السبت، 27 نوفمبر، 2010

يسرواااااااااا

سلام عليكم يا اصدقائي

ناس كتير فهمتنى غلط فى البوست  الى فات وعشان كده  انا هاكتب البوست ده النهارده عشان تعرفوا تفهموا وجهة نظري

دلوقتي انا مش قصدي ان البنات يتامروا انهم يغالوا فى المهور لاطبعا خالص بتاتا البته وانما العدل حلو

استاذنا فاروق ابن النيل قال كلام جميل اوي

قال انا اتجوزت بعفش قليل اوي وبشبكه صغيره  ... وهى رضيت ووافقت وبعد كده ربنا فتح عليهم وكرمهم وعملواكل الى فى نفسهم وربنا يبارك لهم ان شاء الله

كلام ميه ميه
بس حضرتك مين جاب الفرش القليل واشترى الشبكه القليله ؟؟

حضرتك  ولا والد حضرتك ولاوالد العروسه ؟؟؟

ظني انه يكون حضرتك طبعا

ده الى انا باقوله

يا جماعه انا عايزه الشباب يبقوا رجاله ولما يتجوزوا يبقى عندهم هدف وعايزين يشتغلوا ويتعبوا ويكسبوا ويكبروا

يرضي مين ان العيل من دول يروح يقف على باب العروسه  ومعاه ابوه

وابوه يقعد مع ابو العروسه ويقوله بص ياعم انا عليا النوم والسفره وانت عليك الصالون والمطبخ

والعريس بقى يتفرغ للصياعه وبس

انا شوفت اكتر من حالة جواز الاهالي بيموتوا نفسهم عشان يجوزوهم ويجيبلهم كل حاجه ويعملوا لهم كل حاجه

مش من سعه لا ده بالعاااااااااافيه وبيقطعوا من قوتهم عشان يعملوا

وبعدين العيل من دول يتجوز مرتاح لا تعب فى الجواز ولا تعب حتى بعد الجواز من الابره للصاروخ عنده

طب يعمل ايه بقى ؟؟؟؟ يعمل مشاكل طبعا ويطلق فى الاخر والجوازه تبوظ

او   بعد الجواز يبقى عباره عن اكل ومرعى وقلة صنعه ويسيب شغله وقعد سنه واثنين فى البيت مستنى ابوه ياكله هو ومراته او حتى ياخد من شغل مراته

وده لانه مش لاقي شغل يليق بمقام حضرته طبعا

طب ده يرضي مين ؟؟؟؟

طيب لما يكون واحد مش معاه غير الفين جنيه شبكه

يقول مش معايا الا كذا ياجماعه معلش ولا يقول لاااااااا انا هاحط الفين وانتم الفين زيهم ؟؟؟


طيب  الى  مش معاه يفرش شقه بكاملها يجيب اوضتين كفايه ولا يفرض على ابو العروسه انه يجيبله الاوضتين التانين وبمواصفاته الخاص  ويتامر ويقل ادبه

طب لما يكون مش معاه يعمل فرح ويحجز قاعه بعشر الاف جنيه على الاقل ويجيب دي جي ومش عارف ايه وهبل وبتنجان

يبقى ما يعملش
مش يقول لابو العروسه نعمل بالنص ؟؟؟؟!!!!!!!


ده الى انا اقصده

شوفوا يا جماعه انا اتجوزت فى شقه  سكن الشغل بتاع جوزي وقتها وكانت 4 اوض فرشنا منها اثنين بس اوضة نوم وانتريه ومستعملين كمان

بس عشان ايه  ؟؟؟ عشان ما كناش فى مصر

انما لما رجعنا مصر كان لزاما علينا  طبعا نعمل كل الى  الناس بتعمله

بس بصراحه ربنا احنا كنا ناس عاقلين لا ابويا قالي لجوزي انت جايب ايه ولا جوزي قال لابويا انت جايب ايه
الى جه جه  والى ما جاش وقتها جبناه بعدين عادي جدا

بس لا يزال من حق العروسه تطلب مهر وتتشرط ده شرع ربنا يا ناس

هاتعمل ايه يعنى هاتغالي فى المهور طيب لما تلاقي نفسها هاتضيع هاتوافق

كان فى واحد صعيدى مره بيحكيلى انه فى بلد جمبهم  مشهورين بمهورهم المعقوله كل البلاد الى حواليهم بيروحوا يتجوزوا منهم
وبنات البلاد التانيه الى مسمرين مخهم قاعدين من غير جواز

مسيرهم يلينوا وتتعدل لوحدها صدقوني


بس نمشي زي ما ربنا قال  ما نعوجهااااااااااااااااش

المهم المصايب السوده بقى  الى بتحصل فى الجهاز
نفسي افهم ليييييه

ليه فردين هايتجوزوا جديد يشتروا اوضة اطفال ؟؟؟

ليه يشتروا سفره 12 كرسي ؟؟

ليه انتريه وصالون الاثنين في نفس واحد


لييييييييييه العروسه تجيب دستة طقم سرير يكفوها لمدة عشرين سنه قدام

لييييييه تجيب دستتين فوط يكفوها عشرين سنه برضه

بكل بساطه واحده وهى بتكلمنى عن جهاز بنتها بتقولي انا جايبه والله عشرين فوطة وش غير البرانس وعايزه اجيب لها كمان اربع فوط عشان يبقوا كملوا دستتين

