الخميس، 25 سبتمبر 2008

القرش الحرام ما بينفعش يا بوي

سلام عليكم

ازيكم يا قوم طبعا على ما خلصت الكحك كنتم انتم افتكرتم ان الكمبيوتر بتاعي فرقع فى وشي . لا انا لسه عايشه ولله الحمد. وكل سنه وانتم طيبين .

بصراحه مش محدده انا هارغي عن ايه . انتم عارفين احنا فى رمضان ومش عايزين غيبه بقى وكده يعنى بس عادي ممكن نرغي فى موضوع تاني .

مش عارفه انا هاقوم اعمل اصابع زينب تحبوا اقولكم الطريقه . اهو نتكلم فى الاكل بدل ما نجيب سيرة الخلايق .
اه كان فى سؤال قعدت افكر فيه امبارح لما اقولهولكم شاركوني الاجابه .

السؤال : هو الناس الى بتسرق ولا بترتشي ولا اي كلام من ده ازاي بجد بيقولوا ربنا يستر ؟؟؟

أو يعنى بيبقوا متوقعين انهم بعد ما يعملوا كده مثلا عادي بقى الدنيا سايبه وربنا هايسيبهم كده عادي ؟؟
يعنى ده بيبقى عن جهل ولا عن استهبال .

رضا جه من يومين يحكيلى ان مش عارف حد راحله من جهه حكوميه مش فاكره اسمها .
وبدأوا تغليس بقى فيما معناه هاقرفك يا صغنن . وفى النهايه بقى طلبوا بكل بجاحه من رضا انه يعملهم كل واحد شنطه فيها حاجات لعيالهم عشان المدارس . هما كانوا كذا واحد اصلا .

يعنى بدل ما ينزلوا يعملوا شوبنج عشان المدارس قوم يرموا نفسهم على حد من التجار.

طبعا انا لما رضا قالي كالعااااده .
قلتله :وادييييييتهم ليه انت مش ورقك سليم ؟؟؟؟ خلاص ما تسألش عنهم .
لان ده مبدأي فى الحياه ما استسهلش الرشوه ابداااااا .

قوم رضا قالي : يا سلام على النباهه مش انا قلتلك انهم مجموعه . يعني لو اتفقوا عليا يعملولي محضر وممكن يلبسوني بلوى .

قلت اه فعلا عندك حق ما هو قليل الضمير بيبقى مش بس عايز يستفيد لا ده كمان بيبقى ما بين انه عايز يثبت لنفسه انه فوق الجميع وايده طايله وكمان ساعات باحس انهم بيأذوا الى يلاقوه نضيف زي ما يكون بيفكرهم بحقارتهم .

السؤال بقى الى دار فى دماغي ساعتها . هو الشخص ده الى جه سرق حاجات لابنه عشان يروح بها المدرسه .

مش خايف على ابنه كده ان عربيه تهفه وهو ماشي فى الشارع وشايل شنطه فلوسها حرام ؟؟؟

او بلاش كده . يوم لما ابنه يجي يمتحن هايرفع ايده لربنا ويقول ربنا يوفقك يا ابنى ازاي ؟؟؟

بلاش كده ولا كده . نجح الواد مش خايف جزاء لما فعل هو ابنه ده يدفع الثمن انه مثلا يتلم على صاحب سوء ويبوظه

ويخسر ابنه الى هو سرق عشانه ؟؟؟

نفس السؤال برضه دار فى دماغي وانا باتفرج على مسلسل قلب ميت اصل هو ده الى بالحق اتفرج عليه ساعة السحور

من اول المسلسل وانا مستنياهم يقولوا كلمه واحده ولسه عندي امل يقولوها . ان كل الى حصل للعيله دي ان دخل بيتهم فلوس حرام .

لكن لا ما حدش بيجيب سيرة الموضوع . ومصورين البطل على انه بريء جدا . مع انه الحقيقه انه صايع وبتاع قمار وخمرا ونصاب وحرامي .

واول قرش قبضه من النصب اعطى لاخوه منه عشان يروح رحله واخوه مات فى الرحله دي غرقان .

والبطل الى هو شريف منير قال انا الى اديته الفلوس بايدى عشان يروح الرحله .

كان املي فى الحياه ان كاتب السناريو يخلي شريف منير يقول عشان انا اديته فلوس حرام . لكن لا عادي جابوا بس ان الواد حاسس بالذنب عشان اخوه مات فى الرحله .

