الجمعة، 26 يونيو 2009

انانية الابناء




سلام عليكم




وحشتوني موت يا جماعه وقبل ما انخرط فى الرغي كالعاده واصدعكم عايزه بجد اعتذرلكم جميعا عن تاخري فى الزياره والله معلش عندي ضيوف ومش فاضيه خالص




وان شاء الله اول ما اقدر طبعا هاجي اقرا الى فاتني واستمتع جدا بكلامكم الى واحشني جدا




ندخل بقى على موضوع الرغي النهارده وهو موضوع مهم جدا جدا




زي ما العنوان بيقول كده عن انانية الابناء .. ازاي ؟




هاقولكم على اكتر من موقف قابلنى تعرفوا انا قصدي ايه ..






المشهد الاول


واحده صديقه حماتها انتقلت الى رحمة الله تعالى وبعد سنه تقريبا قابلتها وقالتلى ان حماها عايز يتجوز .




قلتلها طب ومالوا مش احسن ما يعيش لواحده ويقعد يستنى حد يبص عليه وحد يخدمه وده حقه .




قالتلى بنته مش راضيه وبتقول ما اقدرش استحمل وجود حد فى البيت غير ماما ؟؟!!!




قلتلها طيب هى بتيجى تخدمه قالتلى يا ماما هى سافرت بره من زمان ولما بتنزل اجازه بتيجى عايزاني انا اخدمها اصلا .




الله يعنى كمان بتزوره مره فى السنه طيب يعنى ما تبقاش تزوره وهى ما تشوفش الى جت مكان ماما وخلاص ؟؟!!!!




وانتهى الامر ان الراجل قاعد كام سنه لواحده مسكين عايش ليلا نهارا لواحده يؤنسه الجرنال الى بيجيبه ويخلص قرايته على الساعه 8 الصبح ويكمل اليوم يناكف فى ابنه الصغير الى لسه باقي معاه فى البيت الى ان اختاره المولى وانتقل الى الرفيق الاعلى .






مشهد اخر :




واحده تانيه هبله عارفه نفسها (ايوووووه انتى ) مامتها ارمله وواحد من الجيران محترم على حد قولها اولاده راحوا يطلبوها للجواز . وامها لسه فى الاربعينات يعنى مش عندها 90 سنه ولا حاجه




وهي واخوها هايتجوزوا ان شاء الله السنه دي وهايسيبوا الست تقعد لواحدها . وعلى حد رواية الهبله قالت انهم بمجرد علمهم بالامر هبوا فى الست يا عينى وقالولها اييييييييييييييييه هو فى حد برضه يملا مكان بابا ؟؟؟!!!!!!




وانا شايفه ان البت بنتها (الهبله ايوه الى هو انتى) غيرانه منها عشان الست مزه وبيجيلها عرسان وهى لا


هههههههههههههههههههههههههههههههههه






مشهد ثالث :


ماما ايه رايك تبدلي معايا خدي شقتي وادينى شقتك ؟؟


لا يا حبيبى انا ما اقدرش اسيب شقتي ده بيتى الى انا عشت فيه عمري كله وذكرياتي كلها فيه وما اقدر اعيش فى مكان تاني




يا ماما ذكريات ايه بس وكلام فاضي ايه خليكى عمليه انتى بس هاتعيشى فى شقه اربع اوض تعملي بيهم ايه وبعدين شقتي بعيده عن شغلي




يا ابنى معلش انا ما اقدرش اعيش فى شقتك انا هنا متعوده على المكان واصحابي وجيراني حواليا هايعش هناك فى حتتكم كده مقطوعه وانا عايشه لواحدي . عايزيت تيجوا تعيشوا معايا هنا اهلا وسهلا انما انا مش هاسيب بيتى ...




وتنتهي المناقشه بحنق وغضب من الابن وبيقول فى نفسه ان ما كانش بجح وقليل الادب وقال لامه فى وشها




بتفكر فى خزعبلات ذكريات وكلام فارغ وبتفكر فى نفسها وراحتها بس وتقولك جيراني واصحابي ومش مهم انا بقى اتبهدل رايح جاي للشغل الى اخره من الكلام الي مش من حقه يفكر فيه بتيتااااااا






وغيره وغيره وغيره من الكلام الكتير اوي الى باسمعه والمواقف الى ما لهاش عدد الى من نفس الطابع




والى بجد باشعر فيها بانانيه فظيعه من الابناء وعدم اكتراث حقيقى باهاليهم واعتبار والدهم او ولدتهم حكر خاص لهم مش بس هما


لا ده هما واموالهم وتفكيرهم كمان .




والكلام العبيط الى بيتقال فى التلفزيون بتاع زواج الونس الى هو بيعصبنى( بقدر ما بيعصبني برضه تفنيد الزواج لنوعين زواج صالونات وزواج عن حب )




والى يغيظنى اكتر واحده هبله تستضيف واحد وتقوله والله كنا عايزين نعرف جواز الونس حرام ولا حلال




هو ايه البتنجان المخلل الى احنا عايشين فيه ده




اثنين بيتجوزوا وانتم مالكم هما هايعملوا ايه فى الجوازه الله حاجه غريبه والله




ونسوا بعض عملوا حاجه تانيه ما كل واحد يخليه فى حااااااااله




كبار فى السن ؟؟ واييييييييه يعنى وانت مالك يا بارد منك له ؟؟؟!!!!




