الثلاثاء، 14 سبتمبر، 2010

مقاعد المرأه ...هوبالعافيه ؟؟

تحديث
نحيط علما بسيادتكم يا ايها المدونين الكرام ان الليالي المصريه ستعاود من جديد بعد انتهاء اجازة رمضان والعيد
وعلى كل من له مشاركه  بالكتابه فى القصه انه يروح يثبت حضور هناك فى الليالي عشان ست الريسه تعرف انه لسه موجود معانا
وللجميع تابعونا هناك ان شاء الله عشان نكمل قصة قلب كامل
***************************************************

بقالي شهر كل ما امشي فى الشارع اشوف صور لمرشحه جديده لمجلس الشعب لما بقوا المرشحات الحريمات اكتر من الرجاله بكتير

باقول لرضا هو فى ايه هما الستات بتوع المنصوره مالهم كده يا اخويا
وبعدين ده فى صور منهم الواحد يادوب يديها عشرين سنه

قالي مش64  مقعد فى المجلس

قلتله طب ماشي هياخدوهم كلهم من المنصوره ولا ايه

سؤال يطرح نفسه ... جوايا انا يعنى ... هو عافيه ؟؟

طبعا احنا المفروض بلد ديموقراطي

والديموقراطيه  اساسها تحقيق ارادة الشعب

طب الشعب لو مش عايز حريم فى المجلس  برضه هو حر

ليه  تجبروا الناس  على انهم يختاروا لتمثيلهم ستات

لو كان فى مفاهيم خطأ (ده لو كانت خطأ )
يبقى نصحح المفاهيم دي عند الناس اولا
وهما حرين بعد كده فى اختيارهم

يختاروا الى يمثلهم ست ولا راجل

طيب فى قصة المسيحين ماشي كلام معقول انهم يحددوها عشان اقليات والكلام ده

انما الستات ليه ؟؟

طبعا انا لما لقيت كل الحريمات دي  انا قلت خلاص انا هارشح نفسي بقى

طيب المجلس لما يكون لازم يكون فيه ستات ماشي عشان يمثلوا راي المرأه

انما ليه كمان مجالس ادارات الغرف التجاريه يصروا على وجود ستات ؟؟

برضه عافيه ؟؟؟!!!

اينعم احنا متاخدين عافيه اصلا فى كل حاجه

انما ده ما يمنعش انى اقول رايي فى الموضوع برضه

انا مش باقول بلاش الستات ترشح نفسها
اطلاقا
اه احسن اعضاء جمعية المرأه المتوحشه حبايبى يقطعوني

بس انا عايزه الى ترشح نفسها للمجلس او تكون اساسا فى المجلس تكون عشان الناس اختارتها لكفائتها الشخصيه
مش عشان الشعب مجبر  على اختيار 64 مقعد للمرأه

لو شايفين ان المجتمع محتاج تعديل فى افكاره الخاطئه يبقى نعمل ده بالتوعيه مش بالعافيه

ولا هى وسائل الاعلام تخدم فقط المصالح اياها ؟؟

وسؤال تاني يلح عليا كل ما امشي فى الشارع واشوف صور المرشحين

هما ليه  كلهم شكلهم مش مريح ؟؟!!!

سؤال كمان والنبى والنبى اخر مره ما تزعقوش بقى

هو ليه الى مرشحين نفسهم المره دي نصهم مدربين العاب رياضيه
وامبارح شوفت اسم واحد  صاحب كوافير ؟؟؟؟ ليه هاه ؟؟ ليه

بس خلاص
على راي المطرب السياسي ا لمعروف شعبوله

هناك 31 تعليقًا:

الازهرى يقول...

أوووووووووووووووووووووول

momken يقول...

حضرتك دى ميراث طبيعى لجهل سياسى موروث

جمله- بلاش كلام فى السياسه - اصبحت اكنها امر الهى او حديث شريف

اصبحت الاميه السياسه تملى حتى الى الناخبين اختيار من يستطيه ان يقدم خدمه شخصيه حتى لو كانت الخدمه دى مجرد خمسين جنيه فى ايده

اصبحت الاعداد الاجباريه فى المجلس طبيعى بيتوالد عنها من هم لا يستحقون تلك المقاعد

لذلك تخرج علينا قوانين متخلفه من نوعيه الضرائب العقاريه وكل الضرائب المزعومه فى عهد الجبايه

هؤلاء الاعضاء هم من صمتوا حين قام وزير الكهرباء بقطع الكهرباء

وهم الذين صمتوا عندما تم تعطيش اكثر من ثلث الشعب

وهم من صمتوا حين عاد وباء التيفود لبلد

المجلس ياسيددتى اصبح كل من به اصحاب مصالح
والا مادامت مهمه النائب هى تطوعيه بدون مقابل الا بدل الحضور 250 جنيه للجلسه

فكيف يتم صرف الملابين للحصول على المقعد؟؟؟



تحياتى

الازهرى يقول...

