الثلاثاء، 15 نوفمبر، 2011

الحل الواقعي




احنا فى مشكله

اه طبعا ده احنا فى مصيبه مش مشكله بس  ..طيب عايزين حلول

طب عشان نلاقي حلول لازم نعمل حاجتين

اولا :نحدد المشكله الحقيقيه ..المشكله الام .. نجردها من كل النتائج ومن كل الديول الى طالعه لها عشان نشوفها كويس


ثانيا : نحدد معطياتنا ..امكانياتنا .. مهما كانت محدوده هاتنفع .. بس المهم نعرف ايه هي ونستخدمها

نحدد الاثنين الى فاتوا دول وبناءا عليهم بقى نبدأ نقترح الحلول ..ليست هى افضل الحلول على الاطلاق وانما هى افضل الحلول الممكنه الآن

يلا بقى نحاول نعمل الكلام ده

ايه هى المشكله ؟ فكروا

الامن ؟
الاقتصاد ؟
الفلول؟
الانتخابات ؟
الدستور ؟
المحاكمات العسكريه ؟
الفلوس الى اتنهبت وما رجعتش ؟
حقوق الشهدا ؟
اممممم ايه تاااااااني

كل دي نتائج كل دي ديول
المشكله الحقيقيه فوووووووق ... المجلس العسكري
لو كان المجلس العسكري عايز يصلح الى فوق ده كله كان صلحه .. بس الحقيقه هو مش عايز

طيب المجلس العسكري مش عايز ليه ؟؟
عشان المجلس العسكري زي ما قلتلكم قبل كده من زمااااان فى البوست دهون  زيه زي كل النظام السابق ملطوط معاهم ... وزي ما قلتلكم اشرفهم واخد فلل وشقق واراضي بالتخصيص من الدوله وبالعبيط  وفى منهم طبعا فساد مالي وعمولات وصفقات السلاح .. ومؤكد فى منهم العميل ... والا تبقى اسرائيل هبله ومسكوها طبله

وانتهز الفرصه السعيده دي واسأل المجلس العسكري فيما تردد فى شهر مارس الى فااااات عن القبض على قائد الحرس الوطني وسجنه ..كان ليه وعشان ايه وراح فيييييييييين
ويا ترى مين الى لسه ما اكتشفتهوووووش

طيب هذا هو المجلس  فماذا يريد ؟

عايز ضمانات طبعاااااا
اه  مجلس عامل كده يبقى من الطبيعى يرفض تسليم السلطه الا بضمانات .. ايوه طبعاااا .. ماهو على الوضع ده لو الصبح جت حكومه جديده  ورئيس جديد من اختيار الشعب ..وبرلمان جديد يمثل الشعب .. المجلس كله هايشرف فى ليمان طره بس على ايه ولا ايه ولا ايه ؟؟ ده الاسباب بتزيد .. بعد ما كان فساد مالي واداري بقى كمان فى محاكمات عسكريه وتعذيب فى السجون وشهداء واستفتاء  وبلاااااوي سووووده

اممممم تفتكروا طمعانين فى الحكم ؟ تؤ لا ما اعتقدش هما دلوقتي بيدوروا على ورقة توت يستروا بيها سوئتهم

وكالعاده السخيفه بتاعتهم لجس النبض نزلوا الفيديو بتاع طنطاوي بالبدله المدنى وبعدها ملصقات انتشرت فجأه لقوا الناس قامت عليهم .. قالوا لا كده وسعت مننا مش هاينفع الشعب برضه اتغير ما عادش شعب بتاع سنة 54 الى هلل لعبد الناصر

راحوا طالعين بوثيقة السلمي وقالك احنا نصدر السلمي وشرف ويحرق يلعن ... واهو بلاش الحكم بس نظبط نفسنا بدستور  نازل عليه ورقة توت هديه

برررررررضه فشلت  ولقوا الناس اوشكت تاكلهم احياء وحتى حليفهم من التيارات الاسلاميه الصديقه كشروا عن انيابهم وقالوا اوعى يغرك جسمك

اعتقد ان الحل الى هما دلوقتي بيسعوا له حاجتين
افتعال ازمات لتاجيل الانتخابات
ولو حصل والانتخابات اتعملت وتمت قضيه صغنووووونه كدهون بجوز محاميين من اتباعهم تتظبط وتتشك للقضاء النزيه ويتهد المجلس على الى فيه ونقطه ومن اول السطر ونرجع تااااااااااني  نلف حوالين نفسنا

