الأحد، 5 أبريل، 2009

ما تحبنيش بالشكل ده ... ما فى اشكال كتيره!!!!

تحدييييث :
انا اسفه اوي يا جماعه على انى اتأخرت فى زيارتكم اليومين الى فاتوا انشغلت والله بالعافيه نزلت البوست ده امبارح والله بعافية العافيه يعنى . وعموما هحاول النهارده الحق ازوركم برضه لكن معلش عندنا فرح الاسبوع ده فى العيله وده بقى ممكن ياخدله بتاع اسبوع كمان من الشغل
ايوه الفرح يوم الجمعه وقبله حنه وقبل الحنه يوم طبيخ للفرح وبعد الفرح الصباحيه يعنى موال كبير اوي بالصلاه على النبى عقبال عندكم والى اتجوز عقبال اولاده سامحووووووووووني يا اصدقائي

السلام عليكم يا مدونينا الاعزاء والى مش مدونين برضه شايفااااااهم :


ماشي يا نورا ؟؟؟ شايفاااااكي ... وبطلي تصيحى انتى وخالو اشرف عند حنان وتجبولي الكلام


وبالمناسبه السعيده دي احب اقولكم ان جدي لامي كان راجل كباره موظف اد الدنيا فى محكمة المنصوره وكان شعره اصفر وعنيه خضرا وحليوه ويشرف اتخنها بلد فيكى يا يا مصر . وطبعا كنت باحبه جدا والله . من غير ما ماما تتكلم ولا نورا واشؤوش يصيحولي كده

هههههههههههههههههههههه

الله يرحمه هو مات وانا عندي عشر سنين بس انا فاكراه كويس .


وده لان ماما زعلانه انى ما جبتش سيرته فى البوست بتاع عيد الام وجبت سيرة جدي لابويا . او يعنى طنط حنان ادتنى اسفين .

حنان مين ؟؟ مالكوش دعوه بقى انا هاحكي قصة حياتي ولا ايه ؟


المهم ندخل فى الرغي بقى الجامد جدا بتاع النهارده :


دلوقتي انا شايفه ان الناس بقى عندها نقص فى فيتامينات الحب .


ايوه بالرغم من انهم ماشين يحبوا فى بعض دلوقتي عمال على بطال فى الشوارع والجامعات والكافيهات .


الا انهم كلهم عيال ركش وهبل ولا بيحبوا ولا يعرفوا الحب والله ده بس من اثار البتنجان المخلل زي ما قلتلكم قبل كده .


احنا بطلنا نحب بعض...!!!!!


اه والله ما تبرقوش كده . بقى اي حد يقول لواحده سلام عليكم يبقى نيته حب من بتاع قيس وليلى ونيته وحشه اساسا وايامه مش فايته .


حتى لو واحد قال لراجل زيه ازيك ياعم ... لا لا مش قصدي كده ... يقولك اكيد عايز مني مصلحه .


نسينا او تناسينا فعلا الحب فى الله

والى ربنا قال ان المتحابين فى الله هايستظلوا بعرشه يوم لا ظل الا ظله مع النبيين والشهداء والصديقين


وما حدش من فضلكم يقولي مافيش حب فى الله بين الرجل والمرأه لانها لا تعقل ابدا


طبع فى حب فى الله بين البشر كلهم لكن طبعا مع الاحتفاظ بالحدود الشرعيه فى العلاقات عموما سواء بين ابناء الجنس الواحد او المختلفين


هاحكيلكم حكايه جايز تفهموا قصدي (شوية لب بقى عشان حكايه طويله )


مره من حوالي اربع سنين كده وجايز اكتر كنت على النت مره وبعد فتره غياب عشان كنت والده رحمه (ده اليوم الى سميت نفسي فيه صبرني يارب )

قوم انا بقى كنت قاعده ارغي مع كذا شخص فى نفس ذات الوقت كالعاده .


واحد عصبني وكنت عايه احدفه بالكي بورد بس انتهت على تسمية نفسي بهذا الاسم صبرني يارب


ومافيش خمس دقايق الاقيلك واحد داخل بيكلمنى برضه سلامات طيبون وهو كان ايامها طفل يعنى حلو كده سبعتاشر تمنتاشر سنه .


والاقيلك الواد عمل فيها عبد الحليم فى فيلم حبيبى دائما ويقولي انا باحبك وما اقدرش اعيش من غيرك



طبعا ما بقيتش عارفه اضحك ولا اضربه ولا اعمل ايه ههههههههههههههههههههه.


المهم بقى عشان انا مؤدبه ما باعرفش اشتم قلتله طريق السلامه يا امور مش ناقصه انا

وبلوك ودليت من الجامد ده .


وتدور الايام وبعد يمكن سنه وجايز اكتر


كنت على الشات وواحد كلمنى ازيك ياامريم سلامات طيبون برضه وكده يعنى .


الامور : انتى مش فاكراني


انا :لا والله معلش انت عارف السن


الامور :طب ده اميلى هو انتى مش بتفتحي الاميل


أنا:لا والله بافتحه بس قلما يعنى


الامور:طيب ضفينى يمكن انتى معاكي ا لميل القديم


انا :طيب ياعم


ضفته الاقيلك الواد معمول بلوك .


انا عائدة اليه على الشات :انت كنت عملت فيا حاجه ياابنى .


الامور :لا ابدا ليه ؟


انا : اصلك معمول بلوك !!


القصد بقى قلت جايز خطأ فني ورجت الواد وقعد يجى شهر يكلمنى عادي ازيكم سلامات اقرا البحث الجديد بتاعي كده يعنى

المهم مره قالي :على فكره انا فعلا كنت معمول بلوك منك وانا فاكر ليه .. هو انتى بجد مش فاكره ؟؟؟


أنا : ايوه يا ابنى هو انا هاضحك عليك ؟! ما انت عارف السن ههههههههههههه


المهم قالي انا كان حصل مني كذا وكذا (هو نفسه الامور بتاع باحبك وما اقدرش اعيش من غيرك ) وانا ماليش دعوه بقى انا برضه باحبك وما اقدرش اعيش من غيرك طيب اعمل ايه .


مش عارفه يا اخوانا انا كنت بافكر اعوره بالموس بس كان عايز يتسن .


المهم ربنا الهمنى كده الصبر كنت بقالي سنه بقى اسمي صبرني يارب


قلتله: يا ابنى الحلال انت صغنون بكره تحب واحده صغنونه زيك وتتجوزها ان شاء الله


وبعدين انا كمان باحب جوزي ومش ناويه اتجوز عليه ههههههههههههههههه


قالي: ما تقوليش صغنووون دي انا مش عييييييييييل انا عندي عشرين سنه واي حد يشوفني بيدنى اكتر من سني.


أنا :طيب طيب يا غضنفر ما تزعلش نفسك . طب قولي ا نت بتحبنى ليه ؟


الامور :لانك حنيه وطيبه ومحترمه .


أنا :طيب انت مامتك موجوده الحمد لله


الامور : اه


انا :طيب لك اخت ؟


الامور : اه


أنا :طيب هما طيبين وحنينين ومحترمين ؟


الامور : طبعاااااااااااا


أنا :طيب بتحبهم ؟؟


الامور: ايوه طبعاااااااااا


أنا :طيب ما تحبنى زي ما بتحبهم ؟؟؟

فى مانع ؟؟


الاموره : مش عارف


انا : طيب جرب كده مش هاتخسر حاجه


وان شاء الله اوعدك لما يبقى عندك 25 سنه وما لقيتش واحده طيبه وحنينه ومحترمه تحبها وتتجوزها هابقى اشوفلك انا عروسه على مسؤليتى الشخصيه


المهم يعنى اتفقنا على ذلك الوضع


والاموره ده دلوقتي الحمد لله بقى من اعز اصدقائي . واتخرج واشتغل وحب وعرفنى على حبيبته وسابها برضه عشان الحنيه كانت ما بتوصلوش اوي من المغرب لحد هنا .. ايوه حب نتاوي من اقاصي الوطن العربي (عقله كان مقضيه على كده وقتها بس هو دلوقتي اعتقد كبر وعقل شويه ولا ايه يا ابنى ؟؟؟)


واينعم هو النداله اشتغلت معاه من يوم ما راح اسكندريه وما عادش بيظهر اوي بس هو واد جدع يعنى ومحترم وزي الفل ربنا يوفقه


وهكذا تم تحويل هذا الحب من حب البتنجان المخلل الى حب اخوي ظريف جدا جدا


والى ما ينفعش يا سيدى عصير اعمله مربى اييييييييييه المشكله


معقدين نفسنا ليه ؟؟؟

ونقعد نقول الحب ما لناش يد فيه


واصل انا حبيت بقى واعمل ايه


ونشغل اسطواننة محمود يس الحب مش بايدينا


وبيجى فجأه زي لطشة البرد




ياا بنى الحب ده ما ينفعش لاي سبب ان كان بقى


يا بنتى انتى كده بتهدي حياتك


تقولك باحبه يا باباااااااااااااااا



الخلاصه ان انا عموما شايفه ان الحب بيجى مع سبق الاصرار والترصد

وان الحب ده ينفع يتحول عادي جدا


يعنى ممكن الواحد يشوف زميلته ويعجب بيها ويبقى خلاص اهو هايعد النجوم

فيكتشف انها مخطوبه او على وشك فيرجع فى كلامه عادي ماهو كان لسه بينه وبين نفسه

ويفضل برضه يعز زميلته دي ويحبها زي اخته عاااااااادي


وجايز برضه ان واحد يحب صديقه او زميله زي اخته تمااااااام بس مافيش ما يمنع ابدا ان لو اتغيرت ا لظروف انه يحبها حب تاني ويتجوزها ايه المشكله برضه ؟؟؟


ليه المواضيع بقت كومبليكس ؟؟؟


الصحابه كانوا بيتجوزوا مطلقات بعضهم واراملهم


ايه المشكله ؟؟؟


هل معنى انه اتجوز ارملته انه كان عينه منها قبل ما الراجل يموت يعنى ؟؟؟؟

او انه ما كانش يعرفها ؟؟

ابدا عادي


يعرفها وبيكلمها وزي اخته وبعدين لما الظروف اتغيرت حبها واتجوزها او العكس برضه ممكن عادي



فين المشكله ؟؟؟؟


مش عارفه قدرت اوصلكم وجهة نظري ولا ايه

بس اتمنى كده


ومستنيه اسمع ارائكم الى عارفه كويس ان فى ناس مش هاتتفق معايا فى رايي

ويمكن كمان اكون عارفاهم

ههههههههههههههههههههههه

تحياتي لكم يا حلوين

هناك 79 تعليقًا:

شمس النهار يقول...

