السبت، 17 أكتوبر، 2009

مجانية التعليم


السلام عليكم يا مدونينا الكرام


حد يعرف ايه هى مجانية التعليم


حد فيكم شافها ؟؟


انا عن نفسي ما شوفتهاش سمعت عنها بس


مع انى كنت فى جامعه حكومي برضه من الي هى المفروض انها مجانيه


المهم خلينا نجيب الشريط من الاول


التعليم المجاني الى احنا عايشين فيه من بداية عهد الثوره ده عمل ايه ؟


عمل كلام جميل اوي اوي فى الناس وكل الناس بقت بتتعلم والغني زي الفقير و و و و وباقي الكلام الحلو الى باسمعه


طيب خلونا نركز كده ونشوف


هل حال التعليم من بداية التعليم المجاني لحد دلوقتي اتصلح ؟؟


لا بلاش اتصلح فضل حتى زي ما هو ؟؟


الواقع الجلي انه من سيء الى اسوأ طبعا ولا فى حد عنده راي تانى ؟؟


يعنى يكون حد له شوق في حاجه


طبعا قائمه من الاسباب الى اولها واخرها قلة الموارد ونعمل ايه ما انتم الى ما تسمعوش كلام ماما كريمه وعددكم فى الطالع وصحتكم حلوه وكده يعنى


طيب ماشي


حد يقولي بلد مين هبله عامله التعليم الجامعي مجاني


حد تاني يقولي بلد مين هبله عندها تعليم جامعي قليل القيمه زي تعليمنا


والنبى بلاش تقولولي جزر القمر جامعتهم تقطع القلب واحمدوا ربنا والحركات دي


انا شايفه ان التعليم المجاني حلو وجميل اوي بس مش كل التعليم


نخلي التعليم المجاني ده مثلا لحد الاعداديه


والباقي بقى الى عايز يكمل يشتغل ويكمل اهله مرتاحين يكمل


انما يبقى الشعب كله داخل الجامعه والشعب كله مش عايز يشتغل حرفي والشعب كله عايز يبقى باشا وهو اصلا طالع من الجامعه شايل ختم على قفاه انه دونكي كبير ما بيعرفش يقرا حتى كويس ؟؟


طب وبعدين ؟؟


العيل الى معاه دبلوم دلوقتي بيقولك انا معايا شهاده اشتغل صنايعيى ؟؟؟!!!


والا الباشا الكبير بقى الى مش لاقي ياكل وبيقطع من لحم ابوه الحي عشان ياخد مصروفه بعد ما اتخرج من الكليه وبقى زي الجدار عشان مش لاقي شغل يناسب الختم الي على قفاه .


كان زمان قبل المجانيه ما تفكروش كانت ظالمه اوي زي ما بيصوروها


عمي الكبير قالي احنا كانت مدارسنا اه كلها ولاد البهوات الى فيها انما كانت فى منح للمتفوقين


كان العيل الى عايز يتعلم وعارف ان ابوه مش هايقدر يدفعله يقوم يجتهد ويذاكر ويتفوق فياخد اعفاء من المصاريف


يعنى ولاد الفقرا المتميزين علميا كانوا بيتعلموا مجاني برضه


طيب كتر خير ابو الثوره عملوا تعليم مجاني


الشعب كله اتعلم ؟


لا برضه


طيب ايه رايكم فى الاقتراح ده يا جماعه بصدق


ان التعليم يكون مجاني لحد الاعداديه بس مثلا

والتعليم الثانوي الفني ده ينضف عن كده ويبقى تعليم بحق وحقيق وما يبقاش مجاني برضه يبقى مدعوم بس وله مصاريف قليله


اما التعليم الجامعي بقى يا ترفع عنه المجانيه اصلا يا اما برضه يبقى بنظام الدعم الحكومي


دعم بس مش مجاني من الاول والاخر


ما حدش يقولي هى الناس نااااااقصه والمصاريف هاتبقى غاليه والبتنجان ده


العيال فى الجامعه بياخدوا دروس فى كل المواد ده انا هاموت من الغييييييييظ


يدفعوا فلوس الدروس للجامعه ويبقى فى دراسه محترمه


والعيال طلبة الجامعه التنابله الخايبين النايبين دول يهزوا نفسهم ويقوموا يشتغلوا


بدل الانتخه والنوم للعصر والسهر فى الكافيهات والصرمحه مع البنات


ولما يتخرج يقف بعين جامده يقولك انا مؤهل عالي عايزنى اشتغل بياع فى محل ؟؟؟ هاو كام ؟؟؟



انما دلوقتي

اتفرج يا سلام


شوف يا حبيبى انت ما لكش دعوه باي حاجه الى تطلبه مجاااااااب بس اهم حاجه تذاكر


ليه ياعم هو هايذاكر لك انت ولا لنفسه غيرو المبدأ خلوه يحس انه بيذاكر عشان نفسه اولا


