الاثنين، 1 يونيو 2009

بعد ما تموت مالكش فيه ..... خلصت



السلام عليكم




بصراحه انا ما هانش عليا اسيبكم فريكس بعد البوست الى فات المنعنش ده




نعم ؟


فريكس يعنى ايه ؟؟!!!




مش عارفين حالة الفريكس ؟؟؟ طيب زي بعضه




الفريكس هى حاله خليط ما بين الفريش والريلاكس




المهم نرجع لموضوعنا نعود بقى بعد حالة الفريكس ونتكلم فى موضوع جد شويه




الا هو :




انك لازم تعترف انك ان شاء الله لما تموت بعد عمرين طوال يا سيدى مش بافول عليكم كلنا هانموت




بعد ما تموت مالكش فيه .... خلاص خلصت




هو ايه الى مالكش فيه ؟؟ الدنيا يا حلو




حد يقولي يعنى ايه؟؟؟ مش مهم من غير ما تقولوا اقولكم يعنى ايه




يعنى الاقي واحد حلو كده كمل وعاقل يقولك :بقى اناااا ولادي مش سألين فيا طيب ولاد الهوهو دول الى زمانهم




بيتمنوا موتي مش هانولهم فلوسي حتى بعد ما اموت وهاكتب كل الفلوس باسم الواد ابنى الكبير هو الوحيد الى بيسأل




عليا ويعبرني بس انا هابقى اوصيه يخلي باله من اخواته برضه ويدي كل واحد حاجه(حونين )




طبعا ده شخص عبيط ولا عاقل ولا نيله . يا حاج انت بعد ما تتوكل على الله خلاص ما لكش فيه ما بقاش مالك بقى مال




الورثه الشرعيين ايا كانوا ما تلعبش بقى فى الوقانين الالهيه (الكتالوج على راي د. اسلام )




عارفين لو عمل كده ايه الى هايحصل ؟




ولاده كلهم هايكرهوا اخوهم الكبير ويحقدوا عليا وجايز هو يطلع ندل اساسا وما يعبرهمش بفتله




واقل واجب هايدعوا على ابوهم بدل ما يدعوله .




يجى سخص تاني




ويقول انا ما عنديش عيال او عنده بنات بس ولما اموت اخواتي ولادي الفرطوس هياخدوا فلوسي ولا هايشاركوا فيها البنات




مع انهم خوووووونه وما حدش فيهم بيسأل عليا وولاد هوهو وهايصرفوا فلوسي فى الهيافه ويقوم رايح زي الحلاوه كده ويكتب املاكه الى اصلا مترين فى قاع ترعة بلدهم باسم البنات او باسم مراته او باسم العفاريت بس اخواته لا .




الله طب ليه كده ؟؟!!! يا سيدى انت لما تتقلب بعون الله الموضوع ما عادش يخصك سيب كل واحد ياخد حقه وبدل مااعمام البنات يكرهوهم ويقطعوهم اهم هايسألوا عليهم ويودوهم ويترحموا عليك جااااايز




ربنا كتبلهم الورث ده والرزق ده خلاااااااااص يبقى حقهم




ما كانوش بيسألوا مااااااشي حسابهم مع ربهم بقى مالكش انت دعوه




هو مين قالك ان الورث ده مكفأه لهم على خدمتك ؟؟؟؟!!






ويجى حد تالت عنده بالصلاه على النبى الصبيان والبنات وعماره فله حلوه كده ومحلين يقوم لا بصوا يا ولاد انا خلاص تقريبا قربت اموت وعايزه اطمن عليكم عشان ما يحصلش بينكم مشاكل والمحلات تبقى بتاعة الصبيان كل ولد محل (كح كح كح ) ده بيكح مش قلتلكم حاسس انه بيودع .


اما العماره فكل واحد فيكم ياخد شقه واهو تمن المحل اد تمن الشقه ولا اقولكم المحلات شغاله برضه خلاص يبقى فى زمتكم لكل بنت الف جنيه من ايراد المحلات فى الشهر




طب يا حاج كبر انت بس دماغك من ا لموضوع ده وخليك فى الكحه لا انا عايز اطمن .




