الجمعة، 17 يوليو 2009

انا جيت يا ولاد



سلاااااااااااااام عليكم

انا جيت يا اصدقائي


اه والله اخيرااااااااااا


طبعا بتقولوا كنتى فين من كام يوم انتى راجعه من يوم الثلاثاء

اقولكم اصل انا كنت باستريح من المشوار


لا لا مش السفر ده لا يعد سفر اصلا انما المصيف نفسه المفروض اخد بعدها فترة نقاهه يجى اسبوعين كده استريح


المهم لما افرجكم الحياه هناك


انا كنت باصيف فى بلطيم

دي فى كفر الشيخ وموقعها تحديدا ما بين البحر المتوسط وبحيرة البرلس


الحقيقه انا عندي مشكله عظيمه فى المصيف اولا انى باكره الزحمه جدا جدا وعليه فخيار راس البر وجمصه دول عذاب نفسي بالنسبه لي


وكمان احنا فى الصيف رضا بيبقى مشغول ا وي اوي وبيكون موسم شغل ما بيقدرش يسيب الشغل او على الاقل لازم يبقى تحت الطلب


فبنخاف نسافر في مكان بعيد عشان ما يبقاص مصيره انه يقضي الاسبوع سايق العربيه رايح راجع


المهم انا كنت من حوالي 27 سنه كده


اه والله بجد


سافرت مع بابا وماما بلطيم دي وكانت صحراء جرداء ذاكرتي مش جايبه غير لقطات بسيطه للبيت الكبير الى كنا قاعدين فيه من دور واحد اصلا

والمايه الى ما كانتش موجوده وكان بابا بيضطر يروح يجب مايه مش عارفه منين فى جراكن كبيره زرقا

والتل الصغير الى كان قدام البيت عندنا الى كنا بنطلع انا واختي الكبيره عليه ونلاقي شجر التين البرشومي ونقطف التين ونحط فى جيوبنا وننزل


الحقيقه دول بس الى كانوا لازقين فى دماغي

وبعدين كان فى صديق بيكلمنى على النت من كام سنه كده وقالي انه من كفر الشيخ وقالي بلطيم بقت حاجه تانيه وبقت مصيف زيها زي راس البر بس صغيره


من سنتين كده مسكت فى زمارة رقبة رضا كالعاده وقلتله ودينى هناك وفعلا راح شاف البلد وحجز هناك والحقيقه الى روحته من سنتين ده كان اهدى واجمل مصيف روحته فى حياتي لحد الان


حبينا نكرر هذه التجربه السنه دي والنبى هى بلطيم هى نفسها بلطيم بس ما تعرفوش كان في ايه السنه دي


بلطيم بلد هاديه فعلا وجميله وانا لا يعنينى من الامر الا البحر ومع ذلك هى برضه فيها مطاعم ومحلات واسواق ومعارض وسينما بس الى يبقى يروح يعنى


واهلها ناس طيبين جدا والله غير انك ممكن تشتروا كل حاجه من البلكونه بالسبت من الناس الى معديين من اهل البلد والى بيبيعوا طرح ارضهم البسيط جدا

والى ممكن يكون شوية مانجه بطيختين قرع عسلي شمام اصفر


وطبعا غير الصيادين الى بيعدوا بالسمك وبيستهبلوا ويضربوا السعر فى خمسه

هههههههههههههههههه

وكمان فى موسم التين تلاقي بنات صغيرين ماشيين كل واحده ماسكه حله صغيره شايله فيها تين جبلي الى هو احلى تين كلته فى حياتي بجد


