الاثنين، 22 نوفمبر 2010

اتأمروا يا بنات براحتكم


ايووووووه وان كان عاجبكم يا ابناء ادم


الموضوع ده يا جماعه تاعبنى اوي .. يمكن عشان انا عندي بنات .. بس والله الموضوع خطير ومحتاج فعلا علاج اجتماعي

احنا عندنا اعلام فااااشل بجميع المقاييس اعلام فاشل جدا جدا ... بيتكلم وبس والى ماسكينه مطبلتيه وبتوع مصلحتهم ومش بيفكروا فى اي اصلاح من اي نوع .. واولي الامر مش فاضيين طبعا للكلام الفاضي ده وتوجيه الاعلام

واحنا بصفتنا شعب متعلم ومثقف وواع بنتاثر بكل ما يبثه الاعلام لعقولنا مباشرة وهانفضل طول عمرنا مزمار يلمنا وعصايه تفرقنا

وعلى فكره احنا مش لواحدنا الي كده لا شعوب العالم كلها بتتاثر بالاعلام تاثرا كبيرا وفعلا انا شايفه ان الاعلام هو اهم جهاز فى الدوله من يمتلكه يمتلك عقول الناس ومشاعرهم

نرجع لموضوعنا الاعلام بتاعنا مافيهوش لا مبدعين ولا متنيلين هما كلهم يادوب يلاقوا لبانه ياخدوها ويفضلوا ينقلوها من بؤ لبؤ وخلصت على كده

الكلام عن العنوسه واخد قالب واحد لا يتغير .. ولا فى علماء اجتماع بيحللوا المجتمع ولا فى ناس بتدور منين المشكله ولا ازاي ولا فين
ولما ربنا يفتح عليهم وجيبوا خبير اجتماعي يلبس البدله والكرفته ويتشد ويقعد يهرينا كلام الله الوكيل هو نفسه مش فاهم نص ومش مقتنع به وحافظ ومش فاهم

مش هناقش اوي موضوع العنوسه اصل عايزله كتاب مش بوست

وانما هناقش معاكم الى حصل بسبب وسائل الاعلام لعقول الناس .. والى مش هاتعدل الا لما نرجع للكتالوج

وسائل الاعلام هرت النا س كلام عن شبح العنوسه والرجاله الى عددها فى النازل والمشايخ بتتكلم عن التعدد على انه المنقذ من ضياع المجتمع .. واصل الرجاله عددها قليل  والبنات هايبقوا الخمسه بقرش واصل دي من علاماااااااااات الساعه
واصبح واجب قومي انك تعف مسلمه وكل هذا الهراء

ايوووون هراء طبعا ... حسب  الاحصائيات الرسميه لكل الدول ما زال عدد الرجال اكتر من عدد الاناث فيما عدا اربع دول اوربيه تقريبا مش فاكره اوي
لكن فى دول فيها خلل بقى فى توزيع الاعمار يعنى عدد البنات الى سن الزواج اكتر من عدد الرجال الى فى سن الزواج ودول برررررررررضه فى اوربا واستراليا

يعنى احنا بالصلاة على النبى لسه عندنا ذكور ما تقلقوش
قصة علامات القيامه لسه لسه يا حبايبى ما تستعجلوش ده لما تنتشر الحروب والرجاله تموت فى الحرب .. مش شايفه فى مصر فى حروب ولا حاجه عندنا جيش بالصلاه عا النبى طويل عريض بنعلفه لله كده عشان يطلع لنا بشوات يمسكوا محافظين وغير ذلك

المهم الكلام الفارغ الاهبل والهراء ده عمل ايه ؟؟؟

خلى كل الناس تقولك اوباااااااا احنا بناتنا هايعنسوا ولازما ولا بد نطمن عليهم ونجوزهم وبقى فى من اهالي البنات هبل اسمه اتنازل والمهم انك تجوز البنت
والشعور ده طبعا اتنقل للشباب الى بيدوروا على عروسه وبقوا حاسين انهم لمجرد انهم يحملون بطاقه بتقول انه ذكر فهو كده فرصه ولقطه ما تتعوضش

