الثلاثاء، 13 أكتوبر، 2009

بصت فى المرايه ....



بصت فى المرايه .....


بصت فى المرايه وابتسمت وقالت الحمد لله . وقالت اللهم احسن خلقي كلما احسنت خلقي

بصت فى المرايه وقالت يا ساااااااتر شكلي غلط وانا مكشره


بصت فى المرايه وابتسمت ابتسامة حلوه اوي لما افتكرته وهو بيبص فى عنيها ويقولها بكل صدق انتى جميله اوي


بصت فى المرايه وقالت الله يخربيت البهدله انا شكلي بقى عامل كده ليه.


بصت فى المرايه واستغربت وقالت لنفسها ايه الحلاوه دي يا بت


بصت فى المرايه وضحكت لما افتكرت واحده غلسه كانت بتقول على واحده تانيه ان وشها نور بعد الجواز وافتكرت كمان حديث للرسول عليه الصلاة والسلام وقالت سبحان الله جاااااااايز برضه


بصت فى المرايه وبكل الغضب قالت لنفسها غبيييييييييييييييه


بصت فى المرايه وقالت فى نفسها مش مشكله بس دمي خفيف


بصت في المرايه وقالت وبعديييييين واخرتها ايه ولحد امته ؟


بصت فى المرايه وقالت والنبى انا حلوه اهو امال ايه بقى


بصت فى المرايه ولفت وشها شمال ويمين وقالت لنفسها وصدقتيه ماهو بيثبتك يا هبله


بصت فى المرايه وقالت يا اختي عليا وعلى جمالي


بصت فى المرايه بعد ما اتلمعت واتافلطت على الاخر وقالت يا خسارتك فى البهدله يا بتعه


بصت فى المرايه استغربت كده وبحلقت اوي وبعديين هزت كتافها وقالت جاااااااااايز برضه


دول كلهم ممكن يكونوا شخصيه واحده ؟؟


تفتكروا ؟؟


جايز


طيب انتم بتبصوا فى المرايه وتقولوا ايه ؟؟


ياريت كل واحد فينا يبص فى المرايه ويقول لنفسه الحقيقه


ياريت نقدر نصارح المرايه


وما نبصش فى المرايه واحنا مغميين زي البنت الى فى الصوره فوق دي


كل واحد وواحده يقعد على كرسي الاعتراف يلا ويقولي بيقول ايه لما بيبص فى المرايه



هناك 45 تعليقًا:

adel يقول...

انا ببص في المرايا و ااقول من العبيط اللي بيبص عليا من الناحية التانية ده
وبنفضل نشتم في بعض لحد ما المرايا بتتدخل

احساس طفلة محبة للرومانسية بس واقعية يقول...

فكرة برضو يا صبرنى
انا ببص فى المرايا واكلمنى لما احب اتناقش مع نفسى فى موضوع وافكر انا صح ولا غلط خاصة لو مختلفة مع حد فى الرأي او متضايقة وحبة اقنع نفسى بالتفائل

دمتى بكل خير
تقبلى مرورى

norahaty يقول...

على حسب المود
بتاعى يعنى لو فرحانة
بشوف نفسى أحلى أنسانة
ولو زعلانة بشوف نفسى
..........لكن فى جميع
الاحيان بحمد الله لانه
احسن خلقى وادعو أن
يحسن خُلقى ايضاً كما
أمرنا رســـــول الله
صلى الله عليه وسلم.

فاتيما يقول...

يوه ...ليه الأسئلة الفضايحى دى ؟
هكون بقول إيه يعنى
بلا وكسة
بصى هيا بتنقسم لمرحلتين
الاولى
قبل ما احط المكياج
بقول لروحى كبرتى و عجزتى يا فطمطم
و راحت عليكى
المرحلة التانية
بعد ما احط المكياج
بقول لروحى طب والله مش وحشة
و فيا الرمق برضو
و مش دايما الماشطة مبتقدرش تعمل حاجة يعنى ..محنا حلوين اهو برضو
بس غالبا
بقول الحمدلله معنديش عيوب صارخة بشكل يسببلى عقدة
و الحمدلله منيش حلوة عشان البنات الحلوين بيبقى عنده مشاكل العن من العاديات
و متوسطات الجمال...
فى كل الاحوال بحمد ربنا
و يستاهل الحمد
لما بكون زعلانة ...مبحبش ابص فى المراية من أساسه

صبرني يارب يقول...

عادل

يا راجل حرام عليك بتشتمه ليه بس والنبى خلي بالك منه

مالكش بركه الا هو بالراحه كده ياعم

صبرني يارب يقول...

