الاثنين، 10 يناير 2011

ما هو احترام الراي الاخر


حد يعرف يعنى ايه احترام الراي الاخر او فكر الاخرين او معتقد الاخرين ؟؟؟

لللاسف الشديد اننا بنردده ومش فاهمينه...

احترم الراي الاخر يعنى اسمعه يعنى ما اسخرش منه  يعنى ما اقلش ادب واقوله انت غبي واهبل ومابتفهمش

حتى لو كان ده اصلا رايي فيه على فكره مش من حقي اصادر على اراء الاخرين

المشكله بقى  ان فى ناس بتقولك انا باحترم الراي الاخر ومعتقدات وفكر الاخرين
ولكن
بمجرد ما تدخل معاه فى نقاش فهو يعتبر انه لازم يقنعك ويكلمك  دائما من منطلق  انك غبي ومش فاهم او ضال محتاج لهدى من الله .. او اهبل ومضحوك عليك

النقطه بقى الى فقعاني وانا واحده شايله المراره مش حمل فاقعه خالص

هى ان الناس اليومين الى فاتوا يجيبوا واحد منشي كده وببدله وحلو ومزقلط ويقولك الوحده الوطنيه والدين لله والوطن للجميع  وحرية الفكر والمعتقد الدينى واحترام المعتقدات والديانات للاخرين ...... ويكلل البؤين دول بانه  كان له صاحبه مسيحى عادي وانه عمره ما سال حد على ديانته وانه مش مهم اصلا نعرف دينه ايه ويا حبذا لو راح داخل على خانة الديانه فى البطاقه وليه نكتبها ما مش مهم

طيب سؤال بس يا جدعان

هو يعنى احترام المعتقد الدينى للاخرين ؟؟

هل يعنى احترام المعتقد الدينى انى اجهل به وما اسلوش اصلا هو ديانته ايه ؟؟؟
ولا هو انى اعرف ان الى انا باكلمه ده مسحيى او مسلم او يهودي او بوذي او ملحد    ومع علمي بذلك فانا اعامله بكل ود واحترام ومافيش اي          ضغائن ما دام ما عمليش حاجه؟؟؟
انا اوقات باحس باحراج انى اسأل حد انت مسيحى ولا مسلم بسبب الفكر ده باخاف يهمنى غلط ولو هو مسيحي الهبل يشتغل  ويقول ده من ساعة ما عرفت انى مسيحي وهى مش طايقاني مثلا

ايوه ماهو الكتاكيت ماشيه فى امخاخ الناس كلها اصلا بصرف النظر هما مسحيين ولا مسلمين

مع انه عادي مفروض اسال عادي  لمجرد العلم

ايه المشكله لما يكون فى بطاقته مسيحى وعلى ايده الصليب واساله انت مسيحي يقول اه وبكل فخر واعتزاز زي ما انا باقول برضه بكل فخر واعتزاز انا مسلمه

هو من حقه يعتز بدينه مش فاهمه هما ليه الناس فاهمين النقطه دي  غلط

هاقول تاني احترام المعتقد الدينى هو انك تعرف معتقده وتحترمه
مش انك اساسا ما تحاولش تعرفه من اساسه

فى اليومين الى فاتوا سمعت هبل غيرعادي وكلام يفقع من الجانبين

مش معقول كده ابدا يا جماعه
احنا ليه بنزودها فى كل حاجه ونخلي كل حاجه اوفر ومبالغ فيها

القنوات كلها شغاله كلام عن الوحده الوطنيه الى هى فى الغالب واحد مسلم بيحكى عن صاحبه فى المدرسه  الى كان حبيبه

والمسلمين عمالين يطبطبوا على المسحيين بشكل برضه اوفر اوفر لحد ما انا حسيت انى انا الى فجرت الكنيسه اصلا طبعا بعض المسلمين مش كلهم  فى ناس عاقله ومعتدله طبعا

والمسحيين عاملين زي    ما يكونوا حسوا اننا  بنداريهم السكات وبرضه ساقوا فيها  وعمالين يهرتلوا فى كلام فارغ  وتلاقيهم ماشيين بيقلولك فى النص الخنازير وبناء الكنايس وخانة الديانه فى البطاقه واي هبل بقى وكل من له عيل بيبكي عليه فى الهيصه .....برضه مش كل المسحيين فى ناس عاقلين ومعتدلين

الى كل مسحيى على ارض مصر  كلنا طايلنا الهم يا اخويا لو مش مصدق جرب تبقى مسلم شويه وشوف يا حبيبى هايجرالك  ايه فى ام البلد دي

