تعدد الزوجات .... على الرؤيه

السلام عليكم

الموضوع الى فات انا قلتلكم بلاش نناقش التعدد من الناحيه الشرعيه

وقلت خلينا نناقش الناحيه الشرعيه على الرؤيه الاسلاميه المتواضعه بتاعتي لما الموضوع يجهز

وجهز الموضوع يا قوم

تعدد الزوجات ....بين مؤيد ومعارض

يلا بقى اتفضلوا معانا على هناك وعايزه نقاش عالي المستوى من فضلكم

اتجوز تاني وما تصدعناش ... تاني

سلام عليكم

النهارده يا اصدقائي الاعزاء انا جبتلكم موضوع من ارشيف المدونه يعنى انا سبق ونشرته قبل كده من سنه واكتر لكن الباحث عن الحقيقه كان طلب مني من فتره موضوع عن التعدد لكن على الرؤيه الاسلاميه

وانا فعلا اوشكت على الانتهاء منه

بس قلت نتناقش شويه هنا ونرغي عن الموضوع ده ونقطع فى شعور بعض عشان لما نروح الرؤيه بقى نبقى خلصنا خناق

وارجوكم اي حد عنده نقطه متعلقه بالاحكام الشرعيه معلش يأجلها يومين ثلاثه على ما انزل الموضوع فى الرؤيه ونبقى نتكلم فيه هناك

عشان ما نقعدش نعيد ونزي فى الكلام .

يلا الى الرغي القديم يا اخواني

****************************************************************************************************

أنا جيت اخيراااااااااا . طبعا فكرتوني مت او تهت وانا جايه او دخان الطبيخ كتر عليا ؟؟؟

لا الحمد لله انا لسه متواجده بس كان عندي شويه حاجات كده باخلصها على السريع.

هاتتعودوا على اختفاءاتي كتير ده عادي.

بالاضافه الى التواجد المستمر لاولادي الهاديين جدا فى البيت يومي الجمعه والسبت بيبقى جو ملائم اوي للتركيز.

لحد دلوقتي مش عارفه لسه أنا هاتكلم عن ايه ؟؟؟؟!!!

شويه كده يمكن الهام تاهت وهي جايه .......!!!!!

اخيرا جاتلي فكره بس مش من الهام دى من الذاكره لانى كنت ا تكلمت عنها قبل كده فى منتدى مش فاكره ايه ولا فاكره قلت ايه لكن تعالوا نرغي حولها .

شوفوا هو الموضوع متعلق بالزواج التاني لكن بقى مش بموقفي تجاهه ولا بتفحيصه وتمحيصه وموقف الدين منه والكلام الذي قتل بحثا ده .

لا انا بقى عندي نقطه معينه ومحدده عايزه اتكلم فيها :

ليه الرجل مهما كانت ظروفه وافكاره ومشاكله بيداعب خياله دايما الزواج التاني ؟؟؟!!!!

مش فاهمين قصدي صح ؟؟؟

طيب نرغي الاول ،

دلوقتي انا باسمع كلام بابقى مش عارفه اضحك عليه ولا احدف الىبيقوله باي آله حاده؟؟؟

زي ايه ؟؟؟

والله انا بافكر اتجوز تاني ...... طب ماتجوز .

اصل بصراحه: (بداية الحجج بقى وتبرير المواقف مع انه مش مطلوب منه اي تبرير)

عد بقى الاسباب الجوهريه:::

اصل التعدد هو اصل الزواج لان الايه بدأت بكلمة مثنى (هايطلع على التاني على طول ) .

الى بعده : اصل التعدد سنه عن الرسول عليه الصلاة والسلام(خلص كل السنن ووقفت على دي واصلا مش صحيح لان الرسول قال خذوا عني امور دينكم )

. الثالث : اصل الستات عددهم بقى اكتر من الرجال ودى من علامات الساعه لازم بقى نعدد عشان نحل مشكلة العنوسه .

(اذ فجأة كده بقى قلبه على المجتمع وهايضحي عشانه وخلص كل الواجبات فاضل حاجه واحده)

وطبعا مش محتاجه اقول ان الكلام ده تعبان ومافيش خلل لسه فى النسب بين عدد الرجال والنساء فى مصر والعالم العربي بالذااااات وزي ما في نساء معنسين في رجال معنسين يبقى مش الحل هو التعدد. اوت دي كمان .

الرابع:

وده بقى مواله كبييييير لانه هايقولك كلام يقطع القلب:

انا مش مرتاح فى حياتي ، زوجتى العزيزه غرقت فى الحلل والاولاد ( تفتكروا مين غرقها اصلا)

وتركتنى حقى اتزوج بواحده تعوضنى افتقاد الحب.

(طب لما التانيه تغرق فى الحلل برضه هاتعمل ايه ؟؟؟

او يقول انا مراتي ما بقتش زي اول ما اتجوزنا اتغيرت بقت عامله زي طبق الملوخيه البايته الى ملحها قليل ؟؟؟!!

طب حضرتك مش ملاحظ انك زي طب الكشري البايت الى من غير دقه ؟؟؟

طب ولما تبات الملوخيه الجديده هاتعمل فيها ايه ؟؟؟!!

ايه رايكم ؟؟!!

اظن بعد ما يقنع نفسه ومن حوله بالكلام الجميل المسبك ده يبقى هو كده بريء وماحدش يلوم عليه والاهم هو نفسه ما يلومش نفسه لاي سبب من الاسباب .

