الأربعاء، 24 أغسطس، 2011

حديث مع الكنبه ( الجزء الاول)



اه حديث مع الكنبه عادي 
  
قلتلها مالك يا كنبنب قاعده متقريفه ... قالتلى والله يا اختي نفسي تخفوا الاكل شويه عشان بتفطسوني وانتم قاعدين فوقي

قلتلها اخس عليكى كنبه قليلة الاصل امال احنا جايبينك ليه  وروحت مكوعه عليها ومدياها نوم وتفطيس بقى  نيهاهاهاها

لا لا مش هو ده الكلام  طبعا

الحقيقه الحديث كان مع احد اعضاء حزب الكنبه المشهور  فى الايام الراهنه ( حلوه الراهنه ؟)

المهم  انا هاقول الحديث كما دار بينى وبيها دون اي اضافات  المسحوق بس

طبعا احنا اتخانقنا كتير من اول الثوره لحد دلوقتي ومن قبل الثوره والله. بس هى صاحبتى وحبيبتى  بس يا حبة عين امها ضحيه من ضحايا مبارك الله يحرقه

يعنى هى عارفه موقفي وانا عارفه موقفها بالتالي اول لما خلصنا فطار واتتمنا اكل المكرونه والمحشي والفراخ والكفته انتقلنا الى مائدة الحوار السياسي وهاتك يا خناق

هى يا حبة عين امها بس قالت . هأ الثوره .. عملت ايه الثوره .. وبصتلي وهى عارفه الى هايجرالها   واضافت :منكوا لله

أنا : اه طبعا مننا لله ... تصدقي انت يا بت والى زيك فعلا خساره فيكم الثوره  ..بس يلا اديكم اخواتنا يعنى

الكنبه : بلا نيله والنبى كان ماله مبارك عمل ايه مبارك عشان تعملوا فيه كده .. تعرفى تقوليلى عمل فيكى ايه مبارك ؟

أنا بهدوء ما يسبق العاصفه :  ليه هو ما عملش فيكى حاجه وحشه خالص ؟

الكنبه : لا طبعا بالعكس .. انا ما شوفتش منه اي حاجه وحشه ... كفايه الاستقرار .

أنا بنفس البرود : ام الاستقرار ... انتى خريجة ايه يا زفته  ؟

الكنبه : هندسه كهرباء

أنا : وكنتى بتاخدي هندسه كهربا بقى عشان تدرسي فى مدرسة ثانوي فنى ؟

الكنبه : بينى وبينك انا كنت فى الاول مضايقه بس دلوقتي مستريحه وباقول خير برضه

أنا : انتى بتاخدي كام يا حاجه ؟

الكنبه : 700 جنيه حلوين اوي ومبسوطه على كده

أنا : 700 جنيه بعد عشر سنين شغل ؟؟؟  طيب ماشي انتى شخصيا مش مضايقه من مبارك بس انا يا ستى مضايقه انا حره بقى .

الكنبه : ماشي ليه بقى انتى مضايقه منه ليه عمل ايه مش كفايه الاستقرار والامان ؟؟

أنا  والعاصفه بتزمجر جوايااااا:  ام الاستقرار فى الارض يا شيخه  ..هانستقر على حساب كرامتنا ؟؟ هناكل اللقمه متغمسه ذل ؟ لييييييه هى كانت بلد ابوهم ؟؟
الكنبه : اااااااااه نفس الكلمه  الى قاله حمزاوي .. اللقمه متغمسه ذل ..

أنا : يا ستى ما سمعتوش بس يعنى هو حمزاوي ده ايه ؟ تهمه ؟

يا بنتى بالله عليكى انتى مبسوطه بحال البلد  ايام مبارك ؟؟؟ ده مافيش حاجه واحده بس لما تبصي حواليكى فى الشارع تلاقيها صح
وانفجرت بقىىىىىىى
قلتلها انا عايزه حقوقي .. الراجل ده واخد حقوقي

الكنبه : قصدك السرقه يعنى ؟ ما حدش اثبت عليه حاجه  ايه يعنى لما يكون عنده قصر ولا بتاع

ردت عضوه تانيه فى نفس  الحزب : ده بواب العماره  الى جمبنا عنده بيت فى بلدهم وشاري شقه فى نفس العماره الى هو بواب عليها

