الأربعاء، 10 يونيو 2009

حسنه قليله تمنع بلاوي كتيره


السلام عليكم


مالكم كده مطلعين حاجب ومنزلين حاجب


ايوه انا جايه النهارده رابطه عينى وهانشحت مع بعض جميعا


كل واحد يجيب المعدات اللازمه للشحاته ويجى يلا .


ما احنا اساسا شعب بنعشق الشحاته والشحاتين


نحب نشحت ونحب اوي ندي فلوس للشحاتين المتسولين فى الشوارع مهما قلنا عنهم



بجد بقى يا جماعه انا بقيت امشي فى الشارع ابص حواليا واقول يا عااااااااالم يا هو مافيش حد عايز يكسب فينا ثواب ؟؟!!!


ولا المسؤلين ولا اي حد من رجال الاعمال الى بيهلفطوا طول ا لنهار فى التلفزيون عن خدمة المجتمع


ولا اي حد سائل فينا ليه


مش فاهمين حاجه صح ؟؟


طيب انا هاديلكم مثال

حدانا هنا فى المنصوره فى شارعنا تحديدا شارع منيل بعيد عنكم فى رصيف فى هذا الشارع بيفضل بين طريقين واحد عالي والتاني اقل منه بتاع 20 سم

فكان فى رصيف فى النص زمان عباره عن درجتين


فبعدين جه واحد مفتكس من المفتكسين عمره اهله ما نزل يمشي على رجليه فى الشارع ( من ايام ما كان بيجري ورا عربية الرش )

فقالك احنا نشيل الرصيف الدرجتين ونعمل رصيف واحد بميل من فوق لتحت


ها متخيلين المنظر ده ؟

لا تتخيلوا بقى كام واحده وواحد بيقع على الرصيف ده يوما وانا كل ما اشوف المنظر ده ادعي عليه من كل قلبي


الى عمل شارع اعتقد طوله يمكن كيلو وشارع ايه فى اوله كلية أزهريه وفى اخره موقف كبير لميكروباص الارياف .


شوفوا كام الف شخص بيعدي من على الرصيف ده يوميا ومنهم كام واحد بيقع ؟؟؟؟؟!!!


سنين واحنا على كده يا ساااااااده ان حد يكسب فينا ثوااااااااب ويبصلنا بعين الرأفه ويميط الاذى من الطريق ؟؟ ابداااااااااااااا



الشوارع كلها مكسره ومنيله وحاجه تقررررررررف يا جدعان ده 2 مليون جنيه يرصفو المنصوره كلها كتير يا ولاد ؟؟؟

للدرجه دي بنشحت . طيب يا جودعان عمنول شاريين تمثال رمسيس الى عملوه شبه عمو رمسيس الى هناك فى القاهره ومش عارفه رجعوا فى كلامهم ما حطهوش فباعوه للغلابه الى هو احنا وكعينا فيه 23 مليون جنيه


ااااااااااااااااه والله العظيم كده ماكانش في بس كام مليون من دول يطرطشوا كده على القاعده ويرصفوا الشوارع ويرحموا الاف البشر من المعاناه اليوميه ؟؟؟


بلاش بلاش هى الحكومه هاتعمل ايه ولا اييييييييييه هانقطعها ؟؟؟ ده غلابه مش فاضيين


رجال الاعمال الى خاوتين اهالينا فى التلفزيون عن خدمة المجتمع ما حدش فيهم يحترم نفسه ومن زكاة ماااااله حتى ياخد شارع كده ويوضبه


لا لا شارع مين

الشارع ده بتاع الغلابه . انما التخين فيهم يتمطع ويقول للمحافظ ادينى يا باشا ميدان كذا وانا اخليهولك فله


ويرشق تمثال مالوش معنى فى وسط الميدان ويزوق التمثال وما حوله والشوارع لسه زففففففففففففت


اماطة الاذى من الطريق صدقه

والنبى تتصدقوا علينا يا جدعان حرام كده .

اول لما جه عمو المحافظ الجديد الله يعمر بيته مانشتات فى الجرايد اول حاااااااااااجه هانعمل الشوارع طيب ياعم فين

هانعمل اهو

ونسمع بقى عن انه ماشي على رجليه فى الشوارع وبيقفش الاخطاء وبيدخل مستشفيات ويحاسب الى يغلط وحاجات قشطه كده

قلت لرضا معقوله ؟؟ احنا هاننضف ولا ايه ؟؟!!

قالي : هع بعينك

قلتله طيب حتى نغسل وشناااا ياعم ما تحبطنيش


الى حصل انه عمل زي رحمه بنتى لما تصحى من النوم فى البرد واقولها اغسلي وشك تقوم تغسل عنيها بس ههههههههههههههههههه


هو بقى جه كده فى بعض الشوارع وقام جايب شوية بتاع من الاسود ده وفوق التراب والورق وما الى ذلك ولزق ليس كله كويس وهيه هيه رصفنا الشوارع وبقينا زي الفل !!!!!!


