الثلاثاء، 26 مايو 2009

شويه جنان ما يضرش ...بالعكس




السلام عليكم يا قوم


ايوه النهارده انا عايزه اتكلم عن الجنان


فيها ايه دي ؟؟


الاول قبل الجنان والمجانين


النهارده عيد ميلاد محاسن صابر حبيبتى


كل سنه وانتى طيبه يا محاسن وعقبال ميت سنه سعاده وهنا يارب
ودي حفله صغننه كده على ما قسم
ادي التورته
وادي الدي جيه اي خدمه


وحشاني يا محاسن ابقى تعالي بقى
يلا بقى نخش على الجنان تعالى يا محاسن اتفضلي معانا جنان هاينفعك فى عيد ميلادك

فيها ايه لما الواحد يتجنن شويه ؟؟

بجد انا حاسه ان الناس بقوا رخمين اوي ودمهم تقييييييل وبيرخموا على نفسهم وعلى الى حواليهم

وبعدين يشتكوا الملل والزهق والخنقه

طب احنا فى مجتمع خنيق اصلا وجاثم على نفس البشر وكل واحد راشق مناخيره فى حياة الاخر

ولسانه شغال الله ينور جلد فى الاخرين وتريقه على خلق الله

كل الى باطلبه من الجميع انهم كل من وقت للتاني يدوروا على وقت يتجننوا فيه شويه عادي يفكوا عن نفسهم

نسيب بقى التنشيه والبدله والتكشيره والشغل والجد كله ونطلع حبة جنان على الوش

على فكره حلوين جدا جدا

والله دورلك على حجه بقى


بالاعب العيال مافيش عيال لاعب الكلاب الضاله

طلعت تجري على الكورنيش فجأه ابقى قول باجري ورا حرامي عادي ماهم ماليين البلد يا عمي

طلعتي تجري على البحر ورا كابوريايه (وش بيغمز يا استاذنا ) عادي قولي ايه حامل وباتوحم ونفسي فيها


تبقى ماشي كده فى البيت فجأه وتقوم مزعق بتتتتتتتتتتتتتتتتتتتت لووومونى ليه ...


زقل مراتك بالمخدات مش باحاجه تانيه مش عايزين دم زقلي جوزك بآله حاده لا لا قصدي بالورد يعنى .


لما تتجمعي انتى واصحابك ما تبقوش رخمه ومنشيين وتقعدوا تكايدوا فى بعض بلاش شغل الحريم ده .



انتهزوا الفرصه لو لواحدكم وهزروا واضحكوا والعبوا انطلقوااااااااا


اتلم انت واصحابك على سطح بيتكم مثلا وحدفوا بعض ببلونات المايه بس كل واحد يبقى ياخد معاه غيار



هههههههههههههههههههههههههه


بلاش اصحاب بلاش جرس ابقى اعمل كده وانت العيال لو عندك عيال ما عندكش عيال استلف من اي حد عيلين عادي هايرحبوا بيك جدا (اهاليهم يعنى )


المهم تشوفلك طريقه تنفس بها عن نفسك عشان الكتمه وحشه .

الناس بقى يوقولوا عليك ايه مش مهم طلعهم من دماغك انت لو عملت حساب للناس هاتشيل الحماره على راسك زي جحا


مش عارف القصه دي ؟؟ طب خلاص مش هاحكيها برضه


مش لازم تمشي فى الشارع تزقل طوب ولا العيال يزفوك ولا توصل لمرحلة الصوره الى فوق دي


لا طبعا

لكن يعنى اعطوا كل حاجه حقها الشغل شغل



والهزار واللعب اخر هزار ولعب

المهم بجد يا جماعه ما تخنقوش نفسكم

الصيف جاي اخرجوا واتفسحوا وما تكسلوش يا كسلانين يا رخمه

اجروا والعبوا حتى لو كان عندك ستين سنه ايه يعنى ؟؟؟!!!