طيب ما تطمن ما انت لما تموت المحكمه هاتقسم الورث بما يرضى الله عادي زي ما ربنا قال شاغل حالك ليه انت ؟؟؟




لا هاتولي موظف الشهر العقاري ا سجل الكلام ده بيع وشرا ء واهو تتعفوا من ضريبة التركات




يادي النيله ياعم انت بتموت ولا بتوفر ضرايب




ويسجل المعلم ويبيييييييييع وبعدين بع اسبوع يقوم ويخف ويبقى زي القرد ويطلع ما كانش عنده حاجه ويرجع بقى محلااااااااته يلاقي العيال بيبجحوا فيه وكل واحد مش عاجبه شغل ابوه الللللللله مش بقى محلهم بيع وشرا ؟؟




وكل ما يقلولوا خليك فى البيت مرتاح يا حج يتنطط زياده ويتعرفت زياده ويقول انتم هاترموني يا ولاد الهوهو عشان بقت كل حاجه باسمكم




والضغط يعلى عليه والقلب يتعب ويحتاج عمليه والعيال جايز يطلعوا اندال




ويقولوا له منين يا سيد وحياة غلاوتك فلوسنا فى السوق ما انت عارف يا حاج




فيتحسر من قلبه ويموت كمدا بقى بصحيح




طب لييييييييييييييييييييييييييه ما تخليك عايش على اد ما تعيش ولما تموووووووووووت هما حرييييييييين
وواحد قاعد على جنب اهو وكتب كل حاجه باسم الووووولد امااااااال
مش هو الولد وهايشيل اسمه
انما البنات دول ولاد هوهو هايروحوا يدوا الفلوس لاجوازهم الاغراب ولاد الهوهو برضه
طب ما دام كلهم ولاد هوهو ما تسيبها تمشي زي ما تمشي
هاتظلم البنات كده
لا ااااااا اصلك ما تعرفش ده انا ابنى حنين اوي انا هاوصيه ما يسيبش اخواته البنات برضه
بس ما يجيش اجوازاتهم يشركوه فى ماله
لااله الا الله
ماهو مش ماااااااله لواحده ماهو مال اخواته البنات كمان
الله استنى اصلا مين ده الى مال مين
ما انت لسه متلقح عايش اهو
يعنى المال دلوقتي مالك انت اصلا بترغي انت ليه دلوقتي




خد من ده بقى وصايا معلقه زي الى كانت بتيجى زمان فى افلام الابيض واسود




لو ما تجوزتيش واد عمك مش هاتخدي ولا سنتوفه من الطين الى حدانا فى البلد




والى يكتب فى الوصيه ان ممنوع منعا باتا فض الشراكه بين الاخوات والا تتحول التركه كلها لصالح مش عارف مين فى كواللمبور


( الله ما تسيبهم ياعم يفضوا الشراكه ويفضلوا حبايب وكل واحد فيهم يعمل شركه لواحده ويكبر برضه ايه المشكللللللله )




والى يجمد اراضيه ويخليها حق انتفاع للورثه فقط لحسن العيال مخهم لاسع وهايبقوا الطين ويشتروا بداله عربيات وهدوم سنيه






لييييييييييييييييييييييييييييييه




خليك فى حالك ياعم عيش وموت براحتك ومالكش دعوه بالاتي




ما قلتش اضربها طبنجه كلا البته اطلاقا






انصح عيالك




وصيهم




حدد حاجه معينه يعملوها او وصي بحاجه مكتوبه ماشي




بس مش بمالك كله بجزء منه فى حدود التلث زي ما بيقول القانون






ما تخنقش عيالك وانت عايش وانت ميت




من حقهم يعيشوا ويحلموا ويحققوا حلمهم هما زي ما انت عشت وحققت حلمك انت مش حلم الجيران ولا حلم ابوك قطعا




هايخلطوا طيب وايه يعنى ما انت ياما عكيت يا معلم




خليهم يترحموا عليك مش حاجه تانيه






وعلى راي خيخه نطلع من الكلام ده كله بايه




وانت عايش حر فى مالك




وانت ميت خليك فى حااااااااالك






والى اللقاء يا اصدقاء




هناك 55 تعليقًا:

مجرد مدونة يقول...

