الخميس، 7 يناير 2010

إخوات فى الدراسة ..... مي وآسر




تنويه هااااااااام


(مي وآسر قصه من تاليفى واخراجي وطالعه من معاميع افكاري واي تشابه فى الشخصيات والاحداث انا ماليش دعوه مش عايزه دوشه كالعاده يا ناس فاضيه انتم .... اينعم انا قابلنى من ده كتير بس والله دي بجد مش بتاعة حد معين )






مـــي وآســـر

مي وآسر مع بعض من زمان اوي مش فاكرين من امته

بيروحوا مدرسه واحده وبيركبوا باص واحد وبيروحوا نفس الرحلات وحتى ساعات بيروحوا نفس المصايف

وفى علاقات أسرية طبعا

لحد ثانويه عامه كل واحد فيهم راح كليه غير التانيه بس الاثنين كلياتهم كانت فى نفس البلد ساعات كتير كانوا بيسافروا سوا ويرجعوا سوا مش احسن ما تسافر لواحدها ؟؟ اهو آسر مش غريب برضه (دي مامتها )

الغربه وحشه لازم يسألوا على بعض لازم يخاف عليها ولازم هى تحن عليه كانه ابوها وكانها امه دى حاجه فطريه جدا

عمرهم ما فكروا يحبوا بعض حب من بتاع الشحتفه والتعطيف وكده

انما بيحبوا بعض برضه وما يقدروش يستغنوا عن بعض بس حب اخوي اه اوعوا تفكروا حاجه تانيه

اصحاب اوي بالنسبه لها هو اعز صديق عندها (اوعوا تكونوا متخلفين ومش مؤمنين بالصداقه بين البنت والولد )

وكان لهم اصحاب مشتركين كتير وقضوا اوقات حلوه اوي مع بعض لهم ذكريات كتيييييير اوي مع بعض

هى كانت دايما دايما تاكد وتبت اوي على الحب الاخوي والصداقه عشان يفضلوا فاكرين

وعشان تنفي اي احساس بالخطأ فى مواجهة المجتمع الى اصلا اصلا مش بالع الفكره من اولها او بالعها من غير نفس

ولازم العلاقه تفضل كده والا تبقى الى فاتت دي كلها ولا اخويه ولا نيله وكانت هى بقى بتشتغل نفسها والمجتمع والناس ؟؟!!!!

آسر بقى كان متفرمل جامد ما اقدرش يا ناس البت بين كل كلمه والتانيه بتقول اخويا وصديقى وحاجات من الى توجع الضمير دي (ماهو الصداقه نوع من انواع الحب والحب نوع من انواع الصداقه )

بس هو من البدايه ما عندوش الضغط المجتمعي على افكاره وعقله ايه يعنى اصلا لما يكون له صديقه ولا الصداقه تتحول ولا حب ولا يعمل الى يعمله عاااااااادي هو راجل (دي نظرة المجتمع )بالتالي مافيش الضغوط الجامده الى على مي

بس برضه كلا البت هي برضه اختي (امااااااااااال اخته فى الدراسه برضه )
المهم خلصوا الكليه وقالتله ايه يا آسر انت مش هاتخطب ولا ايه (مش انا زي ماما ) نقي اي واحده من البنات الى نعرفهم وانا اشوفلك الموضوع

قالها مافيش حد والله على بالي مش عارف طب انتى شايفه ايه ؟؟ اختاري انتى

قالتله : معقوله مافيش ولا واحده منهم لافته نظرك ولا عاجباك ؟؟!!

قالها : لا يعنى عادي رشحيلى طيب

رشحتله مي 3 من المعارف وهو قالها مش عارف كلهم زي بعض عندي .طيب زيد طيب عبيد المهم حادي بادي وقع اختيارهم على واحده

وبدأت مي تمشي في الاجراءات ( امااااااال... امه يا جدعان فى الدراسه ) المهم بدات توفرلهم فرص يقعدوا مع بعض الأول وشويه شويه قربوا من بعض وشويتين كمان والخطوبه الرسمي وخلال كل ده كانت هى الراعي الرسمي للموال كله

حضرت مشاكلهم وخناقتهم وصالحتهم على بعض . شافت رسايله لها ورسايلها له حضرت الخطوبه حضرت كل حاجه بينهم القصه كلها

آسر ؟
آسر في كل مشكله كانت بتدخل هي بينهم تحلها كان بيبصلها وفى عنيه نظره غريبه

تفتكروا كان بيقولها ايه ؟

بتيهئلي كان بيقولها : لييييييه ؟؟ كان فيها ايه يعنى ؟؟ كان لازم تسوقي في الاخوه على الرابع ؟؟

وكان ساعتها يقولها بعنيه برضه : عاجبك الى احنا فيه ؟؟ ما حدش هايفهمنى زيك ولا حد هايفهمك زيي .

افهميييييي بقى

تفتكروا هي كانت بتفهم النظره دي ؟؟

يا اما حماره ومش بتفهم ( بس معقوله ما تفهمش اعز اصدقائها من غير ما يتكلم ؟؟؟؟)

يا اما فاهمه بس بتستهبل (بتهيئلي هى دي )

تخيلوا كمان مي كانت كتير بتحس ان نها خطيبة آسر بتغير منها ده حتى ساعات كانت مي بتحس انها بتوقع بينهم !!!!!

طب ده خلى مي تفكر طب انا لما اتجوز جوزي هايقبل علاقتي الوثيقه وصداقتى بآسر ولا هو كمان هايغير ويمنعنى منها ؟؟

يعنى ايه.... يعنى تقريبا صداقتنا دي لا محاله ضايعه ؟؟؟ ليييييه ؟؟
طب اعمل ايه ؟؟؟؟


روحي يا ايام وتعالى يا ايام فشلت كل محاولات مي فى اصلاح الامور بين آسر وخطيبته
وسابوا بعض نهائيا بعلامات في قلب كل واحد من الاثنين لا قول الثلاثه

وبعد فتره طويله فضل فيها آسر ومي اصحاب اوي برضه اخواتي اوووووي برضه

وبعدين آسر جاتله شغله كويسه بس بره مصر..... هايسافر


بجد مش قادر يسيبها

بجد هى حاسه ان حته منها هاتبعد عنها

بجد بقى هو شايف ان مافيهاش حاجه لما يحبوا بعض ويتجوزوا ما يمسش الصداقه فى حاجه يا ناس ما احنا نفضل اصحاب برضه


المهم فكر كتير وبعدين استجمع قواه وراح قالها الكلمتين دول

هى صدمت لما سمعتهم ( تفتكروا صدمت بصحيح ولا بتضحك على نفسها )

هى رفضت الكلام ده رفضا تاااااااما

وكانت عارفه ان برفضها ده هاتخسر آسر هاتخسر صديق عمرها

ما عادتش هاتقدر تقول اصله زي اخويا هى عارفه انه فكر فيها حاجه تانيه

طيب بس هو اخويااااااااا يا جدعان (هاتستهبلي اخوكي منين ؟؟)

ايوه بس ده احساسي به .. مش قادره ازاي افكر فيه كده ؟؟!!