مش قادر تجري بلاي استيشن بقى وشوف نفسك

اتنفسوووووووووووووووووووااااااااااااااااااا

املى صدرك هواااااااا وطلعه بقوووووه

التعب والمجهود احيانا يبقى فى حد ذاته متعه

مافيش خروج وفسحه وانبساط من غير تجهيز وتعب وجري


كلنا محتاجييييييييين نغير دمنا

نغير الهوا الى بنتنفسه

مش لازم تروحوا تصيفوا فى مارينا عشان تبقوا مبسوطين

والله ولو تاخد المودام والاطفال وتقعد تحت التوته الى قدام بيتكم هاتبقوا مبسوطين ان شاء الله

الى عنده توته قدام بيتهم يبعتلي حبة توت او يندهلي وانا هاجي اطلع على الشجره بنفسي


يلا ورونا الجنان بقى

سلام يا قطاقيط



هناك 52 تعليقًا:

عاشقه الرومانسيه يقول...

احجز وارجع
جنان ×جنااااااااان

عاشقه الرومانسيه يقول...

محاسن حبيبتى كل سنه وانتى طيبه ياقمر
صبرنى هانم
ايه التهييس ده كله؟
هو واضح ان النهارده يوم التهييس العالمى ولا ايه؟


تبقى ماشي كده فى البيت فجأه وتقوم مزعق بتتتتتتتتتتتتتتتتتتتت لووومونى ليه ...
****************************
احيانا باعملها مع اختلاف الاغنيه طبعا
وماما تضرب كف على كف وتقولى جملتها المشهوره عوض عليا عوض الصابرين يارب
ماتعرفش ان ربنا عوض عليها فعلا بيا؟
(;
عموما البوست حلو
احنا محتاجين نتجنن من وقت للتانى والله
العقل المسكين ده من حقه يرتاح شويه

هاتى بوسه بقى على البكلام المهيبر ده

اموووووه

تامر علي يقول...

أكيد الجنان مفيد جداً في عصر الكتمة اللي جاثمة على الصدور وعلى رأيك قليل من الجنان لن يضر أحد :)

هفكر في طريقة جنان مبتكرة وانفذها على الفور ... ممكن أدخل أعمل المواعين بقالي 25 سنه معملتهاش :)

جنان بأه:)

صبرني يارب يقول...

عاشقه

يا دودو انتى مجنونه جاهزه والله

عيشييييييييييييي

هههههههههههههههههههه

نورتي يا قمر

Soul.o0o.Whisper يقول...

السلام عليكم و رحمة الله و بركاته

أولا محاسسسسسسسسن

سنسنتىىىىىىىىىىىىىىىى

كل سنة و انتى طيبة يا أجمل محاسن فى الدنيا

و عقبال مليوووووووووووووووون سنة

......................

أما بئا بالنسبة للجنان

هو فى أحلى من الجنان يا بنتى

تحسى كدا انك لسه عايشة
ههههههههههههههههه

تنطى فى السقف

تمشى على الحيط

تطيرى فى الجو

يااااااااااااااااه

انتعاش

ههههههههههههههههههه


باقولك ايه؟؟

ساعة ما تقررى جنان ابئى قوليلى نتجنن سوا
ماشى؟؟؟؟


ياللا سلام

صبرني يارب يقول...

تامر علي


اي والنبى يا اخويا

بس ابقى مهد لها ممكن البت تروح فيها انا عارفه
ههههههههههههههههه

صبرني يارب يقول...

سووووووول

شوووووووووور انا الاقي اجن منكم يا بطه هاجيب الشله كلها ونتجنن

ههههههههههههههه

Bola 7elmi يقول...

أولا كل سنه ومحاسن طيبه :)
تانيا بقى ... حلو اوووي الجنان
يعني الخنقه مش هتجيب غير الضغط .. يبقى نفرفش ونقطقط على رأيك
انا كنت جايه بلوجك ونا مخنوقه بصراحه .. بس قطقط << يعني فرفشت يا قطقوطه



اول مرا ف بلوجك وانشالله مش الاخيره :)

شمس النهار يقول...