بلاش الشوارع انشاله عنها ما اترصفت ولا لقينا رصيف مشاه نمشي عليه خلينا ماشيين هنا معوجين على رصيف المعاويج الى تحت ده .


السنه دي قالك الدقهليه تخفض نسبة زراعة الارز ليه ياعم قالك كده حفاظا على الثروه المائيه الرز بياخد مايه ضعف القمح

واحنا نصدر رز وبنستورد قمح

طيب نزرع قمح ونبطل نستورد رز


طيييييييييب يا عم


طيب يقااااال ان موضوع قلة الرز ده اثر على السمك اه ماهو زمان كان الفلاح بيروح يجيب سمك زريعه (سمك صغير يعنى) وفى اخر موسم الرز بيلم السمك بقى


الصراحه انا مش مقتنعه ان ده سبب قلة السمك لان اساسا الفلاحين بطلوا الحكايه دي وقالك مش جايبه همها


منين المشكله مش عارفه بصراحه

احنا فى الدلتا بنعتمد بشكل اساسي على سمك النيل وروافده طب يعنى السمك فى النيل مش محتاج موال يعنى ولا يكونش السمك فى النيل خلص


لالا هو تقريبا مااااااات من السموم الى بتترمي فى المايه عقبالنا ان شاء الله


المهم يعنى كيلو السمك انا شارياه النهارده بخماشر جنيه ما تبصوليش كده من شهر كان نفس الكيلو ده ب 9 جنيه

السؤال بتاع الشحاته بقى


مافيش حد من اي اتجاه من المذكورين اعلاه يفكر فى هذا الشعب الغلبان ويجيب بمليون جنيه زريعه يطلعهم من اي مزرعه ويرميهم فى النيل وروافده ؟

على اعتبار اننا عندنا كثافه عاليه فى الدلتا


بلاااااااااش نقول اعملوا مصانع يا عالم فى الصعيد جمب بحيرة ناصر الى مليانه سمك توحش هناك وبيشلوه يرموه على الجنب


لا لا مصانع ايه احنا وش كده برضه ؟؟


احنا نشتري سمك من جمهوريه شومبونجوا ويطلع فى الاخر مش سمك ده صراصير مربربه شويه عااااااااادي


انا اتكلمت فىمشاكل باشوفها بعينى وعايشاها ومش عارفه ليه ما حدش معبرها هو انا عندي عنين اكتر من اللازم ولا ايه ؟

هناك 60 تعليقًا:

همس الاحباب يقول...

ههههههههه
مع الاسف عندك عينينين زى الناس اللى بتشوف مش مستخبية وراء اقنعة ونظارات
مع الاسف ده حال البلد من سوء لاسؤا
ربنا يسهلك الحال وتلاقى واحد ابن حلال يشحتنا كلنا
تحياتى

همس الاحباب يقول...

هو انا كنت اول شحات
قصدى اول تعليق
طب والنبى حسنة قليلة تمنع تعليقات كتيرة

احساس طفلة محبة للرومانسية بس واقعية يقول...

ياه يا صبرنى انتى بتاخدى بالك من حاجات صغيرة اوى كدا لية هاهاهاهاهاها
طيب وانتى بتشوفى الحاجات دى ملقتيش ناس تحت خط الفقر مشفتيش اطفال شوارع
طيب مشفتيش مبانى خلاص اوشكت انها تقع باللى فيها على اللى تحتيها

ياه يا صبرنى وهو حد منهم فكر يعمل واجباتة لما هيفكر يعمل الطريق ولا يفكر فى مشروع ايجابى
كلها مصالح فى مصال هنعمل اية بقى غير اننا نشوف ونقول بس .... محدش هيسمع

ربنا يصلح الحال
تقبلى مرورى

ستيته حسب الله الحمش يقول...

دقي يا مزيكا حزيني على رأي محمود المليجي

لما بيرموا البتاع الأسود فوق التراب والورق يا شوريرة ده ليه اهداف سامية ومديحة
لما انت مش بتاعة اهداف بتكتبي ليه

الأهداف يا ستي ان المقاولين بيبقوا ولادهم داخلين على مصاريف وامريكان دبلوما وجامعات خاصة فبيصعبوا على المحافظ والغير محافظ وبيقول "أهيء أهيء خلوا المقاولين تعيش"

اما عن السمك فاللي عندك ب 15 بحمد الله في القاهرة ب 25 وطبعا انا مش باكل نيلي فالبحري بيبدأ من 35 جنية
يعني اربع سمكات متوسطة ب 35 جنيه وربنا ياخد اللي بيضر الشعب

بس خلاص على رأي شعبولا

صمت المشاعر يقول...

