السبت، 1 أكتوبر 2011

ملخص لقاء المنصوره /30/9/2011


الصوره دي لجزء من الناس اثناء تواجدنا فى الكافيه 


كان يوم جميل بجد بصحبتكم يامدونين

ربنا يجمعنا دايما على الخير

انا طبعا جيت مقتوله نمت وصحيت تاني الساعه واحده لانى ما كنتش نمت تقريبا امبارح

اقولكم بقى ملخص اللقاء
انا نزلت الساعه عشره ونص كده  وقعدوا يستعجلوني وكده يعنى كالعاده ده عادي

وروحت لهم على الكافيه لقيت هناك ابراهيم العدوي وطارق ودعاء  وطلعنا على الكافيه

وبعد كده توالى وصول المدونين واحدا تلو الاخر يا اخويا

هاقولكم الحضور وبعدين نحكي احداث اليوم والدروس المستفاده

طبعا انا كنت كاتبه الاسامي فى نوته بس الحقيقه النوته وقعت مني تحت السرير ومش عارفه اجيبها ههههههههههههه بجد وربنا مش باهزر

فانا هحاول بقى اكتب من ذاكرتي الى انتم عارفين كويس انها جاااااامده جدا

دعاء سلطان (مجرد حلم)
ساره طوبار (رحيل)
امجد القهوجي
احمد عبد الحميد (ابو احميد)
سماح ( كريستال مايند)
سلوى حسين
اميرة الحكايات
ايناس ملاك يعيش بكوكب اخر
مصطفى (فك زنقه)
محمد شحاته
ابراهيم العدوي (كانى اتكلم)
محمد متولي (بوكيه ورد )
ايمان (سول ويسباير )
الاء
طارق الامير (هاتشوفوا)
هشام (سنوهي)
بنت الغروب

وكان فى ضيوف برضه شرفونا
محمود صاحب احمد عبد الحميد
هدى اخت سول
نجوى اخت سلوى حسين
احمد صاحب ابراهيم العدوي
هذا وبالاضافه الى اهم شخصيه فى اللقاء الى هو جوزي طبعا رضا  وبحضور اولادي الاعزاء الهاااادييين مووووووت


والاتصالات .. اتصلت بينا ريم سعيد الجميله وقالت انها ما عرفتش تيجى عشان المدرسات بتاعة البنوتات ولادها ههههههههههه
 واتصلت كمان جوجو  الجواز وسنينه
امممممم مش فاكره مين تاني
فى حد اتصل عليا دولي بس ما كنتش سامعاه وقلتله يتصل تاني على اكلم بتوع المطعم يقفلوا صوت الموسيقى الى كان شغال
للاسف ما اتصلش تاني وانا باقوله من هنا سوري
معلش دول الى انا فاكراهم بقى ربنا يسهل 


يارب ما اكونش نسيت حد يارب

اهم احداث اللقاء بقى
اولا بتوع الكافيه كانوا مخضوضين مننا ومقلقين كده مننا وحاسين ان احنا هانجيب لهم مصيبه مش عارفه ليه ههههههههههههههههههه
بجد والله واحنا بقى طبعا كمصريين اصله قاعدين مستنيين اصحابنا ومش عايزين نشرب قوم الراجل قالنا لا لازما تشربوا حاجه ههههههههههه

وطول الوقت كان فى واحد مقلق مننا اوي وواقف يبص علينا من بعيد وبيسمع احنا بنقول ايه واول ما تيجى بس سيرة المشير فى الكلام كان بينط يقف قدامنا بالظبط واصلا ما كانش فى حد فى الكافيه الا احنا
واحنا خارجين راح قايلي وانتى بقى الزعيمه بتاعتهم ؟؟  مرتاب فينا اخر حاجه ههههههههههههههه

المفروض كنا هانتغدى فى كوك دور بس ساره ودعاء اصروا الحاحا  نروح مطعم تاني اسمه بهجت وسمير  ولونه احمر ورخم والبنات الى هناك ما كانوش بالعنا خالص وشايفين اننا عاملين لهم زحمه

قعدنا بتاع ساع الا ربع محمد متولي ودعاء بيكتبوا فى الطلبات بس لما الواحد كان فاضل همسه ويخنقهم يعنى

بس الحمد لله اكلنا فى الاخر والحمد لله  بعد كده قعدنا نتشاكل انا وطارق شويه عشان هو رايه انه عاااااااادي لما حد يقف جوه لجنة الانتخابات ويقول للناس قولوا نعم او اي حاجه عاااااااادي وده على اساس ان لجنة الانتخابات دي دوار ابوهم يعنى

