الخميس، 26 فبراير، 2009

مناقشة قلب ايمان 2

السلام عليكم
وحشتوني مع ان ماليش نفس لكم بصراحه
ايوه ايوه صدقوا
نفسي مقفوله من البلوج كله بقالي كام يوم
صحيح بافتحه واتابع المدونات
بس قرفااااانه على الاخر ونفسي اولع في البلوج كله
ما علييييييييينا
نكمل بقى مناقشة قلب ايمان عشان نخلصها ان شاء الله نشوف الى ورانا 
عشان عندي كلام كتير واقف فى زوري عايزه اقوله 
 احنا كنا ناقشنا المره الى فاتت لحد الجزء الخامس
ان شاء الله المره دي نكمل 
كان كله تقريبا عن احتفال ايمان بعيد خطوبتها والى خلته سبب لانه يكون واقفه فى حياتها مع اشرف وبدايه للتغير 
فى كذا نقطه هنا فى البوست ده
اولا مافيش فيها اي حاجه ابدا مهما مرت السنين وضاعت الفرص انك تراعي شريك حياتك وتفكر فى اسعاده وتعمله مفجأه وتحتفل معاه بذكرى  حلوه
واوعى اوعى تصد برضه شريك حياتك لو لقيته بيقرب لان ممكن الصد ده يبعدك عنه اميال واميال
حتى لو كانت نفسك مقفلوه منه على الاقل ادي لنفسك فرصه انك تفكر هاتعمل ايه مش لازم لو لقيته بياخد خطوه تاخد  انت اثنين يا سيدى خد نص خطوه لحد ما تفكر هاتعمل ايه 
ثانيا: مافيش مانع ابدا من استشارة الصديق او الام او الاب وسماع نصيحتهم بس
فى حدود المعقول واحنا مشغلين عقلنا مش مغمينه لو لاحظتم هاتلاقوني باقول ان ايمان عملت حاجات من نفسها مش كله من دماغ داليا  ولو انه مش عيب ابدا
بس المهم نلاقي العقل الحكيم المخلص فعلا الى نقدر نفتح لنا قلبه ونثق فى كلامه
مش مهم اننا نقول 
لكن مهم هانقول ايه ولمين وازاي
 نيجى بعد كده للجزء السابع
والى كان فى صوره للتفاهم بس في وقت هما فيه علاقتهم حلوه ببعض
وشوفنا شويه تنازل من ايمان على شوية تنازل من اشرف مشيت المراكب
ولازم تعرفوا ان كل حاجه تزيد عن الحد المعقول غلط
يعنى حلو تدلعي جوزك وما تخليهوش يعمل حاجه فى البيت
لكن كمان مش على طول وفوق طاقتك وعوديه ان من حقك تدلعي عليه برضه
احلى شعور ممكن يحسه الراجل هو ان مراته محتاجله دايما
تاني حاجه باكد عليها
من حق كل واحد انه ينبسط
لكن كمان لازم تعرفوا ان الاسره دي اساسااا كائن واحد من حقها برضه الاسره كلها انهم ينبسطوا مع بعض
خلي فسحكم اولا مع اسرتكم وبعد كده ابقوا اتفسحوا على كيفكم
بعد ما اتصلحت الحياه بينهم بنشوف بقى تراجع هايبدا تاني لان فى اخطاء ما كانوش واخدين بالهم منها
اهمها الي انا ابرزته فى الجزء ده هو الكلام
يعنى بكل بساطه كل واحد يقول على الى مضايقه والى بيوجعه والى بيتعبه
يقوم الطرف التاني بدل ما يتضايق منه ويقرف منه بالعكس يعذره ويصعب عليه ويحاول يساعده ويحاول ما يضايقوش
والكلام ده عموما فى كل حاجه بينهم ولا سيما طبعا العلاقه الخاصه والى اساسا فيها مشكله دايما مابين الازواج وبتكون سبب المشكله فى الاعم الاغلب ان مافيش بينهم كلام ولا تواصل ولا صراحه مهما ادعوا ذلك
الخيانه
خيانه احد الطرفين ازاي ممكن نقابلها وازاي ممكن نعالجها
من غير ما نهد البيت على دماغنا
وما نبقاش عاملين زي شمشون الى هد المعبد على الكل بما فيهم نفسه
وامته نغفر الخيانه وامته لا
وبالنسبه للطرف الخاين لو كان تاب فعلا
لازم يصبر  على شريكه عشان يقدر يتعايش مع نفسه ومعاه وخطاه ده
***********************
المهم هى فى النهايه مش حرب ياريت بس ناكد على  الموضوع ده
وكمان مش لعبه  لا دي جد وجد اوي
صدقوني الحكايه مش محتاج مجهود اد ما هى محتاجه اخلاص وايثار
وشكرا لكم
وحاسه انى دمي تقيل ومودي وحش خالص معلش بقى استحملوني