مع ان ما حدش طلب منه ده ما الى عايز يتجوز يروووووووح يتجوز( الجدع فيكم يورينا نفسه)

هو لّّك فى الكلام وبس .

انت مش مطلوب منك تبرير عايز تتجوز روح اتجوز ماتصدعناش .

طبعا انا عارفه كويس ان الشرع اباح التعدد .

لكن انتم معايا فى كلمة اباح ؟؟؟ أه معايا طبعا مش بمزاجكم

أباح التعدد يعنى سمح بالتعدد ولكن لم يفرضه ولا بتاع.

والى بيتكموا اساسا فى النقطه دي من ناحية الشرع هم ابعد ما يكون عن تطبيق الشرع فيه او فى غيره بس اهى تمثليات على نفسهم وعلى الخلق .

وزي ما اعطى الاسلام الحق للزوج انه يعدد الزوجات

فكمان اعطى حق للزوجه انها ترفض الاستمرار معاه حتى بدون ابداء اسباب.

ومش حرام ولا حاجه عليها عادي جدا .

وطبعا مافيش اي مبرر من الى فاتوا يقول انه يتجوز فى السر من غير علم زوجته الاولى حتى لو برر لنفسه انه كده احسن لها هي ( انا مش عشااااااااني عشاني هو) عشان ما يجرحهاش (الواد حساس وعاطفي الاخر).

المهم دول بقى الناس الى لقت حجه نشوف التانين بقى دول يا عينى غلابه حالتهم تقطع القلب لانهم عارفين ان التعدد مش سنه ومش هايحل مشكلة العنوسه (متفتحين وفكرهم عالي )

وزوجاتهم ستات زي الفل وهما بيحبوهم جدا وكل شيء ميت فل واربعتاشر .

طب ايه ؟؟؟ فين المشكله ؟؟؟!!!

المشكله انهم رغم كل شيء فى داخلهم ولو فى مكان بعيد كده هايموتوا ويتجوزوا تاني ؟؟!!!!

ليه الله اعلم !!!!

حاولت اعرف على فكره بس ما قدرتش اليكم ما دار بينى وبين نفسي ::..

قلت يمكن لما يتجوز اثنين يمشي الرجل نافش ريشه ويثبت للناس كلها انه راجل ونص ؟؟!!!احتماااااال !!!..

او يمكن عشان يحس انه متفوق على غيره وخصوصا المرأه بانه متجوز اثنين وهى لا ؟؟ يممممممكن برضه ...

ويمكن برضه من باب استخدام الرخص والحقوق والاستفاده منها ؟؟

يعنى زي كده الى يلاقي علبة تونه وعليها عرض خاص اثنين بسعر واحده يشتريها وهو ما بياكلش التونه اصلا ؟؟؟ الله اعللللم !!!

المهم انى ما عرفتش اجاوب فى الاخر على السؤال وقلت اكيد هذه الاجابه تكمن فى بير مالوش قرار فى نفس الرجل (مسيرنا نوصله برضه ما وراناش الا هما).

بس اظاهر ان مش بس حلم الجعان عيش .....

لا ده حلم الشبعان برضه عيش

( هششششش شكلها من الاخر طفاسه وبس )

ما تقولوش قدامهم يا بنات والى لقاء اخر ان شاء الله

(بنات اسألوا عليا الا يموتوني الطفسين )

بالمناسبه انا اطول من كده بكتير وما عنديش عبايه بنى ورضا مش بشنب وماعندوش بدله زرقا ولا عنده شعر

هههههههههههههههههههههههههههههههههه

ميمونه بنت الحارث .... على الرؤيه

ميمونه بنت الحارث

زوجة الرسول عليه الصلاة والسلام

موضوع رؤيه اسلاميه متواضعه الجديد

ما حدش يطننننننننننننش وقد اعذر من امن انذر

فيلم تسجيلى بلسان جنود امريكان فى العراق

تحديث هااااااااااام هذه المدونه سايقه الرخامه عليا ومش راضيه تفتح على الاكسبلورر العادي 

فتحت باوبرا او فاير فوكس 

مش عارفه ليه الرخامه دي

الى يعرف ليه يقولي ومن قدم شيء بيداه التقاااااااه

اهيء اهيء اهيء

سلام عليكم ايهاالمدونين الى عنيهم مدووووور

ايوووووه هاقولكم ليه فى الاخر

المهم ندخل فى الكلام المفيد قبل ما الفجر ياذن وابيعكم واقوم اصلي وانام

من فتره كده شوفت فيلم على قناة show cinma 3

ما عنديش الشو تايم ده مسروق بلا فخر من اولها عشان انتوا عالم عنكم مدوره انا عارفه

المهم الفيلم ده كان عباره عن فيلم تسجيلى عن حرب العراق والمصايب السوده الى حصلت فيها

وعلى لسان جنود امريكان فعلا

شوفت تقريبا اغلب الفيلم ما اثار اندهاشي بقى

ان الفيلم ده عباره عن سلسله من جرائم الحرب الي ارتكبت فى العراق على ايد الجيش الامريكاني طبعا