زي ما قلتي الحكومه دول غلابه هبلاحقوا

علي ايه والا ايه

احنا بلديات علي فكره لو جيتي تلاحظي في المنصوره في طرق معينه بتبقي لسه مرصوفه وتلاقيهم يرصفوها من جديد اموت واعرف لييييييييييييييييييه


ربنا يسهل يارب وتتحل الشماكل دي ولو اني معتقدش سيظل الوضع كما هو عليه وعلي المتضرر اللجوء للقضاء

متخافيش بردوه هيتم الاستئناف

جعلوني مريض نفسيا يقول...

هو مش رئيس الوزراء كان عندكوا من كام اسبوع والشوارع اتروقت علشانه يبقي عايزيين ايه تاني ارحموا الحكومة ورجال الأعمال شويه خليهم يكلوا عيش مش كده حرام عليكوا

MaNoOoSh يقول...

علي فكرة يا صبرني انا ليا قرايب كتير في المنصورة وبروح هناك زيارات كتييييييير

والغريبة بقى ان في المنصورة تلاقي غناء فاحش وفقر ما يعلم بيه الا ربنا

يعني بيقعدوا يبنوا ابراج الشقة فيها وربنا اغلي من أسعار القاهرة

ومع ذلك شفت هناك ورا فندق مارشال بيت بيقع ولما بيشيلوا الانقاض بقى والعفش بسيييييييييط جداااا
قعدت اعيط عيااااااااااط
ربنا يرحم اللي راحوا بقى في الحادثة دي

وللا المناطق الشعبية هناك اللي بيبقى فيها شوارع الناس بتخاف تعدي منها


بس بالنسبة للشوارع بقى
انا عايشة فى القاهرة اهو وبتعذب من المشي في الشارع اكتر ما بتعذب فى المنصورة بصراحة

هو عموما الحال بقى فى البلد كلها محتاج معجزة أو فوقان الناس
ربنا يرحمنا جميعا برحمته

مصري جدا يقول...

أشحتوا
وأما تتمسكوا اندهولي اطلعكوا
وبالنص
ماشي يا باشا

مامة مازن يقول...

يا نهار ابيض يعنى فعلا مش متخيلة شكل الرصيف
عندنا هنا منتشر الرصيف العالى بتاع القفز لاعلى ده عارفاه اكيد عندكم منه ما هو موضة من كام سنه وبعدين يهدوه ويبنوه تانى بنفس الارتفاع ان لم يكن اعلى
اااخ نقول ايه يلا حسنة قليلة تمنع بلاوى كتيرة

خمسة فضفضة يقول...

السلام عليكم ورحمة الله وبركاته

اما بتوع المنصوره يقولوا كده امال بقي لو وصفتلك الحال عندنا هاتقولي ايه

يا مؤمنه دا احنا رصفنا الشارع علي حسبنا اي والله علي حسابنا ومع كده مالحقناش نتهني بيه سنه علي بعضها واشتغل الفحر اشي ميه واشي تليفونات واشي غاز

طيب نعمل ايه اكتر من كده يعني ربنا يرحمنا برحمته بقي ويخلصنا من كل العقول الغبيه اللي لازه في الكراسي من ايام الهكسوس

بالنسبه للسمك هو فعلا غالي اليومين دول عشان شهر 5 و 6 ممنوع فيهم الصيد بس مش عارفه السبب ايه ، بس احنا عندنا البلطي حجم كبير ب 10 او 11 مافيش 15 دي تعالي خدي من عندنا

و معروف من زمان وكانت جدتي الله يمسيها بالخير تقولي الشهور اللي مافيهاش حرف الر مش بيبقي فيها سمك حلو وبيبقي غالي يعني شهور الصيف يونيو ويوليو واغسطس وكمان عليهم مايو بس ايه الحكمه ماتعرفيش وايه علاقه الراء بالسمك ماحدش قدر يتوصل للسر ههههههههههههههههههههههههه
مع انك لو لاحظتي هاتلاقي ان كلامها صح جدا مع اختلاف الاسعار من سنة لسنه بس بيبقي اغلي فعلا في ال4 شهور دول

واصلا السمك حاليا غالي بمناسبة انفلونزا الخنازير
مع ان الفراخ بجلالة قدرها الكيلو ب 9 جنيه تخيلي ارخص من السمك !!!!!!

عاشقه الرومانسيه يقول...

لا انتى عندك مخ شغال
واللى مخه يشتغل فى البلد دى
يتعب قووووى


ويطلع فى الاخر مش سمك ده صراصير مربربه شويه عااااااااادي
*********************
يعععع

أحمد حسن البنا يقول...