والصداااااااااااقه ؟؟؟ خلاص هاتنتهي .

انا كنت باعامله على انه اخويا ينفع اتجوز اخويا ؟؟

مش قاااااادره

بس خلاص هى رفضت

رفضته وخسرته وبكت على صداقة العمر وعلى العلاقه الحلوه الى كانت بينهم
ايه رايكم ؟؟

آسر غلطان ؟؟ ما كانش لازم يفكر كده ولا يطلب منها الجواز عشان ما يخسرهاش ؟؟

مي غلطانه ؟؟ متاثرة بفكرة الصداقة البريئة والى شايفة ان تحولها لجواز وحب حاجه مشينه ؟

ولا انا اصلا الى غلطانه عشان فكرت فيهم ؟؟
ههههههههههههههههههههه


سمعوني رايكم يا حلوين

اه والنبى تدعولي ربنا يشفينى ويسترها معايا

ادعوا بذمه منك لها له



هناك 68 تعليقًا:

Wanda يقول...

صبرنى
انت لسه فى دور البرد
سلامتك يا جميل
يارب يارب يارب
خفف عن صبرنى مرضها
و :-)) دخلها المطبخ تعملنا صنف خضار
معدتى نشفت من اللحوم كل يوم :-(

فى راى انت الى غلطانة
اسر ممكن يفكر فى مى زوجة
و مى تفكر فى اسر اخ
و العواطف ده فعلا ممكن تحصل
ليه مستغربينن احساسها بيه كاخ
و عدم تقبلها لانها تعيش معاه كزوجة

مش احسن من انهام يتجوزوا و يخنقوا بعض

Wanda يقول...

حلوة الاغنية قوى
يسلم اختيارك

ستيته حسب الله الحمش يقول...

يارب يشفيك شفاء لا يغادر سقما
بعد الشر عنك يا قمرة

بالنوسبة للحدوتة الحلوة اللي مش ملتوتة

طيب كنا صحاب واخوات وحلوين ومتفاهمين واخر حاجتين تلاتة اربعة :)

وساقت مي الهبل ع الشيطنة وعمالة تقول اخويا اخويا وكأنها بتقنع نفسها هي شخصيا

الله
السؤال المهبب ليه اضيع سعادتي علشان أرضي الناس؟
وليه اضيع انسان كويس علشان اثبت للناس ان العمر اللي فات كان صح مش غلط

طالما انا كنت كويسة
وهو ابن ناس ومحترم
وفضل التفاهم بينا عمر
لأ واستعبطنا كمان وعملت امه وخطبت له
وطلعت القصة فاشلة
ماله آسر؟
برضي الناس واتعس نفسي؟
ربنا المطلع عارف ان اللي بينها وبينه محترم جدا "ونادر جدا" مع كم العقول الوسخة في المجتمع
يبقى اتوكل على الله واتخطب واسيب الناس تولع بجاز
لكن اتعس نفسي
واغامر اني ممكن اتجوز واحد مفيش بيني وبينه ربع التفاهم مع آسر علشان أرضي بشر لو وقفت على راسي برضه ها يلاقوا في الورد عيب

ان ما تفعله مس مي ما هو الا تكملة للمجتمع المظهري الأمور الذي يعشق المظاهر
وكونها اساشا اساشا هي واسرتها ناس عاديين خالص
"حيث انهم كانوا موافقين من الأصل على مروحها ومجيها مع آسر" فده يناسبه تصرف منطقي وعقلي وبعيد تماما عن المظاهر

reem يقول...

صبرنى الف الف سلامة عليكى يا توتة

في ايه ياقمر دا البرد لسا ولا في ايه

انتى اصلا وحشاااااااااااانى جدا

انا كمان بئالى كم يوم تعبانة وبردانة بطريقة مش عادية

انا حاسه انها كان ممكن توافق عليه

لانها زى ما قلتى كانت بتحس بالغيرة عليه من خطيبته ودا معناه ان في حاجة ناحيته

بس مرات فعلا الصديقة بتغير على صديقها وهو فعلا اخ وصديق بس

او يمكن الانثى بتحب تحس انها الوحيدة في الصورة وانها الاهم من اى انثى تانية

تصدقي مش عارفه انتى يا ست انتى لازم تجيبي قصص واقعية وصعبة كدا

بس يا صبرنى قصصك حلوة ياريت تكترى منها بجد

الف سلامة على القمر

ربنا يشفيكى ويعافيكى يارب

صبرني يارب يقول...

واندا

لا برد ايه مافيش فرد

بس وقعت على رجلي الله لا يوريكى ركبتي هاتموتني والمفروض انى الازم الفراش اسبوع على الاقل

على اساس انى ينفع الازمه يوم اصلا


بالنسبه للقصه
انا مش مستغربه احساسها بها كاخ

لا عادي بس هو ايه المشكله يعنى لما يتحول ما دام ينفع مدام مسموح

وبعدين لو الحكايه كده فعلا وانها مش قابلها لاي سبب كان مافيش مشكله

انما مش عايزاها تفكر بعقل المجتمع عايزاه تفكر بعقلها هي

تسلمى يا جميل

صبرني يارب يقول...

ستيته

مرسي على الدعوه يا جميل

والله يا ستيته هى لو تقتنع بالفكره دي اصلا مش هايبقى فيها مشكله

انها هى مصممه انها عملها ما فكرت فيه وانها بتفكر فيه كاخوووها

ماشي عمرك ما فكرتي فيه يا ستى فكري

انا على فكره مره اقنعت واحده بانها بتفكر غلط بس كان وقتها لسه الاخ خاطب البنت اياها ومش سعيد وانا الحقيقه قلتلها الله يسامحك انتى السبب

نفسي نبطل مكابره ونبطل هبل ونبطل نقول لاااااااا انا ما بارضيش المجتمع انا اصلا ماليش نفس

نورتي يا جميل

صبرني يارب يقول...

ريم

الف سلامه عليكى من البرد يا جميل

انا حاسه انها هبله وهاتضيعه من ايدها

لا بس هى مش بتحس بالغير

لا خالص
هى كانت مقنعه نفسها جدااااااااا انها امه

انما البنت خطيبته هى الى بتغير منها عليه

مرسي على الدعوه يا جميل وهاهريكم قصص دونت وري

мαησηα يقول...