شوفوا انا ممكن اقول مثلا ان لو مثلا الابناء لقوا ان والدهم رايح يتجوز عيله من دور اولاده ممكن مثلا يحاولوا يتكلموا معاه ينصحوه




لان بالطبع العيله دي مش متجوزاه عشان جمال عنيه مؤكد الموضوع فيه ان




بس ايه انت ما لكش حكم عليه يا حبيبى انصحه بس كلمه بس . وحياته هو حر فيها انت مش وصي عليه




اذا كان انت لو مخلف حته عيل مفعوص وحبي يتجوز جوازه مش على مزاجك هاتجوزه وتقول اعمل ا يه يعنى اقهر الواد ؟؟!!!




انما لو لقيت والدك او والدتك بيسعوا لجواز وهما كبار فى السن ارجوكم ما تعترضوش وما تزعلوش




مش معنى ابدا انها تتجوز او انه يتجوز انه نسي شريك حياته




لكن الحياه لازم تستمر والوحده مرررررررره




ما تقولش ما انا عايش معاه ولا اخواتي معاه




ابدا الانسان قد يكون حواليه الكون كله لكن حاسس انه وحيد




ومافيش ونس ابدا زي ونس الزوج والزوجه




عارفين ليه ؟




عشان ربنا هو الى قال كده :



ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون




الايه دي عظيمه عظيمه عظيمه ان شاء الله نتكلم عنها بالتفصيل فى الرؤيه فى موضوع باجهزه جديد




وما تحطموش الكبار فى السن وتقولولهم اييييييه انتم لسه عايزين ايه من الدنيا ومن الجواز انتم هاتخدوا زمانكم وزمن غيركم؟؟!!




انا عندي مبدأ باحبه اوي




لو فاضلك يوم واحد بس هاتعيشه اعمل اي حاجه فى الدنيا بس طبعا ما تكونش تغضب ربنا عشان تعيش اليوم ده سعيد




يوووووووووم واحد




والاعمار بيد الله ما حدش عارف مين هايعيش اد ايه






حد فهم حاجه ولا أنا قاعده اهاتي من قلبي وخلاص ؟




ارجوكم بلاش انانيه هما ربوكم وكبروكم وكل واحد فيكم هايبقاله حياته الخاصه او بالفعل عنده حياته الخاص




ما ترهنوش حياتهم باكملها علشان بتبصوا عليهم مره ولا اثنين فى الاسبوع .




من حقهم يعيشوا حتى لو كان هايعيشوا اخر يوم فى عمرهم




وكفايه انهم اكيد ضحوا واستحملوا حاجات كتير اوي عشانكم




اتكسفوا على دمكم




وكفايه بقى عشان شمس بتقول عليا رغايه


حقا انا رغايه ؟؟؟


هناك 63 تعليقًا:

كيــــــــــــارا يقول...

الله ينور يابت ياصبصب

الحاله التالته انانيه مفرطه لان الاساس مش سليم واتعود انه ياخد وبس

اما الاولي ملهاش حق طب تراعيه ايه دا

اما التانيه

وماله اما تتجوز ماهم كبرو ايه هيا مش انثي ومن حقها ولا ايه

صبرني يارب يقول...

كوووووكي

ازيييييييييك

ماشي ياعم روحت وجيت وجاي رايق وكده يعنى

والله هما كلهم مالهومش حق

حتى لو كانوا بيخدموهم مش من حقهم يحكموا عليهم

لو عايزين يتجوزوا يتجوزوا مالهم هما اش اخششهم فى الموضوع

هى غتاااااته

نورتي يا جميل

كلام فارغ اوى يقول...

معاكى حق الناس الكبيره دي محتاجه رعايه وعنايه وتبقى قمه الانانيه ان الابناء يرفضو الخير
لو هم بيعتنو معلش يرفضو ويعملو اللى على كيفهم
انما كده
بلطجه
مش رايحه اخدمه ومش عاوزاه يتجوز
بصراحه دي قمه الانانيه

ستيته حسب الله الحمش يقول...

ماهو اللي انت بتكتبيه نتيجة اننا بنربي وحوش مش عيال

العيل يتولد حلو كده صغنن
تفضلي تدي له في حقوق مطردة وغير مطالب يأي مسئوليات
التعليم ها تعلميه لحد ما يكون شنبه يقف عليه الصقر

الجواز ها تجوزيها وتجوزيه حتى لو بالسلف وقرض من بنك الإصلاح الزراعي

بيعملوا حاجة غلط تأثر على مستقبلهم مستعدة ترمي نفسك في المهالك ولا انهم يشكهم دبوس

نسينا كلنا ان الحياة بدون احتكاك وبدون مرمطة متطلعش عيال عدلة

وعليه فجه الزمن اللي تلد الأمة ربتها

الراجل يتحكم فيه الفسل اللي خلفه
والست البنت تقول لها تعيش حياتها ازاي وتموت على أنهي جنب

انهي ست او راجل كبير بيتمتع بحياته بعد ما يشطب ليلة اخر عيل من عياله

العيب في الآباء يا صبرني
آسفة العيب مش في الأبناء

صديقتي عندها 45 سنة وأرملة بناتها الأتنين عارفين انها بتدور على حب وزوج وبيقابلوا معاها اللي بيعرفها وبيقيموا معاها الموقف
يمكن لسه لم تعثر على الشخص اللي هي عاوزاه
لكنها اعلنتها صريحة وواضحة
بحب ابوكم جدا واول حب في حياتي لكن انا عاوزة احب تاني وحاسة من غير زوج اني ميتة ومجتمعنا معذبنا من غير راجل كحائط صد .. ومش ها اتزوج غير عن حب .. البنات محترمين ده جدا ويتعجبوا ليه يرفضوا ده حق ماما هي مش بتعمل حاجة غلط
طالما الناس بتعلم ولادها الصح ومش بتسيبهم للأفلام .. يبقى الأوضاع حسب الشرع مش حسب امينة رزق وعماد حمدي"

عارفة ان الكلام ده صادم لناس كتير بس مش دي اول واحدة من صحباتي تعمله وتعلنه صراحة
"حقوقي مش في ايد حد وملكومش رأي في اللي يخصني .. ولي رأي في كل صغيرة وكبيرة فيكم .. دكتاتورية امهات"

مش عيل بشورت يتحكم في اهله وهم يسعدوه عمر وهو يحزنهم على عمرهم دهر

رغاية انا؟ عادي انت بتحبي الرغي يا اوختشي

ديالا يقول...