هناك 38 تعليقًا:

ahmed_k يقول...

واضح أن الموضوع كبير
والمناقشه محتدمه
وبصراحه مش لاقي كلام يغطي الموضوع هههه

صبرني يارب يقول...

ههههههههههههههههههههه

ماشي يا استاذنا معلش بقى نزلت الموضوع فاضي خطأ فني بس مليته اهو ولا يهمك
هههههههههههههههههه

ستيته حسب الله الحمش يقول...

تزهقي من البلوج ليه ياابلتي وهو زنبه ايه

هو مش طول ما احنا عايشين بنتعلم؟
"معاتبة السفيه اجتنابه ياحلوة"

عاجبني التحليل واصلا لو قلت فيه مش ها اقول اكتر من اللي قلتيه

نجدد حبنا

الراجل مش مخلوق عايش معانا زي كائنات الفضاء اخدمه من الابرة للصاروخ .. انا كمان بني ادم ولازمن احس بغلاوتي

اجدع ست هي اللي تعرف تجيب جوزها قبل ما ياخده الوبا

الحياة تكشف ذكائنا أو غباءنا امام انفسنا قبل الآخرين

مبحبش ان صحبتي تدخل جوات جوات بيتي .. مونكن انا اللي تكون شخصيتي متحفظة واللي متعرفش تتنيل تسأل والسوق فيه كل الأمثلة والتجارب اللي تعلم الجاهل .. بس الغبي تعلميه ازااااااااااي؟

خيانة الزوج مكنتش قاتلة علشان كده الست قدرت تتحمل وهو كمان مش بجح ولا قاوح وده بيخلي السماح اقرب من الخلع

كلك على بعضك حلو والأحلى العقل اللي في نوفوخك

بحبك قوي

صبرني يارب يقول...

ستوووووته حياتي

وانا كمان باحبك والله

انا كمان ما احبش ادخل حد فى حياتي لكن ان وجدت مشكله لازم ادور على الحل بضوافري


تحياتي لكى يا جميل

احساس طفلة محبة للرومانسية بس واقعية يقول...

الاول لية زهقتى من البلوج بس
دا حتى البلوج والناس اللى فية بتحبك
:)
نيجى للتحليل بقى بصى انا من الجزء السادس دا عجبنى الموضوع والقصة اكتر من الاجزاء الاولى
زى ما تقولى انا كنت مستنياه ايمان تأخد وقفة مع نفسها من بدرى
لانى مش بحب يكون فى حاجة فى نفس الشريك من شريك حياتة
وكمان لازم يكون فى حوار بينهم مش كل واحد يكون فى حياة غير حياة التانى
ولازم يحسوا ببعض ويساعدو بعض
وضايقنى حكاية خيانة اشرف كتير ومكنتش متخيلة ان ايمان تنساها بسرعة
بس برضو اشرف عرف يتصرف صح واعترف بخطئة واعتذر بشكل جميل

تسلم ايدك يا صبرنى واتمنى متغبيش تانى عن البلوج ونفسك تتفتح لية

تقبلى مرورى

عمرو يقول...

