الثلاثاء، 26 يناير 2010

مروه وأمجد


مروه وامجد

مروه بنت جميله ودمها خفيف ومؤدبه واخلاقها لا يختلف عليها اثنين دخلت كلية الأداب قسم تاريخ اصلها من صغرها بتحب تقرا وبتحب التاريخ اوي

مروه عمرها ما حبت . اه وهى عندها 15 سنه كده كانت تقف تبص على ابن الجيران من ورا الشير كان واد حلو وشايف نفسه وماشي مع نص بنات المنطقه . بس برضه هى ما كانتش بتحبه

مروه بقت فى سنه تانيه وكل محاولات زمالائها فى الكليه فشلت معاها كل الى كان بينها وبينهم علاقات فى حدود الدراسه والزماله وجد جدااااااا فى معاملتها

مروه اول مره تروح رحله فى الكليه بعد محاولات مع باباها كتيييييير لحد ما وافق وراحت رحلة اسكندريه مع الشله بتاعتها الى كلهم زمايلها فى الكليه

وفى الرحله كان فى ناس كتير مش من كليتها وكان فى أمجد .....

امجد كان فى كلية صيدله مرح أوي ودمه خفيف ووسيم وذوق وملاحظ وجود مروه من اول الرحله بس ما كلمهاش من اول اليوم عشان كان حاسس انها مش واخده بالها منه

بس الحقيقه مروه كمان كانت شايفاه وعارفه انه شايفها

بعد شويه حصلت مشكله مع المنظمين للرحلة غيروا نظام الرحله وفى ناس مش عاجبها وكانت متزعمه المعارضه مروه وراحت اتكلمت مع المسؤل فى الرحله والى كان صاحب امجد جدا وكان ساعتها امجد قاعد معاه

امجد قعدت يتفرج عليها وهى بتتكلم ... اعجب بها اوي

جميله وشخصيتها قويه وعندها اقدام وفى نفس الوقت محترمه فى كلامها

ادخل امجد لتهدأه الموقف وحاولوا يوصلوا لحل وسط والمشكله اتحلت

وامجد ومروه اتعرفوا .....

وامجد راح قعد مع مروه واصحابها و اتكلموا كتير اوي واليوم كله كان امجد مش شايف غير مروه
ومروه كمان كانت ملاحظه اهتمامه وبصراحه هى كمان كانت مهتمه بس مش باين عليها اوي
هى اصلها طول عمرها جامده وبعدين حب ايه هى مابتفكرش تحب دلوقتي
بس بينها وبين نفسها كانت حاسه ان فى حاجه غريبه

حاجه غريبه فى أمجد
حاجه غريبه في صوت دقة قلبها

بس كذبت نفسها وهزت دماغها كده تنفضه من ا لافكار دي وكملت رحلتها عادي

حتى لما ندى صديقتها القريبه منه اوي قالتلها وهى بتغمز : ايه فى ايه ؟؟ امجد ده شكله مركز معاكي ولا ايه ؟؟؟؟؟

قالتلها : مركز ايه انتى كمان لا بتهيئلي عادي بلاش النوايا بتاعتك دي الواد بيكلمنا كلنا عادي جايز عشان انا اول واحده اتعرف عليها عادي يعنى

المهم خلصت الرحله وتركت ما تركت من علامات على قلب امجد ومروه

ونكمل ا لمره الجايه يا حلوين

هناك 47 تعليقًا:

ENG./ELSAYED,PMP يقول...

طيب
لو مكنش حصل مشكلة فى تغيير برنامج الرحلة
كانوا اتعرفوا على بعض ازاى
ليه نسيب حياتنا دايماً للحظ وللصدف

ليه ال
sliding doors
بطل رئيسى فى تشكيل حياتنا

ليه أمجد من الأول وقبل أى أحداث ... مرحش على مروه وشلتها وعرف نفسه

أمجد كلية صيدلة قسم ميكانيكا

اعزب واعول

ممكن اتعرف عليكم

انا بعاكس اوعوا تفهمونى غلط

مجرد هرتلة اخر الليل

سيد
مهندس مدنى قسم صحافة وعلوم سياسية

تامر علي يقول...

القصة دي فكرتني بالقصة الخالدة شفيقة ومتولي
ياااا جرجااااوي يا متوليييييي
قصة أبكت الكثيرين في انتظار الباقي لكن مش هاعيط :)

فتاه من الصعيد يقول...

احلى حاجه وصفك لمروه :)

بس هي فلتت منك اداب تاريخ دي

عموما في انتظار المزيد

تحياتي

واحدة مفروسة يقول...

يا رخاااااااااااااااااامة
يعنى لازم آخد تاكسي تاني المرة الجاية علشان آجي اقرا التكملة؟؟؟؟
ما تفرسنيش يا صبرني
وش مطلع لسانة
استجدعي و ابعتيلي التكملة على الميل
ههههههههه
ميل دلفري يعنى
تحياتي

خواطر شابة يقول...