وعليكم السلام ورحمة الله وبركاته
والله عندك حق ..
الناس بتشيل هم فوق هم والعملية مش مستاهلة .. كله بيودع!

nody يقول...

بصى هى المشكله فى الجهل
والطمع وخصوصا الى يحرم بناته من الميراث او يبخثهم حقهم علشان خاطر الصبيان
هما مايعرفوش انهم بكده بيورثوا عدوات وبيقطعوا صلات رحم للعمر كده
كل ده علشان الفلوس

ناس بتفكر من خرم ابره والله

صبرني يارب يقول...

نودي

ايوووووووه فعلا بيفكروا من خرم ابره


الله ينور عليكى

نورتي

صبرني يارب يقول...

مجرد مدونه

اه بيتهيء لهم انهم هانظموا الكون حتى بعد ما يموتوا

نورتنا

د. ياسر عمر عبد الفتاح يقول...

والله عندك حق
هوه إحنا هشغل بالنا بالفلوس حتي بعد ما نموت

ملناش فيه

تامر علي يقول...

علشان كده أنا مش هاكتب ولا مليم من ثروتي الطائلة لأي حد :)))

طبعاً اللي يعمل كده هايدخل نفسه في مشكلة عويصة وهي الحساب على مالايملك ...فقد مات ولم يعد يملك ومع هذا فقد أقحم نفسه في حسبة لادخل له بها .... منتهي الغباء الإنساني فعلاً

تحياتي على الطرح :)

Mo7ammed يقول...

ياسلام
شجعتينى انى اصرف فلوسى كلها (ده لو معايا) قبل ماموت

واهو هريح جميع الأطراف
وبالعكس
ده هيدعولى دعوات من نظام
"الله يحرقك يابعيد مسيبتلناش لقمة"

^_^

بسنت صلاح الدين يقول...

بوست جامد اوى ،عندك حق والله طيب ماربنا مقسمها شاغلين بالنا ليه،خليك فى اخرتك و اعمل ليوم تقابل فيه وجه كريم،اما عالم ولاد هوهو صحيح

صبرني يارب يقول...

تامر علي

ثروتك اه اه مصدقاك

نوووووورت

صبرني يارب يقول...

د. ياسر

عشان احنا عقلنا تعبان عادي
هههههههههههه

نورت

MaNoOoSh يقول...

أنا اساسا من أول ما أخلفهم هحرمهم من المصروف (بس هم ييجوا بس الأول)
ههههههههههههههه


لا بجد عندك حق.. هو مال الانسان بعد ما يموت يتقسم بشرع ربنا وبالحق.. والا غير كدة هيحصل عداوات وكره.

واللى هيظلم في الورث من الورثة حسابه عند ربنا بقى.

صبرني يارب يقول...

محمد

ههههههههههههههههه

لا برضه ما تسيبش اولادك شحاتين

ولاكده ولا كده

ويا سيدى سبهم انت بس محترمين وهما يدعولك
من غير فلوس

صبرني يارب يقول...

بسنت صلاح

ههههههههههههههههههههههه

اه صح مش كده ؟

صبرني يارب يقول...

مانوش

مش عارفه يا اختي عايزين يشيلوا ذنوب غيرهم ليه

تقوليش هما ناقصين


نورتي يا بطه

Ahmed يقول...

الأب اللي يحمل هم الأولاد ازاي هيتصرفوا في الفلوس بعد مماته بيكون في الغالب حاجه من اتنين

اما انه ميت على القرش, وفي الحاله ديه بيكون عايز يحافظ على القرش ومش مهم الأولاد

أو بيكون عارف انه مرباش أولاده تربيه صح وفي الحاله ديه عارف انهم هيكلوا بعض بعد ما يتكل وياخد استمارة وداع

في الحالتين, الأب بيظلم الأبناء وبيعمل حاجه هتوقفه في مشهد عظيم امام ربنا

Appy يقول...

طيب ما افرض الولد اللى اتكتب له الفلوس برضه او البنت هيطلع ذمتها كويسه احنا مدخلناش فى دي يا حبيبى بس عموما شرع الله كويس مفيش احسن منه بس ساعات برضه فيه اولاد كويسه بيحافظوا لاخواتهم انا عرفت ناس كده بصراحه

صبرني يارب يقول...