انا : وانتى شايفه ان ده وضع صح ؟؟؟  شايفه ان مفروض بواب العماره يكون عنده املاك وشقه فى العماره الى هو حارس عليها .. وسكان العماره الى هما ناس يفترض انهم مرموقين فى المجتمع بالعافيه بيكملوا الشهر ؟؟ هى دي مش اوضاع مقلوبه  الحكومه هى السبب فيها ؟؟؟

الكنبه 2 : قالت ايوه .. بس يعنى ما كل الناس عندها بيوت  اشمعن هو الى بتعدوا عليه انه يكون  عنده قصر ده برضه رئييييييييس جمهوريه  يعنى

انا : يا ستى يبقى عندى عشرين قصر بس من ماله مش من مالي انا !!!!   وبعدين ايه رئييييييييس جمهوريه دي ؟؟  مواطن زي زيه انا وكل المصريين بنديله اجر عشان يدير البلد دي لصالحنا مش بلد ابوه هى ... يا بنتي الراجل ده مجوع الشعب ومطلع فلوسهم بره البلد وناهبهم ومافيش اي خدمات بتتقدم لهم
ده عميل ماجور علينا والله

كنبه1: باقولك ايه ما تقوليش بقى عميل وبتاع حرام عليك كده
 انا ورفيقتى فى الكفاح صديقتنا الرابعه فى القاعده دي  : فى نفس واحد ما تقولي اسفين يا ريس احسن
كنبه 1 وهى ميته من الضحك: اه والله انا باحبه فعلا وباقوله اسفين ياريس
مش عايزه اقولكم احنا الاثنين بقدرة قادر كنا راكبين فوقيها والبت كانت بتطلع فى الروح والله
وتستنجد بجوزها يا اخويا ولا سال عنها تقريبا ما صدق يخلص منها  مع انه من المعارضين لفكر

وقلتلها بذمتك ودينك يا مؤمنه انتى عايشه معانا فى البلد دي ؟

روحتي مستشفى عام قبل كده ؟؟؟؟

الكنبه 1: ايوه روحت مره بابنى مستشفى الاطفال ( انضف مستشفى حكومي فيكى يا منصوره بعد مستشفى الكلى )
وطبعا كانت راحه تعمل عمليه ومتفقه مع دكتور ودخلت بسهوله

أنا :  انا دخلت المستشفى دي اكتر من مره لما كنت عامله حملات تبرع بالدم ليهم وشوفت الناس واقفه على بابها متبهدلين اخر بهدله والناس بتعامل الغلابه اسوأ معامله .. انا طبعا دخلت بمجرد ذكر اسم نائب مدير المستشفى الى كنت واخده منه معاد ... انما الست الى واقفه ومعاها طفل فى ايده كانيولا وشكلها هى وهو فى هزال تام .. قالها مافيش انتظار جوه

المرضى دول ذنبهم فى رقبة مين ؟؟؟ الجواعى؟؟ العرايا ؟؟ المشردين ؟؟  العاطلين ؟

الكنبه 1:  وهو ده ذنبه ؟؟ ده ذنب الى معاه هما الى كانوا كده وبعدين احنا كتير ومواردنا قليله

انا وانا باصوت خلاص : ما تقوليش مواردنا قليله  احنا بنتنهب ليلا نهارا  ومافيش بلد عندها كل الى عندنا وحالها كده
عندنا زراعه اهملت وباظت .. عندنا مواد خام مسروقه .. عندنا مصانع اجهز عليها عشان ما تشتغلش ... عندنا مايه ... عندنا ثروه بشريه ... عندنا موقع جغرافي... اهميه سياسيه وسياحيه ودينيه  ... عندنا مساحه واسعه  وتنوع مناخي وتضاريسي ... مافيش اي حاجه من الحاجات دي مستغله .. العيب عيب اداره

الكنبه 1: طيب العيب عيب اداره يبقى ده مش عيبه هو عيب المديرين

انا وجالي خلاص انهيار عصبي : انتى يا بت حماره ؟ ما هو الكوتش هو مدير كل المديرين الطم منك ؟

الكنبه 2 : برضه هو عمل كتير يعنى هى البلد كانت كده من 30 سنه ؟

أنا وقاربت على الانتحار : لا كانت احسن من كده ... ايوه بالنسبه لقرنائها كانت احسن من كده بصوا حواليكم شوفوا احنا فين والى حوالينا فين

