الثلاثاء، 29 مارس 2011

الليبراليه ..واشياء اخرى

طبعا اكيد اكيد كلنا شايفين دلوقتي الكلام الى بيتقال على الساحه كل كلمه واختها قضيه لواحدها والله وكيل نص الناس مش فاهمه الى بتقوله ولا الى بتسمعه

فبعد ما شوفت اهوال من كلام الناس على الفيس بوك وتعليقات حقا عجيبه ومريبه  اتقالت سواء عندي فى الفيس بوك تعليقا على فيديو اهبل لواحد اقل ما يقال عنه انه متخلف (اه بقى انا باشتمه انا حره ياعم )...او تعليقات بقى مرميه فى كل مكان فانا حبيت فى البوست ده ان شاء الله اتكلم عن الليبراليه بالمختصر المفيد
وبالتفسير الى اتمنى يكون سهل والناس تقدر تفهمه


الليبراليه : كمعنى لغوي مشتقه من من كلمة liber   والى بتعنى باللاتينيه حر ... من هنا جت تسميتها بليبراليه او حريه

طيب يعنى ايه بقى الليبراليه كمنهج ...خلينا نعتبرها اولا منهج فكري وبعد كده نطبقها بقى المجالات المختلفه(سياسيه اقتصاديه معتقديه )

الليبراليه كفكر هى بتقول ان هناك حريه مطلقه ...مطلقه من وجهة نظري يعنى من كل النواحي وعلى كافة الاشكال

طيب ماشي الكلام ده لكن على ارض الواقع مافيش حريه مطلقه طبعا !!! دى حاجه مستحيله اصلا ان يكون فى بنى ادم فى الدنيا او كيان سياسي او اجتماعي او غيره عنده حريه مطلقه تماما

امال ايه ؟
انت خدت حريتك ؟؟ انت دلوقتي حر تقدر تختار مصيرك ..تقدر تقول رايك ..تقدر تعيش زي ما تحب ...اه

طيب تعالى بقى  انت لازم تعرف ان حريتك تنتهي عند حرية الاخرين
وحرية الوطن جزء من حريتنا ... وحريتك مقيده بانضمامك لاي مؤسسه  او دوله اول كيان

بمعنى لو كنت مثلا جنسيتك امريكى فانت بانتمائك للكيان الامريكى عليك واجبات ولك حقوق ...(تلزمك بها قوانين الكيان كما تضمن حقوقك فيها نفس القوانين )

ولو كنت مسلما فعليك واجبات ولك حقوق

ولو كنت زوج  ولو كنت تعمل فى المنصب الفلاني ولو كنت ولو كنت الف قيد مضروب حوالينا

عايز تتحرر من القيود تماما خالص بتاتا البته ؟؟ اه ماشي حوش بقى واشتريلك جزيره كده فى وسط البحر مترين فى مترين حتى واقعد هناك بقى خليك براحتك  على الاخر لا يمكن ان يقيدك ساعتها غير قيودك الفكريه ومعتنقاتك الدينيه مثلا(تبقى رقيب نفسك يعنى )  وما الى ذلك..

يعنى برضه ممكن تبقى لوحدك وعندك قيود على حريتك ؟؟  ااااااه طبعا

والقيود مش لازم تكون اذلال او كبت حريه او غيره وانما هى نظام  نخضع له لمصلحتنا الفرديه احيانا  او لمصلحة كيان اكبر احنا بننتمي له

بمعنى قد تكون مصلحتك الشخصيه ومصلحة فلا ن وفلان وفلان ..اننا نمشي على نظام معين يكفل لنا تحقيق هدف معين يصب فى مصلحه عامه للمجتمع مثلا او للكيان الى بننتمى له

او كما يقول مفكرون الليبراليه :

أن مصلحه المجتمع ككل تتحقق حتما من خلال عمل كل فرد فيه على تحقيق مصلحته الخاصة...

ايا يكن عشان انا صدعتكم

فى رايي ان الليبراليه فى مجملها او فى اصلها هى الحريه او التحرر ..... ولكن هى لها مناهج كتير اوي تلاقي فى ليبراليه كلاسكيه وتلاقي منها عصري وتلاقي منها مطوره ومنها ذات مباديء اشتراكيه وهكذا

بمعنى ان الواحد لما يجيب بدله ويلاقيها مش مقاسه ..فياخدها يقيفها على مقاسه ..تظل هى بدله برضه لا تتحول الى فستان وانما بدله على مقاسه

كذلك الليبراليه او اي منهج تاني عشان تطبقه  لازم يكون له طابع خاص يتلائم ومحل تطبيقه ...