يعني ياصبرني هي ناقصه جنان
ده احنا لسه بنادي بعقل لكل مواطن

بس عارفه فعلا هي محتاجه من وقت للتاني شوية جنان كده بس محسوبين برضه
عشان مايبقاش في خساير
وعلي فكره كتير وساعات العقل القوي ده بيتعب صاحبه

طيب شوفي لنا حد نتجنن عليه او معاه
اي حاجه:)

صبرني يارب يقول...

بيبرس

صفرا ؟؟

طب مافيش خضرا والنبى


اه عشان الواحد يبقى يغني آآآآآني خضرااااا
آآآآآآآآني خضرا


كده يعنى

فينك يا سيدي

صبرني يارب يقول...

بولا حلمي

ايه ده انتى من حدانا من الدقهليه اهو

نورتي البلوج وصاحبته واتمنى تكوني دايما منوراه يا جميل

صبرني يارب يقول...

شمس النهار

طب بذمتك يا شموسه مش المجانين فى نعيم ؟؟؟

طب مش الواحد حقيقى ممكن من كتر العقل هوبا العقل يطير ؟؟

وانا اهو يا جميل معااااااكي للصبح نتجنن

اتجنني عليا ومعايا وافري ثينج

نورتي يا قمر

بسنت صلاح الدين يقول...

اولا كل سنه ومحاسن طيبه،و عقبال مليون سنه،ثانيا انا كنت فاكره انى الوحيده اللى نفسى اعمل حاجه مجنونه اكسر بيها حاله الملل دى،بس الحمد لله انا كده اتطمنت على نفسى

Appy يقول...

كل سنه وهى طيبه و
انتى يا هانم فتحاها مرقص وجايبه دى جى اممممممممم
ماشى هفوتها لكى المره دى ( وش بيطلع لسانه )

ابوزيد يقول...

مش هقول غير جمله اشرف عبد الباقى ( يا مجانيييييين) انا ايه الى جابنى هنا
ويجعله عامر

مصري جدا يقول...

يعني اية جنان؟

واحد متخلف عقليا بيحكم من تمانية وعشرين سنة وتقولي لسة عاوزين شوية جنان؟ أمال دة أسمة اية

مش كدة وبس
لا دة عايز يجيب ابنة يكمل وابن المتخلف هيطلع اية يعني ولسة عايزة جنان

البلد بتاعتنا بيبيعها شوية حرامية واحنا قاعدين نتفرج واللي يفتح بئة عالمعتقل عدل ولسة عايزة جنان

الخضار مسرطن والفاكهه مرشوشة والفراخ أنفلونزا اللحمة حمي قلاعية
السمك بلا أزرق
العيش يا مؤمنة بالحشرات والسرطان
ولسة عايزة شوية جنان

والنبي تغيري العنوان
وتخلية
شوية عقل ما يضرش في عرض جاة النبي

Sweet Violet يقول...

كل سنه و محاسن طيبة و بخير (:

أما بقى موضوع الجنان فعلا معاك حق فيه الواحد محتاج كل فترة كده يخرج من اللى هو فيه و ياخد اجازة من وجع الدماغ (التفكير)

MaNoOoSh يقول...

والله يا اوختشى انا مهيسة طبيعي.. لدرجة ان تقريبا البيت بيطالب بإقالتي رسميا من منصب بنتهم الصغيرة.

وأنا لن أسمح لهم بذلك التعسف.. ومسيري أجيبلهم مناخوليا.. بس ربنا يقدرني بس.. هع هع هع


وكل سنة ومحاسن طيبة وانا خطفت حتة من التورتة

صبرني يارب يقول...

ابو زيد

والله يا اخويا انا لسه جايلي تليفون دلوقتي حااااااااالا كان نفسي اقوله كده
يا عالم يا مجااااااانين

بس ما كانش يصح يعنى عاااادي

قول قول ما تتكسفش

صبرني يارب يقول...

بسنت صلاح

لا لا يا حبي اطمني كل الناس كده بس بيستهبلوا

صبرني يارب يقول...

