الجمعة، 24 يوليو 2009

تكاتيك وموتسيكلات



تكاتيك وموتسيكلات 

السلام عليكم 

ايه بقى الحكايه حد يفهمنى ؟؟

يعنى ادوني عقلكم جايز انا عقلي على اده 


انا بامشي فى الشارع الايام دي 

اي شارع فى مدينتى الى هى المنصوره 


الاقي التوكتوك ده ماشي كده وسط العربيات زي النمل 

والموتوسيكلات كذلك  

طيب ايه ؟؟

فين النمر ؟؟ لا ده له نمر ولا ده له نمر 

اه والله العظيم تلاته كده

جايز بعض الموتوسيكلات عليها نمر انما كتير من غير نمر 

والانكت من كده ؟؟ ان اصحابها بيقولوا ما لهاش ورق اصلااااا 


طب ايه ؟؟

لو توك توك من دول ولا موتوسيكل خبط حد يبقى نجيبه منين 

اقول والله التوكتوك كان مكتوب عليه عضه اسد ولا نظره حسد ؟


اهو الصوره دي فيها توكتوك من غير ارقام خالص 


لا بس اوعى مكتوب عليه اي ميس يو وسهر الليالي 

يعنى عاملين حساب السياح 
هع 

طيب ماشي توكتوك عشان ازمة المواصلات اوك يا معلمين بس الموضوع يبقى مقنن مش كدددددده 

الله هو مولد ولا ايه ؟؟
اه هو مولد للاسف وصاحبه نايم 

طيب ماشي التوكتوك فى البلاد الارياف وفى الاحياء الشعبيه فى الحواري يعنى من الاخر 

انما ازاي التوكتوك بس يا ناس على الطريق السريع ؟؟

على راي رضا نمل ماشي فى الشارع  

ازااااااي يا ناس على طريق سريع بس يمشي توكتوك 

اهو فى الصوره مش جايبه حاجه من عندي والله
 



طيب بلاااااش كده 

التوكتوك ده مين سايقه ؟؟ عيال

والله العظيم كلهم عيال ومش اي عيال  

لا لازم يكون عيل بلطجي

الله مش ماشي من غير لا ورق ولا رخص ولا يحزنون 

لازم يكون بلطجي وصايع ويعرف يفلت من المرور 

وهو ده الى بيوصل الناس 

وبيوصل العيال الى راحه الدروس 
وسجلوا بقى حالات السرقه والاغتصاب من العيال دي اد ايه 
وكل الى يقدروا عليه كل ما تحصل حادثه يلموا العيال بتاعة التكاتيك 

الله !!! طب ا يه ؟؟؟
انتم لازم تستنوا لما يعلموا على الشعب الاول ؟؟؟!!!

بلاش ده ولا دددددده 

عارفين ان التكاتيك دي شغاله بنزين طبعا 

طيب عارفين ان البنزينه بتكون فى شارع رئيسي طبعاااااااا

وكمان بالصلاة على النبى التوكتوك ما يقدرش يروح لحد البنزينه 

لسبيبين الاول والاهم هو انه على ما يروح البنزينه ويرجع لمكان شغله فى العشوائيات هايكون وهو راجع خلص نص البنزين

والتاني الى مش مهم انه جايز يتمسك فى الطريق (اه جايز طبعا انتم يعنى شايفين حد بيقول انتوا بتعملوا ايه ؟؟ ولا حد بيفكر فينا اصلا ؟؟)


يعملوا ايه يا عبد الرحيم يجيبوا بنزين منين يا عبد الرحيم ؟؟

فى قانون حاليا بيمنع ان البنزينه تدي بنزين لحد الا لو كان فى تانك العربيه دوغري 

ما ينفعش يعبى بنزين فى جركن ويمشي ممنوع يا ساده يا افاضل 

ولو عربيتك فضيت بنزين فى الشارع اولع بجاز مش مهم لحد ما حد يتعطف عليك ببؤين بنزين 