مشهوووورة اوى انتى يا صبرنى حبيتك من كتر الناس مابتحبك

وتخيلى بقه لما جيت عندك حبيتك اكتر ههههههههه

الف مليون سلامة عليك يا حتة سكرة ربنا يشفيكى ويعافيكى ويحبب خلقه كمان وكمان فيكى قولى امييييييين

جميلة اوى الحكاية .. حصلتلى زيها وخسرت القضية كلها نياها نياها بس كانت عند معايا مش استهبال

المهم انا ف حكايتك شايفة ان مى هى اللى غلطانة

ليه وعلشان ايه اضيع حد عمرى مهلاقى حد يفهمنى زيه

وبعدين بجد بجد الجواز اللى بيبقى عن حب من صداقة ده بيبقى جميل وبيدوم

اصل جوزك هيبقى حبيبك وصاحبك وده امل كل بنت

قوليلها جاتك وكسة يا مى

بس بجد احيكى ع السرد الجميل للحكاية

تسلمى ودمتى رائعة

ENG./ELSAYED,PMP يقول...

احياناً ... يتصرف البعض منا بشكل فاضل مبالغ فيه ... فعندما تبدو الأمور أروع من أن تكون حقيقة ... غالباً ما يتضح أنها درباً من دروب الوهم ... من نوعية ضحيت هنايا فداه ... وهعيش على ذكراه ... أو منايا كل المنى أشوفه متهنى ... فرحان فى دنيا الهنا ... ولو بعيد عنى ... أعتقد أنها جميعاً أمور لا تستقيم عقلاً ... حيث ان الواقع الفعلى للحياة ... وبشكل غريزى بحت ... أن كلاً منا يرجو لنفسه الخير ... كأولى أولوياته ... وهنا أتذكر حكاية دارت بين أثنين جلسا لتناول الغذاء ... المكون من سمكتين فقط أحداهما كبيرة والأخرى صغيرة ...فما أن جلسا حتى مد احدهما يده على السمكة الكبيرة واخذ فى تناولها ... بينما اندهش الاخر ... وقال له باستغراب ... انت بتاخد السمكة الكبيرة وبتسبق وبتلحق ... قاله انت لو مكانى كنت عملت ايه ... قاله كنت اخدت الصغيرة ... قاله ... اهى عندك كلها ... حتمية الصراع

احساس طفلة محبة للرومانسية بس واقعية يقول...

طب لية تضيعة اصلا
لية تزعل على الصداقة
ما تفرح بالحب مع الصداقة
فكرت كدا وحسيت انهم فاهمين بعض كويس وانه فعلا بيحبها مش بس عشان فاهمين بعض وعشان المجتمع واللى فيه

اما هى فأحترت فيها هل يا ترى فعلا هى بتعتبره اخوها هل فعلا مش بتحبه
لو كدا يبقى خلاص عندها حق اكيد ترفض
والرفض معناه ضياع الصداقة وليها حق تزعل عشانها لانها صعبة جدا اليومين دول مش بس عشان رفض المجتمع حتى اللى بيقبلوا بالصداقة دى بيوجهو مشكلة فى معرفة حد كويس يستاهل يكون صديق كدا

اما لو بتحبه وبتستعبط عشان الناس
فتستاهل الفرصة والسعادة اللى هتضيع منها

ربنا يتم شفائك على خير يا صبصب
الف سلامة عليكى يا قمر

دمتى بكل خير
تقبلى مرورى

صبرني يارب يقول...

منونه

حبيبتى متشكره خالص خالص على الكلام الجميل بتاعك عني

وانتى نورتينى يا قمر وربنا يحبك وعبيده يارب
قولي انتى امييييين

عند ؟؟

طب ممكن اديكى بالبوكس فى مناخيرك يا منونه ولا فى مشكله
هههههههههههههههههه

هنعاند على نفسنا ؟

وبالنسبه لمي انا برضه من موقعي هذا باقولها اتووووووووكسي

صاحب رأى يقول...

ربنا يشفيكى
ويعطيكى الصحة
انا استغربت من كلمتك لما قولتى متخلفين معارضين لصدقاة البنت والولد
اعتقد ان دماغك اكبر من كدا وتعرفى تتقبلى الآراء
وبما ان الموضوع آراء فى آراء
فلو فكرنا بكل بساطة هو فكر فيها كزوجة ليه وراح قالها لو كان فى حاجة اسمها صداقة ما بين البنت والولد
وهل فعلا زى ما قولتى لو هى اتجوزت واحد غيره هيرضى يسيبها فى علاقة صداقة زى ما بتقولى مع آسر ولا يعترض وكدا يبقى متخلف فى نظرك

الموضوع كله غلط فى غلط
ممكن اه تبقى فى صداقة بين ولد وبنت بس لها حدود قوية جدا
واعتقد انهم لو قرايب يبقى افضل كتير

مش عارف اعترض على الموضوع ولا انى اوافقة
لانى فى اوقات رفضت صداقة لبنات عشان بعد فتره فكرت فيا كحبيب
وقبلت صداقة لبنات لانى واثق انى مش هاقابلهم اصلا ولا هيحصل بينى وبينهم اى حاجه يعنى هى فى بلد وانا فى بلد والايميل مثلا هو الاتصال الوحيد

مفيش دليل على ايجاز الصداقة بين البنت والولد

أسف على الاطالة

اقصوصه يقول...

حلوه وايد القصه :)

ذو الوجه المبتسم يقول...

السلام عليكم
اولا ربنا يشفيكي
بضمير اهو

ثانيا : مي وآسر
اعتقد الرفض طبيعي جدا لعلاقة
لانها لو بجد حبته حب عاطفي رومانسي مكنتش رفضته حتى لو الناس اتكلموا
لكن هى مش حاسة تجاهه بالمشاعر دي
كل احساسها انه اخوها وصديقها

انا شايف انه نصيب ولو فيه نصيب اكيد هتتجوز اللى ربنا محدده لها

تحياتى

الشعب لابد له من حكومه تشكمه يقول...

لو سمحتى بس كلمتين كده:

شكل مى هنا بتحبه بس هى اللى بتعمل حساب للمجتمع لو كده مااشى هى غلطانه.

لكن تفتكرى لو فعلا مى مش شيفاه حبيب ولا بتحس ناحيته بمشاعر..
دا مش من حقها؟

بمعنى من حقه انه يشوفها زوجه وحبيبه,لكن كمان من حقها انها متشوفوش كده,

مش لان مجتمع بيضغط ووووو والى اخره.
لا لانها ببساطه ممكن متكونش حساه.

ممكن يكونوا اصحاب واخوات كويسين جدااا بس ازواج فاشلين جدااا.
مش بتحصل دى ياصبصب؟؟؟؟؟؟

الحب انواع,يعنى مثلا انا ليا زميل او صديق بحبه جداااااااااا معنى كده انى اتجوزه!!!!!!!!!!!
انا بحبه اه بس مش الحب ده ومش النوع ده..
ممكن اكون بعزه وبحترم دماغه وتفكيره وشخصيته بس مش معنى ده انى اتجوزه؟؟
ولا اييييييييييييييه؟

طب اسألك سؤال تانى مش ممكن واحده يتقدملها واحد مفيش زيه فى الدنيا.حد محترم ومركز واخلاق واى بنت تحسدها عليه,بس هى ترفض وتقول مش متقبلاه او مش حساه؟؟ مش بتحصل دى؟؟؟

على فكره الاغنيه حلوه اوىىىىىىىىى وكأبتنى مش عارفه ليه:(

الف سلامه عليكى ياقمر.