يامساء الفل اوصباح الفل بقا عشان الساعه دلوقتي داخله علي تلاته الصبح
انا جيت اخد التاج اجاوبه قبل ماندخل علي موضوع الحب وسنينه البيضه لاقيتك عامله بوست لطيف اوي
انا متفقه معاكي ليه بتقولي هنختلف
ماهوده اللي موجود دلوقتي لو بنت صبحت علي ولد وكانت عينيها مطروفه شويه وضحكت وهي بتصبح خلاص تبقا معجبه مغرمه مع الاعتذار للأخت نانسي عجرم
والعكس كمان ولما يكتشف انها كانت عينها مطروفه ومش بتحبه يغني ظلموه وتبقا كل البنات وحشين
عموما كل ده هنتناقش فيه سوا في بوستات الحب اصحي معايا ياصبرني وحضري لنا اتنين امناء شرطه كده زوق يقعدوا علي باب المدونه عندي لأي هجوم من مشاغبي التدوين

MaNoOoSh يقول...

انا هتفق معاكى وهختلف فى نفس الوقت
متسألنيش ازاى
ههههههههههههههههه
بس فعلا
المفروض الواحد يحكم عقلة شوية قبل ما يطلق العنان لمشاعرة

فاتيما يقول...

إيه يا صبرنى دا ؟؟؟
بتهرجى
صح !!!
فين محمود ياسين دا اللى بتقولى عليه اومال انا مشوفتوش خالص ليه
انا كل اللى صادفتهم و إدلقت فى حبهم فى حياتى قلبوا على عادل ادهم فى الآخر
و بعدين حب إيه اللى يتحول دا
هوه فيه حب من أصله
أهو أنا بقى مبحبش الماسنجر و الشات و التكنولوبيا دى عشان القصص الى بتحكى عليها يا صبصب ...
أنتى بتعرفى تتعاملى مع المواقف دى أنا معرفشى خالص ...
هخش فيه شمال علطول و أفعل قاموس الشتايم فى فيمتو ثانية ...
فبقول خلينى حلوة و ساكتة و بلاش شات من الآخر ...
آه
لما تنوى تغيرى التمبليت إبقى قولى قبلها
لحسن اول ما دخلت أتخضيت و كنت أرجع لورا تانى ...
مبروك على النيولوك يا ست الستات
خالص حبى بقى

ahmed_k يقول...

هو كلامك بالفعل يحتمل الوجهين الصح والخطأ
طبعا الحكم راجع لمفهوم كل طرف وما يجده في الطرف الآخر من إرتياح وخلافه
لكن في العموم العلاقه بين الرجل والست لابد ان يحكمها ضوابط معينه
فإن تطرقت لأمور الحب فإنهائها أفضل
إلا لو كان هناك أمل أن يتحول الحب لزواج
لكن بخصوص الحب الأخوي بين الرجل والست
فده موضوع كبير
بيدخل فيه النشأه والخلق
والأفضل عدم ذكر كلمة حب فالتكن كأختي بدون بحبك كأختي
أو ممكن تكون معزه كأخت
لأن وجود الحب الأخوي في مثل تلك الحالات
نسبته قليله جدا جدا
ولا تتأتى إلا بعد معرفه لفتره طويله

المهم الموضوع كبير وشائك والحذر فيه واجب

تقبلي خالص تحياتي

عاشقه الرومانسيه يقول...

حلو قوى الموضوع ده
بصى ياستى الصداقه ممكن تتحول لحب
لكن العكس؟؟؟؟؟؟؟
لا اعتقد
اما بالنسبه للامور اللى اتكلمتى عنه فده حبه كان حب مراهقه وده مع الوقت بيروح لوحده ومش بيسيب وراه الا ذكريات

عجبتنى بقى قوووووى الجمله دى
والى ما ينفعش يا سيدى عصير اعمله مربى ايه المشكله
ههههههههههههههههههههه
انتى شربات

Anonymous يقول...

موضوعك فعلا من قبيل الرغى

لكن لو بتحترمى الرأى الاخر زى ما بتتدعى اعرفى ان فعلا

مفيش حب فى اللة بين الرجل والمرأة

حتى لو قالت واحدة لشيخ انى احبك فى اللة( رد الشيخ الربانى ان ليس فى حب فى اللة بين رجل وامراة )

اما لو حبيتى تعرفى اية الفرق بين الشيخ والشيخ الربانى فانا ادرك انك تعرفى الفرق جيدا بحكم اطلاعك


ولان الكلام فى الدين بيكون فى مواقع الرغى تقيل على القلب

انا حبيت بس اوضح النقطة دى علشان فى ناس ممكن تعتقد ان صاحبة الموقع مع الاحترام الكامل لها

رايها مبنى على اسس سليمة او قاعدة شريعية

طبعا قد ياخذها الحماس ودة المتوقع للرد

الموضوع مش موضوع زعامة او تمسك بالراى

الموضوع ان فى ناس كثير بتقرا وجايز ميعرفوش الحكم

ممكن يأخذوا رايك على انة الراى السليم مع الاحترام الكامل لشخصك

تحياتى

اما موضوعك

فعندك من الردود ما يشرح صدرك

عمرو يقول...

أسعد الله صباحك يا ست أم خالد و دمتى و الأسره بكل خير ..
كل مرحله سنيه و لها عجايبها اللى ممكن نعتبرها ضرب من الجنون :))
تلاقى دايما النظره بتختلف و المشاعر بتتغير من مرحله للتانيه على حسب شخصية الفرد و أهواءه حتى الوصول لسن النضج النفسى و العاطفى فبتستقر الأمور اٍلا للقله المضطربه نفسيا و دول لا يجوز القياس عليهم ..
اٍستقرار المشاعر الحقيقيه محتاج لوقت و خبره حتى تنضج تماما فلا تؤذى صاحبها بتخبطه ..
موضوع البوست ده مهم جدا على فكره و أرجو أن يستفيد منه الكثيرون ..
و شكرا ..

reem يقول...

صباح الخير يا صبرنى
ازيك يا جميل ؟

بصي يا ستى موضوعك بجد يجنن

انا شايفه وطبعا دا رأيي لان انا عارفة زى ما قلتى ان في كتير هايختلفو معاكى ومعايا في الرأي دا انا بئا شايفه ان في فعلا صداقة واخوة وحب في الله بين كل البشر على احتلاف جنسهم زى ماقلتى يعنى دا ممكن جدا يكون موجود بين راجل وست وبكل احترام .. ليه لأ ؟

اصلا انت بتحب الشخص في الله ازاى مش بتحبه في الله عشان بتلاقيه انسان محترم ورأيه وافكاره ودماغه بتعجبك وقبل كدا بترتاح له وبتحس انه بيبادلك نفس الشعور طيب ماهو كل عادى ممكن يحصل بين راجل وست وبردو بكل احترام

احنا اللى دايما عقولنا بتبص للوحش يعنى لو شفنا صداقة بين راجل وست ممكن نعتبرها حاجة وحشة وانا مش اقصد صداقة يعنى يخرجو يسهرو مع بعض ونقول عادى لا انا اقصد تعامل محترم بين الطرفين


انا مع جوزى عمرى ما طلبت منه انه ينهى صداقته مع الستات اللى بحس انهمفعلا محترمين بل انى كمان اصبحت صديقة لهن وهو اللى انشغل ومش بقى يكلمهم وانا وهما فضلنا اصدقاء هههههههههههههه

ولحد دلوقتى ليا اصدقاء وبحترمهم وبيحترمونى جدا يمكن بنتكلم على فترات متباعده لظروفنا اللى اتغيرت طبعا ومشاغلنا بس اخوتنا لسا موجودة وصداقتنا وبمنتهى الاحترام

اما الحب بئى فكل الشباب والبنات عاوزين بس يحبو حبا في الحب نفسه مش في الحبيب عشان كدا بتكون كلمة سهل يقولوها وسهل ينسوها

ايه دا هو انا رغيت كتير كدا ليه ؟

انا هامشي بئى قبل ما تضربينى

بوست حلو بجد اوي

الطائر الحزين يقول...

قدر صادق الخطى

=========
فين زياراتك؟

mony يقول...

والى ما ينفعش يا سيدى عصير اعمله مربى ايه المشكله



ههههههههههههههه


دمك سكر يا ام مريم
بحبك في الله و الله يا صبصب


بس للاسف انا مايمشيش معاي الكلام ده بتاتا البته


يمكن علشان اتربيت علي العزلة لحد ما دخلت الجامعة
الله اعلم


ابويا و امي ربوني علي ان الولاد كلهم كخ
و دماغهم عادة مش كويسة
(الا من رحم ربي)
و اللي رحمهم ربي دول مش مكتوب علي وشهم
فللاحتياط برضه نعتبرهم مع اللي دماغهم مش كويسة

و لما جيت اتجوز يا اختشي قالولي الولد ده كويس و الباقي لسة متعلم عليه


و بصراحة يا صبصب انا لما دخلت الجامعة شفت بنفسي المناظر
و بصمت بالعشرة علي كلام ابويا و امي


اما بخصوص الصحابة انهم كانوا بيتجوزا مطلقات و ارمل اصحابهم
فدول عقليتهم حاحة تانية خاااااالص
مش هنعرف نوصلها ابدا

مثلا كان الراجل يتجوز ارملة صديقه عرفانا بجميله و صداقته ان صديقه ده مثلا استشهد في سبيل الله و ترك و رائه زوجة و اولاد
بالبلدي كده مش عايز مراته و ولاده يتمرمطوا من بعده

و كانوا لما بيطلقوا لا يعيبوا في مطلقتهم ابدا بل يشكروا فيها و في اخلاقها و حسن معاشرتها


انما الحب في الله بين الرجل و المرأة
في الوقت بتاعنا ده
في عصرنا هذا

محدش هيعرف لا يفهمه و لا يطبقه

لجين أبو الدهب يقول...

اننا متفقة معاكِ فى نقطة ان الحب ممكن يتحول وبتحصل كتير اودامنا ..

ان واحد يكون واخد واحدة زى اخته بس يحس ناحيته بشعور تانى ويبتدى يحبها ..

ومش لازم يكون كان ميت فى دباديبها من الاول ولا حاجة بس هو ساعتها بيكون القدر ..

انما الشق الاول من البوست يعينى ممكن اعترض عليه شوية على مسألة الحب فى الله بين الراجل والست لان لو سلم فى حالة مش هايسلم فى مية حالة ويبقوا اتنين وادم عينينا وكل اللى يكلمهم انا بنحب بعض فى الله ويومين ويبقى العلاقة بينهم ملهلهبة ..

فالطريق ان سلم مرة ومشى حب اخوات عادى مش هايسلم فى كل المرات ويكون مدخل كبير للشيطان ..

دمتِ بخير ..

ِِAdem El-Mahdy يقول...

الحب ..هو عبارة عن شويه تصورات و قناعات فى عقل الانسان

و مع الاحتكاك و التعامل اليومى مع الناس
القناعات دى بترسخ
او بتنهار

بمعنى

انا شفت واحدة

عاجبنى اسلوب كلامها و شخصيتها ...عجبتنى

و بعدين ماشفتهاش

خلاص

انتهت...ممكن اكون فكرت فيها شويه
لكنها ..بعد اول احلال هتتنسه

=====
انا مش مع حضرتك فى الصداقة بين الولاد و البنات

مش قصة دين بس

لا

هى قصة بيلوجية

ربنا سبحانه و تعلى خلق الرجل بكميا معينه و المرأة بكميا معبنة

فلو الكميتين ولفوا على بعض ، هتحصل مشاكل

وما اكثر المشاكل الان

مش خيانةو العياذ بالله

لكن ، تصورات دماغيو الكلام ده

جايز حضرتك تختلفى معايا فى الكلام ده و تقولى انا بعرف اعمل الكنترول ده

اتفق معاكى فى النقطة دى

ان حضرتك بتعرفى تعملى الكنترول

لكن حضرتك تضمنى منين اللى قدامك فى عقله عامل كنترول

حتى لو هو مهذب من جوه

طولت

لكن انا شايف من تقديس الاسلام للحب

جعله فى صوره الطبيعية

الصور الامومة و الاخوة و الاخوة فى الله بين الرجل و الرجل

و طبعا العلاقة المقدسة بين الرجل و زوجته

بس

ستيته حسب الله الحمش يقول...

