الثلاثاء، 16 أغسطس، 2011

لا للمحاكمات العسكريه للمدنيين




اكتر حاجه مضايقاني حاليا ان فى رغي كتير وكلام مش منظم وهبل وعجن وتخبيط فى الحلل والمحصله فى النهايه صفر او حتى تحت الصفر بشويه

اه ماهو طول ما في الاف من المدنيين السلميين الثوريين  كمان وهما محبوسين فى السجن العسكري وبيتعذبوا كمان وبيضربوا وبيتهانوا يبقى احنا بننزل تحت الصفر

اسماء محفوظ سواء اختلفت معاها او اتفقت فهى ما حدش يقدر ينكر انها حره  ومن اوائل الناس الى نادوا بالثوره وعرضت نفسها للخطر لما طلعت وكلنا شوفناها قبل كل الرجاله الى بشنبات وقالت انا نازله التحرير

ونزلت فعلا التحرير قبل الثوره بكام يوم وما حدش راح ورجعت قالت انا نزلت لوحدي وهانزل تاني وكان لكلامها تاثير مهم اوي وقتها

بس يظهر ان موقفها الى كل شجاعه ده حسس كتير من الرجاله انهم لبسوا الطرح بالتالي هما دلوقتي بيشتموا فيها ويقولوا احسن تستاهل

والفكره مش اسماء محفوظ وحدها  الفكره هى كل مدنى يتحاكم امام محاكم عسكريه  اصلا

اما بالنسبه لموضوع اشمعن بتتحمقوا على النشطين اقولكم  لان ده حقهم  لانهم كناشطين بيتعرضوا فعلا للخطر اكتر مننا كلنا الى يمكن اغلبنا نايم فى بيتهم من اول الثوره دون عذر غير انه  مانتخ او خايف على نفسه

اه مانتخ وخايف على نفسه ومافيش مانع يقنع نفسه كده بكلمتين حلوين يخلوا شكله حلو قدام نفسه  وهما ان الثوره دي  ولا ثوره ولا يحزنون والثوار دول شوية عيال تعبانه وان كلهم هبل واغبيا ومش عارفين يعملوا ثوره صح وهو طبعا لانه شخص  فظيع لا يمكن يشارك فى الهبل ده ...واووووووووخ نام يا ضميره

النشطين من حقهم علينا اننا نحميهم  ونقف كلنا فى ضهرهم  لانهم مهمين لنا وللمجتمع مش النهارده بس ومش هما بشخصيهم انما بمعنااهم ... لو احنا سبناهم دلوقتي يمكن يياسوا والى بعدهم يخافوا يطلعوا ويقولوا  هانطلع ازاي ولمين وعشان ايه ... انما لو كل واحد عارف انه يوم ما يقول كلمة حق بصوت عالي هانكون وراه  كلمة الحق هاتفضل صوتها عالي

ارجوكم ما تبيعوش بعض ..فى النهايه مش هاتلاقوا حد يقف جمبكم مهما كان اتجاهك او صفتك او دينك اقف جنب المظلوم ..عشان تلاقي حد يقف جنبك

عيب اوي الكلام السخيف الى باسمعه من جميع التيارات سواء اسلاميه او غيرها فى حق النشطين

عيب اوي تنكروا عليهم دورهم فى الثوره حتى لو اخطأوا بعدها  ما حدش ما بيغلطش لكن ما تنكروش عليهم دورهم

كل النشطين ولو حتى ناشطين من منازلهم كان لهم دور فى الثوره  بلاش نعتبرهم رموز او ابطال لكن لازم نحترم دورهم وما ننكروش

فكروا كويس لو كان الى زي اسماء محفوظ ووائل غنيم وغيره وغيره من الشباب الى طلعوا يوم 25 يناير اول ناس  ما طلعوش وخافوا واستخبوا  كان الشعب هايطلع ورا مين ؟؟

ايوه احنا طلعنا وراهم وورا صوتهم وكلمتهم الى سمعناها او قرناها  يمكن ساعدتهم عوامل كتير لكن هما كان عندهم شجاعة البدايه ودي نقطه تحسب لهم

فى النهايه احب اقول ان نفسي بجد يتم الدعوه لمليونيه حقيقيه وياريت تكون بعد رمضان  عشان الناس صايمين ومانتخين دلوقتي
مليونيه ترفع شعار واحد فقط لا للمحاكمات العسكريه للمدنيين

