الاثنين، 4 مايو 2009

اضراب 17 مايو .... لا تفسد

تحديييييييييث هام
بناءا على ما ورد لنا من تنبيه من الاخت اليس فى بلاد العجائب ان يوم 15 مايو ده يوم جمعه
قلنا مش معقول يعنى نعمل حركه زي كده
وبعد ما دوخت علىما وصلت لدكتور اسلام الى نزل البانر تقريبا وطلع يجري
فهو قالي خلاص نخليه يوم 17 على اساس ان السبت كمان بيبقى اجازه
وعليه تم التعديل ده
والبانر الجديد اهو عيشوا بقى حياتكم
****************************************************




السلام عليكم




بعد الخناقه الى فاتت نتكلم بقى كلام مالوش دعوه بالخناق عشان انتم عارفين خنقتى منكم اد ايه




المهم




الموضوع الى هانرغي بشأنه هو اضراب 17 مايو








والاضراب ده لا ها نتجمع فيه ولا نندد ولا نشجب ولا اساسا هانتحرك من اماكنا الطبيعيه




احنا هانضرب عن الفساد




هانبطل احنا الاول فساد


لمدة 24 ساعه




ما حدش يقولي انا مش مفسد


ولله الحمد كل واحد فينا متحمل جزء من الفساد الى في البلد دي




جايز يكون نظام الحكم عندنا فاسد




انما كمان احنا اصبحنا بالتبعيه مجتمع فاسد




اوجه الفساد كتيره اوي بنشوفها كل يوم وكل ساعه وفى كل مكان تعالوا نقول امثله عشان نفهم اكتر




الرشوه الى بتدفعها عشان تمشي المسائل بسرعه ...... ده فساد


مخالفة قوانين المرور الى المفروض تطبق فى حضور او غياب كماين المرور ما تفرقش كلها مخالفات .... ده فساد


اهمالك فى شغلك وعملك واستهبالك وكلمة على اد فلوسهم ..... ده فساد


لو كنت انت مش مرتشي ولا بتسرق لكن شايف وسايب ناس تسرق .... ده فساد




لما تشتم وتقل ادبك على كل الناس ولسانك يبقى مش نضيف وتزعق ..... ده فساد




لما تكذب وتخدع وتخون اهلك ولا اصحابك ولا مديريك ...... ده فساد




الانانيه والبخل فى العطاء المادي والمشاعر حتى واهمال مشاعر الناس ... ده فساد




عدم التمسك بدينك وتعاليمه المحترمه اي كان دينك (كل الديانات السماويه لها تعاليم لو مشينا علينا هانبقى زي الفل) .... ده برضه فساد


عدم الاتزام بالمواعيد والاستهانه بوقت الناس وحياتهم وظروفهم ........ ده فساد


عدم احترام الراي الاخر والمصادره على اراء الاخرين وقلة الادب الى بتصاحب السلوك ده ...... ده فساد


كمان لما تروح مكان بتدفع فيه تذكره وتدفع الفلوس وما يجيش لك صبر تستنى تاخد التكت بتاعك انت كده بتساعد على الفساد ماهو هياخد الفلوس بالتاكيد ومش هايوردها ...... ده برضه فساد






وحاجات كتير اوي اوي اوي


مش ساعفاني الذاكره




المهم اننا عايزين فى اليوم ده نبطل فساد نعيش يوم نضاف




جرب تعيش انسان




انسان نضيف ملتزم محترم مجتهد متعلم هاديء اخلاقه عاليا يعرف ربنا ويخافه ويحبه يحب الناس والناس تحبه




ايه رايكم فى الفكره دي ؟؟




يوووووووووووووم




يوم واحد فى السنه اقلع عن الفساد


لا تنخرط انت فى الفساد ولا تجعله مفروض عليك


يوم واحد افرض انت نفسك واخلاقك الكويسه على العالم كله




مش هايحصل حاجه




جرررررررررب تعيش انسان






الاضراب ده يوم 17مايو




الى فيكم عايز يشارك ياريت ياخد الصوره الى فوق دي ويحطها عنده بانر مع وصله من






الى عامل سلسله بوستات بيتكلم فيها عن الاضراب




اسمها مين فينا الظالم وياريت ننزل الوصله دي كمان بتاعة مجموعة البوستات




وان شاء الله قبل الاضراب بيومين هابقى افكركم تاني




تحياتي لكم جميعا

هناك 51 تعليقًا:

Sweet Violet يقول...

