شوية كلام

مبروك يا شعب مصر العظيم الانجاز العظيم بجد الرائع جدا الى حصل ده

والثوره البيضاء الاكثر من رائعه والى فى نظري اسطوريه كده وحاجه درب من الخيال ولكننا الحمد لله عملناه فى الواقع ..لدرجة ان الواحد بيبقى ساعات عايز حد يقرصه عشان يصدق انه الاحداث دي بتحصل .

ومبروك علينا الحريه وان شاء الله تعالى  هانبنى بلدنا ونشوفها كما نحب وكما املنا ...

وان شاء الله نعيش الحريه ونمارسها بحق وحقيق وبجد وجديد ... ونقول راينا بلااااااااا خوف ..

ويارب نتعلم بقى اننا ما نعملش فرعون جديد ونعيش فى محرابه ونفضل نخاف ونكتم فى بؤنا برضه  والناس تبطل تكتم الحق ارجوكم ارجوكم ارجوكم

الى يغيظك ويكيدك بقى ان امي  لسه امبارح  بتقولي باقولك ايه انتى ما عدتيش تكتبي حاجه فى المدونه .. ليييييييييه يا ماما ..اهم بيقولوا قابضين على مدون ... الحقيقه لولا انها امي كنت ارتكبت جريمه شنعاء

ايه احنا هانعمل فرعون جديد ولا ايه ونعبده يا دي المصيبه علينا وعلى عيشتنا

طبعا انا عارف ان فى فريق لا باس به بيقول فى سره وهو بيقرا كلامي .... ما هذه البلهاء الي فاكره الدنيا طبق فروت سلاد  ..لكن انا هارد عليه واقوله ده اسمه يا فندم حسن الظن بالله والامل والتفاؤل ..عقبالك يعنى يحصلك منهم حاجه

 *********************

طيب مجموعة حاجات عايزه اتكلم عنها

الجيش والشعب ايد واحده ........... يرد اخر لااااااا اطلاقا الجيش والشعب مش ايد واحده

وتفنيدات وتصريحات وتحليلات حول الموضوع  اسمحولي الخص الى فى دماغي

الجيش بتاعنا خاين ؟؟  لا مش خاين ابدا ..الجيش بتاعنا وطني ومن اول يوم باقول احنا جيشنا مش مرتزقه  لا ده جيش غلبان بيقبض نص مرتبه وطنيه ... بالتالي هو مش خاين

الجيش مين ؟؟  المجلس العسكري ..نو نو نو ...الجيش هو العسكري ابو بندقيه ...او الظابط الى بينزل الميدان ..مش ميدان التحرير لا ميدان المعركه يعنى

طب المؤسسه العسكريه بيضاء اليد ؟؟ ابسلوتلي نوت ... المؤسسه العسكريه زيها زي كل حته فى مصر طالها الفساد ..يا اخي ده احنا بالصلاة على النبي الفساد دلدق على البلاد الى حوالينا ... طب نطهرها ؟؟؟ ومالوا نطهرها هانقولك لا يعنى ؟؟

طب المجلس العسكري معانا ولا علينا ؟؟  شريف ولا مش شريف ؟ ثوره ولا مش ثوره

المجلس العسكري؟؟؟ زي المؤسسه العسكريه فيه وفيه ...

طب هما فاسدين : اه فيهم فاسدين طبعا ...ده احنا النظام بتاعنا كله وكبارات البلد كلهم الشريف فيهم واخد اراضي وفلل وشقق بالتخصيص من الدوله وبيدفعوا تمنها ملاليم وياريت شقق عشان يسكنوا فيها لا ده مراجيح  بقى وزحاليق فى الساحل الشمالي واشياء من هذا القبيل

والمؤسهه العسكريه برضه ولا سيمها كبارتها  طبعا طبعا برضه كده اشرفهم واخد فلل واراضي بالتخصيص بالامر المباشر ..حاجه ببلاش كده

طب اسوأهم : والله زي ما انت عايز تقول قول ... فساد مالي وفساد اداري تجارة سلاح جايز ... حتى العماله للخارج وارده ...الله اذا كان رئيس الدوله نفسه طلع عميل واسرائيل بتبكي على ايامه من يوم ما غار

ومش فى المجلس العسكري بس ؟؟ده فى المؤسسه العسكريه كلها ... طايلها الفساد كلها .. وقلنا ولا المؤسسه العسكريه بس لا ده البلد كلها

هاشرحلكم

اصل الفساد ده شجره كل ما تقدم تكبر اكتر وتضرب جذورها فى الارض اكتر والجذور تكتر وتكبر وتقوى وتخلف جذور تانيه اصغر وتتشعب اكتر وتاخد مساحه اكتر افقيه ورأسيه وتمص من الارض اكتررررر والشجره فوق تكبر اكتر وتقوى اكتر واكتر ..... شجرتنا معمره بالصلاه على النبى مش بقى من ثلاثين سنه لاااا ده ستين سنه ....  واحد زي اونكل صفوت الشريف  ده من ايام عبد الناصر وهو فى السلطه وبيتنقل من مكان لمكان حتى بعد قضية المخابرات الشهيره والى طلع منها زي الشعره من العجينه

بالتالي النهارده لما قطعنا الشجره من على وش الارض لسسسسسسسه بقى الجذور والفروع الى طالعه جنب الشجره وراشقه فى الارض ... الشجره لما تتشعب كده اقتلاعها من جذورها شيء مستحيل .. لو اقتلعناها مش هاتطلع وطلعت هتطلع معاها الارض وتعمل حفره  كبيييييييييييره  جايز نقع فينا كلنا ما نقبش لاقدر الله

بالتالي احنا قطعناها ومطلوب مننا بقى نمزمز فى الفروع والجذور

حد فهم حاجه ؟؟؟

طب نعمل ايه اخد المطوه يعنى واروح اغز المجلس العسكري كل واحد غزه ونسكت ؟؟

لا طبعا لانى ما عنديش مطوه

لكن فى رايي المتواضع ... نصبر ...بس مش نصبر نسكت لا ... مليونيات لو فى حاجه تستاهل الله عليها ..... ضغط بالراي العام .... قضايا بقى اد ما تقول قووووول ..... نخوره فى الارض عشان نطلع الجذور المتعفنه لشجرة الفساد .... كل شويه نقولهم  هاااااااااااا فاكرين الثوره ولا نفكركم ....فاكرين عمكم حسنى ولا ايييييييييييييه