حتى البنات بقوا طالعين تنابله مش عارفين يتحملوا مسؤلية بيوتهم بسبب الدلع ده


امال مش لحد 22 سنه (ده لو فالح يعنى ) انسان مستهلك من الدرجه الاولى ؟؟


الاقي واحد بيقول الواد قال بيقولي انا عايز اشتغل فى الصيف


طب ياعم وماله ما يشتغل


لا يا اخويا مش عايزين منه شغل بس يتنيل يذاكر هو

هو انا محتاج منه شغلللللللللل ولا انا قصرت معاه فى حاجه


اهو انت كده يا اخي قصرت معاه

حرمته من حق العمل والاعتماد على النفس والاحساس بالمسؤليه


خلي بالك

لو كان الى بيشتغل مثلا بيصرف على نفسه 400 جنيه فى الشهر حتى لو كان ده كل مرتبه


فالى مش بيشتغل تاكد انه هايصرف على نفسه ضعف المبلغ ده وهو ما بيقبضش خاااااالص


الله ما الفاضي يعمل قاضي


والقرش بيجى سهل هات ياحاج خد يا حبيبى


بتسم بدنه وانت بتديله القرش ؟؟ طب وايه يعنى جلدهم تخن


بره بيعملوا كده خدت الثانويه العامه يا حبيبى

طب يلا بره اشتغل بقى وورينا حلاوتك


ما قلتش اطردوهم بس على الاقل عودوهم يشتغلوا


نرجع تاني لموضوع التعليم


واقول يا ناس لازم نشوف حل


احنا كده شغالين بنفرخ عيال هبله ومتخلفه للبلد وخلاص على كده


وكل واحد شايل الختم على قفاه وماشي نافش ريشه ونفسه كبرانه على الشغل اوااااااااانطه


ياريته بيعرف حاجه


هو راح الكليه وخد دروس خد المذكرات حفظهم او فهمهم حتى ما تفرقش المهم انه ذاكر عشان يمتحن مش عشان يفهم


دخل اللجنه دلق الى عباه فى دماغه على الورقه وطلع من الامتحان ابيض يا ورد وخد الشهاده


وما حدش يقولي الغلابه مش هاتتعلم


اكلوا الغلابه الاول وبعدين فكروا فى علامهم


مش كاملين المعاني الغلابه وناقصين التعليم بتاعكم الفاااااااشل ده


وما حدش يقولي الجامعات الخاص موجوده


انتم عارفين كويس ان الجامعات الخاصه اسعارها مبالغ فيها جدا وكمان اغلبها نظام بيع شهادات والحركات دي


وبعدين انا مش بس عايزه التعليم الجامعي يبقى نضيف


لا انا عايزه المدارس كمان تبقى مدااااااارس


التعليم يبقى تعليم

الى الاهالي بيصرفوه فى الدروس يدفعوه فى المدارس والعيال تتعلم بصحيح بدل قرف الدروس دي


وغباوة اغلب مدرسين الدروس الخصوصيه الى كل هما الواد هايجيب كام عشان اهله يدفعوا المعلوم


احنا اصبحنا شعب مدمن على الدروس الخصوصيه


والمشكله اننا كمان اصبحنا حاملي شهادات فقط لا متعلمين ولا نيله


عنفك الخط ونقول كلام يمس القلب


اخرنا يعنى بنفك الخط


مش كددددددده ولا ايه ؟


على الله تقولوا ايه


هناك 35 تعليقًا:

فتاه من الصعيد يقول...

لا طبعا اعترض

اصلا هو ملغي ..... امال الدروس والجامعات الخاصه دي ايه

انا اعرف ناس بتجيب مجموع في الاعاديه وموش بتدخل ثانوي علشان الدروس

واعرف ناس جابوا 50% ودخلوا طب خاص بفلوس

على الاقل يبقا في بصيص امل للناس الغلبانه انه ممكن يبقا احسن لو حاول يتعلم

موضوع حلو

تحياتي

فتاه من الصعيد يقول...

والتالت والنبي ..... هذا يوم عيد :)

فتاه من الصعيد يقول...

اول تعليق في اول مره اعلق ...... مش مونكن

سومه...مجنونه فى بلد عاقل يقول...

بصى يا ستى المجانيه المفروض تتطبق مش بتعميم لا بالاتى يعنى كل اسره حسب مرتبها ودخلها كل واحد يتعمل دراسه للرواتب والظروف وكل اسره على حسب ظروفها تدفع ...
لكن تلغيها نهائيا اذن الفقير لن يتعلم واللى احنا فيه واللى بتقولى عليه جهل اوافقك عليه لكن لو اتلغيت نهائى الجهل حيوصل لتخلف
فى اسر فى مصر بتعتمد اعتماد كلى على المدارس الحكوميه
وبعدين تعالى هنا هو فى شغل للمتعلم اما حيبقى فى شغل للى معاه اعداديه ولا ثانويه
اللى احنا محتاجينه فعلا اعاده توزيع للميزانيات واعاده وضع مناهج دراسيه جديده وحديثه
يعنى انا فى فنون جميله درست منهج سنه 70 موضوع سنه 70 الشغل برا بقى مفيهوش شعره من اللى درسته
يبقى لازم اعاده ترتتيبات للامور مش الغائها الغاء كامل

صبرني يارب يقول...