احمد ابو العلا

ايا كان السبب هو بيحشر مناخيره فى حاجه مالوش فيها بصراحه

يعنى المفروض يسيب الامور تمشي بطبيعتها من غير ما يحاول يتحكم في كل حاجه هو

نوووووووورت

صبرني يارب يقول...

آبي

على فكره ده نور غير عادي يا ولاد


هو انا قلت لازم يطلع وحش ؟

بس اعطك كل ذي حق حقه

وكل واحد بقى يشيل مسؤليته

الكلام ده لما يكون الوريث قاصر

وفى الحاله ديه المحكمه بتعمله وصي برضه

مش بتبقى سايبه


ليه اصلا البنت مثلا تقعد تستنى القرش من اخوها مع انه حقها وورثها ومالها ؟؟؟؟؟

الشرع يطبق بحاذفيره زي ماقا الكتاب

اموووووووه يا بطه

mahasen saber يقول...

سيرة الموت يا حالولى يا حالولى وانا اليى لسه جايه من عند مجنون زرت بلوجات اخواتنا رحمة الله عليهم اليى فى ذمة الله
وقاعده افكر امتى هيتحط اسم مدونتى فى القايمه دى

وعماله افكر افكر يا ترى امتى سبحان الله الاقيكى عامله البوست وفيه ريحة الموت

ربنا يخسن ختامنا يا صبرنى

وبعدين اليى ميشوفش بعينه قدام لاخرته يبقى ملوش لازمه يشوف من الاساس

ربنا يرحمنا برحمته الواسعه جميعا

صبرني يارب يقول...

محاسن

ايه يا بت الاكتئاب ده

ما يتحط وقت ما يتحط ما تشغليش بالك

ليكى فيها دي كمان

ما لكييييييييييش فيها برضه


يا ستى الاعمار بيد الله نتحط وقت ما نتحط ما تشغليش بالك

ربك بيسطرها

ذو الوجه المبتسم يقول...

السلام عليكم ورحمة الله وبركاته
ازيك يا ست يا مطحونة بلاش رغاية دى

البوست برده لذيذ
واسلوبك بصراحة مميز وجميل جدا

الموضوع نفسه بصراحة كان محتاج الكلام ده
ولكن عاوز اقول نقطة
ياريت تحطى آيه قرآنية او حديث عن الرسول عليه الصلاة والسلام
بخصوص الميراث

وعلى فكرة فيه مفاهيم كتيرة ناس كتير متعرفهاش عن المواريث

تقبلى تحياتى اختى الصغيرة

حنعيش يعنى حنعيش يقول...

اكتر حاجة بتعجبنى وانا بقرأ البوستات بتاعتك ...انى باحس انك بتكتبى بايدك اليمين وايدك الشمال ماسكة كرباج سودانى ..ومناكى تستخدمية للى مابيفهموش ...ربنا يستر ....

صبرني يارب يقول...

ذو الوجه المبتسم


لا ان شاء الله خلي الكلام عن الميراث والمواريث على الرؤيه الاسلاميه

هنا عشان ارغي بس
ههههههههههههههههه

متشكره لاطرائك ونورتنا

صبرني يارب يقول...

حنعيش يعنى حنعيش

ههههههههههههههههه

حلوه يا دكتور اسلام


بس والله انا باكتب باديا الاثنين بصوابعي العشره بروفشنال تايبينج

بس كرباج لا حرام بيلسع

ايه رايك فى مطوه ؟

(وش شرير )

يعنى بنجيب من الاخر
ههههههههههههههههههههه


نورتنا والله

مسدس صغير يقول...

والله محد اخد منها حاجة
غير العمل الصالح
والولد الصالح
والصدقة الجارية
نسأل الله حسن الختاماشكرك على البوست
جزاكم الله خيرا

ستيته حسب الله الحمش يقول...