والناس الى اتعذبوا دول ما يسكتوش يروحوا يعملوا قضايا ويتابعوا قضيتهم ما نكتفيش بالنواح كفاينا نواح مكتوم سنين

وسيبونا بقى نمزمز فى الجذور وهى هاتجيب بعضها ..... ما قلتش نسكت بس لا نسعى للصدام .... نتكلم ما نتخانقش

نطالب ما ناخدش بالعافيه

فى رايي الصدام دلوقتي مش فى صالحنا اطلاقا ..... تخيلوا لو انت عندك مقشه مكسره ومتآكله ومقندله وبتكنس بيها بيتك .... وما عندكش غيرها دلوقتي ..... ايه الحل تكسرها على ركبتك ترميها بره  .. ولا تفضل تكنس بيها لحد ما ربنا يكرمك وتجيب مقشه جديده لوكس واحتمال تبقى من وسع ونجيب مكنسه كهربا وتكون فيها غسيل سجاد ؟؟

طب ما تخلونا نفضل نكنس بمقشتنا العارجه لحد ما بس نقف على ارض صلب وبعدين نشوف هانعمل ايه فى المقشه القديمه ؟؟؟!!!!

طب ما جهاز القضاء فيه فساد ...اااااااه فى فساد طبعا .. مش قلنا الفساد طال كل المؤسسات ؟؟؟ وهانطهره برضه بس بررررررضه مش دلوقتي ...

فهمتوا ؟؟؟؟ لهم رووووقه الناس دي كلها لهم رووووقه بس نعدي احنا ..نطلع دماغنا فوق سطح المايه نلقط نفسنا

 ***********

النقطه التانيه

المحافظين .... ايه يا جدعان فى هاتقطعوا بعض على المحافظين ... كلها بضعة اشهر ونقلبهم ونجيب غيرهم بالدستور الجديد وننتخب مش باختيار حد ... لو شايفين فى محافظ منهم فاسد اقعدوا كده مخمخوا وطلعوله المستخبي مش المسخره الى بتحصل دي خصوصا فى قنا

وطبعا ما حدش يقولي ما عادش فلول نظام .. لا لسه فيه امال الى بيتبكبكوا على حسنى دول ايه ...وطول ما البقر الى فى السجن معاهم فلوس لسه اهم بيلعبوا شوية اراجوزات بره  لكن مسيرهم يتبطوا جميعا ان شاء الله

وياريت نعقل ونبطل نتكلم فى الفتنه الطائفيه بقى ده انتم عالم خنيقه موت ... الى فى الصعيد مش فتنه طائفيه اد ما هى عصبيه ... نعمل لهم ايه طيب صعايده انش كل واحد فيهم عيار ونخلص ولا ايه

 *****************

الناس المتشائمه : ابوس اديكم يا جدعان بطلوا بقى .... الى هاسمعه بعد كده بيقولي خربتوا البلد هاعلق على باب زويله ...والله العظيم احنا عملنا ثوره ...ثوره بيضاء خسرنا فيها دم طاهر دم شهادئنا ... والله العظيم ثوره يتحاكى بها العالم ... والله العظيم خلعنا حسنى وزبانيته وسجناهم .... والله العظيم عملنا استفتاء وقلنا راينا بصحيح وما حدش زوره ..... والله العظيم يا ناس عملنا ثوره

مش معقول تكسير الهمم ده حرام عليكم ... وليه كل مصيبه سوده فى البلد تقولوا الفوضى والبلد خربت والثوره هى السبب ومافيش استقرار وهباب ... هو احنا اصلا كنا يعنى فعلا عندنا امن قبل الثوره ؟؟ هو احنا كان عندنا استقرار ؟؟؟ هو احنا ما كانش عندنا خراب  وخسائر اقتصاديه بالهبل ؟؟؟  طب لما ما كانش عندنا كل ده احنا عملنا الثوره ليه بنغلس على روحنا ؟؟

الجرائم وقطاع الطرق والسرقات  وحتى المشاكل بين المسلمين والمسيحين والسلفين وسائر الشعب وكل ده كل ده كان موجود بس كان متعتم عليه ... كل الحكايه اننا شلنا الغطاء القذر الى كان مغطي كل حاجه وحشه وسايبها تتحرق تحت وتكبر وتزيد

طب تصدقوا بقى ؟؟؟ طز فيكم لا خمسين طز فيكم بجد ..... ممكن تخرسوا بقى ؟؟ اوف

ياشعب مصر العظيم ... الهي يستركم فكروا بهدوء

ورجاء حاااار من كل الناس ...عشان خاطري كل الى تحت ايده ورقه بفساد من اي نوع ارجوكم يقدمها... ما يريحش دمااغه ما يقولش وانا مالي ما يقولش م اخسرش حد ما يقولش  بلاش خراب بيوت ... ما يقولش والله لما يبقى حد يسالنى ابقى اقول

السااااااكت عن الحق شيطان اخرس ............. ماتكتموش الشهاده ما تكتموش الحق ...كلنا مسروق حقوقنا ارجوكم رجعولنا حقوقنا

وكفايه عليكم كده النهارده

الليبراليه ..واشياء اخرى

طبعا اكيد اكيد كلنا شايفين دلوقتي الكلام الى بيتقال على الساحه كل كلمه واختها قضيه لواحدها والله وكيل نص الناس مش فاهمه الى بتقوله ولا الى بتسمعه

فبعد ما شوفت اهوال من كلام الناس على الفيس بوك وتعليقات حقا عجيبه ومريبه  اتقالت سواء عندي فى الفيس بوك تعليقا على فيديو اهبل لواحد اقل ما يقال عنه انه متخلف (اه بقى انا باشتمه انا حره ياعم )...او تعليقات بقى مرميه فى كل مكان فانا حبيت فى البوست ده ان شاء الله اتكلم عن الليبراليه بالمختصر المفيد