فتاه من الصعيد

هو انا باقول ايه دلوقتي

بدل ما تروح المدرسه اوانطه

واحنا بنصرف على المدرسه دي من ميزانية الدوله

وكلها تمثليات فى تمثليات واهو كله من دمنا برضه

وبعديننرجع ندفع بقى دروس كمان

طيب ما ندفع فلوس الدروس للمدرسه والمدرسه تبقى محترمه

وبصيص الامل للفقير انه يبقى متفوق ومتميز بعلمه ودماغه

انما يبقى فاشل والمجتمع يتحمل مسؤليته ليه ؟؟؟

انتى نورتي فى اول تعليق واول مره وان شاء الله دايما منوره

صبرني يارب يقول...

سومه

انا ما قلتش الغيه كله ولا قلت ما يتعلمش

انا قلت كفايه يتعمل لحد اعدادي

والباقي يشتغل ويعلم نفسه

وبعدين ماهو الى معاهم شهادات دول يا بنتى ما بيفهموش ما استفدناش حاجه غير اننا بس تخنا ودانهم ومش راضيين يشتغلوا

والمناهج بس هما يتنيلوا يفهموها ايا كانت شكلها

صدقينى الى بيحصل ده غلط

على الاقل من وجهة نظري

reem يقول...

حبيبة قلبي اللى وحشانى

انا لازم اقول كدا في الاول علشان مش متفقة معاكى في كل الكلام

قلت أأمن نفسي الاول بكلمتين حلوين

هههههههههههههههههههههه

هو انا معاكى ان التعليم مش حلو خالص خالص

بس مش الحل نلغي التعليم المجانى

ووالله اغلب الولاد اللى فعلا بيطلعو مش عارفين حاجة هما اولاد الناس المقتدرة

ياتوتة ابن الراجل الغلبان بيقدر اوى حتى تمن الورقة اللى بيصورها لانه عارف انها مش جايه بسهوله

ويمكن اكتر الناس اللى فعلا عملت حاجة في حياتها وتركو بصمات في اغلب المجالات بيكونو اولاد ناس فقراء

الحل ان التعليم يتصلح فعلا السعودية فيها التعليم مجانا لكن المدارس صح

ومش تقيسى على زمان وتقولى زمان ابناء الفقراء المتفوقين كانو بياخدو منح تعليمية لان زمان غير دلوقتى

دلوقتى الفرص العادلة اتمسحت من الوجود في ظل الكوسة والواسطة

الطالب االمتفوق والاول على دفعته كتير مش بياخد حقه في جامعته لو كان مش عنده واسطة يبقا الغلبان هاياخد حقه في منحة ياتوتة ؟؟

اما بالنسبة للشغل فعند فيه كل الحق

مش عيب الاب يعود ولاده يعتمدو على نفسهم حتى لو مش محتاجين

في النقطة دى متفقون يا فندم

وانا رغيت كتير وتعديت على اختصاصك معلش
هههههههههههههههه

انتى فين بئا وحشتينى والله

Atef Shahin يقول...

كتبت في مدونتي سابقا موضوعا مشابها تحت عنوان "سلم لي على مجانية التعليم " وقلت فيه اننا نضحك على انفسنا فما تنفقه الاسرة على الدروس الخصوصية اضعاف مايمكن ان يدفعه الناس من رسوم يمكن ان تخصص حصيلتها لزيادة مرتبات المدرسين وعندها يتم اغلاق كل مراكز الدروس الخصوصية
شكرا على اثارتك هذا الموضوع الهام وتقبلي مروري

صبرني يارب يقول...

يا ريم

احنا بنفترض وجود نظام صح بقى

طيب وانا منعت ولاد الفقراء المتفوقين

ما قلنا المتفوق له منح

ما تقوليش مش هياخد المنح

المفروض ياخد

هو ده ال المفرووووووووض يحصل

الفساد موجود موجود بس هانعمل ايه بقى

وسعودية ايه يا امي الى بتقولي عليها

ما نظامهم فاشل برضه

وبعدين حل الجهل مش مجانية التعليم

كان من باب اولى الدول الى اقتصادها قوي تدعم التعليم

شوفي امريكا وكل دول اوربا المحترمه

حد فيهم عنده التعليم الجامعي مجااااااني ؟؟

عقبال ما نبقى محترمين

انت تختلف معايا براحتك يا باشا انت قمري انت

صبرني يارب يقول...