ايه رايكم ؟

خلاص سودتها فى وشكم ومخنوقين مني عارفه

كده وصلنا للمشكله الحقيقيه حاليا ... المجلس العسكري

طيب المعطيات بقى ..عندنا ايه ؟
عندنا شعب غلبان تعبان جتته اتهرت مرض وفقر وظلم وكل حاجه ومش طايق نفسه وعايز يخلص من الفيلم كله ويناااااااام بقى

وفوق كل ده مبارك ابصمله بالعشره انه نجح فى جعل نص الشعب ده دماغه بيضا بلاطه ما بيعرفوش اي حاجه فى اي حاجه ولا حتى يعرفوا ياكلوا نفسهم ... اه والله للاسف دي الحقيقه الموجعه شئتم ام ابيتم

توعيه ؟ هاتوعي مين ولا مين وامته .. ما ينفعش خده على علاته بقى دلوقتي ... اذن الاعتماد على الوعي الشعبي زي ما حصل فى الاستفتاء هايضيعنا

عندنا مجلس عسكري لاااااااا يمكن هايسيب السلطه اذن المناداه بتسليم السلطه لمجلس رئاسي حاليا درب من الخيال

عندنا شرطه مواليه للنظام السابق وماسكه ذله على ناس كتييييييير والمجلس العسكري بيخطب ودهم عشان يسندوه وهما مش طايقين الجيش وعايزين يخلصوا منه ويعوثوا فى الارض فسادا مطلقين الايدى زي زمان

عندنا فلووووول .. عالم ما يعرفوش اكتر من فرعون يحكمهم ويدوروا فى فلكه ..ومالهومش اي شغلانه تانيه غير كده وهايقاتلوا من اجل ذلك  ... ومش هانقدر نمنعهم كمان لان ببساطه الي بيسن القوانين ويفعلها من حكومه او مجلس هو اصلا اصلا فلول بدرجة ما ..هايعزل نفسه ؟؟!!!

عندنا  تيارات اسلاميه  حاليا عباره عن كتلتين ..يتخانقوا ساعات ويتصالحوا ساعات J

الاخوان ككتله ... والسلفيين وباقي التيار الاسلامي ككتله اخرى ...

الاخوان: دائما وابدا يلهثون وراء البرلمان بغباوه سياسيه معهوده ..ومفاوضات مشينه مع السلطه ..وياخدوا وعود مالهاش اي قيمه ..ويكون الوضع فى المفاوضات والاتفاقيات الخفيه دي كمن لا يملك اعطى لمن لا يستحق

السلفيين : مخترقين من جهاز امن الدوله بغباوه .. ومواقفهم السياسيه الدينيه حقيقى مخجله .. مشايخهم الى مش مبطلين ترجيع فى ودان الناس يبعثوا على القرررررف

عشان البؤين الحمضانين الى هاسمعهم هنا ( عارفه ان فى اخوان وسلفيين كويسين انما انا باتكلم على رؤسهم وسياستهم العامه  مش اشخاصهم )


عندنا تيارات سياسه اخرى : نصها احزاب  كرتونيه متعفنه قد تكون اشد وطأة من الفلول على الحياه السياسيه فى مصر لكنه موجودين وما نقدرش نعزلهم  سياسيا

والنص التاني التيارات بقى المستحدثه والى منهم الناشطين و6 ابريل وكفايه و و و ... ودول بقى مشكلتهم السوده انهم مش على قلب رجل واحد  ومش منظمين وما عندهمش خبره وفى منهم فنجريين بؤ ومحبي للظهور وفوق كل ده مستهدفين من كل الناس الى فوق دول ..لانهم بذرة الثوره ..سواء اعترفتم بذلك ام لا لكن هى دي الحقيقه  والى على اساسها بيتحاربوا اصلا

وبعد ما حددنا الكلام الى فوق ده طبعا لازم نقول طريقك يا ولدي مسدودون مسدودون مسدود... ايون مسدودون بالبون

لا طبعا امال انا بارغي كل الرغي ده ليه  حاضر هاقول  حل

مع الاخذ فى الاعتبار الكلام الى فات ده

اقولكم الحل المقترح ..

