الأربعاء، 9 يوليو 2008

فلووووسك ؟؟؟ ليه هو انا شوال بطاطا ؟؟؟!!!

السلام عليكم
مش عارفه يا جماعه انا والله مش فلسانه رغي بس فلسانه وقت وصحه على الاخر عشان كده انا جبتلكم موضوع من ارشيف حياتي كنت كاتباه من زمان وافتكر نزلته فى منتدى انما اول مره انتم تشوفوه .
يلا هيا بنا نرغي ....
نتوقف شويه قدام هذه العباره : فلووووووووسك انتى بتقولي فلوسك ؟؟!!!! ليه يا هانم انتى متجوزه شوال بطاطا ؟؟؟
السؤال بقىىىىى:
لماذا حين تذكر الذمه الماليه المنفصله للزوجه يذكر بجانبها كلمتين :
( ليه انا مش راجل ولا ايه؟؟) او ( مافيش فرق بين الرجل ومراته)
حقيقى مش عارفه ايه الرابط بين الرجوله والذمه الماليه المنفصله للزوجه .
الرسول عليه الصلاة والسلام كان يتاجر بمال خديجه وعلى فكره كان يأخذ عن ذلك اجر .عااااادي يعنى مش كان بيتكسف من نفسه ولا بيقول انا مش راجل ولا حاجه
تفقدوا سيرة الرسول مع زوجاته تلاقي كل واحده فيهم كان لها فلوسها ومالها واملاكها عادي
ففي سفر الرسول للحج مع زوجاته حجة الوداع برك جمل صفيه بنت حيي و راح الرسول لزوجتة زينب بنت جحش( لأنها كانت غنيه ومعاها جمال كتير) قال لها افقيري اختك جملا فقالت : أنا افقر يهوديتك؟؟ طبعا الرسول زعل منها وخاصمها شهر بعد الحج ولما عفا عنها وراحلها اهدته جاريه هديه .
بصوا القصه دي مهمه اوي فى موضوعنا نوضحها بقى النقط
اولا: الرسول عليه الصلاة والسلام كانت لكل زوجه من زوجاته شأنها ومالها مافيش مشكله مش كان بيقولها مافيش فرق بين الرجل ومراته وياخد من فلوسها عادي او يخليها تصرف كده عادي
ده لما حب وهو مساااافر انه يستلف منها جمل استأذنها ومش بس كده وهى رفضضضضضضت . وهو زعل منها مش عشان هى عندها جمال منعتها منه هو عارف انها منعتها من صفيه غيره منها ونعتتها بالهوديه كمان مع انها كانت اسلمت ومع ذلك الرسول بعد ما خاصمها عفا عنها ما طلقهاش ولا هد الدنيا
ثانيا: لما صالحها اهدته جاريه يعنى برضه بعد الموقف ده ما زال معترف بمالها واملاكها ويقبل منها الهديه وهى لم تتنازل عن ثورتها لزوجها وقالتله بعد كده الى انت عايزه خده ومافيش فرق بينى وبينك على فكره احنا بنتكلم عن الرسول اشرف الخلق يارب نتكسف بقى كلمة مافيش فرق بين الرجل وزوجته دي مشطووووووبه
ولا سيما انها مش بتتقال لما تحب الزوجه تتصرف فى ممتلكات زوجها وامواله .لا بتتقال بس لما يكون هي بتدي لجوزها .
اما بقى حكاية انا مش راجل ولا ايه؟ الى بتتقال بمجرد ان الزوجه تشير مجرد اشاره ان لها مال دى بقى عز الاستهبال
لان ما حدش قال انها لما تساعدى فى المصاريف يبقى انت مش راجل لكن كمان ما حدش قال انك تنكر ده اطلاقا .
انا شوفت بنفسي بعض البيوت ماشيه ازاى واستغربت من الحال العجيب
هاقولكم مثال:واحد راح دور على عروسه واتجوزها وكانت بتشتغل وقالها ما تشتغليش شغلك ما يهمنيش
وهو فى الحقيقه رايح لها وعارف انا بتشتغل يعنى لو مش عايزها بتشتغل كان ممكن قال من الاول مش عايز دي اشوف غيرها
المهم بعدين هى قالت : ليه خساره
قالها :هو انتى يعنى بتاخدى كام ده مرتبك هايطلع نصه مواصلات ويبقوا ملاليم الباقي .