والى بيغظنى وينقطنى ان تلاقي الكلام ده بيتقال فعلا من الطرفين .. يا اختي بتتامري على ايه هو حد لاقي جواز الايام دي !!!
وتلاقي واد كده اهبل ما يسواش والله فى سوق الرجاله فى ذمتي يعنى 3 مليم .. وبيقولك ياعم ده البنات دلوقتي الخمسه بقرش ما نتامرش ليه ولمؤخذه يعنى

ينفع كده ؟؟

ينفع يبقى فكرنا كده يا ناس عن الجواز وعن العيشه والى عايشنها ؟؟؟

ده غير طبعا احساس البنت الى تكون مخطوبه مثلا قبل كده فى تاني خطوبه مطلوب منها انها تطاطي رسها وتاكل بالجزمممممه لحسن دي تاني خطوبه وما عادش حد هايعبرها بعد كده واصلا ما عدش فى حد لاقي عرسان

والمفروض ان البنات كلهم واهاليهم يبقوا بالظبط عاملين زي نبيله السيد لما كانت بتقول عريس يا اماااااااي عريس يا امااااااااااي ..

ده حتى نبيله السيد كانت بتقوله طخه بس ما تموتوش ... دلوقتي الاهالي بيستهبلوا ويستعبطوا ويقولك احنا بنشتري راجل ... طب وهو فين الراجل ؟؟؟

لما واحد يروح يتانتخ فى الكرسي كده ويقول لابو العروسه شوف انا اصلا ما كنتش عايز اجوز الواد دلوقتي بصراحه كده كان بدري عليه (24 سنه ) بس يعنى وصلنى انكم عايزينه لبنتكم ( الله يخربيت الحريم الهبل كلهم )
وما دام بقى هى الحكايه كده انا كفايه عليا انى عملتله شقه وانتم بقى عليكم الباقي   انا ابنى لسه باديء حياته ومش معاه فلوس
وبالنسبه للشبكه وكده والله  هما 3 الاف جنيه الى معانا عايزين تزودوا زودوا انتم

وكانت النتيجه انه بعد ما خلف منها عيلين رماها فى الشارع حافيه وبهدوم البيت بعيالها وقالها روحي لابوكي كده ويكون فى معلومك هايجيبك ليا تاني ..

ايوه طبعا لازم يحس ان بنت الناس الجميله الجامعيه الكمل دي رميه مش اهلها عاطينه فرش شقه كامل ودهب بعشر الاف جنيه وفوق البيعه عروسه ؟؟؟

شوفوا المسخره القائمه دلوقتي فى مواضيع الجهاز والجواز ده لازم تنتهي

انتم فاهمين التيسير فى المهور غلط ...
التيسير فى المهور انه لما يجيب شقه ويفرشها وتعجب العروسه تقوم العروسه تقوله بلاش مهر عشر الاف خليهم خمسه بس

انما العريس الراجل  يعنى الى رايح يتجوز حضراتكم لازم يكون يقدر يجيب شقه ويفرشها  والى مش يقدر انشاله عنه ما اتجوز قلة احسن

ويكون فى معلومات حضراتكم فى شقه ايجار وتتفرش بعشر الاف جنيه واقل
وفى شقه تمليك بنص مليون جنيه وتتفرش بزيهم واكتر

التتيسير انك ترضي بالى هو يجيبه او ما ترضيش حقك برضه
انما مش التييسير ان اهل العروسه هما الى يجيبوا فرش الشقه اصل حرام كفايه عليه جاب الشقه

وكمان يبقى ابوه الى جايبله الشقه والاخ داخل بصحته بس ما ينفعش ده كلام فارغ ومسخره ومطلع جيل من الانطاع والاتكاليين