رب صدفة خير من الف ميعاد
قصة مشوقة ننتظر التكملة
تحياتي

راجل صعيدى يقول...

صباح الخير
بجد المره دى قصه ظريفه ودمها خفيف وأهم من كده التسلسل المنطقى اللى فيها لدرجة أنى بحس أنها قصه حقيقيه ويارب بقى تكون نهايتها سعيده ..وأنا مستنى الجزء التانى .. مع خالص تحياتى ليكى ولاسرتك الجميله .

صبرني يارب يقول...

باشمهندس سيد

ماهى حياتنا ايه غير شوية صدف وشوية حاجات فوق بعض
هههههههههههههههه

بس برضه الصدفه هنا لها سبب منطقي وكونه ما بدأش ولا هى بدأت برضه دى مقصوده

نكمل القصه وبعدين نناقش لان انا اصلا اصلا هدفى نناقش المواقف كلها

تحياتي لك ونورت

صبرني يارب يقول...

فتاة من الصعيد

اشمعن ؟؟

يعنى مالها اداب تاريخ

يعنى هى جت فى بالي كده ساعتها مش عارفه ليه
ههههههههههههههه

هو مين الى مش فى اداب تاريخ بالظبط اعترفي
ههههههههههه

صبرني يارب يقول...

تامر علي

طب حيي القاعده بس بدمعتين
ههههههههههههههههههههه

صبرني يارب يقول...

خواطر شابه

يارب تكون خير بس

صبرني يارب يقول...

واحده مفروسه

ده انا هاهريكى تاكسيات يا مفروسه
انا عارفه انك بتحبي الحواديت فقلت ابتزك بقى عشان تيجى هنا كل شويه
ههههههههههههه

وميل ايه ولا كتبتها لسه اصلا وحياتك عندي ما انتوا عارفينى

صبرني يارب يقول...

راجل صعيدى

لا لا لا مش حقيقه لكن واقعيه ان شاء الله

يمكن شوفت بعضها فعلا فى الحقيقه انما القصه باشخاصها من دماااغي انا والله
عشان مش عايزه دوشه وربنا يخليكوا

اما النهايه السعيده
فمش عارفه لسه

بس برضه تعرفوا عني انى بتاعة نهايات سعيده ؟؟
هههههههههههههه

لازم نشحتفهم شويه

منور يا استاذنا

طهر فؤادك يقول...

السلام عليكم ورحمة الله وبركاتة

اخبارك اية ياصبرنى

ربنا يكرمك يارب ويبعد عنك كل سوء اللهم امين ... بس على فكرة امجد مطلعش الرحلة دى على مااعتقد :) راحت علية نومة ...

reem يقول...

يعنى اندمج مع القصة كدا

وفي الاخر تقولى نكمل المرة الجاية يا حلوين ؟

ينفع كدا بئا

واوعى تقولى لمروة حب ايه اللى في الجامعة دا

اصلى عارفاكى مش مؤمنة بيه
سيبى البنت تحب

ههههههههههههههه

مش تتأخرى علينا بالجزء التانى ياتوتة

мαησηα يقول...

مسائك احلى من الشهد يا صبرنى ...

ينفع كده انا قاعدة تنزلى حكاية جديدة وتعلقينى واندمج بقه وبعدين تقوليلى نكمل بعدين اعمل ايه انا بقه دلوقتى :(

بسرعة بقه هاتى الباقى

بجد بحب حكاياتك اوى

ঔღঔ نـــوارة ঔღঔ يقول...

كيفك ياقمر

القصة جميلة وشدتني وهتابعك بس متتاخريش علينا :)


مروة دي بنت الاية بتفكرني بنفسي لا حب ولا قلبة دماغ جواز علطول :)

بس دا ميمنعش انه قلبها يدق في بعض الاوقات ههههههههههههههههه

والنبي سبيها تحب من زمان عن الكصص العاتفية :)

منتظرينك ياقمر

دمت بود

صبرني يارب يقول...

ريم

لا ده ما تقلقيش هاسيبها براحتها وانا مالي

بس ماليش دعوه لو غنت على هايحصلي بقى

صبرني يارب يقول...

طهر فؤادك

يا راااااااجل يكون الى هناك ده كان قرينه يا زواوي ولا ايه
ههههههههههههههه

نورت يا زقازيقى

صبرني يارب يقول...

نواره

عيوني يا جميل تنورينى

لما نشوف هاتثبت على موقفها ولا هاتتكعبل على عينها

صبرني يارب يقول...

منووووون

ايووااااان مش لازم تشويق واثاره ولاايه

عونيه ليكى احكيلك حواديت للصبح

Wanda يقول...