آآآآآآآآآآآبي

ايه يا بت النور الى هل علينا


انتى فين يا اختي مختفيه ليه


وبعدين ما نرقصش ليه يا اوختشي لاعز من محاسن يعنى

اتحزمي وتعالى يلا
ههههههههههههههههه

صبرني يارب يقول...

سويت فيوليت


ايوه محتاجين نشيل الفيشه ونغير هوا فعلاااااااا

صبرني يارب يقول...

مصري جدا

عليه الصلاة والسلام

خلاص ؟؟

سودتها فى وشنا واستريحت

اقوم اعضه الراجل ده

خلاص بص يا اخ هاني

انت مش محامي ؟

ارفع قضيه على رئيس الجمهوريه وانا هابقى اسقفلك

وهاجيبلك عيش وحلاوه ما تقلقش




هاني تعالى ناخد ارض ونزرعها ونربي جموستين ومعزتين

ولا نتحوجش لحد يا اخويا

على فكره ده حلم حياتي فعلا

صبرني يارب يقول...

مانوش

على خيرة الله انتى كويسه اوي تمام اوي يا باشا

reem يقول...

كل سنة ومحاسن طيبة وعقبال 1000 سنة

انتى عسولة يا صبرني وصديقة بجد


اما الجنان فدا بموت فيه وانتى عارفه

انا لما تطلبينى تطالبينى بشوية عقل
عشان الجنان دا العادي بتاعي

تعرفي انى بلعب مع بناتى زى الاطفال

ولما اجى اشترى لهم لعب بصراحة بشترى اللعب اللى بتعجبنى وبكون زيهم فرحانة باللعب

احيانا لما يكون جوزى رايق بتجنن عليه

اما انا واصحابي فلو يعنى عرفنا نتقابل لان كل واحد فينا في مكان فبردو بيكون يوم جنان

تصدقي الجنان دا بيخفف كتير من ضغط الحياة

ولو سمحتى انا عاوزه اخد معاكى انتى وهانى ارض وازرعها ونربي جاموستين زى ما قلتى

تصدقي نفسي اجرب الحياة الطبيعية دى

بس نجيب حد يعلمنى انا وانتى نعمل كدا ازاى احسن حرام ممكن نموت الجاموستين

وحشااااانى ياقمر

صبرني يارب يقول...

ريم

يا حياتي واحنا مالنا هو احنا الى هانحلب الجموسه ونغيرلها البامبرز

ابسلوووووتلي نوت

احنا نشوف حد يعمل كده يا امي انا اعمل كل حاجه الا التعامل مع الجواميس يا بطه

هههههههههههههههه

انا كتبت مره بوست عن الحلم ده تفصيلا

اسمه بذرة فول

ابقى شوفيه


وحشاني يا بطه انتى فين ؟

احساس طفلة محبة للرومانسية بس واقعية يقول...

مش عارفة مالك انتى وستيتة يا صبرنى
هتعملوا انقلاب فى البلد كدا
ومش هتبقى ورود ولا مخدات خالص
هاهاهاهاهاهاهاها

جميل اننا نعمل كدا من فترة للتانية
حتى الاولاد على فكرة يحسوا بتغير فى حياتهم

انا معنديش بلالين ماية بس عندى رشاش ماية وحكاية الاغانى دى مفروغ منها اساسا انا بقول وسومة ترد عليا
طلعنا الجبل التصوير فى اشكال غريبة
الرسم على الوشوش

هفكر فى اختراع جديد بقى استهلكت كل الحاجات المتاحة اللى بعد كدا هيكون جنون رسمى وهنتقفش :)

تقبلى مرورى

mahasen saber يقول...

يا سلام يا سلام ايه الهنا اليى انا فيه ده

صبرنى بتحتفل بعيد ميلادى
يا حبيبتى وانتى بالف خير
شكرا يا جميله على اهتمامك وحبك ورقتك دى بس والله مستغربش عليكى اللفته الحلوه دى

لانك اجدع واجمل وارق صبرنى فى البلوجر بحاله

شكرا يا جميله على رقتك دى واهتمامك يا صبرنى
واردهالك فى الافراح يا جميله

mahasen saber يقول...