بجد و الله ضحكت من قلبى :)))
فيه أيه يا أم خالد مالك النهارده عماله تهيسى ليه ؟؟ لعل الدافع خير :))
فيه بس نقطه أحب أتكلم فيها و هى عدم صد الطرف الأول للطرف التانى لو أراد التقرب منه بعد هبه كده من المشاكل
يا أم خالد البنى آدم مننا مش بزراير يدوس على ده يغضب و يدوس على ده يصفى يعنى الحكايه محتاجه شوية وقت برضو و شىء من اٍبداء حسن النيه حتى تصفو النفوس
و المطلوب دائما هو أن يظل الباب متوارب للصلح و أن يتحكم كل طرف فى أعصابه حتى لا يفقدها و يغلط فى شريكه بما لا ينصلح أبدا أو على الأقل يكون من الصعب اٍصلاحه
و ربنا يهدى الجميع يا رب و يكفيهم شر النكد و الذهاب للمأذون مرتين و أحيانا تلاته

صبرني يارب يقول...

احساس طفله

حبيبتى والله وانا باحب الناس كلها

بس معلش انا مضايقه شويه

وبالنسبه للقصه تمام كلامك وتسلمى يارب وتنوري دايما

صبرني يارب يقول...

استاذ عمرو

اها شوفت بقى التهييس ده ههههههههههههههههههه

ده انا اضحك عليا ضحك هنا يلا حصل خير صحيح

وبالنسبه لكلام حضرتك عن القصه

مين قالك ان احنا مش بزراير ؟؟؟

لا طبعا بزراير وزراير كتيييير المهم نعرف استخدام كل زرار ونستخدمه فى الوقت الصح

وطبعا طبعا لما يكون فى غلطه من احد الاطراف سببت جرح للطرف التاني لازم طبعا الطرف المخطيء يكون حصيف ويقدر نفسية الشريك ويصبر عليه قدر استطاعته

وبالنسبه للمأذون ياما ناس واخده السكه رايح جاي عادي
ربنا يهدي يارب

تحياتي لحضرتك ونورت

ahmed_k يقول...

فعلا أصعب شيئ في العلاقه الزوجيه هي الخيانه
بس الخيانه أنواع منها ما هو يمكن أن يغفر ومنها ما هو لا يمكن أن نتسامح فيه
وخطأ أشرف كان في بداياته وكان ممكن التسامح فيه وهو عين العقل واللي ساعدة إيمان فيه داليا صديقتها
وأما بالنسبه لتدخل الأصدقاء فده لازم يكون بحساب يعني التخير منهم الصالحين العقلاء
أي من لا يستغلون الموضوع لغرض شخصي
أو الموثوق فيهم
فقد يدل الشخص اللي خارج المشكله صديقه الذي لديه المشكله على التصرف السليم الذي لا يراه من الفكر وتوهانه

في الختام القصه كانت جميله
أحييكي عليها

دمتي بكل خير

قوس قزح يقول...

ايه مالك كده عاملة زى زعبيب امشير
بقولك ايه روقى كده عندى لكى اكلة حكاية
هبقى اكلمك اشوف ايه حكاية هولع فيكم دى

و ان كان على قلب ايمان انى مكنتيش محتاجة تفسرى قصدك و اهدافك من القصة
لان كل لبيب بالاشارة و اللى مش لبيب مهما قولتى مش هيفهم و هيفضل الحال كما هو عليه

مخمخى و عايزين قصة جديدة
يلا سلام موبايلات بقى

شمس النهار يقول...

في ايه ايه الحكايه اتحسدتي والا ايه
يا صبرني
وبعدين عايزه تولعي في البلوجر كله كده هتولعي في حبيبك
ولما تولعي في البلوجر هنكد احنا علي الرجاله ازاي بقا
روق روق ياجميل كده

Sweet Violet يقول...

مالك ياجميلة ؟؟ بلوجر عملك ايه بس و انا اقطعه

روقى كده ياقمر .. ده انتى حتى كاتبه قصه بجد عجبانى جدااا لدرجه انى اتناقشت فيها مع اصحابى . رغم انى اتصدمت من النقاش لان الواقع كان صعب )):

نيجى للبوست

زى ماانتى قولتى فى خيانه ممكن نسامح فيها و فى خيانه ماينفعش التسامح فيها

لكن بردو ده بيكون متوقف على الشريك يعنى اشرف اعترف بالخطأ و اتصرف صح

لكن فى بقى اللى اصلا بيرمى الغلط على الزوجه و مابيعترفش بغلطه

اما بقى تدخل اصحاب او اهل حتى فده انا الصراحه مابحبهوش وجود طرف تالت فى العلاقه عامه بيبقى مش كويس فى بعض الحالات

