الأربعاء، 12 أكتوبر، 2011

ما حدث فى احداث ماسبيرو ..من خلال الفيديوهات


ايه كمية اللك والعجن والكذب والمبالغات والقرف الى احنا فيه ده

حد يفهمنى بس احنا ايه جنسنا وايه دماغنا وايه دينا ودينا ابوناااا

اتهامات وتخوين وقرف قرف قرف على كل جانب

المجلس العسكري بيكذب  وبيتنصل من مسؤليته عن المصيبه الى حصلت

المسلمين بيستهبلوا وهما عارفين كويس ان فى ناس مسلمين فاهمين الدين غلط وبيكرهوا المسيحين فعلا

والمسحيين كمان بيستهبلوا وبينكروا ان حصل تحريض من قبل ناس عندهم على العنف مش بس التظاهر وان كمان عندهم ناس فاهمين دينهم غلط وبيكرهوا المسلمين

طب وبعدين ما طول ما احنا كده مش هانحل المشكله ابدا 

طيب انا عندي تحليل كده للاحداث بناءا على الفيديوهات  معلش هاطول عليكم بس استحملوني 


ركزوا معايا شويه


الاول وقبل ما نبدأ مسيرة ماسبيرو واخده تصريح من الامن بخط السير كمان يعنى قانونيه ميه فى الميه  زي ما سمعت من ناشطين على تويتر والله اعلم 


نبدأ الفيديوهات 


فى الفيديو ده وهو سابق على احداث ماسبيرو وقبل وصول المسيره لهناك





 هاتلاقوا ان فى ناس بتضرب المتظاهرين من اعلى النفق بالنار بالطوب  والمتظاهرين واقفين ومش عارفين منين جاي الضرب  علما بانه كان فى ناس من المتظاهرين معاهم عصين وكان فى واحد معاه صاعق كهربا


بعد كده نيجى للفيديو ده 








هما كملوا وراحوا على ماسبيرو وهناك وقفوا وهتفوا ولقوا الجيش واقف وفى جنود ماليين اتوبيس وهما واقفين فى سلميه تامه حوالين الاتوبيس
 وعند الدقيقه 3:20 بالضبط ومع بداية نزول العساكر من الاتوبيس  بيبدأ الضرب فى المتظاهرين بشكل خلاهم يجروا بهستيريه ويبعدوا تماما عن الجنود والاتوبيس وبيتبقى افراد قليلين قريبين من الجيش وبيرفعوا اديهم فى اشاره الى سلميتهم وتهدئة الجنود  لكن بيستمر الضرب وعند الدقيقه 3:40 بيظهر صوت ضرب نار ..الله اعلم هو رصاص حي ولا صوت ولا خرطوش ولا اي بالظبط






فرضا ان بعض المتظاهرين او المندسين اوي اي زفت معاهم سلاح وبيضرب نار على 


الجيش الاعزل  الغلبان 




هل من الطبيعى ان يكون الرد من راكبي المدرعات هو هرس الناس بالشكل البشع ده ؟ 


ما حدش يقولي ما كانش فى دهس مش هاعرف اعدلكم كمية الفيديوهات الى فيها دهس 
 امثال الفيديو المفزع الاتي مثلا :




والى اهم من ده وده صور القتلى الى واضح طبعا انهم مهروسين وبمدرعات او سيارات 


تقيله حسب كلام المتخصصين ..وحسب تقرير الطب الشرعي ان فى 8 ماتوا دهسا 


بالمدرعات 


خلينا نرتب الاحداث بصوا كده معايا على الفيديو ده 


عند الثانيه  26  من الدقيقه الاولى بيظهر هنا مدرعتين واحده كبيره ومقفله من كل ناحيه والتانيه مفتوحه من فوق  واصغر شويه  والاثنين كانوا ماشيين بسرعه جدا وواحد منهم تخطى الحاجز فى نص الطريق ومع ذلك الناس كانوا ماشيين حواليهم عادي


بعد كده بثواني وتحديدا عن الثانيه 38 بتبدا المدرعه الكبيره تدخل فى الناس وتهرس فيهم هرس








وطبعا فى فيديوهات تانيه كتييييييير للهرس  بما هو واضح وجلي  تخيلوا العربيات الى بتهرس فى الناس دي وهرست الى واقف جمبك هاتعمل ايه ؟ انا عن نفسي كنت اقل واجب هاقتل الى جواها واحرق ام العربيه ...