نور حياتي

عشان كده باقول قد تكون الشخصيات الى انا كتبتها دي كلها شخصيه واحده باختلاف الموقف مثلا

صبرني يارب يقول...

احساس طفله

بتبصي فى المرايه وتتناقشي ؟؟

يا ضنايا يا اختي كانت كويسه والله

كل ده من القاعده فى بلاد الاكواوا الى انتى فيها

هههههههههههه

نورتي يا قمر

صبرني يارب يقول...

فاتيما

نو نو نو

كلا البت انا مش موافقه

انت قمر يا باشا وزينه وعال العال

وعجزتي مين فشرررررر

انتى بتلقحي علينا ولا ايه

هههههههههههههه

الشعب لابد له من حكومه تشكمه يقول...

كل اللى فى المرايه دول انسانه واحده بس اختلف المود والموقف..
انا بأه بقول اييييييه؟
اولا انا مش من النوع اللى بحب المرايات تصدقى:)
لما ببص لنفسى مش بقول حاجه هههههههههه بس سعات ابص لنفسى واقول لنفسى همووووووت واعرف انتى مبتسمه ليه كده علطول؟عبيطه ولا مجنونه؟؟:)

أحمد حسن البنا يقول...

هههههههههههه حلوة اوى ياخسارتك فالبهدلة ياباتعه دى ههههههههه يخرب بيت كده هتموتينى مالضحك على مصطلحاتك ولا اللى بتقول ومالو بس دمى خفيف هههههههههههههههههههه بجد مقتطفات كالعادة تهلك مالضحك بس انا لما لاقيت موضوعك حبيت اضحك معرفتش لانى مع الاسف مرايتى كانت مش ازاز دى كانت انسان لحم ودم ومع الاسف لما بصيت فى مرايتى (اللى هو الانسان ده ) لقيتنى اغبى انسان فى العالم وارخص من التراب ولقيتنى اهبااااااااااال ماستحقش لقب عاقل لانى مفهمتش من بدرى ان مرايتى كدابه
المهم من غير لوك لوك ورغى كتير بعد ماوقفت قدام مراية الحياة والواقع لاقيتنى حد طيب فى زمن مالوش امان وبرضو زعلت لان الطيبه اللى زى دى ماتاكلش عيش ياباتعه ههههههههههه
وكمان اكتشفت ان خصلات شعرى الابيض زادت وبدات تحرق دماغى وقررت احلق نمرة اتنين على طول عشان اكفى عالخبر ماجور رغم ان بنات اليومين دول بيحبوا الخصلات البيضه وبيسبلوا ليها هههههههههه
تحياتى يا اختاه وبجد هموت من الضحك على اللى بتقول بس دمى خفيف هههههههههه

ستيته حسب الله الحمش يقول...

ياختي كتاكيتو بني
ههههههههههههههههههههههه

انا مببصش خالص في المرايا
عارفة انك مش ها تصدقي
عمرك شفتي ست مش بتبص غير على باب الشقة
حتى الميكياج بحطه كده بالبركة لا مرايا ولا دياولوا

الا بقى لو مودي عنب
ساعتها "ونادرا ما تحدث" ببص وبحلق واقول يا ختي كتاكيتو بني

يــوم جــديد يقول...

من زمان مش ببص في المراية
يمكن عشان بشوف نفسي في خيالي بشكل تاني غير اللي في المراية
بس زمان وأنا صغنن كنت ببص في المراية وأكلم البنت صاحبتي اللي فيها :)

KHALED يقول...

باقول انى فاكر الراجل دة .. شفتة قبل كدة .. بس فين مش فاكر

المهم نشوفنا من جوا .. مش من برة

مسدس صغير يقول...

كل واحد فينا بيبص فى المرايا ده اللى انا متاكد منه
وبيكلم نفسه
وبيقولها عيوبها
بس مين بقى اللى بيقدر يصلح العيوب دى

احييكى على البوست
جميل اوى

Sweet Violet يقول...

صبصب ياجميلة
ليه بس البوست اللى يجنن ده
يعنى عايزة نبص فى المرايه و نتكلم و يقولوا علينا مجانين "شريرة انتى"

جد بقى
مش كل البشر لما يبصوا بيشوفوا حقيقتهم لان ممكن اللى فى المرايا اصلا يكدب عليهم و يقولهم انهم حد غيرهم اصلا !!!

اما بقى انا مش بحب اتكلم معايا فى المرايا .. لكن بتكلم معايا بليل و الدنيا هدوووووء
^_^

mahasen saber يقول...