عاطف شاهين

ازود مرتبات المدرسين ؟؟

طب مش لما يعملوا حاجه بالى بيخدوا اصلا ؟؟

العمليه التعليميه مش مشكلتها المدرسين دلوقتي

العمليه التعليميه ناقصها اداره والله

تدي للمدرسي على دماغهم بالمرزبه عشان يشتغلوا صح وبلاش ا ستهبال كباقي الشعب

طبعا الا من رحم ربي

حضرتك نورتي يا فندم واكيد هازورك واقرا الموضوع الى حضرتك كتبته ان شاء الله

KHALED يقول...

أيــــــــــــــــــــــة .... !!!!

فى البلدى إللى يتعلم بفلوس بيشتغل بفلوس ...
و إللى إنتى بتقولى علية منفذ فى الحقيقة ...
التعليم المجانى شعار نسيوا يلغوة
أنا تعليم مدارس حكومى و جامعة حكومية ماكنتش باعرف أتكلم عنجليزى كويس إلا لما أستغليت فرصة انتظارى الجيش بعد التخرج و خدت كورسات إنزليجى ..
النظام فى مصر من القمة الى القاع محتاج تغيير

ستيته حسب الله الحمش يقول...

بعد ما ناقشتك على المازنجر مليش نفس اقعد اكسر في المتكسر تاني

ولكن سأطرح هنا كلمة واحدة
اين الجامعات الأهلية يا بشرية

سيبوا المجانية هي كده كده حنفية الحكومة بتقفل خلاص
وكله ها يشتري المية

لكن اكبر جامعات العالم جامعات أهلية
مؤسسات غير ربحية
لا تدفع ضرائب
تعتمد على التبرعات والهبات
ساعات ها يديها هبة رجل اعمال حرامي "وما اكثرهم ويخصم فلوسها من الضرايب
وساعات محبي الصيت ها يبقوا الحاج خليفة رجل البر والاحسان
وساعات ها يتبرع لها شرفاء يقدروا ويقدسوا قيمة العلم والعلماء

الجامعة الأهلية بتطلع بحث علمي عدل
بتطلع متعلمين عدلين
بتكون مصاريفها آدمية وفي ذات الوقت لا تعتمد مجانية ولكن انضباط المصاريف حسب المجموع والإجتهاد

متفتحنيش في منظومة التعليم
عارفة انها بتجيب لي هرش
وبضطر أخد انتي هستامين وبنخمد

بسنت صلاح الدين يقول...

انا معاكى ان الجامعات خرجتلنا جيل شايف حاله على غير مناسبه ،بس انا طول عمرى اشوف الغرب بالمفهوم اللى بتقوليه فشل فى انه يعلم شعبه لأن الجامعات ليست للجميع لكن بالفلوس و المنحات اللى اتكلمتى عنها و كنت بحمد ربنا ان من حقنا اننا نتعلم بمقابل بسيط فى بلدنا اللى مأخدناش منها حاجه غير اننا اتعلمنا كويس و الحمد لله ،بس مش كل حد فاشل دراسيا بيدخل كليه مهمه يعنى مش محتاجين اننا نخليها بفلوس عشان محدش يدخلها غير جدير بيها ،كمان صعبه شويه ان التعليم يبقى بفلوس من اول ثانوى لأن هاتلاقى شعب مصر كله بالاعداديه ،انما انا مقدره فكرتك انك تقضى على البطاله و نحصل على تعليم ممتاز بس ده ليه حلول مختلفه يعنى مثلا نعمل زى بره و نخصص مشروعات تابعه للجامعه يبقى كل دخلها مخصص لتنميه الجامعه و نقبل تبرعات للتطوير الجامعات كمان ممكن نعمل وظائف اجباريه فى الصيف للطلبه عشان يتعلموا ان مش شرط اللى يتخرج من كليه يشتغل فى تخصصه على الاقل فى بلدنا

يــوم جــديد يقول...

التعليم المجاني ؟
دا زي الانترنت المجاني كده ؟
فين المجاني ده
في الثانوية العامة ولا في الجامعة ولا في كليات الطب اللي مش عارفة بياخدوا فيها دروس ازاي

لو عملنا التعليم لغاية الإعدادية مجاني طيب ما الطلبة بيطلعوا منه أصلا مش بيفكوا الخط
يبقى الموضوع مش في المجانية
والدليل على كده إن المدراس الخاصة زيها زي الحكومية في الثانوي في ناس بتطلع ولادها من مدارس خاصة لمدارس حكومية عشان تدفع الفرق في الدروس
وفي الآخر مش هيدخلوا برضه كليات اللي اتمنوها
اللي جايبين 97 و98 مكانوش جايلهم طب ولا صيدلة في الواحات حتى يبقى المشكلة في المجانية ولا في نظام التنسيق

أنا بقول يا صبرني يا حبيبتي قفلي على الموضوع ده عشان أنا عندي حساسية
رفقا بالقوارير

MADO يقول...

The main point first is the QUALITY of education before the way to finance the system.
I mean free education till (e3dadia)middle schoo means many won't go any further so are they will be able to use computer?to think logicaly?can they work any job need to operate machine? and etc etc.
P.s the education in college level education in usa or europe not for free BUT there are MANY ways to get government help and COMMUINTY help and free interst loans and and.... and all of that is not aviliable in egypt so the case will be rich people kids will get educated ,poor people kids will go to hell just because rich people don't won't them to share even the education,maybe soon some SMART will ask to make air not for free because it's not fair poor people use it too

صبرني يارب يقول...