لجين أبو الدهب يقول...

ربنا يشفيكى ويعافيكى من كل سوء

لا طبعا مى هى اللى غلطانة وفعلا فتحت فى موضوع الاخوة على الرابع

حد لاقى حد يبقى طالع اودام عينه وعارفه زى نفسه وواثق فيه وما يرضش

ده مفروض هى اللى كانت تعرض عليه كمان

واهى خسرت كل حاجة فى الاخر ..

مى غلطاااااانة جدا ..

مي يقول...

ههههههههه اسمى نيهااااااا
القصة دى حقيقية حتى لو انتى الفتيها بقىىىىىىىىى
اقولك ليه لان هحكى ليكى قصة مشابهة يمكن برضه تكون بطلتها مى((:
كانوا زمايل واصدقاء جدااااااا لدرجة كانت فى واحدة بتحبه وهتموت عليه وبطلتنا قالتله ياعم امشى فى الموضوع وهو يقولها لالالالالا وهى تحاول اصلهم اخوات وجه فى يوم قالها انا هخطب راحت بطلتنا حست باحساس غريب حست بغيرة بحب له مع انهم اخوات طب ليه
بص لها وقالها مالك؟ زعلتى؟
ولاول مرة حست انها بتحبه بس واهمة نفسها باسم اخوات
قالها دى كانت حركة عشان اعرف مقولتيش ليه وكده
دلوقتى هما بيحبوا بعض وعلى وشك خطوبة واجمل حاجة انهم كانوا صحاب جداااااا وصرحاء جدا وده اللى نجح حبهم

فى قصتك مى لو فكرت كويس هتلاقى انها بتحبه جداااا وانه جزء منها بس هى مش هتحس بقيمته الا لما يبعد هتندم جدا لانه الحب الحقيقى فعلالالالالالالا
الف سلامة عليكى يا قمررررررر
امووواه

صبرني يارب يقول...

المهندس سيد

شوف كل كلامك ده زي الفل حلو اوي بجد وانا مقتنعه به وباقوله دايما

ولكن

فكرة انى اتمنى السعاده من كل قلبي لحد انا باحبه حتى لو كان هايبعد عني انا شايفاها ممكنه


زي بالظبط فكرة الام وابنها تتمناله السعاده حتى لو كان على وضع مش هايريحها

انما مش معنى كده انى اضحي هنايا فداه واعيش على ذكراه

اطلاقا

انا هاسيبه يتهنى وادور انا على حته تانيه اتهنى فيها برضه عااااااااااادي جدا

عشان انا واثقه فى نفسي ومش معلقه حياتي على حد ابداااااااا عشان احنا ربنا خلقنا فرادى وكل واحد فينا حياته مش مشبوكه فى حياة حد تاني

اما الاخ بتاع السمكه فده طفس الحقيقه
ههههههههههههههههههه

تحياتي لحضرتك
انا زورت مدونتك وعجبتنى اوي على فكره بس ما لحقتش اعلق سنعود ان شاء الله

صبرني يارب يقول...

احساس طفله

عارفه انا نفسي مش عارفه هى فعلا مش قابلاه كزوج وحبيب

ولا بس الى مانعها موضوع الاخوه

عشان كده نفسي بس تضع موضوع الاخوه جانبا وتحاول تفكر به بشكل تاني جايز توصل للحقيقه


ميرسي يا جميل ونورتي

صبرني يارب يقول...

اقصوصه

يا جميل انتى الى حلوه وااااااايد ونورتينى

صبرني يارب يقول...

صاحب راي

الاول شكرا على الدعاء

بالنسبه للموضوع

حضرتك فهمتنى غلط
انا مش باقول انى الى يرفض صداقة البنت والولد يبقى متخلف

لا انا باهزر باقول الى ممكن يدور فى مخ البنت

اما بالنسبه لموقفي من الصداقه بين البنت والولد
انا فى وقت من الاوقات رفضتها ليه

لان كنت وقتها سنى صغير والاصدقاء المتوفرين كمان صغيرين الى هو مجتمع الكليه

كنت حتى كمان قافلاها خلاص ولا علاقة زماله حتى

ليه

لان فى السن ده صعب اوي التفريق بين الصداقه والحب

المشاعر بتكون ملخبطه ومتاججه وحاجات كده

لو ضمنت نفسي مش هاضمن الطرف التاني

وعموما وفى كل الاحوال شايفه ان الصداقه طبعا بين البنت والولد مش لازم ابدا تسقط الحدود الشرعيه بينهم

اتكلمت قبل كده عن الحدود الشرعيه دي فى بوست اسمع العلاقه بين الرجل والمرأه الاجنبيين على الرؤيه الاسلاميه ياريت تقراها


المهم

انا بس مش ضد تحول الصداقه لحب فى اي مرحله من المراحل ايه المشكله ؟؟
ايه الغلط
ايه العيب فى كده ؟؟؟


اما كلمة حضرتك مافيش دليل على جواز الصداقه بين البنت والولد

فمش عارفه حضرتك تقصد الايجازه ايه

الشرعي ؟؟

بالنسبه للشرع الاصل فى اي شيء الاباحه
الا الى نزل فيها تحريم او منع

الى اتحدد مش نوع العلاقه
الى اتحدد هو الشكل الشرعي للعلاقه

زي ما قلتلك بقى راجع الموضوع

اقولك هاجيبلك الرابط


اهو يا سيدى

http://islamic-vision.blogspot.com/2008/11/blog-post_28.html

اقراه بقى

ومتشكره لك ونورت

صبرني يارب يقول...

ذو الوجه المبتسم

معاك انه نصيب وانه كل الكلام الحلو ده

بس ليه يعنى طبيعى؟؟

لا طبعا مش ده الطبيعى

الطبيعى ان الاثنين ولد وبنت ينجذبوا لبعض

هما بقى خلقوا حدود لعلاقتهم يقدروا يشلوها ويحطوها براحتهم

مش معنى انها اعتبرته اخوها انه يبقى اخوها بصحيح

يعنى الاخوه بالدم لو ما يعرفوش انهم اخوات ممكن يتقابلوا يوما ويتجوزوا كمان

يعنى المشكله فى المخ نوضب المخ بس صح الاول

حنعيش يعنى حنعيش يقول...

