السبت، 16 فبراير، 2008

2-عيد ميلادي النهارده

انا عيد ميلادي النهارده يا جماعه ال 29 مش عارفه احدد مشاعري الحقيقه تجاهه هي سلبيه ولا ايجابيه لكن عموما كل سنه وأنا طيبه برضه .
مش عارفه ليه رغم ان ولادي عاملين احتفاليه من الصبح طلعوا عينى فيها وخلوني ندمت اشد الندم على انى اتولدت وعاتبت ماما على انها عملت الفصل البايخ ده فيا وولدتنى زي النهارده او ولدتنى اصلا . ورغم انى حاولت اشعارهم بالسعاده البالغه الى انا فيها الى ان مش باين عليا السعاده خالص .

أنا مش كئيبه والله ولا حاجه ولا مش وش احتفال ولا كده لا . بس طبعا تفاصيل الاحتفال الخاص بعيد ميلادي لو تسمعوه . طبعا ولادي من الصبح وهما بيجروا فى الشقه ويقطعوا ورق ويلونوه عشان يرسمولي لوحات بيعتبروها الهديه بتاعتي . وسألوني بكل مسكنه وهدوء تقدري يا ماما تعملي لنا تورته احنا مش عايزين نتعبك بس عشان عيد ميلادك. قلتلهم قدام الزوق والظرف ده اه يا حبايبى هاعملكم . وبدأت فى عمايل التورته وهما الثلاثه واقفين معايا فى المطبخ والاماني والاغاني اشتغلت بقى لانهم عايزين يعملوا تورته زي الى بيعملوها فى العاب الطبخ على النت .
المهم الحمد لله بعد حوالي خمسين مره صرخت فيهم عملت التورته واتاكلت بحمد الله واليوم شارف علىالانتهاء . واخواتي اجتهدوا جدا انهم يغنوا ويعملولي حفله لكن وسط صريخ ولادنا فى النص وعياط الى عايز ينام والى عايز ياكل كانت حفله رائعه .
حتى لما جوزي سألنى اجيبلك ايه فى عيد ميلادك قلتله ممكن تشوفلي مكان اقعد فيه لوحدي ؟؟؟ قالي مش تطلبي طلبات تنفع تتنفذ ؟؟؟

ما علينا 29 سنه كتير والله عليا مش عارفه بيجينى احساس انى عجزت . لكن ساعات اقول قياسا على الانجازات الى انا عملتها فى حياتي يبقى كويس اننا لسه عندي 29 سنه . طبعا الانجازات دي انى اتجوزت وخلفت 3 عيال ما هو يا عينى ما حدش لاقي جواز الايام دي خالص والكلام فى موضوع العنوسه والتفكير فيه بيخلينى احس احيانا ان الواحد يجيب عيلين من الملجأ يربيهم من دلوقي وأبقى اجوزهم لبناتي وخلاص . حاسه ان الشعب كله بنات وشباب معنسين او مطلقين من الحالات الى الواحد بيشوفها .

فى الحقيقه المشاكل فى مجتمعنا بقت بالكومه تحتار تفكر في ايه ولا تتكلم في ايه حاجه تلغبط وتقريبا هو ده الهدف لغبطة الناس ما تسألوش هدف مين ؟ هدف الشريرين الى فى الخااااارج اه فى الخارج .
مش عارفه هل احنا بحالنا ده بقينا نمثل خطر على مين ؟؟ بسأل نفسي السؤال ده كتير احنا ليه مستهدفين ؟؟؟ احنا بنمثل خطر على مين ؟؟؟ يمكن الشريرين شايفين حاجه انا مش شايفاها ؟؟؟ جايز برضه !!!