بلد بسيطه اوي وانا باعشق الجمال الطبيعى مش الشطوط المرسومه بالورقه والقلم


هى بتبقى حلوه بس من وجهة نظري الجمال الطبيعى الفطري حاجه تانيه


والمنطقه الى احنا بننزل فيها لسه شط تحت الانشاء زي ما هاتشوفوا مافيش كورنيش لسه ولا حاجه
والمره الى فاتت لما روحنا كانت البلد هاديه جدااااا
لدرجة ان كان معانا بنت اخت رضا كانت تقولي ده ملللللللللل
بس انا كان عاجبنى الهدوء ده والليل يجى ما تشوفش الا النجوم مع البحر والبلكونه التانيه بقى بتبص على الشارع والناس والدوشه الى مش جامده برضه
غير ان السنه دي عشان حظي الجميل ربنا رزقنا بجيران اجاركم الله تعالى
سهر فى الشارع للصبح والمراجيح عيال وزعيق وصريخ
لدرجة مره الساعه 3 الفجر كانوا بيفرقوا صواريخ طبعا طلعتلهم بقى كنت هاغتالهم خصوصا ان لقتهم شباب كبار مش عيال
ده طول الليل
طول النهار بقى الاغاني
اللللللله
عمري ما شوفت كده جمال اغاني
من حق الكبير يدلع
وفلووووس
والكسكسي بيوجع بطني
وحاجه فل فل فل
مين الناس دي يا جماعه وبيغنوا ايه وبيقولوا ايه ؟؟؟؟
المهم


تعالوا افرجكم الصور الى انا لقطها والى قليله جدا للاسف ما كنت فاضيه كنت ماسكه البوفيه



اولا الصوره دي لقطها وانا قاعده على السرير بتاعي من الشباك




ودي برضه من نفس الموقع بس ساعة الشروق






والصوره دي من البلكونه الرئيسيه للشقه




البحر اهو لافف حولينا من كل ناحيه


بس بيقولك قليل البخت يلاقي الشقه الى باصه على البحر من كل ناحيه حتى المطبخ والحمام ما فيهاش هوا


اه والله يا اخويا ما فيهاش هوا تقريبا البحر ده صناعي ولا ايه


والشقه الى جمبنا كان فيها ناس اصحابنا ما رضيناش ناخدها عشان بتشوف البحر من الجنب بس كان فيها اعاصير هواء

طبعا هاريتهم حقد

هههههههههههههههههههههههههه


ادي اول عضمه لقيتها فى الكرشه


والصوره دي من على الشط لو دققتوا جوه كده تلاقوا ضرتي يووووه قصدي مريم واخده ابوها وداخله البحر وبطلعلي لسانها على اساس انها ضرتي فعلا

هههههههههههههههههههه

طبعا طول الوقت بتحارب عشان تستأثر بكل واحد فينا على حده وتوزع اخواتها فى اي حته ولما تكون مع ابوها انا من ضمن الناس الى بتتوزع





طبعا الرحله كانت جميله جميله جميله


يعنى بصرف النظر عن كون انا ورضا من قبل ما نروح بكام يوم ظهرنا واجعنا وقضينا الاجازه ندي لبعض حقن لما الواحد بقى شاكك اننا بنعمل دماغ مسكنات ولا ايه


او كمان بالنوسبه ليومي الجمعه والسبت الى جمعوا ما بين حر فظيع مريع شنيع وضيوف ونزله معويه للعيال الثلاثه


اه اه ضيوف فى المصيف صدقوا بتحصل فى احسن العائلات الى هى عيلتنا بس يعنى


ده طبعا غير الضيوف المقيمين من اول المصيف لاخره


طبعا قضيت يومين مع الحر والعبايه والايشارب والترجيع والاسهال والسخونيه حاجه زي الفل بصراحه


يوم الاحد الصبح قلت لرضا والنبى على قلبك يا اخويا تروحني بقى كفايه كده


حسيت انه اضايق بس اعمل ايه يعنى اموت نفسي ؟؟؟



اه نسسسسسسيت اقولكم ان رضا فى يوم السبت بررررررضه كان يوم جميل جميل جميل


كان بيلعب كوره مع عواجيز الفرح يوووووه قصدي اصحابه واخواته يعنى


وبعدين قام متفزلك وقااااال بيشوط الكوره بوش رجله على اساس انه ابو تريكه سابقا


لقيته جايلى بيعرج ورجله وارمه وحاجه فل اوي اوي واضطر ينزل يوصل الضيوف كمان الى مش معاهم عربيه لحد جمصه عشان يركبوا من هناك اسهل