هاقولكم بعض الى انا فاكراه

اولا: تسجيل من داخل طياره حربيه بعدسة التنشين بتاعة الطياره نفسها والمفروض ان الاصوات الى موجوده اصوات الجنود الى راكبين الطياره وهما بيضحكوا وبيلعبوا انهم ينشنوا على مجموعه مدنيين ماشيين مابيعملوش اي حاجه وفى حالهم هما حوالي 15 واحد وفعلا نشنوا عليهم وضربوهم خلوهم اشلاء

ثانيا: واحد بيحكي انه قتل واحده ست بامر من القائد بتاعه لانها كانت جايه نحاية الدبابه بتاعته ولما قلها اقفي ما وقفتش فموتها (وبيعقب بدموع تجري على وجنتيه الحمر ا لحلوين انا مش هاقدر اكفر عن ذنبي ده ابدا حتى لو قريت القرآن كله كل يوم او اعلنت اسلامي )

ثالثا : انهم ببساطه ما كانوش عارفين من الى معاهم ومني الى مش معاهم وعليه كان كل الى بيجى ناحيتهم بيضربوه معقب الاخ ده ويقول هناك الانتحاري ممكن يكون ست او بنت او شاب او شيخ او حتى طفل فى ال12 عشر من عمره

رابعا : ان فى اعداد مهوله من الجنود الامريكان (الغلابه الى يقطعوا قلبك من الغلب ) ماتوا منتحرين سواء فى العراق ولا لما رجعوا امريكا

خامسا : واحد بيقول انه قال للقائد بتاعه ان اعصابه تعبانه لانهم النهارده موتوا ناس كتير اوي ما لهمش ذنب

فالقائد بتاعه قاله طب زعلان ليه ما هو ده يبقى يوم كويس

وكلام تاني كتير اوي خاص بالجيش الامريكى و القيادات فيه هاقولكم مغزاه ايه من وجهة نظري

بس بعد ما احكيلكم على الفيلم التاني

انا لما شوفت الفيلم الاولاني ده قعدت افكر واكلم نفسي أو رضا واقوله طب ايه ؟؟ يعنى هما عايزين ايه ؟؟

الفيلم ده فيه تسجيلات من داخل الطيارات الحربيه

يعنى خارج بمزاجهم اكيد يعنى مش مولد هو

طيب يعنى اوباما الى عايز الفيلم ده يطلع كده ؟؟ طب ايه ؟؟ ده المفروض هما الى كده الى مجرمين حرب مش الترابي

وقعدت بقى اقلب الافكار فى دماغي بمعلقه خشب عشان ما تجرحش الطاسه

بس بعد اسبوع جابو فيلم جديد على نفس ذات القناه

والفيلم بقى كان على معتقلات ابو غريب والمصاااااااايب السووووووووودا الى كانت هناك

اولا الجنود الى جابوهم ستات ورجاله اغلبهم ناس مهزوزين نفسيا فعلا ومش تمام خالص

والستات والله هما بيقولوا انهم ستات بس مش عارفه ما كانش باين عليهم

المهم يا حضرات

بكل بجاحه بتقولك البت ايوه ما احنا لازم نعمل كده عشان يعترفوا

لازم نهزأهم ونهين كرامتهم وانسانيتهم وننتهك حرماتهم كده عشان اعصابهم تتعب ويعترفوا

وفعلا كانوا بيعترفوا

وبعدين ما هو كل المعتقلات كده

والى اتصور ده ليس اكتر من عشره فى الميه من الى بيحصل فى المعتقل الى كنا فيه او اي معتقل لكن الفرق ان الى انا عملته اتصور

وفى واحد تاني

قالك انا بانفذ اوامر عسكريه حتى لو كانت شفهيه

والقاده بتوعنا عارفين ان ده بيحصل فعلا لكن ما بيدوش به اوام مكتوبه لو ما نفذتش هايحصلي متاعب كتير لكن واضح برضه انى لما نفذت برضه تعرض للاذى

بس يعنى ده مش مبرر برضه انه يوافق على وضع زي ده

كل الناس بتأكد ان مافيش حد اتجازى ولا اتسجن رتبته اكبر من رقيب

كلهم الى اتحبسوا واتطردوا من لجيش حاسين بالظلم وبانهم كانوا كبش فدا

(وتشوف برائتهم والدموع هاتفر من عنيهم يقطعوا القلب )

بعد برضا ما اتفرجت على الفيلم ده كله المره دي وعرفت هما كانوا بيعملوا ايه فى الناس هناك ولاد ال ..........(كل واحد يختار اللقب المناسب بس فى سره مش عايزه قلة ادب هنا )

جمعت الافكار بقى فى دماغي الا وهي :

اولا واضح ان مش احنا بس المقصودين بالفيلم ده لا ده بالمقامل الاول للامريكان توجيه الراي العام الامريكى والعالمي بالمره الى ان تدخل امريكا العسكري فى العراق كانت غلطه

مش عشان العراقيين طلعوا ناس طيبين لا عشان امريكا الغلبانه المسكينه اتبهدلت فيها يا اخويا

وكمان الجنود دول راجعيين بلدهم عايزين الناس تتعاطف معاهم مش يضربوهم بالبرطوشه لاجرامهم الى الكلام عنه بقى منتشر

واعطوا فعلا صوره للجنود انهم غلابه غلب يا جودعان

طب وربنا قطعوا قلبي وصدقتهم فعلا ( بس لانه ممكن يكون حقيقى فعلا كلامهم انهم برضه كجنود صغيرين يكونا مظلومين

ثانيا : لما سألت نفسي (طب ولنفرض ان الحكايه كده طب ده الكلام ده يدينهم اكترررررر ويخليهم مجرمين حرب ويتحاكموا)

قوم نطلت الكلمه فى ودني

وقلت ايه ده يتحاكموا ؟؟؟؟!!!