الاول الف سلامة عليكى ...ثانيا هوة اللى يجي له برد يبقى بيكتب حلو كدة ..ثالثا والاهم بقى حاقولك اللى حيحصل بعد عشر سنين ...بين الاخين الحلوين بس فى بوست لوحدة رابعا جزاك الله خيرا انا بقالى اسبوع مش لاقى فكرة اكتبها ... وانت نورتى لى السكة شكرا والف سلامة

صبرني يارب يقول...

شيماء


قولي يا باشا

بس انا عارفه هى ليه اكأبتك يا اختي

بصي يا ستى بالنوسبه لكلامك


ممكن يكونوا اصحاب واخوات كويسين جدااا بس ازواج فاشلين جدااا.
مش بتحصل دى ياصبصب؟؟؟؟؟؟

اه طبعا بيحصل وانا قلت لا ؟؟
بس لما يكونوا اخوات مش متوافقين واصحاب برضه كل واحد شايف في التاني حاجه مش هاتمشي معاه

لكن اصحاب اوي للدرجه دي يبقوا لازم متوافقين
انا فى صديق باقبله على علاته لكن ما اقدرش اعاشره عشان اي صفه فيه

لو الحكايه كده ماشي
انما المانع الوحيد الاخوه المزعومه ده الى انا باعترض عليه

كمان قلتي

بمعنى من حقه انه يشوفها زوجه وحبيبه,لكن كمان من حقها انها متشوفوش كده,

عنيه ماشي انا بس نفسها تشيل العصابه الاخويه على عينها وتحاول تشوفه مش هاتخسر حاجه

فى اعتراض ؟؟

كلامي الى قلته فى القصه معناه لكل واحده فى الموقف ده تحاول تشيل العصابه لو كانت موجوده وفى الغالب هى موجوده

وتبص للموضوع بنظره تانيه وتبص له هو نفسه بنظره تانيه

فى نقطه انا قلتلهاك قبل كده هابقى اقولهالك تاني مش هاينفع هنا

اما فكرة ان يجيلك حد كويس وميت فل وترفضيه ده عادي جداااااا

انما لما يكون واحد اصلا متقبلاه صديق ومش اي صديق اقرب صديق

مؤكد انتى متقبلاه بشكل ما
رافضاه كزوج ليه ؟؟

لازم تفكر بقى فى بجد حاجه فيه شخصيه تخليها ترفضه

ولا وهم الاخوه الى احنا بنيناه بس ؟؟

هي دي النقطه الى انا عايزه مي تقف قدامها

فهمك على اده على فكره
ههههههههههههههههه

صبرني يارب يقول...

لجين

مي مظلومه ضحية افكار ملخبطه فى مجتمع متناقض جدا معذب كل افراده

نورتي يا جميل

صبرني يارب يقول...

مي

الله بقى ماليش دعوه ولا اعرفك
هههههههههههههههه

اكيد مش كنت قاصداكي ولا اعرف اصحابك الى انتى بتحكي عليهم (وش بيغمز )

بس مي الى فى قصتك انتى كانت شخصيتها اصلا طريه شويه

فمش قسيت على نفسها ولا عليه ببساطه غيرت السكه

المشكله فى شخصيات بتكون قويه بتقسوا على نفسها

هنا بس نفسي اقولها خليكى حنينه على نفسك انتى مش غلطانه

لا قبل كده ولا بعد كده

صبرني يارب يقول...

حنعيش يعنى حنعيش

باااااااشا

ايه النور ده يا دوك

بس انا ما عنديش برد

انا امبارح كنت بالعب تزحلق على السيراميك ووقعت وركبتي وجعاااااني موت ادعيلى تطلع الامور بسيطه

ومستنيه البوست بتاعك جدااااااا

ومتشكره اوي على الكلام الجميل

مصري جدا يقول...

ربنا يشفيكي يا صاصا

رحمة بينا من قصصك العجيبة دي

أم .. بوبه يقول...

أولا القصة مع إنها ممكن تكون إتشافت كتير وأحداثها مش جديدة علينا .. إلا إن طريقة عرضك ليها أجدد وأحسن طريقة شوفتها فى حياتى

وبالنسبة لوجهة نظرى فى الحكاية كلها .. زى وجهة نظرك بالظبط إللى كانت واضحة جداا وانتى بتحكى وكمان بتفط من الموضوع كدة فى وش إللى بيقرا

أما بقى الأخوة والصداقة والجواز دى مراحل طبيعية جدااا سواء جبتيها من اليمين للشمال أو العكس
يعنى الأخوة ممكن تنتهى بالجواز بعد ما بتمر بمرحلة الصداقة
وكمان الجواز بيمر بمرحلة الصداقة وغالبا بينتهى بالأخوة .. أنا حاليا انا وجوزى فى مرحلة الصداقة هههههههههههههههه

قلم رصاص يقول...

"طيب بس هو اخويااااااااا يا جدعان (هاتستهبلي اخوكي منين ؟؟)"

هههههههههههههههههههههههه

مش معقوله الكلمتين دول
انا ضحكت لتلات سنين ادام
ههههههههههههههههههههههههه

انا شايف انه لازم يكون فيه احساس بين الطرفين ..بس بقى مش ضروري يكون احساس فول تانك يعني ..يكفي مجرد احساس وهيكبر هيكبر لوحده طالما هو محاط بجو من الاحترام والود المتبادل

ومعاكي حق لازم الواحد يشيل العصابه بتاعة الاخوه دي من على عنيه ..

بس فيه نقطة ..مش مع مكل الاصدقاء ..والا هتبقى كارثه طبعا ..ايه الواحد هيفكر يحب ويتجوز سبعتاشر واحده يعني هههههههههههههههههه

كل سنة وانتي طيبه
وربنا يديكي الصحة يارب

وبلاش تسرقي افكاري تاني وتنشريها عندك ..هخلي المحامي بتاعي يلففك على محاكم مصر كلها ههههههههههههههههه

يلا سلاموا عليكم

صبرني يارب يقول...

مصري جدا

كده برضه ماشي ماشي
نورت يا متر

صبرني يارب يقول...

ام بوبه

طب فى امل ترجع تاني بعد شويه جواز ولا ايه
هههههههههههههههههههه

الحمد لله ان وجهة نظري واضحه ولو انى برضه ما كنتش عايزه ااثر على رايكم بس مش قادره لازم ابعبر يعنى
هههههههههههه

صبرني يارب يقول...

قلم رصاص

والنبى يا اخويا ما سرقت افكار حد اطلاقا

ولا ليا دعوه بحد

اهو بقى كل شويه حد يقولي افكاري وقصتي وكده يعنى

معاك فى حكاية محتاجين بس شرارة احساس وبعدين الباقي هايجى

نورت يا فندم انت وافكارك

Anonymous يقول...