الى كل مسلم على ارض مصر  انت مسلم والاسلام فخر لك وعزه وكل ايه و كل حرف فيه وكل امر فيه اعتز به وافهمه صح  من فضلك يا تحط لسانك فى بؤك

ينفع يعنى الاقي واحد كاتب مقاله وبيقول  انا كرهت حصة الدين عشان كانت بتفرقني عن اصحابي فى المدرسه
ويقول انا شايف احنا بنتكلم  فى الدين اكتر من اللازم

وناس عمالين يسقفولوا ويطبلوله ايه القرف ده

هو احنا هانعقل امته ونبطل تسقيف وتطبيل امته ؟؟

انا على فكره مش معنى كده انى مش زعلانه  من الى حصل بالعكس ده انا زعلانه جدا على الناس الى ماتت
على قتل النفوس  على ترويع الامنين  على الصاق التهمه بالمسلمين بفعل ليس له اي علاقه بالاسلام

على ظهور العجز والاهمال من اجهزة الامن

على الوحده الوطنيه الى فعلا بقت مهدده

زعلانه اوي على  انى باشوف  المخططات احنا بنفذها ببراعه وغباوه

زعلانه على انى  شايفه ناس كتير مش فاهمه وبتتكلم وبتعك للصبح

ارجوكم افلا تعقلون

هناك 20 تعليقًا:

فاروق سحير ( فاروق بن النيل ) يقول...

ياسمين...............
إسمحيلى طريقة عرضك للموضوع موش عاجبانى ليه إنتى أصلا عصبية جدا كدة فى كلامك ورد فعلك وإنفعالك ماهو اللى بتتكلمى عنهم إنهم منفعلين وبيهرتلوا
ياسمين من أساليب إحترام الناس والرأى الآخر إنى ماأوصلش رأى لهم بعصبية وبكلام جارح فيه بعض الكلمات الجارحة مثل: "ولو هوه مسيحى الهبل يشتغل ...
منين ياسمين قولتى فى أول كلامك :
"أحترم الرأى الآخر يعنى أسمعه يعنى مايخرش منه يعنى ماقلش أدب واقوله انت غبى واهبل ومابتفهمش" تناقض بين ماقولتى بالأول وماقولتيه بالعبارة السابقة.
وأيضا" فى اليومين اللى فاتوا سمعت هبل غير عادى .
المسلمين ياأختى بيطبطبوا على المسيحيين بشكل غير عادى أوفر أوفر وذلك لسببين:
1- أن المسيحيين قلة
2- أن التفجير الأخير كان أمام كنيسة القديسين وأثناء صلاتهم فى عيدهم حتى لو قدامه جامع كما قالت الحكومة الفاشلة
3- أن المسيحيين اللى كانوا أمام الكنيسة مات منهم حوالى 22 وبعضهم أطفال ونساء وبعضهم تفتت وتحول إلى كتل متناسرة من اللحم والعظم
4-أن باب الكنيسة خلع وماأدراكى ماباب الكنيسة وإرتفاعه وكبر وثقل حجمه ووقع فوق أناس محروحين فقتلهم
أظن بعد كده ماتقوليش الطبطبة شيئ أوفر أوفر
أنا شخصيا ماروحتش هناك وشوفت لكنى سمعت ورأيت الفيدية على اليوتيوب وتأثرت وكتبت مايمليه على ضميرى وإقرأى قصيدتى حتى تهدأى وتتكلمى بعقلانية أفضل .
ياسمين لاتزعلى من صراحتى أنا مسلم ومتدين جدا وعمرى 64 عام وكان والدى الله يرحمه شيخ أزهرى متدين يلبس جبه وقفطان لكنه ليس متعصبا كان مثل الشيخ الدكتور محمد الطيب شيخ الجامع الأزهر إسمعيه مع منى الشاذلى بالعاشرة مساءا وإنتى حاتعذرينى بكلامى
وآسف على التطويل والرأى الصريح وشكرا لكى عزيزتى

خواطر شابة يقول...

عزيزتي ندى انا معك في نقطة ان فكرة احترام فكر الاخر لايعني تجاهله وانما يعني ببساطة احترامه حتى وانا مختلفة معه وقد قرأت مرة هذه المقولة وأعجبتني جدا قد اختلف معك في الرأي لكني مستعد للتضحية بحياتي ليكون لك الحق في ان تعبر عن رأيك.
انا ايضا مع فاروق ابن النيل في انك كنت عصبية في عرضك للموضوع والظروف الان لاتحتمل ذلك ابدا
انا ايضا معه في ان ماحدث من طبطبة كان ضروري جدا فحجم المصاب كبير وتلك الطبطبة وذلك الاحتضان والتعاطف الاسلامي الكبير هو الذي جنب مصر ويلات ماكان يهدف له من فجر الكنيسة.
دمت بكل ود عزيزتي

Ramy يقول...