الى بيحصل بقى يا حلوين ان بقى في تجارة بنزين سوق سوده 

بشكل ا و باخر بيملوا جراكن البنزين الكبيره ويحطوها فى محلاتهم الى هى فى الغالب محلات غيار زيت بتوع كاوتش كده يعنى

والتوكتوك بيروح يعبى من هناك بضعف تمن البنزين الى فى البنزينه 

ولان احنا بلد منظم ونضيف زي ما انتم عارفين 

بتكون فين يا واد يا جمعه المحلات الى بتبيع البنزين دي ؟؟

فى كل حته 

تحت بيتي وبيتك ووسط تجمعات سكنيه ونص العيال الى واقفين فيها البانجو لاحس دماغهم 

يعنى عود كبريت الحي كله يولع بعون الله 

وسلملي على خالتك ام جمعه 


طيب الموتسيكلات ؟؟

كان زمان اشوف الى راكب موتسيكل ده راجل كده شقيان وتعبان وجايب الموتوسيكل عشان يوفر اجرة الميكروباص 

دلوقتي امشي فى الشارع تلاقي حبه عيال هبل راكبين موتيسكلات 

من حوالي خمس ست سنين كده 

كان ولاد البهوات كل واحد بيشتريله موتوسيكل الواحد فيهم اغلى من العربيه قشطه ؟؟

اه عيل وابوه جابله موتوسيكل وبيلعب بيه 

شويه شويه نزلت موتوسيكلات البلد رخيصه جدا يمكن بنص تمن الموتوسيكل العادي (مش بتاع البهوات ) واقل كمان

فين مين ا زاي يقولك صينى 

على ما اذكر انها كانت منحه صينيه باين والحكومه باعتها والصين قالتلهم يا خونه ازاي تعملوا كده ده منحه من الشعب الصينى للشعب المصري الى احنا عايشين على قفا انتختهم 
وكانت مشكله كبيره والاوراق بتاعة ا لموتوسيكلات ما طلعتش والناس فضلت ماشيه بالموتيسكلات كده فى البلاله

وحاليا تلاقي اطفال راكبين موتسيكلات وجري بيهم فى الشارع وخمسات وسبعات الى بيقولوا عليها دي واهرس فى الشعب يا معلم 

الى سايق ده معاه رخصه ؟؟ اشك

الموتوسيكل نفسه مترخص ؟؟ مش لازم يعنى هو انا يعنى هاروح به فيييييين 

وااااااااه يا نفوخي 


يا جدعان ارحمونا قننوا الحاجات دي تبقى بحساب 

تبقى لها اول من اخر ايييييييييييه بقى 

التوكتوك بيستشري فى البلد 

انا ركبت مره مع سواق تاكسي وواحد قاعد جمبه بيشكيله من عربيته هو وصاحبه النقل التقيل 

قاله ياعم بيعها وهاتلك توكتوك ..... اااااااااه ده بيكسب واي عيل يسوقه ولا تبهدل روح ورا مقطوره على السكك كل شويه

بقيت قاعده ابص للراجل واقول ايه ده الشعب اتهبل ؟؟!!!!

يبيع عربيه نقل ويشتري توكتوك 

وقلت لما اروح هاقول لرضا يصفي اشغاله دي ويشتريلنا اثنين توكتوك اجره والتاني ملاكي 

ويمكن امنجه نفسي واجيب لنفسي توكتوك ملاكي لوحدي اروح به السوق 


واخيرا يا حلوين اليكم هذه الصوره الرائعه الى مش ممكن تشفوها الا فى مصر 

ولما تشوفها تقدر تغنى بعلو صوتك وتقول يبقى انت اكيييييييييد اكيد فى مصر 

وباعتذر لكم كلكم  لو كنت مقصره معاكم فى متابعة مواضيعكم  او حتى الرد عليكم هنا الى هو بيكون اول اولوياتي والله على النت 
بس معلش انا الايام دي والله الحكايه ملخبطه معايا شويتين ثلاثه وعلى اخري فى الوقت  لولا ان الموضوع ده مكتوب من شهر فات ما كنتش عرفت انزل موضوع جديد 
ادعولي من فضلكم
كفايه كده ما تقعدوش ترغوا بقى 

هناك 41 تعليقًا:

مصري جدا يقول...