صحيح ياجميلة مبروك النيولوك للمدونة (:

Sweet Violet يقول...

نخيلى بقى ان اليوم ده هيكون صعب على ناس كتييير بس بجد ارجو فعلا انه يتم

عجبانى على فكرة و بالخصوص انه مش اضراب و وقف مصالح البشر تحت شعار لوى الدراع للحكومة

جنّي يقول...

السلام عليكم

كبف حالك اختنا الطيبة .. بجد فكرة ممتازة .. ولكن ياريت نخليها منهج حياتنا كل يوم وكل لحظة .. ياريت ..

شمس النهار يقول...

هو ياصبرني مش 15 مايو ده كان ثورة التصحيح والا انت كنتي لسه مااتولدتيش ساعتها صح

مش عارفه هي الناس هتستحمل يوم ماترخمش فيه علي بعض

وخصوصا في السواقه

عموما كده كده انا مضربه لوحدي طول السنه عشان انا مابدفعش رشوه لحد والا بتعامل مع مصالح حكوميه اصلا

اعمل اضراب علي ايه انا بقا
تقدري تقولي لي

mahasen saber يقول...

يا اضراباتك يا صبرنى بس الفكره هاياه هايله نبدأ بانفسنا فى تعاملتنا اليوميه
ايوه كده ده اسمه خطوه ايجابيه وتفكير منطقى

بس انتى ايه اليى مسهرك لدلوقت
شفتى تحدثنا محادثه ايه مريره هههههههههه البنات زهقوا ومشيوا ولاا اليى انسحب من معركة حرب

احساس طفلة محبة للرومانسية بس واقعية يقول...

انا مشتركة انا مشتركة
حلوة الفكرة دى بجد وسهل تتنفذ مش صعب

عارفة يا صبرنى لسة كنت بقول ان الناس بقت بتعمل الغلط عشان مش تتأذى

ولازم كل واحد يبداء بنفسة الاول بمعنى انك لو شفت حادثة اقف وساعد مش تقف وتتفرج او تمشى ولا كأنك شفت حاجة
اللى اتأذى دا اخوك

نظف قدام بيتك مش عيب يعنى لما تتلم انت واصحابك وبدل ما تلعبوا ساعة كورة وتضايقوا الناس تنظفوا وتخلوا قدام بيتكم نظيف وشكله حلو

انتظم فى المرور بالجارة بتاعتك وبالحزام وغيرة وحتى لو حد زنق عليك حود شمال او يمين من غير اشارة اصبر وامسك لسانك وافضل ملتزم بكرة غيرك يعمل كدا وغيرك وغيرك وتلاقى المرور بقى سهل

وحاجات كتير
حلوة الدعوة دى ورغم انى برة مصر
بس انا منضمة ليكم :)

تقبلى مرورى

صبرني يارب يقول...

سويت فيوليت

ايوه فعلا ما هى دي الفكره خلينا نلوي دراع نفسنا الاول ونتعدل عشان نقدر نعمل حاجه صح

ميرسي يا جميل على الاطراء

صبرني يارب يقول...

جني

وعليكم السلام تعيش يا استاذنا انا بخير بشوفتك


بالنسبه للاضراب والله انا حقيقى ده مبدأي فعلا وباعمل به مش كلام

لكن انا باطلب من الناس انهم يوووووووم واحد بس ما يقلوش يلا نفسي ويعملوا الصح ويطلبوا من الناس يعملوا الصح

نورت يا فندم

صبرني يارب يقول...

شموسه

ايوه فعلا انا ما كنتش اتولدت

بس مش معنى كده انى ما اعرفش ثورة التصحيح

وفعلا د.اسلام كان قاصد ده وقال كده مره

بس الصراحه مش عارفه ده تيمنا باسم الحركه انها كانت تدعى تصحيح

اصل انا بصراحه مش شايفه انها كانت تصحيح
دى كانت تظبيط قاعده وحكم بس
ههههههههههههههههههههه

وانا كمان زيك يا شموسه بس احينا بتضطرين الظروف لمواقف زي دي بس مش بسهوله ابدااااااا امد ايدى فى جيبى واقول اخلص نفسي

نورتي يا جميل

عاشقه الرومانسيه يقول...