صباحو محليات حضرتك

ايه شغل التسول ده ؟ انتى غيرتى نشاطك؟ ولا ناوية ترشحى نفسك فى انتخابات المحليات ؟ نصيحة ابعدى عن المحافظ ليجيب ضورف المدونة بقرار لرجالته فى مجلس المدينة وماتلاقيش مكان ترغى فيه وتقعدى على الرصيف المايلل وتقضى حياتك وقوع من فوقه

وبالمناسبه حلوة حكاية الصراصير المربربه دى ههههههه فكرتنى بالدقه اللى استوردناها من دولة كشرى ستان وطلعت مقلب


صباح خفة الدم وتكسير عظام الهم ياست اوم مريم
احمد حسن البنا

د. ياسر عمر عبد الفتاح يقول...

هيه مشاكل فعلاً تبان صغيرة
بس بتفرق كثير مع اللي بيقع فيها

يعني اللي اتزحلق علي الرصيف ..
شايف إن المشكلة دي كبيرة أوي
ومتفرقش كثير عن مشكلة الشرق الأوسط
علي الأقل دي ممكن تتحل

صبرني يارب يقول...

همس الاحباب

اه والله يا اخويا احنا عايزين حد يبصلنا نظرة عطف بس

نورت مطلع التعليقات يا فندم

صبرني يارب يقول...

ستيته
اه يا اختي اهو اكل عيش برضه


والسمك يا خالتي اعمل حساب فرق مستوى المعيشه بين القاهره والاقاليم

ما انا عارفه الكلام ده

قرايبى الى عايشين فى القاهره بيجوا هنا يقولوا انتم عايشين ببلاش على فكره
هههههههههههه

حقد بقى

بس خلاص يا قمر

صبرني يارب يقول...

احساس طفله


لا ماهو الشوارع دي واجباتهم اصلا يا جميل

بس هما الى مستهبلين علينا


وهانقول وهايسمعوا غصب عن حباب عنيهم

نورتي يا قمر

صبرني يارب يقول...

صمت المشاعر

عارف ليه

عشان بيبقى فى حد من الاخوه المحترمين هايعدي منها انت عايز ايه

يمشوا على شوارع مكسره زي ما احنا بنمشي

خسئتم يا شعب نمرود

مش هاتتحل طول ما احنا كده

تحياتي لك واتشرفت بك يا بلدينا

صبرني يارب يقول...

جعلوني مريضا نفسيا

يا هلا نورت يا اخ هشام

ايه ده هو كان عندنا ؟؟

والله ما عرفت

وبعدين دول بيجيبوا شوالي زرع يزوقوا بها الشوارع ويشلوها تاني

بس الشهاده لله الزباله بتتلم من الشوارع الرئيسيه مش هاننكر بقى اصل الظلم حرام

هههههههههههههههههه

صبرني يارب يقول...

مصري جدا


ايه الافترا ده ياعم الربع كفايه عليك

هو استغلال بقى
ههههههههههههه

صبرني يارب يقول...

مانوش

تفاوت المستويات ده بقى موجود فى العالم كله
حتى امريكا ارقى الاماكن فى الشوارع الخلفيه لناطحات السحاب مليانين متشردين ومساكين وجعانين


احنا مش بنبص فى الكتالوج على راي الدكتور ا سلام يا مانوش

زكاة العالم الاسلامي متاكده انها تكفي تاكل وتعيش كل المسلمين كويس

الكتالووووووووووج


تحياتي يا مانوش

صبرني يارب يقول...

مامة مازن

والله يا جميل المشكله مش فى العلو ماهو عالي فعلا

ماااااااااشي اهو الناس من غلبهم بيعدوا وامرنا لله

لكن الميل شديد جدااااااااا انا لما اجي انزل عليه فى الغالب لازم جوزي يمسك ايدى عشان مش اتفرط

حقيقى لا تتخيلى كميات الناس الى بتقع عليه لما اكون واقفه فى البلكونه

تخلف طاااااافح

نورتي يا جميل

صبرني يارب يقول...

عاشقة الرومانسيه

ااااااه يععععععععع

وهو احنا يا دودو فى هذا الزمن بناكل الا اليع ؟؟

زبالة العالم كلها بتتحول عندنا سمك وقمح وفراخ وخنازير


وكله على كله واما يجيلك قوله

على راي الشاعر العظيم الى مش فاكره قال كده امته

صبرني يارب يقول...

