى بس بجد اول ما تلاقي نفسك اتزنقت اقر بذنبك وقولها الحقيقه الصدق منجي .وانت مراتك طيبه يعنى هاتسامحك ما تقلقش

اشرف: اه يا اخويا طيبه اوي بس مجنونه وعصبيه اوي والحمد لله.

اسامه ميت من الضحك : مش  انا قلتلك عندها شبشب بورده ؟؟؟

اشرف : ثانيه واحده اطرقعلك انا بابو رباط ياض .

هاني: بس اسمع بجد يا اشرف الستات عقلهم صغير كلمتين حلوين على هديه على فسحه حلوه هاتنسى وبعدين انت فعلا بطلت الهبل ده واستقمت وهى لو انت صادق هاتصدقك .

اشرف : ماشي بس انا مش هاقول برضه انا حاجه لو هى قالت ماشي .

هاني: وما تنساش انك فعلا غلطان فى حقها وفى حق نفسك يعنى ترضيها .ورفقا بالقوارير يا اخي

اشرف: صدق رسول الله ماشي . ربنا يعمل الى فيه الخير .

اسامه: طب اتكلم بقى ؟؟؟!!

اشرف وهاني فى نفس واحد بغيظ منه : لااااااااا

*************************

وفى  البيت وبعد ما خلصت  الليله كلها وايمان دخلت تنيم نور

اشرف بجديه وحنيه فى نفس الوقت: ايمان ما تناميش جوه انا عايزك .

ايمان من خلال نفس البوز: حاضر هاحاول.

اشرف بابتسامه حلوه: مافيش تحاولي هاجي اشيلك هيله بيله من هناك لو نمتي .

ايمان بتحاول ترد الابتسامه: ماشي ابقى شيل .

ايمان نيمت نور وخدت وصلة العياط بتاعتها وقامت بعدها مسحت وشها وراحت لاشرف

ايمان: خير يا اشرف فى ايه .

اشرف وهو بيشدها من ايدها تقعد جنبه : انتى الى في ايه مالك

ايمان: مافيش مضايقه شويه كده ومخنوقه .

اشرف: كده من غير سبب ما هو  لازم في حاجه .

ايمان: لا مافيش سبب مخنوقه لوحدي كده

اشرف بحنيه: على  انا برضه ليه هو انا لسه هاعرف ايمان النهارده

ايمان وهى بتحاول تمنع نفسها من العياط: قلتلك مافيش حاجه يااشرف انا هاروق لوحدي 

وما قدرتش تمسك نفسها وفتحت  الحنفيات على اخرها وهاتك يا عياط 

اشرف: اه لا باين انه مافيش حاجه تعالى يا هبله 

وياخدها فى حضنه ويقولها: طيب خلصي الوصله بتاعتك بقى عشان نعرف نتكلم .

ايمان من بين العياط  وبحده شويه: لا مش عايزه اتكلم .

 اشرف: طب انا زعلتك فى حاجه .

ايمان تعيط اكتر ومش بتتكلم

اشرف بعصبيه شويه: الله فى ايه يا بنتى ما تنطقي .

ايمان وهى بتتنفض بره حضنه وبتمد ايدها فى درج الكومودينو : فى ديييييي

خلاص ارتحت  كده

يتبع ............