تسلم ايدك يا صبصب

ده كله تلبيس ابليس

يا عزيزي لا تبيع الآخرة بالخوف من او على أولادك فالذي رزقك في الدنيا متكفل بهم

حاجة عجيبة والله
ها تعمل ايه باللعب في ورث مش ها ينولك منه غير عذاب لن يمنعه عنك ولد ولا بنت

ها ترتب الدنيا يافالح وفاكر انها واقفة عند عقلك
تذكر أن مدبر الكون له تصاريف يعجز عقلك الصغير عن إدراكها

تسلم ايدك يا صبرني ونعم النساء والله

صبرني يارب يقول...

مسدس صغير

امين يارب حسن الخاتمه لنا ولك

نورت

صبرني يارب يقول...

ستيته

يا حياتي من بعض ما عندكم والله انت استاذتنا

وفعلا باحس انهم زي ما انتى بتقولي كده

فاكرين انهم هايرتبوا الدنيا حتى بعد ما يموتوا هع وكمان هع

نورتي يا خالتي

reem يقول...

البوست رائع يا صبرني كعادتك دائما

بس انا اللى بيحيرني ان فعلا في ناس كتير بتراعي شرع ربنا في الميراث ولكن لما بيموتو اخواتهم بيذلو اولادهم اقصد بناتهم دا للى مش عنده اولاد

وبدل ما ياخد العم دور الاب ويراعي بنات اخوه اللى توفي وساب له فلوسه بياخد دور السيد ويعملهم العبيد حتى في اقل حقوقهم بيتدخل

او يبعد عنهم ويسيبهم ولا كأنه يعرفهم

هاتقوليلى ربنا يحاسبه هاقولك اوك معاكى حق مش احنا اللى هنحاسبه

طيب والبنات دول اللى كانو متعودين على حياة معينة مع باباهم هايعيشو ازاي

طبعا انتى عارفه انا بتكلم من منطلق شخصي عشان عندي بنات ههههههههه

لا والله بجد ياصبرني الحاجات دي بتحصل كتير

وبعدين انا عجبتنى اوي حالة الفريكس

دى

عليكى مصطلحات زى العسل

ابو المفاصل الواصل يقول...

الجينات سر الاسرار للبــــــشر والكائنات
فهى نعمة وبركة احيانا واحيانا لعــــــــنات
فتاتى للاد يــــب بجاهل ولها دوروترتيبات
وتهب الجاهل عالم وسبحان رب السموات
وابن يحمل شر ابيه ولاخيه تضيف التحسينات
وبنت اجمل من امها واختها قبيحة القبيحات
وعن طريقها يمكن التحكم فى الميلاد والانبات
والتخلص من الامراض بالتلاعب بالموروثات
وتبقى عيوبها لصيقة بنا للجهل والعنعنات
==========
ناجح يوسف فهمى

ابو المفاصل الواصل يقول...

الجينات سر الاسرار للبــــــشر والكائنات
فهى نعمة وبركة احيانا واحيانا لعــــــــنات
فتاتى للاد يــــب بجاهل ولها دوروترتيبات
وتهب الجاهل عالم وسبحان رب السموات
وابن يحمل شر ابيه ولاخيه تضيف التحسينات
وبنت اجمل من امها واختها قبيحة القبيحات
وعن طريقها يمكن التحكم فى الميلاد والانبات
والتخلص من الامراض بالتلاعب بالموروثات
وتبقى عيوبها لصيقة بنا للجهل والعنعنات
==========
ناجح يوسف فهمى

يوميات شاب منوفى يقول...

بجد انا بتغاظ من الناس دى يفرق بين ولادة فى الميراث ويموت ويسبهم يطحنوا فى بعض ياعم الحاج هو انت هتعرف اكتر من ربنا دة شرع مينفعش نلعب فية بمزاجنا لو حتى ابنك عاق حسابة عند ربنا مش انت الى هتحاسب

صبرني يارب يقول...

ريم

شوفي يا جميل

الاول شكرا على الكلام الحلو ده

شوفي بالنسبه للميراث نسبة الاعمام بتبقى صغيره جدا بالنسبه للميراث ككل

بعد ما بتشيلي ميراث الزوجه

الاعمام كلهم بيتشاروكوا فى الثلث

ومالهمش اي وصايه على البنات خصوصا لو كانوا مش قصر

ولو قصر بيكون الوصي عليهم امهم اولا


وطبعا المفروض يسألوا على ولاد اخوهم ويودوهم

انما لو ما عملوش كده برضه عقابهم عند ربنا بقى


احنا مش هانظم الكون يا جميل

نورتي يا قمر

صبرني يارب يقول...