انا فاهم عصبيتك على فكرة

و فاهم ان الهم طايل الكُل

طب ما تجربى انت تبقى مسيحية شوية (:

بهرج على فكرة

على فكرة مش عيب انى اعرف اللى قدامى مسيحى و لامُسلم علشان ممكن اعمل حاجة ممكن مكونش واخد بالى منها فيزعل

و زى ما قولتى فى من الناحيتن عُبطه كتير

تحياتى

shimaa elkholy يقول...

استاذ فاروق

حضرتك معلش ما فهتنيش

مش معنى انى باقول لو هو مسيحي الهبل هايشتغل يبى قصدي ان الهبل لصيق بكل مسيحى

لا الى اقصده انه لو مختلف العقيده عندي ومسيحى انه ممكن الهبل يشتغل ويقول اااااااااه ما دام يهمها تعرف دينى ايه يبقى هاتسيء الي

انا باسمع راي الاخرين بس من حقي هنا انفس عن غضبي من اراء وكلمات فعلا هدامه من غير ما اشتم حد بعينه ولا استهزأ بفكره والله وانما لازم الناس دي تعرف ان ده مش صح

عزيزي انا ليا اصدقاء مسحيين على النت وغير النت
عزيتهم كلهم وعيدت عليهم والله يا سيدى انا واحده اتصلت عليا بالغلط وقالتلى آنا سيمون موجوده يوم العيد الصبح قلتلها النمره غلط وكل سنه وانتم طيبين

يعنى انا مش باقول نعلق المسحيين على باب زويله يا فندم

وانما هاديلك مثال
حضرتك لو واحد عنده ابن مريض بيهتم بيه زياده ويمرضه ويطبطب عليه لكن لو الولد ده عمل حاجه هاتضره هاتعمل ايه ؟؟ هاتمنعه طبعا

هى دي الفكره انا اطبطب على المسحيين اوك
انما بعض العقول المريضه تفتكر ان احنا كده خايفين منهم وبعض العناصر الغير مخلصه ما بينهم ( ايوه ما عندهم ناس برضه مش تمام مش ملايكه )
زي ما احنا كمان ما مش كلنا ملايكه خلي بالك
يطلعوا الناس دول يستغلوا الموقف ويضغطوا فى نواحي تانيه لها ابعاد تانيه يبقى لا بقى

انا اطيب خاطرهم اه اعزيهم اه بس يا استاذنا احنا مش فريقين عادي ومعتدى

احنا واحد يعنى حضرتك يوم لما والدك توفاه الله مثلا كنت انت واخواتك بتعزوا بعض جميعا ولا واحد فيكم بس الى كان بيعزي الباقيين

احنا فريق واحد يا فندم مصابنا واحد


معلش هاكمل فى تعليق تاني عشان البلوجر بيعصلج

shimaa elkholy يقول...

لسه معاك استاذ فاروق

بعيدا بقى عن المسحيين والى منهم فعلا ناس انضحك عليهم وحسوا اننا اعداء

خلينا فى المسلمين

حضرتك يرضيك ان واحد يكتب مقاله يقول انا كرهت حصة الدين عشان بتفرقنا ؟؟!!!

يقول بسخريه (يطلع واحد يقول لقد كفر من قال مش عارف ايه كده )

ينفع نسخر الايه بالشكل ده .. ومش عايز يكملها حضرته مكسوف منها

ينفع اقول .. احنا بنتكلم كتير عن الدين وزياده عن اللزوم ؟؟!!!

ليه كده بقى ؟؟
تقولي احترم رايه ؟؟ لاااااا هو كده الى ما بيحترمش دينه الى هو دينى وده خارج نطاق المساومه

هاقول لحضرتك حاجه كمان بخصوص النقطه دي

مره قلت لمسحيى كان بيقول كلام تعبان كده قلتله باقولك ايه الحقيقه احنا دينا امرنا اننا نعاملكم كويس ونحترم معتقكم وكنايسكم واحنا الى فاهم مننا بيعمل كده فعلا
ومش محتاجين لا نخبي ايات ولا نخترع كلام لو ياعم دينى وربى قالولنا نقتلكم هانقتكلم ياعم مش هانستاذنكم اصلا

حضرتك يا فندم فهمتنى غلط انا مش باقول ما نطبطبش انما اطبطب وانا باحترم نفسي ودينى وعارفه انى مش متهمه
اطبطب على اخويا مش مجرد واحد من الفريق الاخر
اطبطب من غير ما هو يسوق فيها ويغلط فيا

تحياتي لحضرتك يا فندم وحضرتك والسيد الوالد على راسي

shimaa elkholy يقول...