طب وهو مين يقدر يحاكمهم وعشان مين ؟؟؟ العرب

طب ما طزززززززز

ايوه صحيح هو مين ان شاء الله يقدر يقول لماما امريكا تعالى لما احاكمك ؟؟

يعنى خلاصة ثانيا ان امريكا بتقول للعالم كله انا عملت اهو الجدع فيكم وواكل ريرى كويس وهو صغير يجى يورينى نفسه

ثالثا : ااااااااه ماهو اساسا هى كده اول ما رئيس نظام بتبدأ تظهر فى الافق فضايح ما سبقه الى الفساد فى الحكم وغيره

اه بالنسبه لموضوع عنيكم مدوره

احب اقولكم ان اليمامتين الصغيرين الله يرحمهم بقى ويحسن اليهم ادبحوا مبارح

ده لاننا اكتشفنا ان فيهم فاش

ودخل من شباك المطبخ وحيث ان انا الوحيده الى مرزعوه فى المطبخ ليل نهار

انا الى اتنيلت اتقرصت لما قلت بس

وكان قدام رضا حلين من اقتراحي يا اما يرميهم بالعش فى الشارع بس ده لو كانوا بيعرفوا يطيروا

يااما يدبحهم هو وينضفهم برضه نشيل العش ونرميه وكده بقى

طبعا اختارنا الاول عشان لقيناهم ما بيعرفوش لسه يطيروا ولو حدفناهم هايقوا ويموتوا فلنا يموتوا فى بؤنا احسن

وطبعا انا شايفه ان الفاش ده نتيجه لقركم البتنجاني اللون

ومش هاقولكم حاجه تاني ابدا

وما تحاولوش توقعوني اقولكم انى كنا بنصطاد النهارده سمك وما لقناش الحمد لله يظهر جاتله اعاره السمك

ملحوظه : مشغوله مشغوله مشغوله الايام دي والله غصب عني عندي كميات اشياء مختلفه

مش عارفه اتابعكم اسفه اوي يا مدونينا الاعزاء

البوست نازل من غير الوان اهو مش قادره الون

المهم عايزه اسمع رايكم على الفيلم ده ونتكلم فى الموضوع ده

خصوصا لو حد شافه برضه زيي

يلا بقى الفجر اذن بلاش رغي

فعاليات الفرح بناءا على رغبة الجماهير

بصوا انا ماليش دعوه انتم الى اصريتم الحاحا انى اقولكم الفرح حصله فيه ايه
انا ما كنتش ناويه بصراحه كفايه عليه كده تامر اوي امال يوم فرح مريم هاعمل ايه بقى
ههههههههههههههههههه

المهم نخش فى الموضوع عشان ورايا حاجات كتير
وعندي موضوع مهم عايزه احكيلكم عليه بس بكره بقى لما نخلص الليله دي

الفـــــــــــرح

اول حاجه انا طلع عينى انا ورضا ايضا عشان اكتشفت قبل الفرح باسبوع ان كل فساتين البنات السواريه صغرت عليهم والاخ خالد طبعا بس ده كان معروف من قبلها
ااااااه يا نافوخي اكتر حاجه باكرهها اشتري هدوم وخصوصا للعيال عشان بيبقوا معايا فى الغالب .
بعد اللف على المحلات والاسعار بتاعة ملابس الاطفال الى تجيب شلل رباعي
المهم بعد ما انت انتهينا من اعداد الملابس
ندخل على طبيخ الفرح
اخت رضا اصرت اصرارا انها تطبخ
امها تقولها يا بنتى مالوش لازمه ما حدش عاد بيعمل الافلام دي
تقولك ابداااااااا انا عايزه افرح

يا ستى ما تفرحي هو لازم يعنى تاكلي نص الدقهليه عشان تفرحي

المهم طب هاتعملي ايه يا ستى اعمل معاكي
اه تعالى يوم الاربعاء اخر ا لنهار وتبعتيلى الصبح كل انواع الصواني والحلل الكبيييييره


طب انا عندي اقتراح بدل ما نتحشر خمسين روح فى شقه ستين متر باين ولا حاجه كده
ما تخليكى جدعه ونقيلى صنف ولا اثنين وانا اقوم بيهم
لا يا ستى كله يجى هنا ويطبخ هنا

هاتندمي يا حاجه لو جيتلك بالعيال

القصصصصصصد
روحت بس متأخر بعد ما نيمت البنات
ابو رياض روح وباعني والوقت اتاخرت كملت شغل معاهم للصبح
وروحت نمت ساعتين ورجعتلهم تاني
اه والله
والله كانت عامله كميات اكل بشششششعه لدرجة انها بعد ما غدت الشعب ده كله على دفعات كمان استمرت من 3 عصرا الى 11 مساءا
تاني يوم وزعت على كل بيت حله اكل وبرضه ما خلصش
ليييييييييييييه كده يا ناس