خمسه فضفضه

والله انا بافكر اروح اعيش فى بلد تانيه خالص

منع الصيد ده يا فضفضه فى البحر مش فى النيل اعتقد

واه حكاية حرف الراء دي تيته كانت بتقولها برضه
هههههههههههههههههههه

بس انا هاقولك ليه

عشان السمك فى الوقت ده بيكون صايم عشان بيبقى حامل
هههههههههههههههههههههههههه

اه والله بيبقى جوه بطنه البيض فمش بيطلع لفوق الا قليلا اووووي وبياكل بسيط اوي

وبيبقى لابد فى الطين تحت

اصل انا صياده قديمه

بس بيبدأ ياكل من دلوقتي كده

عارفه كان فى واحد فلاح مكان ما بنروح نصطاد

قال لا فى شهر مايو ما ينفعش الصيد كده

انا لما باحب اكل سمك بانزل بنفسي الترعه اجيب السمك بايدى اصل بيبقى لابد فى الطين
هههههههههههههههههه

بس برضه دي مشكله ممكن حلها بطرق الصيد المختلفه

المهم يا فضفضه حد يعبرنااااااااااااااااااااا

كده حرام وربنا

طيب ما عندكوش جمبري طازه كويس

اصل بتوع السمك هنا استريحوا على المجمد
ههههههههههههههههه

نورتي يا جميل

صبرني يارب يقول...

احمد حسن البنا


الله يكرمك يارب انت الاحسن ونورت المدونه يا فندم

صبرني يارب يقول...

د.ياسر

والله انا شايفه ان مافيش حاجه هاتتحل خالص

اصل بينى وبينك احنا ما نستحقش اكتر من كده

نورت

مسدس صغير يقول...

يا نااااس مش فاضيين عندنا اللى اهم من الطرق
عندنا كاس العالم وكاس الكرات والاهلى والزمالك
مش فاضيين للكماليات دى
معقوله ممكن حد يتكسر من الرصيف؟؟
عادى اهم حاجة عمرو زكى ميتكسرش
ههههههههه
اما بقى عن الرز سياسة فاشلة
لو هما بجد عاوزين الناس تزرع حاجة تانية بدل الرز عشان يوفرو ميه
يشجعو الزراعات اللى بتتزرع مع الرز زى القطن والخضروات والحاجات دى ويدعموها ويزودو تمنها والناس اوتوماتيك مش هتزرع رز
حاجة بسيطة يعنى
اما موضوع الزريعة ده انتى تفهمى فيه اكتر منى
ههههههههه
احييكى على البوست

Me7'o يقول...

هههههههههه
عارفة ياللى إنتى مش مطحونة لو عبروكم هايعملوا إيه

هايشيلوا الرصيف اللى فى نص الشارع ويخلوه درجتين ويخلوا الرصيفين اللى على الجنبين درجة واحدة كبيرة مايلة
ههههه

أقولك على حوار سمعته فى الراديو من زمان قوى بتاع 12 سنة يمكن
واحد أتصل يا ستى بالمذيعة وعمال يشتم فى البلد وأبو البلد واللى جابوا ام اللى خلف أبو بنت أخت البلد

ده يا ستى مهندس وعايش فى المعادى
قالك كل شوية يشيلوا الأسفلت مرة علشان التليفونات ومرة علشان الصرف الصحى ومرة علشان الكهرباء وآهوه دلوقتى على لسانه بيقولك والله العظيم فى نفس الشارع فى أوله ناس بترصف وفى آخره ناس بتشيل اللى بيرصفوه

وعمال يشتم ويزعق أنا عمرى ما سمعت كده الصراحة

تفتكرى هو عنده حق؟؟؟؟؟
ولا احنا فى بلد العجائب فعلاً

لاسع افندى يقول...

الكلام ده بينطبق على جميع المحافظات والمدن على مستوى الجمهوريه يعنى اعملى حسابنا معاكى وانتى بتشحتى

تحياتى

صبرني يارب يقول...

مسدس صغير


يا ابنى هو بس كده

زعلانين ان ما حدش بيزرع قمح ؟؟

طب ما يشتروا القمح من الفلاح بتمن ما بيشتروا القمع المستورد البايظ وهو والله هايزرع وهاتبقى الحياه وردي ؟؟؟


وهو يعنى الفلاحين سمعوا كلامهم

وحياتك ما حد عبرهم انزل كده الاراضي تلاقي الاراضي كلها رز شتل وبدار وميه ميه كل شغال

مش قلتلك انا كنت فى المطريه يوم الجمعه وعلى الطريق شايفه كله زراع رز
عبط وربنا

صبرني يارب يقول...

ميخو

حضرتك لازم تتاكد ان الراجل عنده حق صدقنى مافيش اي تنسيق بين الجهات المعنيه

كل واحد بيعمل الى يجى على باله ويفتكس كده هبل فى هبل

القاعده ما لهاش كبير اصلاااااااااا

تحياتي لك ونورتنا

صبرني يارب يقول...