ما حدش يقولي ايه اهمية الكلمه دي لو اتقالت فى المسلسل . لان للاسفه القاعده العريضه من الشعب بتستمد معلوماتها وثقافتها من المسلسلات والافلام والاعلام بتاعنا . والى القائمين عليه ابعد ما يكون عن الدين والاخلاق اصلا .

شوفتوا بقى ادي اخرة الرغي ادينا غلطنا فى الناس واحنا صايمين يلا بقى كفايه كده عشان نلحق نعمل صوابع زينب
اشوفكم على خير يا كتاكيت

هناك 19 تعليقًا:

Sweet Violet يقول...

لا طبعا كل اللى انتى قولتيه دا ماحدش هايخاف منه عارفه ليه؟؟؟

لان خلاص قامت جنازة الضمير من عمر مكرم و انتهى خلاص قليل قوى لما تلاقى لسه فى ضمير عايش عنده

تفتكرى واحد ضميره مات او واخد تعسيله هايفكر فى اللى انتى قولتيه

اما موضوع المسلسل انتى جاوبتى بنفسك لان الشعب بقى ياخد الثقافه من الاعلام يبقى ازاى عايزاه يغضب الناس الحلوة؟؟؟

دا كلام برضه

المهم بقى سيبك من اللى فوق دا كله

فين طريقه صوابع زينب

ايه بتقولى ايه ؟؟؟

ياسلام على الكرم بتاعك هاتبعتيها بدل ماتعب واعملها ربنا يخليكى يارب

بس انا عايزة طازج D:

كل سنه وانتى طيبه

صبرني يارب يقول...

ضد التيار

عارف انا ساعات باقول لنفسي الكلام الى انت قولته ده

بس برضه باستغرب هما ازاي عايشين كده

واصابع زينب عنيه لك والله لو عايز الطريق

اما بقى لو عايز طبق يبقى انت داخل على طمع بس مش مشكله عنينا برضه

وانت طيب وبخير يارب
ونورت المدونه وصاحبتها واتشرفت بحضرتك

جنّي يقول...

السلام عليكم

للأسف والله دايما يصور البطل كما وصفتيه .. فهل هي وسيلة لغسل عقول الناس ..؟؟

تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

عايش... ولكن !!!! يقول...

ههه ياه تصدقى انى كنت نسيت ان فى حد لسه بيقول ع القرش حلال وحرام
الناس اللى ضميرها بيأنبها بقوا قليلين اوى

Appy يقول...

دول بيبقوا فاكرين انه حقهم كسر حقهم يا حبيبتى بس هو لازم يعمل محضر والله فيهم وميخافش المظلوم ربنا مهاه دايما
كل سنه وانتى طيبه يا رب

صبرني يارب يقول...

ضد التيار معلش يا اختي العتب على النظر ما خدتش بالي انك فيميل نورتي يا جميل

صبرني يارب يقول...

عايش ولكن

يمكن بقوا قليلين بس هايفضلوا موجودين ان شاء الله

صبرني يارب يقول...

جني
استاذنا نورتنا والله واشكرك

صبرني يارب يقول...

آبي

حبيبتى يعمل محضر لمين ويثبت ازاي ماهي دي المشكله
وبعدين للايف انهم بيحاربوا الناس فى اكل عيشهم
يعنى الناس بعد الشقى ده كله يلحقوا يعملوا ايه
يا آبي الناس كلها بقت مطحونه ومش عارفين يعيشوا حياتهم

حقيقى احنا بنحاول نحارب امثالهم بس اكيد هانحاول كمان ما نأذيش نفسنا
نورتي يا جميل
ومبروك النيو لوك

حسن حنفى يقول...

مش عارف بس بما انننا بعد الفطار بقي

:d

يبقي هم مش عندهم دم فعلا مش عارف ايه

ده الواحد يطلب كده !!!!!

سبحان الله

mayada يقول...

بصي يام مريم الناس دي مبتختشيش
ولافي دماغها حرام ولاحلال ولا الكلام ده
بصي احنا بنفرش صيدليه وكمان بعمل محل
اكسسري ومكياج صغنن كده اقسم بالله شفت اللي محدش شافه قله ادب وبجاحه وضمير غايب
وايامهم زي وشهم المهم الموظف من دول يكلمك كان الرشوه دي حقه اللي كفلها
له القوانين واما تعترضي يبقي بجح
وكانه بيقولك اشتكيني وانا وانت والاستاد طويل
لنا الله

صبرني يارب يقول...