ابو المفاصل الواصل


اه طب ده عباره عن ايه مش واخده بالي ؟؟؟
عموما شكرا على الزياره

صبرني يارب يقول...

يوميات شاب منوفي


تقول اييييييه على الى عايزين ينظموا الكون على مزاجهم

نوووووووورت

Anonymous يقول...

عزيزتي

في الشرع الناس بترث المتوفى بمعنى ان طول ماهو على وجه الارض فده يعني انه حر في ماله
يهبه , يتصدق بيه , يعمل اللي هو عايزه مع الوضع في الاعتبار اننا جميعا نسال عن اموالنا صرفناها في ايه

يبقى الشخص ده لو عايش وقرر يدي حد ماله كله فهو حر
له ذلك
اما اذا كان بيوصي ان التركة تقسم بشكل لا يرضاه الله فليس له ذلك
لان هو حر فقط في الثلث

لذلك فانا اختلف معاكي

لان الامثلة اللي حضرتك ذكرتيها كانت لاشخاص احياء يملكون اموالهم وقرروا التصرف فيها بالشكل اللي يريحهم
يعني ماكتبش وصية وقال بعد ما اموت تروح العمارة لابني الكبير ,والصغير محروم من الميراث ..ده بقى اللي حرام

انما مثلا لو هو وهب العمارة لابنه الكبير محدش له الحق انه يساله عن اللي عمله لان ده ماله وهو حر فيه

اتمنى ان رايي واضح بالنسبة لك

تحياتي
هبـة

صبرني يارب يقول...

هبه

لا انتى مش مختلف معايا انتى متفقه معايا تماما

بس انتى مش واخده بالك من حاجه

النيه

لما يكون واحد بيكتب العماره لابنه عشان يحرم التانين من الميراث

ده ما يبقاش مجرد هبه
ده يبقى تحكم فى الميراث

كمان فى حاجه انتى مش واخده بالك منها


ماهو لما فى حياته يخص احد من اولاده بحاجه من املاكه والتاني لا

كده وقع فى خطأ تاني وان كان لا يساوي خطا اللعب فى المواريث

انما هو خطأ برضه يورث الكره بين الاولاد

وهو عدم العدل بن الابناء

الرسول عليه الصلاة والسلام امرنا بالعدل

وانا معاكي مثلا واحد عنده بنات خايف عليهم من المشاكل مع اعمامهم

له مثلا بيت ملك طيب كتب لكل بنت شقه وقالي باقي التركه هما حرين فيها

برضه هو حر

ولو كانت املاكه كلهاهى الشقق دي مثلا

برضه هو حر

انما انه يقسم التركه بالبيع والشرا

وخلي بالك بيبقوا موزعنها للذكر مثل حظ الانثيين

قال يعنى ماشيين على الشرع

طيب واخواتك ماهو الشرع يورثهم ؟؟!!


مثلا يعنى

فاهمه يعنى المهم النيه

نيته ايه

وانا مش باناقش حكم شرعي هنا

زي ما قلت لاخي ذو الوجه المبتسم

انا هنا بارغي ا لحكم الشرعي ان شاء الله على الرؤيه الاسلاميه

انا هنا باناقش الفكر

انت ماااااالك بالى هايحصل بعد ما تموت ما تشغلش بالك انت خليك في حالك

هاتستخسر الورث فى اصحابه ليه ؟؟

ما تقولش انا هاسيب فلوسي

لا انت لما تموت دي مش هاتبقى فلوسك رزق الورثه بقى اخلع انت

فاهمه المبدأ الى انا باناقشه ؟؟؟

نورتينى يا اخت هبه وسعيده بزيارتك ونقاشك معايا

مصري جدا يقول...

الشيخ الشعراوي لخص في الموضوع دة وقال
دة سوء الخاتمة والعياذ باللة
اللعب في المواريث اللي اساسا مفروضة بشرع اللة

ঔღঔ نـــوارة ঔღঔ يقول...