الحنه كانت عاجنه بتاع 3 كيلوا حنه

وما عرفتش ارسم بها كمان طلعت ما تنفعش رسم اصل حنة الرسم لها طريقه خاصه فى العجن

ايوه اصل انا بانقش حنه حلو ولا ستونه يعنى

نروح الفرح بقى
طبعا يوم الفرح ده الكوافير عندي بيبدأ من الساعه 2 كده الظهريادوب نخلص على الفرح
ايوه ماهو الى بتعمل سشوار (مريم) والى شعرها بيتعمل كيرلي (رحمه )
والى المانكير والشغل بتاع البنات الى ينقط ده

واسيب ليا فى الاخر بقى انا ساعه اجهز انا كمان
روحنا الفرح
اولا من الافراح القليله الى انا كنت فيها مرتاحه نفسيا وفرحانه جدا بجد
مش عارفه ليه يمكن عشان الواد تامر ده طيب اوي والبت مراته دي سكره اوي بجد

ندخل بقى على النقد اللاذع
اولا زفة العربيات
مسخره مسخره مسخره
بلد ما لها ش اصحاب
مجتمع عقله تعبان رسمي
طيب بتتهببوا تلفوا فى الشوارع مااااااشي
بتزمروا وتقرفوا الناس ودوشه ماااااااااااااشي
بتعملوا حركات هبله وخمسات وغرز وبتنجان لما يكون المكان فاضي برضه مااااااااااااااشي
انما تقفوا فى الشارع بالعرض وتوقفوا المرور ليييييييييييييييييييه

المهم بصراحه كنت متاذيه جدا من الموضوع ده

وكل شويه اقول لرضا قولهم يا عم انت ما يقفلوش الشارع

طبعا لا حياة لمن تنادي هانقول لمين ولا مين

وبعدين لمحت كده فى عربيه العروسه واحده راكبه قدام وشعر اصفر وحركات كده مش عندنا فى العيله يعنى

قلت لرضا انا شوفت حاجه اصفر فى اسود كده مشبح ابيض ايه ده؟؟ فى مزز فى الفرح ؟؟ هيه هيه

روحنا الفرح

خد عندك بقى

اصوات بعيد عنكم حاجه تجيب صمم كلي وجزئي دول المغنيين

اغاني اجاركم الله حاجه عذاب

التدخين فى قاعه مغلقه من حيث الغباوه الي حاطه على هذا الشعب

الولاد الى لابسين بترتر دول عايزه اولع فيه

الشباب الى بيرقصوا بوسطهم زي الحريم كان فى واد وربنا ما بطل رقص طول الفرح كنت عايزه اعمل معاه حوار الصراحه واقوله وسطك ده بلاستيك ولا ايه ياض وبيرقص زي الحريم بوسطه ويعمل حركات ........... مش عارفه اوصفها انا مؤدبه

المزه

ايوه ام شعر اصفر

انا شوفتها فى الفرح قلت الله ده صحيح اهو ما كانش بتهيئلي

سالت بقى مين دي يا عيال

قالولي دي خطيبة فلان (واحد من قرايب العريس بس مش طرفنا) وفى اقوال اخرى دي الجيرل فريند بتاعته وجايبها من القاهره معاه من امبارح عشان تحضر الفرح

الله يعنى مزه مستورده كمان

طيب كويس

شويه ولقيت رضا واقف قدام المزه دي تحديدا والى انضم اليها مزتين كده بس حاجه اوزي يعنى شمورت حلوين كده

بس شكلهم من فتشنا وكاويين شعرهم بمكوى رجل

بس ده ما يمنعش انهم مطلعين الحته البيضا يعنى

ابص لرضا ماله ده واقف كده ليه

يكونش واقف يعاكس المزه ؟؟؟؟!!!!

لا لا مش ا بو رياض الى يعمل كده غير كده ماله كده واقف محتاس وبيبص فى الفراغ وعنيه مغربه

شاورتله جالي

انت واقف قدام المزه المستورده ؟؟ ايييييييه تاخدها زواقه ولا عياقه ولا واحده يحتار فيها الاطبه ؟

قالي اسكتي انا محتاس

مش شايفه الشباب الى واقفين قدامها ادي ايه

انا خايف عيل منهم يكون ضارب زفت ولا حاجه ويمد ايده عليه تبقى مصيبه والواد خطيبها ده مجنون وهايعملنا مصيبه بقى

قلتله ماشي بس على الله يا معلم المحك عينك جايه على اي مزه من دول

قالي يا شيخه اقعدي انا ناااااااااقص ده عالم مفعصه (وقال حاجه تانيه كمان بس بلاش بقى انا برضه مؤدبه)

المهم هاتقولولي ايه ده انت من المنصوره يعنى وعندكم قشايط كتير

اقولكم اه بس احنا فرحنا بيبقى ناشف شويه يا جودعان كل البنات محجبين ومحترمين بالصلاة على النبي حتلى الى لابسين سواريهات برضه محترمين

فماكانش في اي مزز فى الفرح مزكيه عن صحتها كده الا هما المزه دي ويلحق بها اثنان شمورت تقريبا ده فريق الناشئين

فوق ان كل ما حد يسأل يقولوا دي صاحبة فلان

قشطه صاحبته

تبقى سبيل بقى يا جودعان ولا ايه

بس عدت يعنى الحمد لله من غير خسائر فى الارواح ولا ضحايا للمزز

وبعدين اتلطعنا فى الفرح لحد الساعه اثنين ونص تقريبا لحد لما العريس فرفر من الرقص شاور للفرقه وقالهم خلااااااااااااااص عايز اروووووووووووووح بقى