وكمان تانى
يعنى احنا هندفع

الازهرى يقول...

تعليقى هنا

http://fiteforme.blogspot.com/2009/07/blog-post.html

والسلام ختام ويا فرحة ماتمت
ربنا يعينكوان شاء الله تكونى موجودة المرة الجاية

richardCatheart يقول...

هههههههههههههههههههههههه

فين ايام الستات بتاع زمان يا دردر

السؤال يطرح نفسه والاجابه واضحه زى الشمس عايزين يطرو القعده يا بنتى

خواطر شابة يقول...

بداية كل سنة وانت طيبة وبخير ومن العايدين ان شاء الله
ثانيا يا عزيزتي لولا هذا لعدد الاجباري لما وصلت امرأة الى المجلس في ظل هذا المجتمع الذكوري على الاقل الان سيرون واقعا امامهم تستطيع به النساء الممثلات في المجلس اعطاء المثال وتشجيع الناس على انتخابهن في المرة القادمة ليس لانهن نساء ولكن لانهن الاكفأ
ثالثا عزيزتي انتظر زيارتك لمدونة الليالي فسنتمم ان شاء الله قصة قلب كامل ومشاركتك تهمنا
دمت بكل الود

خواطر شابة يقول...

تسلمي على التنويه عزيزتي وان شاء الله سأعلمك بتعليق هنا بموعد حلقتك ان شاء الله
دمت بكل الود والمحبة

حنعيش يعنى حنعيش يقول...

مش عايزة فقاقه يا ندى ... الكوافير علشان يعمل شعر عضوات مجلس الشعب ...وهما داخلين المجلس على العربية كارو وهما بيصقفوا ويغنوا ويقولوا سيد يا سيد ... طبعا سيد ده هوه سيد قرارة المشهور بمجلس الشعب

قلم رصاص يقول...

اولا الكوته بنسب معينه لتمثيل الشعوب في البرلمانات مسأله غير دستوريه تماما ومعروفه في كل بلاد الدنيا

وبما اننا عايشين على ارض ام الدنيا
فاللي تشوفه الحكومه على الرعيه السمع والطاعه

ثانيا انتي لازم ترشحي نفسك دي فرصه مش يمكن تنجحي وتبقى صوتنا في المجلس(أقصد المدونين يعني) ووقتها هنعمل العمايل ونبقى نسابنا الحكومه

^_^

مصري جدا يقول...

دي تعليمات من الباب العالي في واشنطن دي سي

حد يقدر يفتح بقه( من الحكومه قصدي)

مش في المنصوره بس

تصدقي نص صاحباتي مترشحات

لو نجحن أكيد أكيد

هتولى مسؤليه

طبعا في السجن


هههههههههههههههههههههههههههههههههههههههههههههههههههههههههههههههه

ندى الياسمين يقول...

منور يا ازهري اول تاني وفى كل مكان

وشوفت الموضوع

الله يعنى مش انا بس الى معترضه اهو يا ولاد

ندى الياسمين يقول...

ممكن

والله هو ده السؤال الى طول عمري بسأله بيصرفوا ملايين ليه ؟؟

مش عشان بيحبوا يخدموا الشعب يعنى الحكايه اصلها مش محتاجه كلام

ندى الياسمين يقول...

قلب القطه حياتي

وحشاااااااااااااااني اوي

يطرو القاااااااعده عليكى نور

وحياتك عندي المرشحات بلنسز وشعر اصفر وفول ميكب وحاجه فله يا روحي على الاخر

ندى الياسمين يقول...

خواطر

اجباري لا

الى ما تعرفش توصل باقناع الناس يبقى بلاش منه

الى ما توصلش بمجهودها وفكرها وسياستها يبقى ما توصلش

ومش مهم خال تدخل المرأه المجلس الموقر يا ستى يعنى بيعملوا ايه داتهم ستين نيله


والليالي ديى فى عنيا يو نو بنت قلبي

ندى الياسمين يقول...

