الأربعاء، 14 سبتمبر 2011

حديث مع الكنبه ( الجزء التاني)



الكنبه 2( الهادئه جدا ): طب انتى تختاري مين لمرشحين الرئاسه ؟؟؟

انا : طبعا لسه مافيش مرشحين اكيدين لكن هما متوقعين .. عامة الى انا شايفاه مناسب من الى على الساحه هو البرادعي

الكنبه 1: اهووووو اتفضلي

على اساس انى اتيت شيئا نكرا يعنى

الكنبه 2: البرادعي ؟؟ الى عاش طول عمره بره مصر ؟

أنا بهدووووء بالغ :  انتى تعرفي غاندي ؟؟؟

الكنبه 2: اه طبعا

انا : طب هو مين ؟؟؟
الكنبه 2: ده يبقى الزعيم الهندي

انا : طب تعرفي هو كان فين قبل ما يبقى زعيم ؟؟؟

الكنبه 2: اه كان فى السجن

انا : وقبل السجن ؟

الكنبه 2:  مش عارفه

أنا : كان بره الهند ... قعد 25 سنه تقريبا بره الهند قبل ما يرجع ينادي بالتغيير ويتسجن ويطلع يغير بلده فعلا ويقودها لديموقراطيه احنا لسه ما عرفناش نحققها لحد دلوقتي

فبصولي كده وقالولي يا سلام ؟

قلتلهم طب لما انتى البعيده منك لها مش عارفين حاجه بتبغبغوا ورا القنوات الهم الى بتشفوها دي وخلاص ليه

بعدين هما يا بلاوي مبارك كان عايش معاكم ؟؟ ده كان عايش فى برج عالي ولا يعرف الدنيا دي فى كام مزبله

كنبه 2: طب هى الثوره لحد دلوقتي عملت لنا ايه ؟؟

انا : تعرفى اول دستور اتكتب بعد ثوره 52 كان امته ؟ والجمهوريه اعلنت امته ؟

كنبه 2: ايوه يا ستى ماشي بعدها بسنين 

انا : الله طب امال انتم عايزين مننا نعملكم ايه ؟  انتم يعنى يا فالحين بعد ثورة 23 يوليو طلعتوا القمر ما انتم موكوسين اهو لحد دلوقتي فارقه معاكم ما تخرسوا وخلاص
 بعدين انا عايزه افهم لما انتم مش فارقه معاكم ايه الى مضايقكم من الثوره بقى يعنى ماثره عليكم سلبيا فى ايه ؟
مقهورين ليه من بتوع التحرير

كنبه1: تحرير  انتى ان شاء الله فاكره بقى ان شوية العيال بتوع البناطير الساقطه دول هما الى هايحرروا البلد بقى

انا : ااااااه اهو ده الى كايدكم  يا اصحاب الكنبه .. واغلب من هم فوق الاربعين ( وانا باعلي صوتي كده ناحية الرجاله عشان نصهم كنبه وفوق الاربعين )
ميتين ومش طايقين نفسكم عشان الى عمل الثوره حبة عيال .. طب ماشي انتم فين يا كبار ما تورونا نفسكم .. ولا كل واحد فيكم قاعد على الكنبه مش عايز يهز كرشه  وقاعد يقرف فينا وبس
بلاش كده وانتم بقى عيال ما كانتش بناطيلكم بكسر وكان اهاليكم بيقلولكم شوية عيال خنافس ببناطيل بكسر
ما تخليكم فى حالكم على الكنبه مانتخين وتسكتوا بقى ولا لكم دعوه بما فات ولا ما هو آت وما تقرفوناش
كنبه2: ماشي يا ستي بس يعنى بصي مثلا فى انجلترا ولا فى الصين الناس بتتظاهر بس بيروحوا شغلهم ..انما المعتصمين دول ما بيشتغلوش ليه .. وكل حاجه شغل عيال ومستعجلين وعايزين يطلبوا الطلب يتنفذ فى التو واللحظه  مافيش صبر على الحكومه  كل حاجه بالراحه


انا : نعم يا اختي ؟ انجلترا ؟ ما لقتيش الا انجلترا مثال ؟ ده لسه مولعين فى بلدهم اهو ..  وصبر على الحكومه ايه الى عايزاه وايه الى بالراحه انتم مش عاجبكم ان الثوار مستعجلين على طلباتهم ومش عاجبكم ان الثوره ما عملتش حاجه لحد دلوقتي ايه التناقض ؟!! عايزين ايه ؟؟!!

كنبه 1: طب يعنى انتى عايزه ايه ناقصك ايه ؟؟

انا بانفجااااار تام : عايزه حقي ...عايزه فى بلد محترمه ... عايز اعيش فى بلد تحترمني

من حقى امشي فى شارع نضيف .. من حقى الظابط يحمينى مش يبلطج عليا ... من حقي ما اكونش تحت رحمة جهاز امني يقدر ياخدنى يرمينى فى اي معتقل  لعشرات السنين بدون حكم محكمه ولا تهمه حقيقيه

من حقى ما حدش يراقبنى بدون اذن نيابه او محكمه ... من حقى ما يتعمليش ملف فى امن الدوله عشان باعمل اعمال خيريه ومدونه فقط

من حقى  اعلم ولادي كويس وكان من حقى اتعلم انا كويس ... من حقى اطمن على مستقبل ولادي

من حقى اشوف الانسان له تمن فى بلدي

من حقى ما ادفعش رشوه لحد .. ولا يجى كلب من الحي ولا مباحث التموين يبلطج علينا فى مكان عملنا وياخد مننا بضاعه بدون وجه حق او يلبسنى تهمه