خواطر شابه

النقطه الى انتى متقفه معايا فيا دي كانت اساس البوست المفروض لكن انا ما قدرتش وانا باكتب ما اقولش باقي الكلام كان ناقح عليا

وبالنسبه لكلام استاذ فاروق معلش اقري الرد بتاعي عليه عشان تفهمينى انتى كمان

shimaa elkholy يقول...

رامي

حبيبى يا رامي هههههههههههه
اهو ما حدش عذرني فى عصبيتى الا رامي يا جدعان

عايزنى اجرب ابقى مسحيه ياعم انتم الخسرانين على فكره انا متعبه هههههههههههههههههه

طب بص انا هاعمل نفسي بقيت مسيحيه كده وكده بس على شرك توروني الاسد الى مخبينه فى الكنيسه على راي عادل هههههههههههههه


والله يا رامي ما بيتعبنيش الا انى الاقي الناحييتين فيهم ناس بجد افكارها هبله ومش بس هبله ده هدامه مصايب يعنى

وبعدين تعالى هنا ده انا هاطعكم جيت اكلم الجزار يجيبلي لحمه يوم العيد بتاعكم قالي خلصت كل سنه وانتى طيبه

عاجبك كده بلاش ناكل لحمه احنا يعنى :)))

نورت يا رامي

رحاب صالح يقول...

شوفي يا ندي الياسمين
انت كلامك فيه جزء منطقي جدا
وجزء عصبي جدا
يمكن لو كنت كتبت بهدوء كنت عرضتي وجهه نظرك بشكل حلو..
ده ميمنعش انك اثرت نقاط مهمة جدا

Noha Saleh يقول...

انا فاهمة انتى عاوزة تقولى ايه
ومتفقة معاكى فى حاجات كتير
وكل واحد لازم يفتخر بدينه ومحدش ينفع يقول انا كرهت حصة الدين علشان مش عارف ايه
الدين بتاعنا مش وحش الدين بتاعنا دين جميل ومتسامح جدا يمكن اللى بيحصل ده كله اننا عاوزين نفهم الناس كده وان ديننا امرنا بالتسامح مع الاديان التانية لان ده فعلا كلام القرآن وزى مافى ناس فاهمة اقرآن غلط فى ناس برضه بتحاول توصل الفكرة عن الدين غلط ولو بسلامة نية

Humman being يقول...

أول قواعد احترام الآخر انى متدخلش ولا أتطفل على خصوصياته ..

عايزة أسألك سؤال مهم .. تفرق معاكى ايه لو عرفتى ديانة فلان اللى قدامك ده ؟ يعنى هتغير ايه؟ لو قالك مسلم أو مسيحى أو يهودى ... هتفرق ايه؟ هتغير حاجة

رأيى الشخصى اللى مش بفرضه على حد هو اننا نتعامل مع هذا الانسان على انه بشر ... بشر وبس ...ملناش دعوة لا بدينه ولا معتقداته ... عارفة ليه؟ عشان ربنا هوه اللى فى الآخر هيحاسبنا سواء مسلمين سواء مسيحيين كل الغرب بيتعامل مع بعضه كدة ملوش دعوة بالدين ليه دعوة بس بالانسان بالبنى آدم اللى قدامه

حاجة أخيرة ... موضوع تفجير الاسكندرية واللى اتحول لهيصة وطبطبة ...
كان لازم يبقى كدة... ولو مكناش تداركنا الموقف ووقفنا الوقفة دى كنتى هتلاقى قنبلة قدام مسجد جنب بيتك الأسبوع اللى بعده سواء من الفاعل الأول اللى فجر الكنيسة ألا وهى اسرائيل ... أو من حد من أسر الضحايا اللى محروق قلبه على ابنه أو بنته .. وفى النهاية هتلاقى نفسك عايشة فى العراق مش فى مصر .. أو حتى فلسطين اللى بيخبطوهم فى بعض والفصائل بيموتوا بعض ...
كنت هتحسى ساعتها بالأمان على ولادك؟

الموضوع أكبر من مجرد تفجير ولا كلام أغانى ده مخطط للشرق الأوسط كله زرع الفتنة بين الناس نقوم احنا نموت بعض والجانى بعيد تماما عن الموضوع ...

ده رأيى الشخصى ...

shimaa elkholy يقول...

رحاب صلاح

هى فين العصبيه يا جماعه الي كلكم بتتكلموا عنها هو انتم ليه محسسنى انى باشع فى شعري كده

طيب الحمد لله انى اثرت نقاط مهمه

shimaa elkholy يقول...