لاسع افندي

لا لا انتم كده طمعانين فى الغله ماليش دعوه كل واحد يلم لحسابه

Sweet Violet يقول...

طيب انتى بتقولى بعض الناس يعنى مش الكل بيقع .. كده اتى لفتى نظرهم ربنا يستر بقى لان لو حد سمعك هتقولى يوم من ايامه وهو قديم احسن

وقولتى كمان سعر السمك .. طيب ابقى اعرفى اشترى بعد كده ^_^

و كمان على الصبح كده ادخل الاقى لله يا محسنين و على ايه ؟؟

شوية رفايع !!!

بالذمة ده كلام بردو .. صحيح شعب مفترى

هما فاضين للحاجات دى بردو ؟؟؟

صبرنى و انتى نازلة ابقى البسى نظارة سوووودة علشان صحتك ياماما ((:

تامر علي يقول...

كل المشاكل اللي بنعيشها دي مقصودة يا فندم ..... آي والله مقصودة ... ودي مش نظرية المؤامرة ولا حاجة ...دي نظرية المصالح ..... رصف الطرق والشوارع عبارة عن سبوبة نهب وسلب ولها محتكرينها اللي بيسفلتوا وبعدين يكسروا تاني يوم وهكذا ولايتم النظر الى مصالح الناس وانما للي هايدفع للموظفين والمحاسيب والأجهزة ... وحتى فوق ....

بلد تطل على بحرين وبها أطول نهر في العالم وبها بحيرات من أكبر البحيرات ... وبعد ده كله بتستورد سمك ..... لييييه؟؟؟ علشان اللي بيستورد بيحيب سمك يبيعه ب10 جنيه يبقى لازم السمك بتاعنا ميكونش رخيص ...طيب نعمل ايه ؟؟؟ نخلي الصيد تحتكره شركات ونمنع تداوله بين المحافظات (أمن دوله لو عريبة سمك اتمسكت ) .. وبكده الباشا المستورد يضمن ان سعر السمك عندنا يفضل غالي وهو يعرف يبيع ....

كله متخطط له ومدروس وبعلم أهلهم :)

واحنا والله العظيم نستاهل كده وأكتر :)

صح ؟؟:)

reem يقول...

ياصبرنى مش تدققي اوى كدا

غمضي عينيكى شوية

اصل كدا كل الناس هاتنزل تشحت معاكى

مش عارف بجد ايه الخنقة اللى احنا فيها دي

حتى لو عملو رصيف جديد هايعملوه اوحش من الاول كل حاجة في البلد دى كدا

ههههههههههههههه
ضحكتينى جدا بحكاية الصراير المربربة دي بس وخايفه كل ما اجى اكل سمك افتكرها وطبعا اكيد مش هاكل

زى العسل يا صبصب والله

صبرني يارب يقول...

سويت فيوليت

والله بالبس نضاره سوده ولما لبستها اكتشفت حاجات اسوأ فى الناس

بجد مش هزرا الكلام ده

فى فرق بين انك تشوف الناس وهما مش شايفين انك شايفاهم

تكتشفي البجاحه والصفاقه وقلة الادب على اصولها


ااااااااه ثم اه


اظاهر يا فيوليت يا اختي العيب مش عنيا
العيب فى دمااااااااغي

صبرني يارب يقول...

تامر علي

ابصم بالعشره على كلامك يا اخ تامر


انا عارفه ده كويس عشان كده مش باقول حقنا واعملوا وسوو


باقول صدقه اماطة الاذى من الطريق صدقه يا جدعان

انا باتحسر لما الاقي علبة التونه بخمسه جنيه

ومستورده

طب فين ؟؟ فين انتاجنا احنا من السمك المعلب ؟؟

عندنا على رايك كمية مسطحات مائيه بالهبل

النيل لواحده والله يكفي مصر كلها سمك

والصيد فى النيل من اسهل ما يمكن مش زي البحر محتاج مراكب كبيره وعمال ومعدات

طيب ليه بنعمل كده فى نفسنا

ليه السمك السابا الفلبينى الكيلو فليه ب 14 جنيه

وفليه القشر بياض المصري ب 25 جنيه ؟؟!!!

نفسي اعرف ليييييييييه


شوف ياعم انا عارفه انهم حراميه وبيسرقونا

بس يعنى ده حتى الحرامي وهو بيسرق اي شقه بيمشى على طراطيف صوابعه وما يكسرش حاجه عشان ما حدش يسمعه



انما زي ما انت بتقول احنا نستاهل الله ماهم مش عاملين لنا ادنى سعر اهو ولا هاممهم نسمع نعرف نتفلق نجوع نعيش نموت مش مشكله


عارف فى مثل فلاحي بيقول ايه

اشغل الست لا تاكل ولا تتشاكل

اعتقد ان الحكومه بتعمل بالمثل ده

اشغل الشعب

بش هما شاغلنا بالمشاكل وكبد الحياه

حسبنا الله ونعم الوكيل



على فكره انا كنت طالبه حسنه بس وانت جرجرتوني فى الكلام

والعمليه هاتبوظ كده

هههههههههههههههههههههه

صبرني يارب يقول...