جميل
صبرنى رجعت للرومانسية ياجدعان

بس
والنبى
مادام مش واقعية
خليها نهاية سعيدة :-)
كفاية الواقع و الى واخذينه منه
كل سعادة طبعا :-)))

المهم عايزنا ننقاش ايه فى النقطة ديه ؟؟
انه صيدلى و بيتلزق لرحلة من بره كليته؟؟
اقولك ليه اصل اغلب رحلتنا احنا مضروبة على الاخر :-)))
انه حليوة؟؟
بتوع صيدلة كلهم حلوين :-))

مروة حسيت بحاجة غريبة؟؟
و ماله عادى و بتحصل فى احس المروات و الله :-)))

عاشقة القمر يقول...

مفروسه اهتركب تاكسي انا اهركب سياره توصلني الخرطوم مسافه 8 ساعات حتي اركب طيران مصر ساعتين هههههههههه
شفتي زي هههه قصه جميل بس في انتظارك بس ياريت مش تعمليه تاني لان لي أنا في تعب وتذكره غاليه ههههههههه حرام عليكي هههه

شمس النهار يقول...

كنت لسه بقول انتي ليه مش بتكتبي قصه جديده
بعد قلب ايمان

البداية مبشرة

متابعة

سلامي

عاشقه الرومانسيه يقول...

دووووووووووس يامعلم
انا متابعه ومستنياكى
كملى
وتسلم ايدك على البدايه الجميله دى

صبرني يارب يقول...

عاشقة القمر

يا باشا احنا نجيبلك واحد مروه وواحد أمجد لحد عندك وفوقيهم دستتين قلم رصاص هديه
ههههههههههههههههههه

منوره يا جميل

صبرني يارب يقول...

واندا

لا ما تفهمونيش صح رومانسيه ايه
يلا زي بعضوا عيشوا شويه رومانسيه برضه ما يضرش

بعدين انا قلت بعد كده نناقش الى جاي
مش مقدمة القصه اكيد ولا هاناقش انه حليوه خالص ههههههههههههههه

مجرمه
هاوريكى انا

تابعي وناقشي يا اختي

صبرني يارب يقول...

عاشقة الرومانسيه
ندووووووووووووس

بس مش عارفه يوم الجمعه بقى اعمل فيكى ايه بالظبط اعض ولا اضرب ولا ايه
هههههههههههههههه

منوره يا جميل

صبرني يارب يقول...

شموسة

احلامك اوامر
ههههههههههههههه

والله انا كنت كاتبه البدايه من زمان اوي
بس ما كانش ليا نفس اكمل

جيت اكمل امبارح قوم كتبت حاجه تانيه خالص
بس نفس المضمون يعنى

منوره دايما
شمس بقى لازم تنور الدنيا

قلم رصاص يقول...

حلوة حواديت اخر اللي دي ياام مريم

هههههههههههه

بجد الواحد المفروض قبل ماينام
يشرب اللبن .. ويجي هنا يقراله حدوته وينام على طووووووووووول ^_^

شوية جد بقى
____________

أحيكي بجد على القصة
فعلا سلسه وتتصدق وانا شخصيا منتظر النتيجة في الجزء التاني ان شاء الله

منوره مدونتك
ادفعي بقى فاتورة الكهربا
مينفعش كده هههههههههه

تقبلي مروري

حنعيش يعنى حنعيش يقول...

اموت انا فى عادى يعنى دى ....اعرف ان فيه بلاوى جاية فى السكة ...على طول والنبى الجزء التانى وبلاش نظام السسبنس ...ماشى

Cute Kitty **sookra يقول...

طيب ياصبرنى
تعلقينى وبعدين تيجى تقولى نكمل بعدين
طيب كدا هابندجك واطلع عليكى شغل الاكاليم
هههههههههههه
منتظره الباقى

صبرني يارب يقول...

حنعيش يعنى حنعيش

يووووووه بلاوي ياما يا دوك

حاضر ماشي بس والله مش سسبنس

بس لسه هاكتبه اصلا


نورت يا فندم

صبرني يارب يقول...

قلم رصاص

اي خدمه يعنى
هههههههههههههههههههه

يلا نام بقى

ولعلمك الاضاءه فى المدونه دي ذاتي كده مشعه لواحده

تقولي فاتورة كهربا هى ورانا ورانا يا جدعان

صبرني يارب يقول...

سكره

لااااااااا اكاليم اكاليم لعلمك

بس يا باشا من غير بندجه هانقول هانعترف ما تقلقيش
هههههههههههههههه

منوره يا جميل

الشعب لابد له من حكومه تشكمه يقول...