الرد مقسم عشرين جزئية

صبرها يااااااااااااااارب

اولا مقرتيش حدوتي الملتوتة في الرؤية المصرية ويا تلحقي يا ها تدفعي 1000 جنيه حسبوللي ستيتي

ثانيا لأني ست على قدي ولست ذو حجة قوية وكمان مرارتي مفقوعة ومش دارسة لا فلسفة ولا علم نفس مش ها اعمل مع عزيزي المراهك الزغير زيك خالص .. انا احب اعيش بروقان دماغ .. الي يتجاوز ويبقى مريض نفسي يطلع بره

انا ايه اللي يخليني أدوحر مع واحد يقول لي احبك وانا متجوزة "الأكشين مليش فيه هع هع هع" على رأي موجة كوميدي

حكاية انه يتحول لحب أخوي .. لأ ميتحولش ابدا مهما أدعى .. والمريض ها يفضل مريض ويخبي نفسه لما الست تطلع ضوافرها وتسن سنانها علشان تعض


ولتسمحي لي سيدتي "شفتي الحتة دي متقوليش عبد الوهاب مطاوع" أن أقول لمستر أور مسز غير معرف
اللي يخاف ميعلقش
اللي جريء يقول رأيه وهو معرف
الشيوخ الربانية؟؟؟؟؟؟؟؟
على أساس بقية الشيوخ بيعبدوا بقر؟
آآآآآآآآآآه صبرني تعرف الفرق؟ طييييييييييييب

وحكاية أنك تختلف مع صبرني وهي ها يبقى عندها من الردود ما يريح صدرها
فاي حد ممكن يختلف او يتفق او يضيف لما قيل او يضع حكم شرعي او يضع رأي شخصي والست مش ها تعمل فيه حاجة ولا حاجة

هي عاوزة تبين وجهة نظر بقولها متحبنيش عصير واعتبرني مربة وخليها أخوه في الله تبقى احسن

وعلى رأي منوش اللي عندها حصبة اتفق معاكي ان فيه خمسين شكل للحب
اختلف معاكي في الموقف لأنه باب شبهه ووجع قلب وحكمه يقول لنا عليه الشيوخ
.
.
.
.
.

آه اسم الله عليكي الربانين على اساس انك فاهمة الفرق .. انا مش فاهمة حاجة وصبرني يارب
وكل عام وانتم بخير

صبرني يارب يقول...

شمس النهار

حلوه عينها مطروفه دي
هههههههههههههههههههه

ويا شموسه ايوه ما انا قلتلك على البوست ده
وامناء شرطه مين ؟؟
اقل من لواء يا باشا مايجيش
هههههههههههههههه

نورتي يا قمر

صبرني يارب يقول...

مانوش

ايوووووه ادي اول اختلاف اهو يحكم عقله انما يحب اساسا بعقله كلاالبت
اصل الحب ده كائن هلامي ما بنقدرش نتحكم فيه

هععععععع

ههههههههههههههههههه

نورتي يا منوشه

صبرني يارب يقول...

بيبرس

الله يسلمك يا اخويا لا جت سليمه
ههههههههههههههههه

وايه يعنى بس بيتحول برضه

صبرني يارب يقول...

فاتيما

يا حبيبتى ا لله يبارك فيكى

صدقينى ما كانش قصدي
هههههههههههههههههه

اناكنت باحاول ا نزل تمبلت عندي مش راضي ينزل قلت طب اغير التمبت الى موجود بحاجه تانيه كده المهم فى الاخر رسيت على كده

وبالنسبه للحب والله موجود يا فاتيما كفايه حبك ليوسف يا طمطم الحب اكبر من انه يكون بس حب عشاق

وبعدين ماله عادل ا دهم
هههههههههههههههههه كان زي العسل والله
والماسنجر والشات زي ما قابلت عليهم ناس ضايقوني قابلت كمان عليهم ناس محترمين جدا جدا وكسبت صداقات حلوه وكل مكان فيه الوحش وفيه الحلو المهم احنا عايزين مين هانلاقيه

نورتي يا جميل

صبرني يارب يقول...

احمد كيه

اهوووووو يا جودعان انا ما قلتش حاجه

اه طبعا ما قلتش ده كان فى بالي بس

اهو احمد كيه قالك ما ينفعش نقول حب

ليه يعنى يا استاذ احمد هيه كلمة حب دي عيب ؟؟

هو انا لما اقول لحضرتك انا باحبك زي اخويا بالظبط ايه المشكله فى كده ؟؟؟؟

بنخاف من الكلمه وحاسينها عيب وحاسين الحب ما ينفعش الا حب نوع واحد بس
ليييييه

تحياتي لحضرتك ونورت

صبرني يارب يقول...

عاشقه الرومانسيه


انا معاكي فى النقطه دي على فكره ان الصداقه ممكن تتحول لحب

انما العكس صعب

صعب اه انما ممكن

بس الحكايه محتاجه ناس دماغها كبيره اوي وعقلهم وفكرهم عااااالي جدا

وايه رايك فى المربى طلعت حلوه ؟
هههههههههههههههه

نورتي يا قمر

صبرني يارب يقول...

غير معرف

مع احترامي الشديد لك

والله ما كنت هازعل منك لو كنت قلت الكلام ده باسمك ا لى انا اعرفه

مالوش لازمه تدخل من غير اسم

وطبعا انا باحترم الراي الاخر

وطبعا انا كلامي مبنى على اسس شرعيه وهات دليلك انت على ان كلامي غلط وان مافيش حب فى الله بين الرجل والمرأه

من القرآن والسنه من فضلك مش من كلام الشيخ الرباني

وعلى فكره مااعرفش الفرق بين الشيخ الرباني ولاى مش رباني

والكلام فى الدين عمره ما يكون تقيل على قلبي فى اي مكان يا فندم والله

واي حد ياخد كلامي على انه الراي السليم من غير ما يدور ورايا فى اي حاجه مش فى الدين بس
لكن طبعا فى الدين بوجه خاص
يبقى غلطان طبعا

انا عن نفسي ما باخدش كلام فى الدين على لسان اي حد وابصم عليه كل منا يؤخذ منه ويرد عليه

الا اني اختلف مع حضرتك فى حظر الحب فى الله بين الرجل والمرأه

والا تقدر تقولي فى حال وجود علاقه معرفه بين الرجل والمرأه فى مجتمع اسلامي لا يرفض من وجهة نظري المتواضعه برضه
تواجد المراه فى المجتمع عامة
يبقى العلاقه دي نوعها ايه ؟؟؟

عموما انا كتبت موضوع كامل عن العلاقه بين الرجل والمرأه الاجنبيين على الرؤيه الاسلاميه ياريت حضرتك تطالعها

ولتاني مره باقولك وباقول لكل الى بيقرا هنا انا طبعا كلامي مبنى على اسس شرعيه
انا مش عبيطه عشان اتكلم فى امر دينى وانا مش عارفه عنه حاجه

وانا معاك اهو يا فندم انا وكل الى الناس الى قرت كلامي
وباقولك هات دليلك بنص من القرآن والسنه على ان الحب فى الله مقصور على ابناء الجنس الواحد

تحياتي لحضرتك ونورت

صبرني يارب يقول...

الطائر الحزين

والله والله انا اليومين دول مشغوله خاااااااالص فاعذورني معلش كلكم لكن انتم عارفين مش بافوت

على فكره دخلت مدونتك بالفعل بس ما اسعفنيش الوقت اكمل

نوووووورت والله

صبرني يارب يقول...

استاذ عمرو

شوف يا فندم احنا نقدر نقسم ا لحالات الى 3 حالات

حالات بيفضلوا على نفس القدر من الرعونه فى مشاعرهم وحبهم وفكرهم

وحالات بيعقلوا عند سن النضج اوك

وحالات تالثه بيبقى اساسا تفكيرهم كده صح من اولها
ما يمنعش ان بيكون فى الاول حالة ترقب يعنى يا ترى مين الفريق الصح ؟؟؟ لكن الكلام ده بدري بدري وقبل ما يدخل فى تجارب فعلا

تحياتي لحضرتك ونورت

صبرني يارب يقول...

ريم

لا يا بطه هنا موطن الرغي الاساسي ارغي براحتك يا قمر

واتفق معاكي تماما

رغم انى كفرد من هذا المجتمع اثناء فترة الجامعه رفضت فكره الصداقه بين البنت والولد

لسبب بسيط لانى مش شايفه الى كان بيحصل فى الجامعه صداقه خالص ده كان فى بتنجان مخلل وانتى عارفه انا ما احبوش فى الجامعه احبه فى الاكل بس ههههههههههههههههههه

نورتي يا جميل

صبرني يارب يقول...

موني

استنينى على الاميل هاجي اضربك
ههههههههههههههههههههه

منتهى الاعتراف بالراي الاخر

ههههههههههههههههه

بصي اكتر كلمه بقى بتطلع مجانينى

الرسول كان بيعمل كذا .

الرسول ؟؟ طب وهو احنا زيه

الصحابه كانوا كذا .

الصحابه ؟؟ هو احنا زييييييييييهم


طيب المفروض نكون كذا .
فى الزمن ده ؟؟؟ مش مممممممممممكن


ليييييه طيب

طب نبقى زي مين
ونرفض الصح لييييييه ما دام صح

انا باقولك اهو انا واحده من الناس رفضت الصداقه اثناء الجامعه لان تسعه وتسعين ونص فى الميه من الشباب كانوا دماغهم مفرقعه وبيحبوا على نفسهم اساسا
والنص فى الميه بقى كانوا ما بيجوش الكليه اصلا ههههههههههههههههههههههه

انا هنا بقى باقول ايه ؟؟؟

نصلح عقلنا وفكرنا لو سمحتم ونضف نوايانا شويه

فى حاجه دي ؟؟؟

نورتي يا موني زي بعضه
ههههههههههههههههههههههه

صبرني يارب يقول...

لجين ابو الدهب

يا ست الكل لما تبقى تلهلب العلاقه والامور عاديه يبقوا يتجوزوا بقى ولا هما حرين

انما ما تجيش تقوليلى واحده متجوزه وبعدين تحول الامر لحب
ده طبعا يبقى استهبال

وصدقينى مش غصب عنهم ولا حاجه بمزااااااااااجهم

وطبعا طبعا كل واحد ادرى بنفسه وزي ما دايما باقول

كل واحد عارف فتنته فين يسد باب الفتنه
فى واحد بيفتن بالمال وفى واحد بيفتن بالنساء وفى واحد بيفتن بالاكل
مثلا مثلا يعنى

الى شايف انه ما يقدرش يعمل كده وهايتفتن ما يعملش

انما بقى مايحكمش على غيره انه عشان هو يقدر يعمل كده انه يبقى على خطأ

كل واحد ادرى بنفسه فى الامور دي

فاهمه كلامي ؟؟؟

صبرني يارب يقول...

