الأربعاء، 26 نوفمبر 2008

حكم ....بس الى يفهم وينفذ

هاقولكم شوية حكم يا جماعه تحطوها حلقه فى ودنكم
وعقبالي احطهم برضه بس تقريبا كده خلاص هاحطهم عشان انا خلاص وداني اتخرمت من كتر ما سمعت
اليكم خلاصة الحكم بقى عشان تعيشوا فى هدوء
ما ينوب المخلص الا تقطيع هدومه
اخرة خدمة الغز علقه
يا داخل بين البصله وقشرتها ما ينوبك الا تشم ريحتها
ما دام انت عارف الى فيها ليه تحط ايدك فيهاااااااااااا ليييييييييييييييييه؟؟؟؟؟؟؟!!
من تعبه عقله تعبته رجليه
اصحاب العقول في راااااااااحه ..أه بس المجانين فى نعيم.
واعمل الخير ارميه البحر
وطنش تعش
وهاكونا ما تاتاااااااا على راي تيمون وبمبه
على فكره انا كانت لازمه فى كلامي دايما اقول صبرني يارب
بقالي فتره بقى غيرت باقول اللهم افرغ علينا صبراااااااا
اي خدمه ان ما كنتش اديلكم خلاصة تجاربي ادي لمين يا ولاد

هناك 54 تعليقًا:

حواء يقول...

هههههههههههههههههههههههههه
حلوه ديه
بس انا ودني اتخرمت قبل كده من المثال والحكم دول
تعيش وتتخرم ودنك يارب

صبرني يارب يقول...

اها يا زوجه ما انا حافظاهم زي ما انتى شايفه
بس ياريتنى عملت بهم

حواء يقول...

لالالالالالالالالالالالا
تعملي بيهم ايه
انتي كده من غيرهم حلو
ديه امثال محبطه

عمرو يقول...

أنا بقى أكتر مثل بيعجبنى رغم بساطته لكن بيحمل فكره عميقه
جاموسه بتولد طيب التور بيحزق ليه ؟! قال : أهو تحميل جمايل !!
لا مؤاخذه يا أم خالد أمثال الفلاحين بتاعتنا أغلبها كده .. أو كيدهى ههههه

همس الاحباب يقول...

ههههههههه
خلاصة الامثال والتجارب
ههههههههه
ونعم الامثال يا ام مريم
شاكرين مهللين
هى ودانا بازت غير من كتر الحكم والحلق اللى فى الودن

mony يقول...

هههههههههههههه

حكم دايما بقولها لنفسي
و ساعات كتير مش بعرف اسيطر علي نفسي و اعمل بيها



بس حلو اوي المثل بتاع عمرو ده

ههههههههههه

بصراحة اول مرة اسمعه

اسامه عبدالعال يقول...

نياهاهاها
تقصدي مين بالكلام ده؟
ههههه

الطائر الحزين يقول...

هو لو كنا بنعمل بيها كان بقى ده حالنا

صبرني يارب يقول...

زوجه

ماهو للااااااسف مش عارفه اعمل بها بس بحاول

صبرني يارب يقول...

عمرو

هههههههههههههههههههههههه

حرام عليك يا استاذ عمرو هاموت من الضحك انا كده

ايه المثل ده اول مره اسمعه بس جامد اوعدك ينزل فى القاموس عندي

مالها امثال الفلاحين زي الفل

عشان اتكلمت عن البهايم مالهم البهايم
ما علينااااااااا

حد يسكتني بقى
نورت يا عمرو

صبرني يارب يقول...

همس الاحباب

والله يا ابو همس احترت واحتار دليلى من الناس

صبرني يارب يقول...

موني

انا بقى نفسي اسيطر على نفسي واعمل بيها جداااااا

والله العظيم انا باتعب نفسي اونطه بس دايما اصبر نفسي واقووووول الى عند الله ما بيروحش

والمثل بتاع عمرو انا هانزله فى القاموس بتاعي خلاص

بس بافكر اخليها معزه وجدي عشان تبقى خفيفه فى الشيل يعنى
ههههههههههههههههه

صبرني يارب يقول...

اسامه عبد العال

اصحك يا اخويا اضحك

صبرني يارب يقول...

الطائر الحزين

اي والله يا طائر حسبنا الله ونعم الوكيل

mahasen saber يقول...

الله ينور يا جميل دى ولا الحكم الصينيه حكم امرأه غير مطحونه
وحشتينى يا جميله
اسيبك وااقرا البوست اليى عدانى شكله مرعب يا مرعب انتا
الا ولادك اخبارهم ايه
ربنا يباركلك فيهم

صبرني يارب يقول...

