الأربعاء، 14 ديسمبر 2011

صوتك لمين ؟


صوتك  لمين ؟

طبعا الموضوع ده متاخر كان مفروض اتكلم فيه من زمان بس الحقيقه انا نفسي ما كنتش لسه خدت قرار انا هادي صوتي لمين ولا على اساس ايه لانى مرحله ثالثه

انا عارفه ان فى ناس مقاطعه الانتخابات .. الحقيقه انا لقيته مش حل ابدا من وجهة نظري ان كان فى ناس بتحاول تستولى علينا فعزوفي عن حقي فى مجرد انى انتخب مش هايخليهم يستزوقوا معانا يعنى

للاسف احنا فعلا شعب بلا وعي سياسي تماما .. منه لله حسبى الله ونعم الوكيل فيه مبارك وزبانيته ومش بس مبارك الحقيقه احنا بنعاني طمس للهويه من ستين سنه ومحاوله لمسح الفكر الحر من عقولنا عشان يقدروا يسوقوا بسهوله

عموم الناس بيسألوني احنا مش عارفين نختار مين ومحتارين طبعا فيما عادا الاخوان والسلفيين والى غالبا حاسمين امرهم الا قليلا لاسباب مكانيه او فكريه خاصه وفرديه

لاحظت حاجه سخيفه اوي اوي ان كل الناس بتسالنى هاااا هاتصوتي للاخوان ولا للكتله ؟؟ على اساس ان احنا خلاص عدمنا كل الناس ما عادش في الا هما الاثنين

غلط طبعا  لان فى احزاب تانيه مستقله عن الكتلتين وباقول كتلتين لان الحريه والعداله عامل هو كمان تكتل مع مجموعة احزاب برضه
فى احزاب منفرده ومحترمه ومنها الاسلامي زي الوسط ومنها الليبرالي الوسطي زي العدل ومنهم الاشتراكي  ومنهم ومنهم  وفى منهم احزاب محترمه فعلا

وفى كمان تحالف مهم اوي للاسف ما حدش يعرف عنه حاجه كتير وهو تحالف الثوره مستمره والى بيضم ابطال ميادين مصر اثناء الثوره وبعض الشرفاء فعلا وكلهم وجوه جديده وشباب وده الى احنا محتاجينه فعلا يا جماعه
والحقيقه انا حسمت موقفي لهم لانى شايفاهم فعلا فيهم امل كبير  والله اعلم

فى كمان فزلكه زياده بيتفزلكها بعض البشر وهو انه مش بيختار الى هو عايزه من التيارات وانما بيختار الناجح او الى فيه امل ينجح

يعني مثلا انا مش عايز الاخوان ومش عايز الكتله والله عايز انتخب مثلا حزب العدل بس هو مالوش شعبيه فى منطقتنا فى الغالب هايخسر طيب الوسط له شعبيه اكتر خلاص خليني فى حزب الوسط

الحقيقه انا شايفه ده غلط من ناحية الاخلاص للمبدأ على الاقل .. مفروض تعتبر دايما صوتك هو الصوت المرجح وتختار على اساس مبداك وفكرك مش على اساس مين هاينجح خصوصا اننا فى عهد المفاجأت ما حدش عارف ايه ممكن يحصل

عشان تعبت من الاجابه على نفس الاساله دايما
رايي فى الاخوان طبعا كتيار سياسي : قد يكونوا منظمين وعندهم خبره سياسيه معقوله الا اني شايفه انهم ولائهم الاول للجماعه وليس للشعب او للوطن والحقيقه انا مش اخوانيه وما يهمنيش مصلحة الجماعه يهمنى مصلحة بلدي اولا طبعا
هذا بالاضافه لموقف شخصي منهم لموقفهم السياسي من الميدان وخصوصا فى احداث نوفبر

السلفيين : دماغهم تعبانه ويخيل لهم انهم هايعملوا مننا سعوديه تانيه لكن هيهات والحمد لله انا اعلم دينى جيدا ولا احتاج لاحد يجبرني على اتباع تعاليم دينى بالكرباج ..ولا اقبل ان يحدث ذلك ابداااا ولو فيها حياتي
بالاضافه الى انهم غير منظمين وعديمى الخبره ومخترقين بقوه من النظام السابق

الكتله المصريه: الراعي الرسمي لهم  "ساويرس "انا ما باحبوش لله فى لله  غير انى عندي قناعه انه لابد ان يكون له يد ملوثه مع النظام السابق حيث انهم لا يمكن انهم كانوا يتركوه يكسب المليارات وهو ليس من فريقهم  بالاضافه لانهم ككتله سياسيه بيضموا فلول كتير فى احزابهم وقوائهم وانا عايزه احرق الفلول اساسا


بالاضافه لان الثلاثه السابقين دول كل واحد فيهم له كتله خاصه هاتضمن له وجود قوي فى البرلمان

الحريه والعداله ... الاخوان ومن والاهم

حزب النور..... السلفيين ومن والاهم

بالاضافه للناس الغلابه الى بيستقطبوهم وهما مش عارفين اصلا يعنى انتخابات وبيخوفوهم يا اما بالغرامه او بالنار والعذاب الاليم فى الاخر

