الخميس، 28 فبراير، 2008

8-هو يعنى ايه رومانسيه ؟؟!!!!

السلام عليكم ازيكم وحشني الرغي جدا . ها ايه رأيكم فى العنوان برضه تبع إلهام العنوان ده وليد اللحظه . ايه بقى هي الرومانسيه ؟؟؟؟
اصل انا مش عارفه ليه الكلمه دي لما باسمعها من حد بتعصبني !!! اصل الى بيقولوها باحس انها طالعه منهم مش مسرحه شعرها كده او حاجه. تلاقي واحد يقولك ايه انا رومانسي وعايز واحده رومانسيه ( على شريط الرسايل فى اي قناه مالهاش لازمه ) او واحد يقولك انا مشكلتي انى أنا رومانسي جدا .
فأنا قعدت اقول يا ترى ايه هى الرومانسيه دي الى بيوصفوا نفسهم بها ويدوروا على حد عنده زيها . قلت يمكن مرض معدي ولا حاجه وعايزين حد زيهم عشان ما يعدهوش يجي معدي جاهز ؟؟؟
وبعدين بقى ا لعصفوره قالتلى ان الرومانسيه دي الى هو ؟؟؟؟ ايه ده ؟؟ تصوروا مش عارفه اوصفهم من وجهة نظرهم .
لكن انا بقى بعد ما العصفوره وصفتهم سألت نفسي . هى الرومانسيه دي ان الواحد يكون كده ضامم حواجبه وماسك ورده حمرا ومنديل قماش كبيييير وقاعد يسمع عبد الحليم ويعيط وكده يعنى ؟؟؟؟!!!
ولا انه اول ما يشوف او يسمع حبيبه يقعد يسنسن ويعطف ويبربش لحد ما يحول ؟؟؟؟!!!!
ولا بقى النوع الرومانسي على اخر عزمه الى هو بيحب طول عمره مع نفسه ويعيط ومذهبه فى الحب ايه ؟؟؟؟ احفظوا بقى . الحب من غير امل اسمى معاني الهبل .
المهم عشان ما اطولش عليكم انا بصراحه مش شايفه ابدا ان الرومانسيه تطلق على شخص عموما انما شايفه انها حاله . يعنى ممكن اوصف موقف انه رومانسي مثلا . انما اوصف شخص انه رومانسي الى هو ماله يعنى ؟؟؟؟!!!
انه بيحب الرومانسيه يعنى تقصدوا ؟؟؟ متاكده ان مافيش حد ما بيحبش الرومانسيه ولا في حد ما نفسوش فيها .
بس زي ما قلتلكم المره الى فاتت احنا كمجتمع عندنا مشكله فى التعبير عن الحاجات الجميله .
يعنى ممكن يكون واحد جد جدا جدا ولكن مع ذلك يعيش موقف او حاله رومانسيه للحظات حتى . انما الكلام الي الشباب شغالين طول النهار فيه انا رومانسي وانا رومانسيه والافلام دي .
والواحده فيهم تحسب انها رومانسيه بقى انها تقعد تبربش. تقوم يا عينى تفضل تبربش طول حياتها لحد ما تحول ولا حد سائل عنها فى يومها .
اه نسيت حكاية الرومانسيه دي بتفكرنى الفلانتشيييييين داي . يوم اهبل من الهبل اقف فى البلكونه ابقى مش عارفه اضحك على الهبل الى لابسين احمر ومحصبين ولا أعيط على الحاله الى وصلنا لها .
على فكره الى عايز يعيش موقف رومانسي مش لازم يستنى الطرف التاني يعيشهوله . لو جه فى مناسبه حلوه وجاب هديه بسيطه وحلوه وعملها مفاجأه ( اه مش خدي انزلي اشتري هديه اصل انا مش باعرف !!!!!) . او عملتي حاجه حلوه وقلتيله كل سنه وانت طيب زي النهارده يوم لما وقعتك من نظره واحده . اي حاجه يعنى . المهم الى عايز يعيش رومانسيه يقدر يخلقها .
وبالنسبه للمتجوزين من عشره عشرين سنه لو حاولوا يعملوا كده فجأه وهما ما كانوش بيعملوا كده الطرف التاني هايطلبلهم البوليس . ويمكن يحجزلهم فى مستشفى امراض نفسيه وعصبيه . فلو عملتوا كده توقعوا اي رد فعل غريب لكن ما تيأسوش . السور الى اتبنى فى سنين مش ممكن يتهد فى لحظه .
واشوفكم بقى مش عارفه امته لكن اشوفكم على خير يارب . والبوست ده الى يقراه يسيبلى ربع جنيه عشان ابقى اشتري ورد واضم حواجبي واسنسن شويه مع نفسي .

هناك 8 تعليقات:

ahmed_k يقول...

الرومانسيه موقف أو حاله نفسيه تمتلك الشخص لفتره معينه تكون فيها متشبعه بالعواطف والأحاسيس الجياشه ولكن لا بد ان لا تتعدي كونها حاله لفتره زمنيه بسيطه والا تحولت الي مرض واصبحت عامل تعطيل وهدم للفرد بدلا من ان تكون عامل تحفيز له علي الكسب حتي يستطيع ان يجتمع بخليله وقد تكون موقف يمر علي الشخص نتيجة لموقف معين وليس بالضروره ان تكون الرومانسيه بسبب حالة حب بين رجل وامراه فالصوفيه مثلا حالة روماتسيه ان جاز التعبير ومنها حب الله وحب رسوله وهذه الرومانيه اسميها المحفزه فالمحب يجب ان يطيع حبيبه ويعمل علي ان لا يغضبه وذه الحاله المحفزه التي تجعل الشخص دائم السعي للخير ..... مش عاوز اطول بس آخر ما اود قوله ان الروماسيه والحب وجهان لعملة واحده فكما للحب اشكال عده كذا الرومانسيه ويا ام خالد الغردقه مش بعيده اوي منكم كلها فردة كعب وعموما احنا اللي ناجيلكم لو مش عاوزين تأتوناوالسلام ختام

صبرني يارب يقول...