وبالتفسير الى اتمنى يكون سهل والناس تقدر تفهمه

الليبراليه : كمعنى لغوي مشتقه من من كلمة liber   والى بتعنى باللاتينيه حر ... من هنا جت تسميتها بليبراليه او حريه

طيب يعنى ايه بقى الليبراليه كمنهج ...خلينا نعتبرها اولا منهج فكري وبعد كده نطبقها بقى المجالات المختلفه(سياسيه اقتصاديه معتقديه )

الليبراليه كفكر هى بتقول ان هناك حريه مطلقه ...مطلقه من وجهة نظري يعنى من كل النواحي وعلى كافة الاشكال

طيب ماشي الكلام ده لكن على ارض الواقع مافيش حريه مطلقه طبعا !!! دى حاجه مستحيله اصلا ان يكون فى بنى ادم فى الدنيا او كيان سياسي او اجتماعي او غيره عنده حريه مطلقه تماما

امال ايه ؟

انت خدت حريتك ؟؟ انت دلوقتي حر تقدر تختار مصيرك ..تقدر تقول رايك ..تقدر تعيش زي ما تحب ...اه

طيب تعالى بقى  انت لازم تعرف ان حريتك تنتهي عند حرية الاخرين

وحرية الوطن جزء من حريتنا ... وحريتك مقيده بانضمامك لاي مؤسسه  او دوله اول كيان

بمعنى لو كنت مثلا جنسيتك امريكى فانت بانتمائك للكيان الامريكى عليك واجبات ولك حقوق ...(تلزمك بها قوانين الكيان كما تضمن حقوقك فيها نفس القوانين )

ولو كنت مسلما فعليك واجبات ولك حقوق

ولو كنت زوج  ولو كنت تعمل فى المنصب الفلاني ولو كنت ولو كنت الف قيد مضروب حوالينا

عايز تتحرر من القيود تماما خالص بتاتا البته ؟؟ اه ماشي حوش بقى واشتريلك جزيره كده فى وسط البحر مترين فى مترين حتى واقعد هناك بقى خليك براحتك  على الاخر لا يمكن ان يقيدك ساعتها غير قيودك الفكريه ومعتنقاتك الدينيه مثلا(تبقى رقيب نفسك يعنى )  وما الى ذلك..

يعنى برضه ممكن تبقى لوحدك وعندك قيود على حريتك ؟؟  ااااااه طبعا

والقيود مش لازم تكون اذلال او كبت حريه او غيره وانما هى نظام  نخضع له لمصلحتنا الفرديه احيانا  او لمصلحة كيان اكبر احنا بننتمي له

بمعنى قد تكون مصلحتك الشخصيه ومصلحة فلا ن وفلان وفلان ..اننا نمشي على نظام معين يكفل لنا تحقيق هدف معين يصب فى مصلحه عامه للمجتمع مثلا او للكيان الى بننتمى له

او كما يقول مفكرون الليبراليه :

أن مصلحه المجتمع ككل تتحقق حتما من خلال عمل كل فرد فيه على تحقيق مصلحته الخاصة...

ايا يكن عشان انا صدعتكم

فى رايي ان الليبراليه فى مجملها او فى اصلها هى الحريه او التحرر ..... ولكن هى لها مناهج كتير اوي تلاقي فى ليبراليه كلاسكيه وتلاقي منها عصري وتلاقي منها مطوره ومنها ذات مباديء اشتراكيه وهكذا

بمعنى ان الواحد لما يجيب بدله ويلاقيها مش مقاسه ..فياخدها يقيفها على مقاسه ..تظل هى بدله برضه لا تتحول الى فستان وانما بدله على مقاسه

كذلك الليبراليه او اي منهج تاني عشان تطبقه  لازم يكون له طابع خاص يتلائم ومحل تطبيقه ...

حتى الدين الاسلامي لو خدنا الموضوع بفكره شامله وبدون تحيز الفكر المنهج الدينى الاسلامي فى حد ذاته من وجهة نظري وناس كتير يتفقوا معايا فى ذلك وحتى غير مسلمين ..فكر عظيم جدا ومتكامل الى حد بعيد وتطبيقه ممكن ببساطه وسهوله كمان

لكن للاسف الشديد فى تجارب كتيره قدامنا حصلت ظاهرها تطبيق الشريعه الاسلاميه او المنهج الاسلامي ولكن فشلت وفى رايي فشلت لسوء التطبيق ولتفصيل المنهج على مزاج واهواء واتجاهات مطبقيه ومش طبعا لقصور المنهج لا سمح الله

والحقيقه انا مهما تفرقت الاتجاهات والتيارات والجماعات لا ارى دين اسلامي الى في كتاب الله وسنة نبيه ...وليا عنين ومخ اعرف اميزهم واتدبرهم ...وباقي من تشعب بعد ذلك الله اعلم بما هم عليه بقى من صح او خطأ (ده راي شخصي بحت )

نرجع لموضوعنا ان قد يكون الفكر او المنهج فى اساسه حميد ولكن تطبيقاته المختلفه غير حميده بالمره وتبقى دائما مقولة  نيلى الخالده فى فوازي رمضان (النظريه صح والتطبيق غلط )

وعليه ارجوكم قبل مهاجمة فكره معينه او منهج او شخص او اي حاجه تحبوا تهاجموها انشاله صباع رجلكم الصغير ..اعطيهم من وقتك نص ساعه قرايه تفهم ايه الموضوع من اكتر من مصدر ارجوكم يا جماعه  خلينا نتغير ارجوكم وبلاش العلم البؤيئي والمهاجمه الغير مبرره والانسياق ببساطه ورا كل واحد يزعق ويجعر ويجعجع بكلمتين فارغين

وصدقونى انا لا عايزه الى يحكم مصر يطلع يقول انا ليبرالي ولا اسلامي ولا مسيحى ولا اي اتجاه معين من الاتجاهات

انا عايزه الى يحكم مصر يطلع يقول انا مصري ...انتمائي الاول مصري....ولائي الاول لوطني ..مصلحة وطني وشعبه فقط

عايزه رئيس جمهورية مصر العربيه  يكون بيمثل الاغلبيه الساحقه فى مصر ...الى هما مين ؟؟ الى عارف يرفع ايده  ميييييييييييييين..

