الأحد، 11 أبريل 2010

انا جييييييييييييييييييييت ودهنت البيت

السلاااااااام عليكم
وحشتوني وحشتوني وحشتوني ( ورده  دي يا اخواتي ولا ايه )

بجد وحشتوني ووحشنى الكتابه موت موت

طبعا انا خلصت الشقه اينعم  ولكن مش خالص مالص يعنى

لسه فى كام شباك كده بس انا مطنشاهم دلوقتي  ولسه الفرش والترتيب بقى وما ادراكم ماهو

ولكن كل ده مش مهم

المهم انى تخلصت من علب  البويا فى الشقه ونضفت الشقه

وحاليا كل ازاز الشباك راكب  وممكن على بالليل يكون عندنا سراير مفروشه
واجيب العيال من عند  ماما بهدومهم وكتبهم وبابا غنوجاتهم

اه والله تخيلوا بعد العذاب والضنا

بعد البوست الى قبل الى فات الناس سألوني على  الميل ايه ده انتم بتدهنوا الشقه باديكم ؟؟؟؟؟!!!!!

وقلت اريحكم بقى واقولكم اينعم

انا ورضا ومعانا ربنا يا اخويا الى عملنا الشقه  كلها من الالف للياء

واخدنا القرار ده فجأه كده واحنا قاعدين نقول فلان بيقول يعرف واحد كويس طب هايخلص فى اد ايه
ولانى من سنتين تقريبا ممرت بتجربة مريره فى دهان شقة ماما والنقاشين الى عذبونا وطلعوا روحنا

واغلب الايام كانوا يجوا ثلاثتهم  على معاد الغدا يتغدوا ويشتغلوا ساعه ويروحوا
اماااااااال
انا الى كنت باطبخ لهم وذلك لان بابا قال (يعنى ابقى واقف معاهم واسيبهم واطلع اتغدى انا وهما قاعدين) قلتله لا طبعا ابسلوووتلي ودي تيجى

طب اليكم بقى الحاجات الى انا اتعلمتها من المفاضله بين التجربتين

فى حال انت بتدهن شقتك بنفسك هاتروح تشتري البويا الى على مزاجك  من المحل الى على مزاجك وتدربها كمبيوتر وتطلع نفس اللون الى انت عايزه
ولو جايب نقاش هايقنعك تجيب من المحل الى بيديه عموله ويقنعك انه يدربلك هو يدوي لان التاني غالي ويطلعلك فى الغالب اللون غير الى انت عايزه  ويحاول يقنعك به ومافيش قدامك غير حلين يا تحميه بجردل البويا الى بوظ لونها يا ترضى بالامر الواقع

لو انت الى بتدهن شقتك بايدك ت الى هاتدهن وانت الى هاتفضي الشقه وتشيل وتحط لما يطلع عينك وانت الى هاتفرش وانت الى هاتشتري الحاجه  هاتتبهدل من الاخر 

لو انت جايب نقاش انت الى هاتشيل وتحط وتفك وتركب وتحتاس وهو هايدهن بس طبعا حتى لو قالك ان هو الى هايعمل واهم انت بترسى عليك فى الاخر

لو  انت الى بتدهن شقتك هاتدهنها بلقمتك يا ضنايا يا اخويا 
انما لو جايب نقاش هياخد اجر طبعا ولو  كان ذمته خربانه هايسرقك لما يشبعك

لو انت الى بتدهن ممكن جدا مراتك تقولك ايه ده الجدار ده وحش  عايز وش تاني وانت يا عينى تقولها اه والله باقول كده برضه
اه بقى لو النقاش وانت اتجرأت وحبيت تعدل عليه ولا تقول ربع كلمه اولا هايطلعك مش فاهم اي حاجه وبعدين لما يزهق منك هايقولك يا بيه اللاكيه خلص ممكن تروح تجيب لاكيه ماركة النمله الحمرا وده مش هاتلاقيه الى فى مدغشقر بس ما تتاخرش بقى وخلي بالك من السلمه المكسوره  هع