وتااااااااني زفة عربيات وهبل

وفى الاخر واخيرا مؤخراااااااااااااا روحنااااااااااا هيه هيه هيه

من ضمن ما احزني فى الامر ان العروسه كانت مرعووووووبه وعامله زي الى داخله للمشنقه ساعتها قلت الله يسامح مامتها اكيد مش طمنتها ولا ساعدتها كفايه

هو ده مجتمعنا ما بيواجهش

بث خلاص كل ده رغي مش معقول كده على فكره

صور الفرح .... وعش اليمام

السلام عليييييييكم

وربنا بتوحشوني يا جودعان

طبعا انا عندي حوالي دستين بوستات رغي على فكره
بس قلت لما ارفه عنكم

وافرجكم على صور الفرح بتاعنا اولا

فرح المدعو تامر على الحلوه الى قاعده جنبه دي امل

وتامر يبقى ابن اخت رضا


اتحايلت عليه يا جماعه يقلع النظار اصر اصرارا انه يسيبها قائلنا ده انا عملها جديده دافع فيها دم قلبي غير انى ما اشوفش مترين قدامي لو قلعتها انجزي وصوري
ههههههههههههههههههههههه
البت العروسه دي بت زي العسل بجد انا حبيتها كده من اول ما شوفتها من قبل ما الواد تامر ده يخطبها
ربنا يبارك لهم يارب ويصلح حالهم وعقبااااال الى ما اتجوزوش كلهم يارب نفرح فيهم
وعقبال ولادكم وحبايبكم يا الى اتجوزتم


اما هذه الصوره فدي الانسه رحمه كريمتنا واخده رضا وبيرقصوا وبتبصلي بالشماته الى انتم شايفنها دي




وده مستر خالد ابنى الصغير منهمك طبعا وبيقدم نمرته وبيرقص

وده ابو رياض ومعاه خالد (طبعا انتم عارفين رضا انا مصيتاه من زمان )

ودول مريم ورحمه بيرقصوا باخلاص وتفااااااني

بس لعلمكم البست فى الوقت ده كان كله بنات ااااااااه معلش يعنى

ده كان شرط مريم عشان ترقص مش هيصه هي

بث خلاص خلص الفرح

تعالوا بقى افرجكم على حاجه جميله اوي اوي

مش باقوووووووولكم هاشهيصكم انا النهارده

دي صورة عش يمام عندي على شباك المطبخ

اكتشفته بالصدفه

انا كنت باسمع صوته بس كنت فاكراه حمام وبيقف بس على الشباك او المدخنه بعدين كانت عندي مشكله مريعه

هى ان خالد سمع صوته مره

وبابا قاله دي صوت حمامه يا خالد وبتقول اذكرووووو ربكم

بسسسسسسسسسسسسس

قعد العبيط ده كل يوم يعيط ويقولي انا باخاف من البطه الى بتقول اذكروا ربكم

يا ابنى دي حمامه

لا دي بطه

طب ياعم بطه بس مضايقاك فى ايه

كده بتقول اذكروا ربكم

طيب ما تقول قول انت لا اله الا الله

يقولي لا اله الا الله بس انا باخااااااف

المهم مره قلت افتح الشباك كده عشان اطمنه يعنى ان مافيش حاجه

قوووووم ليه بافتح الشباك الى هو اصلا صغير جدا وعالي ومقفول نصه بالشفاط

ولقيت الشيش نصه مقفول بامد ايدى افتحه وطبعا كرسي بقى واجراءات كتيره يعنى عشان اوصله

الاقي حاجه طارت فجأه

طبعا انا صوووووووووت

طبعا الواد اترعب زياده ومن هنا كتشفنا انه عش وخالد هو الى طلع فوق وبص وقالي ان فى بيضتين

وبعدين بعد شويه رضا بص وقالي ده يمامه مش حمامه

طبعا انا زي الهبله روحت حطيت لهم اكل

هههههههههههههههههههه

رضا ضحك عليا وقالي مش هاياكلوه رز ا يه الى انتى حاطاه

وفعلا ما كلهوش مش عارفه ليه

بس من يومها وانا باعيش ماساة

انا باخااااااااف يا ماماااااااا البطه بتقول اذكروا ربكم

بس طبعا مش هامشيها يعنى ولا ارميلها البيض لازم هو يتعود ما يخافش

واول ا مبارح وقافه اغسل الاطباق سمعت صوت صوصوه ندهت لرضا بقى عشان يبص عليهم

ولقينا اليمامتين الامورتين دوووووول

شوفوا جمالها والنبى يا اختي عليها

دول بقى بعد ما اعتدينا علي عشهم ورضا نزلهم فى المطبخ على الارض

طبعا كان فى فى المطبخ سيرك عالمي

بس بيقولوا قال ده فال حلو ورزق وحركات من دي

طيب بركاااااااتك يا يمامه هااااااانم

هاسيبكم بقى تتابعوا هذا السيرك العالمي

واي تريقه على صوت المصوراتيه الى صوتها رايح من الفرح ممكن اعوركم على فكره

والى اللقاء بقى فى الرغي القادم يا حلوين

ما تحبنيش بالشكل ده ... ما فى اشكال كتيره!!!!