قلتلها لييييييييييه ده كده هاتستعمله فى عقدين من الزمان

تضحك وتقولي والله لسه عندي فوط من بتاعة  جهازي انا فعلا من 22 سنه

ايه الجنان ده ؟؟؟

ليه افرش النيش اكلفه 30 الف جنيه مثلا  واعيش بتاع خمستاشر سنه ما اجيش ناحيته

ايه الحاجات الغريبه دي ؟؟؟

ليه لازما وحتما ولابد البنت تدخل  وهى مخليه ابوها على الحديده ومديون لطوب الارض ؟؟؟

ليه لازم العريس يكون جايب جاز على  اعتاب حياته الجديده

ليه مصعبين الدنيا على نفسنا كده ليييييييييييييييييييه

يسرواااااااااااا ياعالم يسروااااااااااااااااا

بجد حرام الى بنعمله فى بعض يا جماعه

كنا  الاول بنقول للبنات ما تتعنتوش وماتتامروش

دلوقتي بنقول للطرفين بلاش المغالاه والاسارف والتفاخر
وبلاش نقطم رقبة بعض

احلى حاجه فى  الدنيا انك تفضلي طول عمرك تزودي بيتك مش تيجيلى اوضة اطفال قبل العيال ماتيجى  على ما تيجى تستعملهيا تبقى  قديمه

معقوله كده ؟؟

صدق بابا لما كان بيقول لاختي وهى بتفرجه على حاجات شارياها لجهازها

قالها طب باقولك ايه  ماتروحي تشتري هدوم العيال الى هاتخلفوهم بالمره عشان لما تخلفوا ما تبقوش تشتروا هدوم


يا نااااس ياعالم عايزين بدل ما  نطلع شقق وكريستالات ونجف وستاير ودهب وهبل

نطلع من بيوتنا ستات تفتح بيوت
نطلع رجااااااااااااااله تشيل المسؤليه وتربي عيال وتكبر  وتحمي وتضلل

ما زلت باقول للناس كلها
من حق البنت هى الى تطلب وتتشرط

ومليون بنت والله ما عايزه الهبل ده كله بس عايزه رااااجل  يعتمد عليه

يارب تكون وجهة نظري وصلت

هناك 19 تعليقًا:

غير معرف يقول...

وجهة نظرك واضحه من الاول يافندم مش محتاجه بوست تاني توضحيها واللي فهم غلط ده عايز يفهم غلط
او بمعني اصح عجبه حكاية ان البنات كتيره وتتامروا علي ايه وباقي الكلام اللي انتي عارفه ده
عايزه اقول معلومه مش عارفه معروفه ولا لا
ان عدد الشباب اللي متجوزش وعنس 6 مليون شاب وعدد البنات حوالي 3 مليون وشويه
وكل اللي معنس لحد دلوقتي 9 مليون ليس البنات فقط
لان كتيررررررررررررر فاهمين ان 9 مليون بنات فقط
سلالالالالالالالالالالالالالالالالالالام

momken يقول...

مش عارف ليه كل يوم بتزيدى فى نظرى
انتى حد جميل وعظيم
ربنا يرزق الاسلام بالف زيك
مش عاوز اتكلم عن البوست خالص
اد منا عاوز اسجل انى فخور بصدقتك جدا


تحياتى

مصري جدا يقول...

لا يمكن

والله اما تعملي ايه

اقل من مليار دولارمهر وضعفهم شبكه

لا يمكن

خليهوملك بئا العرايس طبعا

اما نشوف العرايس هيعملوا فيكي ايه

adel يقول...

10/10
بس برضه مش هتجوز
مالها العزوبية ومن غير اوضة اطفال حتي

موناليزا يقول...

متفقة معاكِ
فمن لا يتعب فى شئ يهون عليه فقده

فاروق بن النيل يقول...

هوه فيه راجل يقبل على نفسه إنه يكون دلوعة أمه أو دلوعة أبوه بالشكل ده إبنى لو سمع الكلام ده حايتنقط لأن إحنا والحمد لله مستورة جدا معانا ونقدر نعملهم كل اللى عايزينه لكن مبدأنا أجهزلك الشقة حيطان وبناء وتشطيب ( لأن البيت ملكنا ) بعدين يابطل إنت إفرشها من جيبك وإلا ماتكونش راجل ولاتستاهل تدخل على مراتك لأنك ساعتها حاتبقى أختها موش جوزها وكفاية كدة لحسن أغلط
شكرا لكى ......" نـــــــــــــدى "
ماتنسيش تبعتيلى"الياسمـــــــــــين"
لأنى بحبه أوى

كلمات من نور يقول...