لكن لو تطلب الامر فعلا للدخول و اخد النصيحه .. يبقى من شخص موثوق فيه و بيقول نصيحته لوجه الله مش علشان مصلحه ليه

و اعتقد لتجنب برود العلاقه من الاساس اللى ممكن يوصل لخيانه احد الاطراف .. لازم يكون فى لغه حوار مابينهم من الاول

تحياتى ياجميلة و يارب موضوع الخنقه من بلوجر دى تروح بسرعه

(:

صبرني يارب يقول...

احمد كيه

الله يكرمك يا استاذنا


احب هنا يا جودعان اشاور وااكد على كلام استاذ احمد

الى بيقول ان خيانة اشرف كانت سهله وبسيطه وفى بدايتها


شايفين الناس هنا بتقول ايه على اشرف ؟؟؟

فى حين انهم ساكين السكاكين على ايمان رغم ان غلطها كانت مجرد تفكير بس ما دخلش حيز التنفيذ زي ما عمل اشرف


مجتمع محكمته عوجه

صبرني يارب يقول...

قوس قزح

زعابيب امشير مبهدلانا يا اختي عندي الجو برد موووووووت وبتمطر تلج والجو ملبش خالص والله

والله يا دولي بجد قرفانه

وماعادش حد لبيب يا دولي انا كان بيجيلى تعليقات على الاميل تنقط

والقصه الجديده يا حبي لسه شويه بقى على ما امخمخ لها جامد اصل هاتبقى صعبه عليا عن دي

وتصدقي بالله
انا كنت هاكلمك ساعة صلاة الجمعه وروحت لحد التليفون وبعدين قلت خليها شويه تكون بتصلي ولا حاجه
بس طبعا تهت فى الطريق بقى بعدها انتى عارفه

صبرني يارب يقول...

شموسه

معلش كان مزاجي وحش اوي وانا باكتب البوست ومضايقه من حاجات كتير شوفتها على البلوج وقرفانه على الاخر


سوري يا جميل ما عاش ولا كان الي يولع فى الناس الحلوين

بس ده ما يمنعش انى هاعمل محرقه فى اخر البلوج كده ارمي فيها الناس الى تستاهل الحرق ههههههههههههههههههههههههههههه
ولا اقولك خليهم يتحرقوا فوق بقى بيد من لا يغفل ولا ينام

صبرني يارب يقول...

سويت يا جميله

اه يا بت سويت دي احلى من ضد برضه هههههههههههههههه

معلش يا كوكي هابقى اقولك على الحته الى بتوجعني فى البلوك نقطعها سوا هههههههههههههههههه

وتسلمى على كلامك عن القصه

واكدي على اصحابك ان القصه فى منتهى الواقعيه بس هما الى مش فاهمين الدنيا صح

abdo يقول...

السلام عليكم
تعليق حضرتك على القصة كان جميل جدا وانها فعلا تحمل أهداف كتير قوى
ومش بس مجرد قصة للتسلية
وانا فعلا لما كنت بتابعها لم يكن الهدف بالنسبة لى انى أتسلى ولكن انى اتعلم من المواقف فعلا وجزاكم الله خيرا وانا كان لى تعليق كان نفسى أبعته لحضرتك على الايميل من بداية القصة على مجرى الاحداث ولكن الايميل مش موجود
وعامة القصة رائعة
بس لو حضرتك أضفتى لمسة دينية صغيرة جدا فى وسط الاحداث دى كانت ممكن تكون طريقة جميلة قوى للدعوة للناس وتأكد على الناس انها متنساش الجانب الدينى
يعنى مثلا تصحية يقوموا يصلو مع بعض مرة هينزلو ا مع بعض يبقى ينزلوا بعض صلاة وقت محدد بحيث الناس تبقى عارفة ان ده الطبيعى انا مش قصدى اقلل من شان القصة لأ خالص والله هى فعلا أعجبتنى جدا كلها بس كان يبقى زيادة الخير خيرين
واعتذر عن الإطالة

بنت الغربة يقول...