الى هما ناس مصريين مالهومش اي انتماءات فكريه او معتقديه او سياسيه  ..ناس متدينين اه لكن مش متعصبين ...

غالبيه عظمى مسلمين ايوووه ...مسلمين بس مسلمين بلا اله الا الله محمد رسول الله ...وكتاب الله وسنة نبيه ..لا هما اخوان ولا هما سلف ولا جهاد ولا اي حاجه من دول

اه الناس دي موجوده .. وقد يكون بعضهم عدده كبير ...ولكن رغم انف الجميع تظل الغالبيه العظمي مش اي حد من دول

 وان شاء الله هاتفضل كده عشان هى دي فطرة وطبيعة الشعب المصري

ومصر دوله اسلاميه بشعبها غصب عن التخين فى الدنيا دي كلها ...بالماده التانيه او من غيرها ... افهموا بقى

كان فى حاجات وتعريفات تانيه كتير عايزه اتكلم عنها بس كفايه كده النهارده ونكمل المره الجايه ان شاء الله ان كان في عمر

ماذا بعد ؟؟ ....يلا ورانا شغل كتير

زي ما قلتلكم البوست الى قبل الى فات ايا كانت نتيجة الاستفتاء فالمهم ان الاستفتاء حصل وورانا شغل كتير كتير

طبعا لكل الى بيتكلموا فى حوادث تزوير كلام مش حلو خالص وبيشكك فى النتيجه وفى نزاهة القضاء وده فى رايي مش صح اطلاقا لانه مافيش اصلا حاجه بتطلع بدون تحاوزات ميه فى الميه ده فى اكثر الدول تقدما وديموقراطيه بتحصل حوادث تزوير يعنى فخلينا نقول ان نسبة الخطا معقوله  حتى موضوع الدفتر ده مش دليل على حاجه زي ما انتشر رد القاضي الى قال انه الدفتر مش مهم وبيتسلم للشرطه  وما الى ذلك

التزوير الحقيقى الى حصل فى نظري هو تزوير فكرى  وده بعد الى حصل من السلفيه والاخوان والى انا حكيت عليه فى البوست الى فات واكتر منه كتير سمعته بعد كده من الناس الثقات فى محافظات تانيه غير الدقهليه

وما زلت مقتنعه ان الحزب الوطني كان يستغل جوع البطون اما الاخوان والسلف فهم استغلوا جوع العقول وفى الاثنين المواطن الغلبان مالوش يد فيه فقد كان مقموعا لعقود من الزمن

بس خلاص خلصنا بقى من الكلام التعبان ده وكفايه كده ولو كلامي مش عاجب السلف والاخوان فمش مهم ما يبقوش يقرولي تاني..مش عايزه صداع اكتر من كده

المهم

هانعمل ايه ؟؟؟ فكرتوا ؟؟؟

قبل كده اتكلمت عن الحزب سريعا .... عارفه ان كل واحد هينام ويقوم يقول جالي هتف فى المنام بيقولي اعمل حزب ..ما ينفعش الكلام ده لازم تحصل توعيه ان ده مش وقته لازم نوحد كلمتنا  تفتيت الاصوات مش فى صالحنا اطلاقا مطلقا

ارجوكم يا جماعه خلونا نعمل حزب بروح التحرير حزب مصري بسسسسسس مصري مالوش اي انتماءات ولا افكار تانيه فاهمنى ؟؟

خلينا نعمل حزب عنوانه شباب الثوره باي اسم بقى  خلى الناس تلتف حواليه

فاكرين لما جينا نبدا الثوره قلنا  ايه ؟؟ يوم 25 يناير  اطلعوا من العشوائيات وخلوا هتفاتكم بتقول رغيف العيش والبطاله والجواز وجايع الناس كلها مش هتفات بتقول اصلاح سياسي ولا بتنجان

وقد كان ...

وفى رايي هو ده سبب نجاح الثوره ان الشباب طلعوا اتكلموا بوجايع الشعب الحقيقيه

انا باطلب من ائتلاف الثوره الى مش عارفه صوتي يوصلهم ازاي ولا هما مين تحديدا  انهم يشكلوا حزب سريعاااا

حزب يبقى له مكان فى كل بلد فى مصر  شبكه قويه واثقه انكم تقدروا تحققوها وضموا لكم ناس لهم شعبيه فى  دوايرهم واختاروا متحدثينكم عشان تكسبوا قلوب الناس البسيطه

اتمنى ان الحزب ده يكون توجهه او اهدافه الاتي

الجعان يلاقي ياكل

المريض يلاقي علاج

العريان يلاقي ستره

الشريد يلاقي متوى

البطال يلاقي شغل

الشباب يلاقي جواز

الشعب يلاقي امان داخلي

وكل ده يحصل بكرامه للجميع

وعلى الصعيد الخارجي

بدون اي زحلقه فى الكلام

انا عايزه السياسه الخارجيه  ايا كانت شكلها تدينى حاجتين

اولا ضمان تنفيذ السياسه الداخليه السابق ذكرها

ثانيا  عودة مكانة مصر ومواطنيها  عربيا واسلاميا وافريقيا بل وعالميا ايضا

ده الى المفروض احنا محتاجينه الفتره الى جايه وعليه ارجوكم عايزه حزب يقول الكلام ده الهي يستركم توحيد فى الصفوف بالله عليكم زي ما كنتم فى التحرير كده بتقولوا هتافات واحده عايزه برضه اداء الحزب ده يبقى جماعي وكلمه واحده بتتقال فى اسكندريه تتسمع فى اسوان

ومرشح واحد لكم فى كل دايره من فضلكم عشان الاصوات تلتف حول شخصيه واحده واختاروا المرشحين بعنايه اوزن بميزان حساس بين الصلاحيه والكفاءه والقبول عند الناس ...القبول عند الناس مهم اووووووي فى المرحله دي وياريت تختاروا حد اصلا له قبوله فى منطقته وبعدين تضموه ومباديئكم لما تكون زي الى انا قلتها مش هايختلف عليها اثنين