حتى الدين الاسلامي لو خدنا الموضوع بفكره شامله وبدون تحيز الفكر المنهج الدينى الاسلامي فى حد ذاته من وجهة نظري وناس كتير يتفقوا معايا فى ذلك وحتى غير مسلمين ..فكر عظيم جدا ومتكامل الى حد بعيد وتطبيقه ممكن ببساطه وسهوله كمان

لكن للاسف الشديد فى تجارب كتيره قدامنا حصلت ظاهرها تطبيق الشريعه الاسلاميه او المنهج الاسلامي ولكن فشلت وفى رايي فشلت لسوء التطبيق ولتفصيل المنهج على مزاج واهواء واتجاهات مطبقيه ومش طبعا لقصور المنهج لا سمح الله

والحقيقه انا مهما تفرقت الاتجاهات والتيارات والجماعات لا ارى دين اسلامي الى في كتاب الله وسنة نبيه ...وليا عنين ومخ اعرف اميزهم واتدبرهم ...وباقي من تشعب بعد ذلك الله اعلم بما هم عليه بقى من صح او خطأ (ده راي شخصي بحت )

نرجع لموضوعنا ان قد يكون الفكر او المنهج فى اساسه حميد ولكن تطبيقاته المختلفه غير حميده بالمره وتبقى دائما مقولة  نيلى الخالده فى فوازي رمضان (النظريه صح والتطبيق غلط )

وعليه ارجوكم قبل مهاجمة فكره معينه او منهج او شخص او اي حاجه تحبوا تهاجموها انشاله صباع رجلكم الصغير ..اعطيهم من وقتك نص ساعه قرايه تفهم ايه الموضوع من اكتر من مصدر ارجوكم يا جماعه  خلينا نتغير ارجوكم وبلاش العلم البؤيئي والمهاجمه الغير مبرره والانسياق ببساطه ورا كل واحد يزعق ويجعر ويجعجع بكلمتين فارغين

وصدقونى انا لا عايزه الى يحكم مصر يطلع يقول انا ليبرالي ولا اسلامي ولا مسيحى ولا اي اتجاه معين من الاتجاهات
انا عايزه الى يحكم مصر يطلع يقول انا مصري ...انتمائي الاول مصري....ولائي الاول لوطني ..مصلحة وطني وشعبه فقط

عايزه رئيس جمهورية مصر العربيه  يكون بيمثل الاغلبيه الساحقه فى مصر ...الى هما مين ؟؟ الى عارف يرفع ايده  ميييييييييييييين..

الى هما ناس مصريين مالهومش اي انتماءات فكريه او معتقديه او سياسيه  ..ناس متدينين اه لكن مش متعصبين ...

غالبيه عظمى مسلمين ايوووه ...مسلمين بس مسلمين بلا اله الا الله محمد رسول الله ...وكتاب الله وسنة نبيه ..لا هما اخوان ولا هما سلف ولا جهاد ولا اي حاجه من دول

اه الناس دي موجوده .. وقد يكون بعضهم عدده كبير ...ولكن رغم انف الجميع تظل الغالبيه العظمي مش اي حد من دول
 وان شاء الله هاتفضل كده عشان هى دي فطرة وطبيعة الشعب المصري

ومصر دوله اسلاميه بشعبها غصب عن التخين فى الدنيا دي كلها ...بالماده التانيه او من غيرها ... افهموا بقى

كان فى حاجات وتعريفات تانيه كتير عايزه اتكلم عنها بس كفايه كده النهارده ونكمل المره الجايه ان شاء الله ان كان في عمر



هناك 18 تعليقًا:

Alaasalim2 يقول...

موضوع جميل بجد وشامل وياريت كل الناس تقراه وتفهمه

shimaa elkholy يقول...

شكرا ربنا يخليك يافندم

جنّي يقول...

السلام عليكم

جميل يا ام مريم .. زي ما قلتي كلام بسيط وسهل ومش مكلكع ..


اتفق معك في اشياء واختلف في اخرى ..