لو انت الى بتدهن شقتك لو عملت ام الالي فى الشقه هاتقول الله حلوه والنبى وبتبقى فعلا حلوه
اما لو جبت نقاش من الفضاء الخارجي هاتفض كل شويه تقول كان المفروض عمل كذا ده طالع وحش ده طالع مش اللون وتبقى مقهور نفسيا ومش طايق الى هو عمله

لو انت الى دهنت شقتك بنفسك هاتتبهدل ويطلع عينك وتطلع روحك واي اكسسوارت  تانيه ممكن تطلع
ولو انت  جبت نقاش يعمل الشقه  هاتتبهدل ويطلع عينك وتطلع روحك واي اكسسوارت تانيه ممكن تطلع

الخلاصه يا قوم انا مرتاحه نفسيا لان احنا الى  عملنا الشقه من نواحي كتير والله
بس المشكله العظمى هى ان رضا اذ فجأة قرر السفر للصين لظروف الشغل وطبعا قضينا اسبوع من الجري والشغل الى يمووووووووت فى البيت طبعا والتجهيز لسفره كمان
وطبعا سافر وخلع وسبنى اكمل شوية  حاجات كده
ويسعدنى ويشرفكم ان انا دلوقتي بقيت اسطى نقاش ميه ميه اي حد عايز حاجه يقول
بس لعلمكم انا استشارات بس  اه عقلكم يوزكم على  حاجه اكتر من كده ولا حاجه

وان شاء الله لما اخلص فرش بقى هابقى  اصورلكم الفن التجريدى العظيم بتاعنا

وحشتوني جدا جدا ووحشني الرغي وهاريكم بقى  ان شاء الله


هناك 36 تعليقًا:

م/حسام القاضي يقول...

ألف مبروووك على الدهان

وحلوة جدا المقارنة دي

عايزين اسعار البويات ومنين بالظبط بقى عشان ممكن اتجنن واعملها انا كمان مع المدام والواد فارس إبني اشغله صبي تحت ايدي :)

فاتيما يقول...

ايه يا صباصيبو دا

رضا هيطفش ع الصين ؟؟!!!

للدرجة دى التجربة كانت مريرة

الحمدلله خلصت على خير


الف مبروك

و عقبال شقة عروسة ولى العهد
ان شاء الله

بس هوه و اصحابه اللى يدهونوها

براااااحة متتعصبييش
يا امى انا هكمل اهو
وانتى هتوقفى تتفرجى من بعيييييييد
ملكيش دعوة بحاجة خاااااالص


بس تعمليلهم اكل برضو ..
اصلهم ميستغنوش عنك
يا ام الكرم كله
و يا صاحبة احلى مطبخ ف الدنيا
مش البلوجر بس


الف مبروك يا حبيبتى
و الله كنتى وحشاناااااااااا قوى بجد

لــــ زهــــــراء ــــولا يقول...

ارق ندى
اقصد الاسطى ندى
ايه الجمال ده كله والحلاوه والنشاط ده كله
فرحانه بيكى اوى اوى
على كده بقى الواحد يقدر ياخد رايك لما الفكره تنط تفط فى دماغه ويقرر انه يقلب لون حوائط الشقه
ربنا يجعل وشها خير عليكى وعلى ا لاسره كلها ان شاء الله

المهم انتى وحشتينا جدا جدا
لو عاوزه اى مساعده ابعت لكى فرقه طيران من اسكندريه لغاية عندك
فى انتظارك عن قريب ان شاء الله

زهراء

غير معرف يقول...

اولا الف مبروووووووك دهان البيت

ثانيا على فكره انا اتمنى الكل يعمل زي حضرتك كده

ثالثا وده الاهم .... خدي بالك علشان في زوجات صيني ناويين يصدروها لمصر .... واخشى ان تكون تلك اسباب سفر استاذ رضا .... انا جايه اهدي النفوس :D

تحياتي

shimaa elkholy يقول...

حسام القاضي

الله يبارك فيك يا باشا

اسعار البويات عنيه حاضر والله لوعايز قولي بس

ايوه والواد فارس ده بالذات ابعتهولي وانا ادربه

نورت يا فندم

shimaa elkholy يقول...