انتى اتعديتى انتى كمان وبتكتبى اجزاء:(
دنا بكره اسامه انور عكاشه علشان الاجزاء دى(وش بيزعق)

افتكر زمان لما كنت بقرا سلسله رجل المستحيل ود.نبيل فاروق يعمل اللى اللقاء فى الجزء القادم كنت بشدددد فى شعرى:(

مش هاجى تانى غير لما القصه كلها تخلص واقراها مره واحده مش بحب الانتظار حضرتك,

صبرني يارب يقول...

شيماء

ايه يا بت البلطجه دي
ده انا هاطلع روحك

عارفه لو مش كل بوست تيجى تقريى وتعلقي هاقطعععععععععك ترنشات واقليكى فى الزيت

ايه البت دي حتى على البلوج عايزه كنبه تقعدي عليها
هههههههههههههههههههههه
كلبه

مصري جدا يقول...

اية الحركات دي بئا؟

المهم

الزراعيين ممنوع الاكل

ممكن تجيبي فاس وتقاوي وتزرعي براحتك وتأكلينا المحصول

ويوصى بالمكرونة وتحديدا السيبك أنتي

طبعا القصة بتاعتك هتخلص وهما بيقطعوا في بعض في محكمة الاحوال السخصية

صبرني يارب يقول...

مصري جدا

لا بجد ؟؟

بجد ولا بتهزر فى موضوع النادي

فاتيما بتقول ممكن ايه بقى ما تحيرونيش
اكلم ام سماح ولا ما اكلمهاش


محاكم ليه يعنى ماهم حبايب اهو
ههههههههههههههههههه

Laila يقول...

ليه كل حد بيحب بيشك في مشاعره رغم انه من جواه بيكون متاكد منها
اوقات كتير حلوه بتضيع بالسبب ده

فشكووول يقول...

السلام عليك صبرنى .. كيف حالك

فى تعليقك يا سيدتى واجهت صدمه كبيره لم اكن اتخيلها.

حضرتك قلتى فى تعليقك

(تقول قانون .. صحيح بس احنا ما لناش كبير .. لو كان لنا كبير ما كانش حصل كدا ..)

تصدقى يا صبرنى كلمة لو كان لنا كبير صدمتى فعلا .. وانا اللى كل كتاباتى تقريبا بالرمز وعن السياسه وعن الاقتصاد وما كانتش واخد بالى من الحكايه دى وانتى اول من نبهنى الى هذا

انا كنت عارف اننا نحكم بحكم ظالم ودكتاتورى وكل انواع القهر بس ما كنتش واخد بالى من حكاية الكبير دى

انا راجع اقرأ البوست تانى وبعدين ارجع اعلق

فشكووول يقول...

اوعى تحطى نهايه مأساويه للقصه .. لحد كدا الموضوع حلو والبت مع ان مخها ناشف وعامله فيها السبع بنات لكن عارفين انها فى الاخر ستخر صريعة الحب .. بس ربنا يسهل بقى ونشوف نهايه زى النهايات بتاعة السينما المصريه

تحياتى

bos bos بسمه عبدالباسط يقول...

تعرفى أكتر حاجة بقيت بكرهها إيه أننا نبقى من جوانا نفسنا فى حاجة ونفضل مستنين يا تحصل يا لا ونفضل مأجلين ونضيع وقت كتييييييير ونستنى الصدف وممكن الصدف دى تتأخر قووووووووى وقوى كماااااااااااااااااااان

منتظرة الباااااااااااقى

عطش الصبار يقول...

الله
محتاجيين فعلا لااستراحه رومانسيه
النهايه حلوه مش كدا
صبرنى يارب لحد الجزء التانى

صبرني يارب يقول...

ليلى
ايه يخليه متاكد ؟؟

ماهو طبيعى فى الاول لسه مش متاكد

معقوله يعنى اول ما حد يشوف واحده يعجب بها يروح يقولها باحبك ولاايه
هههههههههههه

يعنى العادي ان بيحصل اعجاب صامت الاول
خصوصا مافيش سابق معرفه

نورتي يا ليلى وكملي معانا بقى

صبرني يارب يقول...

استاذنا فشكول

مش هى دي الحقيقه ؟؟

مافيش كبير مافيش منظم مافيش بيج بوس

او بالاصح مش فاضيلنا


بالنسبه للنهايه

انا برضه بتاعة نهايات سيما

عموما انا لسه ما كتبتش النهايه والله

نشوف بقى
نورت يا استاذنا

صبرني يارب يقول...

بسمه

ما ينفعش نندفع زياده عن اللزوم وما ينفعش نندلق زياده عن اللزوم

خير الامور الوسط

والعقل حلو برضه

نورتي يا جميل

صبرني يارب يقول...

عطش الصبار

لوكان على الاستراحه اه ماشي هاهريكم رومانسيه وسنسنه

انما النهايه
الله اعلم بقى بصراحه ما اضمنيش

نورتي يا جميل