آدم المهدي

طيب يا فندم وانا مالي ومال دماغ وتخيلات الشخص الى قدامي

ماهو حر مع نفسه

طيب ما انا ابطل امشي فى الشارع بقى افرض واحد خياله مريض تخيل حاجه كده ولا كده ؟؟؟

انا صحيح لو حسيت من شخص ما انه هايهبل بقى وهايعيش الدور ممكن اسكه على راسه عااااااادي

لكن كمان لو كان هو معايا شخص محترم فعلااااا مش انا باستهبل واستغبى واقول عليه محترم معايا وهو مش كده

خلاص

حتى لو كان ده ظاهره وانا مش عندي فراسه وباطنه الفساد الفكري

طيب برضه وانا مالي ؟؟؟
اتحاسب ان بداله ليه ؟؟؟

والكميا الي حضرتك بتقولها دي نفس فكرة الحب مش بايدينا والحركات دي يا فندم

لان الصداقه كمان محتاجه توليف كميا حتى لو كانت بين راجل وراجل

طيب ما ايه رايك بقى نمنع الصداقه بين الراجل والراجل ا حسن يكون فيهم واحد له ميول جنسيه شاذه وتنشأ بينهم علاقه ولو فى خيال احدهم ؟؟؟

والحب والاخوه فى الله ما زلت شايفه انه مافيش مانع يبقى بين الرجل والمرأه
بسسسسسسسسسسسسسس بالشروط ا لى انا اتكلمت عنها قبل كده فى الرؤيه كشروط لاي علاقه عموما بين الرجل والمرأه

تحياتي لك ونورت

صبرني يارب يقول...

سوووووووووتيته حياتي

أولا يا جميل ده مش مريض والله ده بس مراهق ده كان عمره 18 سنه او اقل حتى طفل يا ستيته
والاطفال احباب الله
هههههههههههههههههههههههه

صدقينى الكلام ده لو كان صدر من حد كبير شويه كنت هاسفره تذكرة ذهاب بس ومش هاطول معاه

واساسا الاخ ده انا كنت سفرته بس القدر كعبلنى فيه تاني

وعموما انا يمكن ليها فلسفه خاصه فى التعامل مع الناس 0

واختلف معاكي فى النقطه دي وينفع يتحول والله بس احنا الى مش بنفكر كده اصلااااا
وما زلنا حاسين ان الحب ده كائن هلامي ما ينفعش نتحكم فيه

وبالنسبه للاخ الغير معرف

انا بس زعلانه منه لاعتقاده الراسخ اني جايز اخد منه موقف لما يقول هو مين بجد دي حاجه مخليانى اضايق انه يفكر ان ممكن يكون دماغي كده

انا باتكلم مع كل الناس واسمع كل الناس على اختلاف طبايعهم وفكرهم واقبل الى اقبله وارفض الى ارفضه ومش باصادر على راي حد

على فكره انا عندي واحد على الاميل ملحد
اينعم انا مش باحب اكلمه لكن مش عارفه انا سايباه على الاميل ليه
احيانا بندخل فى مناقاشات انا عارفه انه واهيه حالا

لكن انا باحس كتير انى منتصره عليه فى الحديث وده بيسعدنى واقول جااااااااايز ربنا يلهمنى واقوله كلمه تغير فكره الى انا اسااااااسا شايفه مش مستقر على لالحاد ولا نيله ده اهبل

خرجنا من الموضوع يا سوتيته

وموضوع الرباني ده

يظهر ان الاخ الغير معرف معشم فى معرفتي جامد

بس انا والله يا سوتيته وحياتك عندي يا اختي ما اعرف ايه الفرق بين الشيخ والشيخ الرباني ده

اسالي وقوليلى يا اختي انتى عارفه انا قرويه وساذجه وست بيت وتعليم جامعي مجاني يعنى من الاخر ماليش الى فى البتنجان المخلل

هع هع هع
نوووووورتي يا جميل

mahasen saber يقول...

احمدك يا رب انى مبدخلش الشات والميل كتير


عبال فرح اولادك يا جميله

وحاضر هقبل التاج مقدرش ااقولك لا يا قمر

mahasen saber يقول...

بسفرحتينى يا صبرنى بمجرد ذكر كلمة فرح فى البوست

شكلى بشمشم على فرح
الحياه بقت مره قوى ساعات كتير فبيحليها انك تحضرى فرح لحد تعرفيه او عزيز عليكى او حتى متعرفهوش اصلا

بس مجرد انك تشوفى السعاده على وشوش الجميع

صبرني يارب يقول...

نورتي يا محاسن والله

بس هو مش قصة حضور زي ما قلتلك المواضيع اكبر من كده
هههههههههههههههههههههه

تحياتي ليكى يا قمر وعقبال فرحك يارب

Soooo يقول...

الف الف مبروك الفرح
وربنا يجعل ايامك كلها فرح وسرور يارب

وانا لا مؤااخذه عايز اجي عشان اكل
ولا هو فرح من الافراح اللي الواحد يبقى جايب اكلو معاه؟؟؟؟؟




سلامووووووووووز

خايف من الحقيقة يقول...

السلام عليكميا ام مريم يا غاليه
اولا
دعوتك التحريضية ضدي ومحاولتك لضم ست الناس لفريق المحرضين مش هتخوفني لسبب بسيط ان انا نفسي ارجع ادون تاني بس بجد مش قادر اتحمل مسئولية الرجوع بدون ما اكون واثق من الاستمرار بشكل يرضي ربنا اساسا

ثانيا اذا كانت القصة اللي عند فاتيما ابكتك فده لانها حقيقية وصادقة واتمنى بجد من اولادنا يتعلمو منها حاجة مفيده تنفعهم في مستقبلهم

ثانيا
شكررررررررررررررررررا جدا لزوقك واخلاقك وكرمك واوعدك اني هحاول ارجع
ودمتي بخير انتي والاسرة الكريمة

القدر و انا يقول...

صبرنى
اتفق معاك ان هناك من حب الاخوة والجدعنة بين المراة والرجل الكثير
ودائما البداية الصحيحة هى الطريق لعلاقة صداقة ومودة محترمة
نحن لسنا فى غابة
وفى رايى ان السيدة او البنت تستطيع ان تفرض شكل العلاقة وبنودها وان تلزم جميع من يتعامل معها على ذلك
موضوعك جرئ وشيق
لك تحياتى

Ahmed يقول...

نتفق أن طبعا في حب في الله
نتفق أن فيه حب في الله بين واحد وواحده

لكن وعلى المستوى الشخصي صعب على مخي البسيط في تفكيره أنه يفهم يعني ايه حب بين واحد وواحده في أي عمر

انا مثلا ليا زميلات في العمل, وأنا فعلا بقدرهم وبعتبر علاقتي معهم في الله. بنتكلم في أشياء كتيره حتى في الزواج
عمرنا منخطينا الحدود
بس ده في الأساس لأ اعمارنا مختلفه بالشكل اللي تجعل من الصعوبه قبول تشكيل العلاقه ديه بشكل تاني

لكن لو الأعمار متقاربه بشكل مختلف فعلاقتي معاهم بتكون علاقه زماله عاديه جدا. لأن ده فيه نوع من حفظ النفس (على الأقل بالنسبه ليا)

جايز تكون حالتي مختلفه عن حالات ناس كتيره

بس زي ماقلتلك, تفكيري البسيط بيعتقد كده

احساس طفلة محبة للرومانسية بس واقعية يقول...

انا هختلف معاكى فى جزء ومتفقة فى الجزء التانى
هتفق معاكى ان الاخوة ممكن تتحول لحب وزواج زى صديق العائلة ما ممكن يكون زوج بعد كدا بسبب حالة طلاق او ان الزوجة تكون ارملة
ممكن زميل العمل يتحول لزواج ناجح وحب متبادل
ينفع يكون فى اخوة وحب فى الله بين الزملاء او اصدقاء الاسرة او العائلة

بس لو حصل ان الحب دا كان حب رجل لأمرأة يبقى صعب يتحول ويكون حب اخوى او حب فى الله ربنا عالم بالنفوس بس من وجهة نظرى دا صعب وبيكون فى فالنفوس شوية حاجات كدا مش اخوية مهما الطرف اللى كان بيحب دا حاول انه ينقى نفسة

مش بحب التعليق بغير معروف ويكون الرد بالسلوب دا واذا كان لحد رأي مناقض
وعايز يختلف ومقتنع انه فاهم يرد بتعقل ويقول رأية بدون كلمات ونقد لاذع فى حاجة اسمها حوار وتفاهم واحترام لرأي الاخر ومشاعرة

اعذرينى على تدخلى يا صبرنى
:)

تقبلى مرورى

صبرني يارب يقول...

سووووووو يا سوووووو

لا حابسهوش حبيبى لسه هنا الحمد لله

ايه يا ولاد النور ده
وشك ولا وش القمر يا استاذنا

انا كنت عندك فى المدونه النهارده يادوب شوفت الكرسي الى انت شاحته من الصباغ وما لحقتش اقرا شقتين الفول


وبالنسبه للاكل فى الفرح والله يا اخويا ما اعرف الفرح نفسه فى اكل ولا لا

بس يعنى هو فى يوم الحنه اكل فى بيت العريس
تعالى ياعم ولا يهمك فى اكل بالهبل واحنا الى هانطبخ يا اباااااااااااااا

صبرني يارب يقول...

خايف من الحقيقه

ايه ده النور ده

هو احنا لازم نيجى نهدد كده عشان نشوفك


وبعدين يا سيدى احنا بنكتب ونجتهد واجرنا على الله بقى

مش معقول نخاف نكتب احسن نغلط

ومتشكره لكلام حضرتك الذوق اوي ومستنيين نشوف جديدك دايما

صبرني يارب يقول...

القدر وانا

انا كمان اتفق معك وبششششششششده

تحياتي لحضرتك

صبرني يارب يقول...

احمد ابو العلا

ايوووووووه تمام كده

كل واحد حر فى دماغه بقى وطريقته فى الحياه

وبعدين عارف ليه انت علاقتك مع زميلات الى من عمرك مختلفه ؟؟

عشان فى عقلك وعقل الجميع انه ممكن تكون العلاقه دي حاجه تانيه

فتبعدوا عن الحب وتغنوله

مش الحب بس لا حتى اشاعات الحب

يعنى انا مش هاتكلم مع زميلتى دي كتير
احسسسسسسسسن الناس تقول حاجه

وعموما انا مش ضد السياسه دي بالعكس
انا عن نفسي كنت باعمل بها وانا فى الكليه

عشان اريح دماغي

نوووووووووورت

صبرني يارب يقول...