وفضل واخد موقف الى مش هامه فلوسها ولا عايزهم ولا يعنيه الامر وانه بيتفضل عليها ويسيبها تروح الشغل وتتبهدل ويطلع عينها وتموت فى نفسها كل يوم عشان تثبت انها غير مقصره فى بيتها عشان بتشتغل .
وبعدين هو ما بيجيبش سيرة مرتبها لكن هى بتصرفه فى البيت اكل وشرب ولبس مواصلات وقسط الثلاجه ووصل النور الى بيجى هو مش هنا وفاتورة التليفون الى هى بتدفعها وهى راجعه من الشغل وغيره وغيره.
وهو معاه مرتبه برضه بيصرفه بس بقى هما نفسهم يشتروا عربيه. فبيعمل دفتر فى البنك باسمه ويحوش فيه من مرتبه وبعدين بعد كام سنه يشتري عربيه من فلووووووووسه وطبعا باسمه !!!!
وهى تواااااااااصل الصرف على البيت بما فيه نفسها الى هو اصلا المفروض ان يصرف هو عليه .
ده غير انه طول عمرها لو حبت تشتري حاجه من فلوسها لازم تتحايل عليه يوافق لانه اصلا مش معترف ان لها فلوس هى بس بتصرف الفلوس ويقولك بكل فخرررررررر: انا مراتي بتشتغل من 30 سنه عمري ما خدت منها مليم ولا اعرف حاجه عن مرتبها .
طبعا اكيد مش بيلحق يشوفه ولا هى كمان يا عينى بتلحق تشوفه ولما يسلف صاحبه الي هو اكل عليه الفين جنيه قبل كده كانوا محوشنهم عشان يجيبوا غساله اتوماتيك تريحها وجابتها هى بالقسط من مرتبها.
قامت القيامه لما قالتله: تاااااني هاتسلف صاحبك الى اكل فلوسنا قبل كده؟؟
يقولها : انتى ماااالك فلوسي وانا حر فيهاااااااااا ده على اعتبار ان مافيش فرق بين الرجل وزوجته
وحاااااااااااجه تفرس
وعليه فان بعد 30 سنه كل ممتلكات الاسره هاتكون باسم جوزها واي اشاره منها ان لها فلوس يقولها خلااااااااااص بقيت انا ماليش كلمه وبقى لك فلوس ما كانوش مليمين دول الى انتى بتقبضيهم ( ويمكن يكون مرتبها بقى اكبر منه )
لكن برضه هو مصمم انه لا يعنيه فلوسها الى صرفتها عليه وولاده ومافيش مانع بعد كده يتجوز عليها بمدخراته برررررررضه
ده مثال يا جماعه مش كل الناس كده وحقيقى مهم اوي ان الزوجه يكون لها ذمه ماليه منفصله وده عادي جدا جدا وحتى لو كانت مش موظفه ومالهاش مصدر للمال وحتى لو كان مصدر مالها الوحيد مثلا هدايا من زوجها فما دام هديه خرجت من ذمته الماليه الى ذمتها الماليه ومن حقها التصرف فيها . حتى انه لو حصل خلع المسترد للزوج هو المهر فقط مش الهدايا .
وعموما انا مش شايفه ابدا ان ده ينقص من رجوله الشخص بالعكس ده يزيد منهاوالمفروض ان النساء العاملات الى بيتعتبروا ان مافيش فرق بين الرجل وزوجته يتقاسموا ممتلكات الاسره المستجده بعد الزواج مع الزوج مش استهبال هو.
وكمان من حقها اتخاذ قرارتها بشأن المال ده فى مساحه من الحريه لقرارتها خصوصا لو كانت بعيده عن الاسره يعنى لو واحده حبت تشتري مثلا ارض اظن ده قرار من حقها تاخده هو مالوش دخل الا بالنصيحه والمحبه انما عافيه لا.
وهافضل اقول طول عمري ما ضاع حق وراؤه مطاااااااالب الى لها حق تاخده قبل ان تصبح تضحيتك حق مكتسب لغيرك
وبعدين الحق حبيب الله وان كنت اخوات اتحاسبوا وان كنتم ازواج برضه اتحاسبوا . اتحاسبوا حساب حبايب ايه المشكله ؟؟؟!!!!
الانجليزى مافيش احسن منه .ولو انه فى الحقيقه مش انجليزى ولا حاجه ده لب الدين والشرع عندنا الوضوح وتحديد الحقوق والواجبات .
وعايزه رايكم واسفه للاطاله بس الى فى داء الرغي بقى وبعدين الموضوع خطيييييييييييييييييييييير