بجد بقي زمن العجائب

عادي كل حاجه بقت متوقعه ومباحه

ومستغربين اوي الامراض الي بتجيلنا والاوبئه دي

ماهو كل ده من اعمال العصاه

وخصوصا اكبر اثم بعد الشرك بالله عقوق الابناء

حبيبه سى السيد يقول...

اولا ازيك عاملة اية؟

وحشتينى جدا

تعرفى انا طول عمرى اقول ان اللى بيزرعة الاباء فى الابناء طول العمر بيحصدة بعد كدة فى الكبر

واهم حاجة التربية الدينية
لو ربوا الابنا صح من البداية كانوا حصدوا احسن من كدة

مش انانية


وكمان الابناء نسيوا ان زى ما هيعملوا فى ابائهم ولادهم هيعملوا فيهم
اصلها دائرة
الابناء هيربوا والابناء هيربوا ولادهم على اللى اتربوا علية
وكلة فى الاخر غلط
لحد ما يجى حد فيهم يعرف قيمة الاخلاق والدين ويخرج من الدائرة


تحياتى واهلا بالرغى من جديد

صبرني يارب يقول...

كلام فارخ

حلوه اوي بلطجه دي
هههههههههههههههههههه

صبرني يارب يقول...

سوتيته يا حياتي


تمااااام الله ينور عليكى ماهو انا البوست ده موجه للابناء

انما الاباء الى ربوهم ما اقدرش اقول يستاهلوا طبعا الى يجرالهم عشان ما ربوش ولادهم صح

الا ان احيانا يا ستيته بيكون الام نفسها ده فكرها وده رايها فعلااااااااااا

يعنى ممكن الام نفسها تعترض عن بنتها الارمله هاتتجوز وهى عندها عيال

وتقولها اقعدي ربي عيالك بلا جواز بلا بتاع

هاتروحي تجيبي واحد يعامل عيالك وحش ويتحكم فيكى وفى عيالك ؟؟

والكلمه دي سمعتها بوووودني

ده غير بقى المفهوم السائد بتاع اتجوز بعد فلان الله يرحمه لا يونكن ابدااااااا


وحلوه اوي عيل بشورت دي
ههههههههههههه

نورتي يا جميل اظهري بقى عايزاكي

صبرني يارب يقول...

ديالا

يا حبيبتى دول العيال بقوا حاسين انهم امتكلوا الاباء باعمارهم جميعا

قلة ادب وربنا

نورتي يا جميل

مصري جدا يقول...

الاهل السبب
بيبقوا عبيد للعيال
وبيدوهم كل الحقوق بدون لأي ألتزام
يشربوا بئا

صبرني يارب يقول...

حبيبة سي السيد

فعلا عندك حق

نورتي

صبرني يارب يقول...

مصري جدا

ايوه طبعا ده حقيقى غلط اوي نعلم الولاد ياخدوا وما يدوش

بس الى حصل حصل وما نقدرش نغيره

لكن نقدر نغير فكر العيال عشان يربوا عيالهم كمان صح

نورت يا فندم

عاشقه الرومانسيه يقول...

وانا شايفه ان البت بنتها (الهبله ايوه الى هو انتى) غيرانه منها عشان الست مزه وبيجيلها عرسان وهى لا
************************
كركرككركركرككررررررررر

ايه يابنتى العسل ده؟


فيه ناس بتعتبر امهم وابوهم ملكيه خاصه ممنوع الاقتراب منها
مش انانيه ولكن حب
وبالذات لو اتربوا على غيره شديده وحب شديد بين الطرفين
الام والاب يعنى
وبالذات لو كان الاب هو كل شئ فى حياة اولاده وزوجته

صبرني يارب يقول...

عاشقه الرومانسيه


اه يا بت طول عمري عسل
وبعدين دي اقل حاجه عندي

هيهيهيهيهيهي

الى يحب حد يحب يسعده مش يحب يسيطر عليه ويمتكله

انانيه انا قلت انانيه تبقى انانيه

محموقه انتى ليه ؟؟؟(حاجب طالع وحاجب نازل )

هههههههههههه

حاسوباتيه يقول...

بجد كلامك رائع انا فعلا بشوف النماذج دي كتير بجد انا ماعرفش ليه في ناس بيرفضوا جواز ابائهم ماعرفش هبل فعلا على رايك ومشهد الشقه ده موجود كتيييييييييير ربنا يرحمنا يارب ويجعلنا صالحين لاهالينا يارب

همسة ايمان يقول...

هههههههههههه

كلامك عسل واسلوبك جميل خالص

انا شايفاه فعلا انها انانية ومفروض ميكونش

عندنا حب تملك كدة ونحبلهم الخير والسعادة

تقبـــــــــ مرورى ـــــلى

لجين أبو الدهب يقول...