يعنى بينا وبين جمصه بتاع نص ساعه كده بس الطريق تحت الانشاء لسه


مش باقولكم يوم خفيف ظريف لطيف ؟؟



بس عشان ما اكونش ناكره الجميل يا جودعان اقولكم انى نزلت البحر مرتين


سمعاااااكي منك لها له لا ما باعرفش اعوم بس كنت باطفو وده احساس جميل جدا


وطبعا انا عندي شروط عشان انزل الميه لا تتوفر بسهوله


وعليه ما نزلتش الا مرتين


والمره التالته نزلت مع البت مروه صاحبتى وطبعا البت يا جماعه شجاعه شجاعه وسباحه ايه وان ولا رانيا علواني فىزمانها


من اول الاسبوع باتحايل عليها تنزل معايا وبعدين فى هذا اليوم العظيم الى هو اخر يوم اصلا


اتمشينا وصلنا لمكان فااااااااضي مافيش فيه اي حد قلتلها تعالى بقى يا رخمه انزلي الميه شويه


اولا لاجل خاطرها مشينا يجى 300 متر والميه مش بتوصل الا لحد ركبنا


الله هو فى ايه هو الواحد ممكن يوصل لقبرص مشي من هنا ولا ايه


وبعدين باقولها جربي نامي على وش الميه والله سهله انا هاساعدك قالتلى لا يا ستي


يا بت ارفعي رجليكى من على الارض


تقولي لا الشبشب هايضيع


يا لهوووووووووي انتى نازله البحر بالشبشب يا بت


تقولي اه احسن ادوس فى حاجه

ههههههههههههههههههههه


وافرضي قنديل لدعني


قلتلها وايه يعنى هانبقى نعالجك ايه البت الرخمه دي


المهم قضيت حوالي نص ساعه هاموت من الضحك عليها بس اييييييييه قلعتها الشبشب فى الاخر وربنا


ده بعد ما لقيناه طالع على وش الميه واحنا واقفين





وكمان فى خروجه ما اقدرش انكرها بس ما كانش قصدنا


احنا كان عندنا ضيوف ونزلنا نشتري سمك فقلنا نروح السوق الكبير الى هو بره بلطيم المصيف وفى بلطيم البلد الى هى بلد ارياف بسيطه بس سواحليه وعليه فيها سوق سمك كبير او حلقة سمك يعنى


وروحنا اشترينا السمك واحنا راجعين رضا قالي الطريق ده جديد بس مش عارف مودي على فين تعالىنجرب جاير اسهل


طبعا وصلنا لبلطيم المصيف عن طريق راس الرجاء الصالح فى عز الظهر حاجه فل اوي


بس بقى الحسنه الوحيده اننا شوفنا بحيرة البرلس الجميله الهاديه الرائعه دي






ادي ايه بجد المكان هناك طبيعى جدا جدا مافيش حد بوظه ولا تحتى جمله



هو اصلا كده لواحده

والبساتين دي كانت على الجنب التاني من البحيره

من اجمل الاراضي المزروعه الى باحب اشوفها هى البساتين وخصوصا لما تكون فيها شجر طارح بجد منظر جميل اوي


وفضلنا نقول هانروح تاني البحيره الصبح بدري ونشوف الصيادين وهما طالعين بمراكبهم بس طبعا فى واحد طنش وما رضيش يصحى وقالي نامي نامي اصل لو خرجنا العيال هايصحوا

لن انسى له هذا الموقف ابداااااااااااااااااااا
وده كان جزاؤه





شايفين البت مريم برضه قبل الصوره دي بخمس دقايق كانت بتغيظ فيا ضرتي حقيقى يعنى


اه بالمناسبه بعد ما صورت الصوره دي كنت باصور صوره تانيه وانا نايمه جمبهم فخالد الله يصلح حاله زق ايدى الموبايل وقع فى عينى مباشرة ولقيت الدنيا ضلمت ولما شلت ايدى قالولي دم دم انتى اتعووووووورتي


اه يا عينى ضيعتوا مستقبلي


ايه رايكم بقى رحله سعيده صح ؟؟


جميله صح ؟؟؟


ااااااه يا مامايا


طبعا نتيتجه لما تقدم شرحه


انا قررت انى ماروحش مصيف تاني اقرب من مدغشقر


او اصلا ما اروحش مصيف خالص


وماله مصيف اليوم الواحد ساعتين ونروح ننام فى بيوتنا وخلصت


هيييييه دنيا


بس خلاص كفايه كده عليكم كده واستعدوا بقى للرغي عشان انا عندي كلام كتير عايزه اقوله طبعا محوشالكم


هناك 53 تعليقًا:

reem يقول...