السلام عليكم ورحمة الله وبركاته
اولا : الف سلامه ليكى ويارب تقومى بالسلامه وربنا يكرمك وخدى بالك من نفسك شويه .
ثانيا : ومتزعليش من صراحتى أنتى ممكن اووى تقرأى لمحمحد حسنين هيكل مقال او كتاب سياسى تاريخى لمدة يوم كامل ومتقدريش تقولى غير الله ينور عليك يا استاذ . لكن لو لقيته كاتب قصه هتقولى يعنى مش بطاله كويسه ... ماتزعليش منى مقالاتك وموضوعاتك اللى بتختاريهاممتازه و قبل كده قلتلك تنفعى صحفيه لكن زى بعضع سيبى القصه القصيره لاصحبها بغض النظر عن الهدف اللى عاوزه توصيليله من القصه بتاعتك .
ثالثا : معرفش هل انا عشان كبير ولا الزمن أتغير بصراحه مافيش حاجه اسمها صداقه بين ولد وبنت ممكن يكون فيه زمالة عمل او زماله فى الكليه وبكل أدب وأحترام لكن صداقه دى لا يمكن تحصل وأن حصلت لازم تتحول لحب .
أخيرا ياااارب ماتكونى زعلتى منى أنتى تعلمى تماما مدى تقديرى واحترامى لكتابتك وموضوعاتك بصفه عامه مع خالص تقديرى واحترامى لشخصكم الكريم .
مره تانيه الف سلامه ليكى ومتزعليش منى .
راجل صعيدى

صبرني يارب يقول...

راجل صعيدى

يا استاذنا ازعل منك ازاي بس حضرتك على راسنا

وانا اصلا مش بازعل من اي نقد يكون بالطريقه الذوق الجميله بتاعة حضرتك دي

قوم لما يجى النقد من عمو مدحت هازعل ده لا ممكن ابدا

بالنسبه لموضوع القصه يا فندم انا مش روائيه وانا قلت الكلام ده قبل كده لما كتبت قصة قلب ايمان

اعتبرني بس حكيت حدوته مش كتبت قصه قصيره انا ماليش فى الادب والله يا جدعان

اما موضوع الصداقه

انا ليا فيه نظره خاصه بس هى شئنا ام ابينا موجوده حتى لو لم نطلق عليها الاسم ده

لان احنا فى مجتمع مفتوح يعني مي واسر ما اختاروش بعض

مي واسر طلعوا لقوا نفسهم اصحاب كل الحكايه انهم وثقوا العلاقه عشان هما متوائمين بعض

يعنى حضرتك لو ابنك قريب نفسيا من بنت اخوك مثلا الى فى نفس عمره وبينهم كلام وذكريات ومواقف وجايز تكون كمان البنت اكبر منه وتتجوز وهو لسه

ويفضل يحبها زي اخته وقريب منها برضه وكل حاجه عااااادي

الفكره فى ان الصداقه تتقلب حب دي يا استاذنا انا شايفاها عاديه جدااااا

لو كانت الامكانيه موجوده ايه المشكله

انا باتكلم عن ناس كبار يا فندم بالغين راشدين عاقلين فى منصف العشرينات مثلا

مش لسه مراهقين ولا على اعتاب الشباب

والصداقه بين البنت والولد دي موال كبير بقى عايزله قاعده

وفى ايا من الاحوال انا اقر وابصم بالعشره على الحدود الشرعيه طبعا

وزي ما قلت في الردود قبل كده انا فى مرحله من حياتي كنت رافضه اي علاقات مع الجنس الاخر ولا صداقه ولا زماله حتى
ولاسباب لحد الان شايفاها صح

تحياتي لحضرتك يا استاذنا وكلامك على راسي

Anonymous يقول...

أحرجتينى جدااا بذوقك وكرم أخلاقك ده وفعلا ندمت أنى بعت تعليقى الاولانى ومش عارف فعلا أقول ايه أمرك لله بقى صعيدى واللى فى قلبه على لسانه ربنا يوفقك ويكرمك بكل خير ويارب تكونى احسن دلوقتى .
راجل صعيدى

MǿиY El-Shreef يقول...

اه ياني يمة :((

دي ع فكره بتسعبط اوي البنوته دي

اصل المفروض ان حبيبي دي تجمع اخويا وابويا وابني وصديقي

فيها ايه لو كانت رضيت بيه ك زوج

مي غلطانه بالثلث ع فكره وانا مع اسر لما راح واتكلم بس زعلت اوي لما رفضته :(

صبرني يارب يقول...

موني الشريف

احبك وانت عاتشفي يا جميل انت

هههههههههههههههه

انا معاكي برضه وحاسه انها بتستعبط على نفسها
ههههههههههههه

على تيجى تقفشنا اي مي فى الدنيا واحنا بنقطع فى فروتها وتضربنا كلنا

صبرني يارب يقول...

راجل صعيدى

ابدا والله مافيش اي حاجه بجد ما ضايقنيش الكلام ولا زعلني بالعكس

انا باحب كده جدا فى تعليقات انا باستناها عشان عارفه انهم لو لقوني خرفت مثلا يردوني لما القايمه دي تزيد واحد انا ابقى سعيده جدا

ماحدش فينا على طول كويس وانا مش غاويه تسقيف

كل التعليقات بتبسطني من كل الناس لكن فى ناس لوزنهم وثقلهم الثقافي او رجاحةالعقل والفكر ده بيخلينى بجد استنى تعليقهم

وازعل لما يطنشوني

دايما منور يا عمو ما نتحرمش منك ولا من تعليقاتك

عالم الحب يقول...

مرحباً
قصة جميلة ورائعة
لديكي إحساس مرهف أختي العزيزة
سلمت يمناكي التي كتبت
نتمنى أن لا تحرمينا من زيارتكي لعالم الحب
http://www.al7ob1.blogspot.com

شوكولاتة يقول...

وحشتيني موووووووووووووووووت ياصبصب
أخبارك إيه ياقمر؟؟؟

تسلم إيدك على القصة اللذيذة دي

تحياتي

صدى الصمت - عاشقة الورد - يقول...

من رأيى مى هية ال غلطانة لأنها تمسكت بوهم الأخوة إلى الأبد وخسرت أقرب إنسان ليها
تحياتى

عاشقه الرومانسيه يقول...

مى بتحب اسر
تبطل استعباط بقى وتتجوزه
لانها مش هتحس بحبه قوى الا لما يبعد عنها
ليه ترفضه؟ وهو فله ياروحى؟
ليه تضيع صداقه عمر وتفاهم لايمكن تلاقيه مع حد غيره
هتقوليلى علشان الناس والمجتمع وبتاع
هاقولك طظ فى الدنيا كلها
اهم شئ انا فين من كل ده
سعادتى فين
راحته بالى وقلبى مع مين

قولى لمى تتجوز اسر وتبطل استعبااااط

صبرني يارب يقول...

عالم الحب

زورتك والله بس مش فاكره انا علقت ولا لا معلش هاجي تاني


وشكرا على الزياره

صبرني يارب يقول...