فاتيما

لا يا حبي هو طفش خلاص سافر بالفعل يوم الجمعه
وولي العهد مين ده

اذا كان انا باقولهم اخر مره تحصل فى حياتي العلميه والمعمليه كلها ان ابيض ده حاجه قهر يا اختي والنبى

وتيجى يا اختي هى العروسه تقف انا مش هاقف انا هاقعد على البلوج هنا معاكم وهما يشتغلوا
ههههههههههه
والله وانتى واحشاني يا جميل اوي

shimaa elkholy يقول...

لولا وزهرا

حبيبتى ربنا يخليكى يارب

اوك قولي بس وانا هاساعدك استشارات بقى
هههههههههههههههه

متشكره اوي يا جميل وابعتى الفرقه يلا

shimaa elkholy يقول...

فتاه من الصعيد

الله يبارك فيكى يا جميل

والكل يعمل زيي ابسلوتلي ما ينفعش النقاشين ياكلوا عيش ازاي يا اختي

اما بالنوسبه للزوجات الصينى

فيا اختي ولا صينى ولا يبانى ولا يهمنا من اي حد تاني
هههههههههههههههههههه

احنا ناس جامدين اوي بالصلاه على النبى

نورتي يا جميل

سمع هوص (Abo 3li) يقول...

كفاااااااااااااااااارة

يااااااااااااااااااااه حمدالله علي السلامة.... مستنين صور فان جوخ علي الحيطة..

sony2000 يقول...

بجد بجد
بدعيلك من قلبي
ربنا معااااااااااكي
لانه شغل مجهد
بس حلو فالاخر وهتكوني مبسوطه بأذن الله
:)

ستيتة يقول...

كفارة يا معلمة
واسمحي لي اغني لك اغنية سماسم لزينهم السماحي وهو خارج من سجن الإنجليز :)

علشان بس تعرفي ان م القلب للقلب رسول

ربنا يرجع ابو رياض بالسلامة ان شاء الله

عطش الصبار يقول...

الف الف مبروك يا جميل
برافو عليكى معظم الاجانب بيعملوا كدا
انا جربت الصنايعيه عليهم قدره على الاقناع والكدب وياسلام على كلمه ماشى يا ابله تقومى تصدقى انه هيعمل اللى طلبتيه وتلاقى ذوقه العالى هو اللى اتنفذ
عموما كفاره

غير معرف يقول...

ينهار احوس
انتي اللي دهنتي بإيدك
ده انت مفتري يامعلم
صحيح قويه ومفتريه
حبكت دلوقتي طيب
طب استني بعد امتحان العيال
انا بجد مش مصدقه
هههههههههههههههههههه
شكلك اكيد كان تحفه ياسطي
بس تعب جامد عليكي يابنتي
يلا علقه تفوت ولاحد يموت

كلام عيب يقول...

تسلم اديكى يا جميل
و الله براوا عليكى فى الحركه الجامده دى
كل اللى قلتيه عن الصنايعيه صحيح جدا
فى اوربا و الدول المتقدمه ناس كتير جدا بتدهن بيوتها بنفسها
اصلا الموضوع سهل مش صعب
بس الناس بتصتعب
ههههههههههههههههههههه

Remas يقول...

وحشتينى ياتوتة خالص خالص

عجبتنى المقارنة دى اوى اوى اوى

والف مبرووووك

ولو عاوزه اى مساعدة قولى وانتى عارفانى بئا وعارفة شطارتى
ههههههههههههههه

بجد وحشنى اوى كلامك

وانا في انتظار الصور

ومش تنسي صور اود الاطفال

وربنا يخليكو لبعض انتى وجوزك

وربنا يرجعه لكم بالسلامة يارب

قلم رصاص يقول...

عليكم السلاااااااام ورحمة الله وبركاته

حمدلله على السلامه
نورتي مكانك من جديد ياختي والله
ايييييه دونيا
الف مبروووووك على الدهانات والتجديدات

بقى انتوا اللي عاملين الدهانات؟
طيييييب ..كويس اوي عشان لما اجي اشطب انا كمان استعين بخبراتك..استشارات بس منا عارف عشان بس المطوه متطلعش على غره
ههههههههه

يلا ارغي براحتك

تقبلي مروري وتحيتي

غير معرف يقول...

عقبال ما رضروض حبيبي يغير العتب

طبيعي تدهنوا بأيديكوا عايزين تدهنوا برجليكوا يعني؟

ايه الذكاوه دي؟

shimaa elkholy يقول...