الكتالووووووووووووووووووووج (بعد اذنك يا د . اسلام ) الكاتلوج شرع ربنا

بيقول  من استطاع منكم الباءه فليتزوج

مش من استطاع اهله ولا من استطاع اهل مراته

وعمر بن الخطاب لما جه يحدد المهور عشان المغالاه  طلعت الى قالتله مش شغلك وصدق هو على كلامها


لو كنا نسيب الامور تمشي طبيعيه كانت هاتمشي انما التدخل السافر بتاعنا هو الى بوظ الموضوع

اجيبلكم التدريج حصل ازاي

الاول والصح والمفروض .. كان العريس بيجهز جهاز معقول فى اوضه فى بيت ابوه حتى ولا شقه متواضعه بالايجار ويدفع مهر ويجيب شبكه كمان  .. بس كانت العروسه تروح بقى بيت جوزها وهى محمله هدوم وهدايا من اهلها كل واحده على حسب مقدرة اهلها بقى وكانت دي مدعاه للتفاخر بين العائلات ( والتفاخر ده بقى الى جايبنا ورا لحد دلوقتي)

بعد كده نداءات بتيسير الزواج والتخفيف من المغالاه فى المهور

بقى العريس يدفع مهر بس العروسه تجهز منه لنفسها  ولما كان جهاز العروسه ده  شارياه بالمهر الى هو من حقها وملكها ... بدأوا يكتبوا قائمة المنقولات الى تثبت الكلام ده ان الفرش ده مهر الزوجه وبتاعها وحقها

بعد شويه  اتحور الامر لان المهر الى العريس بيدفعه اصلا ما يجيبش كل الفرش وهو بكل بساطه بيدفع ويقول لابو العروسه كمل انت بقى مش معايا الا كده وبعد ما كان الى يجيبه ابو العروسه فوق البيعه ويشكر

لا بعد شويه بقى حق مكتسب والعريس يقعد يتامر ويقول التنجيد وحش الستاير دي نوعها اي كلام وكل هذا الهبل

عندنا دلوقتي ما حدش بيدفع مهر انما العريس بيتفق مع ابو العروسه ان العريس هايجيب نص الفرش وابو العروسه النص التاني

وبقى العريس كمان يقل ادبه ويزعق ويقول تجيبوا ده ما تجيبش ده ويقول مش ماضي على قايمه
وامضي ليه  عشان تمسكوني من رقابتي .. وتمسكوني ليه ما انا امسكم انا

وتحول الامر لحرب مش جواز .. وبقى كله قرف .. قرف .. قرف

ليييييييييييه عشان نسينا الكتالوووووووووووووووووووووووووج

يا بنات
الكتالوج بيقول ... تقعدي فى بيتك معززه مكرمه .. والى يتقدملك لو عجبك من حقك انه يجيب شقه ويفرشها بشكل يرضيكى .. ويدفعلك مهر كمان انتى ترضيه .... وغير كده يا بت منك لها ما ترضيش وما توافقيش وما تعبريش ... وقولي لامك وابوكي القاعده فى الخزانه ولا الجوازه الندامه
  ان ما كانش راااااااجل ويعرف يجوز نفسه ويعولك ويعول عياله منك يبقى بلاش منه .. الواحد اعصابه تعبت من التفقيع قصاد شوية عيال ما بيعرفوش حتى يعولوا نفسهم

مش باقول طبعا للبنات يضربوا عليوى ويبهدلوا العرسان لا بالعكس انا مش عاجبنى كل الكلام الى بيحصل ده وفى مره تانيه هانتكلم عن جهاز العرايس عشان الموضوع طول اوي

فهمتوااااااااااا يا بنات ؟؟؟

هناك 26 تعليقًا:

مصري جدا يقول...

تعليقا عالعنوان بس دون المضمون

ربنا يوقف نموكن

richardCatheart يقول...