احساس طفله

يا بنتي فى فرق بين كونه مجرد حب من طرف واحد او بدايات حب وكونهم مثلا اثنين حبوا بعض خمس ست سنين ولا طالوش

دي الى ممكن تبقى مشكله

وفى الحاله دي ممكن اه يفضلوا برضه يحبوا بعض حب يحاولوا يكون حب فى الله فعلا لكن لازم لازم يبعدوا عن بعض

طول ما هم قدام بعض مش هاينفع كل واحد فيهم يعيش حياته

وكمان لما مثلا مثلا واحد يعجب بواحده ويبدا يحبها بينه وبين نفسه وبعدين لما مثلا يصارحها تقوله مثلا والله ده انا خطوبتى بكره وانت معزوم يا معلم

فايه المشكله انه يفضل يحبها برضه ويعزها بس زي اخته ؟؟!!!


انا مش باقول ان ده سهل او ممكن عند كل الناس

انما هو ممكن

وبالنسبه لغير معرف انا رديت عليه خلاص وبرضه هو حر فى رايه فيا وفى المدونه

ابوزيد يقول...

المشكله انك جيت على وتر حساس انا متزوج وبحب زوجتى اوى بس بحس ان قلبى مفتوح للجميع وعاوز يحب المشكله بقى ممكن ابكون زى الامور الصغنون اللى قلتى قصته ولو المدام شافت الرد هتبقى مشكله ومش هدخل المدونه تانى استريحتى كده يا ام مريم بعد البشاميل انطرد بالطريقه دى هههههه بجد مش هزار عندى مشكله عويصه اوى فى الموضوع ده بس مش هينفع اقولها هنا لو فى طريقه وتحبى تعرفيها يمكن كون عندك حل بلغينى فيها

حواء يقول...

استفزني كلامك اوي ياصبرني يافرساااااااااني
مفيش حاجه اسمها صحاب أو اصدقاء أو بنحب بعض في الله بين راجل وست
وإلا مكنش القرأن قال ولا متخذات أخدان
وياريت ياجماعه اللي يعلق هنا بغير معرف يعلق بزوق اكتر من كده شويه
وبلاش الهجوم الارض جو
وبلاش شغل انا مضايق منك ادخل بغير معرف افقع كلمتين واجري علشان متغاظ
ولو عندك تفسير للأيه اللي في القرأن ديه غير الصحاب والاصدقاء بين الراجل والست
واللي بقت موضه نسميها الحب في الله علشان كده اشيك واحلي
عايزه التفسير من مصدر موثوووووق يام مريم
ومبروك ألف مبروك علي الفرح مع اني معرفش بتاع مين ههههههههههه




سوتيته الف سلامه علي بنتك
شفاها الله وعفاها

صبرني يارب يقول...

ابو زيد

والله يعنى ابعتلي مراتك وانا اضمها للجمعيه عشان تعرف تتصرف معاك

وانا بصراحه مش عايزه اعرف ههههههههههههههههههه

حب الناس كلها يا سيدى ما حدش هايقولك حاجه

وابقى قولي اخبار المكرونه ايه

الضاحكون يقول...

فعلا اللى ما ينفعش عصير اعمله مربى
هههههههه
جامدة قوى قوى
البوست رائع يا ام مريم
تحياتى
خالد همس الاحباب

صبرني يارب يقول...

حواء

ايه ياماما الى جابك هنا مش فى امتحانات ولا ايه

يلا زي بعضه

نعم ... لا نعم يعنى ؟؟؟؟

هو ايه الى جاب القلعه جنب البحر يا بنتى ؟؟؟

ايه الى جاب متخذات اخدان للموضوع الى بنتكلم فيه ؟؟؟

متخذات اخدان وردت مرتين على حسب علمي

الايه الاولى بتقول:

فانكحوهن باذن اهلهن واتوهن اجورهن بالمعروف محصنات غير مسافحات ولا متخذات اخدان

والتانيه :والمحصنات من الذين اوتوا الكتاب من قبلكم اذا اتيتموهن اجورهن محصنين غير مسافحين ولا متخذي اخدان ومن يكفر بالايمان فقد حبط عمله وهو في الاخرة من الخاسرين


متخذات اخدان فى الاثنين نفس المعنى

اخدان هنا جمع خدن والخدن هو الصاحب او الرفيق

مش عشان قلنا حب فى الله يبقى صداقه ويبقى صداقه يبقى صحوبيه وما دام صحوبيه تبقى كده

لا طبعا هنا صاحب = عشيق

وده موضوع تاني خاااااااالص مالوش علاقه يا بنتى بالى احنا بنقوله

هو قص ولزق ولا ايه ؟؟؟

وعيب عليكى لما تقوليلي بقت موضه ونشيكها وتبقى احلى

مش انا الى ممكن اعمل كده وما زلت باقول هاتوا دليلكم على ان الحب فى الله الوارد فى الاحاديث مقصور على ابناء الجنس الواحد


قال نشيكها قال ياماما كنا عملناها واحنا صغيرين عيب عليكى

روحي يا بت ذاكري خلينا نخلص من قصة المذاكره بقى

صبرني يارب يقول...

خاااااااالد

ايه ده معقوله البدله بتاعة الضاحكون لايقه عليك موووووووت

بس هى فيها نص متر طول زياده بس مش مشكله هى اول سايز برضه

هههههههههههههههههههههههه

تحياتي لحضرتك ونورت

فشكووول يقول...

صبرنى يارب .. السلام عليكم
ممكن الكلام اللى قلتيه فى الاول اللى هو الحب بين جنسين .. ودا الشيئ الطبيعى

وممكن برضه الموضوع الثانى حب الجنسين لبعض فى الله (زى اخته او امه)

والحالتين الاثنين ممكن برضه ينفعوا مع ناس وما ينفعوش مع ناس .
لان الناس عقولهم مختلفه وعواطفهم مختلفه ولا يمكن طباعة ناس بالاكلشيه
يعنى ممكن تلاقى هذا وتلاقى ذاك
وتختلف الطباع من شخص الى شخص
وتختلف العواطف ايضا .. وايضا الوجدان
لكن فى النهايه العلاقه بين الرجل والمرأه لابد وان توزن بمعيار الدهب
وشوشو اعوز بالله منه نشيط قوى فى كل زمان ومكان
ومهما رجمنا شوشو برضه بيكون نشيط

وتحياتى

صبرني يارب يقول...

استاذنا الغالي فشكول

انا معاك تماما فى رايك طبعا

بس انا ليا راي فى الموضوع ده ان كل واحد وله فتنته الى هو عارفها كويس
والمفروض انه يرجع وقت ما يحس بالخطر

وانا عارفه تماما زي ما قال الرسول عليه الصلاة والسلام

ان الشيطان يجري من ابن ادم مجري الدم .

انا كل الى باطلبه من الناس هو انهم يحاولوا يكونوا كده وما يضيقوش الخناق على نفسهم بمعنى حصر الحب فى شكل واحد ومعنى واحد والا فلا

حواء يقول...

يابنتي عيييييب
انا مقصدكيش خالص بموضوع نشيكها ديه
انا اقصد نشيكها للأناس اللي بتعمل كده ومن شكلها يبان عليها التدين زي المنتقبه اللي زي والملتحي وانتي عارفه بقي
وعلشان ميتلموش من اللي زيهم ويعرفوا الدين كويس أوي ويوقللهم انتوا مجرد منظر فبيقولوا حب في الله
أنا اسفه بس والله مقصدتش خالص عليكي
يارب تكوني فهمتيني



صدقيني ياصبرني بقت فعلا الحب في الله ديه كلمه نخدع بيها الناس
وخصوصا الناس اللي عرفه كويس أوي ان اي علاقه بين الرجل والمرأه حراااااااااااام
مدام لم تخرج عن نطاق العمل خد وهات فقط
يعني مفيش زميلي في الشغل برده
يبقي جميل
لان لازم هيكون في احتكاك
ولو مكنش الاكتحاك ده محكم جدا ومفهوش صغرات هيبقي اي انسان نفسه ضعيفه وفاتح قلبه علي البحري زي ابو زيد هيحب بدل المره عشرين
واحنا عارفين ان القلب بيزني وزناه الحب
والعين تزني وزناها النظر
وطبعا مفيش حد بيحب ومبيبصش اللي بيحبه بدل المره عشره
والباقي مفهوم
زي قصتك بالضبط قلب ايمان

وانا بقي هقفلك الموضوع ده قريب اوي علشان اثبت الصح مش وجهة نظري
هجبلك الادله والبراهين بس اصبري عليا وسيبي الموضوع موجدو يومين تلاته كده
وانا هرد عليكي

ابوزيد يقول...

طيب نسيبنا من الحب والكلام ده خلينا نربى العيال المكرونه بقى يا ستى من وجهه نظرى طلعت ممتازة بس على الرغم من انها اول مره المدام تعملها بس زعلانه جدا بتقول لا وشها بيكون محمر شويه واللى عملتها مكنتش محمره كانت دهبى شويه يمكن عشان اكتشفنا ان البوتجاز مفهوش شوايه طلع فرن بس اصا احنا فى غربه وبعدين عنك كنت مستعجل وانا بشترى ومركزتش اذا كان فى شوايه ولا لاههههههه حلى لنا بىق مشكله الوش دى مع العلم انه فرن عادى ورينا بقى الفتاكهيا ام مريم وتحياتى ولو حبيت اضيف بوست او موضوع هل ممكن ولا ممنوع ؟؟؟؟؟؟؟واضيفه ازاى

ابوزيد يقول...

انا بعد ما كتبت التعليق الاول لقت ناس بتخبط فيا يا جماعه لا انا مش فاتح قلبى على البحر انا فاتحه لبنتى وابنى ورماتى وشويه ناس ومش حب بتاعكم ده دول اخواتى وابويا وامى وكده الناس فهمتنى غلط ربنا يعينك ام مريم على الردود وياريت تغيرو البوست ده بسرعه معرفش حاسس ان كله بيفتى ؟؟؟؟؟؟؟؟؟

صبرني يارب يقول...

