الثلاثاء، 3 مايو 2011

ضباط لكن شرفاء

السلام عليكم يا اصدقائي الى واحشنى

انا زعلانه اوي بجد انى ما عدتش باكتب زي الاول بس لا ولن ايأس وهارجع ان شاء الله اكتب تاني كتير وارغي واكل ودانكم

المهم النهارده عايزه اعرفكم على  مجموعة ناس محترمين جدا شرفاء ناس عايزين من عينتهم كده شويه فى كل مصلحه وكل وزاره وكل مجال فى مصر

الناس دول هما حركة ضباط لكن شرفاء

وهما مجموعه من ظباط الشرطه الشرفاء ... الحركه بدأها واسسها المقدم محمد عبد الرحمن يوسف 

واهداف الحركه دي بكل بساطه وفى كلمتين  انهم كظباط شرطه وكل واحد فيهم فى مكانه بيجمعوا مستندات وادله تدين الظباط الفاسدين الى فى جهاز الشرطه وبيقدموها للنائب العام واجهزة التحقيق  للتخلص من العناصر دي وتظهير جهاز الشرطه

وكانوا ايام الثوره لهم فضل فى فضح كل جرائم نظام العادلي من داخله 

طيب انا بارغي فى المرغي ليه ؟؟؟

عشان اعرفكم جميعا بالحركه اولا ... وعشان انا املي يكون فى زي الحركه دي فى كل مكان فى مصر وفى اجهزة مصر كلها

القضاء   الصحافه   الجيش   الاعلام    الاثار  التعليم  الصحه   والوزارات كلها عموما

حملة نضافه لكل حته فيكى يا مصر

حركة ضباط لكن شرفاء...... ياريت تزوروا الجروب بتاعهم على الفيس بوك وتشوفوا بيقولوا ايه .... وطبعا الى عنده معلومه او مستند يقدر يساعد بيه ممكن يتواصل مع المقدم محمد عبد الرحمن ويشوف ايه الموضوع

والحركه من ضمن الجهات المدعوه لحضور المجلس الوطني  والى برضه عايزاكم تبصوا على الموقع بتاعه لان  انا شايفه انه محطه مهمه اوي لتجميع كل فئات المجتمع السياسي الى افرزتها الثوره تحت لواء واحد

فى النهايه هاسيبكم مع شوية فيديوهات فى تعريفات ومعلومات عن ضباط لكن شرفاء

ده فيديو تعريف بالحركه



والفديوهين دول ردا من المقدم محمد على وزير الداخليه الحالي والى اعتمد فى حكمه على المقدم محمد من خلال النظر فى الملف الذي صنعه العادلي وتلامذته



هناك 11 تعليقًا:

Mahmoud Ahmed يقول...

منوره مدونتك و مكانك

و شكرا على الجروب

ومهنه الشرطه زي اي مهنه فيها الكويس و فيها الوحش ، فيها المحترم و فيها الى مش محترم

بس قبل 25 يناير كنا وصلنا لمحرله كبيره قوي من عدم الاحترام لأفراد الشرطه
لدرجه ان الناس المحترمه بقت حالات شاذه

shimaa elkholy يقول...

سبايدر

ربنا يخليك منوره بك

الحقيق انا كنت فقدت الامل كمان انى الاقي حالات شاذه والله

الحمد لله ونتمنى فعلا يتم التطهير وترجع الشرطه نضيفه

كلمات من نور يقول...

لايك لايك وتم النشر علشان بجد احنا نفسنا نسمع عن ضباط شرفاء وناس شرفاء في مصر بعد ما اخدوا يشوهوا صورة كل مصري في كل مكان ...تسلمي يا ياسمينه

غير معرف يقول...

إنت مش شرفتي ونورتي تويتر .... إنسي إنك تكتبي في المدونه زي الأول أصلا ..

تويتر ده وكما قال الحكماء فيه .... بيحرق الأفكار :)

عموما بوست تعريفي كويس ... والجروب ده انا مشتركه فيه اعتقد ... ولو مش لقيتني مشتركه هشترك :) :)

تحياتي

غير معرف يقول...

الميه تكدب الغطاس

ما بناكلش من الكلام ده

نشوف أفعال قويه ومحدده

وبعد كدا نشوف

شرفاء ولا مش

shimaa elkholy يقول...

كلمات من نور

تسلمى يا جميل وفعلا احنا محتاجين شرفاء فى كل مكان مش فى الشرطه بس

shimaa elkholy يقول...

فتاه من الصعيد

اه اسكتي توتر وفيس بوك الاثنين الواحد مش عارف يكتب شكلي هاخاصمهم لانى باحب الكتابه فعلا ومفتقداها

shimaa elkholy يقول...

مصري جدا

هما حقيقى نفذوا عمليه فعلا بنفس الطريقه الى قلتلكم عليها بتجميع مستندات وكده ووقعوا 22 ظابط و2 من القيادات
والحقيقه انا اتعاملت معاهم عن قرب من فتره خصوصا المقدم محمد عبد الرحمن نفسه وحاسه بصدقهم واخلاصهم

والله اعلم وربنا يوفقهم ويجعل فيهم الخير

sony2000 يقول...

ربنا مع الحق

يارب
ويتصرنا وينصرهم
اللهم امين

غير معرف يقول...

ثقافة الهزيمة .. العتبة الخضراء

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

غير معرف يقول...

ضباط لكن فاسدين
هذا هو حقيقة هؤلاء الحفنة مما يسمة إئتلاف ضباط لكن شرفاء ومن لايصدق يبحث فى ملف هؤلاء