نها صلاح
بذمتك هل دي طريقه نظهر بيها دينا دين متسامح ودين قوي ودين جميل ؟؟

بذمتك الكلام المفقع ده الى بيتقال معناه كده ؟؟

ده الى انا باقوله

نفسي نبقى ناس معتدلين كلنا كمصريين الاتجاهات كلها جايبه شمال لييييييييييه ماله النص ما حلو حتى هانتقابل هناك

shimaa elkholy يقول...

شيماء

انا قلت ما حدش فهمنى غير رامي

يا شيماء اه انا يهمنى اعرف ديانة الى قدامي لاسباب كتير

مش عشان اغير معاملتي معاه عشان حاجات كتير

شوفي يا ستى انا واحده متطرفه اينعم مش هاحاسب الناس اطلاقا بس انا من ضمن مفردات حكمي على الاشخاص لو باقييم شخص
هل هو يتقى الله او لا سواء مسلم ولا غير مسلم

لما كنا فى لقاء الزراعيين السنه الى فاتت ساعة الصلاه كل ا لمسلمين الرجاله راحوا الصلاه
واتبقى عادل ومينا فقلتهم ايه ده انتم مش هاتنتشروا ؟
طب خدوا مكانا قصيا وصلوا من اجلنا انت وهو بقى
عادي يعنى مش خدت منهم جمب عشان عرفت انهم مسحيين ؟؟
وطلب اخير
ولو سمحتي تردي عليا ماهو احترام عقيدة الاخر
هى انى ما افكرش هو عقيدته ايه ولا انى اعرف انه عقيدته مختلفه وافضل اعامله نفس المعامله ؟؟



ولوكان قصدك موضوع البطاقه

فطبعا طبعا طبعا لازم يكون البطاقه فيها مسلم ولا مسيحى ولازم يكون الاوراق بتقول هو مسلم ولا مسيحى وبرضه المفروض ده ما يولدش اي اضطهاد
لكن عشان الحقوق تثبت والدنيا تبقى واضحه احنا عندنا قانون احوال شخصيه مبنى على الدين يا ستى وجواز وطلاق وميراث وحقوق
وده اعتبريه الف باء رفض الغاء خانة الديانه

بالنسبه لموضوع الطبطبه هاقولك تاني
زي ما قلت فى التعليقات الى فوق

انا كان ليا اصحاب مسحيين وطبطبت عليهم وعزيتهم وعيدت عليهم
لكن انا باعترض على الطبطبه الغلط الى فيها اساءه لينا

يا شيماء المسحيين لو ما فهموش الملعوب تبقى باظت حتى لو عملنالهم قرد وكلب
ومعلش انا عن نفسي مش هاعمل قرد ولا كلب
انا كل الى اقدر اعمله لو اخويا صدق واحد بيوقع بينا انى اخده افهمه مش اقوله خد ياعم قفايا اهو اضرب عشان تصدق

وبالنسبه للامن والامان فانا اساسا لا اؤمن على اولادي حاليا ولا على نفسي
والى انتى بتقوليه ده ما زال قائم حدوثه

ولعاشر مره انا ما قلتلش ما نطبطبش ولكن نطبطب واحنا فى فريق واحد واحنا رافعين راسنا فوق واحنا معتزين بنفسنا ودينا

تحياتي ونورتي

mrmr يقول...

الاحترام واجب جدا
وخصوصا احترام اراء ومعتقدات الاخرين
ومش عيب ابدا انى اعرف اللى قدامى معتقداته ايه ولا ديانته على الاقل نقدر نفتح ساحه من الحوار الهادف ومش بالضرورى انى اقنع اللى قدامى بمعتقداتى لان معتقداتى دى تخصنى وحدى مش تخص حد تانى
لكن مش يضر ان كان فى اسئله من الطرف الاخر يحب يعرف اجابه عنها انى ارد على سبيل المعرفه وانى اسئل الطرف الاخر عن معتقداته وده للعلم بالشئ ولا الجهل به
وفى الاخر كلنا بنعبد الله سواء كان مسيحى او مسلم
وبعدين وماله لما نطبطب على المسيحى ونعزيه اليس هم من فقدوا اخواتهم فى المسحيه
لما تروحى اى معزى لصديقه او قريبه مسلمه اليس من الواجب عليكى تعزيها وتاخدى بخاطرها لاجل حزنها
اى نعم الحزن طايل الكل ولازم الكل يعزى بعض ويطبطب عليه والقوى يسند الضعيف وياخد بايده لكى يمر بالازمه بسلام
وفى النهايه باقول ان الخلاف فى الراى لا يفسد للود قضيه والمقوله دى فعلا مقتنعه بها وحفظاها عن ظهر قلب

ربنا يرحم موتانا جميعا
ويشدد الضعفان ويجبر كسر قلوبهم
موضوع جميل يا ندى
لكى كل احترام وحب

فشكووول يقول...