هاعمل اللى طلبتيه ياقمر
وده اضعف الايمان يعنى
انى احط البنر على مدونتى
هو انا اطول الشرف ده؟
(:
بس الاول هاروح عند الدكتور اسلام وافهم ايه الموضوع
اممممممممممموه

ابوزيد يقول...

انا تعليقى على النيو لوك بص يا جميل شيلى الجزيئن الىل على جمب صورة الورده اللى فوق وخلى شورة الورده اخف شويه بس تكون اعلى من درجه العلامه المائيه وتصغر حبة صغيرة بالنسبه للخلفيه تحت عاوزة تخف درجتها شويه كل الحاجات دى بسيطه خالص ولو صعبه انا ممكن اعملها على الفوتو شوب عندى وابعتها على الميل بس هاتى اصل الصور ويجعله عامر

صبرني يارب يقول...

محاسن صابر

تعيشي يارب

والله يا اختي نزلت الموضوع وقفلت نمت على طول

ايوه المحادثه دي كان مارور عليها جامد اوي

وفى الاخر كله زهق ومشي وقعدت انا كتبت الموضوع بقى

صبرني يارب يقول...

احساس طفله


بره مصر جوه مصر المهم نتعلم الالتزام والنضافه والعقل

تحياتي ليكى جميل ويلا عايزه البانر يبقى على مدوناتكم جميعا

وكل حد ينزل بوست عنه كمان قبليه بكام يوم

صبرني يارب يقول...

عاشقة الرومانسيه

اوووووك يلا عايزه شغل
هههههههههههههههههه

مش قلنا بلاش بوس لما نشوف انتى عندك اي نوع

اموووووووووووه

زي بعضه

صبرني يارب يقول...

ابو زيد

المشكله مش فى الفوتوشوب ولا تظبيط الصوره نفسها

المشكله فى الجزئين الى فى الجنب انا مش عارفه اشيلهم

شكرااااا على الاهتمام

أليس في بلاد العجائب يقول...

السلام عليكم ورحمة الله وبركاته

الفكرة محترمة جدا

بس مش شايفين لو كانت يوم 14 او 17 كانت تكون افضل !!

انتو اخدتوا بالكم ان يوم 15 مايو يوم جمعة ؟؟

يعني معظم الناس في بيوتها علشان الامتحانات او حتي لو خرجوا هيكون طبيعي نسبة الفساد أقل عن ما يكون يوم عمل !!

بس عموما فكرة كويسة لو ابتدينا بعدم فساد بيوتنا وعلاقاتنا مع الأخر ظاهريا لحد ما يشاء الله و يكون في تدمير ذاتي للفساد الداخلي


اهو صيام مؤقت .. يمكن يفلح

وقد أفلح إن صدق ..

الله معكِ

MǿиY El-Shreef يقول...

تصدقي دعوه جميله اوي

والله لو كل واحد بدأ بنفسه مش هنبقى نحتاج توجيه من حد

ان شاء الله معاكم

ربنا يجازيكي خير لنشر الخير يا جميله

الدال ع الخير كفاعله

ربنا يكرمك يااااارب

ومبروك النيوولوك عسوووول

صبرني يارب يقول...

اليس فى بلاد العجائب

لا طبعا ما اعرفش انه يوم جمعه

مش عارفه د. اسلام واخدباله ولا لا

ويفضل طبعا انه ما يقاش يوم جعه

انا هانبه دكتور اسلام واشوف هايعمل ايه

شكرا يا اليس على التنبيه

صبرني يارب يقول...

موني الشريف

تسلمى يا حبيبتى ربنا يكرمك

وميرسي على ذوقك يا قمر

بسنت صلاح الدين يقول...

الله اضراب عن الفساد اخيييييرا،انا معاكوا،مدونتك رائعه، ان شاء الله متابعاكى

أليس في بلاد العجائب يقول...

ما انا تخيلت بردة انكم مأخدتوش بالكم :)

علشان كده قولت يبقي توقف عن الفساد الاجتماعي في يوم العطلة

اضعف الايمان .. انت ومن حولك

لجين أبو الدهب يقول...

ان شاء الله مشاركين فى الاضراب ..

مع ان المفروض الحاجات دى على طول تكون فى اخلاق الانسان ..

جزاكِ الله خير حبيبتى ..

دمتِ بخير ..

همس الاحباب يقول...

فكرة اكثر من رائعة
فكرة ايجابية حقا
وسهلة التنفيذ لو اردنا
تسلم الافكار يا صبرنى
تحياتى

صبرني يارب يقول...