ههههههههههههههههه

اسلوبك رائع

والله معك حق بالي قولتيه اول مرة اخد بالي من الحاجات دي كنت فاكرة انه لو قسم التركة بمزاجه افضل :)

لكن فعلا نظريتك صحيحة مليون بالمية فكرتيني بعمي كاتب العمارة الي ساكنين فيها وكل مايملك باسم مراته وولاده الخمسة وبناته الخمسة بحححح وكل شوية تعايرنا :)

وياريتها بتعاير ولادها لأ دي بتعاير زوجاتهم :) بتعايرنا بالشقق الي ساكنين فيها طبعا

ربنا يهدي الجميع بيفكروا بالفلوس حتى بعد موتهم

ربنا يرحمنا برحمته

صبرني يارب يقول...

مصري جدا

ربنا يرزقنا ويرزقك حسن الخاتمه امين

نورت

صبرني يارب يقول...

نواره

حماكي لو مات الله يرحمه ويغفر له

وياريت تقولي لجوزك يحاول يدوا البنات حقهم عشان ربنا يغفر لابوهم لو كان مات

ومرات عمك الى هى حماتك يعنى

عادي يا ماما وهاتعيرك كمان وتقول مش كفايه خدتي ابنى راجل على الجهاز

ده على اساس انهم بيبقوا جايبن البنات مش متربيين على الجاهز لا تفصيل

ههههههههههههههه

ربنا مقضيهم على كده اصل ما حدش جاب شنبات الا هما
هععععععع

انا عشرت الفلسطنيات وعارفه دماغهم فى موضوع الصبيان والبنات

املنا فى الجيل الجديد يا معلم انت

نوووووووووووووووووورتي يا بطه

مامة مازن يقول...

اختى العزيزة موضوعك مهم جدا
فى موقفين عاصرتهم وعشتهم مع ناس اعرفهم
الاول واحد راح لاخوه وقاله انه يكتبله زى تنازل كده عن ميراثه فى اخوه ده بعد ما يموت علشان معندوش الا بنات وهو كده هيورثه هو وابنه ويشارك البنات فالراجل رفض وقاله ده شرع الله انا مش عايز حاجة ومش ناقصنى حاجة بس سيبنى اتصرف مش يمكن اعمل كده وازودلهم عليه بتستعجل ليه وبعدين مش يمكن اموت انا الاول وترتاح من همى ومشكلتى دى
والتانى خد ميراث اخته فى اهلها وهو ارض زراعية وقالها ايجارك هيوصلك كل سنة وفعلا ايجارها بيوصلها لكن ما تقدرش تتصرف فى حاجة وماتت وفضلت المشكلة لاولادها علشان حقهم مع خالهم الكبير وعملو قعدات وحكايات ومفيش فايدة
تقديرا منهم لامهم مش عايزين يمشو فى محاكم وخلافه وكمان معهمش ورق ملكية لان امهم كانت بتقول ده اخويا معقول هياكلنى واهو كلها واكل العيال

الناس لو تسيها على الله هترتاح وتريح

اهى تذكرة منك وعلى الله ان الناس تتعظ
شكرا لكى اختى

Sweet Violet يقول...

اول مثال ذكرتيه بجد انا شوفته لايف ^_^

الاب و الام واخدين ابن واحد بس هو اللى يعرف كل حاجة و هو المتحكم فى كل حاجة حتى بعد مايموتوا "على الرغم من اخواته بيسألوا عنهم مش مقصرين "

و فعلا فى "مش هنقول كره بالمعنى الصحيح" بين الاخوات لكن فى حساسية بينهم فعلا و جامدة جدااا "و لسه الاب و الام عايشين "

مش عارفة بقى لما يموتوا ايه هيحصل بين الاخوات

ربنا يهدى بجد ):

شمس النهار يقول...

ده حب تملك وتسلط
عايز حتي بعد مايموت كمان يتسلط ويتحكم في الخلق
سبحان الله
:)

خمسة فضفضة يقول...