يا ياسمين هانم
السلام عليكم
يااااااه !!!!! انت فتحتى جرح كبير ويا ترى ازاى اداويه
طبعا مش صح انى اجهل اللى قدامى دا مسلم ولا دا مسيحى
وعلى رأيك الناس بقت تهرتل وتفنجر ببقها مع انه عمره ما بيعمل اللى بيقول عليه
ازاى اتعامل مع انسان وما اعرفش دينه .. دا لازم عشان اتكلم معاه بالاسلوب اللى ما يزعلوش .. طب لو شالوا حصة الدين من المدارس وعملوها حصة العبادات .. يعنى كله زى بعضه واما ابنى ييجى يقول لى والله يا بابا اليهوديه دى حلوه او البوزيه حلوه .. طب انا ح اقول له اييييييه؟؟؟ طبعا لازم اشرح له ان الاسلام والاسلام والاسلام واجيب له محاسن الاسلام ومساوئ الاديان الاخرى .. يعنى كدا نبقى رجعنا للمربع واحد وهو ان اللى المدرسه مش بتعمله وما بتفرقش بين الاديان لازم انا اعمله فى البيت عشان ابنى ما يبقاش بزرميط.
كل ضيوف التليفزيونات اللى بنشوفهم دول واخدين اجرهم عن الحلقه ومحفضينهم الكلام اللى لازم يقولوه
زمان يا ستى هانم فعلا مش كلام ... كنا نحن المسلمين والنصارى لا يمكن التفرقه بينهم فى اى شيئ .. انا بحبه وهو صاحبى وحبيبى كمان وللحقيقه انا كمان صاحبه وحبيبه بس هو عارف دينى وانا عارف دينه .. وكانت الحكايه دى فى الارسشيف ما بتطلعش ولا كنا بناخد بالنا منها فى التعامل
لكن برضه احنا علينا شوية اخطاء
شوفى حضرتك
ما اخدتيش بالك من الدعاء ساعات فى المساجد بيقولوا ايه
بيقولــوا
اللهم اهلك الكفره والملحدين
اللهم اهلك اليهود ابناء القرده والخنازير
اللهم اهلك امريكا
اللهم اهلك الدنيا كلها
واهلك كل من يخالفنا
وهاتك يا دعاء على الناس كلها وما بنستسنيش حد من الدعاء عليه ... زى ما ما يكونش لنا اعداء وبنحاول نشحت اعداء عشان يعنى الحياه تبقى متعادله معنا
طب لما الدنيا كلها تسمع الدعاء عليهم بالطريقه دى .. يبقى احنابقى ايه .. والنبى حيقولوا لنا بسم الله.. لازم طبعا يحاربونا
عايز اقول كلام كتير لكن الكبيورد وجع صوابعى
تحياتى

shimaa elkholy يقول...

مرمر

اولا منوراني ومنوره البلوج كله يا جميل

ثانيا : انا ما قلتش يا مرمر ما نطبطبش يا ستى والله انا طبطبت بس نطبطب صح

مش هاعيد الكلام تاني الى فوق

باقول نطبطب واحنا فريق واحد مش فريقين

ياريت تفهموني يا جماعه

shimaa elkholy يقول...

استاذنا فشكول

ربنا يخليك يا فندم انت منورنا انا مستعده تملينى وانا اكتب انا تايبنج مافيش مني على فكره

وطبعا انا معاك فى ان الى بيعملوه المشايخ غلط وميت غلط الادعيه والتفسيرات على مزاجهم فى الاحاديث واحكام اهل الكتاب

بلاوي كتير حاجه تخنق


وطبيعى جدا الناس برضه يتوقعوا مننا ما دام بندعي عليهم اننا نقتلهم مافيش مشكله

بس برضه عشان اشرح موقفي اقول يا جماعه الناس دول انا مش معاهم الناس دول مش فاهمين الدين بتاعنا صح

انما مش اقول هو الدين هو سبب المشاكل تعالوا نلقيه جانبا


وعجبنى اوي تعبير حضرتك ان الحكايه مركونه فى الارشيف

الله ينور عليك مركونه فى الاشريف لا مهمله ولا شايلنها على راسنا وماشيين

تحياتي لك وجبت المفيد حضرتك

فاتيما يقول...