حمد لله على السلامة ياقمر

بجد وحشتينا جداااااااااااااا

ووحشتينى انا خاصة

انتى زى العسل في وصفك

بس عاوزه اسأل هما اللى كانو في الشفة اللى جنبك لسا كويسين ؟

معلش ياتوتة المهم انك غيرتى وخلاص

وان شاء الله المصيف اللى جاى يكون احسن

بس والله هاموت من الضحك على موقفك مع صاحبتك في البحر

حمد لله على السلامة ومنتظرين الرغي اللى وحشنا اوى

خمسة فضفضة يقول...

السلام عليكم ورحمة الله وبركاته

حمد الله علي السلامه يا صبصب

هو يا بنتي المصيف يبقي مصيف الا بالهيصه واللمه والناس حواليك من كل حته

ويجيلك ضيوف والعيله تتلم وياسلام لو جايين معاكي من اول يوم كده ومافيش مكان للنوم كفايه ونفرش وننام علي الارض وفي البلكونه :))


انت عامله زي جوزي بقوله المفروض قبل ما تنزل تعمل اعلان في الجرايد انك نازل تتفسح وتطالب فيه افراد الشعب انهم يلزموا بيوتهم ومايخرجوش انهارده هههههههههههههه



بقولك لقيت طريقة بسبوسه تحفه زي الجاهزه بالظبط واحسن عاوزاكي بقي تجربيها وتقولي رايك ولو عجبتك نزليها علي المدونه

وصدقيني جربيا مش هاتندمي
انا خلاص قررت ماعدتش اعملها الا بالطريقه دي جوزي اول مره يقولي ايه البسبوسه الرهيبه دي حتي اصحابه مصدقوش انها بيتي

خدي الطريقه اهي :

http://forum.hawaaworld.com/showpost.php?p=32616279&postcount=334

سلام يا قمر

ستيته حسب الله الحمش يقول...

قليل الملح يلاقي الشطة في المصيف

يووووووووووووووه مش ده

طب انا راضية ذمتك
فيه واحدة مسافرة مصيف ترضى انها تطبخ

لأ وايه
وإيييييييييييييييييييه

نازلة لي تتفسح مع المز في سوق السمك

صبرني يارب زي ما صبرتها
ههههههههههههههههههههههههههههههه


يارب يخلي ابو رياض وعيال ابو رياض وخاصة عسولة بابا الست مرمر هانم

استفيدي من غلطتك دي ومضيهم على اقرار قبل المصيف

اي حلة رز لا لا لا
اي سمكة ف فرن لا لا لا لاااااااااااااااا

وحشتينا وفعلا تركتي فرااااااااااااااخ كبير في النت كله

همس الاحباب يقول...

هههههههههه
هههههههه
حمدلله على السلامة
ورحلة سعيدة ومصيف لذيذ
تعيشى وتفتكرى
هههههههههه
تحياتى

Sweet Violet يقول...

حمدلله على السلامة ياقمر
و الف الف سلامة ليك و لرضا

نورتى بلوجر من جديد و المدونة
^_^

واحدة مفروسة يقول...

ههههههههههههههههههههههههههههههههه
فطستيني من الضحك
مش قادرة امسك نفسي بصراحة
المهم حمدا لله على سلامتك
و رحلة و تاخدى غيرها
و الله يا صبرني يا اوختى اليومين اللى فاتو برضه مش عارفه فيهم ايه
كان الواحد مسكديل قطة سودا
كل حاجة معاكسة و حاجة غريبة و الله
بس الصور اللى انتى واخداها شوقتنى انى اروح اتفرج
انا اصلا عمري ما رحت بلطيمو راس البر رحتها برضه من 27 سنة زيك بس مش افتكر حاجة كان عندى سنتين
ههههههههههههههههههههههههههههههههه
وحشتيني و بوسيلي ضرتك ههههههههههه
ربنا يسعد ايامك يارب

سلامة عينك
ابنك مستأقصدك يا صبرني مش برضه هوه اللى عورلك عينك المرة اللى فاتت؟
حد مسلطه عليكي و على عينك
الف سلامة

صبرني يارب يقول...