والدعوه تكون لكل المصريين ولكل البنى ادمين على ارض مصر  على كافة طوائفهم وافكارهم وديانتهم  واحزابهم
الى موافق على عنوان المليونيه ومطلبها الوحيد  وهو لااااا للمحاكمات العسكريه للمدنين  يطلع يقف معانا  ويقول معانا نفس الكلام ده وبسسسسسسسسسسس

ارجوكم وحدوا الصف والكلمه والمطلب بدل ما يصطادونا واحد ورا التاني

الى بيحصل دلوقتي هو تخويف للثوار واصطيادهم فردا فردا واتجاه اتجاه عشان فى الاخر الكل يدخل جحوره والباقي فى السجن العسكري

من فضلكم فى الوف مرميه فى السجون العسكريه مدنين ما عملوش اي حاجه غير انهم طالبوا بحريتهم
ارجوكم ما تضيعوش حق الناس دي
هما كمان لهم اهل زي اهالي الشهدا ولا تحبوا نستنى لما يموتوا نبقى ندور على حقهم ؟؟

انتم عارفين احنا لو رجعنا لايام الذل والقمع تاني  بجد مش عارفه ممكن يحصلي ايه

قبل الثوره بكام شهر انا دخلت بجد فى حاله نفسيه زي الزفت بسبب انى حسيت انى عايشه مش من حقي اعمل اي حاجه فى الدنيا
جوزي كان مانعنى اكتب فى السياسه وبعد شويه منعنى انظم لقاءات خيريه وبعد شويه منعنى اصلا احضر لقاءات  وكل شويه يحذرنى من الكتابه بتاعتي وانى حتى ما المحش لاي حاجه فى السياسه

انا عارفه انه كان خايف عليا وانه فعلا كان عنده حق فى خوفه عليا لكن كانت المشكله انى عارفه
عارفه ان احنا كلنا بقينا نخاف نخاف على روحنا وعلى اهالينا وعلى عيالنا
بنخاف نتكلم بنخاف نفكر بنخاف نحلم وشويه شويه الخوف يزيد ونلاقي نفسنا محبوسين فى زنازين من صنعهم
ارجوكم مش عايزه ارجع كده تاني

ما تسمحوش لهم يصطادونا فرادى ... ما تسمحوش لهم يكتموا اصواتنا تاني

هناك 10 تعليقات:

مصري جدا يقول...

طبعا لأ ومليون لأ

للمحاكمات العسكريه
وللمنع بالمره

فتاه من الصعيد يقول...

الظلم لابد الا نختلف على رفضه مهما كنا مختلفين ..

والمحاكمات العسكريه اصلا معموله للناشطين .... انا اعرف بلطجي اتقبض عليه بحشيش وخد براءه

بس اصله بلطجي حزب وطني كبير

Timo.. يقول...

المساواة في الظلم ..عدل..
والمفروض مبارك والعادلي يتحاكموا عسكري مش بس لجرايمهم..
لأ...
على الاقل عشان دي ناس عسكرية..
اما محاكمة المدنين عسكريا فهو امر مرفووووض وهايشهد التاريخ على اللي هما بيعملوه.

شمس النهار يقول...

لازم الشعب والتيارات والقوي السياسية
يرجعوا يتحدوا تاني
والا مانلومش الا نفسنا
المحاكمات العسكرية دي من تانئج الفرقة اللي حصلت
ونبي منورة البلوجر ياصبرني
:))
عملتي الكنافة بالمنجي
وانا بعمل رجيم
بعد مااخلص الرجيم واظبط الدنيا هعملها
:)))))

ندى الياسمين يقول...

مصري جدا

منور يا متر

ندى الياسمين يقول...

فتاه

يا بنتى البلطجيه اهم فى الشارع بيضربوا الناس وبيبلطجوا عليهم والمطوه ما بتفارقهمش والمخدرات والزفت ماليه الدنيا مش هما دول الى بيتحاكموا عسكريا ما هى حاجه معروفه يعنى حسبنا الله ونعم الوكيل

ندى الياسمين يقول...

تيمو
لا مش موافقك هما يتحكموا عسكريا واحنا لاااااااااااا برضه وده العدل بقى

ندى الياسمين يقول...

شموسه

حبيبتى انتى الى منوره الدنيا كلها

والكنافه يا جميل قولي بس وانا ابعتهالك معموله جاهزه يا قمر

ومتفقه معاكي تماما فى الاتحاد طبعا

sony2000 يقول...

برغم من كل اللي حاصل

بس ربنا سبحانه وتعالي معانا

وجوايا امل غريب
لايتناسب واللي احنا فيه من احباك
ايه

في امل؟

ندى الياسمين يقول...

سوني

طبعا طبعا فى امل وان شاء الله ربنا هايكرمنا :))