ابو علي
هاهريكم صور بس اخلص وافرش كده واروق

نووووورت

shimaa elkholy يقول...

سوني

ربنا يكرمك يا جميل متشكره اوي

shimaa elkholy يقول...

سوتيتة حياتي

والله وحشاني اوووووي وفرحانه اوي انى سمعت صوتك ما اتحرمش من سؤالك يا جميل

واسمع منها يارب

shimaa elkholy يقول...

عطش الصبار

ايووووه ماهو رضا برضه قالي كده الاجانب بيعملوا كده

طب يا سيدى احنا مش اجانب

بس عموما انا عجبتنى التجربه مع انها متعبه

الصنايعيه دول جننونا فى شقة ماما السنه الى فاتت والله

shimaa elkholy يقول...

الغير معرفه

الى انا باشبه على كلامها

اينعم انا مفتري طبعا حد قالك غير كده

وكان شكلي يجنن طبعا اسطى فظيع

ههههههههههههههههه

shimaa elkholy يقول...

كلام عيب

لا لا لا سهل مين

مش سهل ولا حاجه

بس عادي احنا بتوع الصعب كله

منوره يا جميل

shimaa elkholy يقول...

ريم

ايون ايون شاطره طبعا امااااال

ياريت والله الشغل الى عندي لو لميتوا بعضيتكوا كده كمدونات يعنى نخلصوا فى ساعتين يا اختي

بس انا قوليلي تكرهي ايه اقولك رص الدواليب يا ابويااااااا خنيقه اوي

والله وانتى وحشاني يا جميل

shimaa elkholy يقول...

قلم رصاص

ايوه ايوه اي خدمه يا ابنى انا مستشار كبير دلوقتي

والرغي طبعا مستحلفاله انا سبوني بقى ما حدش يحوشني

shimaa elkholy يقول...

مصري جدا

احنا نيجى ايه فى ذكاوتك يا متر

بس يعنى هو مافيش غير رجلينا ممكن نكون سالفين ادينا الجيران او ادين النقاشين هع

وبالنسبه لموضوع العتب بقى يا عمنا

احب اقولك مقولتي الشهيره

اغلي يا براد على نارك لا شاي ولا سكر حطالك

ولا نسكافيه على فكره
ههههههههههههههههههه

صوت من مصر يقول...

نفسى اعمل كده بس كسل
والشقه عموما مش عاوزها خلاص
والف مبروك على اللون الجديد

Unknown يقول...

هههههههههههه

طب وربنا جدعة بجد انا نفسى آخد الخطوة دي ومحدش مشجعني

حستنى الصور عشان اتفرج بقى
:D

shimaa elkholy يقول...

كيمو

لا انت شويه عليك واللليله دي

وايه ما عدتش عايز الشقه دي طب ماشي احجز اول رصيف بقى وسيبلنا الشقه هنا سبيل لاهل البلوجز

نورت يا كيمو
اجمممممممممممد يا بطل

shimaa elkholy يقول...

انسانه

انا اشجعك يا باشا

الصور لسه شويه بقى لما اخلص فرش

اصل بعيد عنك الى يستنى اي صنايعيى فى ا لدنيا لازم يطلع روحه والاكسسورات زي ما قلتلكم

بقالي 3 ايام مستنيه النجار يجى يتكرم ويرفعلي المطبخ على الحيطه

شوفتي القهر

يلا بس خدي الخطوه الاولى وانا هاشجع وانا هنا
ههههههههههههههههه

sweet angel يقول...

مبرووووك ع الشقه

Mahmoud Ahmed يقول...

مبرووك على الشقه الجديده
^_^

!!! عارفة ... مش عارف ليه يقول...

حلوة الاستشارات الهندسية دي


وربنا يستر على الشقة :)

ومستنين نشوف النتيجة

shimaa elkholy يقول...

سويت انجل

الله يبارك فيك مرسي ا وي

shimaa elkholy يقول...

سبايدر مان

الله يخليك متشكره الله يبارك فيك

shimaa elkholy يقول...

عارفه مش عارف ليه

هههههههههههه ماشي الحمد لله ربنا ستر