ريم

والله انتى كمان وحشاني يا قمر


ايوه عارفه الى بيقولك اهو تغير ا نشاله للاوحش
ههههههههههههههههههه

الله يسلمك ونورتي

صبرني يارب يقول...

خمسه فضفضه

اه اه يا ريت والله يعملوا حظر تجوال

لا لا يا فضفضه مش كده ابدا ده تعب ووجع قلب مش مصيف بقى

ونعذب نفسنا ليه احنا

العيال معلش يفرحوا بالهيصه واللمه

انما الى بيخدم اللمه اكيد مش هايبقى مزقطط كده يا معلمي

والبسبوسه هاروح اشوفها يا باشا حالا

صبرني يارب يقول...

سوتيته

والنبى يا اوختشي تبقى تبعتيلى صيغة العقد اصل انا مش عارفه اعمل زيك

واه شوفتي سوق السمك اقصى فسحه يعنى

هههههههههههههههه

صبرني يارب يقول...

سويت فيوليت

تسلمى يا جميل ده نورك

صبرني يارب يقول...

همس الاحباب

تعيش يارب

قصدك نعيش وناخد غيرها

اوك اشمتوا اوي
ههههههههههههههههه

صبرني يارب يقول...

مفروسه

والله يا مفروسه يا اختي هما كلهم متسلطين عليا

لا مش هما بس هما والعيله كلها

ههههههههههههههههههههههه


لا انا باكره راس البر عشان شطها مش حلو وفيه طين وصدف بيوجع

انما بلطيم شطها حلو وهاديه وجميله

اينعم كان فى عيل رخم بيشغل كاسيت ويقول من حق الكبير يدلع
بس عادي يعنى كل شيء وارد

حنين القلب يقول...

حمد الله على سلامتك يا سكرة

انتى اللى غلطانه مصيف ايه
هو احنا لينا فى المصيف ياختى
هههههههههههههههههههههه

ربنا يخلى ليكى ضرتك
وعقبال ما يجى ليه ضرة انا كمان بستكون بنتى لحسن يتجوز عليه تبقى مصيبه
هههههههههههههههههههه

الصور حلوة اوى
ويا رب مصيف سعيد دايما

وحشتينى

صبرني يارب يقول...

حنين

يا حياتي ان شاء الله يجيلك عروسه جميله وتفرحي بها

نورتي يا جميل

ذو الوجه المبتسم يقول...

السلام عليكم
الاول حمدلله على السلامة
ورحلة سعيدة
بصراحة رغيك لذيذ
انا قريت كل البوست
ايه ده ... مش بتبطلى رغي ابدا
ههههههههههههههههه
ربنا يسعدك يارب
ويبارك لك فى حياتك واولادك وزوجك
ان شاء الله المرة اللى جاية هاكون معزوم معاكم
يمكن على حساب ولا انتى بخيلة وبتحبى تحافظى على فلوس جوزك
ههههههههههههههههه
هو موافق بس قولى له
والف سلام على رجله اللى ورمت ههههه
هارد لك يا ابوتريكة سابقا

ربنا يسعدكم
تقبلى تحياتى

MaNoO يقول...

يعنى يوم اما ادخل هنا يبقى مصيف والله بشرى خير انا طول عمرى اسمع عن بلطيم بس اول مرة اشوف حد بيتكلم عنه او كدا من كلامك اه كويس يعنى ممكن الواحد يخطف ليلة ويرجع فيه او كدا اهوو تغيير حتى راس البر بقت زحمة ونيلة اهم حاجة انك انبسطى والجو كان تمام وان شاء الله المرة الجاية مدغشقر بقى او كولالمبور اهو كله تجديد

ঔღঔ نـــوارة ঔღঔ يقول...