خالد

ماهو ده قصدي احنا بقينا شعب كله بدون اي مهارات

كله فى البتنجان وخلاص

صبرني يارب يقول...

ستيته يا حياتي

انا عارفه عارفه معلش بقى حقك عليا انتى الكبيره

يا ستيته انا باتكلم باعتبار اصلاح النظام

فاهمه ؟؟

يعنى النقطه دي بحر فى اصلاح التعليم

استنى عليا لما امسك الحكم واوريكي بقى

فى الصيييييين يعنى
انا عايزه اوجه الانفاق الحكومي على التعليم على المراحل السابقه

ونطلع عيال فاااااااالحه

ويبقى عندنا خريجى جامعه مافيش زيهم

ويبقى كمان عندنا عمال وفلاحين

امال مين ينام فى المجلس يا خالتي الله

انا وانتى وكل الناس عارفين ان المشكله فى التمويل

المشكله فى السرقه
فلوس الجامعه دي بتتشفط فى بطن ناس انتى عارفاهم قبل مني

ميزانيه مهوووووووله يادوب بنشمها احنا كشعب

صبرني يارب يقول...

بسنت صلاح

قبل ما تقارني سعر التعليم الجامعي هنا وهناك

قارنى المستوى الى انتى اتخرجتي به والمتسوى الى هما متخرجين به

ووظائف ا جباريه

حلوه الفكره دي ونرجع الصخره كمان

تصوري فكره ؟

اصل احنا تقريبا ما بنجيش الا كده

صبرني يارب يقول...

يوم جديد

الى يدفع فلوس فى مدرسه خاصه زيها زي الحكومه يبقى عبيط يا بنتى مالناش دعوه بقى

انا باودي ولادي مدارس خاصه بس فيها تعليم
ومش باديهم دروس لحد دلوقتي بحااااااااول ما اخليهمش يدمنوا الدروس الخصوصيه

اعتقد لو كنت وديتهم تعليم حكومي
ووديتهم دروس عشان ما فيش تعليم اساسا فى المدارس الحكومي كنت دفعت اكتر ما انا بادفع فى المدرسه الخاصه

عارفه ليه احنا ما بندخلش الكليات الى بنتمناها ؟؟
بس انا دخلت يا اختي الى اتمنيته ولله الحمد
ههههههههههههه

ما بندخلهاش عشان هي ليس ما نتمنى فعلا

هى ما يتمناه المرض النفسي المجتمعي ما يسمى بكليات القمه

بسسسسسسسسسسسسسس
شعب مصر كله فجأه تحول الى انه بيهوى الطب والهندسه

فجأه كده

الميول والاتجاهات كلها للشعب ده انحصرت فى كده

تخلف شعبي حااااااااد

صبرني يارب يقول...

mado

ومين قالك اننا ما بندفعش فلوس الهواء ؟؟

امال الفلوس الى راحه للمحافظه على البيئه والحمايه من التلوث دي تبع ايه ؟؟

ما احنا بندفعها كشعب يعنى من لحمنا الحي ويااااااريته نافع

ده احنا بندفع ثمن تمثليات وبعدين العصبجيه بيبيعوا هوانا لشركات اجنبيه يعملوا مصانع مضره بالبيئه ويتاجروا بصحتنا وعافيتنا


انا ما قلتش الفقرا يموتوا

لكن الفكر الشيوعى الى بيدى الحق لكل الناس فى كل حاجه زي بعض انا مش باؤمن به

احنا مسلمين والاسلام فرق بين الملكيه العامه والخاصه

الاسلام عمل زكاه من مال الاغنياء للفقراء

ما قالش الفقير يقسم مع الغنى

الغني الى عايز يقسم بقى هو حر

انا باقول ندي فرصه للفقير الى عايز ينجح

الى عايز يتعلم

انما ما يبقاش فقير ومش لاقي ياكل ونقوله انت بقيت بيه ياابنى ومعاك شهاده
اوعى تتنازل وتشتغل شغلانه مش من مقامك العالي

خسرنا والله بالتعليم ده

انت عارف لو العيال دي بتطلع من الجامعه متعلمين فعلا

كنت اقولك لا مش بس خليهم مجاني اديهم فلوس ياعم عشان يجوا

انما ما ينفعش نشتغل ضد المنظومه البشريه

الى هى اشتغل احصل على شيء
اجتهد تكون متميز

انما لا بيشتغل ولا متميز ولا نيله

ده للفقرا والاغنيه وحياتك

كله بقى زفففففت

انت مش فاهم انا باقول ايه

انا باقول نعلمهم لحد ثانوي مثلا علام بصحيح

يطلعوا منه بيعرفوا كمبيوتر ولغه محترمه عربي واجنبي ومهارات شخصيه وهوايات ونفسيه سويه ونعمل مدارس فنيه تطلع فنيين محترمين