قالك فى شهود عيان بيقولوا ان فى متظاهرين استولوا على مدرعه للجيش .. اقولك اه حصل ..بس بعد الدهس يا معلم


بص معايا الفيديو ده
سيبك من الهجص الى بيقوله المذيعين الى صاحب القناه بتاعهم عايز يفتح قناته ويعيش فى سلام  وياكل بقلاوه





عند الدقيقه 3:48  هاتلاقي مدرعه بتنطلق بسرعه وبتشيل فى وشها عربيتين جيب للقوات المسلحه وبتزقهم لحد ما يعدوا الناحيه التانيه ويخبطوا فى الاتوبيس الابيض ( فاكرينه ؟ الى كان ناقل الجنود ) وبيعدوا من جنبه  وبتقف المدرعه بعد ما تلبس فى ظهر الاتوبيس وتزقه شويه كمان  وتثبت على كده
كان يقدر الى سايق المدرعه  لو كان متمكن منها قبل ما يخبط فى الاتوبيس بثانيه يكسر شمال وكان هايعدي ويهرب ده لو  كان مجرد عسكري مذعور عايز يهرب من المتوحشين المسلحين الى حواليه ..


ومن هنا يبدأ المشهد التاني للمدرعه الصغيره  والى موجود فى الفيديو ده بالظبط عند الدقيقه 0:40





والى بتظهر فيها المدرعه ورا الاتوبيس الابيض والمتظاهرين بينقضوا عليه ويحدفوا الى جواها بطوب  ويقلوله اطلع .. والى فى الفيديو الى فات شاهد العيان قال عنهم انهم ناس متظاهرين سارقين المدرعه .. وفعلا انا شايفه من طريقة السواقه للمدرعه انه فعلا شكلها واحد مش متمكن منها  وراجع الفيديو تاني ودقق فى طريقة السواقه


وفى حد سالنى مره طب وهو اي حد يعرف يسوق مدرعه 
احب اقوله ان المدرعه فى النهايه عربيه ومدراعتنا عمرها عشرات السنين مش تكنلوجيا فظيعه يعنى .. فوق ان مين بيسوق المدرعات فى الجيش مش اغلبهم مجندين؟ 
طب وهما مين المجندين ؟؟ يعنى ممكن يكون الى ساق المدرعه ده كان مجند سابق واحنا شعب اغلبنا دخل الجيش يعنى 


نيجى للمدرعه التانيه الكبيره والى ظهرت فى فيديوهات كتير بتهرس فى الناس فعلا  واحنا اتفقنا ان لا مجال للشك بان حصل دهس بالمدرعات
 طيب انتم متفقين معايا طبعا ان كيد الهرس فى المتظاهرين كان قبل حرق المدرعه ..ولا تفتكروا المدرعه هاتهرس بعد ما اتحرقت ؟؟


هانرجع تاني كده للفيديو السابق ده على طول وعند الدقيقه 0:55 بالظبط هاتظهر المدرعه الكبيره المقفوله من فوق والناس ملمومين حواليها وبعد شويه النار والعه تحتها والناس بتخبط عليها وبيطلع منها بعد شويه عسكري وبيجري ناحية اليمين لكن الناس بيلحقوه ويمسكوه يدوله العلقه التمام ورغم وجود قس حاول منعهم الا ان ده ما منعهمش توضيبه ...


وقلتلكم ان ده اقل واجب ممكن يتعمل مع حيوان راكب مردعه وبيهرس فى الناس وحسب تقرير الطب الشرعي ان فى 8 ماتوا دهسا بالمدرعات  والناس الى بيضربوا العسكري ويحرقوا المدرعه دول شافوا الدهس ده وشافوا ضحاياه على الحقيقه ودمهم سايل ووشهم مطبق وضلوعهم متساويه بالارض  على  الحقيقه مش صور زينا




طيب فاضل حاجه واحده بس اطلاق النار على المتظاهري حصل اطلاق نار ولالا ؟؟؟
شوف يا معلم الفيديو ده وقولي رايك ايه ؟؟







امممممم مش رصاص حي ؟؟ خرطوش ؟ او طلقات فشنك ؟؟  جايز برضه الله اعلم ... بس هى مش طلقات الصوت مفروض يضربها لفوق ولا يوجهها فى وش الناس ؟؟ برضه الله اعلم مش خبيره فى الطلقات بقى حد تاني خبير يقول لو يعرف


خلينا فى الفيديو الى بعده والى بيصور جنود قواتنا المسلحه داخل الاتوبيس الابيض ايااااه ... وياريت تسمعوا كويس  العسكري الى طلع من الشباك بيقول للناس ايه





بيقوله اخد رصاصه فى صدره ..وقالها كذا مره ... والاخ الى واقف تحت بيقوله رااااااااجل وبيهتفوا له وهيصه هيصه