حبيبتى ياصبرنى
انا عارفه انت مخنوقه ليه وموضوع الخيانه ده موضوع كبييير قوى بس صدقينى مش اى واحده تتقبله...
فى ستات اعرفهم ممكن قوى تسامح جوزها بسبب خيانته لو كتبلها عمارة مثلا او حساب فى البنك...وفى نوعيه انا منها اللى يهمها مشاعر الانسان اللى عايشه معاه...وولادها اهم حاجه عندها..صعب تعيش مع واحد خااين..لان العمر صغير قوى علشان نقضيه فى شك وعذاب..وليه اصلا واحد بيحب واحده ...يعيش مع واحده تانيه...خليه شجاع ويخير اللى عايش معاها ...ياتقعد ياتمشى ..من غير انانيه من الطرفين....والموضوع ينتهى بهدوء من غير مالاولاد يتحملوا هفواات الاابااء....
انا الموضوع ده مضايقنى اكتر منك ...بس زى ماقالت ستيته ...الواحد دايما بيتعلم من الحياة...والجمد لله على كل الاحوال..
وربنا يهدى ويجازى اللى كان السبب فى خراب اى بيت ...
فاكره لمل قلتلك ان قصة ايمان دى بتفكرنى بقصه حلت لواحده اعرفها فى دبى ....بس دى لاأسف مانتهتش نهايه سعيده زى نهاية ايمان ...لالالالالالا
دى بكل بساطه اتطلقت من جوزها ...وسابيتله 3 اولاد بمزاجها ...وراحت اتجوزت اللى بتحبه..وبعد سنه دلوقتى بتدور علشان عايزة تضم ولادها لحضانتها ..
انا مابقولش انها غلطانه لانى مش باحب احكم على الناس...لكن ولادها كانوا بيصعبوا على كل مرة باشوفهم وهم من غير امهم ..شكلهم فعلا يحزن ...ده غير انهم شافوا خناقات ابوهم مع امهم ..واللى كانت مليانه الفاظ جارحه جدا ..ده غير المحاكم ...ليه المواضيع دى ماتنتهيش بالحسنى ؟؟؟والطرفين ينفصلوا بهدوووء..علشان ولادهم ...
معلش ياصبرنى انا نكدت عليك وانت مش ناقصه .....
وبلاش تزعلى من البلوج ...ده انا بحبه جدا ..علشان عرفنى عليك ياقمر
تحياتى

abdo يقول...

بالنسبة ان حضرتك متضايقة من المدونة طيب والمونة والناس اللى بتدخل المدونة ذنبها ايه
ممكن تقرأى قرأن مع كوب من النسكافية
وان شاء الله هتبقى زى الفل

bastokka طهقانة يقول...

صحيح لان الزوج و الزوجة دايما محتاجين للحب و طاحونة الحياة لو شفطت حد فيهم التاني حيضيع
معاكي في كل كلمة الصبر و التفاهم و الاحتواء
كلمات سهلة الكتابة
بس صعبة التطبيق

اوروفوار

صبرني يارب يقول...

الاخ عبده

ازاي بقى مافيش ماسحه دينيه عموما المسحه الدينيه دي غصب عني بتطلع فى كل كتاباتي بس بشكل طبيعى وهادي

ولو رجعت للقصه هاتلاقي ايمان صلت وعيطت واستغفرت تقريبا فى الجزء التالث مش فاكره


وبالنسبه للاميل انا كنت حطيته على المدونه والله عشان كذا حد طلبه مني

لكن من يوم ما حطيته بقى يجيلى اميلات سخيفه بتاعى النصب الى مش عارف كسبت كام والهبل ده

فشلته وبرضه لسه بتيجى

ده اميلى اهو

sbarny_yarb@yahoo.com

اتشرفنا يا فندم

abdo يقول...

هو جميل طبعا انا عارف طبعا ان المسحة الدينية موجودة بدليل المدونة الثانية
رؤية اسلامية متواضعة
بس يبقى خير أكتر لو ربطنا الأحداث بمواعيد الصلاة مثلا
بحيث الناس اللى لا قدر الله مبيصلوش يعرفوا ان الصلاة لا يمكن التهاون فيها وانها لها دور كبير فى الراحة النفسية والاطمئنان
وجزاكم الله خيرا كثيرا

صبرني يارب يقول...