هو والله انا اول مرة اسمع اباء سمعوا ولادهم فى حكاية الزواج
كل الامثلة اللى اودمى كانوا مجرد اعلام بس للاولاد ..

انما اللى حصل امامى كتير فعلا حكاية الشقة بس بعد ما الام او الاب يصروا ابن وما هانش عليا واللى حيلتى ومش عارفة ايه ويدوهم الشقة فى الاخر ..

ساعة الابناء بينظروا للاباء نظرة هم هياخدوا زمانهم وزمن غيرهم

ربنا يعافينا ..

دمتِ بخير صبرنى ..

حواء يقول...

كلام ستيته وكلامك فكرني بحاجه ياصبرني
ليه جار في منزل بابا متجوز واحده علي مراته
والست ديه مطلقه
وعندها بنت و ولد
لما اخت جرنا بتيجي تلحق عليها بالكلام تقولها خلاص اتجوزتي وخلفتي واطلقتي حتي لو كنتي مظلومه خلاص بقي
ايه مش قادره تعيشي من غير راجل
وتقصد بده العلاقه الجنسيه
وبصرف النظر عن انه اتجوزت راجل متجوز وخربت بيت الراجل
إلا ان اي واحده مطلقه او ارمله سواء كبيره او صغيره معها ولاد او بنات فالمجتمع بينظرلها علي انه ست جشعه ووحشه لانها بتفكر في غريزتها
وحتي ده لو صح 100 %
فهو حقهاااااااااا
ده لو جيت سئلت اي شاب هيقولك انا بتجوز علشان السيكو سيكو وعلشان معملش حاجه حرام
وبتتقال علني
طيب ليه الراجل يطلق او يترمل ويتجوز تاني بكل بساطه ومحدش يقدر يعيب عليه ده
ولا مجرد تعليق حتي لو بهزار
ويبقي حققققققققققه
والست لو فكرت تتجوز تبقي ست وحشه لان فيه نسبه بسيطه انها بتفكر في غرائزها وعايزه تعف نفسها
لاحول ولا قوة إلا بالله
انا بقي كلمه دايما بقولها لمعظم الناس اللي بقبلها لما حد بيسئلني انا ليه مثلا قاعده بقالي فتره عند بابا
برد رد بسيط جدا
ربنا بيقول ياأيها اللذين امنوا لا تسئلوا عن اشياء ان تبدا لكم تسؤكم
يعني بابلدي خليكي في حالك يارخمه
لو كل واحد خلاه في حاله كان الحال اتغير في بلدنا
حتي العيال تخليها في حالها الام كبيره كفايه انها تعرف تاخد قرراها
وبتفكر في الاولاد قبل متفكر في احتياجتها
اتقوا الله ياجماعه

فشكووول يقول...

السلام عليكم صبرنى يا رب
بالراحه يا صبرنى على الاولاد والبنات هى دى طبيعتهم واحنا الكبار لما كنا فى سنهم برضه كان ممكن نعمل كدا لان الانسان بطبعه انانى وابويا ملكى خاص لى وامى ايضا ملك خاص لى وانا لما كبرت بقيت ملك خاص لابنائى صبيان وبينات ... هى دى ثقافة مجتمعنا
لكن انت ناقشتى الموضوع بموضوعيه كما يجب ان تكون.. بس العيال معذورين برضه
فى السن الكبيره الزواج مش بيكون من اجل الزواج والحاجات بتاعة الشباب دى اللى هى اعمار الارض
فى السن الكبيره بيكونوا محتاجين للزواج اكتر ... فيه دواء وفيه امراض وفيه بلاوى متلتله ... ربنا ينجينا مما ابتلى به كثير غيرنا...والراجل بيحتاج ونس ... حد يكلمه ... حد يشوفه قدام عنيه وكذلك الست اللى جوزها توفى او مات
والموضوع حلال ..لا فيه حاجه عيب ولا فيه حاجه حرام ... بس احناتتغير ثقافتنا
بس محتاج المجتمع شوية وقت وشويه شويه حتكون المواضيع دى مافيهاش مشكله ولا حاجه
بصراحه يا صبرنى ..ز انا عندى 57 سنه والله يرحمها امى لو كانت عايزه تجوز بعد والدى كنت حاشوف الموضوع صعب برضه
... احنا بشر يا صبرنى
تحياتى

الطائر الحزين يقول...

ابسط حقوق البر
حتى لو كان فيه ظلم وقع على الابناء فى السابق

=======
محدش يعرف قيمتهم الا لما يفقدهم

مامة مازن يقول...

يا سلام ياسلام عليكى بتحطى ايدك على الواوا ههههههههه
فعلا فى ناس بتوجع اهلها وبيعملوا اوصياء عليهم وممكن تلاقيهم مش عارفين يمشوا نفسهم ولا اهل بيتهم اصلا
امال يا حبيبتى دور المسنين كترت وانتشرت واتملت ليه ماهو معظم اللى عايشين فيها نتيجة لانانية الابناء دول
وعجبنى جدا راى الاخت ستيتة
دمتى اختى بكل خير ويقدرنا نربى اولادنا كويس علشان ما نشوفش ولا نسمعش منهم حاجة توجعنا يارب

Ahmed يقول...

انا شايف ان الناس اللي بتحرم زواج الكبار ديه ناس مريضه وبتستهبل
يعني بيخفوا مشاكلهم وعقدهم في حجج باطله
محدش يملا مكان بابا
محدش يقعد مكان ماما

وللأسف يستغلوا ضعف الكبار قدامهم ويتلذذوا بفرض سيطرتهم عليهم

صبرني يارب يقول...