هل ممكن ان يفسر ليا احدا من الذي اخذ الرصاصه فى صدره ؟؟ هل هو اسرائيلى مثلا مهاجما لوسط القاهره ؟؟


طيب حد تاني كده يقولي  السبعه الى ماتوا بطلقات ناريه حسب تقرير الطب الشرعي دول مين موتهم ؟؟؟


*****************************
خلاصة الى حصل فى نظري هو ان حصل ضرب بين طرفين هما الجيش والمتظاهرين ... مين الى بدأ الاول رغم انه واضح مين الى بدأ لكن حتى ده مش مهم لان حتى لو كان بعض المتظاهرين او المندسين بينهم هما الى بدأوا ضرب ما يكونش الرد بالوحشيه دي 


وهل يصح ان نقول ان المتظاهرين ضربوا الجيش فسقط منهم 25 قتيل ؟؟  
وهل احنا شكلنا اهبل عشان تقلولنا اصل احنا مش هانصرح بضحايا القوات المسلحه عشان نفسية الجنود .. دي مسخره 


وان حصل دهس للمتظاهرين ... ايوه حصل بما لا يوجد مجال للشك وطبعا من قبل الجيش للمتظاهرين 
اه حصل استيلاء على مدرعه لكن بعد الدهس 
اه هجم الناس على المدرعه وحرقوها بس بعد ما هرستهم وقتلتهم 
اه ضرب الناس المدرعه والى جواها   لكن كان الى جواها ناس مستوليين عليها 


اه حصل ضرب نار .. بما لا يوجد مجال للشك ايضا ... وقع فى صفوف المتظاهرين 7 قتلى بالرصاص الحي .. طب يعنى المتظاهرين ضربوا نفسهم ؟؟
طب الجيش ما كانش مسلح بذخيره حيه .. طب مين الى ضرب ؟؟ طرف ثالث؟؟ طب هو مين دي مسؤليتكم انتم تجاوبوا على السؤال ده 


حصل تحريض ؟؟؟ ايوووه حصل تحريض وشحن على جميع الجوانب .... الجنود جايين مشحونين ضد المتظاهرين الاقباط ولاد دين ....
المسيحين هما كمان جايين مشحونين ومحرضين ياخدوا حقهم من المسلمين الظلمه المفتريين الى بيهدولهم كنايسهم 


الشعب كله محرض من خلال الاعلام ضد الاقباط المسلحين الى اعتدوا على رجال الجيش الشرفاء 


سفاله وقلة ادب من الجميع .... ومين صاحب المصلحه ؟؟ جاوب انت مين صاحب المصلحه ؟؟






باقي نقطه عايزه اقولها للقساوسه المحترمين  هاقولهالكم لما تشوفوا الفيديو ده



اخسسسسسسسسسسس والف اخسسسسسسسس علي كل من يساوم على دماء شهداؤه ... عيب اوي لما تضللوا الناس وتقلولهم مالوش لازم التشريح ومش هتاخدوا حاجه .. وكمان تحرضوهم هناخد حقنا بادينا .... مش قادره ابعد عن ذهني اشتراكم فى المؤامره على الشعب المصري  كده عيب


والاخوه المشايخ الى سايبين كل حاجه وبيناقشوا هل يجوز نقول على المسيحين شهداء ولا لا ... الهي تتوكسوا



تحديثه: قابلتنى  الشهاده دي على الاحداث ياريت تشفوها 
http://masperotestimonies.wordpress.com/mohamed-el-zayatt-testimony/

هناك 20 تعليقًا:

fokakmeny يقول...

تحيلل جميل تحياتى

ندى الياسمين يقول...

تسلم شكرا ربنا يخليك

Comr4de يقول...

عندك قدرة فائقه على سرد حقائق وبعدين استنتاج شيء خاطيء تماما منها فى كل مرة ..

فتاه من الصعيد يقول...

دول مش مسيحيين ومش بتوع ربنا ..

المسيحي اللي بجد لما يروح مظاهره لازم يأمنها كويس ... ولو مأمنهاش يندهس

المسيحي اللي بجد لما تدوس صديقه مدرعه جيش لازم يقف ويهتف ... الجيش والشعب ايد واحده .... ويجيلب مراته وعياله يندهسوا كمان اثبات لحسن النيه ..

دول مسيحيين اخر زمن :(

وحسبي الله ونعم الوكيل فيك ياللي في بالي

ندى الياسمين يقول...

comr4de

مش يمكن خاطيء من وجهة نظرك ؟؟

ندى الياسمين يقول...

فتاه من الصعيد

والله انا قلبي ما عاد قادر يستحمل الى بيحصل كل يوم ده

ربنا يرحمنا منهم بقى

Ramy يقول...