بنت الغربه

لا انتى ما كنتيش عارفه بس انتى عرفتي خلاص ههههههههههههه

وطبعاالخيانه درجات ومش زي بعضها وتقبل الناس لها مش زي بعضها

بس بتاعة الحساب والعماره دي حسابتها غيرنا او مش محل مناقشتنا لانها ببساطه مشاعرها للبيع

اما صاحبتك فطبعا انا مش هاحكم عليها ما اعرفش القصه باكملها

واكيد ما حدش يعرفها الا هى وجوزها
لان الحقيقه بتكون دايما ضايعه فى الظروف دي

بس واضح انهم ناس مش تمام ما دام الحكايه وصلت لقلة الادب لان قلة الادب مالهاش اسباب ولا تبرير

وفعلا نفسي اشوفنا بنعمل زي ما كانوا زمان بيقولوا نخرج بالمعروف زي ما دخلنا بالمعروف
ونقيم حدود الله
نورتي يا جميل

صبرني يارب يقول...

طهقانه

ايه النور ده يا جميل

حلوه طاحونة الحياه الى بتشفط

تصوري تعبير معبر جداااااا

تحياتي ليكى يا جميل ونورتي

صبرني يارب يقول...

اخ عبده

اوك عنيه حاضر القصه الجايه وعليك خير

نورتنا يا فندم

الطائر الحزين يقول...

ربنا يبارك فيك
نصايح غالية

كل طرف له حقوق وواجبات اعمل واجبات علشان تاخذ مش حقوقة بس وتأخذ عشرة على عشرة كمان

صبرني يارب يقول...

الطائر الحزين

الله يكرمك يارب ونورت

يــوم جــديد يقول...

كل سنة وانتي طيبة ومدونتك طيبة وبخير ولينكها شغال :)
أنا كمان مدونتي مولودة في شهر فبراير
تفتكري هاتبقى عظيمة ؟؟

صبرني يارب يقول...

يوم جديد

وانتى طيبه يا قمر واكيد طبعا مدونتك تبقى من العظماء
ههههههههههه

نورتي يا جميل

Anonymous يقول...

صبرني.. القصة كانت كويسة بنفس درجة جودة المسلسلات التي يكتبها سيناريست واحدة ست .. و ده مش شتيمة أو قدح و الله بل هو إقرار .. فأنتي سمحتي لإيمان إنها تستقبل رسايل من زميلها في الشغل بينما قامت الدنيا و لم تقعد بسبب رسايل لزوجها على الموبيل (و هو خطأ شنيع و لا أبرره لأنه من مقدمات الزنا)كل كلامك كان عن إيمان و مشاكلها و ده له ما يبرره إنك ست .. و حتى النهاية ختمتيها برومانسية نسائية (طفولية) تشبه أحلام البنات في العريس الرومانسي ..

عاوز أقولك إنه من الأساس يا صبرني أنا معترض على شغل الست إلا فيما لابد منه .. يعني مدرسة في مدرسة بنات .. دكتورة نسا أو دكتورة أطفال أو غيرها من التخصصات التي تمس المرأة حتى لو بنك.. أما غير كده فأعتقد ده يكون إجرام في حق بيتها و حق زوجها و حق نفسها .

الست ربنا خلقها لأشرف و أطهر عمل في الكون ألا و هو الأمومة فليه تنزل تصارعني في مجالي اللي ربنا خلقهولي علشان أرعاها بيه ؟

الإسلام واضح و لو نمشي على تعاليمه بالحسنى كل حاجة هتبقى كويسة .. يعني لازم الزوج (المجرم) ده مايبصش برة بيته (إلا في الحلال) علشان ماحدش يبعت رسايل لمراته .. و كذلك الزوجة ماتقعدش تنكت في خلقتها 3 ساعات و تلبس أحلى لبس و تتمكيج و تحط برفان علشان الشغل و بعدين تعمله ستيتة في البيت .