محاسن

تعيشي يارب

ولادي الحمد لله كويسين

ادخلي على الرعب بقى ولا يهمك

مستنيه رايك اهو

عبدالرحمن يقول...

إديها طناش ولا تتعشاش الحب طشاشا إن كنت عايزها ما تستناش
دي حكمه جديده
تقبلوا مروري زيارتي الاولى وليست الأخيرة

جنّي يقول...

تعرفي ان الأمثال والحكم نتاج خبرات شعبية ومنها الكثير صحيح بالفعل

طيب ايه رأيك في المثل دا :

الخنفسة تشوف ولادها على الحيط تقول دا لولي ملضم في خيط ..

ولا المثل دا :

يا مستني السمنة من بطن النملة عمرك ما ها تقلي ..

شكرا وتحيتي

ahmed_k يقول...

هههههههههههه
بوست كلله حكم
أيه الموضوع يا أم مريم
بجد وأنا بأقرأ البوست مستني الموضوع
أتاري الموضوع كلله تخريم ودان ههههه
مشكوره على النصايح المفيده دي


والسلااااام ختام

حاسوباتيه يقول...

ههههههههههههه بدخل مدونتك بستفيد جدا علشان انا على وش جواز وبحب حكمك بصراحه

سنابل قمح يقول...

حلوين أوى
بس ماتغلبيش نفسك صعب يتنفزوا عملي

أليس في بلاد العجائب يقول...

أكل فول و أخرج قفاي عرض و طول و لا آكل كباب ووقفة الديانة ورا الباب


آدينى حيه لما أشوف اللى جيه

ابن بطني يفهم رطني

ابنى فى ملكك و ملك غيرك لأ و احكم بطبعك و طبع غيرك لأ و ربي ابن ابنك و ابن بنتك لأ و الميه تنزل فى الواطي و العالى لأ

استعدل و لا تستعجل

اغسلى حلتك من دمعتك و لا تغسليهاش من زعلتك

ألف عدو برا الدرا و لا عدو جوا الدار

اللى بيعاير ما على باله من اللى داير

اللى ما لوش شغلة تشغله يفتح الباب و يقفله

اللى يعمل نفسه رده تنكشه الفراخ

ان وقعت يا فصيح ما تصيح

بعد ما كان بينام على المصطبة نجدله لحاف و مرتبة

البيض الجربان يلم على بعضه

دونى و دونك الميدان و القصير و الطويل بيان

الرغيف اللى يلمع للصاحب اللى ينفع

زرعت لو كان فى أرض لو كنت و سقيتها بمية يا ريت و طرحت ما يجيش منه

شحات و طماع و طالب طلب عالى يدوا له كحكة يقول دى عوجة غيروها لى

شيلنى ما لا أطيق و لا تمشينى مع الغشيم

الضحك على اصناف : يا كيد يا فقعة يا قلة أصناف

طلع عين الكلب و ارميها و اللى فيه خصلة ما يسليها

الطويلة تقضى حاجتها و القصيرة تنده جارتها

العايط فى الفايت نقصان فى العقل

الغجرية ست جيرانها ان ما خافوا منها يخافوا من لسانها

غراب ضمن حداية الاتنين طايرين فى طايرين

كل حماية بليفة أحسن من فرخة بتكتيفة

كل عيش حبيبك تسره و كل عيش عدوك تضره

لبس الخنفسا تبقى ست النسا

لولاكى يا جارتى لانفقعت مرارتى

لولا الخيط و الابرة لأصبحت الناس فى عبرة

ما تبكوش على اللى خابت زرعته ابكو على اللى خابت ذريته

ما تدعيش على الكافر وهو غافل

ما حدش اشتكى و لا قال آه الا لما الوجع جه فيه

ما ديق الزريبة إلا على الحمارة الغريبة

من باعك بيعه و ارتاح من قهره و ان كنت عطشان ما تورد على نهره

هفتكر منك ايه يا بصلة و كل عضة بدمعة

يا بخت من له يا شقاوة من عليه

يا خاين و عامل من الليل ستارة بكرة يروح الليل و تظهر الأمارة

يفوت عليا ما يقولش عوافى و أنا مربياه من لحم كتافى

_____________

يارب حاجة منهم تفرح حد
ربنا يجعلها في ميزان حسناته يارب

enjy يقول...

ميرسى وشكرا ومتشكرين وتسلمى على هذوه الحكم الغالية

blue-wave يقول...