تحدييييث :
انا اسفه اوي يا جماعه على انى اتأخرت فى زيارتكم اليومين الى فاتوا انشغلت والله بالعافيه نزلت البوست ده امبارح والله بعافية العافيه يعنى . وعموما هحاول النهارده الحق ازوركم برضه لكن معلش عندنا فرح الاسبوع ده فى العيله وده بقى ممكن ياخدله بتاع اسبوع كمان من الشغل
ايوه الفرح يوم الجمعه وقبله حنه وقبل الحنه يوم طبيخ للفرح وبعد الفرح الصباحيه يعنى موال كبير اوي بالصلاه على النبى عقبال عندكم والى اتجوز عقبال اولاده سامحووووووووووني يا اصدقائي

السلام عليكم يا مدونينا الاعزاء والى مش مدونين برضه شايفااااااهم :

ماشي يا نورا ؟؟؟ شايفاااااكي ... وبطلي تصيحى انتى وخالو اشرف عند حنان وتجبولي الكلام

وبالمناسبه السعيده دي احب اقولكم ان جدي لامي كان راجل كباره موظف اد الدنيا فى محكمة المنصوره وكان شعره اصفر وعنيه خضرا وحليوه ويشرف اتخنها بلد فيكى يا يا مصر . وطبعا كنت باحبه جدا والله . من غير ما ماما تتكلم ولا نورا واشؤوش يصيحولي كده

هههههههههههههههههههههه

الله يرحمه هو مات وانا عندي عشر سنين بس انا فاكراه كويس .

وده لان ماما زعلانه انى ما جبتش سيرته فى البوست بتاع عيد الام وجبت سيرة جدي لابويا . او يعنى طنط حنان ادتنى اسفين .

حنان مين ؟؟ مالكوش دعوه بقى انا هاحكي قصة حياتي ولا ايه ؟

المهم ندخل فى الرغي بقى الجامد جدا بتاع النهارده :

دلوقتي انا شايفه ان الناس بقى عندها نقص فى فيتامينات الحب .

ايوه بالرغم من انهم ماشين يحبوا فى بعض دلوقتي عمال على بطال فى الشوارع والجامعات والكافيهات .

الا انهم كلهم عيال ركش وهبل ولا بيحبوا ولا يعرفوا الحب والله ده بس من اثار البتنجان المخلل زي ما قلتلكم قبل كده .

احنا بطلنا نحب بعض...!!!!!

اه والله ما تبرقوش كده . بقى اي حد يقول لواحده سلام عليكم يبقى نيته حب من بتاع قيس وليلى ونيته وحشه اساسا وايامه مش فايته .

حتى لو واحد قال لراجل زيه ازيك ياعم ... لا لا مش قصدي كده ... يقولك اكيد عايز مني مصلحه .

نسينا او تناسينا فعلا الحب فى الله

والى ربنا قال ان المتحابين فى الله هايستظلوا بعرشه يوم لا ظل الا ظله مع النبيين والشهداء والصديقين

وما حدش من فضلكم يقولي مافيش حب فى الله بين الرجل والمرأه لانها لا تعقل ابدا

طبع فى حب فى الله بين البشر كلهم لكن طبعا مع الاحتفاظ بالحدود الشرعيه فى العلاقات عموما سواء بين ابناء الجنس الواحد او المختلفين

هاحكيلكم حكايه جايز تفهموا قصدي (شوية لب بقى عشان حكايه طويله )

مره من حوالي اربع سنين كده وجايز اكتر كنت على النت مره وبعد فتره غياب عشان كنت والده رحمه (ده اليوم الى سميت نفسي فيه صبرني يارب )

قوم انا بقى كنت قاعده ارغي مع كذا شخص فى نفس ذات الوقت كالعاده .

واحد عصبني وكنت عايه احدفه بالكي بورد بس انتهت على تسمية نفسي بهذا الاسم صبرني يارب

ومافيش خمس دقايق الاقيلك واحد داخل بيكلمنى برضه سلامات طيبون وهو كان ايامها طفل يعنى حلو كده سبعتاشر تمنتاشر سنه .

والاقيلك الواد عمل فيها عبد الحليم فى فيلم حبيبى دائما ويقولي انا باحبك وما اقدرش اعيش من غيرك

طبعا ما بقيتش عارفه اضحك ولا اضربه ولا اعمل ايه ههههههههههههههههههههه.

المهم بقى عشان انا مؤدبه ما باعرفش اشتم قلتله طريق السلامه يا امور مش ناقصه انا

وبلوك ودليت من الجامد ده .

وتدور الايام وبعد يمكن سنه وجايز اكتر

كنت على الشات وواحد كلمنى ازيك ياامريم سلامات طيبون برضه وكده يعنى .

الامور : انتى مش فاكراني

انا :لا والله معلش انت عارف السن

الامور :طب ده اميلى هو انتى مش بتفتحي الاميل

أنا:لا والله بافتحه بس قلما يعنى

الامور:طيب ضفينى يمكن انتى معاكي ا لميل القديم

انا :طيب ياعم

ضفته الاقيلك الواد معمول بلوك .

انا عائدة اليه على الشات :انت كنت عملت فيا حاجه ياابنى .

الامور :لا ابدا ليه ؟

انا : اصلك معمول بلوك !!