السلام عليكم ورحمة الله وبركاته


عارفه يا صبصب بسبب كلام كتير زي اللي حكيتيه ده تلاقي العيال بعد ما ابوهم يتكل بقوا الاخوه الاعداء وممكن يقعدوا سنين مايكلموش بعض

وكل ده عشان واحد حب يعمل فالح ويتدخل في النظام الالهي

لو كل واحد رضي باللي ربنا بيحكم بيه كانت الارض بقت جنه

دا حتي ربنا بيقول :
" ومن لم يحكم بما انزل الله فأولئك هم الفاسقون "
صدق الله العظيم

جريدة الصباح العربي يقول...

شاركوا معنا في أختيار العمل الأفضل للنشر عبر صفحات جريدة الصباح العربي
http://sabaharabi.blogspot.com/
وذلك عن طريق التصويت في المدّونة على القصة التي أعجبتكم
أو التصويت عبر جروب الجريدة على الفيس بوك
http://www.facebook.com/group.php?gid=78080770039
وذلك لرعاية المواهب العربية الشابة

صبرني يارب يقول...

سويت فيوليت

بصراحه انا الى مش عارفه لما يموتوا هايقولوا ايه لربنا عن التفرقه بين الاولاد

نورتي يا جميل

صبرني يارب يقول...

مامة مازن

فعلا عندك حق الحالتين الى ذكرتيهم حقيقى بيحصلوا

الى عنده بنات مش عارفه مسروع ليه ان اخواته هايورثوه

والى له اخت بنت مش عارفه بيموت ليه لما تاخد ورثها مع ان هو ده حكمة ربنا لتدوير الثروات وتفتيتها وتجميعها اتوماتيكيا
من غير تاميم وفدادين خمسه ولا زفت الى جابتنا ورا

تحياتي ليكى ونورتي

صبرني يارب يقول...

شموسه

وحشاااااني يا جميل

صبرني يارب يقول...

خمسه فضفضه

صدقتى وصدق العلي الكريم


تحياتي ليكى يا قمر

صبرني يارب يقول...

جريدة الصباح العربي

عوووونيه

Soul.o0o.Whisper يقول...

السلام عليكم و رحمة الله و بركاته

عندك حق يا صبرنى

بجد بوست فى الصميم
أنا باتغاظ جدا بجد من اللى بيعملوا الحركات دى

و بعدين لما يحصل حاجة من اللى قلتيها
يمثلولك دور الملايكة

بئا دا جزاتى عشان مش عارف عملت لكمايهيا ولاد الـ.... هوهو بردوا

و يعيط و الناس تتعاطف معاه

طب مانت اللى مامشتش حسب الكتالوج من الاول
جاى تعيط ليه؟؟


ربنا يبارك لك يارب يا حبيبة قلبى
وحشانى بجد
يارب تكونى بخير

صبرني يارب يقول...

سول

انتى الى وحشاني يا جميل

ايه كنتى فين امبارح ما احنا كنا قاعدين للفجر والله
يارب تكوني انتى بخير

وكلامك صح فعلا ونورتي

فشكووول يقول...

السلامو عليكم يا صبرنى
فعلا يا صبرنى وربنا يصبرنا كلنا على مصيبة الموت
مالناش فى اي حاجه
حتى الولاد طول ما دم البنى آدم لسه جديد يدعو لله بالرحمه وبعدين مع الايام كل حاجه تاخد وقتها وتنتهى والعيال ينسوا وعشان كدا انا دايما فى كل صلاه ادعو لوالدى ولوالدتى بالرحمه عسى ربى ان يهدى لى احد من اولادى ويفعل ما افعل
تحياتى يا صبرنى

صبرني يارب يقول...

استاذ فشكول

طبعا زي ما انت قلت كده مش كل الاولاد بينسوا يترحموا على اهاليهم ويدعولهم

بالعكس

وداين تدان فعلا ما تقلقش زي ما انت عملت مع اهلك ولادك هايعملوا معاك

على فكره جدتي اتوفت من 15 سنه تقريبا وجدي من 20 سنه وكنت طفلة آن ذك الا انى مش بانساهم وباترحم عليهم دايما كل ما يجوا على بالي وباذكرهم بكل خير

حتى جدي وجدتي الى ماشوفتهمش برضه بادعيلهم

تحياتي لحضرتك وربنا يديلك طولة العمر ويخليلك ولادك ويبارك لك فيهم