فعلوا كلوا بنى ادم تقدروا توصلوله وواعملوا مؤتمرات مش فى القاعات المكيفه وانما فى الشوارع مع  الناس انزلوا الشارع وكلموا الناس

عايزه الحزب ده يبقى اعضاؤه مش اقل من مليون بنى ادم قبل دخول الانتخابات يا جماعه واظن احنا خرجنا ورا الشباب فى ميادين التحرير 13 مليون ياريت مليون منهم يؤمن فكر الحزب وينضلم ليه وانا منهم لو ان الحزب كانت هى دي مبادئه

نيجى لانتخابات الرئاسه

الحمد لله تعالى عندنا شخصيات محترمه اوي ناويه تترشح ... انا اميل كل الميل لاننا نخلي الرئيس يختار نائب له وينتخب معاه فى بطاقه واحده

بالتالي الشرفاء الى ناويين يرشحوا نفسهم ارجو منهم التنسيق مع بعض بحيث برضه نتفادى تفتيت الاصوات حيث اننا محتاجيت تكتيل الاصوات مش تفريقها على مرشحين كتير

عندنا 3 مناصب اهم من بعض   رئيس الجمهوريه  نائب رئيس الجمهوريه   رئيس الوزراء

بالتالي الناس  الى عايزه ترشح نفسها للرئاسه كلهم  لو نسقوا  مع بعض لما فيه مصلحة الوطن الى حاليا فى امس الحاجه لقلوب وطنيه بالمقام الاول ومش بيهمها اي مصالح او امجاد شخصيه  ونطلع من الهيصه دي كلها بمرشحين اثنين بس محترمين ومعاهم نائب ورئيس وزراء محترم برضه و ما يحصلش تفتيت اصوات ولا سيما ان نفس الى عملوا تكتل لا اخلاقي من وجهة نظري على كلمة نعم هايعملوا تكتل برضه وهايدوا صوتهم لشخص واحد فقط

يبقى عشان يكون فى توازن لازم يكون فى قصاده كمان شخص وراه تكتل مهم عشان نحقق توازن معقول فى القوى المطروحه فى الساحه وقتها

مش عارفه اقتراحاتي ممكن توصل ازاي لكن انا باقول والباقي على ربنا وعلى كل من بيقرا كلامي

يعنى بتهيئلي ده تصور اولي ومش عارفه قدت اوصلكم جزء من دماغي ولا لا
وطبعا يهمنى اوي اسمع منكم مقترحاتكم ما تبخلوش بيها عليا

يا شعب مصر العظيم من فضلكم صحصحوا  معانا ورانا شغل كتير اوي

تحياتي للجميع

صوت الحريه بيناااادي

السلام عليكم

ايووووووووووه دي ايدى

انا ادليت بصوتي ..ايوه صوووووت والله صووووت عشت وشوفت اليوم ده يا ناااااس

الى ما نزلش ينزل حالا حالا حالا ..احساس جميل اوي

انا من ساعتها ماشيه فى الدنيا اقول  فى كل شارع فى بلااااااادي صوت الحريه بيناااااااادي

فرحانه اوي يا نااااااس الاقبال الى شوفته الى اللجان فظيع اقبال بصحيح ومافيش بلطجيه ومافيش منع تصوير ومافيش خناقات ومافيش اي حاجه الناس واقفه بصبر فظيع فى الطوابير

انا ما نمتش من امبارح غير ساعتين وقمت صليت الفجر وقعدت مش عارفه انام لحد ما جوزي جه ينزل قالي هانزل اروح مشوار واجيلك قلتله لااااااااااااا العب غيرها معااااااااااك لازقالك لحد ما تودينى ..ماهو مش راضي يودينى وحدي ... وقد كان لزقتله من الصبح لحد العصر لما وداني نيهاهاهاها .... مبسوطه اوي يا جدعاااااااان

المهم هاقولكم الى شوفته بقى النهارده سريعا

عديت على 3 لجان زحمه موت موت موت ... ناس كتير بس واقفين طوابير فى  الغالب عاملين طابور ستات وطابور  رجاله

فضلنا ندور على لجنه فاضيه شويه مافيش فى الاخر لقينا لجنه الستات فيها قليلين شويه فرضا قالي باقولك ايه ادخلي صوتي انتى عشان اخلص من زنك نيهاهاهاهاها

اللجنه الى انا صوت فيها كان منتشر فيها السلفيين مش عارفه ايه السر بس هما كانوا كتير

مستفزين لاقصى درجه بس حصل قدامي موقف بشع واحده واقف للستات الى داخلين يصوتوا كلهم تقولوهم قولوا نعم علموا على الدايره الخضرا فراحت واحده من الي واقفين قالتلها ما ينفعش كده كل واحد حر  اتكلمي عن نفسك بس ...تتخيلوا تعمل ايه ؟ الهانم المنتقبه ؟؟؟ راحت شايله ايدها ورازعاها قلم

ااااااه والله طبعا الناس حجزوا وكده وكان فى بره اثنين عساكر كده شرطه تدخلوا في الامر

الحقيقه انا ما شوفتش القلم بعينى لكن حماتي شافته وجوزي شافه وانا شوفت بقى الكلام مع العساكر

منتهى قلة الادب بجد الى هما بيعملوه ده

المهم دخلت اللجنه وصوت الناس الى فى اللجنه محترمين اوي الصناديق مقفوله الورق مختوم اللجنه فى قاضي بيتحققوا من الشخصيه فى ستاره بس ما حدش بيستعملها اوي كفايه الواحد ياخد جمب

كله تمام يعنى مافيش اي مشاكل

وانا خارجه بقىىىىىىىى  لقيت واحد تيييييييييييييييت  واقف يقول المنقبات يجوا على طول على باب ما يقفوش فى الطابور ؟؟؟!!!!  طبعا انا كنت خرجت من اللجنه خلاص ما ينفعش ارجعله بس قلت للناس ما تسكتولوش الراجل ده يعنى ايه المنقبات ما يقفوش فى الطابور منين الامتياز ده يا يهنى يا سيد امك انت  كان نفسي ارجعله بصراحه  بس الحرس مش بيدخل حد تاني