بعد كده روحنا النادي

 وبعدين واحنا فى الطريق راح سقط منين ثلاث مدونين يجى نص ساعه ندور عليهم مش لاقينهم بعدين لقيناااااااااااهم ومحمد متولي قال اصلهم قالوا هايلفوا لفه ويشيشوا ويجوا وكدهو وطبعااااااا انا مش هاقولكم هما مين عشان ما يبقاش تصييح برررررررضه يالا ان شاله ما حد حوش

كان المفروض هانتطلع من النادي نروح نركب مركب فى النيل بس قلنا نشرب شاي وكدهوك قووووووم الطلبات جت بعد ساعتين تقريبا وكنا زهقنا وتعبنا والمسافرين عايزين يمشوا وعليه فقد مشيناااااااا

احمد عبد الحميد من اول ما جه وهو بيشتغل فينا واقننعني ان محمود صاحبه من بتوع اسفين يا ريس وانا كنت هانتحر وقعدت اكلم معاه شويه كتير وبعدين في لاخر طلع احمد بيهزر والراجل لسه جاي من التحرير طازه
شويه وراح اقنع الحضور كله ان هو نفسه احمد من بتوع اسفين يا ريس بقى وادي الى خدناه من الثوره وادي شباب الثوره وهكذا ... اعتقد قبل ما يمشي كان بيحاول يقنع الناس بقى انه مش كده هههههههههههه

مصطفى ومحمد شحاته طخوا مشوار مشي كبير جدااااااااااا لحد النادي  مش فاكره قالوا ليه بس انا قلت بقى هما بلاقسه وكدهون وقالوا يفروا حق التاكسي نيهاهاهاها ترويقه على الماشي يا ولاد ههههههههه

محمد متولي كان قايل هايجيب لنا بسبوسه بس تقريبا طمع فيها وبعد ما كل الناس مشيت كلمنى يقولي البسبوسه جت كي دي حركات انا فاهماهاكويس عشان ياكل هو البسبوله لوحده طبعا

ساره طوبار وهى حامل شكلها يفطس من الضحك مع ان مش باين على بطنها وشكلها كده والله اعلم حامل فى قزم انما تلاقيها قاعده نفسها ضيق ومتعصبه وخلقها ضيق ومش قادره تقوم وكده يعنى  هههههههه بس عسوله والنبى

امجد ومحمد شحاته وسول سمعونا شعر جميل
قعدنا نرغي وتعرف كلنا كلنا لما قلنا بس

ولان النادي محدوف شويتين الله يصلح حالهم رضا وطارق اخدوا الناس فى عربياتهم على مرتين لحد مواقفهم وكده
بس عشان برضه بنحب نعذب الشباب يعني وكده  فضل محمد متولي وابراهيم واحمد صاحبه من غير مواصلات وقلنا هانعذبهم وكده لكن ما لحقناش ومتولي جاب عربيه

ونتعمل من اللقاء ده ثلاث حا جات

اولا  نبقى دايما نرتب نشاط خيري عشان بصراحه بيخلي اليوم بنكهة خاصه
ثانيا : ما نعملش لقاءات فى الحر عشان كنا هانفطس
ثالثا : ما نا خدش راي واقتراحات كل من دعاء سلطان  ساره طوبار محمد متولي

وكل لقاء وانتم طيبين يا جماعه وانت حقيقى نورتوني واليوم كان جميل بيكم بجد
وربنا يخليكم ليا ويكرمكم ان شاء الله ونتجمع تاني علىخير
شكرا يا قوم

هناك 16 تعليقًا:

رحــــيـل يقول...

توك توك عطلااااااااااان انا بقيت توك توك عطلان :)

وبعدين احنا فعلا كنا عاملين دوشة وكل واحد فينا بكلمة هى البنات اى انعم خنيقة وشغلها انها تستقبلنا كويس وتريحنا بس المهم اننا كلنا الحمد لله
وعلى العموم اللقاء الجاى ان شاء الله مش على ارضنا فمش هتاخدى لامنى ولا من دعاء اى مقترحات سنلتزم الصمت ونتفسح بس :)
شكرا ع الكيك الجامد جدا
بنوتاتك القمرات كانوا بيجربوا فيا التصوير ابقى ابعتيلى الصور لما تفضي
وطبعا لا ننسي ابدا اننا نشكر استاذ رضا واستاذ طارق على انهم انقذونا من المشورة

snohe يقول...