حاسوباتيه
نورتي يا جميل انتى فين مختفيه ليه

صبرني يارب يقول...

همسة ايمان

فعلا هى كده حب تملك

صبرني يارب يقول...

لجين

لا يا حبيبتى كتير بيجسوا النبض بس لولادهم واولادهم يهبوا فيهم يتعتبروا عيب بقى ويسكتواوينتهي الموضوع زي المشهد الاول الى انا وصفته

وربنا يعافينا

صبرني يارب يقول...

حواء
بنت حلال على فكره ده بيصحل

اييييييه انتى عايزه تتجوزي خلاص يعنى مش عارفه تصبري على نفسك

وكأن ده تهمه وكأن الحاجه للجنس لو كانت عند الراجل ده طبيعى ولو عند الست تبقى جريمه

وده طبعا تخلف حقيقى وجهل عااااااادي هو ده مجتمعنا

صبرني يارب يقول...

فشكول

لا لا انا مع حضرتك خالص بانى اسلم بان المجتمع فكره كده وخلاص

فكره غلط ولازم يتغير

الرسول عليه الصلاة والسلام ابن ام سلمه هو الى جوزهاله لان اهلها كانوا مسافرين


واحنا لازم نعرف ان دي سنة الحياه
ولازم نتربى على كده ونربي عيالنا على كده

وبعد اذنك انا مش ملك ولادي

لا ابدا ولا ملك حد ابدا الا ربنا الى خلقنى

ولادي لهم حقوق عليا ياخدوها
وجوزي له حقوق عليا يتفضلها

انما يمتلكوني ويمتلكوا عمري وحياتي ؟؟

اطلاقا مش هايحصل ان شاء الله


انا يمكن لواتحطيت فى الموقف ده مع اهلي ربنا يخليهم ليا يارب الاثنين

جايز يعز عليا انما لاااااا يمكن افكر بالانانيه دي

وعشان انا هايعز عليا اقوم امنع حد فيهم من حقه واعيشه تعيس عشان مصلحتي


اختلف معاك يا استاذنا

تحياتي لحضرتك نووووورت يا باشا

صبرني يارب يقول...

الطائر الحزين

والله ده الى انا باقوله حتى لو كان الابناء جايز ده يضايقهم

ايه يعنى لما يجوا على نفسهم شويه

نورت

صبرني يارب يقول...

مامة مازن

تمام الله ينور عليكى


نورتي يا جميل

صبرني يارب يقول...

احمد ابو العلا

ماهو الانانيه تعتبر خلل نفسي

وحقيقى انا بابقى نفسي اسفخهم قلم على خلقتهم

هابقى اعزمك تتفرج
ههههههههههههههههه

Sweet Violet يقول...

و الله كلامك سليم ياصبرنى
لكن اوقات بيكون الخوف من المجتمع و كلام الناس هو سبب لانانية الابناء
v_v

بسنت صلاح الدين يقول...

المشكله ان لو الاهل تدخلوا كده فى حياه اولادهم هاتلاقى الولاد يقولوا احنا حريين و مش من حقك تقف فى طريق سعادتى الى اخره،طيب زى مانت حر يبقى والدك او والدتك كمان حرين ،انت خلاص بقى ليك حياتك المستقله مستخسر فيهم ليه يلاقوا حد يسأل عليهم و يعيشهم الحنان و الدفء فى سنوات عمرهم المتبقيهنهما ادولنا كل حاجه فى الحياه و ضحوا كتير عشانا مش من حقهم يعيشوا لنفسهم بقى شويه

Me7'o يقول...

لأااااااااااااااااه

أعلنها صريحة
أنا ضد الفكرة دى وضد المثل اللى بيقول
اللى يتجوز أمى أقوله يا عمى

بصى يا ستى
أنا أعمل أى حاجة لأبويا ولأمى غير إن أى حد فيهم يتجوز
أعيش خدام تحت رجليه
بس جواز
لأ
وألف لأ كمان

مينفعش بعد ما عشنا معاهم كل العمر ده أخش البيت ألاقى واحد ولا واحدة على فرشة أبويا مع أمى أو على فرشة أمى مع أبويا
ده أنا فاكر موقف حصل وأنا صغير مش قادر أنساه لحد النهاردة

جدى أبو أمى لما مات خالى أخد شقته مع إنه عنده شقته الخاصة بيه وفى نفس البيت كمان وكنا احنا راجعين من الصعيد ونازلين البلد أمى راحت على شقة أبوها كالعادة لقت حما خالى قاعد على ترابيزة الأكل مطرح جدى وبيعزمها تاكل فى بيت أبوها اللى كان لسه ميت بقالوش 3 شهور
أمى طلعت تجرى من البيت زى المجنونة وراحت عند خالتى وجالها انهيار عصبى

تيجى إنتى تقوليلى يتجوزوا
ده أنا كنت قتلت جوز امى ولا قتلت مرات أبويا دى

تحياتى

أول زيارة

nody يقول...

اكيد دى انانيه
طب تصدقى بالله فى واحده قالت لابوها اى واحده هاتتجوزها هافتح لك كرشها
انت عاوز ايه اكتر من حد يعمل لك اكلك وينضف لك الشقه؟
طب وهى مال ابوها
الراجل عاوز ونيس
غباء بعيد عنك

صبرني يارب يقول...

سويت فيوليت

المجتمع لو كان بيتعارض مع شرع الله

طز فى المجتمع لا لا ميت طز

نورتي يا جميل

عمرو يقول...