ريم

وحشاني يا بنتى ايه ده بقى انتى روحتي فين
انا قلت البت ريم عملت بنصيحتى ويظهر الموضوع وصل للقسم بقى وكده
ههههههههههههههههههههه

بالنوسبه للصراصير المربربه عادي هى الصراصير وحشه على الاقل عارفين هي ايه

وما حدش قال انها بتجيب سرطان

انما السمك بتاعهم قالوا بيجيب سرطان

لله الامر من قبل ومن بعد

نورتي يا جميل

بلاش افترا يا ريم توصل للقسم ؟؟

ههههههههههههههههههه

nour shahen يقول...

ههههههههههه اولا انا تببرع ليكم من جيبى الخاف بربع جنيه
اوعى تقولى كتر خيرك يا اختشى ارجوكى غير كدا تبقى داخله علي طمع
طيب قولى المنصوره بعيده شويه عن عنين البعده احنا فى القاهره نفس الحال انسى يا بنتى لا حياة لمن تنادى
مش بيقولوا اللى اختشو ماتوا نروح بقى بأتنين كيلو برتقان وقرص ونترحم عليهم
تصدقى علي ما قولت الكلمتين نسيت انا كنت داخله ليه يا رب خلاص فقدونى الذاكره كمان هههههههههه يا جمالى لما بنسى
اقولك بلاش فضايح فلنكتفى بهذا القدر تحياتى

عمرو يقول...

الموضوع كبير و أتخن من أنك تناقشيه فى بوست !!
ده موضوع لا يصلح اٍلا للمناقشه فى مجلس الشعب و هاتك يا اٍستجوابات و هاتك يا مناقشات و لجان متخصصه تنعقد و ينبثق منها لجان تانيه للمتابعه و تقارير ترفع و تقارير توطى و هكذا .. لحد ما نلاقى السماء بتنشق و الكواكب بتنتثر و البحار بتتفجر و القبور بتتبعثر و يقولوا لنا يالا يا بشر يوم القيامه أهو قوموا بقى أتحاسبوا ..
بتتكلمى فى موضوع بجد يحير يا أم خالد :))

بنت الغربة يقول...

حبيبتى ياصبرنى
وحشتينى قوى ...على فكرة الموضوع ده انا اخدت بالى منه وانا فى المنصورة السنه اللى فاتت..ان الشوارع معظمها سيئه ..بس البلد فيها اماكن حلوة برضه..على فكرة بالنسبه لموضوع السمك ده ..فيه سمك مسمم بيتباع فى مصر على انه سمك بلطى ..لانه شبهه شويه ..بس التانى بيعيش فى المصارف والمجارى..خلى بالك وانتى بتشترى السمك ..انا هابعتلك الايميل بتاع السمك ده ..وانت ابعتيه للى تعرفيه ..ماشى ياقمر..
وانا قربت انزل مصر وهاشوفك بأذن الله ..
تحياتى ياجميل

شمس النهار يقول...

في ايه ياريسه
يخرب بيت اللي يزعلك
ايه الكلام الكبير ده
عارفه مافيش فايده في البلد دي عشان احنا معتمدين علي الحكومه وبس
البلد دي عايزه اللي يحبها
وترجع احلا من الاول

صبرني يارب يقول...

نور شاهين

ولسه يا حبيبتى هايجيلنا توخلف وبله منغولي على ايدهم
ههههههههههههههههه

نورتي يا جميل وهاتي الربع جنيه حلوي ما نقولش لا

صبرني يارب يقول...

استاذ عمرو

طيب ادينا بنفك على نفسنا

وبعدين مجلس شعب ايه

والله احنا اجدع منهم

هههههههههههههههههه

نورت

صبرني يارب يقول...

بنت الغربه

انت فيييييييين يا بنتى

يخرب عقلك اصحي بقى وفوقي معانا


مستنيه ايملك ومستنيه رجوعك يا قمر

وهاتنورينا

صبرني يارب يقول...

شمس النهار

البلد دي يا شموسه

عايزه اداره عايزه رجاله يااختي

عندكيش شويه ؟؟؟

لمؤاخذه يا جودعان بس والله هى كده


نورتي يا شموسه

واحدة مفروسة يقول...