شكرا ليكى فعلا كان يوم جميل مش هنساه خصوصا ان اجازتى فى مصر قربت تنتهى وخلاص مسافر تانى - قابلت ناس كنت بقرأ ليهم ومتابعهم من زمان على الفيسبوك وبلوجرز وكان نفسى اتعرف عليهم وكنت سعيد جدا لما قابلت امجد وكريستال ومازال البحث - وابراهيم ودعاء وكل اللى حضرو لكن كان صوت الموسيقى فى الكافيه عالى جدا وكان نفسى اتكلم مع كل اللى حضرو لكن اليوم انتهى بسرعه
تحياتى لكل اللى حضرو اللقاء ويارب نتقابل تانى على خير

شكرا ليكى وسلميلى على الطفلتين القمرتين ربنا يبارك فى مريم واختها

تحياتى

Soul.o0o.Whisper يقول...

بجد اليوم كان رائع يا ندى

و بجد فرق معايا كتيييييييييير
و كان نفسى نتعرف كلنا أكتر من كدا

لكن الجايات أكتر ان شاء الله :)

تحياتى لـ ا. رضا
و البنوتات العسولات

Mahmoud Bahgat يقول...

اولا شكرا على اليوم و الكحك و الكيك و ده ثالث شكر "تويتر و فيس بوك و ج ميل " عليها
و ربنا يبارك لك فى الاستاذ رضا و فى الاولاد و عقبال كل منصورة و انتوا مدونين و ربنا يخليلكوا الفلول

أحمد عبد الحميد يقول...

ندى الياسمين
اليوم كان جميل فعلا
شكرا ليكم كلكم
الناس بقوا مصدقين 100% إننا من أبناء مبارك
نياهاهاهاهاااااااااااا

شمس النهار يقول...

كل الناس الموجودة ناس جميلة

ومافيش اجمل من الصحبة الحلوة

هتشوفوا يقول...

كان يوم جميل فعلا
ان شاء الله نكرره كتير حتى لو يبقى ساعتين نجتمع فيهم مش لازم يبقى يوم كامل عشان الناس تحضر
شكرا لكل اللي حضروا

shimaa elkholy يقول...

رحيل

ما لقيتش ليكى صور والله يا ساره يعنى هى صوره تقريبا او اثنين ومش العيال ده ابراهيم كان مصور بتليفونه كام صوره وبعتهوملي وهابقى ابعتهوملك يا جميل

اموووووه

shimaa elkholy يقول...

سنوحي

العفو يا فندم وانت بجد نورتنا

واتمنى تشرفنا دايما ويكون اللقاء فى مكان حلو وهادي ونتكلم براحتنا ان شاء الله

shimaa elkholy يقول...

سووول

العفو يا جميله وكفايه انى شوفتك يا جميل
شوفتك شوفتك يعنى مش كده وكده هههههههه

shimaa elkholy يقول...

محمود بهجت
ربنا يخلييييك ايون انت هريتنى شكر الصراحه ايه الاحراج ده

انا بجد الى متشكره على حضورك

shimaa elkholy يقول...
أزال المؤلف هذا التعليق.
shimaa elkholy يقول...

ابو احميد

هههههههه عجبك الى انت عملته هههههههههههههه

بجد شكرا لك انت على الجو اللطيف الى عملته فى اللقاء وتعبك وتشريفك لنا

shimaa elkholy يقول...

شموووسه

امووووووه عايزه اشوفك بقى

shimaa elkholy يقول...

هتشوفوا

ده انت الى هاتشوووووووف يا لهوووي الحمد لله انتهى النقاش من غير الااات حاده ههههههه

نورتنا

خايف من الحقيقة يقول...

ندى الياسمين
وحنين قديم لذكريات جميلة لاحلى عالم واحلى صحبة
شكرا
شكرا لكلماتك الجميلة
وشكرا لانك لسه فاكرة
يا ريت الحجات الجميلة تفضل موجودة ومتروحش بعيد
فاكرة
انا كنت خايف
وانتي طلبتي الصبر
صبرني يارب
المشكلة النهاردة الناس معدتش بتخاف
وكمان معندهاش صبر

تحياتي لك وللاسرة الكريمة
سعيد بتواصلك
وناوي ارجع اكتب تاني
لكن بعد ان استقر
لان نغمة التشويش مرتفعة جدا