يسلم فمك يا ست الستات والله ....لسه من كام يوم عروسة و أمها ناس على اد حالهم ومن الأرياف بيقولولي جبنا وجبنا وجابت الشتوي بتاعها بس مش لاقيين لبس صيفي بقى حجيب لها قماش وافصل لها ...قلتلها ليه هو لازم الجهاز يكون فيه شتوي وكمان صيفي بتاع صيف 2011؟ قالتلي انتي عايزة حماتها و أهل جوزها ياكلوا وشي؟؟؟؟؟؟؟؟؟؟؟؟؟؟؟ قلت لها يا ستي ياكلوا وشك ليه ؟؟؟؟طيب ما تشتري لها فساتين الحمل بالمرة؟؟؟؟؟؟؟؟؟


حنفضل نخاف من كلام الناس الا ياكلوا وشنا و نصرف ببذخ مصاريف مالهاش اي لازمه والله المستعان

محتاجين البوست الجاي بقى تتكلمي عن الحاجات اللي لازم العريس يجيبها ولازم العروسة تجيبها الا ضحكت ضحك على حاجات صغيررة قوي قال ايه دي لازم العريس ودي لازم العروسة

ندى الياسمين يقول...

غير معرفه

لا مش كده بس الكل بياخد بظاهر الكلام عشان العنوان الى هو بيقول للبنات تتامر
والناس متاثرين برضه بكلام الاعلام ان البنات ما يتامروش ويسهلوا على العرسان والكلام ده

وكلامك عن العنوسه صح مليون الميه

ندى الياسمين يقول...

ممكن

ايه الاحراج ده

شكرا لك جدا جدا على الكلام الجميل ده

وطبعا انا كمان فخوره بوجودك هنا وصداقتك

شكرا

ندى الياسمين يقول...

مصري جدا

ايه هايعملوا ايه ولا حاجه عااااااتي
هههههههههه

ندى الياسمين يقول...

عادل

هانجوزووووووووووووك وحياتك هههههههههههههههه

ندى الياسمين يقول...

موناليزا

ايوووووووووون كلامك تمام التمام

ندى الياسمين يقول...

ا فاروق بن النيل

اه تخيل ؟؟ بس ما تقلوش راجل بقى عشان ده عار

لا بيعمله شقه ويجوزه ويجيبله عربيه ويساعده فى مصاريف البيت كمان

اه والله العظيم


وشكرا لحضرتك ونورتنا وعنيه الياسمين نجبهولك يا فندم

ندى الياسمين يقول...

كلمات من نور
اااااااااه هو الهدوم دي يا اختي لها موال تاني

تفضل البنت تشتري هدوم الله الوكيل البت اختي كانت جايبه هدوم بزياده عن 10 الاف جنيه

وفى الاخر ما لبستهومش كلهم يادوب اتجوزت حملت
بعد الحمل ما جاش على مقاسها ولا طقم

قلتلها يلاااا رزق الغلابه


ايه حاجات للعروسه والعريس مش فاهمه قولي انتى طيب

حنعيش يعنى حنعيش يقول...

حقول ايه ... لافوض فوكى ...

sony2000 يقول...

بالرغم من كل دا
صدقيني
كتير قوي
لما تيسري
بيقلولك فيها حااااجه مش مفهومه
واظن كلامي دا بيكون كتير جدااا
انا نفي
الكل يوصل لنقطه الوسط
علشان كل حاجه تتم
ياريت

ندى الياسمين يقول...

د اسلام

ربنا يخليك متشكره اوي

ندى الياسمين يقول...

سوني

قصدك يعنى لو واحده عملت زي ما انا باقول هايقولوا رميه يعنى

ماشي ماهو ده الى انا باقول عليه تغيير فكر المجتمع

انا نفسي مع اقتناعي ببعض المباديء جدا الا انى مش باقدر اواجه بها المجتمع على طول الخط ده فيه ارهاق نفسي فظيع

حتى لو كانت صح والمجتمع هو الى غلط تحسي نفسك انتى الغريبه الوحيده وسط الناس

بالتالي انا باقول ليه دور الاعلام المتنيل على عينه مهم

لاننا محتاجين نغير فكر المجتمع مش نغير فكر واحده

ولازم الكلام الى انا قولته ده فى البوست ده والبوست الى فات يتقال فى اعمال دراميه ويتقال في وسائل الاعلام والتوك شو والهبل شو

الله يسامحهم او مش مهم

نورتي يا جميل

غير معرف يقول...

المظاهر والبذخ سمة من سمات المجتمعات العربية مع ان الدين مقلش كدة وميرضاش ربنا اللى بيحصل اية اللى تملالك النيش بشى اطقم اشكال والوان مع انهم لاهيكلو ولاهيشربو بالكوبيات المركونة جواة حتى ممكن الحاجات دية كلها تتكسر ولا تجيبلك لبس يقضيها لميت سنة جاية مع ان الموضة بتتغير واللبس ممكن يضيق عليها بعد كدة ولا تكليفات الفرح وكلها مظاهر ملهاش لزوم وتكليف وبذخ على الفاضى