من ناحية على قدة فعلى قدة جدا

التوك توك دة يا ستي
المستورد بتاعة عمك الحاج بطرس غالي تمنة جملة بعد الشحن والذي منة تلت تلاف وتمنميت جنية شاكب راكب
بيتباع بكام بئا تمنتاشر ألف جنية كاش اما عن القسط فحدث ولا حرج الجنية يزيد خمسة وستين قرش لو ملتزم وبتدفع القسط في الميعاد

نيجي بئا للترخيص
قانون المرور يعرف السيارة بانها باربع عجلات والموتوسيكل بعجلتين ولك يذكر التل عجلات من اساسة ومن هنا دخل النور قصدي الحاج بطرس
هتقولي يتعدل القانون طب والسبوبة اية يا شعب حصوة في عين اللي ما يصلي عالنبي رزق وبتاع بطروس

اية حكاية الظروف لو عاوزة ربع جنية شغال رقبتي بس ما تساويس تلاتة ابيض
ربنا يفرج كربك

adel يقول...

ههههه

انتي قالتيها انت اكيد اكيد في مصر

اساسا العيل بتوع التكاتك مش محتاجين تكتك عشان يسرقوا و يغتصبوا حد بس اهي طريقة جديدة و معلش ده من الحكومة لو في ردع للموضوع جامد كان هيقف بس كل واحد ياكل شوية فلوس من بيع التكاتك بيحط لسانه جوه بقه

الموتسيكلات نفس الشء بس الموتوسيكل الصيني ده لازم ليه تصريح لكن تقول لمين اساسا

عاشقه الرومانسيه يقول...

تعرفى انا عرفت منك معلومه مهمه قوووووى دلوقتى
كنت دايما اسئل نفسى ايه جمع توك توك
والحمد لله عرفت
(:

بطلى حقد على البشر بقى ياصبرنى وسيبى الناس تعيش
بزمتك لو انتى عندك اتنين من البتاع ده اللى مش عارفه اقول جمعه
كنتى هتتكلمى على رخص ولا غيره؟
(;
ههههههههههههههههههههههههههههههههه
اينعم هما مولعينها
والمشوار ما ياخدش حاجه ولا حتى لاخر الشارع ويلهفوا منك مبلغ وقدره
بس ده مش سبب برضه
اه هما اللى بيسوقوا حبه عيال والله باكون مرعوبه وانا راكبه معاهم بس ده مش سبب برضه
دع الخلق للخالق يااوختشى

ياصبرنى ياحبيبتى
طنش تعيش تنتعش


وحشتينى ياحماتى العزيزه

مي يقول...

ايييييييييييييه ياستى انا كل ده غياب لالالالالالالالالا مش واخدين عليكى كده كل ده بترتاحى من الاجازة والفسحة الهايلة عاااااا
بس عالعموم فرحتينى والله حمد عالسلامة وحشتينى يابت ياصبرنى
ماعلينا الله يخربيت التكاتك بنشوف حالات سرقة رهيبة بجد
بس الصورة الاخيرة دى تحفة ههههههههه
دايما انتى كده عسل بتيجيبى حاجات رهيبة
تحياتى ليكى على فكرة انا كنت بعلق عندك بس بمى بس من غير مدونة معرفش هتفتكرينى ولا لاء
تحياتى ليكى ياقمر

حنعيش يعنى حنعيش يقول...

كالعادة مش حيبصوا للى بعملة التكتك الا لما تقع مصيبة .....ممكن استلف اسمك اسبوعين ....بس حاغير فية شوية ....حخلية صبرنى يارب وحياة حبيبك النبى

Somaya Kamal El Din يقول...