بس الجنان بتاعك عجبنى وااقدر ااقولك ان ده من اجمل البوستات اليى قريتهالك فى حياتى البلوجريه

بس كله الا جنان اللعب مع الكلاب الضاله اهه ده يا اختى الجنان بعينه

ده انا بترعب منهم وهما كلاب ولاد ناس ما بالك لو ضآله بئه

حنين القلب يقول...

كل سنه وانتى طيبه يا محاسن وعقبال مليون سنه


والله عندك حق يا صبرنى احنا بقينا مضغوطين وشويه وهنفرقع

لازم صح نفك شويه او نتجنن هيحصل ايه
انا عايزة العب واجرى بس للاسف مش لاقيه حد يتجنن معايا
جوزى عاقل ياختى مش بيحب الجنان
عااااااااااااااااااااا

صبرني يارب يقول...

احساس طفله

انتى فين يا جميل

ما شوفتكيش من زمان


ابقى خدينى معاكي الجبل والنبى


تعرفي انا كتبت البوست وبعد ما خلصت روحت عند ستيته قعدت اضحك وقلت ايه ده ماشييييييييييين على سطر واحد احنا

نورتي يا جميل

صبرني يارب يقول...

محاسن يا حياتي ده اقل واجب والله

هو انا عملت حاجه ده حفله صغننه على ادي

وبالنوسبه للكلاب انا يا اختي مش باحبها بس اكيد فى ناس بتحب تداعب الكلاب الضاله
هههههههههههههههههههه

صبرني يارب يقول...

حنين

انا اهو يا بطه اركبي السوبر جيت واخطفي رجلك وتعالى وانا ارجعك بالقميص الابيض
هههههههههههههههههههههه

وحشاني يا بت انت فين

Ahmed يقول...

ديه يعني دعوه عامه للجنان

ياريييييييييييييييييييييييييييت

نتجنن شويه ونهسهس ونخرج من رتم الحياه
ونشغل اغاني محمد7ود العسيلي المجنونه ونعمل شو

دعوه جميله

عمرو يقول...

البوستات بتنزل من ورايا و انا ما اعرفش و لا ايه الموضوع ؟؟!!
كل سنه و أنتى طيبه يا محاسن و أتمنى لك عمر سعيد مديد :)
يا أم خالد العمليه مش ناقصه جنان :))
كل واحد عنده الجنان الخاص بيه و اللى مريحه و بيسعد فؤاده فليه بتحرضينا على الجنان بقى ؟؟
و مع اٍن الجنان ده شىء ممتع للغايه بس لما يبقى غى المعقول لكن برضو بأقلق منه خاصة موضوع الكابوريا لأنها بتقرص الحقيقه :))
متشكرين يا أم خالد على نصايحك اللى بجد ممكن تكون سبب لتنفيس الكبت اللى بيسببه التمسك بالعقلانيه ..
تقبلى تحياتى و تقديرى ..

صبرني يارب يقول...

احمد ابو العلا

يا عمي اعمل ما بدالك عسيلي بصيلى كله ماشي عادي

ههههههههههههههههههه

صبرني يارب يقول...

استاذ عمرو

ماليش دعوه انت الى مختفي النهارده اهو

وبعدين ياريتهم والله راضيين وسعداء فعلا

ابدا دول ساعات بيبقوا تعبانين ومش عارفين ليه
عايزين حد يكتب لهم روشته

والكابوريا لا ما عضتنيش والنبى
ههههههههههههههههههه

مسدس صغير يقول...

اولا
محاسن كل سنة وانتى طيبة وعقبال 200 سنة فى صحة وخير

ثانيا اتجننى براحتك احنا بردة اجن منك
هههههههه
احييكى على البوست الظريف جدا
نورتى المدونة

صبرني يارب يقول...

مسدس صغير

الله يخليك يارب ده منوره بصاحبها

نورت انت كمان

MǿиY El-Shreef يقول...