الله ينور يا أم خالد بوست أكثر من رائع لأنه بيناقش قضيه خطيره و بتمس الكثيرين ..
العيال الأنانيه دى لازم يفكروا أنه ممكن تدور عليهم الدوائر و يبقوا فى نفس الموقف اللى هم شايفين أبوهم و لا أمهم فيه يبقى ساعتها حيعملوا أيه بقى ؟؟؟
و برضو نرجع لأصول التربيه للعيال هل كانت قويمه و مظبوطه و لا ربيناهم على الأنانيه و عشق الذات و المصلحه الشخصيه و بس ؟؟
يعنى برضو ما يزرعه الآباء فى عيالهم و هم صغيرين حيحصدوه منهم و هم كبار ..
نظريه مش بطاله برضو :)
تقبلى تحياتى و تقديرى ..

مسدس صغير يقول...

فعلا الانانية دى موجوده
والامثلة كتيرة ومنتشرة
عجبنى البت اللى مبيجيلهاش عرسان ومامتها بابها اتكسر من العرسان
ههههههههه
غيرانه

جميل اوى البوست
متألقة كالعادة

احييكى على البوست

فاتيما يقول...

لأ ...لستى حقا رغاية يا صبصب
و كلامك تمام و مفيهوش أى غلط
لكن الولاد بتبقى نظرتهم غالبا مش عاطفية للموضوع زى ما بتقولى و غيرة و كدا
الحكاية بتبقى غالباً مادية بحتة و خوف على الشقة و الفلوس و التحكم و السيطرة على الأب و الام بدل منهم
اللى تاعب قلبى بجد أن اللى بيتجوزا الأيام دى زى المثال اللى حكتيه ...
أنا عندى فى معارفنا إتنين فوق الستين متجوزين بنات قد بناتهم ... يبقى العيال عندهم حق ساعتها فى غضبهم و لا لأ ؟؟!!!
كل الحب ليكى يا صبصوبتى و بوسيلى العيال القمرات

صبرني يارب يقول...

بسنت صلاح

انا رايي ان الواحد هايعيش يوم واحد اليوم ده لازم نجتهد يبقى اليوم ده مريح وسعيد يستحق الامر ذلك

نورتي يا جميل

صبرني يارب يقول...

نودي

ده اسمه قصور عقلي

لو محتاج بس واحده تنضفله وتطبخله ممكن نجبله شغاله

انما هو عايز زوجه ايه الرخامه دي

استنى انا هاجي اعورها انا البت دي

صبرني يارب يقول...

استاذ عمرو

ايوه طبعا التربيه عليها عامل كبير

لكن برضه انا موجهه كلامي للي اتربوا اصلا والى بفكرهم ده هايربوا اولادهم

المجتمع نفسه محتاج يغير فكره

عايش... ولكن !!!! يقول...

نشأتنا وتربتنا هيا اللى زرعت جوه معظمنا التفكير ده
مع ان كل واحد له الحق انه يعمل كده
ولو فكر ببساطه انه ممكن يجى عليه الوقت اللى يبقى محتاج ده هيتعلم انه ميبقاش انانى
دمتى بكل الود

صبرني يارب يقول...

مسدس صغير


ايوه الهبله دي احنا خلاص هانقتلها
هههههههههههههه

الله يكرمك يا باشا ونورت

هيثم يقول...

والله برافو عليكي موضوع جميل كده وصحيح هو ده اللي بيحصل يا ريت كل واحد يخليه عنده دم ويفكر في مصلحة ابوه وامه زي ما بيفكر في مصلحته وأنا عندي حالة حصلت زي كده حاقولك عليها بعدين

صبرني يارب يقول...

هيثم

ربنا يكرمك

نورت يا فندم ومستنيه البعدين اهو

شمس النهار يقول...

رغايه!!!!!!!!!!؟؟؟؟؟؟؟

ماعاش اللي يقول عليكي رغايه ياقلبي

ده انت في المختصر المفيد دايما احنا اللي مش عرفين نقرا بسرعه:):)


البوست جادم وفي الجون
والموضوع اكبر من كده بكتير هي مش موضوع نسي ماما والا نسي بابا
لا
الموضوع يااما الشقه هتروح لمين يا الفلوس هتروح لمين بعد عمر طويل
يا طبعا طول مابابا او ماما لوحدها يبقا مافيش مانع يخدوا بالهم من العيال بدل الحضانه وكمان المعاش بيروح منه كتير علي المحروس والمحروسه
وساعات بيتخاف من كلام الناس يقولوا اتجوزوا عشان اهمال اولادهم ليهم
لا ياصبرني الموضوع كبير جدا

Me7'o يقول...

ههههههههههه

إنتى ليه رديتى عليهم كلهم ماعدا أنا؟؟؟؟

أنا مستنى الرد بقى مليش دعواااااا
والله اعيط وأعملك فضيحة فى المدونة هنا

صبرني يارب يقول...