شوفوا حتى العرب الى كنا بنقول غرقانين فى التخلف .. بقوا انضف مننا ... ده انا اخر مره فتحت الجوجال ايرث وروحت ازور المكان الى كنت عايشه فى ابو ظبي من 8 سنين اتحسرت ... لقيت بلد تانيه غير الى انا كنت فيها

الكنبه: ماشي هما عندهم فلوس وعددهم قليل .. احنا يا ستى كتيييييير

انا : يادي النيله على كتير وهباب ... هى دي سبه ؟ يا بنتى دي مييييييييزه .. احنا نعمه مش نقمه ... الزعيم الصينى قالوله انت مجنون ازاي هاتعمل نهضه عندك وانت عندك ملياااار بؤ عايز ياكل ... قالاهم انا فعلا عندي مليار بؤ ... بس عندي اثنين مليار ايد ... وهو ده الى وقف الصين على رجليها .. ايدين الشعب ..افهموا بقى


الكنبه1: يعنى انتى عايزه تحمليه كل المسؤليه لواحده ؟؟

انا : اينعم هو اولا ... ومن ولاه ثانيا طبعا  ... كل شلة الحراميه دول لازم يتحاسبوا

ردت رفيقتى فى الكفاح  : يعنى يا بنتى هو مش المفروض رئيس الجمهوريه  يقدر انه مثلا لما يلاقي مشكله معينه ولتكن فى شارع من الشوارع يقوم يدي اوامر لوزير النقل انه يعمل هنا كبري مثلا او نفق يحل المشكله ؟؟

الكنبه 1: طب ما هو عمل كتيييييييير .. بس مافيش فايده

انا : ايوه احنا الى شعب ابن كلب مافيش فيه فايده مش عارف يتحكم ... تعرفي تتوكسي ؟؟

ووجهت كلامي للرفيقه الثوريه : قلتلها بالنوسبه لسؤالك .. الاجابه هى لا مش المفروض اصلا ن ده يحصل .مفروض ان يقول لرئيس الوزرا انا بلغني او شوفت مشكله فى المكان الفلاني حلها ... هو بقى يقول لوزيره .. ووزيره يعمل لجنه فنيه تكنوقراط  ويظبط نفسه  بقى

لكن الكلام ده لو احنا فى دوله محترمه ... انما كان ايام حسنى مبارك يا سلللللللم يا سلللللللللللم بس هو يشاور الصبح كانت تتوجد الميزانيات والشغل يشتغل وميه ميه

الكنبه 2( الهادئه جدا ): طب انتى تختاري مين لمرشحين الرئاسه ؟؟؟

ونكمل بقى المره الجايه يا حلوين عشان شكلكم زهقتم :)

هناك 12 تعليقًا:

Timo.. يقول...

طب وليه قطعت يا ندى..
انا كنت محتاج اسمع باقي وجهات النظر اللي هي شكل مصغر من الشارع المصري..

كل سنة انت طيبة :)

ندى الياسمين يقول...

تيمو هاكمل البوست الجاي ان شاء الله اي خدمات

sony2000 يقول...

صوووووتي ياللي منتيش غرمانا

عندي نموووووووووذج زيه بالزبط
بس فعيلتي

وماادراكي ما عيلتي
هبقلي اقلك عليها بعدين:)

مصري جدا يقول...

يا طولة بالك يا صاصا

أنا لو منك أفسحهما

أيون الفسحه الأخيره


بالمناسبه بئا ومن جملة حرء الدم

ممكن والله طريقة عمل الكحك والغريبه والبتي فور والبسكويت

أستني بس

عارف أن ده طلب عادي

الغير عادي بئا

مع بعض

أفهمك ازاي

تاخدي قطمه من نفس القطعه تطلع كحك وتاخدي قطمه تانيه من نفس القطعه تطلع بتي فور وهكذا

ورينا بئا ستات البيوت

هع هع هع

والله مراتي دي ليها الجنه

حياتها معايا كلها كدا

شمس النهار يقول...

انتي بتعزمي الفلول في بيتك ياصبرني

!!؟؟
احبطتيني

:))))))

ندى الياسمين يقول...