ههههههههههههههه

حلو موضوع التكاتك ده
نفسى مرة اركب توك توك

بسنت صلاح الدين يقول...

التوك توك ده مصيبه من ابداعات الشعب المصرى المتعدده، عندك حق فى كل كلمه قلتيها محدش عارف المصايب اللى ممكن تيجى من الشىء اللى حط على شوارعنا مش عارفه منين و كذا حاله اغتصاب وتحرش و حوادث حصلت من البلطجيه و الاطفال اللى بيسوقوا الشىء العجيب ده ،انا مبقولش يمنعوه بس مش يسيبوه لقيط كده يتعمل له رخصه و شروط مفيش كده غير عندنا احنا فى بلد كله ماشى

شـقـاوة مـراهـقـة يقول...

ههههههههههههههههههههههههه..


التكاتك دي شويه خناااافس طلعت من بلاعه وانتشرت فـ انحاء المحروسه ..

وانا شوفت والله عيل يجي 7 سنين كده بيسوق توك توك وطول ماهو ماشي يزمررررررررر والشارع اساسا فاضي ..

شكل مامته قالتله اخرج العب شويه بالعجله يا حبيبي ..

البوست جميل جداااااا ..

بس ياترى حد من المسئوليين هيسمعك وهتلاقي حاجه حصلت ؟؟

ياريت بجد ...

تحياتي ليكي يا جميله ..

تسلم ايدك ..

Ahmed يقول...

أمال لو شفتي الوضع في القاهره, بكل المقاييس كارثه ومأساه فعلا

محدش يقدر يمشي مطمن جنب الناس ديه اطلاقا

أصل الحكومه مش فاضيلهم, عندها اهتمامات تانيه أهم بكتير من الناس ديه

وبالنسبه للاغتضاب والتحرش والسرقه والنصب وكل ده, مفيش مشكله, الناس لو تعبانه من العيش يكلوا جاتوه أحسن

صبرني يارب يقول...

مصري جدا

ماهو انا عارفه والله انها لقمة عيش وسبوبه

بس يعنى كانوا هايتشكوا فى معاميعهم لو كانوا نظموها واتنيلوا سرقوا وسبونا نعيش فى امان ؟؟؟

وبالنوسبه للظروف سداد يا باشا ربع جنيه بحاله الواحد مش مصدق نفسه ان لسه فى كرم كده
ههههههههههههههههههههه

لا مش ظروف ارباع جنيه خالص وقت بس والله

نووووووووووورت

صبرني يارب يقول...

عادل

ايوه انا عارفه انهم مجرمين طبيعى بس كمان لما يكونوا سايقين توتوك وناس راكبه معاهم ؟؟؟
وقد يكون الى راكب حد كبير فى السن ولا طفل ولا اي حاجه ؟؟؟


ايوه الموتيسيكلات الى نازله دلوقتي بتصريح غير بتوع المنحه دول كانوا موضوع تاني وبالهبل وموجودين فى البلد حاليا ومن غير ورق حقيقى

مش عارفه فى الاخر مشوها فى المرور بفاتوره باين حاجه كده

نورت يا عادل

صبرني يارب يقول...

مي

ايوه يا جميل فكراكي والله نورتي البلوج

وايه الاخبار بقى عندك مدونه ولا ايه
ان شاء الله هاروح اشوف

نورتي يا جميل

صبرني يارب يقول...

عاشقة الرومانسيه

يعنى انتى سايبه الموضوع كله ومش عاجبك الا جمع توكتوك
هههههههههههههههههههههههههه


نورتي يا جميل

صبرني يارب يقول...

سميه صلاح

تعالى يا حبيبتى وانا اركبك على عينى

بنتى برضه نفسها تركبه خديها وانزلوا فى جوله هنا بالتوكتوك

هههههههههههههههههه

نورتي

صبرني يارب يقول...