المهم هاقولكم الى سجلته النهارده

واحده قريبتى عمرها خمسه وستين سنه تقريبا  عفاكم الله مريضه بقالها سنين وقعيده على كرسي متحرك بل انها لا تستطيع الجلوس اكتر من دقائق هى دايما نايمه على ظهرها ..... عرفت النهارده انها راحت الاستفتاء رغم كل الصعوبات الى ممكن تقابلها فى ده بجد ....حلوين اوي

اختي راحت صوتت فى لجنه داخل المعهد الدينى بالمنصوره وده تابع للازهر طبعا ومن الحاجات الى لفتت نظرها هناك ان كان فى قسيس رايح يصوت فى اللجنه الى فى المعهد الدينى مع ان فى على بعد امتار لجنه تانيه  داخل مدرسه .....حلوين احنا اوي

السلف والاخوان ....اخس اوي اوي اوي ليه كده ؟؟؟

السلف هل اصبحتهم بما تفعلوه الان خلف للسلف الصالح فعلا ؟؟؟؟

الاخوان المسلمين.... تهانيا لكم فقدتك كل من كان يكن لكم احتراما او بعضه من العقلاء

الوطني  العبوا بعيد مستقبلكوا ضاع

الشعب المصري ...... تعظيم سلام للشعب المصري وكالعاده تكتب التاريخ على راي المحروس بتاع ايطاليا

مبروووووووووووك يا ناس مبروووووووووووك  طعم الحريه

فى كل شارع فى بلاااااااااااااادي         صوت الحريه بيناااااااااااادي

(لا للتعديلات الدستوريه)

اخيرا وبعد حيره كبيره كبيره كبيره  استخرت ربنا واستقريت على انه لا للتعديلات الدستوريه

مش هاتكلم كتير فى موضوع قتل بحثا هاقول بعض نقط سريعه

اولا : دستة كتاكت نبشت فى دماغي لما قالت بس لما لقيت هذا الكولكشن الغريب ...اخوان سلف جهاد فلول الحزب الوطنى ....وكلهم اتجمعوا على كلمه واحده وبيقولوا نعم ؟؟؟!!!

نعم الله عليهم او مش مهم

ثانيا : الكلام المروج له والى من نوع لو قلنا لا هانرجع للدستور بدون تعديلات...او هاندخل فى نفق مظلم ...او هاتعلن الاحكام العرفيه ؟؟؟!!! ايه البتنجان ده ...هو احنا عيال هاتخوفونا بابو رجل مسلوخه ما تتكلموا كلام عاقلين بقى

ثالثا: لما قريت مواد الدستور المعدله مع انى ماليش خبره حسيت ان فيها ثغرات وسالت ناس لهم خبره شويه فى القوانين واكدولي ظنوني

رابعا : والى خلاني حسمت الامر ان بعد البحث لقيت ان نعم هاتدي شرعية للدستور المرقع وتنزع مننا احنا كشعب الشرعيه الثوريه..اما لو قلنا لا هايكون الاعلان الدستوري  غصب عنهم مؤقت لانه ما اخدش شرعيه باستفتاء  شعبي وايا يكن ان كنت  اعلم ان حل هو الخاطيء وحل  لااعلمه جيدا اختار الخاطيء؟؟ باي منطق ؟؟

خامسا : انا الداعيين الى نعم بدعوى  الاستقرار ..هم غالبا نفسهم الداعين الى وقف الثوره واخلاء التحرير لنفس السبب ..الاستقرار والخوف من الفوضى

سادسا : لا اصدقهم فى ادعاء شيوع  الفوضى باختيار لا ..وعدونا بالفوضى والفراغ الدستوري بدون مبارك ...واصرينا وازحناه عنا ..وعدونا بالفوضى لو اقيلت وزارة شفيق ... وما عبرناهومش واتشال وابدلنا  الله خير منه ....وعدونا بالفوضى لو حل جهاز امن الدوله ... وحل واصبح وجودهم غير شرعي ولسه زي ما احنا ما جرلناش حاجه

بالتالي لما يوعدوني بالفوضى لما اقول لا مطلوب منى اصدقعهم ليه ؟؟!!! برضه ابو رجل مسلوخه ؟؟؟

سابعا : وصلت الى قمة القرف من جميع الاتجاهات الى استخدمت الدين لتحقيق مكاسب سياسيه والتاثير على الناس وان قول نعم واجب شرعي ... ايه القرف ده مش هاتحترموا عقول الناس بقى
وتخويف الناس بررررضه بالغاء الماده التانيه من الدستور ..برضه ابو رجله مسلوخه ... مع ان حتى لو قلنا نعم الدستور المؤقت مفروض هايتلغى وهانعمل غيره ولو فى نيه تتشال هاتتشال ...مسخره

ثامنا : ناس سياسيين انا بارتاح لرايهم ولضمائرهم رايهم لا من البدايه هما حسموا امرهم لكن انا حسمت امري امبارح بس ...وطبعا لو جد جديد مستعده اغير رايي ولو كنت قدام الصندوق ..بس لو جد جديد

بس كده خلاص  ده ملخص سريع للى فكرت فيه فى الكام يوم الى فاتوا

والى كل من يختلف معايا ويقول نعم وفى نفس الوقت يحترم كلامي يا اهلاااا وسهلا بك والمهم نقول راينا

والى كل من يختلف معايا ويتريق على رايي او يتساخف عليا ... اعرف على طول انه لمؤخذه اهبل

سواء ان كان نتيجة الاستفتاء بنعم او لا

اعزائي شباب الثوره مطلوب مننا عمل عمل عمل ...نشاط سياسي وانتشار سياسي وتواجد قوي

امنية حياتي تكوين حزب سياسي معتدل ينتسب لشباب الثوره الحقيقيين ويكون هدفه الاساسي فى المرحله القادمه

الجعان ياكل ...المريض يتعالج ....العريان يلبس ... الشريد يلاقي متوى... الناس تتعلم ...الشباب يتجوز