القوى السياسه تتجمع كلها ..بما فيهم الفلول .. اه اه بما فيهم الفلول .. فلول  سلفيين اخوان شباب الثوره احزاب كرتونيه  احنا مش قلنا الى مش هانقدر نغيره دلوقتي ناخده على علاته ؟... ويختاروا من مرشحي الرئاسه البارزين خمسه ..اه خمسه  فى عين العدو عشان الحسد وكدهوك

الخمسه دول هايبقوا مجلس وطنى يتفاوضوا مع الجميع باسم الثوره ... يتفاوضوا مع المجلس العسكري  ويتفاوضوا مع التيارات السياسيه الداخليه ومع الشعب كمان لو لزم الامر

ممكن بقى الخمسه دول ما بينهم وبين بعض ينتخبوا ليهم ريس برضه عشان ما يقطعوش هدوم بعض والمركب ما تغرقش

هانتفاوض على ايه بقى ؟

نتفاوض مع المجلس بقى بشخصه وصفته .. نقوله بص احنا هانسيبك تعدي ياعم بالكام فيلا وكام فدان بجملة الى راح يعنى بس انت بقى يا حلو كفايه عليك كده اوي  ومالكش دعوه بالقوات المسلحه بعد ما تسيبها وبعد المرحله الانتقاليه تروح تقعد بقى فى الفدادين الى سايبنهالك وتزرعهم فلفل وشطيطه ومالكش دعوه بالسياسه

او ايا يكن شكل التفاوض بقى الى هايكون بينهم قد يكون المشهد الى انا قلته ده هزلي خيالي لكن المهم انهم هايتفاوضوا معاه على المكشوف ونخلص بقى من الفيلم المحروق بتاع المجلس حمى الثوره ونشفها وغطاها ونيمها ده بقى

المهم نوصل لوجود من يتفاوض باسمنا ولو لقينا المجلس الوطني ده بدأ يخرف هو كمان عن الهدف الاساسي الى هو دستور محترم ..نوصله بقى بعد الانتخابات البرلمانيه لا قبلها...بعد الرئاسيه لا قبلها مش مهمممممم كل ده ومش مهم مين الى هينجح اصلا اهم حاجه على الاطلاق كتابة دستور محترررررررم
لو خرف بقى المجلس واستهبل يبقى نطلع حلوين كدهون طعمين متوحدين على التحرير بيافطه واحده بس بتقول المجلس الوطني روح بيتكم فقططططططط

واكيد المجلس الوطني ده مش ملزم بتحقيق اي مطالب زي زيادة مرتبات زيد وتعين عبيد  وتوصيل نت للشارع الى ورانا

وانما هو شغلته يتفاوض على المهم بقى عشان ما عادش فى وقت لكل الفرعيات دي ارجوكم

خلونا نتنيل نعمل الدستور ونخلص بقى

ارجوكم اتفقوا...

 يا اخوااااااااان ارجوكم غيروا خطتهم وافهموا مين الى يستحق ان تعقدوا معه الصفقات
( الاخوان عايزين بوست لوحدهم ان شاء الله)

يا اصحاب الاحزاب الكرتونيه احترموا نفسكم وانضفوا ودي فرصه قدامكم تنضفوا

يا فرسان الثوره جمعوا الناس حواليكم ..وان كنت فظا غليظ القلب لانفضوا من حولك .


باقي رساله  مهمه اوووووي

يا شعب مصر العظيم ابوس اديكم اطلعوا فى مليونيه مافيش مخلوق يرفع فيها  اي يافظه غير لا للمحاكمات العسكريه  للمدنين

المهزله دي لازم تنتهي ال 12 الف مصري الى مرمين فى سجون العسكر لازم يطلعوا منه ويتحاكموا قدام معاكم طبيعيه

ما نفرحش ان المشير خرج لنا 400 واحد كاننا بنشحت منه دي مسخرررره


استرجعواااااااا ثورتكم ... استرجعواااااااا ثورتكم  ... ابوس اديكم

هناك 8 تعليقات:

elbazscience يقول...

عفوا هذا ليس وقت الانشقاق بين الليبراليين والاشتراكيين والاسلامين بل هذا وقت اتحادهم وان يكونوا يدا واحدة ضد حكم العسكر ..اتحدوا يرحمكم الله
اجل هذا هو الحل الاتحاد ضد العسكر دعوا المصالح جانبا بل نصيحتي لكل من تعجل جني ثمار الثورة من تعجل شيئا قبل أوانه عوقب برحمانه فاصبروا وصابرو ورابطوا ضد العسكر هذه المرة

مصري جدا يقول...

الأندال طامعون

والثوار يتعففون

حاجه من أتنين

يا أما ربك يحلها

يا أما المتعففون والأندال يتقاتلون


بس خلاص

ندى الياسمين يقول...

الباز

لا فض فوك تمام اتفق معاك تماما اتمنى ان يعقلون قبل فوات الاوان

ندى الياسمين يقول...