الكتله... وطبعا وراهم الاقباط وكتله اخرى من الشعب لا يستهان بها لا يريدون التيارات الاسلاميه لسبب او لاخر ولا يرون بديلا الا الكتله بالتالي بينتخبوا الكتله

انا بقى نفضت لكل دول لانى اولا مش مقتنعه بيهم زي ما قلت

وثانيا وده سبب مهم اوي اوي ياريت تحطوه حلقه فى ودنكم لو كنتم لسه ما حسمتوش اختياركم  هو ان البرلمان ده مش لازم ابدا ابدا اي كتله فيه تستاثر باغلبيه وتسيطر على البرلمان مطلوب التنوع الكبير عشان ما يحصلش انفراد بالحكم
ولا احنا هانخلع مخلوع ونجيب مصيبه تانيه يقرفنا ؟؟

فى كمان حاجه عايزه اقولها
ياريت كانت نسبة المشاركه كانت 40% فقط  لكن جايين من بيوتهم عشان عايزين حقهم مش عشان الغرامه

انا شايفه ان الغرامه دي هى مسخره وقلة ادب واهانه حقيقيه لنا باعتبار اننا محتاجين حد يكرتنا على قفانا عشان ننزل ندور على حقنا

بالاضافه لان فى ناس بتستغلها فى تخويف ناس ما يعرفوش اصلا اي حاجه تماما عن الانتخابات ولا التيارات السياسيه وبيكون سهل استقطابهم واللعب باصواتهم باي شكل من اي اتجاه

وطبعا الي اساتذه فى ذلك هما التيارات الاسلاميه وفى اكتر من واقعه مش بافتري عليهم لكن هى دي الحقيقه

واحد اثق فى كلامه قالي ان الشغاله بتاعة صاحبه المسيحيه انتخبت حزب النور عشان ناس طيبين ودولها زيت  وقالولها ان ده حزب ام النور "السيده مريم "
وتتوالي مساخر الضحك على عقول الناس
وما حدش يقولي انتى بتتهمى الشعب بالجهل ... ماهو الشعب اصلا جاهل انت هاتسعبطوا ؟؟ ده احنا اربعين فى الميه اميه ومن عندي انا بقى تسعين فى الميه زيرو وعي سيااسي

الحاجه الى احب كمان اؤكد عليها

ان الشعب المصري الحقيقى مالوش دعوه خالص بالبتنجان المخلل الى احنا بنهرس فيه وربنا انتم مش متخيلين النوعيات الى انا قابلتها فى الفتره الى فاتت لما قررت اتكلم مع اي حد اقابله فى موضوع الانتخابات ..ماساه بجد

قد يكون البعض عنده وعي فطري وانما العموما ابيض يا ورد والله

عموم الشعب المصري كمان بلا اتجاه سياسي ولافكري ولا يعرفوا البتنجان ده اصلا

وبالتالي هاقول تاني الكلمه الى بتزعل مني بعض الناس

اعزائي كل من:
المجلس العسكري ... التيارات الاسلاميه...الليبراليين ... القوى الخارجيه.. الفلول ... الاشتراكيين ... اي بتنجان تاني ... كل الطامعين فى السلطه والكراسي .... حلوا عن سمانا يا ولاد الكلب حرام عليكم الضرب فى الميت حرام ..خلونا ناخد نفسنا بعدين ابقوا اتخانقوا علينا


ملحوظه: اسفه على الشتيمه بس عشان انا قلتها كده اول مره وكنت متعصبه فمش عايزه ارجع فى كلامي تاني ... اه وزودت على الاتجاهات المذكوره ليبراليين واشتراكيين حيث انهم كانوا سقطوا سهوا

وملحوظه تانيه كل الناس الى قولتهم فى الجمله الى فاتت دي  هم اقليه فى الشعب المصري ...الاغلبيه العظمى ما يعرفش غير انه مصري ..يا مسلم يا مسيحى .. وممكن يكون عارف اسمه رباعي وامه طابخه ايه النهارده والماتش او المسلسل الساعه كام

اوصيكم بقائمة الثوره مستمره 
وشكرا

هناك 11 تعليقًا:

amr fadl يقول...

وكما قال الاخوانجى كل بئر بيطلع الى فيه واحنا جوانا ثورة ثورة

Haytham Kilany يقول...

انا برضو على لسانى نفس الشتيمه
بس ك كيان مش أشخاص لان عيب نشتم اشخاص
وبالمرة عايز ادخل الثورة مستمرة فى الشتيمه

مصري جدا يقول...

دي مخالفه أنتخابيه

هبلغ عنك

ندى الياسمين يقول...

عمرو

ايوه والله فعلا جوانا ثوره

منور يا ريس

ندى الياسمين يقول...

هيثم كيلاني

انا ما شتمتش اشخاص وانا ليا اصدقاء من جميع التيارات وهما يردوا عليك لو كانوا شايفين كلامنا

والثوره المستمره حضرتك عايز تشتمه براحتك مافيش مشكله

بس احنا لسه ما شوفناش منهم لا ابيض ولا اسود وانا مش عايزه اشتمهم لانى شايفه منهم اخلاص للقضيه لسه
لكن يوم لما اشوف منهم اعوجاج حضرتك تابع هايكون رد فعلي ايه

شكرا ونورت

ندى الياسمين يقول...