حنعيش يعني هانعيش

د. اسلام منور والله


وبالنوسبه للاسم اوك اتفضله

ده لان الاول كانت لازمه فى كلامي اقول صبرني يارب

حاليا باقول

اللهم افرغ علينا صبراااااااااااااااااا

نورتنا

صبرني يارب يقول...

بسنت صلاح

لا لا ما تقوليش مصري مش كل حاجه تلزقوها فى الشعب الغلبان

ده اختراع هندي ولا عمرنا كنا نعرفه يا اختي

وهو فعلا كده بلد كله ماشي


نورتي يا بسنت

صبرني يارب يقول...

شقاوة مراهقه

ايوه والله هما بيبقوا سنهم كده

انشاله ما سمعوا يعنى انا هاعمل ايه بقى ادينا بنقول بدل ما نتفرس

نورتي

صبرني يارب يقول...

احمد ابو العلا

هو فى توك توك فى القاهره كمان ؟؟؟

يا رااااااجل كنت فاكره القاهره لسه ما وصلهاش المصيبه دي

واه طبعا مش فاضيالكم ايه الشعب الرخم ده

نووووووورت

همس الاحباب يقول...

توكتوك وتكاتيك
يالصلاة على النبى
ولسه يا شعب
كله ماشى وعديها الناس لبعضيها
ده احنا برضه شعب الفهلوة
وربنا يستر على الجاااااااااى
تحياتى

مامة مازن يقول...

احسنتى فى وصف الحالة المأسوية اللى الحال وصلها تعرفى حوادث الموتسيكلات دى كتير جدا وربنا يستر فعلا والله حاجة صعب

مذكرات زوجة يقول...

بناتى نفسهم ومنى عينهم يركبوا توكتوك ولو مرة واحدة فى حياتهم

فكرت انى اطلع على الشارع وأتقاول مع واحد منهم عشان يفسح البنات

رحت لقيت خناقة عند موقف التوكتوك ومطاوى وسنج

طبعا لغيت الفكرة دى من دماغى خالص والعيال يعيطوا مهما يعيطوا .. يتفلقوا ولا انى اركبهم مع واحد وش اجرام

صبرني يارب يقول...

همس الاحباب

والله ما عارفه رايحين على فين

صبرني يارب يقول...

مذكرات زوجه

لا انا شايفه الخناقات طبيعى فمش ممكن اقدم على الخطوه دي

نورتي

صبرني يارب يقول...

مامة مازن

وايه يعنى ما الشعب كتير اهو يعنى كان خس ؟

نورتي

د. ياسر عمر عبد الفتاح يقول...

مالها بس التكاتك
دي حتي بتوفر فرص عمل للبطلجية والمجرمين
وكمان بتعمل علي إشاعة الفن الشعبي الجميل في الشارع من خلال السماعات الضخمة اللي بتركب فيها .. وبتتحول لدي جي متحرك


محدش يعرف أجيب توك توك منين وبكام؟

كيــــــــــــارا يقول...

انتي بتجيبي الحاجات دي منين متبلغوا البوليس يابنتي دا كدا خطر ازاي بنزين يكون تحت بيت ولا التوكتوك دا يالهوي ياني

Me7'o يقول...

عارفة يا صبرنى

لو طلعتى لفوق شوية كده وبصيتى على الشوارع من فوق كده

هاتلاقيها عبارة عن شرايين بتجرى فيها كرات دم بيضا اللى هى جميع انواع المركبات وكرات دم حمرا وهى الأغلبية طبعاً ودى فعلاً كرات دم من كتر الحوادث اللى على الطرق والواحد بيسمع عنها وشوية حاجات سودة عاملة زى السوس كده ودى طبعاً التكاتك وعوادم السيارات والحاجات السودة دى بتنخر فى الشرايين دى اللى بقت متهتكة أصلاً

مع شوية كوليسترول سادد شريان وده عبارة عن ظباط المرور لما مسئول كبير بيعدى من الشريان ده

وفى أوقات كتيييييييييييرة قوى
هاتقدرى تشوفى السكتة القلبية اللى بنعانى منها دى

وربنا يحفظنا من شر السكتة القلبية

اللهم أجعلنا من أصحاب الشرايين السالكة

سلام بقى علشان السيرة بتجيب ضيق فى النفس

Me7'o يقول...