يطلع من ثانوي يقدر يشتغل

يقدر يشتغل ويصرف على نفسه لو حب ويتعلم

نعمل جامعه اهليه بمصاريف محترمه

والحكومه نفسها تعطي منح للجامعات دي

مش بس هالغي المجانيه

لو دققت تلاقينى باقول هاطلعهم من ثانوي احسن من حالهم دلوقتي وهما طالعين من الجامعه ابيض يا ورد

مجانية ايه الى بتتمرغوا فى ترابها

الجامعات بقت معامل تفريخ لناس ما بتعرفش حاجه

صدقنى انا كنت فى انترفيو امبارح وكان فى ندوه قبل الانترفيو للمتقدمين

ذهلت من مستوى العيال الثقافي وفكرهم

وده الى خلانى اكتب البوست ده

احنا راحين فين واخرتها ايييييه

اذا كنت انت بتقول بكره حد يجى يقول نعمل الهوا بفلوس

بنفس منطقك بقى طالب الحكومه تعمل مصايف مجانيه

عشان مش معقول الاغنيا يصيفوا والفقرا لا مش عدل برضه

مش بتتحسب كده ابدا

فى عدل الهى احنا فى غفله عنه

نورت يا مادو

MADO يقول...

First of all I’m not Communist at all, also let us agree there is no perfect education system ever ,even if it is perfect at some point for some nation that won’t stay long because everything change with time ,also let me put example if what happen when no more free education..
Rich people kids go to colleges because ONLY they have money and that doesn’t mean they all are losers but just mean they all go because they all can, and poor people kids can’t go to college only the GOOD one (who will decide if that student is good? The exam result? Never was an actual tool to discover talented people) but one poor kid is that good one and want to be a doctor, engineer or a judge (for god sake that not for poor people from loooooooong time)so now that poor kid need ALWAYS to be perfect in his college to keep his free education, and always has to recover himself from that different than other students have cars and he go by public bus!!! He has poor cloth ,he can’t afford the education tools, and after graduation he won’t be able to be independent doctor (3iada) or his own office (engineer) or never be judge because he is poor, say he could , you know what that student future will be? Will try to be rich at any way to save his kids from same future…. Isn’t that what happen in Egypt after 1952?? But now poor student between other poor students doesn’t face all that problems because simply he isn’t alone
Sorry for long respond
Taha Hussein should complete his words to match nowadays
Education is as water and air POLLUTED

صبرني يارب يقول...

مادو

الاول يعنى مش شيعي من كله
مافيش فايده نتفة شيوعيه اتسقيناها زمان ووقفنا زي انت بتقول كده

بقينا عاملين زي الى رقصوا على السلم
لا محصلين دول ولا دووووووول

شوف انا برضه مش عارفه حضرتك كل الى خايف منه يحصل لو حصل الى انا باقترحه

موجود فعلا

ان الناس بتحاول تكون معاها فلوس باس شكل عشان تعلم ولادها

طيب ماهو ده اساسا موجود ماهو اصلا مافيش تعليم ببلاش دلوقتي

ببساطه مافيش مدارس دي تمثليات

وبعدين السؤال الى حضرتك بتقوله

ابن الفقير لو بقى دكتور مش هايبقى عنده عياده طيب ماشي نعمل ايه بقى

نلم من بعض ونفتحله عياده ؟

يشتغل فى المستشفى يا سيدى الى مش لاقيين دكاتره يشغلوها

الحقيقه انا مش فاهمه ليه انتم عايزين الفرص كلها بنفس الشكل تكون موجوده ومتوفره لكل الناس

انا مش باقول يبقوا مش متعلمين

لا باقول يتعلموا تعليم نضيف
ويكون فى جزء من التعليم بقى يتطلب العناء

يا فندم حل انت مشكلة الن الشعب كله معاه شهادات عليا وما حدش فيهم راضي يشتغل ؟؟؟!!!

يااما يشتغل بيه يا بلاش

نعمل ايه ؟؟

نستورد عماله

حصل والله استوردنا عماله

ما ينفعش نفضل كده من بدء الخليقه والناس درجات فى كل شيء حتى فى التقوى

ما لناش فضل على بعض بده

ده كله فضل الله

التعليم كالماء والهواء ماااااااشي

الى بقى ملوث على رايك زيهم تماما

انما فين الماء الهواء ؟؟؟!!