حواء

ماهو انا كمان باتكلم فى الدين وفى نفس ذات الوقت انا كمان باقر الحب فى الله بعموميته

مش لازم عشان انا باحب حد فى الله ان انا اكون فاتحه العلاقه ما بينا سداح مداح

كلا البت

بكل احترام وبكل حدود وطبعا المدونه اهي مفتوحه لكل حد يعرفنى وبيتعامل معايا والى شايف كلامي غلط يقول

وحضرتك بصوت عااااالي وبتقولي حراااااااااااااااااااااام

مش عارفه جبتيها منين ومستنيه يا ستى ادلتك اتفضلي مش هانزل بوست جديد غالبا الا بعد الفرح ان شاء الله

وبعدين انا مش زعلانه من كلامك ولا حاجه انتى ليه فاكره كده

اي حد حر فى رايه وانا كمان حره فى رايي ما حدش هايتحاسب بدل حد

وايه يا ست انتى البؤين دول

(معلش يا جماعه هاشوط فيها سبوني اصل احنا اصحاب )

طيب العين تزني وزناها النظر ... ماااااااشي

انما ايه بقى يا معلمي القلب يزني وزناه الحب ده ؟؟

اليكى ما وجدت من احاديث صحيحه فى الامر

إن الله كتب على ابن آدم حظه من الزنا ، أدرك ذلك لا محالة ، فزنا العين النظر ، وزنا اللسان المنطق ، والنفس تتمنى وتشتهي ، والفرج يصدق ذلك كله أو يكذبه
الراوي: أبو هريرة المحدث: البخاري - المصدر: الجامع الصحيح - الصفحة أو الرقم: 6243
خلاصة الدرجة: [صحيح


وآآآآآآآدي التاني

كتب على ابن آدم نصيبه من الزنى . مدرك ذلك لا محالة . فالعينان زناهما النظر . والأذنان زناهما الاستماع . واللسان زناه الكلام . واليد زناها البطش . والرجل زناها الخطا . والقلب يهوى ويتمنى . ويصدق ذلك الفرج ويكذبه
الراوي: أبو هريرة المحدث: مسلم - المصدر: المسند الصحيح - الصفحة أو الرقم: 2657
خلاصة الدرجة: صحيح

ولقيت كمان روايه اخرى فيها الفم يزني وزناه القبل

انما القلب يزني وزناه الحب ده يا باشا لم اجده بتاتا البته فى اي روايه

قالك القلب يهوى ويتمنى والفرج صدق ذلك او يكذبه

القلب يهوى ويتمنى ايييييه ؟؟؟
هو ده الفرق بقى

ان كان القلب يهوى ويتمنى الحرام او يتمنى حاجه مش من حقه

وبرضه كمان مش زنا فعلا الا لو صدقه الفرج

المهم يعنى حضرتك انى ما لقيتش البؤ الى انتى قولتيه ده بتاتا البته

واقعدي ذاكري بقى

صبرني يارب يقول...

أبو زيد

بالنسبه للمكرونه معلش هاجاوبك هناك على بوست المكرونه هنا رغي مش مكرونه

وبالنسبه للموضوع الى انت عايز تنزله فده ما ينفعش هنا ده مش منتدى يا فندم دي مدونه خاصه بيا

وطبعا نتشرف باي حاجه عايز تقولها على الردود هنا

وبالنسبه لكلام حواء عادي ما تاخدش فى بالك مش قلتلك ان احنا مجتمع عنده حساسيه من كلمة الحب ؟؟

شرفت يا فندم

تامر علي يقول...

ايه ده فرح ومعازيم وبط وفراخ وكده ... ماشي انا هاندس في وسط المعازيم ولو حد سألني من طرف العروسه هقول اني من طرف العريس والعكس ...
أما بالنسبة للصداقة فهي ممكن تقلب لأنفلوانزا ... أما الحب فممكن يتقلب لقمح واهي كلها حبوب برضه :)

تحياتي :)

صبرني يارب يقول...

تامر علي

اوي اوي يا باشا

والله ما حد هايسألك
ههههههههههههههههههههه

بس على فكره انا سألت على المينو ما لقيتش بط

حيث ان اقل بطه دلوقتي تعملها 100 جنيه
وفى وسط الشعب ده عايزين حوالي الفين جنيه بط عشان تكفي ههههههههههههههههههههههههههههههه


وبالنسبه للحب والقمح وكده

عادي حب شباب حتى مش مشكله









ما تقول رايييييييييك مش هانقول للحكومه ياعم

ايه الناس دي

انت لازم شاري اكياس قريب

Anonymous يقول...

صباح العثل يام خالد
ياتس الكل انتي ورنبا يخليك ويخلي اسرتك
انا قلت خليك للاخر ياواد ياميدوو ياعثل يمكن تلاقي قصتك مع صبري منشوره او مع شمس الأصيل هههه بس اتضح انك تقريبا مش متذكراها 0
وتقريبا قصص التعارف العاديه مش بتكون ذات تأثير 00 بس بجد المفروض تكوني ناقضه وكاتبه كبيره0
طبعا انيت مره على العام في الشات وصفتيني اني غلس بس مش حقيقي ههههه
لاني انا بجد كنت بادخل مواقع كثيره جدا واعرف ناس والحمد لله بالمنتديات والشاتات بعدد شعرات راس شعري وماتخافيش شعري كامل والحمد لله مش اصلع 0
المهم اتعرفت اخيرا على شات مصرواي بعد مالمنتدى بتاع عاشقه لبنان اتقفل 00 ليه 00 ماعرفش 0 المهم دخلت وقلت ياواد ياميدو غي اسمك السابق من الصياد لميدوو 00 عارف هاتسأليني ليه؟؟ 00 هاقولك ومش هاقولك ليه ؟؟ لما كان اسمي الصياد كان الجميع بيخاف مني لان الجميع كان بيظن ان اسم الصياد ده يعني داخل اصطاد بنات او سيدات 00 مع اني كنت باحب الصياد 00 لانه كان بيدل على هوايه باحبها من هوياتي وهي صيد السم لاني باعشق البحر والصيد 0
المهم ماطولش عليكي وعلى القراء قولي طول 00 قلت ياواد ياميدوا سمي نفسك باسم ميدوو العثل 00 لقيت ماشا ءالله البنات بتدخل وتكلمني وهي اللي بتعرض الصداقه 00 شوفتي ؟؟ والسيدات بيعطفوا عليا وناقصين يجيبوا ليا شوكلاته ويحكوا لي حدوته قبل النوم ؟؟
بيني وبينك تماديت في الاسم واصبح اشم مشهور والحمد لله يعني ممكن انتخب بيه في مجلس الشورى بلا مجلس الشعب 0
لحد مالقيتك وتقابلت معاكي وكان واضح انك متكلمه بارعه ولبقه وادتين يتعليق صغير على العام قلت لازم ياواد ياميدوا تتعرف عليها دي لقطه هههه
واتعرفت عليكي وكالعاده ادتيني ايميل مش بيفتح نهائي ، ومع اني كنت عارف انه مقلب ومش هايفتح وقلت الك وقتها انك ادتيني الايميل علشان ابله واشرب ميته ، الا انك انكرتي المقلب 00 ماعلينا 00 نرجع لاساس الموضوع 0
طبعا هاتقولي هو انت لسى هاترجع للموضوع واساسه 00 انا تعبت من القراءه 00 هاقولك انتي السبب وكما يقال جنت على نفسها مراكش 00 احيانا النت وخاصة الشتت بيكون منفس لبعض العقد والكلاكيع بالنفس البشريه سواء الصغار منهم او المتجوزين حديثا وقديما 00 لان كما تعلمين ان الاصدقاء المقربين مش ليهم امان وماينفعش ننفس ونفضفض لهم بأراءنا علشان لما بينقلبوا من اصدقاء لاعداء بيكون صعب قوي اننا نقدر نحافظ على اسرارنا عندهم ، لكن النت مش هايكون هناك اي مشكله نعمل دليت او بلوك او عدم رد ونرتاح من الصديق المزعج اللي اصبح عدو 0
هذه نبذه مختصرة ومش عايز اطول عليكم
قوموا ناموا
عارف اننا الصبح
ميدوو العثل

صبرني يارب يقول...

غير معرف

والله يا اخ ميدو

أنا مش فاكره بالتحديد يعنى انت عارف السن وانا برضه ياما دخلت شات ومنتديات كتير وقليل

المهم حضرتك برضه ما جيتش ناحيةالموضوع خالص الى انا اتكلمت فيه

حضرتك اتكلمت عن علاقات الصداقه على النت ودي ما لهاش علاقه بموضوع ا لبوست وهو الحب بين الناس والحد منه وحصره فى نوع واحد من الحب الى قد يكون احيانا حب كاذب

اما بالنسبه لعلاقات النت الى انت اتكلمت عليها اعتقد دي تبقى حياه زفت اوي لما الواحد ما يبقاش واثق فى حد ابداااا ويدور على حد ما يعرفوش يفضفضله ويقول اهو ما يعرفنيش

وجايز ده يفضله حد تكون اسراره مشينه ولم يتخلص منها بعد وعلى قدر من الضعف الى ما يخليهوش يواجه اخطاؤه دي قدام المجتمع الي هو معروف فيه .


انما انا ما خصيتش ابدا بكلامي علاقات النت الى من وجهة نظري لا تختلف عن اي علاقه عاديه لو صبغناها احنا بنفس صفات العلاقات الحياتيه المباشره من صدق وجديه .

وبالنسبه لموضوع الاميل انا مش اديتك اميل مضروب والله

انا اساسا بافتح الاميل قليل جدا واسأل اي شخص هايقولك كده
لانى ما عنديش وقت فعلا
واحيانا افتح الرسايل بس مش الماسنجر
واحيانا افتح اوف لاين والاقينى مش عارفه حد من الموجودين عشان مش هاحفظ اميلات 700 جهة ا تصال هم عدد الناس الى عندي على الاميل
انا لو مش عايزه اديلك الاميل كنت هاقولك مش بادي اميلى لحد عادي يعنى

شرفتنا يا اخي الفاضل ومتشكره على مدحك فيا

بنجاواتى يقول...

السلام عليكم
اول مرة ادخل مدونتك وان شاء الله ما تكونش اخر مرة
اولا ربنا يعينك على الفرح والحاجات دى
ثانيا انا شايف ان اللى بيحب واحدة زى اخته وبعد كده حبها حب من التانى ده من البداية ما كنش بيحبها زى اخته بس ما كنش ينفع يحبها حب من التانى...-ايه الكلام ده؟؟!!!-
ثالثا بقى اللى بيحب واحدة حب من التانى وبعد كده حبها زى اخته لما الظروف ما سمحتش يحبها حب من التانى ده ربنا يشفيه ...
وشكرا
بنجاواتى بن ابى بنجاواتى

حواء يقول...