يعني بالمختصر (و لهن مثل الذي عليهن بالمعروف.. و للرجال عليهن درجة) (ألا و هي درجة القوامة لأنه اللي بيصرف على البيت فلما هي تصرف على البيت اتلغت القوامة لان البغل اللي يقعد و يستنى مراته تشتغل و تصرف عليه يبقى خسارة فيه الطرحة .)

و كذلك خيركم خيركم لأهله

يا رب رجعنا للإسلام

ستيته حسب الله الحمش يقول...

معلش يا صبرني ياختي
السيد غير معرف ولو كان جدع كان عرف نفسه مضطرة اتجاوزك وارد عليه ممكن اسمحيلي

ها اعتبرك سمحتي

سيناريست المسلسلات بتكتبه الستات دي حقيقة .. لندرة أي اكشن من اي راجل في زمن الدكور

اي موبيل بيستقبل اي رسالة بس المهم الموبيل بيرد على مين؟ وبيرسل لمين .. ياما فيه ستات عفيفة بتقف للأغراءات وياقلة الرجالة .. أغلبهم ها يتجننوا يعرفوا ويتجوزوا وهم لسه في شهر العسل القصير .. والحقيقة كاتبة القصة لم تقر بجودة تصرف الزميل .. ولا طلعت الست ناوية تمشي في الغلط .. ولو فيه انسان راجل او ست صريح مع نفسه كان أقر بأن النفس امارة بالسوء والجدع فيهم بتغلبه نفسه اللوامة

الخاتمة شفتها في بيوت كتير تضم رجال ونساء مستقرين نفسيا وعاطفيا والاهم ولاد اصل "ع الاصل دور .. متلاقيش كتير"


من حق اي رجل يعترض على عمل المرأه ان يسمع مني قصص الأرامل والمطلقات التي لولا عملهن لزقن الجوع هن واطفالهن اللي بيترموا في بيت آباء النساء .. والي معترض على عمل المرأه يتجوز ست بيت عادي

واللي ربنا نور ليه عقله بيتجوز واحده زيه عقلا وفكرا وتصرفا لأنه مش خايف أنها تناقشه او تكون شريكته

فيه رجالة ضعااااااااف قوي قوي نفسها تبقى كبيرة وزوجتها صغيرة وكل يومين يقول لها "انتي مش فاهمة حاجة .. هو انتي تعرفي حاجة في الدنيا غير طشة الملوخية؟" عقد نقص لا تنم عن شخصية .. عادي موجود من الصنف ده كتيييييييييير

زي ما الراجل من حقه يختار شغله من حق اي ست على وجه الأرض تختار شغلاناتها الكتير هي مش فاقده الأهلية

عاوزة تقعد في البيت وشايفة ان دي مهمتها الأكبر ربنا يكرمها "ويارب يطمر فيه .. وميخرجهاش شرك زي خيل الحكومة بعد كام سنه ولا يقول ليها عاوز اثني واثلث واربع يا معلمة"

عاوزة تشتغل في مكان للستات .. بها ونعمت ربنا يكملها بعقلها "هو فيه حاجة اسمها شغل ستات والرجالة متدخلوش بأي شكل؟ ماشي نعديها والناس لبعضيها"

عاوزة تعمل اي شيء في الدنيا حلال تعمله واللي ده مش مذهبه ومنهجه مفروض يحترم الأختلافات ويكون عنده مبدأ احترام الآخر .. وبلاش يتجوزها .. يسيبها لراجل جدع يستاهلها

لما الاقي رجل بيشرح لي فكر المرأه ودورها بضحك لسبب بسيط انه مؤكد عمره ماكان ست وبالتالي ميقدرش يعبر عن طلباتها واحتياجتها .. هي بس اللي تقدر تفهمها ليه

كل ما حد عاوز يشغل الستات معيز في السعودية يقول ليهم انتم جوهرة ولازمن نحطكم في علبه صفيح "احم احم سوري" في علبة قطيفة
فيه ستات مش للتخزين .. ولو احنا جواهر مش اي دكر مؤكد جواهرجي ومع هذا الأغلبية العظمى من النساء بترضى بالقليل اللي ربنا رزقها بيه حتى لو كان مش في زلعة فخار وبدوده .. بس فين الراجل اللي يرضى