هههههههههههههه

انا عن نفسي بعمل كده كتير

مش محتاجه اتجنن زياده

اما محاسن فانا وصلتلها التهنئه بنفسي

كل سنه وهي طيبه

ايه اللسعان المنتشر ده :D

كيــــــــــــارا يقول...

ههههههههههههههههههههههه

وجنان بجنان وحشاني وربنا

كل سنه وسنسنتي طيبه

مصري جدا يقول...

ما بحبش الحلاوة
أرض وجاموستين؟
ماشي
وبعد ما يطلع عنينا ونزرعها والجاموستين يبقو عشرة( بفضل رعاية ريم) أموت واشوفها بتربي الجاموستين
ينط لنا واحد من الحزن ويلهط تعبنا
طبعا هطخة
وانتي صوتي وانا بتشنق
ريم بئا ولا بتعرف تصوت ولا حاجة
حاجة تفلئ ما تعلميها الصويت

صبرني يارب يقول...

كيااارا


وانتى يا قمر والله وحشاااااني موووووووووووووووت

صبرني يارب يقول...

موني الشريف

اوك يعيش الجنان يا يعيش
نورتي يا جميل

صبرني يارب يقول...

مصري جدا

ليه بس مالها الحلاوه حد يكره الحلاوه والحلوين (وش بيغمز )

وريم اااااااه والله وانا كمان نفسي اشوفها هاتعمل ايه مع الجموسه

فى الغالب هاتعملها باديكير وتاخدها تنيمها معاها على السرير


هههههههههههههههههه


مين ده الى يطلع وياخد ايه

عيب يا باشا انا الى ياخد منى حباية رمل غصب عني اخد عنييييييييه

خلي عنك انت ابقى علم ريم انت الصويت

هعععع هع هع

حنعيش يعنى حنعيش يقول...

والنبى انت عسل ...فعلا بقينا شاربين نشا ...حتى العيال الصغيرة ماشية كئيبة ..انا معاكى فى كل كلمة وبعمل كدة ...بس مش باستخدم المخدات ؟؟ باستخدم قزايز المية المعدنية الاتنين لتر المليانة ...ههههههه بهزر طبعا...

صبرني يارب يقول...

حنعيش يعنى حنعيش

ازايز مايه يا لهوووووي

لالا مش عايزين ارتجاج فى المخ

يا دم يا بلاش
ههههههههههههههه

تحياتي وحمد الله بالسلامه

سبهللة يقول...

ومين ليه نفس يتجنن

الناس اغلبها شايفة الدنيا بمنزار اسود

عموما ربنا يسعدك كما اسعتدينا بالبوست دة

صبرني يارب يقول...

سبهلله

بالذمه يا اختي بلاش اكتئاب اصل انا على تكه والله

نوووووووورتي

mahasen saber يقول...

صبرنى واليى مهيتفضلش على المدونه التانيه هتعملى فيه ايه

اعرف بس قبل ما اعمل اى تصرف ممكن اندم عليه بعد كده ههههههههههههههه

ازيك يا جميل هنتقابل يوم الجمعه كلنا ولاا ايه النظام
عايزه اشوفك يا صبر يا جامد انتا

صبرني يارب يقول...

يا محاسن


لا ده هانحط السيخ المحمي فى صرصور ودنه


لا يا محاسن اتقابلوا انتم ما خالص احقادي
عاااااااااااااااااا

مش هاينفع والله انا تقريبا مش وش تجمعات يااختي

الظروف عندي ملخبطه على الاخر
ادعولي

مامة مازن يقول...

طبعا اولا كل سنة والاخت محاسن بخير
ثانيا يا سلااام الجنان ده بيفك الواحد فعلا
شكرا على الدعوة اللطيفة دى وجارى تجريب وصفة الجنان مع انه شغال هنا على طول بسبب العيال بس وماله نتجنن كمان (وماله يا اخويا مش عيب) قصدى يا اختى
سلامى وتحياتى لكى اختى