لوووووووووووووولليييي

واخيررررا رجعتي وحشتيني وربي

الف الحمد لله على سلامتك



بعد ايه يااوختشي الرغي دا كله

انت رغيتي عن اسبووووع واكترررررر

ههههههههههه

لكن والله متاكدة انه كلامك زي العسل

اروووووح اقرا بقى ^ـ*

اموووووووووووواه

mahasen saber يقول...

هههههههههههههه يا نهارى عليكى وعلى خفة دمك

عيشتينى المصيف وانا فى بيتنا

ربنا يباركلك فى اولادك ورضا وضيوفك وحياتك الجميله دى

بجد جميل الجو اليى عيشتينى فيه ده يا صبرنى

بس انتى هربتى كده على المصيف من غير ما تقولى طب ادينى مسد كنت اتشعبط انا والواد بيرو معاكوا واهه بجملت الضيوف يا ستى

بس بجد تحفه بلطيم
والله فكره اروحها انا وبيرو نتبلطم شويه وادوق التين الجبلى ده

مصري جدا يقول...

حمد اللة على السلامة

سيبك من كل الكلام دة
نازلة لابسة الشبشب
حلو
طب لابسة اية من فوق
يا خرابي
اكيد شتوي
انا ما رحتش بلطيم
وبعد الشبشب
مش رايح

ঔღঔ نـــوارة ঔღঔ يقول...

ههههههههههههههههههه
ههههههههههههههههههههه

يخرب عقلك ايه دا كله يابنتي

تلاقيكي اتحسدتي عشان رحتي المصيف وما اخدتينا معك :]

قعدنا نقر عليكي طول الوقت ياقلبي

ههههههههههههههه

الصور تحفة على فكرة

تصوري بقى انا البحر بيني وبينه خطوتين ولهلا ماروحته الا مرة واحدة بس

:(

ربنا يسعدك علطوول ويخليلك ابو رياض والعيال الي زي الفل

اموووووووووواه

صبرني يارب يقول...

ذو الوجه المبتسم

ونبطل رغي ليه

امال نقعد هنا نعمل ايه
ههههههههههه


ولا انا قررت ما اصيفش اصلاااااا

مش بس ما اعزمش حد

ولو انى ما عزمتش حد اصلا

صبرني يارب يقول...

مانو

اها بس بالنسبه للمزز ما ترسمش مافيش هناك مزز اد كده
ههههههههههههههههههه

راس البر طبعا اكبر ومستوى اعلى فى المحلات والشوارع بكتير

انما بلطيم اهدى وبحرها احسن

نورت يا بلدياتي

صبرني يارب يقول...

نواره

اااااااااه اهو قركم ده باين الى جابنى ورا
هههههههههههههههههههه

يا قلبك الجامد يا اختي انا باموت فى البحر لما كنت عايشه فى ابو ظبي كنت لازم كل كام يوم اروح البحر اتمشى على الكورنيش

ده غير رحلة الصيد الاسبوعيه

وانتى كمان وحشاني يا قمر والله

صبرني يارب يقول...

والله يا اختي انا كان نفسي اخد المدونين كلهم اهو كانوا سلوني بدل ما الواحد سمع كلام مفقع للصبح

ويلا روحي وانا اجيلك هناك لووووووووحدي

صبرني يارب يقول...

مصري جدا

لا لا ما تروحش بلطيم انت

هاتكون لابسه ايه يعنى عباااااايه طبعا

وحاولت اقنعها انها تبقى تجيب عبايات مقاسها مش ادها مرتين

لكن بتقولي مش لاقيه مقاسي تقريبا هى بتشتري من محالات خمسه اكس بس

adel يقول...

حمدلله علي السلامة

وكويس انك انبسطي

انا عايز ااقولك اني روحت بلطيم مرة واحدة من 8 سنين و هاموت و اروحها تاني

اهدي مصيف بجد و تطمني فيه
هو بحره غريب بس بحبه :)
عشان بحب الهدوء

بسنت صلاح الدين يقول...