هناك 24 تعليقًا:

mony يقول...

ياسلاااااااام
بجد انا اول تعليق


علي فكرة انا اعرف ناس كتيييير بالمنظر ده

لاء و ايه دا في ناس اصلا لما تتجوز لازم يدور علي اي حاجة يشتريها علشان ياخد الشبكة و يبيعها و لما الست المدام ترفض يقولها
ايييييييه
مش انا اللي جايبها


و لو بتشتغل و بتودي الاولاد حضانة يبقي لازم هي اللي تكع مصاريف الحضانة علشان آل ايه لو قعدت في البيت هتوفر مصاريف الحضانة


والادهي و الامر انا اعرف واحد بيغصب علي مراتة تحط مرتبها كله في حساب بأسمه في البنك و هو تعطف عليها و عملها توكيل تسحب بيه لو حصل و حبت تسحب فلوس (اللي هي اصلا فلوسها)


ربنا يسترها علينا و علي ولايانا ياختشي

واحدة مفروسة يقول...

مالحقتش ابقى الأولى
ههههههههههههههههههههههه
النمتزج اللي زي كده كتير فى البلد
و على قفا من يشيل
بس بجد بقى لو الرجاله كلهم و المتدينين....يح\وا ح\و رسولنا الكريم
و الله الدنيا ديه حتختلف

محمد فوزي يقول...

موضوع هايل ,,

الحقيقه إن في أمور كتير أصبحنا ننظر لها بحساسيه فرضتها علينا الأعراف مش الدين ,

بمعنى إن الحاجات دي بتكون حلال لكن في نفس الوقت إحنا بنسميها عيب !!

عندك مثلا القصه اللي حكتيها , هي نوع من الإلتفاف الصريح والخداع النفسي , يعني الراجل بيتكسف من جواه إن مراته تساعده فيقوم عشان يرفع عن نفسه حرج العيب يصور لنفسه ولمراته وللمجتمع إن مفيش فرق بين الراجل ومراته وبالتالي دي متعتبرش مساعده ده مفيش فرق وبتاع !!
وكمان عشان وقت اللزوم ميترتبش لها حقوق لأجل المساعده دي حتى ولو معنويه

ولنتذكر جميعا آيه الدين (من الديون ) في القرآن الكريم

تحياتي

صبرني يارب يقول...

مفروسه

موني سبقتك المره دي نورتي يا جميل وفعلا سيرة الرسول مع زوجاته مدرسه للحياه الزوجيه

صبرني يارب يقول...

موني

نورتي يا جميل

للاسف هى دي الحقيقه وهو ده الواقع لكن هانقول ايه ماهم الارجله لاقين ستات يوفقوا على كده
احنا بنهدي النفوس يعنى

صبرني يارب يقول...

محمد فوزي

اتشرفنا بحضرتك جدا ونورتنا ودايما يارب

ماهو كل واحد لازم يخلي عنده داما اسبابه الى تخليه يشعر بالتوازن فى الحياه .

فهما بيقنعوا نفسهم بحاجه كان نفسهم فيها .

Appy يقول...

عارفه انا فعلا بضايق لما اسمع الكلمه دى
بس فيه ناس يا قمر اليومين دول عادى ان مراتهم هى اللى تصرف فى كل حاجه على البيت وحتى بيستنطعوا جدا فى الموضوع ده وانا متأكده من كده لان بعض صحباتى كده
الحياة بقت متلخبطه

على جنب حمد لله على سلامه محمد

صبرني يارب يقول...