بصوا بقي
أنا هتكلم المره ديه بالقرأن والسنه
وباستفاضه
وعلشان مش عاوزه جدال ملوش لازمه فأنا مش هعقب علي اي حد رغاي عايز يثبت الغلط وبس
وانا اخص بكلمة رغاي فقط أم مريم لانها رغايه وديه صحبتي وانا عارفها
اما اللي عايز يثبت الغلط وبس فده براحته بقي معه ربنا
وطبعا انا سبق وقولت اني هرد
واديني هرد بالاحاديث الصحيحه اللي كلنا حفظنها وبالقرأن الكريم



نبتدي طبعا بالقرأن
الايه الكريمه بتقول ايه
قال تعالي ( وإذا سألتموهن متاعا فسألوهن من وراء حجاب )
من وراء ايه ؟؟؟؟
جحاب يعني حائل
ويكون فيه ايه؟؟؟؟
متااااااع مش رغي والسلام

والحديث الشريف اللي اساسا عرفنا منه ان فيه حب في الله
هو الحديث الشريف اللي بيقول فى السبعة الذين يظلهم الله بظله يوم لا ظله الا ظله ( ورجلان تحابا فى الله اجتمعا عليه وتفرقا عليه )
الحديث قال ايه ؟؟؟
رجلان
مش اثنان ويبقي بقي اي اتنين رجلين
بنتين
او راجل وست
لا الحديث حددها وقال رجلان ويتساوي عليها إمرأتين طبعا

وبعد كده نيجي ونقول اه في حب في الله بين راجل وست
يبقي احنا كده بنضحك علي نفسنا
اتقوا الله ياجماعه
واعرفوا ان الاختلاط هيؤدي الي مصائب والله
ومنها خراب البيوت
اتقوا الله
وصدقوني الكلام اللي قولته ده هيبقي حجه علي كل واحد هيقرأه
وياريت نعدل سلوكنا كلنا
ولو كنت راجل ابعد عن النساء
ده الرسول قال ما معني الحديث
ما تركت فيكم فتنه اشد من فتنه النساء
ولو كنتي إمرأه
صدقيني البعد عنهم غنيمه
ده حتي كتر الكلام معاهم بيفقد حياء الست اللي هو تاجها وعفتها
اللهم اني بلغت اللهم فاشهد
وبلاش نزين الكلام وبدل منقول صحبي نلزقها في الحب في الله ونبقي بنعمل كل حاجه وحشه تحت ستار الدين
مضايق أو مضيقه من كلمه صحبي وصحبتي يبقي بلاش نعملها خالص
مش نفضل ندور ندور علي كلمه شيك تغضي بيها اللي بيوجعنا ويسوء سمعتنا
بلاششششششش
وبعدين الاثم ما حاك في صدرك وخشيت ان يطلع عليه الناس
مش عايز تقول صحبتي أو صحبي يبقي اللي بتعمله غلط
وانا قولت بالادله
اللي عايز يرغي يرغي
واللي عايز يثبت العكس يعمل زي ويقولي بالحديث والقرأن علي وجود الحب في الله بين الراجل والمرأه
وانا بقول حديث وقرأن مش حكايات في منها كتير اسرائليات
تحياتي للجميع

بنت الغربة يقول...

حبيبتى ياصبرنى
واااااااااحشانى جدا ياحبيبتى والنهارده برااائه مشيوا بعد مامدوا عشر ايام كمان...وفعلا فعلا اتخنقت ومابقتش اعرف ااقعد على النت خاااالص...
وبصراحه انتى وحشتينى قوى ووحشنى رغيك جدا ..موضوعك ظريف قوى ياصبرنى
بس انا مختلفه معاكى ان الحب ممكن يتحول ويبقى صداقه....جايز حصلت معاكى لان اخينا كان فى سن المراهقه
وعادى ان مشاعره تتغير بمرور الوقت
لكن انا حصلتلى الحكايه دى وانا مخطوبه للباشا ...وفشلت انى احول مشاعر الشخص التانى انها تبقى صداقه او زماله بس ....
وانتهت اننا مابنكلمش بعض ليومنا ده ..وماعرفش عنه اى حاجه..
بس الموضوع مافرقش معايا كتيير لانى بحب الباشا..بس لانى بحب عارفه يعنى ايه مشاعر تتجرح وشخص يتعذب..فقررت من يومها تعاملى مع زمايلى يكون فى حدود الشغل بس ولاحاجه غير الشغل...
يمكن ده خلانى خنيقه شويه فى تعاملاتى
بس كده احسن....
لان زى مافلتى بين الصداقه والحب شعرة وانا مش عايزة الشعرة دى خاااالص..
رغيت كتييير معلش بس اصلك وحشتينى مووووت ياقمر
تحياتى

صبرني يارب يقول...

بنجاواتي

على فكره الكلام الى انت قلته ده ممكن يحصل والله بجد

بس محتاج ناس عاقله فعلا ومحترمه وما اتفرجوش على افلام محمود يس

يعنى دماغهم نضيفه مش ملوثه بافكار صفوت الشريف الى بوظت دماغ الشعب كله


اعتقد من الغباء ان البنى ادم يعذب نفسه ويهدم حياته قدام حب من غير امل زي ما بيقولوا

فى الغالب بيبقى حب خادع جدا

تحياتي لك ونورت يا فندم

صبرني يارب يقول...

حواء

اعمل فيكى ايه ؟؟؟

طيب انتى الى مصره على فكره ما تعيطيش فى الاخر

تعالى يا اختي

اول ايه انتى جايباها

تعالى نقراها كلها على بعضها وبلاش نقطعها على طريقة ولا تقربوا الصلاه


آيه 53 من سورة الاحزاب

يا ايها الذين امنوا لا تدخلوا بيوت النبي الا ان يؤذن لكم الى طعام غير ناظرين اناه ولكن اذا دعيتم فادخلوا فاذا طعمتم فانتشروا ولا مستانسين لحديث ان ذلكم كان يؤذي النبي فيستحيي منكم والله لا يستحيي من الحق واذا سالتموهن متاعا فاسالوهن من وراء حجاب ذلكم اطهر لقلوبكم وقلوبهن وما كان لكم ان تؤذوا رسول الله ولا ان تنكحوا ازواجه من بعده ابدا ان ذلكم كان عند الله عظيما
صدق الله العظيم

طيب شوفي كده يا حلوه فى نفس السوره الاحزاب وفى ايه قبل دي رقم 32

بسم الله الرحمن الرحيم

يا نساء النبي لستن كاحد من النساء ان اتقيتن فلا تخضعن بالقول فيطمع الذي في قلبه مرض وقلن قولا معروفا

صدق الله العظيم


اظن واضح يا قطه انا قصدي ايه

فى الايه الاولى محل ذكرك انتى الكلام موجه للناس بالامتناع عن حاجه بتأذي رسول الله

وموجه الكلام للناس بخصوص زوجات رسول الله

وفى الايه ال 32 يا نساء النبي لستن كأحد من النساء

فى ايه بقى مش زينا يا ستو هانم ؟؟؟

فى المذكور اكيد فى الايات دي


لكن يا ستى الى عايز يعمل زيهم يعمل كل واحد حرررررررررررررررر

لكن مش فرض يا ست الكل اننا نكلمهم من وراء حجاب

زي ما هو طبعا طبعا مش فرض ان الست ما تتجوزش بعد وفاة جوزها زي ما فرضت الايه 35 على زوجت الرسول ده



والحديث الشريف

حديث الى ذكرتيه اسمحيلى اقوله كله حته واحده على بعضه ما باحبش البازل الى بتعملوه ده


سبعة يظلهم الله في ظله يوم لا ظل إلا ظله : الإمام العادل ، وشاب نشأ في عبادة ربه ، ورجل قلبه معلق في المساجد ، ورجلان تحابا في الله اجتمعا عليه وتفرقا عليه ، ورجل طلبته امرأة ذات منصب وجمال ، فقال إني أخاف الله ، ورجل تصدق ، اخفى حتى لا تعلم شماله ما تنفق يمينه ، ورجل ذكر الله خاليا ، ففاضت عيناه .
الراوي: أبو هريرة المحدث: البخاري - المصدر: الجامع الصحيح - الصفحة أو الرقم: 660
خلاصة الدرجة: [صحيح]


اشمعن بقى يعنى رجلان يبقوا رجلان بس يا ستى

ماهو فى نفس الحديث قايل رجل تصدق ؟؟؟

يبقى رجلا بس برضه وست لا

وقايل شاب نشأ .... يبقى ما تنفعش شابه ؟؟


واشمعن قيستى وقلت زي ما قال رجلان نقول مرأتان

ولو كان كلمة رجل هنا فعلا مقصود بها تحديد النوع ليه ما قال مثلا عبدااااا تصدق ؟؟

او فردا او كلمه تانيه تدل على التعميم


وخدي عندك الحديث ده كده محبه

إذا تبايع الرجلان ، فكل واحد منهما بالخيار ما لم يتفرقا ، وكانا جميعا ، أو يخير أحدهما الآخر ، فتبايعا على ذلك ، فقد وجب البيع ، وإن تفرقا بعد أن يتبايعا ولم يترك واحد منهما البيع ، فقد وجب البيع
البخاري


ماهو قال تبايع رجلان اهو

يبقى ما ينفعش بقى يتبايع رجل وامرأه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟






وبالنسبه لباقي كلامك

مين قالك انى اخجل من نفسي ولا من الناس وقبل الاثنين من ربنا انى اقول فلان ده صديق ؟؟؟

اظن انا باقولها كتير فى بوستاتي

صديق بمعنى صديق

وحتى لو قلنا صاحب الى هى مشتقه من الصحبه

زي ما ذكرت فى القرآن مواضع كثيره

اذ هما في الغار اذ يقول لصاحبه لا تحزن ان الله معنا

وكمان

يا صاحبي السجن اارباب متفرقون خير ام الله الواحد القهار


بمعنى صحبه المرفق يعنى

مش بالمعنى الى انتى تقصديه


انا مش عايزه اثبت العكس يا حواء

انا عايزه اثبت الحق

ولعاشر مره باقول اقروا موضوع العلاقه بين الرجل والمرأه الى فى الرؤيه يمكن تفهموا قصدي


حواء

ما تحاولوش انتم تثبتوا اننا مجرد قطيع اول ما هانختلط ببعض هاننهش بعض

الى شايف نفسه مش قادر يختلط وانه هايفتن ما يختلطش يا ستى

لكن الى يقدر خلاااااااص هو حر


على فكره لو ما ذاكرتين وقاعدتى ساكته بقى هاتضربي


نورتي يااختي

صبرني يارب يقول...

بنت الغربه

اهو كلامك مش متعارض مع كلامي على فكره

بالعكس

هو لو كان بقى مخه كبير وبيفهم كان الموضوع مشي معاه عادي

طيب مش قادر خلاص نبعد عااادي جدا


يعنى تفتكري لو افترضنا ان الاخ الى انا باتكلم عنه ده ما كانش مراهق وكان من سني او اكبر
وانا قلتله نفس الكلام
وهو ما اقتنعش او ما قدرش ينفذه

كان ايه هايكون الوضع ؟؟

اوكدلك ان الوضع ساعتها كان هايبقى تمام زي ما حصل معاكي

بالسلامه وكل واحد يمشي طريقه بعيد

لكن فرضا ان فى فرصه ان الدنيا تمشي فى هدوء من غير عذاب والم وتقطيع فى شعورنا

ايه المشكله ؟؟


يا مخنوقه الموضوع اصله بيتطور فى نفوس الناس

انا مره واحد قالي انتى لازم تبطلي تكتبي على النت

ليه ياعم


قالي ان ممكن دي تكون فتنه وواحد يقرا كلامك ويتعلق بيكى ويحبك

قلتله طيب ما كانوا يوأدوني ا حسن عشان ما تبقاش فتنه

ايه الشوره الجاز دي

ما الى يتفلق يتفلق ا نا مالي

وبعدين هو الحب ده يعنى خلاص دور حصبه ما كل واحد يلم قلبه فى جنب ويقعد بقى


وبرضه انتى مش عايزه او مرتاحه على اي وضع اي كان استمري براحتك

انما ما تلوميش بقى على الى اختار وضع مريحه برضه ومش غلط برضه


وانتى كمان وحشااااااااني يا جميل والله

وارغي ياامي امال احنا فاتحينها المدونه دي

عشاااااااان نرغي طبعا

حواء يقول...