آه نسيت أقولك

إنتى ممكن بقى لو حظك حلو تشوفى الجلطة الكبيرة بقى

لما تلاقى اللهم احفظنا وأجعل كلامنا خفيف على قلبه وأقر اللهم عينه معدى كده من شريان وكل الشرايين الى بتنقل الدم مسدودة

تحياتى

MǿиY El-Shreef يقول...

ههههههههه معلش بقى يامحاسن اتعودنا ع ان كل حاجه موجوده ف مصر

مش مشكله بقى نمل بيمشي ف الطريق العالم

والله موتيني من الضحك

:))

ahmed_k يقول...

ميس يو كاتبينها غلط هههههه طبعا
يلا مش حندقق في دي
يا أم مريم أصحاب التكاتك على حد علمي أغلبهم أمناء شرطه ورجال أمن فمش ممكن يرخصوه لأنهم غير مسموح لهم بممارسة أنشطه تجاريه حتى لا يستخدموا نفوذهم, هذا القانوني لكن اللي ماشي أنهم بيمارسوا أنشطه تجاريه وبيستخدموا نفوذهم بشكل مخالف تماما لكل القوانين
وأمناء الشرطه وضباط الصف أصبحت التكاتك ملعبهم الخاص فالمرور تبعهم والواد من دول لما يتمسك صاحب التكتك بيطلعه ويا دار ما دخلك شر
وهكذا حاميها حراميها

المشكل يا أم مريم أنا شعب ميعلم بيه إلا ربنا يعني مثلا لو القانون متهاون في جانب معين تجدي هذا الجانب خربان واللي اربه الاس (الشعب نفسه) مش مستورديهم اللي بيعملوا المصايب دي
وعلى رأي الشاعر(حافظ إبراهيم) اللي قال

وكم ذا بمصر من المضحكات
كما قال فيها إبو الطيب
تضيع الحقيقة فيها بيننا
ويصلي البريئ مع المذنب
ويهضم فينا الإمام الحكيم
ويكرم فينا الجهول الغبي

هيييييييه تحياتي

صبرني يارب يقول...

د ياسر

اه والله العظيم تصور حكاية الاغاني دي بشعه

الواحد يفكر ان فى بره مظاهره وبعدين الاقي توكتوك معدي

لو عايز توك توك تعالى عندنا الشارع فيه ولا خمسميت توك توك

صبرني يارب يقول...

كيارا

بوليس ؟؟؟


بوليس النيس كوانيس

شوفي احمد كيه قالك ايه ؟؟؟

يا بنتى البوليس دلوقتي عشان يحمي ناس تانيه خالص غيرنا

منوره يا كوكي

صبرني يارب يقول...

ميخو

بص انا قلقت كده على شراينى على فكره


من ضمن كرهي لشوارع القاهره الحقيقه بسبب المواكب

والحمد لله تعالى انى مش من سكان القاهره الكبرى ولا المترددين عليها كتير

عشان كان زماني فى السجن من زمان لانى لا احتمل الموقف ده اطلاقا وكان ممكن ارتكب جنايه يا معلم

صبرني يارب يقول...

موني الشريف

محاسن مين

البت موني دي تقريبا تايهه
ههههههههههههههه
محاسن المدونه الى على اول الشارع يمين

يظهر ان انتى النمل طلع عليكى ولا ايه

نورتي يا جميل
انا ومحاسن واحد دونت وري
هههههههههه

صبرني يارب يقول...