ههههههههههههههههههههههه

معلش بضحك على تعليق مصرى جدا


نيجى للبوست بقى
متفقه معاكى طبعا فى المضمون والعلوان

بس طبعا اكيد مش ناسيه الغلاء الفحش اللى بقينا فيه فاكل وحده ناويه تطبق كلامنا دا تعرف انها هاتطول شويتين

حنعيش يعنى حنعيش يقول...

العن كلمة باسمعها : ضل راجل ولا ضل حيطة .... على فكرة انت فتحتى قضية عايزة كلام كتير قوى ... وقريب قوى حأعمل سلسله عن المرأة اللى بتضيع نفسها باديها ... تسلم ايدك

الحب الجميل يقول...

معااااااااااااااااكى
فى كل كلمه
انا بنتى تقعد جنبى معززه مكرمه
تاكل وتشرب وتلبس
تحط رجل على رجل وتتشرط كمان
واللى مش عجبه يغور فى داهيه
ربنا يخدهم كلهم
بس كدا
صباحك فل

غير معرف يقول...

تعليق مصري جدا فطسني من الضحك


انتي عارفه فاكرتيني لما جيت اتجوز بابا حب يسئل ابو البنات علي مرتبه بس مسئلش مباشرة فقاله ومرتبك كويس المنتظر العريس يرد يقول اه كذا
لا رد قاله اه كويس
من هذا الموقف نطلع بحاجه واحده بس ان الاب لازما ولابد يكون شرس مع العريس في كل حاجه ويتأمر ويحط رجل علي رجل ويحمد ربنا العريس ان الاب وافق يديله نور عينه وبنته




وبعدين ضل راجل ولا ضل حيطه
مش لما تلاقي راجل اصلا
بلا هم
ديه محلاها عيشة الحريه
مش بناخد من الجواز غير الخدمه والقرف والنكد والحبسه في البيت( ده لو راجل كمل محترم ) او لو عكس كده تلاقي ضرب وبهدله وخدمه لاهله بالعافيه والفاظ قذره وكل حاجه لا وكمان متعرفيش تجملي حد ولاتشوفي صحابك ولا تشوفي اهلك ولا تكلمي حد
وتبقي بقدرة قادر خدامه
يمكن الخدامه بتاخد مرتب لكن انتي ياموكوسه مش هتاخدي غير علي قفاكي



محلاها عيشة الحريه
محلاها عيشة الحريه
الف مره

مصري جدا يقول...

برضو العنوان

أتامروا زي العيش المأمر؟

اه الهي تتأمروا كلياتكن حد ما تتحرقوا

ندى الياسمين يقول...

مصري جدا

الله يسامحك يا استاذ هاني
وعموما ان كان على النمو احنا بنحاول نوقفه اصل هههههههه

ندى الياسمين يقول...

قلب القطه

وحشاني خالص يا جميل

مصري جدا كده دايما يا اختي بيدعي علينا ما تعرفيش هو متغاظ مننا ليه كده
هالبت احد بنات جنسنا معلمه عليه ما تعرفيش بقى ههههههه


يا قلب القطه انا والله مش باقول للبنات يغالوا بالعكس انا هاتكلم فى الموضوع ده المره الجايه

وعموما برضه ماهم من غير حاجه البنات مطولين يا اختي
يطولوا على فايده بقى

خواطر شابة يقول...

عن نفسي اؤمن بشدة بكلامك لكن الموضوع موضوع عقليات تشكلت على هذا النهج وتربت عليه بحيث يشكل شبح العنوسة بعبعايخيفها وكأن الزواج هو من الاعمال التي فرضها الله وجعلها شرطا لدخول الجنة وما لم تتغير هذه العقليات فلا تنتظري عزيزتي أن تتغير الصورة امامك
دمت بكل الود عزيزتي

ندى الياسمين يقول...

حنعيش يعنى حنعيش

ايوووووووه باقول ساعات بتكون حواء عدوة نفسها

مستنيه السلسله دي جدااااااااااااااا

ونورتنا يا فندم

ندى الياسمين يقول...