ينهااااااار فل
أنا كنت عارفه ومتأكده ردك علي الايه
لكن بصراحه مكنتش متخيله ردك علي الحديث
لكن الرسول لما قال رجل وشاب ورجلان
كان يقصد بيهم برده
إمرأه وفتاه وإمراتين
يعني العكس تماما
ولم يقل رجل وشاي واتنين تحابا في الله
لان اثنين تحابا في الله تشمل اي اثنين
رجل وإمرأه
رجلان
إمرأتان
ولكنه حددها برجلان علشان عكسها إمراتين


لكن بصراحه واضح انك مش عايزه تقتنعي اساسا
وحتي الحديث هنفسروا علي مزجنا بقي
إعملي انتي كده سيرش علي الاحاديث وومفهمها وانتي هتشوفي بعينك المفهوم الصحيح للحديث
يمكن تغيري رأيك
وفي الاخر كل واحد حر
ومحدش يتأخد بعمل الثاني إلا اذا مكنش نصحه
وانا كده عملت اللي عليا اوي للكل
تحياتي للجميع

صبرني يارب يقول...

حواء

ما تخيلتيش ايه ؟؟؟؟


انا سألتك سؤال فى الاخر

ما تجاوبي عليه

الحديث التاني قال اذا تبايع رجلان


معنى كده ان ما ينفعش رجل وست يتبايعوا كمان ؟؟؟

لو كان المقصود برجلان هو تحديد نوع للعلاقه ؟؟


وموشكرين على النصيحه يا ستى نردهالك فى الافراح
هههههههههههههههه

مش انا قلتلك اقعدي ذاكري بقى

حواء يقول...

طيب مش لما تردي الاول علي سؤالي
هاتي دليلك ياعم صبرني علي وجود حب في الله من القرأن والسنه
وبعدين انتي جايبه دليل وحجه مش في الموضوع اساسا
هاتي الدليل علي الحب في الله
وانا ارد علي سؤالك
وانا هجاوبك وعندي الاجابه متقلقيش



متخفيش المذكره تمام التمام
وزعبلا ان شاء الله هيجي يلقي امه مش فاضيه إلا ليه علي راي سوتيته
هاتيلي انتي بس الدليل علشان اتكبس أنا واللي زي

صبرني يارب يقول...

انا دليلى ان الحديث ده اساسا كلام عام والحب فى الله مش مقصور على النوع

يعنى انا دليلى هو نفس الحديث ا لى انتى واخداه دليل احنا مختلفين فى تفسيره
بسسسسسسسسس

وبعدين يا بت ما تصدعنيش ما تحبيش انتى حد فى الله

انا هاحب مالكيش دعوه
ههههههههههههههههههههههههه

شمس النهار يقول...

انتي فين ياصبري الدنيا والعه عندي في المدونه وجاري الاتصال بالمطافي
مبروك الفرح اجيب الاخوه المدونيين واجي والا ايه
عودي سريعا قبل النهايه

حاسوباتيه يقول...

كلامك فعلا جميل وبنفتقده المشكله ان الناس دلوقتي ماعادتش بتفهم ده يعني عارفه ماعاتش في بين مشاعرهم حدود بصي هقولك على حاجه كانت ماما بتقولهالنا كان بين عمامها قضايا في المحكمه المهم كانت تقولي كانوا كلهم بيروحوا المحكه بعربيه واحده ويجوا يعربيه واحده وعادي بيزوروا بعض وبيروحوا لبعض يعني الي عايزه اقوله ان في فصل في الامور زي مثلا واحده وواحده يحبوا بعض ومايحصلش نصيب ليه مانحولش مشاعرنا دي لمشاعر اخوه عاديه يعني ماعاتش عندنا المرونه دي

تحياتي ليكي بوست جميل

Anonymous يقول...

سلام عليكم
انا متأكد انك اكيد زعلانه منى .. لكن بصراحه فى اتنين غاليين عليه اووى تلاقين قاعد بذاكر الايام دى وعينى عليهم مستنى تى كلمه تطمنى عليهم واللى هيجننى وان كنت بلتمس العذر ليها انى عارف ظروفهم كويس اووى .
المهم فى يوم من حوالى 15 يوم كنت تعبت من مذاكرة الانجلش لاستعادة معلومات مضى عليها اكتر من 8 سنين قلت اجرب ادخل الشات ودخلت والله زى ما بقولك بنت صغيره وفضلت تتكلم وانته كام سنه قلتلها ..... قالت انا بموت فى السن ده طيب كويس وبعدين ياريت نبقى صحاب .. انا ( اهلا وسهلا ) بابا عنده كام سنه طلع اصغر مننى 4 سنين عندك اخوات 2 بنت اكبر منى 19 وولد 4 ابتدائى طيب يابنتى انا لو اتجوزت بدرى شويه كان زمانك بتقولى جدو .. هيه ( لا ممتقولش كده انا بمووت فى السن ده ) انتى من فين ده انا انا من طنطا طيب يا بنتى ده انا فى الصعيد الجوانى.
بتحبى بابا (بموت فيه) وماما (دى كل حياتى ) واختك الكبيره (كل اسررنا مع بعض) طيب انتى كام سنه هيه (16) طيب عاوزه ايه قالت نفضل اصحاب ويمكن لو شفتنى تحبنى .. قلتلها والله العظيم اسمر وبنضاره وسنى .....وشكلى عجوز واللى يشوفنى يقول 63 سنه .. هيه مش مهم كل ده قلتلها تعرفى لو اتجوزت انى هدخل السجن .. هيه ( ليه ) لانك ااقل من 18 سنه ردت ومين هيعرف .............
وانا فضلت اتكلم كتير اوووى معاها على اساس انها بنت بتعلب لكن المصيبه انى اكتشفت انى قعدت حوالى ساعتين اتكلم ومافيش فايده وحاولت اعرف اسم بابها مقدرتش بينى وبينك كان نفسى اتصل بيه ااقوله خد بالك من بنتك شويه .
يعنى عمك كان هيبقى عريس وام محمد هتحطه فى اكياس سوده .... ربنا يلطف ويحمى اولادنا كان نفسى احكيها لاليس لكن هيه مالهاش نفس لاى حاجه لو شفتيها سلميلى عليها اوووى .
عمك مدحت

KHALED يقول...

شوفى ياأم مريم ..

تبسيط الأمور للأسف مابينفعش مع الناس كلها ..
لازم يكون مع الناس إللى إحنا عارفين مسبقا إنهم محترمين و ذوات عقلية متزنة ..
النت مليان بالعيانيين نفسيا ..
إللى بيدور على حب و إللى بيدور على جواز و فيهم كمان إللى بيقضى وقت فراغة عالفاضى ..
وفى بقة إللى واخدها هواية مفيدة إنة مثلا يتبادل الآراء و يستفيد و خلافة
و فيهم إللى بيدور على أصدقاء جدد يتكلم معاهم و مابيبقاش فارق معاة هما ستات ولا رجالة لإنة بيدور على العقل و ليس النوع و الناس دى بتقدر تكون صداقات حقيقية على النت بشرط إتزان الطرفين و إكتفائهم الذاتى .

صبرني يارب يقول...

حواء

قبل ما انسى عشان انا كنت بارد عليكى الصراحه وانا مشغوله فى مليون حاجه

بس لما رجعت ابص على ردي استغرب انى ما ردتش كالعاده

المهم

انتى عايزه دليلى على ايه ؟؟


الاصل فى الشيء التحليل
الى يثبت هو التحريم

اثبتي انتى التحريم

وعلى المدعي البينه يا ست ا لكل

قشطه ؟؟


نشوف باقي الردود بقى

صبرني يارب يقول...

شموسه

معقوله كده ؟
معلش والله غياب غصب عني

عموما لسالهم مشوار واحد النهارده وبعدين اقولهم ما اسمعش صوتكم سنه بقى

بس هاحاول اجيلك قبل ما انزل

صبرني يارب يقول...

حاسوباتيه

فعلا انتى عندك حق
وفعلا مامتك واعمامها برافو عليهم حاجه نادرة الوجود دلوقتي

اصل المفروض ان اللجؤ للمحاكم مش عشان نقطع بعض لا عشان كل واحد ياخد حقه

زي مثلا ما بنروح نعمل اعلام وراثه

كل واحد ياخد حقه وبس على كده من غير ما نقطع فى شعور بعض


نورتي يا جميل

صبرني يارب يقول...

عموو مدحت

ايه ده الغيبه الطويله دي

والله جيت على بالي من كام يوم

وقلت اسيبلك اوف لاين وبعدين افتكرت ان حضرتك قلتلى ما عدتش بتفتح الاميل

نورتنا يا عمو وما اقدرش ابدا ازعل منك

واليس وسيف ما اعرفش عنهم حاجه بقالي فتره طويله

ولا هى بترد عليا ولا هو وهما الاثنين بيدخلوا على المدونه بتاعتهم طيب اعمل فيهم ايه احكم حضرتك ؟؟

وبالنسبه للبنت دي

دي مخها تعبان ولله الحمد زي باقي العيال وياريت تلاقي حد ياخد باله منها فعلا

وربنا يكرمك يا استاذنا ان جالك روح كده تكلمها وتحاول معها ربنا يصلح حالها ويهديها قبل ما يفوت الاوان

وما تبقاش تغيب علينا كده يا عمو هاجيلك الصعيد الجواني

تحياتي لحضرتك

صبرني يارب يقول...

خالد

تمام معاك حق

بس مش عشان فى ناس وحشين يبقى نلغي وجود الناس الكويسين المحترمين

فوق انى للمره العاشره يا جودعان باقول انا باتكلم عامة مش على الصداقات على النت فقط

تحياتي لك ونورت

فشكووول يقول...

روحى زورى صعلوك يا صبرنى عشان هو واد ابن كلب وعايز اجرجره من الشارع ويقعد فى البيت وعشان تشجعيه وتنفتح نفسه للمدونه
تحياتى

فشكووول يقول...

اشكرك يا صبرنى يارب على كلامك الحلو وتشجيعك لى انت زى السكر يا صبرنى

ما علهش التعليق عندك ح يظهر باسم صعلوك اصل الواد محمود ابنى الصعلوك خطف منى المدونه ومش عارف ازاى ارجع اسم فشكول
بس لو زرتى المدونة تلاقى فشكول قاعد هناك بس لما هو يزور غيره بيزور باسم صعلوك ولحد البت سومة المجنونه بنت اختى ما تيجى عشان تصلح الاوضاع وتفض الاشتباك بينى وبين الواد الصعلوك ابنى
تحياتى

صبرني يارب يقول...

استاذنا فشكووووووول

يا خبر كده تلخبطني واقعد اقول مين ده

انا شجعت حد اسمه صعلوك ؟؟؟
انا دماغي باظت ولا ايه
هههههههههههههههه

بعدين قبل ما اكمل كلام شوفت صورة اسامه عرفته والله

وفهمت بقى

على ايه الشكر يا استاذنا والله ده اقل من حقك

وبالنسبه للاسم هاجي عندك حاالا اقولك
بلا سومه بلا بتاع
ههههههههههههههههههههههه
بنتك تبقى هنا وتستنى سومه

وصعلوك هاروحله طبعاااااااااا
ده انا هاسيطه فى البلوك
هههههههههههههههه

نورتنى والله