والخلاصةوبما انك مسلمة مصرية عربية حرة .. فما ذكرتيه من محاسن الليبرالية موجود واكثر في الاسلام .. اما مساوئها فينهانا عنها الاسلام .. اما الضوابط ( او ما يعرف بالنسبي ) في الليبرالية فهي محدودة والمطلق فيها كثير جدا يتعدى حدود الاخلاق ..
وتخوفك مممن سيطبق الاسلام له حظ بسبب بعض التجارب المحدودة في السودان وافغانستان وهي تجارب بالفعل فاشلة اما ايران فلها مرجعيتها ( ولاية الفقيه ) والدولة الدينية التي تحكم بالحق الالهي لا توجد في الاسلام .. اذا امامنا تجربة غاية في الروعة والاتقان يغفل عنها الجميع وهي التجربة التركية والتي طبقها ممن يعتقدون بالمنهج الوسطي للاخوان المسلمون ..
وانتي كما عرفتي نفسك اول ما قلتي انك مسلمة ثم مصرية فهويتنا الاساسية هي اسلامنا ثم ياتي الوطن .. فمن كان ولائه لدينه سيكون بالتبعية ولائه للوطن ,,
اما وقد ارتضينا حرية الرأي وتكافؤ الفرص والتي يكفلها لنا الاسلام فكما قلتي تحكمنا الاغلبية الساحقة بس يا ريت نجد ال45 مليون في الانتخابات القادمة ان شاء الله ونرضى بما يختارونه ..
والاخوان تنظيم ومنهج وفكرة ولهم الحق ان يحكمونا مثل الوفد والغد والجبهة بعكس السلفيين اصحاب منهج فقط .. والناس البسيطة تختار من ينظم لها ..
انا صدعتك معلش .. لكن مهم نتحاور بدون افساد الود حتى نصل لنقطة التقاء

ودي التدوينة التي كتبتها بعدما حذفت فيديو ساويرس .. المهم نحافظ على ثورتنا :

بسم الله الرحمن الرحيم


أحبتي : تعالوا إلى كلمة سواء ...


يا شباب وشابات الثورة المباركة البيضاء ..
يامن صنعتم تاريخ مصر الجديدة ..
يا من ألهمتم العالم وصناديد الديمقراطية ..
يا من أسقطتم الطاغية ..
يا من أسقطتم الظلم والاستبداد ..
يا من رفعتم رؤوسنا في العلا ..
يا من تصديتم لأعداء الثورة من أصحاب البغل والجمل بصدوركم العارية ..
يا من اتحدتم وقت الشدة مسلم ومسيحي وإخواني وسلفي واشتراكي وليبرالي وعلماني ..
الآن تتشرذمون وتتراشقون ..
الآن تتبادلون السباب واللعنات ..
الآن تتصيدون الأخطاء ..
أسعدتم أعداء الثورة بعدما نفذتم خطتهم للقضاء عليكم ..
ونشرتم فديوهاتهم المشبوهة ..
وتناقلتم شائعاتهم الجهنمية ..
أيها العقلاء مزيد من التعقل ..
مزيد من الاتحاد والقوة ..
مزيد من الهدوء ..
مزيد من الحب ..
مزيد من التآلف ..
مزيد من الإيثار ..
وامنعوا الفرقة ..
امنعوا العصبية ..
امنعوا حب الذات ..
امنعوا الكراهية ..
امنعوا الجهل أن يسود بينكم ..

كلمات من نور يقول...

والله الإسلام لما كان دين وسطي لا غلو فيه ملكنا مشارق الأرض ومغاربها دينا وعلما

Unknown يقول...

السلام عليكم
طيب تعريف اليبرالية هو التحرر من القيود السلطوية الثلاث ( اللي انتي ذكرتيها ) السياسية والاقتصادية والثقافية , ومعلوم ان ثقافة الشرق دينية بحته اي التحرر من الموروث الثقافي وبالتالي التحرري من الموروث الديني ,ده التعريف , حنقول نحط ضوابط . مين حيحط الضوابط وحد تكبيل الليبرالية حيكون لمين بحيث انه يجبلنا ليبرالية مصرية


اسف للاطالة ولكن سؤالي : اذا كنا فعلا نؤمن ان الاسلام دين الله الكامل الذي لا ينقصه شىء فلماذا لا نبحث فيه عن حلول وعندما لانجد يكون من حقنا البحث عما سواه , فاذا قلنا ان النماذج المطروحة سيئة ولا تمثل الفهم الصحيح للاسلام فلماذا لا نسعى الى تقويمها وتصحيح مسارها او انشاء اخرى تقوم على الاسلام الصحيح كما نراه بدلا من استيراد نموذج مختلف تماما ونحاول توفيقه مع اوضاعنا

تحياتي

sony2000 يقول...