هههههههههههههههههههههه
والله مجموعة حكم من الأخر
تسلم دماغك

صبرني يارب يقول...

عبد الرحمن

حلوه دي يا عبد الرحمن دي بقى امثال مستحدثه اكيد ما كانتش على ايمانا
هههههههههههه

نورت ودايما منور

صبرني يارب يقول...

ايمى

تسلمى ونورتي

صبرني يارب يقول...

جني

تعيش يارب اها عايزه المواهب كلها تطلع كده

نورت

صبرني يارب يقول...

استاذنا احمد

اها والله كله تخريم ودان على رايك

صبرني يارب يقول...

بيبرس
انت لسه ما تعرفنيش ما حدش يقدر عليه بفضل الله تعالى ونعمته

صبرني يارب يقول...

حاسوباتيه

عنيه ليكى اي خدمه يا جميل

صبرني يارب يقول...

اليس

يخرب عقلك ضحكتينى ضحك ايه الامثال دي كلها جبتيهم منين قيدى عندك يا بنتى على ما ابقى احفظهم حبه حبه

نورتي يا جميل

صبرني يارب يقول...

سنابل قمح

نورتي ودايما منوره

فعلا صعب بس مش مع كل الناس فى ناس اساسا عايشين كده

صبرني يارب يقول...

بلو ويف

الله يخليك تسلم انت وتنور دايما

صبرني يارب يقول...

انجي
العفو يارب حد يعمل بهم بدل ما يتقرف قرفي

نورتي ودايما منوره

بنت الغربة يقول...

حبيبتى ياصبرنى انت وحشتينى جدا وانا عارفه انى مقصرة معاك بقالى فتره بس اعمل ايه الشغل وامتحانات الاولاد مش مخليانى ابص قدامى - وفاتنى البوست الجميل الى قبل ده بس قريته دلوقتى وكان حلو ومفيد قوى -اما بالنسبه للامثال فانا مابعرفش امثال مصرى كتير لانى اصلا مولوده فى الغربه-بس ممكن ااقولك مثل خليجى ظريف وحاولى تترجميه ولو معرفتيش قولى لى وانا هاترجمه (يعيب القرد على الوزغه ويقولها ياسوده يامحترقه)بس الامثال المصرى اظرف ودمها خفيف - بس انت دمك خفيف دايما واكيد حد زعلك وخلاك تقولى الامثال دى كلها -سلمى على الامامير ولادك وتعالى دبى خليهم يلعبوا مع ولادى-احنا عندنا اجازة لمدة اسبوعين-تحياتى ليك ياقمر - داليا -

حواء يقول...

انتي فين يابنتي
اظهر وبان عليك الامان

قوس قزح يقول...

لو على ريحة البصل ماشى و العلقة الواحد يستحمل .. لكن الا الهدوم يا اختى


تقولى قبلت مين النهارده ؟؟
قبلت حد نفسه تعملى بالحكم دى اووى P:

صبرني يارب يقول...

بنت الغربه

اخبارك ايه والله واحشاني ربنا يقويكى يا جميل

ويعنى ايه الوزغه دي يا اختي ؟؟

انا كنت عايشه فى الامارات بس طبعا مش فتره طويله وكمان كان احتكاكي بهم مش كتير اوي على قد صحباتي من العماره والحج وكانوا بيحاولوا يكلموني كلام قريب من المصري عشان افهمهم

وما حدش يقدر يزعلني يا دوللي انا ازعل بدل بزيها هههههههههههههههههه

ونفسي اجي دبي والله يا دوللي ليا فيها ذكريات حلوه اوي خصوصا خور بر دبي والمطعم المصري على على الخور فتافيت ده هييييييييه ايام بقى

والاجازه طبعا عشان عيد الاتحاد وعيد الاضحى جايين مع بعض

ايام ما انا كنت فى الامارات حصلت برضه بس كان عيد الفطر والعيد الوطني

اه خدي المعلومه دي على الماشي
الشيخ زايد الله يرحمه كان عيد ميلاده يوم واحد ديسمبر برضه
أنا شوفت صورة جواز سفره

تسلمى يا دليا ونورتي وفكرتينى بايام كان هلا حلاوتها وهدوئها

صبرني يارب يقول...

زوجه انا اهو يا اختي

كنا بنصطاد سمك بس ما لقناش سمك اكبر من كي جي وان وساعات رضع وحياتك

صبرني يارب يقول...