احمد كيه

ايوه مش انا باقولهم عاملين حساب السياح ؟؟؟

على اساس انهم ناس مسقفه يعنى ايوه مش مثقفه

الي هما بيسقفوا كويس

وحاميها حراميها من زماااااان للاسف الشديد

بس عندنا مش هما الملاك لكن الملاك مسلكين معاهم يعنى

وااااااه يا بلد

نورت يا استاذنا

عمرو يقول...

رغى مفيد جدا و فى الجون تمام يا أم خالد ..
بجد بيزنس التوك توك بقى شىء غير محتمل و مينفعش يتسكت عنه أكتر من كده لأن الموضوع زاد عن حده أوى ..
طبعا اٍحنا مش ضد اٍن الناس تشتغل و تكسب و تغطى نفسها بالحلال و كمان مش ضد أن اللى مش قادر يركب تاكسى يلاقى وسيلة مواصلات رخيصه نوعا ما لكن ضد الفوضى و الاٍستهبال بشتى صوره ..
الموضوع محتاج تقنين ما و مساءله للى أستورد هذه البعارير و سمح بدخولها مصر و باعوها للناس و بعضهم باع عفش بيته علشان يشترى توك توك و بعدين أكتشفوا أنه لا يصلح للترخيص !!
عجيبه دى !!
أمال كل ده كان ليه لما شفتوا عينيه ؟؟
و على رأى طلعت زكريا ربنا يشفيه لما قال على التوك توك ده البعر بتاع العربيات النقل عمركم شفتوا دوله بتستورد بعر ؟؟
لا و الله يا عم طلعت ماشفناش !!
أييييه يا أم خالد .. على طول كده أنتى شاغله تفكيرنا :)

شريكة في المطعم يقول...

السلام عليكم ورحمة الله وبركاته

بصي بقى انا طبعا زيك من المنصورة
وعندنا بقى موضوع الموتوسيكلات ده بقاله كام سنة في المنطقة الي انا فيها
اغاني غريبة عجيبة بأعلى صوت وطول الليل والنهار ..والأضواء بقى تقولي فرح معدي
وكل الي عليها شباب طبعا واحيانا تلاقي بنات بتسوقوا برده
وساعات بقى عائلات متكونة من 6 افراد
بس مشكلة فعلا وبيحصل بسببها حوادث كتير
اما التوك توك ده بقى
ظاهرة حديثة على منطقتي لاني ساكنه على شارع رئيسي وكبير واي حاجة في المنصورة بعيدة عنه..ميترحلهاش بتوك توك يعني ..بس بقوا متواجدين برده
بالشعارات الغريبة الدلوعة والي معرفش ايه!!!
اما الي بيسوق في الغالب اطفال ..جه لأختي مرة في الوحدة سواق توك توك اتقلب بيه في الترعة ..وعمره كان 7 سنين

ايه الرغي الكتير بتاعي ده :)
بس بوست جميل فعلا

صبرني يارب يقول...

استاذ عمرو

لا ماهو احنا ما بنبصش الا تحت رجلينا

المهم نجيب التوكتوك ونوصل للسبوبه

مش مهم الشعب يولع يتحرق مش مهم

احنا ما حدش بيفكر فينا والله

صبرني يارب يقول...

شريكه فى المطعم


اه فعلا انا باشوف اعمار كده بتسوق


هنا موطن الرغي الاصلي يا جميل ترغي براحتك يمينا ويسارا

حاسوباتيه يقول...

فعلا بقوا شئ مستفز وبيسببوا مشاكل كتير جدا ماعرفش ماحدش قايلاهم حاجه ليه

akeed يقول...

طبعاً الموضوع ده مش موجود الا فى مصر والهند طيب نقول ان الهند لسه فيها نسبة جهل كبيرة و اقاليم تتسم بالجهل و الفقر طيب مصر دلوقتى مع التقدم احنا بنرجع للخلف هل حل ازمة المواصلات التوك توك بالعكس هو يزيد من الحوادث و معرض للحوادث باستمرار