طيب انا فى نهاية اليوم السعيد ده احب اسألكم ونفسي برضه هو امته الواحد اصلا يبقى سعيد ؟ وايه هى اصلا السعاده ؟ هل هى ان الواحد يرسم ابتسامه عريضه على وشه دايما ؟؟ ام انه يضحك بصوت عالي اوي ؟؟ ولا انه يمشي يقول انا سعيد ؟؟ ولا مايقولش حاجه ولا يعملش حاجه اصلا ؟؟؟
مستنيه اسمع ردودكم وهافكر انا كمان فى رد على الاسأله دي واشوفكم على خيران شاءالله




هناك 6 تعليقات:

Hassan يقول...

awalan kol sana enty tayabah,thanayan ,eslobek baset gedan we gameel yod7'ol el 2alab 3alatool mafehoosh fazlakaat el lo3'ah , we ana ba3edo men el asaleeb el sahl el momtanee3, leno feh men sha7'sayatek ( 2awo feh basmetk el 7'asah), fahowah esloob shayeq fel ta3beer 3an el 7alh el ensanayah,ra3'm za3alek enk (29) bas fa enty lesah so3'anoonah , we yarab 3o2bal el 129 bel se7ah leky wel sa3adah leky enty we awladeek we zogeek we kool afaad el osrah el sa3eedah


m3 ta7ayaty da2eman bel tawfeeq wel nagaa7

Hassan, Nerway

صبرني يارب يقول...

والله يا اخ حسن انت نورتنى وكلامك اثلج صدري وربنا يكرمك ويخليك وتنورني دايما

challenger يقول...

بصراحه مش عارف ابارك على بدايه المدونه الاول ولا اقولك كل سنه وانتي طيبه يارب ودايما يا رب بصحه وعافيه وسعاده
وان شاء الله السنه دي تكون افضل وتحققي كل اللي بتتمنيه ان شاء الله

والف الف مليون مبروك المدونه

ودايما تمتعينا بدردشتك وكلامك

كل تقديري

صبرني يارب يقول...

الله يكرمك يا تشالنجر ويبارك فيك انت كفايه تكتب اسمك بس تبقى المدونه وصاحبتها نورت تسلم يارب

ahmed_k يقول...

انا قلت لكي كل سنه وانتي طيبه وعبرت لكي عن بعض اسباب محاربة الغرب لنا وعموما مش عاوز ازعجك واضيع فرحتك بشهر ميلادك بس عايز اعبرلك عن اجابي ببساطة اسلوبك والمرح الكامن في ثنايا كلماتك وهذا يدل علي اصالة مصريتك مع اطيب امنياتي لكي بالتوفيق

صبرني يارب يقول...

الله يكرمك يا اخ احمد انت نورت فعلا المدونه ونورتني وانا لما اتكلمت عن فكرة محاربة الغرب لنا كان قصدي ان احنا ما نقعدش مكتوفي الايدى نتفرج على الى بيحصلنا ونقول مش بايدينا ده هما بيحاربونا وهما السبب . لا طبعاالمفروش حتى لو هما بيحاربونا اننا على الاقل ندافع عن نفسنا ومش نقعد ونستسلم . وانا عارفه ومتأكده انهم مش هايسبونا فى حالنا حتى لو كنا جثه هامده لانهم عارفين ومدركين اننا لو صحينا هانبقى خطر عليهم لكن انا قصدي ان احنا نفوق لاننا بعد ما كنا كل حاجه بقينا ولا حاجه فى الوقت الحالي لانشكل خطر مباشر وفعلى وحالي على اي حد . لكن لو عايزين نكون حاجه هانبقى بس المهم نبطل نقول هما عملوا ونشوف احنا الاول عملنا ايه فى نفسنا ومشاكلنا بقت اد ايه ؟؟ الداخليه قبل الخارجيه. مش نكون احنا غرقانين فى مشاكل ا جتماعيه احنا الى سمحنا بوجودها حتى لو كانت مقصوده من الغرب فاحنا انساقنا وراها ودى غلطتنا وفى نفس الوقت ده نقول مش ذنبنا لا انا دايما باميل لتحميل الذات مشاكلها عشان تقدر تحلها .
وشكرا على الاطراء على اسلوبي يا اخ احمد وفعلا انت نورتنا .
وياريت كل الناس تناقشنى وتقول رايها فعلا بصراحه حتى لو كان معارضنى ده بيفرحنى جدا مع كل احترامي لك يا ا خ احمد وشكرا لك.