فرستيني يا صبرني اكتلر من انى مفروسة
يا بنتى الامخاخ طارت و الجمجمة بقا فيها شوربة عدس
و فرستيني اكتر لما قلتي ان السمك الكيلو ب 15 جنيه
ههههههههههههههههههههههههههههه
ده البلطى يا باتعه؟؟؟؟؟؟؟
ههههههههههههههههه
احنا بلا فخر
الكيلو بشتريه ب 25
يالهوي يا صبرني فرستيني مووووت

حنين القلب يقول...

انتى عندك اربع عيون مش اتنين

اللى يشوف الحاجات دى كلها وتفضل عينه كويسه وبيشوف بيها يبقى ربنا بيحبه


يا حبيبتى احنا كلنا شحاتين

ربنا يرحمنا من الغلب اللى احنا فيه

صبرني يارب يقول...

حنين

تعالى يا لوليه نربط عينا ونقعد قدام سيدى المرسي ابو العباس
ههههههههههه

نورتي يا جميل

صبرني يارب يقول...

مفروووووسه

وحشااااااني يا جميل والله

ايوه يا مفروسه اعملي فرق مستوى المعيشه فى الاقاليم عن القاهره

احنا كان عندنا نفس السمك ب 9 جنيه
بقى 15 خلال الشهر

فى ناس غلابه اوي يا مفروسه


وبعدين بلاش كده تعالى زورينى وانا انزل معاكي ا جبلك سمك وسمنه وقشطه وبيض بلدي
هههههههههههههههههههه

نورتي يا جميل

كيــــــــــــارا يقول...

ياحيني ياعني هيا جت علي الرصيف

يلا منه له

صبرني يارب يقول...

كيارا

ازيك يا جميل منوره

بسنت صلاح الدين يقول...

تعاطفك وحده مش كفايه،اتبرع ولو بجنيه،والله كل المحافظات كده تلاقى قرار بميزانيه بالملايين عشان رصف و تصليح الشوارع و تلاقى الشارع اتكسر و رجع زى ماكان و انيل كمان و الفلوس راحت فى خبر كان

صبرني يارب يقول...

بسنت صلاح

خلاص تعالى نعمل جمعيه للشحاتين ونطلع نشحت
هههههههههههههههه
نورتي يا جميل

mira يقول...

ما تزعليش اوى كدة دى اقل حاجة شوفتيها وايه يعنى عادى من دة كتير
بس فى اللى اكتر منه والله
بس الواحد هايتكلم على ايه ولا ايه
بس اقولك ربنا معانا وعليهم ان شاء الله
دمتى بخير
ميرا

KHALED يقول...

بتقلبى المواجع لية ياصبرنى ... !!!!

و نسيتى القضية إللى كسبها سياج و حاندفعلة ملايين علشان الحكومة بعد مابعتلة أرض فى طابا المتر على جنية و نص خدتها منة تانى .. و دة كان فى زمن أحد أشهر رموز الفساد و الخراب المستعجل فى مصر

نسيتى الفاكهة المهرمنة المحظور دخولها أوربا و أمريكا و إحنا بناكلها زى البقر ولا حد سائل فى أهالينا

نسيتى لإن أصلا مافيش عدالة إجتماعية

أقول أية ولا أية دة انا حاطق من جنابى ..

صبرني يارب يقول...

ميرا

اهو ادينا بنقول اي حاجه يا بنتى

بدل ما نطق

صبرني يارب يقول...

خالد

خلاص بقى ما تبكيناش على حالنا اكتر ما احنا

نورت

عطش الصبار يقول...

ياااااااااااااااااااه ياصبرنى
هو الرصيف بس اللى مايل ماهى كل حاجه مايله وبعدين احنا شايفين المشاكل دى وعايشينها بس اتعودنا عليها زى بوكيهات الزباله السوداء وهى تزين الرصيف وتوزع عبيرها كل صباح وتقل لكل سائر اصحى صحصح فوق انت رايح العمل
طيب الرصيف عندكم مايل احنا عندنا بيجوا فى نص الرصيف ويحطوا حاويه القمامه
وبعدين ما انا قلت الحل مشعاجبنا حاجه نروح عند عاطف عبيد فى القصور وحمامات السباحه طب رجال الاعمال هيعملوا لكم ايه ايه الشعب ده يا ساتر
تقبلى تحياتى

صبرني يارب يقول...

عطش الصبار

اه والله فعلا كل حاجه مايله


لا طب انتى مش عاجبك حاويةالقمامه؟؟

طب عندنا شالوا الحاويات وسابونا بالزباله لواحده كده يجى سنه

وبعدين عمو المحافظ ا لجديد حطلنا براميل كده لا تسمن ولا تغني من جوع

وحسبنا الله ونعم الوكيل
نورتي يا جميل

من غير عنـــوان يقول...

رصد جميل للشارع المصري

أمنياتي