شيكولاته

انتى فينك يا جميل مختفيه ليه بس

انتى كمان وحشاني والله

نورتي يا جميل وما تغبيش تاني

صبرني يارب يقول...

صدى الصمت

المهم تكون هى فاهمه النقطه وما تكونش بس بتقاوح

نورتي

صبرني يارب يقول...

عاشقه الرومانسيه

والله مش عارفه

انا برضه مش عايزاها ترفضه

حتى انا تطوعت انى ابعت رساله لكل اسر فى الدنيا يزن على كل مي ويربط دماغها كويس عشان توافق

ههههههههههههههه

نورتي يا جميل

خواطر شابة يقول...

اولا الف سلامة عليك
تانيا انا جوابي شئ واحد انا اؤمن تمانا ان الصداقة يمكن ان تتحول لحب وتنتهي بزواج لايوجد ما يمنع ذلك وبالتالي بالنسبة لي مي في هذه القصة محبكاها زيادة عن اللزوم الذي لا اتقبله ولااقتنع به هو من يطلب ان يتحول الحب الى صداقة على رأي ام كلثوم أهو ده اللي مش ممكن ابدا
تحياتي لك

صبرني يارب يقول...

خواطر شابه

اه انا معاكي على فكره فى موضوع تحول الحب لصداقه

هو ممكن على فكره بس صعب جدا جدا محتاج نوعيه خاصه من البشر

محتاج الاثنين يكونوا عاقلين اوي وعمليين اوي ومستقرين نفسيا وحاجات كتيره اوي لازم تكون موجوده صعب توافرها فى الاثنين ان لم يكن مستحيلا


مشكلة مي هنا انها اقنعت نفسها انها فعلا مش قابلاه

نورتي ياجميل وتسلمى يارب الدعاء الحلو

محمد فؤاد (صاحب عمود النور) يقول...

الف مليووووووووون سلامة عليكى يا صبرنى

بصى هو بالنسبة للموضوع دا بيحصل ان اتنين بيبقوا زمايل قوووى بس مش بينفع يبقوا احباب او بينهم علاقة.

مى مش حساه اسر واسر بيحب مى.
بس فى سؤال هنا .. هل العشره اللى بين اسر ومى ماكنتش كافيه انها تحبة او يتزرع جواها مشاعر لاسر؟؟

صبرني يارب يقول...

عمود نور

المشاعر مش معقده ولا هى كائن هلامي

المشاعر دي محكومه بافكارنا والله ودماغنا برضه

بتوجهنا وتحكمنا من غير ما نشعر بها

هى هنا حطت لنفسها قواعد وشرائع ومشيت عليها

والى كان مقتضاها ما تحبيش اخوكي فى الدراسه

ده اخووووووكي ده اخووووووووكي

كده يعنى

نووووووووورت يا باشا

أم مالك يقول...

الف سلامة عليكى ياحبيبتى
لسة عارفة حالا من عند شيما
يارب تكونى دلوقتى احسن

وبالنسبة لمى واسر
انا اعرف قصة مشابهة الولد كان ممتاز ولكن علشان كانوا جيران واتربوا مع بعض وكانوا فعلا زى الاخوات
فبدا هو يلمح انه من كثر تصرقات البنات
اللى شايفها لايثق عند الارتباط الا فى فلانة فهو قريب ويعرف كل حاجة عنها

ورغم ان هذا كان رايها فيه برضه
الا ان لما امه لمحت بان ممكن يحصل
زواج رفضت نهائى وانها لن تراه الا فى
منزلة الاخ
وديه وجهة نظر غلط ومى غلطانة غلطانة وربنا يطمنى عليكى

قوس قزح يقول...

اوعى كده سيبى دراعى وجعتنى
حد يجر حد كده ؟؟
و تقولى تعبانة ؟
و الله انتى بتدلعى

و بعدين ايه مى و اسر دول
مالهم منى و احمد ؟؟
المهم

بصى يا ستى
انا مش عارفة الافتراضات اللى بين الاقواس دى ..من تفكير الشخصية و لا من تفكيرك انتى

لو من تفكير الشخصية يبقى طبعا البنت غلطانة انها اثرت على الصداقة و خسرت الشخص اللى بتحبه علشان تحافظ على مبدا ممكن يتغير عادى

لو التفكير منك انتى ككاتبة .. يبقى مش شرط الافتراضات دى تكون صح .. ومش شرط مى تكون فعلا بتحبه ..ومش معنى ان البنت تكون علاقتها قريبة من ولد يبقى انها لازم تحبه ..و ده يمكن يبان مع اولاد العم و الخال ..بتكون العلافة بينهم قريبة و مع كده البنت فى الاخر بتحب حد تانى و ترتبط به

فى ناس اول ما بنشوفهم بنحطهم فى خانة معينة صعب تتغير .. و ناس تانية بنكون لسه مش عارفين هم لنا ايه و دول اقولك اه ممكن يلعبوا شطرنج على قلوبنا

فى صداقة من غير حب بين الولد و البنت

الف سلامة عليكى يا جميل
تحياتى

أُكتب بالرصاص يقول...

دا التطور الطبيعي

الصداقة بتتحول لحب والحب يتحول لزواج والزواج يتحول لدوامة او بقعة زيت مدلوقة على الارض والواحد المفروض يعدي من عليها،
فا كل ما يجيي يقوم يجع تاني


تحياتي يا مطحونة
:)

محمد فؤاد (صاحب عمود النور) يقول...

مش محتاج نقوليلى نورت لانى انا اصلا منور ههههههههههههههههههههههههههه
(وش مطلع لسانه)

صبرني يارب يقول...

ام مالك

يارب يخليكى

متشكره اوي يا جميل

انا مش معترضه على منزلة الاخ

بس معترضه انها ما ادتش لنفسها فرصه تفكر فيه بشكل تاني جايز كانت تمشي معاها


نورتي يا جميل

صبرني يارب يقول...

قوس قزح


ايواااااان ما بتجيش الا بالعافيه اعمل فيكى ايه
هههههههههههههههه

ووالنبى يا اختي ما حدش شاف ركبي مش عارفه كانوا هنا وراحوا فين


التعليق الى بالازرق ده كلامي انا وتوقعي فى نفس الوقت للى ممكن يكون دار فى عقلها ولو للحظه

ما تنكريش يا داليا انه لازم يكون فى لحظه دار فى مخها ده

غير ان من خلال احتكاكي فعلا بالشخصيه نفسها فى كل قصه زي دول قابلتها فعلا هى فكرت مش مافكرتش

بس بتنفض دماغها كده كده وتقول استغفر الله العظيم يا رب اعقلي يا بت

برضه ده مجرد توقع

معاكي ان فى قرايب او اصحاب ما ينفعش يتجوزوا

بس لاسباب معينه حتى لو دفينه حتى لو بينهم وبين نفسهم

انا من النوع الى اي صديق اوصديقه باقبله بمميزاته وعيوبه بس مش معنى كده ان ما عنديش اعتراضات على شخصه

انما فى حال مافيش اعتراضات على الشخص يا داليا
وفى حال الموضوع بس اثبات حاجه للنفس والمجتمع يبقى حرام نعمل كده فى نفسنا

منوره يا قمر

صبرني يارب يقول...