القصد بقى قلت جايز خطأ فني ورجت الواد وقعد يجى شهر يكلمنى عادي ازيكم سلامات اقرا البحث الجديد بتاعي كده يعنى

المهم مره قالي :على فكره انا فعلا كنت معمول بلوك منك وانا فاكر ليه .. هو انتى بجد مش فاكره ؟؟؟

أنا : ايوه يا ابنى هو انا هاضحك عليك ؟! ما انت عارف السن ههههههههههههه

المهم قالي انا كان حصل مني كذا وكذا (هو نفسه الامور بتاع باحبك وما اقدرش اعيش من غيرك ) وانا ماليش دعوه بقى انا برضه باحبك وما اقدرش اعيش من غيرك طيب اعمل ايه .

مش عارفه يا اخوانا انا كنت بافكر اعوره بالموس بس كان عايز يتسن .

المهم ربنا الهمنى كده الصبر كنت بقالي سنه بقى اسمي صبرني يارب

قلتله: يا ابنى الحلال انت صغنون بكره تحب واحده صغنونه زيك وتتجوزها ان شاء الله

وبعدين انا كمان باحب جوزي ومش ناويه اتجوز عليه ههههههههههههههههه

قالي: ما تقوليش صغنووون دي انا مش عييييييييييل انا عندي عشرين سنه واي حد يشوفني بيدنى اكتر من سني.

أنا :طيب طيب يا غضنفر ما تزعلش نفسك . طب قولي ا نت بتحبنى ليه ؟

الامور :لانك حنيه وطيبه ومحترمه .

أنا :طيب انت مامتك موجوده الحمد لله

الامور : اه

انا :طيب لك اخت ؟

الامور : اه

أنا :طيب هما طيبين وحنينين ومحترمين ؟

الامور : طبعاااااااااااا

أنا :طيب بتحبهم ؟؟

الامور: ايوه طبعاااااااااا

أنا :طيب ما تحبنى زي ما بتحبهم ؟؟؟

فى مانع ؟؟

الاموره : مش عارف

انا : طيب جرب كده مش هاتخسر حاجه

وان شاء الله اوعدك لما يبقى عندك 25 سنه وما لقيتش واحده طيبه وحنينه ومحترمه تحبها وتتجوزها هابقى اشوفلك انا عروسه على مسؤليتى الشخصيه

المهم يعنى اتفقنا على ذلك الوضع

والاموره ده دلوقتي الحمد لله بقى من اعز اصدقائي . واتخرج واشتغل وحب وعرفنى على حبيبته وسابها برضه عشان الحنيه كانت ما بتوصلوش اوي من المغرب لحد هنا .. ايوه حب نتاوي من اقاصي الوطن العربي (عقله كان مقضيه على كده وقتها بس هو دلوقتي اعتقد كبر وعقل شويه ولا ايه يا ابنى ؟؟؟)

واينعم هو النداله اشتغلت معاه من يوم ما راح اسكندريه وما عادش بيظهر اوي بس هو واد جدع يعنى ومحترم وزي الفل ربنا يوفقه

وهكذا تم تحويل هذا الحب من حب البتنجان المخلل الى حب اخوي ظريف جدا جدا

والى ما ينفعش يا سيدى عصير اعمله مربى اييييييييييه المشكله

معقدين نفسنا ليه ؟؟؟

ونقعد نقول الحب ما لناش يد فيه

واصل انا حبيت بقى واعمل ايه

ونشغل اسطواننة محمود يس الحب مش بايدينا

وبيجى فجأه زي لطشة البرد

ياا بنى الحب ده ما ينفعش لاي سبب ان كان بقى

يا بنتى انتى كده بتهدي حياتك

تقولك باحبه يا باباااااااااااااااا

الخلاصه ان انا عموما شايفه ان الحب بيجى مع سبق الاصرار والترصد

وان الحب ده ينفع يتحول عادي جدا

يعنى ممكن الواحد يشوف زميلته ويعجب بيها ويبقى خلاص اهو هايعد النجوم

فيكتشف انها مخطوبه او على وشك فيرجع فى كلامه عادي ماهو كان لسه بينه وبين نفسه

ويفضل برضه يعز زميلته دي ويحبها زي اخته عاااااااادي

وجايز برضه ان واحد يحب صديقه او زميله زي اخته تمااااااام بس مافيش ما يمنع ابدا ان لو اتغيرت ا لظروف انه يحبها حب تاني ويتجوزها ايه المشكله برضه ؟؟؟

ليه المواضيع بقت كومبليكس ؟؟؟

الصحابه كانوا بيتجوزوا مطلقات بعضهم واراملهم

ايه المشكله ؟؟؟

هل معنى انه اتجوز ارملته انه كان عينه منها قبل ما الراجل يموت يعنى ؟؟؟؟

او انه ما كانش يعرفها ؟؟

ابدا عادي

يعرفها وبيكلمها وزي اخته وبعدين لما الظروف اتغيرت حبها واتجوزها او العكس برضه ممكن عادي

فين المشكله ؟؟؟؟

مش عارفه قدرت اوصلكم وجهة نظري ولا ايه

بس اتمنى كده

ومستنيه اسمع ارائكم الى عارفه كويس ان فى ناس مش هاتتفق معايا فى رايي

ويمكن كمان اكون عارفاهم

ههههههههههههههههههههههه

تحياتي لكم يا حلوين