صحيح

ومعاكي
http://sony2000-sony2000em.blogspot.com/2011/03/blog-post_31.html?showComment=1301526206701#c280027068705387348

shimaa elkholy يقول...

جني
الاول باعتذر عن تاخر ردي انا من كام يوم رديت رد طويييل وحصلت مشكله تقريبا وما اتنشرش ولا ايه
المهم
انا مسلمه طبعا اعتز باسلامي بل اعزنى الله بالاسلام الحمد لله

بالنسبه لليبراليه فانايا فندم ما قلتش الليبراليه عيوبها كذا وكذا واحنا نطبقها ونتلافاها

لا وانما قلت ان الليبراليه فى حد ذاتها مبدأ الحريه نظريه صحيحه ولكن ليس كل من طبقها بالضروره يكون طبقها صح
واعطيت مثال على ان الاسلام نفسه والذى اعتبره انه منهج متكامل غير منكوص ابدا هو نفسه كمنهج صحيح لا شك عندي وانما حين تم تطبيقه من قبل اشخاص معينين فشل لانهم فى رايي طبقوه بشكل خاطيء وليس كمان يجب ان يكون

كذلك المباديء الليبراليه فى حد ذاتها جميله مالناش دعوه بقى الى طبقها غلط ووصل لنتيجه لا نبغاها مش موضوعنا فيه

مش هاشرح فلسفة الحريات تاني والقيود الى بتضرب عليها عشان اتكلمت عنها فى البوست

اما بالنسبه للتجربه التركيه فى الحقيقه مش عارفه حضرتك بتدي تركيا مثال على اي اساس فى حدود معلوماتي يا فندم ان اصلا اصلا تركيا دوله ليبراليه!!! مش فاهمه حضرتك بتدي مثال على ايه هنا

وبالنسبه لحكاية المنهج الوسطي للاخوان المسلمون !!!!
حضرتك زرت تركيا يا فندم ؟؟؟
طيب الايام دي التاشيرات مفتوحه تذكرتين كده فى شهر سته الجاي واسبوع كده صيف هناك
تعالى احكيلى شوفت ايه

يا فندم اي وسطيه اسلاميه تبيح الدعاره وتقننها ؟؟؟!!!
فى رايي ان الاخوان المسلمون فى تركيا رضخوا الحقيقه للوصول للحكم
ويكون فى علم حضرتك الاخوان عندنا واخدين نفس الاتجاه
والى باعتبره انا اتجاه مشين

اه وعلى فكره ليس من حق الاخوان ولا غيرهم يحكومنا يا فندم لانهم لحد الان لا يمثلوا الاغلبيه وانما اغلبية الشعب المصري لا ينتمى لاحزاب ولا لجماعات سياسيه او فكريه بالتالي كلهم لا يعبروا عنا
والذي فقط من حقه ان يحكمنا هو من نختاره بصندوق الانتخابات بحريه دون تدليس من اي نوع حتى لو كان تدليس الفكر
تحياتي يا فندم ونورت

shimaa elkholy يقول...

كلمات من نور

الاسلام كان دائما وسيكون ابدا دين العدل والوسطيه
المشكله فى المطبقين مش فى المنهج

نورتي يا قمر

shimaa elkholy يقول...

واحد من الناس

ياريت حضرتك تقرا البوست تاني معلش

وكمان انا قلت ان الليبراليه بتتكلم عن تحرر مطلق فى الاساس
وبعد ما يحصل التحرر ده يبدا كل فرد بمحض ارادته يدخل فى المنظومه الى هو يختارها والى بدورها هاتكفله حقوق وتفرض عليها واجبات

وتاني باقولكم انا مش باقنعكم بالليبراليه من دون الاسلام ولكن عايزه افهمكم ان مهاجمتكم ليس لها ادنى سبب
وما نخليش حد يستغلنا ويقول فلان ده ليبرالي كافر ؟!؟!؟!؟!

shimaa elkholy يقول...