الحب الجميل

لا بلاش ياخدهم كلهم سبيهم جايز ينفعوا هههههههههههه

ندى الياسمين يقول...

غير معرفه

لو سمحتي يا بت انتى اتكلمى عن قفاكي لوحدك هههههههههههههههه

هو لو الوضع زي ما انتى بتقوليه كده يبقى اه محلاها عيشة الحريه

بس مش كل الناس كده يبقى حرام علينا نفتري

فى رجاله كتير محترمين برضه وولاد ناس وبيحترموا ولاد الناس

بس الراجل الى بدل الحيطه ده برضه ما ينفعش يا خالتي

ندى الياسمين يقول...

مصري جدا

الله يساااااااااااااامحك حرام عليك بلاش الدعاوي دي ياعمنا

ندى الياسمين يقول...

خواطر

حرام عليكى يا خواطر لازم تقوليها فى وشي كده مافيش فايده
ههههههههههههههههههه

لا طبعا هو ممكن يتغير بس مش بكلامي انا لوحدي

انا ممكن غير فكر واحد اثنين عشره

انما مش ممكن غير مجتمع وحدي لازم الموضوع يكون اكبر من كده

نورتي يا جميل

ستيتة حسب الله الحمش يقول...

كلامك صح
التسلط الإعلامي فعلا عامل غسيل مخ
وقصة هم البنات وعلشان تنزاح
وقصة ها تقعد على قلبنا
وكل كلمة فاكسة بتثبت كل يوم عدم جدواها
وبدل ما كان عنده بنته بطولها
بتبقى عنده هي وتوابعها

ربنا يعافينا ويعافي ذريتنا من الأذى وأهله

مساءك فل يا جميلة

مجرد حلم صغنتوت يقول...

المهم الاهالي يفهمو ان من حقهم يتأمروا
والمهم انهم يتأمرو على العريس مش على بنتهم

هتأمر على اد ما اقدر يا ندى حاضر :D

كلمات من نور يقول...

صح الصح وبما إني أم بنين فطبعا كده حتحسبيني حاقف ضدك واعمل بوست ارد عليكي بيه هههههههههههه

بس فعلا يا ندى أنا دايما باقول لاولادي أبوكم رجل عصامي اشتغل من وهو طالب وربي اداله على اد نيته وجهده ولما اتجوزني مقالش لأبوه الله يرحمه تعالى جوزني لا بالعكس وانتم لازم تكونوا زيه

بس الفكرة إن الواحد بقى بيسمع عجب في الزيجات دلوقتي تلاقي اب عنده بنت وولد يتأمر على عريس بنته و يتشرط ويعجزه وييجي عالولد يقوله شوف لنا بنت على اد ايدنا ...تخيلي بقى

في انتظار البوست الرجالي

sweet angel يقول...

والله كل الناس بقت بتفكر بالطريقه دي

عارفه انا عندي 19 سنه
وبيعاملوني معامله العانس
ههههههههههههههههه
كان لما يتقدملي واحد
ماما تقولي ايه يعني ما هو راجل زي الفل اهو
ايه يعني لما تتنازلي شويه
ههههههههه

كان يركبني العصبي
واقولها انا البنت يعني انا الي اتشرطت وافوافق او لا

الدنيا ميزانها اتقلب والله

فاروق بن النيل يقول...