استاذهاني
الخوف كل الخوف بجد من حكاية يتقاتلون دي
والحقيقه انا شايفه فعلا فى مبالغه فى التعفف من الثوار

لمحاولتهم اثباتهم مثاليتهم واخلاصهم بس الحقيقه الوضع لا يحتمل ده لازم يشيلوا المسؤليه

تامر علي يقول...

انا متفق اجمالاً مع حضرتك لكن في ملاحظات بسيطه

حضرتك اغفلتي دور القوى الخارجية اللي مش هتسيب المجلس يمشي اصلاً علشان بيحمي مصالحها والوجود المبريالي في المنطقه مرهون بكون مصر في جيبه والمجلس العسكري في جيبه فعلاً وفي الحكم فعلاً يبقا هيسيبه يخلع من الحكم ؟ هيدعمه بكل الطرق الممكنه والغير ممكنه اما للبقاء في الحكم او بتسليمها لنظام عميل اخر

الدستور مش مشكلة ابداً ولا ليه اي لازمه لأنه ممكن يتغير في اي وقت ويتعدل في اي وقت المهم اننا نوصل للحكم ممثل حقيقي للشعب لكن الدستور ده مالهوش اي قيمة في حالة وصول عميل للحكم

الاتجاهات الاسلاميه "من وجهة نظري" هيا لوحيدة القادرة على افراز ممثل حقيقي للشعب علشان كده لازم ندعمها في التصدي للمجلس في الجمعة القادمة وما بعدها

تحياتي

ندى الياسمين يقول...

استاذ تامر
الاتجاهات الاسلاميه نفسها مخترقه وفيهم عملا وبتهيئلي ما حدش يقدر ينكر ده يعنى ممكن برضه الى يوصل يكون عميل

غير ان الاتجاهات الدينيه الى موجوده على الساحه دلوقتي انا شايفه انهم مصيبه وهايجرونا لنفس طريقة حكم النظام السابق من قمع لكل من يخالفهم

وما يختلفوش ابدا فى ايدلوجيتهم عن كل الانظمه الاسلاميه الى وقعت بلادها فى حفره ما قاموش منها

واكيد مفهوم انى مش باعترض على المنهج الاسلامي الصحيح وانما على المطبقين وعلى طريقتهم فى التطبيق

وبالنسبه للدستور اهو انا عايزه بقى اوصل للي حضرتك بتقول عليه يكون عندي دستور يتضمن حتى سبل تغيره بحيث ما يبقاش لعبه فى ايد كل رئيس جمهوريه يجى يقطع ويفصل فيه على مزاجه زي ما حصل قبل كده

وبالنسبه للقوى الخارجيه اعتقد ان من مصلحتها كمان استقرار المنطقه ومصر بالذات لان لها مصالح هنا وما تنساش قناة السويس
هما يهمهم اوي الاستقرار عندنا
فوق ضغط شعوبهم الى بتحاسبهم عقبال عندنا والى متعاطفين مع الثوره عندنا
ده ما يمنعش الشغل من تحت الترابيزه لكن انا شايفه ان اي قوى خارجيه لا تشكل اي خطر علينا كشعب دلوقتي بالعكس هما خايفين مننا الحشد رعب الكل خصوصا الدول القريبه زي اسرائيل
وايا يكن لو كان المجلس هو دراعهم فى البلد هنا يبقى المجلس برضه هو المشكله الحقيقيه
نورت يا فندم

غير معرف يقول...

ثقافة الهزيمة .. عصابة البقرة الضاحكة 4


قال المهندس عبدالحكيم عبدالناصر عقب جولته بقرى الأصلاح الزراعى فى إيتاى البارود : «للأسف الذين قاموا بالثورة لم يحكموا، والثورة لازم تكمل حتى لا يورث الأغنياء الغنى، والفقراء الفقر».

وأوضح أن عائدات قناة السويس منذ تأميمها بلغت نحو 73 مليار دولار، منها مليار واحد فى عهد عبدالناصر أقام به مشروع السد العالى، وكان يجب بناء 10 مشروعات مثله على الأقل، وقال: «لكن كلنا عارفين الفلوس راحت فين، وعارفين أننا بلد غنى يراد له الفقر». ...باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

www.ouregypt.us

UncŁē Sam يقول...

هااى ازيك
اولا البوست طوويل عليا :P
بس فهمت الملخص
وعرفت ان انا جيت متأخر
تحياااتى
متاااااااابع