ومع كل ده علاقات خارجيه محترمه تعمل لصالح الوطن ....فقط لصالح الوطن

مش عايزه يكون له اي انتماءات سياسيه ولا دينيه ولا اي هباب بسسسسسسس يكون كده

الشعب المصري كله كده مالوش انتماء سياسي  محدد وعليه كل الاحزاب والتيارات الى على الساحه لا يمثلوا القاعده العريضه من الشعب المصري

يلاااا بقى خلينا نشوف الى ورانا وبطلوا كلام فى لا ونعم  خلصنا

دستور يا اخوانا

السلام عليكم

طبعا الان الوضع غير مستقر تماما وانا قلقاااانه اوي اوي بس يعنى عندي امل فى ربنا كبير ربنا ينتعنا بالسلامه

عايزه اتكلم معاكم النهارده عن الدستور بس قبل كلامنا عن الدستور عندي كلمتين عايزه اقولهم لكم بخصوص الجيش

الناس محتاره من اول يوم فى الثوره ..يا ترى الجيش معانا ولا علينا ولا عايز ايه بالظبط

الحقيقه انا حاليا عندى يقين ان الجيش زي الشعب بالظبط ناس منهم مقتنعين جدا بالثوره وناس لا

الناس الى مش مقتنعين فريقين  ..فريق فاسد ومستنفع بالفساد الى فات ..وفريق تاني شايف انها ثوره عيال او انها هاتخرب البلد ...يعنى نفس موقف الشعب

ولكن...

انا برضه حالهم حال الشعب الجزء المقتنع بالثوره وعايز يحميها اكتر واكبر واقوى

حتى لو كان جزء من قيادات الجيش مش معانا وانما عارفين كويس ان الظابط الى هايكون على ارض المعركه مش هايكون معاهم

طيب نعمل معاهم ايه ؟؟ من وجهة نظري المتواضعه بقى يا شباب .

احنا عملنا ثوره ..المفروض ان الثوره هلى الى تحكم البلد دلوقتي لانهم هما الشرعيه الوحيده دلوقتي فى البلد

الجيش بقى ما ينفعناش ...اه لانه محايد ..ينفعنا فى حماية البلد عموما انما يحكم لا ..احنا دلوقتي عايزين حكم متحييييز للثوره  ...اه متحيز للثوره حقنا يا جدعان احنا مش عملنا ثوره ولا كنا بنلعب استغمايه فى التحرير

بالتالي الحل دلوقتي الى شايفاه مناسب هو مجلس رئاسي من اثنين مدنيين وواحد  عسكري

هنختاره زي ما حصل مع عصام شرف نقدم اقتراحات ويختاروا منها الشرفاء والكفاءات كتير كتيركتير

لما يكون عندنا مجلس رئاسي بقى متحيز  للثوره ويعمل  لنا الى احنا عايزينه وما يخضعش لاي ضغوط من اي نوع وما يكون مداس على رجله ولا على راسه بطحه لاي حد خصوصا من فلول النظام القديم

ساعتها بقى نبقى فضينا وعندنا وقت وعندنا دماغ نفكر فى موضوع الدستور ...مستقبل مصر الحقيقى

الدستور

انا كنت قعدت افكر فى موضوع التعديلات وكنت كتبت بوست بالفعل عن التعديلات وما كنتش عارفه اكون راي فيها وقلت اسمع منكم وتسمعوا مني لكن جدت ظروف واتاجل البوست واتغيرت الافكار فقلت نبدا من جديد

التعديلات المطروحه  الى احنا المفروض هانستفتى عليها يوم 19 مارس ..نعم ؟؟؟ ازاي ؟؟ طب هى فين يا معلمي ؟؟  لحد الان مافيش بيان رسمي بنص المواد المعدله ؟؟؟!!! انا قريت وسمعت اكتر من حاجه وفيهم اختلافات طب مين صح

طيب اقول الى لاحظته

اولا  مجلس الشعب ..ما جابوش سيرة ال 50% فلاحين ولا مقاعد المرأه ولا كل  هذا الهبل ..طب ايه ؟؟

هما دول الى هايختاروا اللجنه التاسيسيه ؟؟!!  والمرشحين للرياسه وكل ده ؟؟ طب  ازاي؟؟

ثانيا : دى بقى نقطه شوفتها مختلفه فى حاجتين او مره نشرت التعديلات فى جرائد قالوا ان الطعون على عضوية مجلس الشعب تكون امام محكمة النقض ..ده كويس ...لكن فى المؤتمر الصحفي لطارق البشري قال المحكمه الدستوريه والحكم نهائي لا يجوز الطعن عليه  .. دى مش حلوه ...ليه ؟؟ ما ياخدش درجتين ليه نقض ودستوريه مثلااااا ؟؟

ثالثا :سلطات رئيس الجمهوريه ما حدش  جه ناحيتها اوي برضه غير 3 نقط ابرام المعاهدات واعلان الطواريء وتعديل الدستور !!!

رابعا :الاحزاب ؟؟!!! ايه هايبقوا ازاي مين فين ...امال هانعمل انتخابات بمين ؟؟ الوطني والاخوان ..وشوية الكتاكيت الى على الساحه ؟؟؟  ده يبقى استهبال

خامسا : السيناريو المطروح  والى بيقول نعمل انتخابات برلمانيه بعد شهرين ؟؟!! نعم طب مين وازاي وفين

لعلمكم هو ممكن بس هاتبقى اميشن امبوسيبل محتاجه مننا نعمل بهلونات عشان نقنع الناس المحترمين فى كل الدواير انهم يترشحوا ..لان دلوقتي الى موجودين على الساحه هما الحزب الوطني اه طبعا لسه موجودين بقرفهم وبلطجياتهم  وسلطاتهم كلها .....والاخوان .. انا ما باتعاملش مع الاخوان على انهم بعبع لا ..بس برضه مش عايزاهم يبقوا هما اغلبية المجلس ولا حتى ثلث المجلس .. وده مش لراي شخصي او مصلحه شخصيه وانما المفروض كده اصلا مايكونش فى اتجاه معين هو الى مسيطر الفتره الجايه فقط لانه مافيش غيره  .