صبرنى انا لو بصيت فى المرايه هتجنن مش من حلاوتى متفهمنيش غلط لا من كلاكيعى
بس دايما كل ما ابص فيها بحمدربنا اهه مجرد اننا اتخلقنا بشر دى فى حد ذاتها نعمه كبيره

بس جمالنا الحقيقى لو بصينا فى مرايتنا الداخليه وشوفنا ايه الوحش فينا نعمله عملية تجميل فوريه وايه اليى حلو نجمله زياده

ولاا رأى سعادتك ايه

وحشتينى جدا جدا يا صبرنى يا جميله

طهر فؤادك يقول...

السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله

dr.w.krm يقول...

طبعا ممكن تكون الشخصيات دى واحد
الانسان لما بيبص فى المرايه بيشوف نفسه ...دى الحاجه الوحيده اللى بتوريله نفسه بس للأسف من بره بس
بتورينا حقيقة شكلنا تعبيرات وشنا علامات الزمن علينا
بس لو دورنا على الحاجه اللى بتورينا شكلنا من جوه مش هنلاقيها متوفره ذى المرايه
ممكن نشوف نفسنا فى قاعده حساب مع النفس اكلم نفسى بدون مرايه اشوف بعنيه انا قلبى وروحى عاملين ازاى
اشوف نفسى وانا بتكلم مع ربنا اللى عارف نفسى اكتر منى ولا يمكن اكدب او ازيف مشاعرى وانا بكلمه
اشوف نفسى مع صديق عارفنى وبيحبنى وقريب لقلبى ..اكيد هيكون مرايتى الروحانيه مش الشكليه بس
اشوف نفسى فى موقف يبكينى وموقف يستفذ حنانى وموقف تانى اكون فيه حسوده حاقده ناقمه
المرايه جميله وبتورينا نفسنا بس صدقينى بتورينا نفسنا ذى ماحنا عايزين نشوفها...مش ذى ماهى على الحقيقه

صبرني يارب يقول...

الشعب لا بد له من حكومه

لا حرام عليكى خليها تبتسم حرام عليكى

انا برضه رايي ا نها تنفع شخصيه واحده باختلاف المواقف

صبرني يارب يقول...

احمد حسن البنا

ايه الكلام الكبير ده ياعم

انا مش معاك فى ان الطيب مالوش مكان

عشان انا شايفه ان الطيب مش لازم يكون ضعيف

لو كان ضعيف يبقى هو يستاهل يداس عليه

الطيبه مش ضعف

الطيبه لازم لها قوه تحميها

متشكره اوي على اطرائك واي خدمه ضحكناك ببلاش ياعم

صبرني يارب يقول...

ستيته

يبقى انت يا جميل مش محتاج تبص فى المرايه
انت قشطه من غيرحاجه
هههههههههههههههه

لا انا لما ما بابص فى المرايه الصبح وانا باغسل وشي احس ان انا هاوحشني
هههههههههههه

نورتي يا جميل

صبرني يارب يقول...

خالد

تماااااام الله ينور عليك

هو ده قصدي

نشوفنا من جوه ونشوووووف الحق ونقووووول لنفسنا الحقيقه ما نضحكش على نفسنا

صبرني يارب يقول...

يوم جديد

انا عندي ابنى بيكلم صحبته من غير مرايه
ايه العيال دي يا اختي
ههههههههههه

نورتي يا جميل

صبرني يارب يقول...

مسدس صغير

تعرف ان كونك بس عرفت العيوب دي يبقى على الاقل هاتتقبل الوضع

لو حصلت لك مشكله بسبب عيوبك هاتقدر تواجهها احسن عشان هاتكون محدد السبب

والعلاج يجى تدريجى ممكن

صبرني يارب يقول...

محاسن

ايوه فعلا هو ده قصدي

اننا ما نغشش نفسنا ونعرف حقيقى نفسنا

صبرني يارب يقول...

سويت فيوليت

اه مش الناس بتشوف حقيقتها فعلا

طب بذمتك
انتم ناقصين حد يجننكم ما كلنا مجانين خلقه

صبرني يارب يقول...