طيب مش كنتى تقولى يا جميل انا كمان كنت فى بلطيم و لسه راجعه من كام يوم،حمدلله على سلامتك هى بلطيم فعلا هدوء وجميله وكله كوم و السينما اللى فيها كوم تانى فيهااحدث الافلام، تتفرجى على 3 افلام بعشره جنيه يا بلاش، وساعات اربع افلام كمان هههههههه،ابقى قوللى المره الجايه يمكن نشوف بعضينا، ده اذا كان فيها مره تانيه بعد ماتعقدتى كده

حاجات جوايا يقول...

هههههههههههههه
نستعد للرغى

ااااااااااه يا دمااااااغى
وكل ده كان ايه ؟؟ تسخين ؟؟
ههههههههههههههههههههه

حمدا لله على السلامة يا قمر
نورتى المنصورة والبلاد المجاورة
اللى احنا منهم اكيد ههههههههه

رحلة سعيدة عليكوا وعقبال كل سنة
اخبار عينك ايه دلوقت ؟؟
طمنينااااااااا

صبرني يارب يقول...

عادل

الله يسلمك

فعلا هى مصيف هادي جدا

نورت المدونه يا عادل

صبرني يارب يقول...

بسسسسسسسنت

معقووووووووووله لو كنت اعرف كنت بجد قابلتك

انا كنت باتصلب اصلا عشان الاقي حجه اخلع بها يعنى

عموما لو حصل وروحت بلطيم هاقولك يا جميل

ده لو نقلوها جمب مدغشقر

صبرني يارب يقول...

سالي

لا والله عينى كويسه الحمده لله حصل خير

وطبعا ده مش رغي ده تقرير المصيف بس
هههههههههههههههههه


نورتي يا جميل

دعاء يقول...

الحمد لله على السلامة
عقبال المرة الجاية إن شاء الله
البلوجر كان ناقصك بجد وحشتيني
و عقبال مامة مازن لما ترجع هي كمان
شوية رغي بقى لو سمحتي...أنا مستنية

أهو يا ستي خليت بالي من المدونة ومخليتش حد ييجي جنبها أحنا ستات آه بس بـ100 راجل.هههههههه

صبرني يارب يقول...

دعاء

يا حبيتى والله انتم الى واحشنى وانا بجد الى كنت ناقصنى حاجه كبيره اوي

انا من غيركم باحس ان الدنيا عباره عن حله كبيره وعيال وصويت وغسيل وكده يعنى
هههههههههههههههه

وان شاء الله الرغي الجامد جاي يا جميل

MǿиY El-Shreef يقول...

حمدلله ع سلامتك ياصبرني

ماشاء الله شكل المصيف عسووول اوي

بغض النظر عن الضيوف :D

معلش المهم غيرتي جو ونزلتي المية وكل حاجه بعد كده تهوووون

ماشاء الله الصور تفتح النفس والله

وربنا يخليلك قمراتك كلهم واونكل رضا كمان

مووووووواه

شريكة في المطعم يقول...

حمدلله على السلامة
حلوة اوي الصور ..اهم حاجة تكون رحلة سعيدة وقضيتوا وقت حلو
والف سلامة على عينك..
انا عن نفسي مرحتش بلطيم خالص قبل كده
بيقولوا دمياط الجديدة حلوة..كنت رحتها من ييجي خمس سنين كانت حلوة وفاضيه خالص..بس اكيد اتغيرت
اما جمصة بقى ..فشهرتها سابقاها طبعا
هههههههههههههههههه

عاشقه الرومانسيه يقول...

اكتر حاجه عجبتنى صاحبتك اللى نازله البحر بالشبشب دى
هههههههههه
والله انتى عسل واصحابك عسل
تعيشى وتاخدى غيرها بس المره الجايه فى اسكندريه
(;

ahmed_k يقول...

حمدالله على السلامه يا أم مريم
وفعلا كلامك حببني أروح بلطيم وأشوف بحيرة البرلس اللي بسمع عنها في الكتب بس

ومتظري قادم البوستات والرغي اللي محوشاه

الص تحياتي

صبرني يارب يقول...