بسنت صلاح

الله يكرمك يا جميل

ربنا معانا كلنا

بس نشوف موضوع المعاد الى هانغيره ده

صبرني يارب يقول...

اليس

ما خدتش بالي طبعا من موضوع الجمعه ده

انا خدت الميعاد من د. اسلام لما يظهر ويبان نشوف هانعمل ايه


وطبعا يوم الجمعه ده ماينفعش اه من حولك بس يكون اكثر تفاعلا لو كان مش الجمعه يعنى

صبرني يارب يقول...

همس الاحباب


تسلم يا ابو همس بس مش فكرتي والله دى فكرة دكتور اسلام

بس يارب تسمع الناس كلها فعلا

صبرني يارب يقول...

لجين ابو الدهب

اه ماهو ده المفروض

بس هانعمل ايه

يوم واحد طيب نحاول ما نتحججش ونعمل كده

reem يقول...

صبرنى وحشااااااانى جدا
انا طبعا مع الاضراب جدا وانتى عارفه

انا كنت لسا هافكرك ان 15 هايكون يوم جمعة
بس لقيت في اللى سبقنى جزاهم الله خير ونبهو للنقطة دى

افتقدك جدا الايام اللى فاتت

صبرني يارب يقول...

ريييييييم

انتى فين يا بنتى


سبتك يومين وقلت مشغوله فى الفرح

يارب تكوني بخير

طب كنتى قولي قبل ما نصيح كده
ود . اسلام منفضلنا مش عارفه راح فين

جعلوني مريض نفسيا يقول...

السلام عليكم
جزاك الله خيرا علي السؤال
الحمد لله علي كل شئ انا بخير هو بس في الشهريين الي فاتوا حاولت ادخل في مشروعيين وربنا موفقنيش وبعديها حاولت اسافر برا مصر وبرده ربنا موفقنيش وطبعا ده اسنزفني ماديا ونفسيا ومخليني في حالة توهان مع حبة اكتئاب علشان كده مبكتبش حاجة لحد معرف افوق

وجزاك الله خيرا مرة تانيه وحلو فكرة الأضراب عن الفساد ربنا يوفقكم

هشام توفيق

Ahmed يقول...

الله
الله
الله

أول مره أشوف اضراب ايجابي
اضراب بناء

من أنواع الفساد اللي ممكن نكون بنشارك فيها اننا بنكسل في شغلنا لو مفيش علينا رقابه ونقول ماهما تلاقيهم واخدين حقوقنا

الاضراب ده جميل وان شاء الله هينجح

عاشقه الرومانسيه يقول...

تم تغير البنر على مدونتى يامعلمى
وكله تمااااام

الطائر الحزين يقول...

الله المستعان

عمرو يقول...

أولا صباح الخير ..
ثانيا زعلان أنا علشان فاتتنى هوجة التعدد لما نزلتى البوست كنت فى الصعيد و لم أدلى بدلوى فى هذا الموضوع فى حموته يعنى بس برضو حأشترك فى التعليقات و لو أنها متأخره شويه ..
ثالثا أنا مشترك فى الاٍضراب بأنى حأضرب الواد أبنى الكبير اٍحتياطى يعنى لحسن يكون عامل حاجه غلط من ورايا :))
يا أم خاااااالد
يوم واحد مش كفايه لمحاربة الفساد .. و حياة النبى ده أحنا لازم نضرب الدهر كله علشان نقدر نصلح ما أفسدناه بأيدينا ..
تحياتى ليكى و للأسره :)

صبرني يارب يقول...

احمد ابو العلا

طب يلا ورينا الهمه نقبل المساعدات

هههههههههههههههههه

صبرني يارب يقول...

جعلوني مريضا نفسيا

ما تزعلش ابدا على حاجه راحت منك
خدت الشر وراحت

اتعلم من غلطك عشان انت اكيد اكيد عملت حاجه غلط

ما تجريش ورا السراب اشتغل واشتغل واشغل وما تستناش عوض ربنا عليك فى حينه دى بتبقى ترتيبات وربنا ما بيضيعش تعب حد


والعفو على ايه ده اقل واجب

ربنا يكرمك

صبرني يارب يقول...

الطائر الحزين

ونعم بالله

صبرني يارب يقول...

عاشقة الرومانسيه

اوووووووك يا جميل تسلمى

صبرني يارب يقول...