آبي نورتيييي

والله انا باقول برضه ان الرجاله بدأوا ينقرضوا ؟؟؟

مش عارفه امال الى ماشيين فى الشارع دول ايه ؟

ومحمد ادعوله لانه دخل المستشفى تاني ربنا يشيل عنه يارب

FaceMoon يقول...

ياريت كل الناس تقتدى برسولنا الكريم والله كان حالنا اتعدل لان كل واحد بقى يطلع قوانين من دماغة وعادات وتقاليد معرفش مين اللى حطها بس الزواج مشاركة فى كل حاجة ومافيش مانع ان كل واحد فيهم سواء الزوج او الزوجة يحاول يرتقى بالحياة ويساعد فيها على اد ما يقدر ودة مش عيب ولا حرام
وحشتينى خالص
موضوع جميل كالعادة
تحياتى

صبرني يارب يقول...

فيس مووووون

تصدقى انتى بنت حلال وربنا انا بافتح الصفحه واقول بقالي كتير ما روحتش عند فيس مون وحشتنى هابص على المدونه عندي واروحلها .

نورتي يا جميل

انا مش ضد المشاركه بس يكون الامور واضحه وكل واحد عارف هو بيشارك بايه والطرف التاني بيشارك بايه كمان
مش يبقى استهبال انا دايما اقول الحق حبيب الله

موناليزا يقول...

فعلا موضوع خطير وانتشر جدا
لا وممكن كمان يقوللها ماليش دعوة بفلوسك وهو لابيصرف عليها ولا هى تمتلك فلوس من اصله
بس هتقولى لمين ده طبع

صبرني يارب يقول...

موناليزا

نورتي المدونه وصاحبتها حبيبتى

ماهو ده بيحصل عشان مافيش حد عارف حقوقه وواجباته

ومن الاول هى غلطانه انها ما رفضتش الوضع وقالتله لا اعرف يا باشا انى انا مسؤله منك حتى لو كنت باشتغل

نورتي

Desert cat يقول...

اصدقائى الأعزاء المدونين والمدونات
تمت اليوم إذاعة باقى اجابات سؤال السيارة الطائرة فى برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
من زوارنا الكرام التى تمت اذاعة اجابتهم
مدحت محمد
كشكول المورق
صبرنى يارب
ام احمد المصرية
غمض عينك
جيهان على
امل
روفى
حاجات جوايا
الطائر الحزين
عبده الرايق
يمكنكم الآن سماع الحلقة من البوكس يسار المدونة
http://netonradio.blogspot.com
او من خلال الموقع
http://dear.to/cairo
تمنياتنا بدوام التواصل

Darsh يقول...

معاكي بالطبع في كل كلمة قولتيها

انا مش شايف اي مشكلة ان الزوجة يكون ليها فلوسها و مالها الخاص

و مش مشكلة لما جوزها يعرف برضوا هي فلوسها ايه و هي تعرف هو فلوسه ايه

مش هيحسدها و لا هتحسده مثلا هيخبوا من بعض

صبرني يارب يقول...

ديزرت كات ماليش دعوه انا ما قلتش كده يا ستى
هههههههههههههههه شكرا يا ديزارت

صبرني يارب يقول...

درش
نورت اولا
والله يا درش حكاية يعرفوا معاهم كام دي مش موضوعنا ولو ان الحكايه مش مستاهله

والوضع الطبيعى انهم يكونوا واضحين مع بعض وبينهم حاجات حلوه ما تسمحش انهم يخبوا على بعض مالية بعض

لكن فى الاول وفى الاخر فى مساحه من الحريه الشخصيه لازم كل واحد يحترمها للطرف التاني

صبرني يارب يقول...

واعذروني يا جماعه لو اتأخرت عليكم في الردود وفي زيارة حبايبنا فى المدونات التانيه لان انا ما عنديش كمبيوتر حاليا فى عملية احلال وتجديد

وعلى اد ما اقدر هابقى اجي ازوركم من عند بابا زي دلوقتي كده

حبيبـــــــة القمـــــر يقول...