يامصرى جدا ......
ماهوه لو وقف نموهن نموك حايقف برضه داهى أمك وأختك وخالتك وعمتك وزوجتك وإبنتك هل ترضى لها ذلك ....
نيجى بقى ليكى ياست الكل.......
ندى الياسمين........
لاتتأمروا يابنات براحتكم وكونوا صبورين حتى ييجى عدلكم وإبدأو ا حياتكم على قد الإمكانيات وظروف العريس وبعدين ربنا حايرزقكم كتير
أقول لكم لقد بدأت حياتى عام 1980 بدبلتين وغويشة ب200جنيه وبشقة بها سرير جديد نص ونص وشوفنيرة و2 كوميدينوا تمنهم حوالى 500 جنيه
لكن بعد ثلاث سنوات فقط عدت لأشترى لزوجتى العفش اللى هيه عايزاه حوالى 15 ألف جنيه 1983 طبعا مبلغ كبير فى هذا الوقت والآن أنا وزوجتى وولدى عندنا منزل ست أدوار(عمارة) بفيصل -الجيزة
فقط لى ولأولادى لأنها صبرت وعلمت أن زوجها إختارته صادقا طموحا مخلصا وهذا يحتاج إلى الإستخارة والإيمان ولايحتاج إلى كلامك الصادم هذا إسمحيلى خففى منه شوية دومتى أختاه

momken يقول...

يعنى محبكش البوت ده الا وانا على وش جواز

متامرتيش انتى ليه ياااختى

وجايه تحرضى البنات تتامر على حظى انا

ايه الحظ ده ياربى
ـــــــــ

كلام بجد

اتفق معك بشده فى ان الاعلام ناقش كل مكلات المرأه بطريقه من ثلاثه
ايما السخريه
اى يسخر من الانثى الى يتاخر زوجها والتى تحب والتى تتزوج وتفشل

ايما بالتحريض الخطا عن طريق ملسسللات موجه تجعل الانثى متحفزة ومتوثبه

ايما بالسطحيه والجهل والتخلف
واحتارت البنات وكان ضحيه معول الهدم الاول فى مصر بقياده صفوتالشريف

البوست صرخه قويه فى صوره وشوشه

تحياتى

ندى الياسمين يقول...

سوتيتة حياتي

وحشاني يا جميل

يارب عافينا وارحمنا

ندى الياسمين يقول...

مجرد حلم صغنتوت

ايووووووه يبلطلوا يرددوا هو حد لاقي عرسان

عشان مش مطلوب انه يكون عيل اهبل ونقول عليه راجل ابدا

ندى الياسمين يقول...

كلمات من نور

ايوه الكيل بمكيالين يا حبيبتى ده مصيبه لواحده

المهم ما دام عندك عرسان متربيين حلو على المبدأ ده احجزيلى اتنين والنبى هههههههه

ندى الياسمين يقول...

سويت انجل

ايه ده 19 بس ؟؟ طب تيجى نبدل ؟

وطبعا ايوه البنت هى الى تتشرط وتتقل وتتامر كمان ايه هى سايبه

ندى الياسمين يقول...

ا فاروق ابن النيل

حضرتك فاهمنى غلط
شوف حضرتك قولت ايه
الشبكه والفرش والشقه مين جايبهم

حضرتك ولا ابو العروسه ولا باباك انت ؟؟؟

حضرتك صح ؟

هو ده الى انا باقوله

انما تخيل الموقف كده لما انت تروح لابو العروسه تقوله والله انا مش معايا فلوس غير 3000 جنيه ودول ما يكفوش طبعا افرش الشقه كما يجب

بالتالي انا هاجيب على ادي وانت تكمل بقى

ايووووه بيفرضوا فرض على ابو العروسه انه يشترك فى الجهاز على اساس انه لازم يدفع تمن انه العريس هياخد منه بنته

شوفت كده حضرتك ايامكم ؟؟؟

وللكلام بقيه فى بوست كامل عن مهازل الجهاز

ندى الياسمين يقول...

ممكن

اولا لوووووووووووووولي مبروك وربنا يتمم بخير


ثانيا مين قالك بقى يا اخويا انى ما اتامرتش ؟؟

اتامرت ونص وقعد كام شهر يتحايل عليا اوافق كمان
هع
هع

والى ابويا جابه خده وقاله شكرااااااا تعبناك معانا من غير قلة الادب الى بتحصل دي

...........
الاعلام اصلا ما بيحاولش لا يصلح حاجه ولا يعالج حاجه مش فاضيين عندهم حاجات اهم

اكل العيش مرررررررررررررر