مصري جدا

لييييش يا فندم هههههه فين المخالفه دي بس ماشين فى التمام اهو

eng_semsem يقول...

سيدتي العزيزه ذكرتي في كلامك ان 90% من الشعب لا يحمل وعي سياسي وهذا يزيد من احتمالات تواجدك داخل هذه النسبه
انا متفق معك تماما ان من حق الجميع اختيار من يمثلهم اي كان انتمائها او حزبه او تفكيره اشتراكي او ليبرالي او علماني او اسلامي ولكني لا اتفق معكي في ذكر مساوئ الاخرين كان يكفينا من القول ذكر محاسن اختيارك
ان كان المرشح الاخواني اهتمامه وولائه الاول للاخوان فلماذا لا ينطبق ايضا على مرشح العدل او الثوره او الكتله او السلفيه انهم ايضا ولائهم الاول لحزبهم وما المشكله لو كان ولائهم للحزب والحزب يقدم كل مجهوده وتفكيره من اجل البلد اي كان اسم الحزب
كلنا نتمنى الافضل لمصر وقد ارى الافضل لها شئ وانت لك وجهة نظر اخرى ولذلك تجرى الانتخابات ليكون الفائز من اختاره الاغلبيه
تحياتي لك

ندى الياسمين يقول...

سمسم

انا كاتبه البوست ده عشان اقول فى وجهة نظري فى استبعاد بعض الناس عشان فى ناس بتسالنى عنها

ثانيا حضرتك حدد موقفك بتتكلم عن جماعة الاخوان المسلمين ولاحزب الحريه والعداله؟
واي حزب من الى حضرتك قولت عليه ما عندوش جماعه حدودها لا تقف عند الحدود السياسيه لمصر ومصالحها قد يوما تتعارض مع مصالح مصر
حزب الحريه والعداله خلفيته هى الاخوان المسلمين وانا اختلف معاهم سياسيا وفكريا احيانا

عفوا حضرتك فاهم الانتخابات ومجلس الشعب غلط
هو ليس اختيار لحاكم كي نقول الفائز هو الاغلبيه
انما انتخابات مجلس الشعب هى اختيار افراد يكونوا مجلس يمثل الشعب ككل بكل طوائفه يا فندم

واخيرا هل ذكيت نفسي عليكم ؟؟
كوني قادره على عرض وجهة نظري فى محيط ضيق هو بيتى الذي هو مدونتي لا يجعلنى اوصف نفسي بالوعي السياسي الكامل دون غيري

غير معرف يقول...

ثقافة الهزيمة .. مرجانة‏

" لن أتسول علاجى لأستعادة بصرى.. وحسين سالم هو «رأفت الهجان» بتاع إسرائيل " حوار مع البدرى فرغلى (عضو مجلس الشعب السابق عن بورسعيد من 1990 ـ 2005 ) جاء فيه:

ماذا عن علاقتك بالرئيس السابق حسنى مبارك؟

تحدث معى تليفونيا، بعد أن تحدث إلى قيادات التجمع أوائل عام 2005، وقال لهم: «الولد ده لسانه طويل، وهاقطع له لسانه»، وأستدعتنى قيادة الحزب وسألتنى: «أنت اتكلمت عن إيه؟»، فقلت إننى تحدثت عن الفرق بين إيراد قناة السويس المعلن بنحو 24 مليار جنيه، والمسجل فى الموازنة العامة 9 ملياراً فقط، !!! وإيرادات البترول المعلنة نحو 70 مليار جنيه، والمسجل فى الميزانية حوالى 20 ملياراً فقط، !!! ولم يعقب على حديثى أحد.

بعدها أرسلوا لى مسؤولا كبيرا ليقول لى أن فروق دخل القناة والبترول ننفقها لدعم حركات التحرر، فقلت له دلنى على حركة تحرر واحدة موجودة الأن فى العالم، أو تتلقى منكم دعما؟!!!

...
باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

www.ouregypt.us

غير معرف يقول...

عيب قوي إن الدعاية الانتخابية لفئة نبتديها بالشتيمة وانتقاص كل الفئات الاخرى علشان أقول انا أحسن من غيري .. لو كان معاك حق يكفيك عرضه وفقط وليس انتقاص كل من على الساحة

ندى الياسمين يقول...

دعايه انتخابيه ؟؟؟

دعايه انتخابيه لمين ؟؟

يا سيدى انا ما باعملش دعايا لحد هنا دي مدونه شخصيه
والبوست ده كتبته قبل ما التحق فى عمل تطوعي فى حملة الثوره مستمره
ثم انى ما شتمتش فى اي اتجاه اطلاقا
لكن قلت رايي فيهم وانا حره فى رايي

والبوست كله عباره عن توضيح لموقفي من الجميع فى الانتخابات
ودي مدونتي الشخصيه بعد اذنك يعنى؟؟؟!!!!
شيئ غريب فعلا