سوني

لا ماهو فى عيلتى فى اسخم من كده يا ابويا ده بينقطوني بس لا ما عندناش اسف ياريس ولا فلول

بس عندنا كنب كتير كتير كتير

واخوااااان وناصريين وبالنوسبه لابويا هو اكبر متشائم شوفته فى حياتي بالنسبه للثوره يعنى ههههههههههه

ندى الياسمين يقول...

مصري جدا

لا لا ده طلب سهل خاااااااالص

ادينى بس تليفون المدام وانا هاقولها تعملي ايه
نيهاهاهاهاههاها

ندى الياسمين يقول...

شموسه

ههههههههههه لا وحياتك ما عزمتهمش ده تجمع سنوي لاصدقاء رضا الانتيم وزوجاتهم الى هما اصبحوا اصحابي جدا
بس احنا بنعمل ديش بارتي وكل سنه فى بيت حد فينا وكنا عند كنبه 2 السنه دي

بس ظبطهم هاتشوفي لسه الجزء التاني

قلم رصاص يقول...

النموذج دا منتشر جدا في البلد
العيب عندك.. انتوا ليه ماتكلمتوش في الطبيخ اريح :)

ثم عجبني كام حاجة كدا
زي مثلا..... تنوع تضاريسي دي :)

خلاصة البوست انا فهمت انكوا كنت طابخين (المكرونه والمحشي والفراخ والكفته )
عرفنا ياستي .. لازمة اللفه دي ايه كلها ههههههههههههه

لا بجد البوست تحفه، بسيط جدا لكن بيعبر عن حالة تسود المجتمع المصري بطول وعرض البلاد

كل سنه وانتوا طيبين ام مريم

:)

فشكووول يقول...

السلام عليكم ندى الياسمين
تحياتى
الكلام ده عشان يتعلق عليه عايز بوست كامل والله العظيم
عارفه يا ندى المشكله ايه .. ان احنا ما زلنا عندنا ثقافه متجذره بعبادة الحكام زى عبادةالآلهه تماما .. عارفه الناس الهمج اللى جايين من الكويت عشان يدافعوا عن مبارك ويردوا الجميل .. هما عندهم الثقافه الابويه والآلهيه للحكام يعنى هو مبارك عمل ايه .. هو او ابنه او ابنه سال دمهم على رمال الكويت .. الشعب المصرى هو الى سال دمه فى صحراء الكويت كان رد الجميل للشعب المصرى مش لمبارك لان هو اللى دفع ثمن تحرير بلادهم وهو اللى خلاهم يرجعوا ولو لم يتدخل الجيش المصرى بالذات فى الكويت لما تحررت الكويت من الحكم الصدامى ولما حدثت احداث 2003 وكان زمانهم دى الوقت بيشحتوا من هنا ومن هناك

وبعدين هو عنده كذا قصر ولا ما عندوش .. احنا مالنا .. هو يرجع لنا القصور بتاعتنا وفلوسنا ويدفع ثمن الشهداء من دمه ودم اولاده .. ولو انى اشك فى هذا .. لكن كفايه بالنسبه لى ان اشوفه فى القفص ذليل خانع بعد ما كان متجبر فى الارض ولو حسبنا مرتبه طول عمره بافتراض انه ما بيصرفش ولا مليم مش حيقدر يشترى شقه على النيل

واكره قصة وجيه اباظله لما اشتكى لمبارك ان ابنه علاء عايز يدخل معاه شركه فى بيجو وبعدين مبارك رد عليه وقال له اعتبره عيل من عيالك ويومها الصبح ما طلعش على الراجل الا وهو هربان من الدنيا كلها وراح على الطرب. وعقبال الغير مبارك لما هو كمان وعياله يروحوا الطرب
تحياتى

ندى الياسمين يقول...

قلم رصاص

متاكد انك مش عينك فى الاكل هههههههههههههه

ندى الياسمين يقول...

استاذ فشكول

ايوه فاكره حكاية اباظه طبعا وبجو

حسبى الله ونعم الوكيل فيهم مصوا دمنا سنين
والحقيقه خساره فيه ادعي عليه يغور فى داهيه يموت

وزي ما حضرتك قلت لازم نغير فكرنا من ناحية الحاكم

على راي جوزي الشعب كان فاكر كل ده ان احنا الى بنشتغل عند الريس مش الريس هو الى بيشتغل عندنا

نورت يا فندم