الاخ حسن حنفي

ايوه والله ما عندهم دم بجاحه وعين واسعه

صبرني يارب يقول...

مياده

اه والله يا بنتى دي حقيقه فعلا عارفه يعنى بتوصل الامر احيانا الى تهديد مباشر بانه يقرفك لو ما اديتوش المعلوم
لنا الله

mohamed يقول...

سلام الله عليكم
أيوة الرشوة والشاىوالاسم القديم لها يرطله هى الوسيله للحصول على الحقوق
نظام الاداره هنا هو الى بيخلى الرشوة ممكنه
عارفه ليه
لان نظام الاداره بجعل نفسه فوق المواطن
ويخلى المواطن دايما فى حاله الغلط
مثال
هل رأيتى محافظه مثل الفاهرة او غيرها
تتطرح اراضى بوفرة اكتر من الطلب
للبناء رغم ان عندنا صحرا لاحدود لها
طبعا قله الاراضى يلزمها قرعه
طيب والى محصلش ارض
يعمل ايه
يبنى عشوائى
ويبقى الفرصه للرشوة
الخ
بجد
حاجه تقرف
تحياتى

صبرني يارب يقول...

الاخ محمد

والله العظيم واكتر من كده مش بس الى بيبنى عشوائي الى بيدي رشوه

لا والله الى بيرخص والى ماشي سليم بيدي رشاوي عشان يسبوه فى حاله

حسبنا الله ونعم الوكيل

mony يقول...

تقولي لمين يا صبرني

ما كل دول شحاتين زي اللي بنقابلهم في الشارع

بس الفرق ان بتوع الشارع بيطلبوا جنيه اتنين خمسة انما دول شحاتين بجحين شوي


طيب سيبكانت من دول


دلؤتي القانون الجديد بتاع العربيات و الناس بتوع المرور مظبتين الناس علي الاخر

و لما الراجل المسكين صاحب العربيه يطلب تصالح يقوم امين الشرطة يقوله ماشي
بس البيه عاوز كرت شحن ب200 جنيه


ولا الاكبر منهم
لو حد عاوز يشتغل في وظيفة يا يدفع يا اما مع السلامة و نشوف اللي يقدر يدفع


ولا الاكبر و الاكبر
و انت عارفة وانا عارفة


و هم مستحلين لنفسهم الفلوس ديه


شاطرين بس لما ربنا يبتليهم بمصيبة تشلهم كلهم ان شاء الله يعيطوا ويقولوا ليه كده يا رب انا عملت ايه علشان ده كله


سيبك انت

قوليلي بأه علي صوابع زينب علشان احطها عندي في المدونة الجديدة بتاعتي (مدام سلاموني) و هقول انها بأسمك
بس علي ضمانتك

ahmed_k يقول...

للأسف الشديد إنتشرت ثقافة الرشوه والمال الحرام كالنار في الهشيم
لدرجة أنه لا يمكن أن تنقضي أي مصلحه بدون دفع المعلوم
وبعد الدفع بتصبح الحياه وردي من غير أي كلاكيع
فحقا مقولة من أنفسكم سلط عليكم
فلولا أن حال الشعب مش تمام ما كان سلط الله علينا من يسرق البلد أمام أعيننا وبكل بجاحه
ربنا يسترها من عنده

وكل سنه وأنتي طيبه يا أم مريم وأسرتك الكريمه بمناسبة عيد الفطر

وعيدكم مبارك قصدي سعيد

صبرني يارب يقول...

استاذنا احمد لا فض فوك

ونورتنا وكل سنه وانت بالف خير وسلامه يارب

صبرني يارب يقول...

موني عندك حق فعلا

وصوابع زينب اسكتي على الي جرالها

لا لا طلعت مش عاجباني خالص انا كنت اول مره اعملها هما قالولي انها مش بطاله بس مش عجبتني

حاولت احولها الى معمول بالتمر برضه طلع وحش
اردمي على دي ومبروك على المدونه الجديده
وعنيه ليكى لو عايزه اي مساعده
ان ااصلا نفسي اعمل مدونة طبخ
بس نفسي انزلها بالصور
هاجيلك هناك ان شاء الله نشوف ايه الموضوع .