موني الشريف

ربنا يكرمك يا جميله ونورتي

صبرني يارب يقول...

شريكه فى المطعم

دمياط الجديده احدى الخيارات عندي لمصيف اليوم الواحد ان شاء الله

اكتر من كده لا ممكن ابدا اصيف تاني فى حته قريبه

نورتي

صبرني يارب يقول...

احمد كيه

ربنا يكرمك يارب

هاتنبسط ان شاء الله بس ابقى سبلنا شقتك بقى لما تروح هناك نيجى احنا نصيف عندكم
ههههههههههههههههههههههه

صبرني يارب يقول...

عاشقة الرومانسيه

ايوه ده تقريبا الشبب بيمثلها حاجه مهمه كانت خايفه عليه اوي
هههههههههههههه

عمرو يقول...

الحمد لله على السلامه و كل سنه و أنتم طيبين ..
مش عارف ليه المصايف دايما بيبقى فيها مفارقات غريبه و ضيوف رايحين و ضيوف جايين و بيصعبوا عليا ستات البيوت اللى بيقضوا معظم وقت المصيف فى المطبخ بس هى المصايف المصريه كده و ده شىء متعارف عليه و عادى يعنى :)
عقبال كل سنه و أنتم متجمعين و مبسوطين و لامين العيال تحت جناحكم و مهيصينهم ..
تقبلى تحياتى و تقديرى ..

صبرني يارب يقول...

استاذنا ربنا يكرمك

وربنا يسعدك ان شاء الله واجازه سعيده باذن الله

متشكره اوي

hasona يقول...

السلام عليكم

حمد لله علي السلامة
ورحلة جميلة سعيدة
و تكونو صيفتوا كويس

وبعد كده تبقوا تجيبوا مية البحر وتصيفوا في الشقة ولا في حمام السباحة

بلطيم من المصايف الجميلة والمميزة

سبهللة يقول...

حمدا لله على سلامتك
دة ماكنش مصيف
دى كانت مجموعة من الحوادث المتتاليه
شفاكم الله جميعا

شمس النهار يقول...

صبرررررررررررررني
ازيك
الجيران هنا كانوا هيطلبوا لي البوليس من كتر الضحك
في ايه ياماما ده مصيف والا عكاشه في الادغال
وحشتيني فعلا

معلش كل مصيف وانتي طيبه
تعيش وتاخدي غيرها
معلش انا مقصره بس مافيش وقت خالص
للبلوجر
واديني بحاول اتابع كل مايسمح الوقت

صبرني يارب يقول...

سبهلله

اه انا واخده على كده على فكره

مش انا قلت موضوع مالوش لازمه ؟

صبرني يارب يقول...

حسونه

الله يكرمك

وليه نتعبن نفسنا ويعنى لو ما صيفناش هايحصل ايه

ماله بسين الاستاد حلو زي الفل

نورت يا فندم

صبرني يارب يقول...

شموووووووووووسه

وحشاني وحشاني وحشاني

ماشي ياعم مافيش وقت للبلوجر

ماشي ماشي

طب خدينى معاكي والنبى


حلوه أوي عكاشه فى الادغال دي
ههههههههههههههه


منوره البلوج يا جميل وترجعي بالسلامه ان شاء الله

أم مالك يقول...

بجد بجد انا مبسوطة خالص
وضحكت من قلبى كمان
ووصفك للاحداث رائع وخلانى كانى كنت معاكم انا اول مرة امر هنا
وانبسطت جدا
ربنا يبارك فى ابو مريم ومريم واخواتها
تقبلى مرورى واتمنا التواصل
تحياتى

:) QŁp 7āZēŋ يقول...

طب حمد لله ع السلامة ويارب تكون اجازة جميلة
بس مالها اسكندرية احلى بحر واحلى جو

صبرني يارب يقول...

ام مالك

الله يكرمك يا حبيبتى متشكره اوي

ان شاء الله نتواصل بس ادعولي افضى شويه
احسن انا على اخري اليومين دول

صبرني يارب يقول...

اسلام

انا قلت لا يا اخويا

يا رييييييييت بس صعب نبعد عن الشغل