حتى دول ما بقوش متوفرين

شوفت ازاي احنا ماسكين فى احبال دايبه

بنقول نعمل التعليم الجامعي مجاني

واحنا اساسا شعب جعاااااان

والامراض ماسكه فى جتتنا من كل ناحيه

محتاج اكتر اعالج الناس وااكلهم واسكنهم
وبعدين اعلمهم تعليم جامعي

هى اسامي وبس

انا باقول هاعمل تعليم اعدادي او حتى ثانوي حقيقى ونضيف ومدارس حقيقيه

يدينى نفس نتيجة الجامعات المايله الموجوده دلوقتي

ايه الفرق بقى ؟؟

احنا جامعتنا بقت مهزأه اوي ما عادش حد معترف بها حتى هنا والله

مش عارفه حضرتك متابع ولا لا

انما دلوقتي الشركات الكبيره النضيفه ما بيقبلوش حد من جامعه حكوميه

تخيل كم الملايين الى بتتصرف على الجامعه وبيتنهب منها كاااااام

صدقنى النظام كله فاسد والتعليم كله فاسد

بس انا اقول نقطه فى بحر فى اطار الاصلاح

انا عندي امل يكون فى اصلاح

لما امسك الحكم ان شاء الله
ههههههههههههههه

فى الصيييييين هامسك الحكم فى الصين اه لتفكروا حاجه

تحياتي لحضرتك

طهر فؤادك يقول...

السلام عليكم ورحمة الله وبركاتة ,,
ماشاء الله موضوع جميل وادعوك لموضوعى الجديد لان رأيك يهمنى اكيددددددد

عمرو يقول...

أنا شفت التعليم المجانى :)
يعنى ممكن أبقى مؤرخ على كده ..
و أتعلمت فى مدارس عبد الناصر المجانيه أيام ما كان الزى المدرسى الموحد لكل تلاميذ مصر مريله كاكى ماركة ناديه و دخلت المرحله الثانويه أيام ما كان الزى المدرسى الموحد للطلاب الذكور هو الزى العسكرى الرمادى لما كانت كل المدارس الثانويه فى مصر مدارس عسكريه بتطلع رجاله .. و لا عمرنا أخدنا دروس و لا حتى مجموعات و كان العيل اللى ياخد درس خصوصى فى هذا الزمن السحيق يبقى عيل صايع و خايب و محدش يرضى يكلمه و لا يسلم عليه لحسن يشبهه ..
و دخلت الجامعه برضو أيام التعليم المجانى و شفت ده بعينيا و الله و برضو ماكنش فيه دروس و لا عمرنا سمعنا عنها .. و كانوا بيصرفوا لى منحة تفوق 7 جنيه فى الشهر كنت بأعيش بيهم أسبوعين :))
تعالى النهارده بقى مش حنروح بعيد بس حأقولك اٍبنى الكبير اللى أتصرف عليه تقله دهب على ما أتخرج من سياحه و فنادق و الله العظيم مش بيعرف يكتب و بيقرا بصعوبه :))
أتخرج اٍزاى ده هو و اللى زيه ؟؟!!
الله و رسوله أعلم ..
بنتكلم فى أيييييييه ؟؟
الموضوع محتاج تغيير جذرى .. بجد جذرى ..

صبرني يارب يقول...

طهر فؤادك

متشكره اوي

وحاضر طبعا ان شاء الله هاشوف الموضوع

صبرني يارب يقول...

استاذ عمرو

كان ساعتها اه المدارس بخيرها ومدرسينها ومش محتاجه حاجه قالك مجانيه وافلام من دي

ولو جيت لجيل بحاله محروم من التعليم قلتله تعالى اعلمك هاتلاقي عايز يتعلم

انما عيال دلوقتي عيال بايظه عايزين حد يشد عليهم شويه

ما ينفعش الحال الماااايل دهه

اه محتاجه تغيير جذري والي انا باقوله ده ما ينفعش يتحقق الى فى وجود تغيير جذري

شوكولاتة يقول...

إزيك ياصبصب ؟؟
اليومين دول بتعامل مع جامعة خاصة من اللي طول عمرنا نقول دي جامعات فاشلة وأنا طالعة كنت عماله ألعن ابو مجانية التعليم اللي خلت نص البشر جهله
عندي طالب في الكورس مابيعرفش يكتب ولا كلمة عربي أصلا وجاي ياخد كورس إنجليش قال

صبرني يارب

MADO يقول...

Thanks for respond, Again free education doesn't mean that the rich will share with poor because simpl education is RIGHT for everyone and my example wasn't to help the doctor but with the same example what will happen when all doctors are rich people kids? you think they will care to cure poor people?? also isn't that mean the teachers should be rich people kids who get educated at non free colleges are they will have willing to teach for poor people kids at elemntry school and so? the main point that the authourties take the public money from colleges isn't reason to stop it and if so they take streets money too then shouldn't make any more streets?one more point that education in egypt is worse than bad and i mean ALL free and non free ,even the schools and colleges beloge to another countries because number one importance in education is to be connecting to commuinty not to interduce kids speak english and can't write thier names in arabic!!!
one more thing egypt problem isn't problem created by poor the problem created by who think they are elite, you can see who in pictures with gamal mubarak and you will see they aren't the free education kids,so the rich people kids are happy to take more from people ,is that what rich want? and if people care about halal and haram if one got land from naser at 50's and 60's should bring it back fro real oweners before 1952 right?most of people who call them selves rich now were farm workers then i agree every thing back to same and that will be fair right?