سوني
اوك يا جميل هاروح اشوف

Unknown يقول...

http://islam-nogodbutallah.blogspot.com/2010/12/2_24.html
http://islam-nogodbutallah.blogspot.com/2010/12/3_24.html

هذا تعريفي المفصل لليبرالية , والعيب ليس في من يتلقون الليبرالية خطأ بسبب خطأ دعاتها , العيب هو فيمن يدعي التفتح وقبول الاخر وهو يؤمن تماما بمبدأ لا حرية لعداء الحرية ومن هنا يبدأ الصراع الخفي اكثر الاحيان والعلني احيانا .

نتشرف بتعليقكم على الموضوع

ELMASRYA - SHAMLOOLA HANEM يقول...

إنتي جميله خالص

أنا سعيده جدا بالتعرف على مدوناتك

واستفدت فعلا من شرحك لليبراليه

ومعاكي في ان مصر دوله مسلمه غصب عن عين التخين

في انتظار كل جديد تكتبينه

خالص تحياتي

shimaa elkholy يقول...

واحد من الناس
تمام روحت وقريت وعلقت
وما زلت مختلفه معا فى طريقة تعريف الليبراليه

shimaa elkholy يقول...

شملوله

ايه ده يا بنتى انتى فين
والله جيت سالت عليكى على المدونه

اهلا بكي يا قمر ومتشكره على كلامك الجملي

نورتي

Unknown يقول...

الاخت الكريمة
ده مش تعريفي , ده تعريف الليبرالية على الويكيبيديا



وهذا عن مقالك من باب التناصح ليس الا


* تعريف شومان لليبرالية طبعا غير صحيح ولا يمت لتعريفها بصلة , لكن سبه بانه اهبل ومتخلف وقرن ذلك بالحرية ؟!!!! على قدر علمي البسيط ان حريتك تنتهي عند حرية الاخرين ( اعتذر اعتذارا صريحا عما قاله عن د. البرادعي ) , اما من حيث الاسلام الذي تنتسبين اليه فالمسلم ليس بطعان ولا لعان ولا فاحش ولا بذىء حتى لو اخطأ الاخرون.

* انتماء المسلم الاول هو الاسلام وليس شيئا اخر ورغم ان تعارض الانتماء الديني والوطني هو مسالة نظرية بحته لا تكاد تحصل في الواقع الا انه ايضا نظريا يجب تخيل في حالة التعارض لمن تكون الغلبة لله ودينه ام لغيره



وفي النهاية يقول الله
فان تنازعتم في شىء فردوه الى الله والرسول ان كنتم تؤمنون بالله واليوم الاخر ذلك خير واحسن تأويلا


ولا نرجع في التنازع لاي شيء اخر , اظننا متفقان على المبدأ , فاذا اتفقنا فرجائي هو الدعوة الى تصليح مسار الاسلاميين وردهم الى الحق حتى ننعم جميعا بدفء الحياة تحت نظام اسلامي

فشكووول يقول...

السلام عليكم ندى اياسمين
تحياتى
انا ليبرالى واعتبر الليبراليه كنظام احسن نظام للحكم والحياه
بس اللى حاصل عندنا اننا بقينا ليبرالبيين خالص شحط محط لدرجة اننا من كتر الليبراليه اللى عندنا اصبح فيه مشكله فى الدوله .. انا عاجبنى لحد يوم 11 فبراير .. لكن بعد كدا مخى حيطق خلاص
تحياتى

الازهرى يقول...

امممممممممم
الموضوع كبير كبير كبير

دماغى ولعت اكتر ما هى مولعة
بقت ولا مبنى الحزب يوم 28 يناير

ما علينا فى انتظار باقى المصطلحات

nona elsha3nona يقول...

بجد تسلم ايديكى وذوقك فعلا طريقه بسيطه واسلوب رائع ودلوقتى بقى انا كمان بضم صوتى لصوتك على الفيديو بتاع الراجل الاهبل وكمان اقدر اقولك انتى شخصيا يا صديقتى الهبل كتير وانا لسه حاسه اننا ياما هنتفرج كتير على هبل اكتر وربنا يخرجنا من الازمة دى على خير يبقى مقوله واحده فقط عايزة اقولهالك انت شخصيا على الموضوع الجميل ده
لا فض فوك ومات حاسدوك (قديمه قوى صح هههههههه بس انا بحب اقولها)