قوس قزح

لا انتى كده عايزه رد بينى بينك بقى الصبح اكلمك اقولهك هنا ما ينفعش هههههههههههههههههههه

ومين ده الى نفسه اعمل بالحكم دي اوي ؟؟؟
بكره هاقعدك على كرسي الاعترف اساسا تحكيلى التجمع كله

مش كان وداااااااني التجمع طيب ما روحنا ما لقيناش سمك عااااااااااااااا

أحمد (زوج مخنوق ). يقول...

بيقوله امثال تاني حلوة
زي ضربني و بكى و سبقني و أشتكى

حواء يقول...

هههههههههههههههههههههههههههه

صبرني يارب يقول...

اردب ما هولك لا تحضر كيله تتعفر ذقنك وما ينوبك غير شيله


واجري يا مشكاح للقاعد مرتاح

واتصالح الفار على العرسه ونسيوا الكلام والهرسه

وأما شفي المريض نسى وصفة المداوي

بكرة تقوم القيامة و ينصبوا الميزان و يبقى المعدى يعدى و الشقى حيران

واهري يا مهري وانا على مهلي

هههههههههههههههههههههههههههه

أليس في بلاد العجائب يقول...

يا قلبى فضك من خراب العقول زى ما يخش يقول يطلع يقول


داخل بيت عدوك ليه قال حبيبى فيه

اللى يربط رقبته بالحبل كل الناس تجره

من رادك ريده ومن طلب بعدك من الجفا زيده


الضمانة أولها شهامة وآخرها غرامة


_________

دي باه امثال موردن حبة :)

قليل الأصل لا تعاتبه ولا تلوموا ، ده زي البقعة اللي لا تطلع برابسو ولا بأومو .

من طلب العلا يتفضل فى كابينه (4‏)

اللى بيته من‏ إزاز ميغيرش هدومه فى الصالون

قال‏ يامحشحشين يكفيكوا شر الكمين

وبكره ترجع ريما من عند خلتها فى‏ مارينا


أكل العيش يحب الطعميه

ياخبرالنهارده بفلوس بكره ينزل عليه أوكازيون


وبكتفي لحد كده باه لحسن والله اروح اجيبلك شوية جداد تحتاسي فيهم :)

صبرني يارب يقول...

اليس

يا واد انت يا بتاع القديم والجديد
هههههههههههههههههه

طب والله العظيم لعبة الامثال دي طلعت حلوه تصوري

بس جامدين مووووووت

أحمد (زوج مخنوق ). يقول...

في كمان

طبخت الطبخة و ملحتها بتراب

و اسمع كلامك اصدقك اشوف امورك استعجب

لجل الورد يتسقي العليق

صبرني يارب يقول...

اها امثال جميله

بص بقى للمرايه وقولهم تاني

بس خلاص ... يقول...

اخيرا وصلت .... كل سنه وانتى طيبه يا ام مريم والنبى انتى عسل.....
...

بس خلاص ... يقول...

خدى بقا عندك
كل شئ جايز حتى جواز العجايز
اسمع كلامك اصدقك اشوف امورك استعجب .. واهو ضل راجل ولاضل حيطة ... خنفسه شافت ولادها على الحيط قالت لولى ملضوم فى خيط .... والقرد فى عين امه غزال ... لاتعايرنى ولا اعايرك الهم طايلنى وطايلك .. هه هاخد نفسى وارجعلك

صبرني يارب يقول...

بس خلاص

ايه ده انا تعبتك باين على ما وصلتي انا عارفه الصفحه بتاعتي مليااااانه مدونات تتوه بس هاعمل ايه بقى على بال ما يكفوني كلام


نورتي يا جميل وتسلمى على الامثال ووقتي ما تحبي تيجى تعالى يا قمر

البحث عن أنا شىء جنونى يقول...

اسف انى هكتب خارج نص الموضوع

يله ضيف / ضيفى مدونتك حسب القسم بتاعك وخلى العالم يتعرف عليك

وادى لغيرك فرصة يقرا خطوط قلمك

خلى البحث عنك اسهل

اتبع اللينك ده

مدونه كل العرب

http://arabwriters.blogspot.com/

أحمد (زوج مخنوق ). يقول...

طب ليه ابص في المراية يا صبرني؟؟

رد غريب جدا

انهي طبخة اللى انا ملحتها تراب دي؟؟

مش عارف حاسس ان بالرد ده داخلين على خناقة

صبرني يارب يقول...

ولا خناقه ولا غيره ياا حمد

خلاص بقى كده كفايه امثال وحكم

وكمان كفايه عليا كده بقى

ولا انت شايف ايه ؟؟؟

challenger يقول...

ههههههههههههههه

هاكونااا ماتاتااااا يا ام مريم