حنعيش يعنى حنعيش

والله والله يا دوك انا ورضا قولنا كده ماهو ما دام كل دول ستات داخلين لازم يبقى فيها كوافير بقى

نورت

ندى الياسمين يقول...

قلم رصاص

بص هو انا افهم الكوته بالنسبه للمسيحين على اساس صعب ان يكون فى مع الاقليه حد مسيحى

والمفروض كمان ان الاول نخلي فى مرشحين مسيحين ولما يبقوا يسقطوا نبقى نعين احنا اجباري بقى

والله يا سيد بابا قالي كده برضه فرصه يعنى
هههههههههههههههههههه

بس انا ما ادخلش فى الزحمه دي اوعدك لو بقينا محترمين فى يوم بعد عشرين سنه كده اكون ربيت العيال وفضيت لو كان فى عمر والمجلس والحياه السياسيه نضفت ارشح نفسي

ندى الياسمين يقول...

متر هاني

نص صاحباتك مترشحين طب لو نجحوا هاتبقى واصل بقى ياعم

هيييييييه دنياااااا

فشكووول يقول...

السلام عليكم
عيد سعيد وكل عام وانتم بخير

انا شفت البوست اللى فات
بس مش مبسوط من كلمة عيد (مبارك)
اصل كلمة مبارك دى ما بحبهاش وبتجيب لى الارتكاريا
افتح الحنفيه الاقى الميه بتقول لى مبارك عليك انا
افتح النور الاقيه بيقول مبارك عليك النور
انام الاقى يجينى فى المنام يقول لى مبارك عليك النور
زهقت من حياتى من الكلمه دى
ممكن تقولى عيد سعيد
ممكن تقولى كل عام وانتم بخير
ممكن حاجات كتير ... بس الله يخليك بلاش مبارك دى

نيجى بقى لمقعد المرأه .. اصل المشكله برضه من كلمة مبارك
من يوم المؤتمر القومى للسكان اللى اتعمل فى التسعينات والدنيا مقلوبه ومجالس قوميه للمرأه ومجالس قوميه للسكان وحاجات كتير قوى مش عارفين هما عايزين يعملوا ايه

شوفى عندك .. من غير تحيز
فيه سيدات كتير لو اترشحوا انا ح انتخبهم دون كل الرجال
يعنى مثلا : نانسى عجرم .. انا حا اديها اصوات العيله كلها .. واليسا .. برضه.. بس يا ستى ما تحرميش الناس من انها تشوف صور جميله فى الشارع .. آهوا برضه احسن من المرشحين العجر العواجيز زى فشكول ما تسد نفس الناس ..
وعلى فكره .. القانون دا مخالف للدستور عشان الدستور بيقول ان الناس كلها متساويه امام القانون .. قاموا خالفوا الدستور وعملوا كوته للمرأه .. وكمان يومين يعملوا كوته للاقباط .. وبعدين يعملوا كوته لبياعين الطماطم وهلم جرا .. وبعدين يا ستى ما تزعليش .. عشان اللى بيقولوا آمين يزيدوا 64 صوت .. وغيرهم كان عمل ايه .. آهى سبوبه وخلاص .
تحياتى

غير معرف يقول...

فعلا ما لفت نظري ايضا ان معظم مرشحات مدينة المنصورة لا يتعدو الثلاثين من العمر الا قليل منهم اما موضوع كوتة المراة في مجلس الشعب فهو من تصميم الست سوزان من اجل " تمكين المراة" وعقبالك اليوم الخميس الموافق 16/9هي في جامعة القاهرة لمنحها الدكتوراة الفخرية في علم الاجتماع!!!

عبد الجليل
قارئ دائم لكل ماهو ممتع ومفيد

بنت الغربة يقول...

