الاثنين، 18 فبراير، 2008

3-لو تقولي ايه هى السعاده ؟؟؟؟

وحشتوني والله . نقول بقى ايه هى السعاده الى انا سألتكم عنها المره الى فاتت وسمعت اراء قليله منكم بس حلوه فعلا من سيزار وتشالنجر وبتهيئلي مش هاقول اكتر منها لكن اسمعوني برضه جبران خواطر.

انا من وجهة نظري المتواضعه شايفه ان السعاده هي عباره عن كوكتيل من الرضا ( حلوه كوكتيل دي ؟) اه هاقولكم بعض عناصر الكوكتيل ده :

اولا طبعا رضا ربنا عننا لأن فعلا لما الواحد بيحس ان ربنا راضي عليه بيحس بسعاده غامره طبعا لازم نعمل كل ما يمكن عشان ربنا يرضى علينا واحنا المفروض نكون عارفين كويس احنا نعمل ايه وما نعملش ايه
ثانيا نرضى بحكم وقدر ربنا بمنتهى الاستسلام والرضا الفعلي والامتنان كمان فعليا مش كلام بس.
ثالثا اننا نرضى عن نفسنا ازاي ؟ اننا دايما نعمل حاجه اي حاجه نشعر من خلالها بتقدير الذات(نحس ان لنا قيمه )
رابعا اننا نحاول نرضى الناس الى حوالينا بس من غير ما نيجى جنب رضا الثلاث حاجات الى فاتوا ( بمعنى نراضي الناس ونكسب حبهم ) .
ملخص الكلام ده كله باحبه اقوله فى آيه واحده اتكررت فى القرآن 3 مرات تقريبا (رضي الله عنهم ورضوا عنه ) صدق الله العظيم . ولو كملتوا ورا الايه دي دايما تلاقوا كلام عن الجنه والنعيم عشان كده باحب اقول بعدها فأرضاااااههم.
تأمل الكلام كده وشوف لو طبقته مستوى السلام النفسي الى هاتبقى فيه .
بالنسبه ليا انا فى رضا برضه مهم اوي من اسباب السعاده بس مش هاقولكم عليه (غلاسه)

انما احنا ولله الحمد بنتفنن فى ضياع السعاده من ايدنا وما نصدق نضلم الدنيا وننعي حظنا ونووح على ما فاتنا وبالمره ما قد يفوتنا ونلبس رداء الضحايا ونعيط ونغني ظلموه ونشوف الاجنحه الى على ظهرنا وما نشوفش فى الناس كلها الا الشوكه الى ماسكينها فى ايديهم ( الشوكه بتاعة الشيطان الى بيجبوه فى المسلسلات ماسكها دي ) .
واحنا احسن ناس نبكي على الي راح حتى لو كان الى راح ده كان اصلا معذبنا بس لما يروح بيحلو وما نشوفش ابدا الحلو الى في ادينا لا نشوف الى في ادين الجيران .
ونحب نعيش الدور اوي خصوصا فى الحب ونسمع كلام بقى من بتاع الافلام العربي منهم لله الحب من غير امل اسمى معاني الهبل يووووه قصدي الحب . والحب الاول والحب من اول نظره . والحب زي لطشة البرد والحب مش بايدينا وكده يعنى وتلاقي طبعا الى بيقول الكلام ده واحد عنده 15 سنه ومافيش مانع يكون بيحب واحده عندها 25 سنه عاااادي ومصدق نفسه . وممكن كمان يكون واحد عنده 45 سنه وبيحب واحده عندها 25 ومتجوزه كمان ويقولك انا مش عايز منها حاجه انا عايز احبها بس اصل الحب معنى ليس الا!!!!!!!!!!!!!! طب ليه عذاب النفس ده ما تحب حب طبيعى من بتاع ا لبشر الى هو من غير ما نعذب بعض ايه المشكله ؟؟؟؟( موضوع الحب ده كبير كبير عايزه قاعده لوحده)
المهم انك تلاقي ناس بتحب تعذب نفسها مش بس فى الحب فى العلاقات الاجتماعيه اسوأ حاجه بقى لما واحد يكون عنده احساس بالنقص وانتقاص الاخرين من قدره يا ربي بيعذب نفسه والاخرين كل ما تقوله ازيك يقولك انت مالك بتقولها من غير نفس ليه انت شكلك مش طايقنى شكلك مستقل بيا . وممكن يعيش الدور بقى اسبوع كده ولا حاجه يعيط على الموقف الرهيب ده .