الست لما جوزها يكون بيراعيها "حفظ الله لنا ازواجنا يا اوختشي وبعد عنهم الحسد وولاد الحراااااااااااام" بتلبس له ايشي وايشي وكل شيء مشمشي .. وبره برضه بتلبس عدل وعلى شرع ربنا وشيك وحلو وقمر "وش بيطلع لسانه" مش ها تخرج زي ما شيوخ حلق حوش بيقولوا "بريحة كريهه حتى لا تكون فتنه" فتنه في عين اهاليكم .. هو احنا ايه؟ عبيد؟ ده احنا ناس محترمين
ولو الراجل مبهدل بس يرضى ان مراته تخرج بشكل بشع وغير لائق ... بس نحمد ربنا ان لسه فيه رجالة سوية طبيعية غير معقدة وجعلهم الله من نصيبنا
لا ليهم في الشم والهروين .. ولا ليهم في الدين المظهري فقط

الست لما تتجوز راجل بحق وحقيق تبقى في نعيم واي دكر على وجه الأرض ميقدرش يجي ناحيتها .. لكن لما تتجوز دكر بط هنا بس الخوف .. وساعتها لازم تخلعه بدون اي تردد

اعرف كثير من الارامل والمطلقات ظلما وعدوانا لولا تعليم اباءهن لهن ولولا عملهن لكن من المفضوحات .. ستر الله نساء المسلمين جميعا .. ولا حكم فينا طالبان وأفغانستان وبتنجان واشبههم .. وارزق بناتنا بمثل ازواجنا .. رجالة رجالة مش كلشيانكان

لو لقيتي يا صبرني اني طلعت المطوة ممكن عادي جدا تشيلي تعليقي مش ها ازعل بس انا تم استفزازي .. وانتي عارفاني

صبرني يارب يقول...

ستيته

لا ابدا يا حياتي فين المطوه دي ؟

كنت هاتيها معاكي طيب

نورتي مدونتك وزياده يا جميل

صبرني يارب يقول...

الاخ الغير معرف

اه نسيت اقولك لو كنت حضرتك شايف ان نهاية القصه طفوليه وغير واقعيه فدي مشكلة حضرتك

انا عن نفسي شايفاه واقع وممكن وهو ده اساسا العادي والطبيعى

وهي دي العقليات الى بتنعم بحياتها مش بتعيشها سواد وغباء وتصرفات رعناء ونفسيات معقده


اه وعلى فكره كمان الطرحه الى مش عاجباك هى خساره فى اي راجل عموما ما تزعلش نفسك اوي كده

وياما طرح ربت رجاله وستات محترمين وزي الفل

وياما طرح اجدع وانضف واعقل من ميت شنب

واعذرنا لو كنت انا وستيته كلامنا شديد
بس لو كنت حضرتك شرفتنا وعرفتنا انت مين بدل ما تدخل مستخبي وكنت تعبر عن رايك بشجاعه كنا ممكن عمالنلنا قافله بس ده اختيارك

حبيبه سى السيد يقول...

احم احم انا جاية اتعرف وارد الزيارة

على فكرة موضوعك حلو اوى بالذات للزيي

بس واضح ان اجزائة كتيرة

اولا انا مش هعرف اقولك رايي الا لما اقراة كلة بكل اجزائة

بس انا مش لاقية الا بأ من الجزء السادس

فين الاول؟


تحياتى

صبرني يارب يقول...

اهلا يا جميل

نورتي والله
عنيه هاجيبلك رابط فيه القصه كلها
وهابقى احطهولكم بره على المدونه

صبرني يارب يقول...

http://raghy-emraao-gheer-mathona.blogspot.com/search/label/%D9%82%D9%84%D8%A8%20%D8%A7%D9%8A%D9%85%D8%A7%D9%86


اهو الوصله يا جميل للقصه كلها
بس هاتلاقيها بدأه من الاحدث للاقدم يعنى اخر بوست هو اول بوست

حبيبه سى السيد يقول...

متشكرة على الوصلة انا اخدتها

وهقراها كلها

تسلميلى يا قمر:)

صبرني يارب يقول...

تسلمى يا حبيبتى انتى تامري