اكتب بالرصاص

متاكد ؟؟

شكلك بتضرب بالرصاص حتى فى الصوره
ههههههههههههه

وبعدين البروفايل بتاعك جابلي حول كده مختار 3 عواصم مالهمش علاقه مكانيه ببعض خالص
هالبت ما المعنى فى بطن الرشاش الى انت ماسكه ؟

ما علينا

تعالى هنا بقى ايه ماله الجواز ؟؟

الاول هو التطور الطبيعى ده اه طبيعى
بس مش لازما ولابد يحصل يعنى ممكن برضه ما يحصلش

وبعدين الجواز بقعة زيت ؟؟

طب مين الى واقع فيه بذمتك الرجاله ولا الستات

ده الست من اول يوم يا ضنا امها على راي ستيته بتيجى لمس اكتاف

طاااااااااخ ولا حتى تقدر تحاول تقوم تجف هى واجعه وشوره وخلاص ههههههههههههههههه

تحياتي لك ونورت ويارب دايما منور

صبرني يارب يقول...

عمود نور

مافيش فايده فى المناكفه يا ولاااااااد
هههههههههههههه

طيب خد دي عندك بقى

منور طبعا مش عمود نور اماااااااال

بس مش عمود قصير شويه ولا ايه

(وش مطلع لسانه وميت من الضحك )

هع هع هع

قلم رصاص يقول...

"قلم رصاص

والنبى يا اخويا ما سرقت افكار حد اطلاقا

ولا ليا دعوه بحد

اهو بقى كل شويه حد يقولي افكاري وقصتي وكده يعنى

معاك فى حكاية محتاجين بس شرارة احساس وبعدين الباقي هايجى

نورت يا فندم انت وافكارك"
ـــــــــــ

للدرجة دي كلامي مش واضح انه كان هزار؟!!!!!!

انا باقولك أفكاري على سبيل التهريج

بقى كده تاخديها جد

شكرا يا ام مريم ردك اللي زعلني ..
كنت فاكر نفسي دمي خفيف


سلاموا عليكم بقى

هي وظروفها يقول...

اولا دي الزياره الأولي عندك

كل سنه وانتي طيبه

هي غلطانه ومش غلطانه

غلطانه لأن عمرها مهتلاقي حد يفهمها

زيه ايه المانع

انها تبقي حبيبته وصاحبته

دي تبقي جوازه ملهاش حل

هو ده الجواز من وجهه نظري اكون بحب عقلها وبفهم نظره عينها

من غير ما تتكلم احس بيها

غلطانه لنها افتكرت ان هتتجوز وتفضل العلاقه باسر زي ماهي

طبعا جوزها مش هيرضا

انا عن نفسي مقبلش ان مراتي تفضل علي علاقه قويه اوي كده بصاحب قديم ممكن زميل اه انما صديق صعبه علينا شويتين

وهي مش غلطانه

لأنها حباه كصديق ومش قادره تشوفه غير كده الصداقه ممكن تستمر بس ده مش عندنا

في كوستاريكا ممكن...

انا نفسي شخصيا ليه بنت صاحبتي من تسع سنين من ايام الجامعه
فيها مواصفات متمناش اكتر من كده

اقدر اقولك اني لو لقيت زوجه زيهها تبقي الدنيا احلوت

بس مش قادر غير اني اشوفها صاحبتي

اختي حبيبتي لا ليه معرفش

يمكن عشان فهمين بعض زياده عن اللزوم
وانا مبحبش حد يقفشني ويبقي عارف اخر ممكن

بس بجد حاله واقعيه قدرتي تنقليها لنص أدبي جميل

أخوكي وليد الدوغري

شمس النهار يقول...

صبررررررني

في ايه يا صبرني

الحاجات دي بترجع للشخصيه نفسها
ممكن مي تحس كده غيرها لا

وممكن مي لما تتحرم منه هتراجع نفسها تلاقيها بتحبه وماتقدرش تعيش من غيره
ترجع له ويكون انجح زواج في الدنيا

وهدعيلك ربنا يشفيكي قادر ياكريم علشان تيجي القاهره واشوفك

سلام

صبرني يارب يقول...

قلم رصاص

لا لا انت مالكش فى الهزار خالص

ايه ياابنى انا الى باهزر طبعا

هو انا هاقولك بصحيح افكارى وقصتي

طب عيب عليك انت عارف طريقة كلامي كويس يعنى

ايه ده

باهزر يا عم انت

انت الىما لكش فى الهزار باين

صبرني يارب يقول...

هي وظروفها

نورتنا فى اول زياره ودايما منور يارب

الحقيقه انا موافقاك على كلامك

انا كل الى عايزاه تحدد فعلا هى عايزه ايه بدماغها هي


تحياتي يا اخ وليد ونورتنا

صبرني يارب يقول...

شموسه

معاكي يا جميل والله


انا بس نفسي مي تحس نفسها فعلا مش تموت احساسها

نورتي يا جميل وشكرا على الدعوه وانا كمان نفسي اشووووووووووفك موت

وحشااااااااني

وحمد الله على السلامه

حنين القلب يقول...

اولا الف سلامه عليكى وربنا يشفيكى يا رب اهه بدعى من قلبى

ثانيا انا شايفه ان مى هى اللى غلطانه فيها ايه لما الصداقه بينها وبين آسر يتحول لحب وفيها ايه لما تتجوزه مدام مش بتحب حد وهى معترفه انها بتحبه

خلى بالك من مريم ورحمه ومن اصحابهم
هههههههههههههههههههههههههه

nona يقول...

عارفة هترضي في الاخر وهتجوزوا عشان متقدرش تعيش من غيرو الصداقة حب مؤجل واعتقد بالنسبة لهم جه بقي وقت الحب عمرها مهتلاقي حديحبها ولا يفهمها قد اسر

nona يقول...

اه بتقولي عيانة سلامتك مالك انا جديدة هنا اول مرة ادخل البلوج ده اصلا بصراحة يكفيك شر التخلف الانترنتي اللي عندي مكنتش بعرف ادخل ازاي ولا ارد ازاي بس طلعت الوصفة سهلة
على فكرة انا حبيت موضوع عمالة الاطفال يا ريت خلي الشباب يسترجلوا شويةبقي لحسن ده انا اتفقعت من الانتخة اللي انا شايفها اه انا بحب الرغي زيك
انا برج الميزان انت برج ايه
؟
وسلامتك كمان مرة