القرش الحرام ما بينفعش يا بوي

سلام عليكم

ازيكم يا قوم طبعا على ما خلصت الكحك كنتم انتم افتكرتم ان الكمبيوتر بتاعي فرقع فى وشي . لا انا لسه عايشه ولله الحمد. وكل سنه وانتم طيبين .

بصراحه مش محدده انا هارغي عن ايه . انتم عارفين احنا فى رمضان ومش عايزين غيبه بقى وكده يعنى بس عادي ممكن نرغي فى موضوع تاني .

مش عارفه انا هاقوم اعمل اصابع زينب تحبوا اقولكم الطريقه . اهو نتكلم فى الاكل بدل ما نجيب سيرة الخلايق .
اه كان فى سؤال قعدت افكر فيه امبارح لما اقولهولكم شاركوني الاجابه .

السؤال : هو الناس الى بتسرق ولا بترتشي ولا اي كلام من ده ازاي بجد بيقولوا ربنا يستر ؟؟؟

أو يعنى بيبقوا متوقعين انهم بعد ما يعملوا كده مثلا عادي بقى الدنيا سايبه وربنا هايسيبهم كده عادي ؟؟
يعنى ده بيبقى عن جهل ولا عن استهبال .

رضا جه من يومين يحكيلى ان مش عارف حد راحله من جهه حكوميه مش فاكره اسمها .
وبدأوا تغليس بقى فيما معناه هاقرفك يا صغنن . وفى النهايه بقى طلبوا بكل بجاحه من رضا انه يعملهم كل واحد شنطه فيها حاجات لعيالهم عشان المدارس . هما كانوا كذا واحد اصلا .

يعنى بدل ما ينزلوا يعملوا شوبنج عشان المدارس قوم يرموا نفسهم على حد من التجار.

طبعا انا لما رضا قالي كالعااااده .
قلتله :وادييييييتهم ليه انت مش ورقك سليم ؟؟؟؟ خلاص ما تسألش عنهم .
لان ده مبدأي فى الحياه ما استسهلش الرشوه ابداااااا .

قوم رضا قالي : يا سلام على النباهه مش انا قلتلك انهم مجموعه . يعني لو اتفقوا عليا يعملولي محضر وممكن يلبسوني بلوى .

قلت اه فعلا عندك حق ما هو قليل الضمير بيبقى مش بس عايز يستفيد لا ده كمان بيبقى ما بين انه عايز يثبت لنفسه انه فوق الجميع وايده طايله وكمان ساعات باحس انهم بيأذوا الى يلاقوه نضيف زي ما يكون بيفكرهم بحقارتهم .

السؤال بقى الى دار فى دماغي ساعتها . هو الشخص ده الى جه سرق حاجات لابنه عشان يروح بها المدرسه .

مش خايف على ابنه كده ان عربيه تهفه وهو ماشي فى الشارع وشايل شنطه فلوسها حرام ؟؟؟

او بلاش كده . يوم لما ابنه يجي يمتحن هايرفع ايده لربنا ويقول ربنا يوفقك يا ابنى ازاي ؟؟؟

بلاش كده ولا كده . نجح الواد مش خايف جزاء لما فعل هو ابنه ده يدفع الثمن انه مثلا يتلم على صاحب سوء ويبوظه

ويخسر ابنه الى هو سرق عشانه ؟؟؟

نفس السؤال برضه دار فى دماغي وانا باتفرج على مسلسل قلب ميت اصل هو ده الى بالحق اتفرج عليه ساعة السحور

من اول المسلسل وانا مستنياهم يقولوا كلمه واحده ولسه عندي امل يقولوها . ان كل الى حصل للعيله دي ان دخل بيتهم فلوس حرام .

لكن لا ما حدش بيجيب سيرة الموضوع . ومصورين البطل على انه بريء جدا . مع انه الحقيقه انه صايع وبتاع قمار وخمرا ونصاب وحرامي .

واول قرش قبضه من النصب اعطى لاخوه منه عشان يروح رحله واخوه مات فى الرحله دي غرقان .

والبطل الى هو شريف منير قال انا الى اديته الفلوس بايدى عشان يروح الرحله .

كان املي فى الحياه ان كاتب السناريو يخلي شريف منير يقول عشان انا اديته فلوس حرام . لكن لا عادي جابوا بس ان الواد حاسس بالذنب عشان اخوه مات فى الرحله .

ما حدش يقولي ايه اهمية الكلمه دي لو اتقالت فى المسلسل . لان للاسفه القاعده العريضه من الشعب بتستمد معلوماتها وثقافتها من المسلسلات والافلام والاعلام بتاعنا . والى القائمين عليه ابعد ما يكون عن الدين والاخلاق اصلا .

شوفتوا بقى ادي اخرة الرغي ادينا غلطنا فى الناس واحنا صايمين يلا بقى كفايه كده عشان نلحق نعمل صوابع زينب
اشوفكم على خير يا كتاكيت