اعتقد الاستاذ احمد قال حاجه يمكن انا اجفلتها تحديدا وسهوا مني داخل سياق الكلام وهى ان الرومانسيه ليست فقط فى حال الحب بين الرجل والمرأه لا طبعا وانا مقتنعه بكده جدا .
لكن اعتقد انها ليست مرادف للحب ولا وجها اخر للحب ولكنها احد اوجه الحب لانها قد تمثل التعبير عنه علنا امام النفس والطرف الاخر فى حاله خاصه .

ولكن قد يأتي الربط بين الحب بين الرجل والمرأه والرومانسيه من أن اساسا نحن كمجتمع عندنا مشكله فى توجيه مشاعرنا وتهذيبها بجعلها دوما ايجابيه ونحصر الحب ونضيق عليه فى نطاق واحد فقط رغم ان ديننا الحنيف اقر واكد وحبب فى مشاعر الحب فى الله واثنى على المتحابين فى الله وقرنهم بالشهداء والصديقين تحت عرش الرحمن .
نسأل الله تعالى ان يجمعنا واياكم تحت ظل عرشه يوم لا ظل الا ظله .
واما حكاية الغردقه دي بقى نفكر فيها بس يا استاذن اسمها ( فركة كعب ) تراث شعبي هههههههههههههههههه
وانتم تشرفونا يا اخ احمد على راسنا من فوق والله .
وانا طولت عليكم شكراااااااااااا

ahmed_k يقول...

السيده ام خالد معلش التعبير الذي قلته(فردة كعب) صحيح من افراد الشيئ (همزه اسفل الألف)اي افراد كعب القدم ثانيا انا ما سبتش الربع جنيه علشان بصراحه مكانش معايا فكه يس اوعدك اول ما تتوفر حبعتها علطول هههههههه وهيا متكسليش الموضوع الجديد ايه ويا ريت تتكلمى عن ظاهرة الزواج العرفي الذى اصبح ظاهره خطيره تهدد كيان المجتمع وتماسكه والا حعمل مدونه زيك وانافسك ههههههههه والسلام ختام

حـ العين ـور يقول...

فعلا عندك حق مش لازم اللى اليوم ده بالذات انا عارفه طبعا انك بتتخنقى من الحاجات دى بس كل وقت من حولينا بايدنا نخليه كل حب ورومانسيه زى ما عملتيلى امبارح كانت مفاجاه جميله بشكرك على موضوعك يا ام خالد وبارك الله فيكى ,وميرسى على التورته الجمليه اللى انتى عملتيهالى عاشت اديكى وفى انتظار البسبوسه

صبرني يارب يقول...

أستاذنا العزيز احمد :
طول عمري باسمعها فكرة كعب على فكره جدتى الله يرحمها بقى لكنت سألتها ولا يهمك كله يمشي .

والربع جنيه لزمك ماليش دعوه ههههههههههههههههه
والزواج العرفي اها فعلا محتاج كتب عشان نتكلم عنه مش مدونات بس لانى شايفاه نتيجه مش سبب عشان كده محتاج نتكلم قبله كتير .
واعمل مدونه بقى حضرتك الى مش تكسل.
انا مش باكسل والله ده انا رغايه قديمه ممكن اقعد اكتب واتكلم طول النهار والليل بس الظروف بقى ما كنتش فاضيه والله .
وشكرا لك يا استاذنا ونورت

صبرني يارب يقول...

حور العين :
تسلمى ياجميل وكل سنه وانتى طيبه ونورتي المدونه كلها . واحب اقولكم ان البت حور العين دي كان عيد ميلادها من يومين وانا عملتلها تورته اكلير وروحت عملتلها مفجأه كان عيد ميلادها هى وباباها كمان وهى كلت نص التورته لواحدها .ههههههههههههههههه
وكمان متوحشة بسبوسه كل ما تشوفني تقولي فين البسبوسه .هههههههههههههه
نورتي يا حور العين وابقى فكرني اشوف جالك ايه يوم الفلانتشيييييييين داي من خطيبك هههههههههههههههههههه

Anonymous يقول...

السلام عليكم يا صبرني

إيه يا ستي الرومانسية بقى عشان فهمي على قدي
على كل مش هعرف أرد على البوست عدل عشان الكيبور مطلع عيني

قصدي عشان أنا مش مقتنع بحكاية الرومانسية دي يمكن هي موجوة وانا عشان صعيدي مش متقبل الأمر كويس ومش نازلي من زور

على كل موضوع مهم وكويس أنك طرحتيه

يلا يا ستي إلى الأمام دايما

وأدي الربع جنيه بتاعك

بس كنت عايز منك طلب ممكن تسلفيني 35 جنيه عشان أجيب كيبورد جديد وهأكتب على نفسي ورقة بيهم

عشان أشتري كيبورد جديد وأعرف أرد على مواضيعك

تقبلي تحياتي


التوقيع // THE WHITE KNIGHT

صبرني يارب يقول...

وايت نايت
انت ما ينفعش تضم حواجبك هما اساسا لازقين فى بعض باين .
وبعدين انت صعيدى كمان يعنى ممكن الرومانسيه بتاعتك تولع فى الدره

وبعدين الربع جنيه بتاعك ده مغسول ياعم ,

والكي بورد لما تلاقي حد يسلفك قولي عليه عشان انا عايزه اجيب جهاز اصلا جديد .

شرفت يا وااااااايت