صباح الخير يا صبصب

ازيك ؟

انا كنت عاوزة اعلق
اول ما اتنشر البوست
بس حبيت استنى شوية الاول


مش عشان كنتى عصبية ف طرحك
لأ خالص
انا مش حاسة كدا
لأنى شوفتك وانتى بتتكلمى ف الواقع
وف المدونة وعارفة انك حمقية بطبعك لما تكون مقتنعة بشىء
وبتتكلمى بحماسة
فمش معتبرة لهجة البوست عصبية بالمرة



انما اللى أخرنى انى اترددت
اكتب رأيى ولا مكتبش ؟!!
بما ان بوست واحد عندى
كان فيه كل حاجة
وملوش لازمة اعيد ف كلامى وازيد


لكن مقدرتش امنع نفسى من الإبتسام وانى اقولك حاضر على افلا تعقلون
حاضر هحاول أعقل انا وغيرى اكيد
ولأنى بحطها قصادى طول الوقت
بس تانى اقراها واسمعها


لكن لما قريت التعليقات
لقتنى عاوزة اقول حاجة
وسامحينى عليها
من باب الغلاوة والمحبة
والرغبة الحقة
فى وصول لمعنى احترام الرأى الآخر
حسب عنوان البوست


انتى معترضة على الطبطبة الغلط
اللى فيها إساءة لينا
على حد ردك على شيماء


طب يا صبصب ممكن أسأل

هيا الطبطبة دى زى أى شىء ف الدنيا يعنى مش درجات ؟


يعنى حد يطبطب بكلمة
او ضمة
او موقف
او شجب
او حتى سكوته .. الصمت يعنى


زى ما مرمر جابت مثال العزاء
تفتكرى كل واحد عنده ميت
هيبقى رد فعله زى التانى


واللى داخل يعزيه ..
كلهم هياخدوا نفس الشكل
ولا فيه حد هتلاقيه مواسى قوى
وحد بارد شوية
وحد ملخوم
وحد سخيف
وتتباين الإنفعالات وردود الأفعال ؟!!

جايز مشاعرهم
تكون واحدة ف الحزن
بس التعبير مختلف


كل شىء ف الدنيا درجات
الوان من الأبيض للأسود
وما بينهما من رماديات
وفواتح
وغوامق


الطبطبة
ينسحب عليها نفس النظرية


فيه حد يطبطب قووووى
وحد نص نص
وحد شوية
وحد بهدوء
وحد ببرود
ألخ


السؤال هنا
مين يحكم ع الحكاية دى
ويقننها ؟!!
يعنى مين يقول انفعال كل شخص
تجاه ازمة ما ..يبقى عامل ازاى ؟!!!


ثم السؤال التانى
مين يتحكم فى رغبة الآخر
فى اظهار مشاعر الطبطبة دى
من عدمها ؟!!




طب انتى قولتى
انا عن نفسى مش هعمل قرد ولا كلب
فى حكم منك
ان اللى يطبطب طبطبة غلط
هيكون هكذا يبدو
والمفروش الاخوة المسيحيين ميصدقوش دا


طب ماذا فعلا لو كان حد
بيواسى
وبيطبطب عن قناعة حقيقة
مش عن تزلف
او عن خوف
او عن تنطيط
او عن محاولة كسب مواقف
او عن رغبة فى تعذيب الذات
والضرب ع القفا عشان الآخر يحبه ؟!!



ماذا لو كان صادق فى مشاعره
وفى قناعاته
وفى طبطباته ؟!!!


ساعتها هيبقى ايه
من وجهة نظرك ؟!!
ويا ترى حكمك عليه
هيكون ايه؟!


انه فى أسوأ الاحوال
قرد بيسلى
او كلب خواف
او غاوى ضرب ع الأقفية


او فى أحسن الاحوال
مغيب
او ساذج
او مبيغرش على دينه كفاية
او بيزعز صلب العقيدة
او انه افلا يعقل ؟!!



وحكمك دا
مش يعتبر ظلم ليه كشخص
لمجرد انه مختلف عنك
ف الأفكار المحددة الواضحة بتاعتك
ومختلف عنك كمان
فى درجة قوة عقيدته
و مختلف فى مفهومه
لمعنى الطبطبة
ودرجتها حسب طبيعته الأنسانية
اللى بتختلف من بنى آدم
للتانى
ولا إيه ؟!!!



جزئية تانية
بس عاوزة اقولها
حكاية خانة الديانة
و الدولة المدنية والحقوق ..الخ الخ
الكلام فيها برضو مستويات
و المتحدثين درجات


هل كل واحد بيقول كلم
ة هترشق
وتبوظ العقيدة وتهزها ؟!