ميخو

والله معلش اسفه خالص خالص

تصدق بالله انا تعبانه من امبارح ما فتحتش المدونه ومن شويه مش عارفه تعليقك جه على بالي وقلت انا ما رديتش عليه ولا رديت وناسيه ولا ايه
وفتحت عشان ابص والله لقيت تعليقك التاني

مش عارفه تعليقك سقط مني سهوا وانا بارد مع انى قريته اول ما نزل

اسفه والله خالص معلش اعذروني الايام دي الحكايه مش مظبطه معايا


نرد بقى وانت الى جبته لنفسك

احب اقولك يا ميخو انى اول ما قريت الرد بتاعك قمت لا اراديا قلت
اما صعيدى صحيح
هههههههههههههههههههههههه

حقيقى دي تقفيلة دماغ مالهاش اي معنى ده حلال ربنا

الدين والشرع احل لهم كده وحببه كمان

مافيش ابدا اي حاجه تخلي حد يعيش وحيد عشان افكار المجتمع الغريبه دي

وانا ليا شعار عمري ما هتنازل عنه

طززززززززز فى قوانين المجتمع الى تتعارض مع قوانين ربنا

والموقف الى انت حكيته بتاع خالك مالوش اي علاقه بالموقف بتاعنا

وما دام مامتك واخواتها سمحوا لاخوهم انه ياخد شقة ابوه

يبقى ما يزعلوش ان حماه بقى قاعد هناك ولا غيره ماهم سمحوه فيها

ولا سمحوه فيها وعينهم فيها ؟ ويحكموا عليه مين يدخلها ؟؟



على فكره اعتقد دي مش اول زياره انت زورتني قبل كده

ونوووووورت ودايما منور

واسفه والله سقط سهوا

صبرني يارب يقول...

عايش ولكن

اه على فكره

ده بيحصل انه بيكون رافض انه ابوه مثلا يتجوز ولما هو يتحط فى نفس موقف ابوه يكون عايز يتجوز برضه وولاده يرفضوا

حقيقى ده صح

وفعلا احنا ما بنعملش حساب ابدا اننا يوما هانكون مكان ابهاتنا

وكمان ما بنعملش حساب اننا فكرنا بيتغير مع السن

تحياتي لك ونورت

صبرني يارب يقول...

مسدس صغير

ايه ده مش ميخو بس الى سقط مني سهوا معلش يا جماعه اعذروني والله


اه وحياتك غيرانه وانا عماله اغيظ فيها

وبتيجى تقرا التعليقات وتتجنن
هههههههههههههه

متشكره اوي لك ونورت

صبرني يارب يقول...

فاتيما

بصي احنا ما نقدرش نبقى اوصياء على اهالينا

احنا ممكن نعترض انما نقبل او نرفض مش شغلنا تماما

اذا كان اي عيل عبيط دلوقتي بيقول لاهله بكل بجاحه ما تفرضوش رايكم عليا

مش بس الجواز

انا كتير الاقي بابا مثلا بيعمل حاجه مش عاجباني وهى فعلا مش صح

الفت نظره واكلمه بالراحه والادب والود
والله ما سمعش كلامي خلاص هو حر ما اقدرش افرض عليه

برضه الى انتى بتقولي عليهم غلطانين بس ما نقدرش نفرض راينا عليهم

ونفضل برضه نودهم ونبرهم حتى لو كانوا غلطانين فى قرارتهم


هاتي ا نتى بوسه عشان وحشاني

نورتي يا قمر

صبرني يارب يقول...

شموسه


لا لا الحقيقه يا شموسه انى رغايه
هههههههههههههههه

وبعدين ما انتى قلتي يا شموسه بنتنا وهانقرالها يعنى انتم جاين طواعية ههههههههههههههههههه

هاتي بوسه بقى

على فكره وجهة نظرك صح ميه الميه وده حقيقى وبيحصل

لكن والله العظيم احيانا ما بتكونش الحكايه كده خالص والموضوع مش خارج عن كونه حب امتلاك وبسسسسس للام او للاب

والمهم انه بيعمل مشاكل لنفسه هو مش ادها

يعنى يقوله ما تتجوزش يا بابا وانا اخدمك

ويروح بقى يمسك فى خناق مراته ويقولها اخدمي ابويا

متخيله ؟؟؟ كم الانانيه الى الناس عايشاها ؟؟؟

هو مش عايز ابوه يتجوز

وكمان مش عايز يخدم ابوه

وعايز مراته تخدمله ابوه

وهو يعمل ايه ؟؟
يعيش انانيته
ونفس الحكايه لو بنت برضه

رافضه ان ابوها او امها تتجوز

ومش بتروح تزورهم ولا تخدمهم
وتقول بكل بساطه انا عندي بيتى وجوزي مااقدرش اسيبهم
شوفي ابنك خليه يجيب مراته ويجي يقعد بيكي

والله العظيم الكلام ده بيحصل باشوفه بعينى

نعمل فيهم ايه قوليييييييلي الناس دي

نورتي الدنيا يا شموسه

انا ودماغي يقول...

و الله معاكى حق
الناس اللى طول عمرهم قعدوا يدونا كانوا بيعملوا حسابنا قبل حسابهم و يطلعوا اللقمة من بقهم عشان يدهولنا ميستاهلوش كدة ابدا..

ده حتى يبقى حرام مش دول بنى آدمين يعنى مشاعر و احاسيس و ليهم حق عيش الحياة زى ما لينا...ليه بقى كدة

بجد احيانا الانانية بتعمى عين الواحد

Me7'o يقول...

هههههههههه
ماشى يا ستى
صعيدى صعيدى بس نعيش

ما الصعايدة برضه أحباب الله

"طززززززززز فى قوانين المجتمع الى تتعارض مع قوانين ربنا"

حلوة الجملة دى
بس طبعاً علشان أنا صعيدى فلسه مصر على موقفى ومش هاغيره أبداً
ده أنا بغير على أبويا وأمى موووت
أقوم أجوزهم ونعمل بقى زى محمد هنيدى وأشرف عبد الباقى فى فيلم صاحب صاحبه
الواد عاوز البت والبت رايداه
هههههههه

أما صحيح قمة الأنانية

بس برضه لأ

تحياتى
ثالت زيارة

صبرني يارب يقول...