من حقى ما ادفعش ضرايب وجبايات بدون ادنى لازمه ومالهاش اي مردود عليا ولا على البلد  اصلا فتكاليف جبايتها اكتر من الحصيله من اساسه

من حقى انه لما يجيلى حكم محكمه بسنه سجن  و10 الاف جنيه غرامه   بتهمة القاء مخلفات صلبه فى الشارع  وانا ما عملتش كده وما جاليش محضر وما عرفتش اي حاجه عن القضيه غير صدفه وبعد الحكم بيومين انى اخرب بيت ابو الى عمل معايا كده

من حقى اشم هوا نضيف مش هوا فى يوريا من مصنع السماد وفى دخان من حرق قش الرز وفيه عادم عربيات بايظه

من حقى ما يكونش بلدي اعلى نسبة فشل كلوي فى المنطقه واعلى نسبة سرطان اطفال واعلى نسبة فيروسات كبديه
من حقى اتعالج فى مستشفيات نضيفه ويكشف عليا اطباء محترمين بيفهموا مش طالعين بقر من الكليات

من حقى اسوق فى الشارع بقوانين مرور  وبلطجة العساكر على الناس واجرام الظباط

من حقى ما يكونش الشارع بتاعي بيتحكم فيه بلطجيه  يعلم بهم تماما الامن وسايبهم ينتشوا فى الناس

من حقى لما اطلب النجده تجينى خلال دقايق زي اي دوله محترمه
من حقى الاقي اسعاف والاقي دم فى بنك الدم

من حقى الاقي حد يطالب بحقوقي خارج بلدي

من حقى الاقي حد يعمل دراسات للمجتمع ويقولي ايه المشاكل الى بتقابلنا وسببها ايه ويوضع لها حلول حاليه ومستقبليه
اطفال الشوارع ... البطاله ... العنوسه... نسب الطلاق...  وكتير غيرهم من مشاكل غرقانين فيها

من حقى ابقى بنى ادمه ... من حقى اعيش انسانه

الكنبه 1:  اه بقى انتى بتتكلمى بقى فى مواضيع تانيه عامه ... انما انا كشخصي يعنى مافيش حاجه ضرتنى

انا : هى دي مواضيع عامه ؟؟؟ امال لو كلمتك عن العلاقات الخارجيه  للدوله  ولا دورنا فى الاتفاقيات الاقتصاديه العالميه ولا اي كلام من الى مالكيش فيه ده  كنتى قلتي ايه ؟؟

قومي يا  بت انتي بدل ما اقتلك ... قومي يا موكوسه هاتي طبق محشي واكلي العياااااااال وده اخرك  اصلا  وياريتك فالحه فيه

وقامت تجري ورا بنتها تاكلها فى الشقه ويلا افتحي بؤك والطياره راحه فين وهيييييييييييييه  سقفولها شاطره اكلت وهاتكبر
وهذا ما ارفضه تماما فى اكل طفله عمرها 4 سنين مفروض تقعد تاكل وحدها وتطلب الاكل لما تجوع

وعليه قلتلها حتى اكل العيال ما انتيش فالحه فيه  .... ونديت على جوزها  وقولته عرووووووووستك عندي مشي البت بتاعة اسفين يا ريس دي

هناك 10 تعليقات:

غير معرف يقول...

بصي يا صاصا أنا هخدمك ابعتي لي كل الكنب اللي مزعلك وأنا بعون الله هنجدهولك
.
.
.
بالبلدي الفصيح

Haytham Alsayes يقول...

هههههههههههههههههه

وسيظل حزب الكنبة معاندا
في تفاوت رهيب بين الاجيال مصر عايشة كد دلوقت بين جيل شجاع لا يهاب الموت اصلا ومستعد يموت عشان قضايا شايف الجيل الاكبر منه انها قضايا تافهة
بيتهموا الجيل الاصغر بالغوغائية والانفعال بينا بتوع الجيل القديم او حزب الكنبة كانوا عايشين في الذل والهوان وعادى خالص عندهم
ومش كل الجيل القديم طبعا فيهم شجعان بس اكثرهم للاسف بيحبوا ياكلوا المحشي ويناموا علي الكنبة

sony2000 يقول...

والله كان الله فعونك بجد

Haytham Kilany يقول...

راااااائع حقا هذا الحديث
بس مش عارف فى الاخر كدة مافهمتش حاجة
هو مين اللى راح يأكل مين وطيارة ايه اللى
.......
نعم

shimaa elkholy يقول...

مصري جدا

لا ما انا نجدتهم كويس زي ما انت شايف ههههههههههههه

shimaa elkholy يقول...

مصري جدا

لا ما انا نجدتهم كويس زي ما انت شايف ههههههههههههه

shimaa elkholy يقول...

سوني

تسلمى يا جميل

shimaa elkholy يقول...

هيثم السايس

ده خلاف اجيال عادي جداااا المهم يسبونا نشم نفسنا بقى

فشكووول يقول...

السلام عليكم
تحياتى
طبعا انا فاهم انت عايزه تقولى على الكنبه ايه .. يعنى تقصدى الناس الكبار العواجيز اللى زى حالاتى
بس انا مش كنبه يا ياسمين ومش موافقك فى كل كلامك .. هه .. هه

shimaa elkholy يقول...

استاذ فشكول
هههههههههههه لا لا لا والله مش كده خالص

بالعكس الكلام ده حصل بصحيح بينى وبين ستات اصحابي ومن سني مش كبار فى السن ولا حاجه

وحضرتك تختلف معايا براحتك مافيش مشكله

نورتنا
هاتيجى المنصوره ولا لا فى لقاء يوم الجمعه