سادسا : المحافظين ونظام الحكم المحلي ...نعم ؟؟؟ ايه عايز تسيب العصابه دي فى البلد واحنا بنشتغل فى دستور والانتخابات والجو ده ؟؟؟ ده لا ممكن ابدااااااااا

سابعا : بالنسبه للماده الخاصه باشتراط الجنسيه المصريه وعدم حمل غيرها حتى سابقا ولا هو ولا مراته ولا ابويه.....انا شايفاها شروط صعبه اوي ...بس بيرن فى دماغي كلمة طارق البشري لما قال احنا بنطبق الشروط دي على ظابط بدبورتين فى الجيش ..ورئيس ا لجمهوريه ده هايبقى القائد الاعلى للقوات المسلحه ..ما يبقاش عليه الشروط دي ؟؟!!!

حقيقى لسه محتاره فيها النقطه دي 

                                                              

كمان حكاية الحكم يكون برلماني ولا رئاسي ما اعتقدش هاتفرق كتير اوي لو كان سلطات الرئيس محجمه ويبقى حكم ديموقراطي فعلا مش بتنجاني زي الى احنا كنا فيه

طيب انا دلوقتي واقفه اشد فى شعري فى النص لانى مش عارفه اقرر

لكن فى قدامي صوره مش عارفه هى هاتكون صح ولا لا

لكن اعتقد انها هاتكون مناسبه ....وطبعا عايزه اسمع رايكم

نستعرضها كده ونشوف:

اولا: زي ما قلت فوق مجلس رئاسي ويتفضل الجيش ومتشكرين لحد كده ومش يخلينا نتسرع عشان هو مش فاضي يقعد لنا...والمجلس الرئاسي مع الحكومه الى موجوده دلوقتي يسيطروا على البلد ويمشوها وينقذوا البلد اقتصاديا وهاتمشي فل والله

ثانيا : تجميد عمل الحزب الوطني ..وحرمان اعضاؤه من العمل السياسي والانتخابات جمعاء  لمده من خمس لعشر سنين ...كفايه الى عمله  فينا 

ثالثا : فتح الباب لتكوين الاحزاب ..عشان يبقى فى مناخ سياسي يسمح باقامة انتخابات محترمه ومجلس شعب محترم يمثل الشعب بصحيح

رابعا : الحكومه والمجلس الرئاسي  يختاروا اللجنه التاسيسيه الى هاتحط دستور جديد نوووفي على الزيرو عشان زهقنا المستعمل المرقع يا ريت ...على راحتنا بقى ما البلد ماشيه والناس بتاكل مم والتنميه عادي والاقتصاد عااادي

والدستور لما يتكتب ينزل رسمياااا مكتوب بصياغته الاساسيه ونتناقش فيه لمدة شهرنقطعه من غيرما يكون  فى امن دوله يعملنا حوادث وفتن عشان نتلهي فيها عن الكلام فى الدستور ...وبعدين نصوت على الدستور وطبعا كان بودي اننا نصوت على المواد ماده ماده ..بس مش عارفه ايه صعوبة موقف زي ده فى الحاله الى احنا فيها دي

خامسا :الانتخابات الرئاسيه  بقى وتكون حسب الدستور الجديد ونقعد برضه شهرين ثلاثه نقلب فى المترشحين ونسمعهم ويسمعونا ونقرر برااااحتنا ..وبعقلنا مش بقلبنا نبطل نستدعي خالتي عواطف بقى فى الامور السياسيه الى زي دي ..وبعد ما نختار  الرئيس  نقوله يلا يا حلو ظبط نفسك  بقى واختار نائب ورئيس وزراء  وشكلوا الوزاره 

وسادسا : ونكون ساعتها بدأنا فى ترشيحات مجلس الشعب ..ونكون بقى اتنصحنا والناس اتنفست الحريه وبقى فى احزاب حره .ومستقلين محترمين ...والاقي واحد مرشح نفسه محترم بقى من نفسي بدون اي اتجاهات ولا اي مطامع غير خدمة الوطن والمجتمع ياااااااااارب بقى

 وخلال ما كل ده بيحصل .ولحد ما  الوزاره الجديده تحلف اليمين قدام رئيس الجمهوريه المنتخب .....والى اتخيل انه ممكن ياخد مننا سنه ..اه عادي ورانا ايه يعنى

تكون بقى الدنيا  ماشيه ...اه وزاره شرف تشوف شغلها صح ...تحاسب كل المخطئين وتصلح  الى انكسر وتجيب حقوقنا الى اتنهبت وتعمل تنفس صناعي للاقتصاد بتاعنا .. والاوضاع الخارجيه المنيله فى المنطقه

وتنفس صناعي للاحوال الداخليه اجمع بداية من لقمة العيش لحد الفتنه الطائفيه

وعملية استئصال داخل جهاز الشرطه لا بديل ولا فكاك منها ..وعملية مسح باستيكه لجهاز امن الدوله الفااااسد

وطبعا لان الدستور الجديد هاحقق احلامي .. اه وهايبقى  عندنا محافظين منتخبين ومجالس محليه منتخبه وحكم محلي حقيقى ..

وانتخابات نقابيه حره وانتخابات مجالس ادارات حره وانتخابات لرؤساء الجامعات والعمداء حررررره

كل ده بقى يتعمل تباعا ... ونفضل كده نرتب ونوضب فى البلد لحد ما تبقى تمام نبدا نشم نفسنا بقىىىىىىىىىىىىىىىىىىىىى

 يهمنى اوي اسمع رايكم

انتم عارفين انا مش متخصصه انا بس باتصور واتخيل ازاي ممكن الدنيا تمشي

متاكده ان فى منكم ناس متخصصه وتعلم اكتر مني عايزه اسمع رايكم اوي عشان اقدر اكون راي ونساعد بعض كلنا فى ده

اسفه لانى طولت عليكم بس يعنى الامرجد خطير(حلوه جد خطير دي اوي )

يلا عايزه اراااااااائكم ما حدش يكسل