عمرو

ااااااااااااااااه

سبتوني لوحدي

عااااااااااااااااا

انت فى الصعيد وشمس كانت مشغوله وسبتووووووني لوحدي يا جودعان حرام عليكم

ماشي ماشي
على فكره عايزه اقولك رضا حقد عليك لما قال بس
ههههههههههههههههههههههه
وانا طبعا


وحلوه هاضرب الواد ابني دي
ههههههههههههههههه

واحنا محتاجين اه نضرب الدهر كله بس اهو بدايه
خلينا الاول نضرب يوم واحد وبعدين نشوف

صدقنى كل واحد فينا مؤكد مؤكد مشترك فى الفساد

على الاقل وصلة التليفزيون الى بيعمولها دي مش شرعيه ومش قانونيه طبعا

وحاجات تانيه كتير ده اقل واجب

نورتناااااا

ابوزيد يقول...

انا خايف يلمونا فى بوكس جهاز المعلومات الى فى مصر مش بيهمه حد هما يوفو كلمه اضراب على البانر هنروح فى داهيه وساعتها ام خالد هتقول ولا اعرفكم حد قالم اعملوا اضراب وسلمى لى على الفساد
ويجعله عامر

momken يقول...

اشطه خدونى معاكوا

قصدى سبونى معايا


الفكره حلو اوى

انشاء الله بالتوفيق


تحياتى

شمس النهار يقول...

كده ياصبرني بتشتكيني لعمرو
طب والله انا عملت اللي في وسعي
ولو تشوفي المواعيد اللي كنت برد فيها عندك هتلاقيها قرب الفجر
ماانت عارفه انا كنت في ايه


ماقلتيش هتعملي ايه يوم الجمعه هي كيارا ماكلمتكيش

صبرني يارب يقول...

ابو زيد

لا لا انا من دلوقتي باقول ولا اعرفكم
هههههههههههههههههههههه

صبرني يارب يقول...

شمووووووووووسه يا حياتي

هههههههههههههههههههه

والله ما اشتكيتك يا جميل انا عارفه الظروف بتاعتك ايامها

كده يا استاذ عمرو ده انت بتهدي النفوس بقى
هههههههههههههههههههههه


انا بس باقوله انت كنت فى الصعيد هناك هاااااايص وسايبنا

وشموسه مشغوله

وسبتوووووني لوحدي
ههههههههههههههههههههههههه

ما اقدرش اشتكيك يا جميل ده انا باعتالك السلام النهارده الصبح مع البت كيارا وصلت ولا اجي ا ضربها ?

صبرني يارب يقول...

ممكن

ماااااشي استنى اطلع رابع ورا
هههههههههههههههههه

نورت

Mysara يقول...

أبطل فساد؟! صعبة شوية..

بس أهو نحاول.. يمكن نقدر نعمل حاجة للوطن...

موفقين إن شاء الله...

صبرني يارب يقول...

ميسره

معلش بقى يا اخويا تعالى على نفسك شويه هانعمل ايه بقى
هههههههههههههههه

نورت

سيف الدين اليزل يقول...

طب انا مش بعمل اي فساد والله بس حاجة واحدة ببص علي المزز اللي بيجوا يزورو المرضي اللي هنا برضوا لازم اضرب معاكم
وحشاني يا احن اخت في الدنيا السلام امانة
والسلام علي من اتبع الهدى

صبرني يارب يقول...

سيييييييييييف

اه طبعا لازم تعمل اضراب عن البص على المزز

ازيك والله وانت كمان لك وحشه وانا نفسي اقفشك مره على النت والله

بس ابقى طمني عليك دايما ربنا يكرمك ويارب تكون بخير

المدونه نورت

Soul.o0o.Whisper يقول...

السلام عليكم و رحمة الله و بركاته

ما شاء الله
ربنا يبارك يارب

ان شاء الله هأعمل تنويه عندى على المدونة باليوم دا

لأن فعلا الفكرة عاجبانى
و إن شاء الله يكون يوم نضيف
نحس فيه فعلا بقيمتنا كأنسان


ربنا يبارك لك يا جميلة يارب
و يجعله فى ميزان حسناتك
و ميزان حسنات د. اسلام

دمتى بود

صبرني يارب يقول...

سول

ايه النور ده يا جميله

تعيشي يارب وربنا يكرمك

متشكره ليكى وربنا يجازيكى كل خير يا قمر