بجد نفسي اعيش فى سلام نفسي متبادل وهدوء اعصاب من الناس واقبال منهم على الحياه عايزين ندور ونتلكك على سبب نقول من خلاله احنا سعداء . بدل العكس نتلكك على أي حاجه تكون سبب مقنع اوي لنا لنواح ونعي الحظ والعيشه والى عايشنها . ونفسي اكتر نحدد احنا عايزين ايه عشان لما نوصله نحس اننا عملنا حاجه تخلينا نرضى ونسعد بها.
والرغي النهارده مش عارفه دمه تقيل جدا وكتير وشكلكوا زهقتوا مني .
على فكره اول ما بدأت كنت هاتكلم فى موضوع تاني خااااالص بس الرغي بقى خدني كنت هاكلمكم عن مصطلح انا اخترعته خليه المره الجايه بقى .
اشوفكم فى كل خير وسعاده يارب

ملحوظه : انا جوزي جابلي هديه فى عيد ملادي حلوه مش هاقولكم هي ايه( نفس الغلاسه) بس بعد ما كتبت الجزء الى فات عشان الموضوع ده كان سؤال ناس كتير مش عارفه ليه .

هناك 5 تعليقات:

ahmed_k يقول...

اولا- الأيه(رضي الله عنهم ورضوا عنه) ثانيا-ممكن نعرف ايه هو الرضا المهم اوي اللي من اسباب السعاده اللي مقلتيش عليه علشان كده انتي حيرتينا المهم عاوز اقولك ان تركيبة النفس البشريه معقده بشكل رهيب وهذا من عظمة الخالق اليس هو القائل(وفي انفسكم افلا تبصرون)فالسعاده شيئ نسبي ما يسعدني ليس بالضروره يسعدك وما يسعد شخص اوروبي مثلا لا يسعد شخص من افريقيا مثلا وسبحان الله الخالق مع خالص تحياتي لكي يا ام خالد

صبرني يارب يقول...

حقيقى حضرتك شرفتنا واسعدتنى انك دائم الرد ومتابع المدونه ربنا يكرمك وانت نورت

اما عن الايه انا فعلا شوفت الغلطه المطبعيه دي لان انا لما باكتب ايات فى اي مكان لازم باجيب الايه الاول من الباحث عشان دى مش تبقى اي غلطه ورغم انى راجعت الجزء ده لكن عدت عليا وحاولت اصلحها مش عارفه لسه انا مستجده فى الموقع ده بس اكيد فى طريقه هاوصلها ان شاء الله وشكرا على التصحيح . واتمنى من الجميع انهم يغفروا بعض الاخطاء المطبعيه والاملائيه جايز كمان .

اما عن موضوع السعاده النسبيه فده حقيقى فعلا مافيش حاجه محدده ممكن تسعد جميع الناس فى كل مكان وزمان وفعلا النفس البشريه معقده ومش ممكن تحليلها ببساطه عشان كده نحاول اننا نعيش سلام نفسي مع الدنيا ونرضى وده اقل ما يجب .

اما عن الرضا الى حيرك انا كنت باهزر يا اخ احمد لان اغلب الناس تعرف ان ابو خالد اسمه رضا وهو ده الرضا بتاعي الى باتكلم عليه ربنا يكرمه ويخليه لنا ويسعد الجميع يارب .
والف شكر لك مش قادره اعبر عن فرحتي برجوع حضرتك للمدونه وشكرا لك واتمنى تنورني دايما .

challenger يقول...

اولا اذا كان الناس كلها عندها 3 رضا
فانتي تختلفي عن الاخرين عندك 4 ;)

ثانيا اجمل ما شدني في كلامك عباره الوصول للاستقرار والسلام النفسي

لان ده هو اساس اي سعادة الشعور بالاستقرار والامان والثقة ....

بجد حلم السعاده حلم جميل يمكن تحقيقه بالتزامنا بمبادئ دينا الحنيف

ربنا يسعدك يا ام خالد ويسعدنا ويسعد الجميع

كل التقدير

صبرني يارب يقول...

الله يخليك يا تشالنجر ويكرمك ويسعدك ان شاء الله .
ودايما تنورني يارب هنا

nona elsha3nona يقول...

صح والله عندك كل الحق الساعده هى كوكتيل من الرضا رضا ربنا علينا ورضانا بواقعنا وقسمه ربنا لينا والحمد لله على كل شئ مكتوب علينا بجد احساس الرضا ده احساس جميل وهو اللى بيودينا للسعاده الحقيقيه تعرفى بيبقى احساس حلو انك تقولى الحمد لله وانت فرحانه وكمان احساس برضه حلو لما تفتكرى بعد اى حاله حزن انك قلتى وقت ما عرفتى الحمد لله قدر الله وماشاء فعل او حتى قلتى اللهم اجرنى فى مصيبتى واخلفنى خيرا منها بجد كوكتيل من الرضا حلوه ياقمر