هل كل شخص بيتكلم
الناس هتنسحر بيه
وتمشى وراه و الكيان يتزعزع ؟



سواء مسيحى او مسلم


ليه الاحساس ان كل واحد
بيتكلم هنا او هناك عنده اجندة ومخطط لنخربة دين الآخر
والتسفيه منه


وليه صورة الصليب تثير الغضب
بهذا الشكل فى التوقيت الحرج دا ؟


وليه الهلال الذى يعلوا
قباب المساجد من الف سنة ويزيد
بقى دلوقتى رمز مرفوض
لا يصح ربطه بالأسلام كدلالة
و مطلوب مسحه من الادمغة
لمجرد اقترانه بالصليب فى صورة
بقالها اكتر من 80 سنة
جزء من تاريخ هذاالبلد
ومع ذلك لا مست عقيدة المسلمين
ولا خلت فكرة صلب المسيح تكون حقيقة واقعة عند أى مسلم ...
رغم كل هذه السنوات الطويلة


وليه الاجابة على الأسئلة دى تكون عند نفر واحد
او فريق بعينه
والآخر لا يعتد برأيه
لو لم يكن موافقاً وبيقول حاضر
ه ؟!


إين إحترام رآى الآخررغم انه مختلف عنا ؟!!
واذا كنا نحترم عقيدة الآخر وافكاره رغم اختلافنا معه جذرياً
اما اولى بنا أن نحترم أراء الآخر من نفس عقيتدنا ولو اختلفنا معه برضو وميكونش ف نظرنا قرد او كلب ؟!!



أرجو ميكونش تعليقى
فيه أى حاجة ضايقتك يا صبصب
انتى عارفة غلاوتك عندى
ولو مش عارفة اقول تانى
بجد انتى اختى
وغالية عندى
ولا ألف خلاف ف الرآى .. هيفسد الود
ان شاء الله


بوسيلى العيال
وسلامى للأستاذ رضا الغالى
:)

shimaa elkholy يقول...

يا فاتيما يا حبيبتى انتى مش فاهماني ليه

يا ستى اجيبلك اصحابي المسحيين يحلفولك ان انا طبطبت عليهم وعزيتهم


عارفه يعنى ايه اعمل قرد وكلب ؟؟؟

يعنى ابقى بهلوان باقول اي كلام فارغ عشان ارضي الى قدامي وخلاص

وده اصلا مش هايرضيه ده هايجيب نتيجه عكسيه هايخليه يحس بضعفي وهيافتي وموقفي المهزوز

انا مش باطبطب عليهم ولا باواسيهم تسديد خانه ومن غير نفس

لا ابدا اساسا انا مش محتاجه ده لو مش عايزه اطبطب مش هاطبطب اصلا

وانما انا باقول فى ناحيه محدده هل من ضمن الطبطبه انى اقول على الدين انا كرهت حصة الدين عشان بتفرق بينا ؟؟
وشويه الاقي حد بيقولي لا احنا كلنا بنعبد ربنا يبقى نلغي المساجد والكنايس ونسميها بيوت الله ونعبد ربنا كلنا فى مكان واحد ؟
طب ليه
ليه مسخ الهويه ده ؟؟؟
ما كل واحد يحتتفظ بنفسه بمعتقده بدينه باخلاقه بكتابه بطقوسه

وكل واحد يحترم الطرف الاخر
وكل واحد يعتز بنفسه

كنت دايما اقول للمسحيين المتعصبين فى الكلام

انتم فاكرين انا ازعل لما الاقي واحد مسيحى متمسك بدينه وتعاليم دينه
بالعكس
ده من مصلحتي

من مصلحة المجتمع انه كل واحد فينا يلتزم بتعاليم دينه

كنت باقوله يا اخي نفذ الوصايا العشر وانت تبقى حبيبى مافيش زيك

فهماني ؟؟؟

بصي يا فاتيما
انا من نوع الى باحب اعمل فرق

يعنى ايه
انا راحه اعزي مثلا

اقوم اروح اقعد جمب المصاب فى عزيز لديه اقوله ما تعيطش يا حبيبى انشاله كنت انا ؟؟ ونقعد نعيط جمب بعض وننوح من هنا للصبح
اه انا باتثر وباكون زعلانه على زعله وممكن اعيط معاه وانتى ما تعرفنيش فى العياط لما افتح

انما كمان هاقوم اقف واقوله مش عايز مني حاجه ؟؟
اداويه اطببه اشوف طلبات اهله اساعده فعليا مش كلام

فاهمااااااااني

منوره يا فاتيما واثقه انك مش مختلفه معايا جايز مش فاهمه بس قصدي

غير معرف يقول...

كيف افتح محفظة استثمارية؟
محفظة اسهم مصطلح يشير إلى أحد أنواع المحافظ الاستثمارية، والتي تعني امتلاك الفرد أوراق مالية خاصة به