صبرنى حبيبتى
مش عارفه صحيح ايه حكاية المرشحات النسائيه الكتير قوى دول..
صدقنى انا كمان فكرت جديا فى ترشيح نفسى ..المشكله انا هارشح نفسى ليه؟؟
انا اساسا مابشتغلش نهاؤى فى البلد دى...وماعتقدش انى عندى اى ميول سياسيه او حتى بافهم فيها قوى..
بس اهو من باب اشمعنى انا ...هما احسن منى فى ايه...
انا عايزة ااقولك على نكته حقيقيه
اتنين من المرشحات (بلاش من دايرة ايه)متجوزين نفس الراجل بس طلق القديمه وبيسند الجديده...وصورهم ماليه الشوارع جنب بعض...
وهنا السؤال نرشح القديمه رأفة بيها علشان ابن اللذين طلقها..
ولا نرشح الجديده الامورة الدلوعه المسنوده...
مع العلم ان الاتنين مابيفهمووش فى اى حاجه...
وعماااااااار يامصر
تحياتى

فتاه من الصعيد يقول...

ده يا ستي أسمه التميييز الإيجابي وده مطلوب لو في فئات مهمشه ومطلوب تفعيل دورها او في أقليات مثلا

واهو هنشوف أداء الستات بقا

تحياتي

شمس النهار يقول...

ضحكتيني ياصبرني بجد

اه ياستي بالعافيه

الشعب مش متعود ان يكون في ستات

يتعود بقا وبالعافيه

طيب افرضي انهم سقطوا كلهم مايعملوهم بالتعيين ويخلصوا
ايه لزمت الترشيح والبهدله

احنا مجبرين علي كل شئ

علي فكره انا مش مع الكوته دي اللي بيقولوا عليها مش علشان الاجبار والكلام ده ماهو كده كد ه مجبرين لا

علشان الاجبار ده ممكن يجيب ناس مش قد المنصب
وهيقولوا ساعتها اهو شوفتوا الستات عملوا ايه

لكن لما الست تنجح في الانتخابات بشطارتها وفكرها وخدمتها للناس هتكون احسن
وفايده كامل ماكنش حد بينزل قصدها ويفلح
كانت ست ماليه مركزها وديرتها بتحبها صح

احنا كده كل حاجه نعملها غلط

كل سنه وانتي طيبه
فين الكحك

تحياتي

Timo.. يقول...

ممممممم...
ندى..
اسئلتك كترت قوي..
ده مش (صحي) علشانك :)

ندى الياسمين يقول...

استاذ فشكول

عليك نور مخالف للدستور

طب احنا فين بقى ما بنقولش حاجه ليه ؟؟

وبعدين تصور انا ما خدتش بالي من حكاية اللهم احفظنا مبارك دي اخر مره يا فندم مش هاتكرر تاني

ندى الياسمين يقول...

استاذ عبد الجليل
ما تفكرنيش والنبى شوفت الحفله وفرسوني حسبنا الله

ندى الياسمين يقول...

بنت الغربه

بتكلمي جد ؟؟ اتفرجوا المسخره بقى

والله هو ده الى انا باقوله صدقوني غلط الى بيحصل ده

ندى الياسمين يقول...

فتاه من الصعيد

ما انا فاهمه البؤين الحمضانين دول مهمشه ايه بس

يا ستى انا باقول دلوقتي الفكره العامه ان الشعب يختار
طب هو مش عايز يختار ست هو عااااافيه ؟؟

لا مش موافقه لو ما كانتش الست تدخل البرلمان بجدارتها مش بالقوانين يبقى هانبقى مهزأه يا بنتى

ندى الياسمين يقول...

شموسه

ماهو انا عارفه اننا متقندلين والله مجبرين بس ادينا بنفس فى اي اتجاه الا نطق

وانا معاكي جدا جدا جدا فى الكلام ده

علشان الاجبار ده ممكن يجيب ناس مش قد المنصب
وهيقولوا ساعتها اهو شوفتوا الستات عملوا ايه

منوراااااني ووحشاني اوي

ندى الياسمين يقول...

تيمو

ااااااه اصبت كبد المرار مش صحي انا عارفه ان كل حاجه ما بقتش صحيه عليا بس اعمل ايه طيب ادينا بنقول اي حاجه ننفس بها عن نفسنا

Ĥ!bØ يقول...

ذكرتني في تلك التي دخلت البرلمان في المغرب المسمات ياسمينة بادو لم تفعل شيئا اكثر من اضحاكها الشعب
السياسة لسيت للنساء

ندى الياسمين يقول...

هيبو

لا انا اختلف معاك
فى سياسيات محترمين جدا على مستوى العالم

انما احنا فاهمين السياسه والتمثيل البرلماني للمراه غلط

وبنطبق غلط

تحياتي ونورت