سلام عليكم
عجبني اوي استشهادك بموقف رسولنا الكريم عليه الصلاة والسلام
بس خلينا نتكلم بالعقل كده
انتي شايفه ان الرجاله في الاساس بتطبق اسلوبه وطريقتة في التعامل مع المرأة بوجه عام
عشان تطبقها في اهم حاجه عندهم وهي الفلوس

طبعا لأ

وللحياديه اقول ان يمكن بعض الازواج بترفض عمل المرأة من الاساس
عشان ميحصلش تقصير من الزوجه في البيت
ودا مش عيب طبعا

وعشان كمان مش تيجي الست في يوم تقول دي فلوسي وانا اللي عملتك وانا اللي بنيت البيت وانت معملتش حاجه وفين مرتبك اساسا اللي يادوب بيكفي طلبات البيت
ودا غالبا لأنها بتحتفظ بمرتبها كامل مكمل في دفتر توفير او بتشتري بيه دهب

مش ننكر ان اسلوب المراة من اسباب تصرف الرجل بالطريقه دي
وانا شفت نماذج لستات ربنا يهديهم يارب بتتحكم في الراجل لمجرد ان مرتبها زاد عن مرتبه والتصرف دا بيخليه يكره انه فكر يوم يسيبها تشتغل


وزي مافيه نماذج بتسئ لكل ست عامله فيه نماذج بتبقى مفخره بجد خصوصا لما الست بتعرف تتعامل بذكاء مع الراجل عشان تبقي فيه حدود مقننه بين مرتبها ومرتبه واحتياجات البيت القائم اساسا على المشاركه
بتلاقيها هي اللي بتمشي السفينه مع اقرارها ان الربان هو الزوج

شكلي اتعديت ورغيت كتير هههههههههههههههههه
اسفه للاطاله
لكي تحياتي وتمنياتي بدوام الرغي والتواصل
حفظك الله

صبرني يارب يقول...

حبيبة القمر

نورتي اولا يا حبيبة

انا طبعا عارفه ان النوعيات دي موجوده ومش بس عشان فلوسها
لا وحياتك من فلوسه كمان

وتلاقيها بكل صفاقه عايزه الشقه باسمها والارض باسمها والعربيه باسمها
بدون اي مبرر او دعوى

لكن زي ما دايما اقول انا باناقش الوضع العام او السائد او الى اكثر شيوعا .

والاكثر شيوعا فى مجتمعنا هو وضع المراه دايما فى الظل واجبارها على التنازل عن حقوقها
بس على شرط يكون ده برضاها .
يعنى تكون هى بتتنازل وتقول عشان بيتى وعشان وعشان وعشان

لكن حقيقة الامر انه اجبار اجتماعي متفق عليه من الجميع لو حصل وفكرت الست تقول حقي وما افرطش فيهشي؟؟؟

تقوم الدنيا وما تقعدش

نورتي يا حبيبه واهلا بك فى موطن الرغي الاساسي انتى ترغي زي ما تحبي .

وعلى فكره انتم واحشني اوي اوي ونفسي ا جي ارغي معاكم بس مستحيل فى الوضع الحالي .

جنّي يقول...

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

عبده الرايق يقول...

انا جيت اسأل عنك
لان غيابك عن الضاحكون طال
ياترى فى مشكله ولا ايه ؟؟
ارجو لو فى اى حاجه ارسال اميل لى او لفرنسا او تكتبى ماتريدين فى الدرافت
احنا برضه لازم نسأل على اولادنا

صبرني يارب يقول...

جني نورت

اوعدك لو عرفت اجي ازورك هاجي ان شاء الله واجازه سعيده

صبرني يارب يقول...

رايق
تسلم يارب ما اتحرمش من سؤالكم عليا يا بابا

انا روحت هناك النهارده فى الضاحكون ومتشكره اوي بجد على السؤال

amr fadl يقول...

الحقيقة لازم يكون لها ذمة مالية منفصلة ده مالوش علاقة بالزواج ده له علاقة بكونها بشر وليها حقوق مش تابع ولا نص كائن حي وبعدين لمصلحة الأولاد لو جراله حاجة ان يبقى عندها ذمة مالية خاصة تصرف عليهم