صبرني يارب يقول...

شوكولاته

والله يا شوكولاته المشكله كمان ان التعليم بقى مالوش سعر مالوش تمن

بقى حاجه زي الهواء فعلا زي ما قال طه حسين الناس ما عادوش عارفين قيمته

اصل اصلا فى بلدنا بقى معدوم القيمه

صبرني يارب يقول...

الاخ مادو

ازاي ما نردش يا فندم

اي نعم انا تعليم مجاني والانجليزى بتاعي بعافيه بس اهو بنحاول نفهم برضه
هههههههههههههههههه


شوف انا على فكره احترت فيك خالص وما بقيتش عارفه احدد موقفك
ههههههههههه

اولا عشان نتفق انا جدي كان ترزي وابويا واعمامي اتعلموا بمنح المتفوقين ومن بعدها بمجانية عبد الناصر

بمعنى انى مش بادافع عن اولاد الاغنياء

لا بالعكس انا شوفت اولاد الفقراء الى انت بتقول عليهم مش حاسين قيمة النعمه الى تحت رجليهم وبيدسوها

والله العظيم انا مش باقول نلغي مجانية الجامعه عشان المصروفات

كده كده هى بتتسرق يا معلم وانا عارفه

انما عشان يبقى التعليم للللللله قيمه

يا متعلم يا مش متعلم

انما الى موجودين دلوقتي رقصوا على السلم

لا منهم متعلمين فعلا ونافعين نفسهم وبلدهم

ولا منهم مش متنيلين وعليه راضيين يشتغلوا اي شغل

وبعدين دكاترة ولاد فقرا مين الى بيعالجوا الفقرا؟؟؟؟؟ظ

وهما برضه احنا عندنا فقرا بتتعالج يا فندم
مش عارفه جايز حضرتك غايب عننا بقالك كتير

انما احب اقولك ان الى مستور دلوقتي ومعاه يتعالج على حسابه مش عارف يتعالج برضه

لا فى مجانية تعليم ولا فيه علاج بالمجان ولا فى دكتور عشان ماهو كان فقير طالع حامل هم الفقرا

بالعكس ده اول واحد بيطلع نمرود ولله الحمد
طبعا الا من رحم ربي

وبعدين انا قلت حاجه ان المنظومه كلها تتغير ؟؟

انا قلت ان المنظومه تفضل زي ما هى

مش انا قلتلكم لما امسك الحكم (فى الصيييين ) كل حاجه هاتتغير

بس وحياة غلاوتكوا عندي لاخلي البلد كلها معاها الابتدائيه كفايه
ههههههههههههههه

تحياتي لحضرتك

MADO يقول...

ok i'll clear my point of view, i'm against any idea to stop any thing free now in egypt ,simply because even if it right it will cause more problems, first poor people already feel egypt it's not thier country any more and they just numbers, second why i respond while it's not my habit? it's because i know for sure many will take your idea and follow it and maybe soon you will find groups at facebook for that because many in egypt now has psychological problems and they will put the failure on the head of poor people and they cost much!!
I agree and KNOW how much the system is bad but to get rid of free education the same as get rid of poor people in flight to get less weight
Thanks

صبرني يارب يقول...

مدمن عاده سريه

يعنى اتمنى ربنا يثبتك على الطاعه

واتمنالك كل خير ان شاء الله

صبرني يارب يقول...

مادو

يا نهار ابيض ده انت طلعتنى شريره خالص
ههههههههههه

وبعدين فين ده الى بكره تلاقي جروبات على الفيس بوك
هو انا مشهوره كده يا جدعان ولا ايه


بس برضه انا فكرتي لو اطبقت كلها على بعضها بدون استهبال هاتبقى فى مصلحة الكل مش الاغنياء بس

ده انا باقوله هاكفلهم تعليم لحد الثانوي يديهم مستوى تعليمى احسن من الى هما بيطلعوا عليه من الجامعات المضروبه بتاعتنا


وانا مش شايفه فى ده ظلم لهم ولا لغيرهم ولا انصاف لحد على حد

لكن ان انا باضحي بالفقراء فى حال وجود ازمه
لا طبعا

يا لهوي انت طلعتني زي بتوع العباره كده يا فندم
ههههههههههه

عموما ده رايي وده رايك وهى وجهات نظر برضه

بس حضرتك حط فى اعتبارك انى خريجة النظام ده وولادي فى مدارس
ومحتكه بالمجتمع هنا اكتر جايز ده هو سبب اختلاف الرأي بينا

ومرحبا بك دايما

مصري جدا يقول...

مجاني تعني

ان الدولة ما تساهمش بأي شكل في التعليم بالعكس تضع العراقيل امامة لان شعب متعلم هيئرفها_الدولة_

صبرني يارب يقول...

مصري جدا

على رايك يرفعوا هما ايدهم عنها بس

حسبنا الله ونعم الوكيل