هنتسكت على حققنا

لغاية ما ربنا يجبها

دة رد على سؤالها فى اخر فيديو

...............

عندها حق اه متواطىء فى انه مش عاوز يثبت ليه

...........

بوست محايد جداً

بجد يا ندى

wahid يقول...

يسلم فمك شيماء

wahid يقول...

خدى كمان الفيديوهات دى كمان للموضوع
الاول
http://www.youtube.com/watch?v=N_q1Tpzz2v8&feature=share

الثانى
http://www.youtube.com/watch?v=w1kgmK67JiA&feature=share

سبايدرمان يقول...

انا و الله مبقتش عارف الحقيقه فين
انا فعلا توهت و مبقتش عارف احكم على حاجه خالص للاسف :(

شكرا على الفديوهات و التجميعات دي :)

elbazscience يقول...

تحليل جيد يا ندي الياسمين والكل يتفق جميعا علي ان دهس المتظاهرين أبشع ما في الموضوع ولا يمكن السكوت علي مثل هذه الجريمة النكراء ولازم عقاب رادع
طيب انت بدأت من قبل بداية الاحداث طيب ايه رأيك نرجع لورا من اسوان ظهر فيديو للانبا هيدرا الناس قالت قبل الاحداث ما علينا طيب انا خدت منه انهم خالفوا الترخيص وزادوا ف الارتفاع ودي مخالفة من البداية طيب هنقول المسلمين غلطوا بعدها بعد غلطة الاقباط طيب بعدين القس فيلوباتير يدعو لمظاهرة كويس وشوف الفيديو قال ايه فيه تحريضي تحريضي طيب شفت فيديوهات الاستفزاز لما الاقباط كان بيهتفوا بالطول بالعرض احنا اصحاب الارض مسيحين مسيحين الارض ملكنا ليوم الدين (راجع الفيديوهات) وبعدين في حاجات تانية مش عايز اطول اللي اان مدايق منه الدهس اللي حصل وتبرير المجلس اللي يخنق والقس فيلوباتير وغيره بس توضيحك وتحليلك جيد :)

ندى الياسمين يقول...

رامي

تحياتي لك ربنا يكرمك ويرحمنا من القرف الى احنا فيه

ندى الياسمين يقول...

وحيد

شكرا ربنا يخليك هاشوف الفيديوهات

ندى الياسمين يقول...

سبايدر مان

قول اللهم ارنا الحق حق وارزقنا اتباعه وارنا الباطل باطل وارزقنا اجتنابه

العفو ونورت

ندى الياسمين يقول...

الباز

انا اشرت للتحريضات بس انا كنت باحلل الحدث نفسه مش التحريضات

وعشان تكون حضرتك عارف ان الجيش كمان كان رايح مشحون على المسيحين

والتلفزيون المصري كمان شحن الناس ضد المسيحين وبقت الاطراف كله مستنيه اي حد يقول اي حاجه عشان يمسكها عليه

والمفروض كل الناس تتحاسب بالاضافه طبعا لمجرمين المعركه نفسها

حروف يقول...

تعليقا ع تزوير التراخيص...لجنة تقصي الحقائق قالت مش مزورة
وتحليل جيد لواقع مخزي

ندى الياسمين يقول...

حروف

بتهيئلي مافيش مجال اصلا للكلام هنا عن التراخيص ولا غيره لانه من الواضح انه لا علاقه اصلا هى مجزره مترتب لها وبس

Ramy يقول...

كل سنة و انت طيبة

عيد أضحى سعيد عليكى و على الأسرة

(:

ندى الياسمين يقول...

وانت طيب وبخير يا رامي
متشكره اوي كلك ذوق

غير معرف يقول...

ثقافة الهزيمة .. عصابة البقرة الضاحكة‏ 3

وأنا تقديري الشخصي لهذه العملية الخاصة بسعاد حسني أنه لم يكن ثمة ما يدعو لأقتحام الغرفة عليها أثناء وجودها مع ممدوح والأكتفاء بمواجهتها بالصور التي حصلنا عليها من عملية الكنترول خاصة وأن الأقتحام تم أثناء ممارسة أوضاع جنسية وكانت سعاد عريانة،

وأذكر أنه في مرحلة من مراحل العملية كانت سعاد وممدوح متغطيين بملاية وكان ذلك من ضمن الأسباب التي دفعت إلى التفكير في الأقتحام أنما هذا لا يمنع من أننا ألتقطنا لهم صور قبل ما يتغطوا بالملاية، وقد كانت هذه العملية الخاصة بسعاد حسني هي أول عملية نلجأ فيها إلى هذا الأسلوب في التجنيد وهو ضبطها متلبسة.

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

www.ouregypt.us