ميخو

ماشي يا صعيدى

يا سيدى ربنا يخليهم لك الاثنين ويخليك لهم

صعيدى برضه
هههههههههههههههههههه

صبرني يارب يقول...

انا ودماغي


والله للاسف الانسان دايما كده ما عندوش الا مرايه ما بتجيبش الا صورته

الا من رحم ربي

نورت يا باشا

ঔღঔ نـــوارة ঔღঔ يقول...

الله عليكي يا قمر

ايدهم على دماغهم يمكن يحسوا

جتهم خيبة انا مش عارفة الابناء خنقة كدا ليه مايسيبوهم يعيشوا حياتهم من غير خنقة

ذكرتيني باخويا وعمايله السودة بس اخويا ماشاء الله مصايبه اكتر من كدا بكتير بس نقول ايه دا سبب دلع اهلي فيه الي زرعوه بيحصدوه :(

ربنا يهديه يا ولا بلاش

بوستاتك ديما خطيررررة


اروح بقى ابص عالبوست بتاع السرير احجزيلي سرير مليش دعوة يمكن يكون فال حلو عليي ولا حاجة :]

ربي يسعدك

صبرني يارب يقول...

نواره

لا يارب يهديه لكم ويخليه معلش ساعات الشباب بيتغر بشبابه وقدرته بكره يهدى

واحجزلك يا جميل عشر سراير بس انت جو اون

ربنا يديكى يارب من فضله وينعم عليك بذريه صالحه امين يارب

نورتي يا جميل

قوس قزح يقول...

عندك حق فى كل كلامك

ساعات بحس اننا شعب متخلف و انانى و بنمشى ورا عادات و تقاليد غبية من غير ما نفكر

و الغريب ان بيهمنا رد فعلا الناس اكتر من الفعل نفسه
مع ان الناس كده كده هتتكلم

و بعدين بدل ما يتخيل ان ابنه عايز يتجوز على مزاجه ..يتخيل حتة المفعوص ده بيقوله لا متعملش كده على اى حاجة و بيحاسبه

عارفة يا صبرنى
انا موصية جوزى ان لو حصل لى حاجة لازم يتجوز ..يا بنتى الدنيا بتتعاش مرة واحدة ومش الطبيعى نتعس نفسنا و نتعس اللى بنحبهم على الفاضى


تحياتى

صبرني يارب يقول...

قوس قزح
بعد الشر عليكى يا جميل على الله تسبيه وتمشي خليكى لازقاله كده يا اختي
ههههههههههههههههه


ده حقيقى وانا برضه موصيه جوزي يتجوز ومن غير ما اوصيه اساساااااا

هو كل شويه يقولي اتكلي على الله بس ومالكيش دعوه بالعيال هاجيبلهم احلى ام فى الدنيا
هههههههههههههههه

اقوله بعيييييينك قاعده هنا على راسك

فاكره ابو سلمه لما قال لام سلمه لما اموت قولي اللهم ارزقني خيرا من ابى سلمه ؟

احنا فين من دددددده فيييييييين ؟

نورتي يا قمر

عطش الصبار يقول...

اجمل حاجه فى البست بتاعك انه دايما بيناقش موضوعات تبان اها بسيطه لكنها فى الواقع موضوعات اجتماعيه وانسانيه بتترك بصمتها على المجتمع
عموما انا كنت منتظره حل من حلولك اللى دمها خفيف للمشكله ديه
ياعنى مثلا نجيب المعترض او المعترضه ونقعدهم فى الشقه لوحدهم لمده شهر منغير ما حد يزورهم ولا يتكلم معاهم وطبعا ما ينزلوش الشارع كتير
ولا يخرجوا مع حد زى الابهات والامهات وتكون وسيله تسليتهم الوحيده تلفزيون او جرنال فقط
ونشوف هيعملوا ايه
تقبلى تحياتى

صبرني يارب يقول...

عطش الصبار


دول جيل متبلد الاحساس هناموا ويانتخوا ويتفرجوا على التلفزيون

صدقينى انا نصهم كده
هههههههههههههههههههههههه

اصل الحكايه بالنسبه للكبار مش شهر الحكايه دهر

الحكايه احساس بانه مالوش قيمه ولا له لازمه

الحكايه مش لقمه وكلمه وخلاص

الحكايه انه حتى لو حد من ولاده جامله وراح قعد معاه يبقى حاسس بالذنب انه معطله ومضايقه

انا لما باقعد ارغي مع عمي الكبير شويه ومش غصب عني ولا حاجه بالعكس

بالاقيه يقولي باحراج انا عطلتك قومي شوفي الى وراكي

وباحس كتير برضه انى لو استأذنت منه انه بيحس بالذنب

فاهمه الموقف الصعب ؟؟

مش بس وحده لا ده موضوع كبير واحساس وحش اوي

حنين القلب يقول...

والله العظيم عندك حق يا صبرنى
بس المشكله ان الابناء مش بيشوفوا غير نفسهم وبس

يعنى الست اللى هتيجى تتجوز ابويا ده ممكن ابويا يموت وهى تاخد الشقه
كل تفكيرهم مادى
او انانى علشان ماما بتقعد باولادى يبقى ازاى تتجوز وتنشغل عنى
انا محور حياتها
ازاى حد ياخدها منى

زى ما تكون ملكيه خاصه ليها

ربنا يهدى الجميع
تسلم ايدك يا صبرنى