طهر فؤادك

ايه ده بقى انت خدت على عليها فكره
هههههههههههه

حاضر هاروح اشوف ايه الموضوع

بس اصلا انا عندي مشكله فى التمبلت الايام دي عايزالها روقه كده واقعد اوضب المنطقه

مش عارفه احط بانر الحمله الى فاتت

صبرني يارب يقول...

dr.w.krm

تصفيق حاد للبنيه دي الى اول مره تجيلى تقريبا

هوووو ده

احنا بنشوف نفسنا كما نريد ان نراها

هى دي المشكله

بالتالي احنا مش صرحا مع نفسنا

بنغش نفسنا ونقوووووول مش بنكذب على حد
واحنا اول ما بنكذب بنكذب على نفسنا

نورتي يا جميل

موناليزا يقول...

اول ما اصحى ابص لنفسى وابتسم واقولها صباح الخير
ثم على مدار يومى لو افتكرت يعنى ابص فى المرايا بقول
اللهم أعتق وجهى من النار

تامر علي يقول...

ممكن ابص في المراية واعمل تكوينات عجيبة بوشي :) واقول خسارتك في المرمطة يا باتعه برضه :)))
حقيقة مش ببص في المرايا لأن آخر مرة بصيت فيها لم تأت العواقب سليمة حتى يومنا هذا :)

فكرة جامده جداً الحقيقة

dr.w.krm يقول...

منور والله والله بصاحبه
انا اللى سعيده جدا بدخولى للمدونه دى واتمنى تقبلينى من ضيوفك وتنورينى بزيارتك لمدونتى ....بجد يهمنى مشاركتك وارائك اللى اكيد هستفيد بيها

فاتيما يقول...

لا و الله لن اجرؤ
ألقح أى كلام خلاويصى
وبعدين يا ماما أنا اكبر منك و دى حكيكة ثابتة بالاوراك الرسمية
و بعدين انا فعلا بحس إنى كبرت قوى ...يعنى مش دى نفس الملامح بتاعة عشرة عشرين سنة فاتوا
صح و لا أنا غلطانة ؟؟
انا احلويت دى مفيهاش نقاش
و بقيت قمر و بكل تواضع
و كدا
مش قولتلك إنتى سألتى سؤال فضايحنى ؟؟؟
الملخص مقصدش القح يا صبصوبتى
و بحبك قوى

صبرني يارب يقول...

موناليزا

الحمد لله انك بتضحكي
هههههههههههه

صباح الفل يا رايق انت

صبرني يارب يقول...

تامر علي

باتعه برضه

طب خليها باتع طيب هههههههههههههههههه

شكرا لك ونورت

صبرني يارب يقول...

dr.w.krm

عنيه يا جميل من غير ما تقولي ان شاء الله كنت ناويه اجي

انا الى هاتشرف بيكى

صبرني يارب يقول...

فاتيما

طمطم يا حيااااااااتي

اطلاقاانا باهزر انتى بتصدقي كل حاجه كده

ههههههههههههههههههههه

يا بنتى انا 18 سنه وانتى 19

ما تصيحيش بقى اكتر من كده

شوكولاتة يقول...

اقولك الصراحة في كلمة واحدة
غبية

عاشقه الرومانسيه يقول...

انا بقول
سلاما قولا من رب رحيم واتخض
هههههههه
تصدقى انى مش بحب المرايا اصلا
وغالبا بالبس طرحتى من غير ما احتاج مرايا
ونادرا لما احط مكياج ساعتها باحتاج لها
بس لما باتجن وابص فى المرايا واركز على عينى قوى بابكى
مش عارفه ليه

انا متفقه مع محاسن صابر
اهم شئ المرايات الداخليه

صبرني يارب يقول...

شيكولااااااااته

ليه ليه ليه

موش غبيه ولا حاجه ده انتى عسل

ممكن حته شيكولاته ؟؟

صبرني يارب يقول...

عاشقه
ينفع كده لازم تقولي الحقيقه يعنى
ههههههههههههههههههههه

وانا كمان متفقه مع محاسن طبعا

من غير عنـــوان يقول...

مسأله مفيده إن كل واحد يُصدق نفسه في مرايته

أمنياتي

صبرني يارب يقول...

من غير عنوان

متشكره لك ونورتنا

Anonymous يقول...

طب واللة ممكن سوال؟؟؟؟؟؟؟؟؟؟؟؟؟؟



الى معندوش مرايايعمل اية ؟


تيتو

صبرني يارب يقول...

لا كده يبقى انت داخل على طمع بقى

يشتري مرايا يا تيتو ايه بقى

شهووووده يقول...

اممممم.. الموضوع فكرني بطفلة صغيرة ليها اخت تؤم .. خالتها صاحبة اختي جابتها معاها البيت .. البت راسها والف سيف الي جوا(المراية) دي اختي.. طلعولي اختيييييي.....

موضوعك جميل قوي ...

احتراماتي